ᐃᓄᐃᑦ ᓄᓇᖓᑦ ᐊᑐᐊᒐᖅ

Version Inuktut Qaliujaaqpait (PDF, 927 KB, 13 pages)

ᑖᓐᓇ ᐊᑐᐊᒐᖅ ᐊᑐᕐᒃᑕᐅᓗᓂ ᒐᕙᒪᒃᑯᑦ ᑲᓇᑕ ᐱᓇᓱᒃᕕᖏᓐᓂ ᐊᒻᒪᓗ ᐃᖃᓇᐃᔭᕐᕕᐅᔪᓂ, ᑐᑭᒧᐊᒍᑕᐅᓗᓂ ᐊᕿᒃᓯᒪᓂᖓᓂᒃ, ᐱᕙᓪᓕᐊᓂᖓᓂᒃ ᐊᒻᒪᓗ ᐊᑐᓕᕐᑎᑕᐅᓂᖓᓂᒃ ᑕᒪᕐᒥᒃ ᓄᑕᑦ ᓄᑕᖑᕐᑎᕐᑕᐅᔪᓪᓗ ᒐᕙᒪᒃᑯᑦ ᑲᓇᑕ ᐊᑐᐊᒐᖏᑦ, ᐊᐅᓚᓂᖏᑦ,ᐱᔨᓯᕐᓂᖏᑦ ᐊᒻᒪᓗ ᐱᒋᐊᕐᑎᑕᐅᔪᑦ ᐊᑐᕐᑕᐅᓂᐊᕐᑐᑦ ᐃᓄᐃᑦ ᓄᓇᖓᑦ ᐊᒻᒪᓗ/ᐅᕝᕙᓘᓐᓃᑦ ᐱᕙᓪᓕᐅᑕᐊᓂᐊᕐᑐᑦ ᐃᓄᐃᑦ, ᐱᖃᓯᐅᑎᓗᒋᑦ ᐊᐅᓚᑕᐅᔪᑦ ᐊᑐᕐᑕᐅᔪᓪᓗ, ᐊᒻᒪᓗ ᐃᑲᔪᑕᐅᓗᑎᒃ ᐃᓄᐃᑦ ᓇᖕᒥᓂᖅ−ᐱᓇᓱᒃᓂᖏᑦ. ᐱᔪᑎᒋᔭᖓ ᐊᑐᐊᒐᖅ ᐱᑕᖃᓕᕐᑎᑦᑎᓇᓱᒃᓗᓂ ᐊᔪᕐᓴᖏᓐᓂᕐᒥᒃ ᐊᒻᒪᓗ ᐃᑲᔪᕐᑕᐅᓗᑎᒃ ᓄᓇᓕᑦ ᐊᒻᒪᓗ ᐃᓄᑐᐃᓐᓇᐃᑦ ᖃᓄᐃᖏᑦᑎᐊᕐᓂᖏᓐᓄᑦ ᐃᓄᐃᖅ ᓄᓇᖓᑦ ᓄᓇᖃᕐᑐᑦ ᑐᕋᒐᖃᕐᓗᑎᒃ ᐃᓄᓯᓕᕆᓂᒃᑯᑦ−ᑭᓇᐅᔭᓕᕆᓂᒃᑯᓪᓗ ᐊᒻᒪᓗ ᐃᓕᖁᓯᓕᕆᓂᒃᑯᑦ ᓇᓂᒧᒋᒥᒃ ᐃᓄᐃᑦ ᑲᓇᑕᒥᐅᓪᓗ.

1. ᐃᓄᐃᑦ ᐊᒻᒪᓗ ᐃᓄᐃᑦ ᓄᓇᖓᑦ

1.1.
ᐃᓄᐃᑦ ᐊᔾᔨᐅᖏᑦᑐᒥᒃ ᐱᔪᓐᓇᐅᑎᖃᕐᒪᑕ−ᑎᒍᒥᐊᕐᑎᐅᓪᓗᑎᒃ ᓄᓇᖃᕐᖃᕐᓯᒪᔪ ᐃᓄᐃᑦ ᓇᖕᒥᓂᖅ ᐃᓄᓯᖃᕐᓂᑯᓪᓗᑎᒃ, ᓇᓗᓇᐃᒃᑯᑕᖃᕐᖢᑎᒃ, ᐃᓕᖁᓯᖃᕐᖢᑎᒃ (ᐱᖃᓯᐅᑎᓪᓗᒍ) ᐅᖃᐅᓯᖓ) ᐊᒻᒪᓗ ᐃᓄᓯᖓ. ᑎᑎᕋᕐᓯᒪᔪᓂ ᐃᓚᖓᓂ 35 ᑲᓇᑕᒥ ᑐᖓᕕᐅᔪᖅ ᓇᓗᓇᐃᕐᓯᓯᒪᖕᒪᑦ ᐱᖓᓱᓂᒃ ᐊᔾᔨᐅᖏᑦᑐᓂᒃ ᐅᖃᐅᓯᖃᕐᓂᕋᐃᓪᓗᑎᒃ ᓄᓇᖃᕐᖃᕐᓯᒪᔪᑦ− ᐊᓪᓚᐃᑦ, ᐃᓄᐃᑦ, ᐊᓪᓚᖓᔪᓪᓗ− ᓇᖕᒥᓂᖅ ᐊᑐᓂ ᐱᒋᐊᕐᕕᖃᕐᑐᑦ, ᓇᓗᓇᐃᒃᑯᑎᖃᕐᑐᑦ ᐊᒻᒪᓗ ᑭᒐᕐᑐᕐᑕᐅᓂᖏᑦ. ᐊᓪᓚᐃᑦ ᐱᖁᔭᖏᑦ, 1985 ᐊᑐᑎᖃᖏᑦᑐᖅ ᐅᑯᓄᖓ ᐃᓄᐃᑦ. ᑕᕗᓇ ᐃᓄᐃᑦ−ᑯᐃᓐ ᐸᓐᓇᒋᖕᓂᒃᑯᑦ ᑲᑎᒪᔨᖏᑦ, ᒐᕙᒪᒃᑯᑦ ᑲᓇᑕ ᐊᒻᒪᓗ ᐃᓄᐃᑦ ᓄᑕᐅᓯᒋᐊᕐᒪᑕ ᐱᓇᓱᖃᑎᒋᖕᓂᕐᒥᒃ ᒪᓕᒃᓗᒋᑦ ᐃᓕᓴᕆᔭᐅᓯᒪᓂᖏᑦ ᐱᔪᓐᓴᐅᑎᖏᑦ, ᐃᒃᐱᒋᔭᐅᓂᖏᑦ, ᐃᑲᔪᕐᑎᒋᖕᓂᒃᑯᑦ, ᐊᒻᒪᓗ ᐸᓐᓇᒋᖕᓂᒃᑯᑦ ᐃᓚᒋᓪᓗᓂᐅᒃ ᑐᕋᒐᐅᔪᑦ ᐃᓗᐊᕐᓯᖃᑎᒋᖕᓂᕐᒧᑦ.
1.2.
ᐃᓄᐃᑦ ᓄᓇᒋᔭᖓ, ᐃᓄᐃᑦ ᓄᓇᖓᑦ, ᐊᖏᓂᖃᕐᑎᒋᖕᒪᑦ ᐅᑭᐅᕐᑕᕐᑐᐃᑦ ᕿᑭᕐᑕᐃᑦ ᑕᕆᐅᕐᒥᓗ. ᐱᔾᔪᑎᒋᓪᓗᒍ ᐊᑐᐊᒐᖅ, ᑭᒃᓕᖓ ᐃᓄᐃᑦ ᓄᓇᖓᑦ ᐊᔾᔨᒋᔭᐅᕗᑦ ᐃᓄᐃᑦ−ᑯᐃᓐ ᐊᖏᖃᑎᒋᒍᑎᖏᑐᑦ ᐊᒻᒪᓗ ᓇᖕᒥᓂᖅ ᐊᐅᓚᑦᑎᓂᕐᒧᑦ ᐊᖏᖃᑎᒋᒍᑎᑦ ᑲᓇᑕᒥ, ᐅᖓᑕᓂ 51 ᓄᓇᓕᑦ ᐊᕕᒃᑐᕐᓯᒪᔪᑦ ᑎᓴᒪᐅᓕᖓᓪᓗᑎᒃ ᐃᓄᐃᑦ ᓄᓇᓕᖃᕐᕕᖏᑦ: ᐃᓄᕕᐊᓗᐃᑦ ᓄᓇᑕᕆᓯᒪᔭᖓ, ᓄᓇᕗᑦ, ᓄᓇᕕᒃ ᐊᒻᒪᓗ ᓄᓇᑦᓯᐊᕗᑦ (ᐊᔾᔨᓐᖑᐊᖅ 1 ᐊᒻᒪᓗ ᐃᐅᒍᖓ 1). ᑲᑎᓪᓗᒋᑦ ᐅᑯᐊᖑᔪᑦ ᐱᖓᓱᐃᓕᓗᒍ ᐃᓚᖓᑦ ᐱᖓᔪᖓ ᐊᖏᑎᒋᓂᖓ ᑲᓇᑕᐅᑦ ᓄᓇᖁᑎᖓᓂᑦ, ᐅᖓᑖᓂ ᐊᕙᓪᓗᐊᖓᑕ ᓯᒃᔭᖓᓂᑦ, ᐊᒻᒪᓗ ᑕᕆᐅᕐᒥ ᐊᖏᓚᖑᓪᓗᓂ, ᐱᖃᓯᐅᑎᓪᓗᒍ ᓄᓇᒧᐊᖓᔪᖅ ᑐᕙᖅ, ᓄᓇᒥᑦᑐᑦ ᑕᓯᑦ ᐊᒻᒪᓗ ᓴᕙᓯᒃᑐᒥ ᑕᕆᐅᕐᒥ.
1.3.
ᐃᓗᐊᓂ ᐃᓄᐃᑦ ᓄᓇᖓᑦ, ᑕᓪᓕᒪᐅᔪᑦ ᐊᖏᖃᑎᒌᒍᑎᑦ (ᑕᐃᔭᐅᖕᒥᔪᑦ ᓄᓇᑕᕈᑎᑦ ᐊᖏᖃᑎᒋᒍᑎᑦ, ᑕᕙᓂ ᑕᐃᔭᐅᔪᑦ "ᐃᓄᐃᑦ−ᑯᐃᓐ ᐊᖏᖃᑎᒋᒍᑎᖏᑦ") ᐊᑐᕐᑕᐅᔪᑦ, ᐃᓚᖓᑦ ᐱᖃᓯᐅᑎᓯᒪᔪᖅ ᓇᖕᒥᓂᖅ ᐊᐅᓚᑦᑎᓂᕐᒧᑦ ᒐᕙᒪᐅᓗᑎᒃ, ᐃᓄᐃᑦ ᐊᒻᒪᓗ ᑯᐃᓐ: ᐃᓄᕕᐊᓗᐃᑦ ᑭᖑᓪᓕᕐᐸᖓᓂ ᐊᖏᖃᑎᒋᒍᑎ, ᓄᓇᕗᑦ ᐊᖏᖃᑎᒋᒍᑎ, ᔭᐃᒻᔅ ᐸᐃ ᐊᒻᒪᓗ ᐅᐊᖕᓇᖓᓂ ᑯᐱᒃ ᐊᖏᖃᑎᒋᒍᑎ, ᓄᓇᕕᒃ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒋᒍᑎ, ᐊᒻᒪᓗ ᓚᐸᑐᐊ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒋᒍᑎ. ᐊᓯᖏᓐᓂᒃ ᑎᑎᕋᕐᓯᒪᔪᖃᐅᕐᑎᓪᓗᒍ ᐅᑯᐊᑦᑕᐅᖅ ᑎᑎᕋᕐᓯᒪᔪᑦ ᓇᓗᓇᐃᕐᑕᐅᓪᓗᑎᒃ ᐃᓄᐃᑦ ᐱᒧᓐᓇᐅᑎᖏᑦ ᓄᓇᒧᑦ, ᓄᓇᒥᒐᕐᑐᓂᒃᓗ ᐊᒻᒪᓗ ᓇᓗᓇᐃᕐᓯᓯᒪᓪᓗᑎᒃ ᐊᐅᓚᑦᑎᓂᕐᒥᒃ ᒐᕙᒪᐅᓂᕐᒥᒃ, ᐱᖃᓯᐅᑎᓗᒍ ᐊᖏᖃᑎᒋᒍᑎ ᐱᔭᕆᐊᖃᕐᑐᑦ ᐊᒻᒪᓗ ᑐᕋᒐᐅᔪᑦ, ᓇᓗᓇᐃᕐᓯᒪᓪᓗᑎᒃ ᐊᑐᓂ ᑎᓴᒪᐅᔪᑦ ᐃᓄᐃᑦ ᓄᓇᒋᔭᖏᓐᓂ, ᐱᖃᓯᐅᑎᓪᓗᒍ ᐃᑲᔪᕐᑎᒋᒃᓗᑎᒃ ᐊᐅᓚᑦᑎᖃᑎᒋᒃᓗᑎᒃ, ᐃᓄᖕᓄᑦ ᑭᒐᕐᑐᐃᓂᖅ ᒐᕙᒪᐅᔪᑦ, ᐊᒻᒪᓗ ᓇᖕᒥᓂᑦ ᐊᐅᓚᑦᑎᓂᕐᒥᒃ ᒐᕙᒪᐅᓂᖅ. ᑕᓐᓇ ᐊᑐᐊᒐᖅ ᐱᒋᐊᕐᕕᖃᕐᐳᖅ ᑐᖓᕕᒋᓪᓗᒍ ᑲᓇᑕᐅᑉ ᐃᒃᐱᒍᓱᖕᓂᖓ ᐱᔪᓐᓇᐅᑎᓂᒃ ᐊᒻᒪᓗ ᐊᐅᓚᑦᑎᓂᕐᒥᒃ ᒐᕙᒪᐅᓗᓂ ᐊᒻᒪᓗ ᐊᒃᑐᐊᔪᑦ ᐃᓄᐃᑦ ᑭᒐᕐᑐᐃᓪᓗᑎᒃ ᑎᒥᐅᔪᑦ ᐃᓚᐅᖃᑕᐅᔪᑦ, ᐃᓕᓴᕆᔭᐅᓗᑎᒃ ᐱᑕᖃᐃᓐᓇᕐᓂᐊᕐᓂᖏᓐᓂᒃ ᒪᓕᒃᓗᒋᑦ ᐱᓯᒪᐃᓐᓇᕐᑕᖓ ᐱᔪᓐᓇᐅᑎᖓ ᐃᓄᐃᑦ ᓇᖕᒥᓂᖅ−ᐱᓇᓱᒍᓐᓇᕐᓂᖏᑦ.
1.4.

ᐊᑕᐅᓯᖅ ᐃᓄᐃᑦ ᐊᖏᖃᑎᒋᒍᑎᖓ ᑎᒥᐅᔪᖅ ᐅᕝᕙᓘᓐᓃᑦ ᒐᕙᒪᐅᔪᖅ ᓇᓗᓇᐃᕐᑕᐅᓯᒪᒋᓪᓗᓂ ᐃᓗᐊᓂ ᐃᓄᐃᑦ−ᑯᐃᓐ ᐊᖏᖃᑎᒋᒍᑎ,Footnote 1 ᑎᑎᕋᕐᓯᒪᓂᖓ ᑕᑯᓗᒍ ᐊᑕᓂ:

  • ᐃᓄᕕᐊᓗᐃᑦ ᓄᓇᓕᒐᓚᖃᕐᕕᐅᔪᓂ ᑯᐊᐳᕆᓴᓐ (ᐃᓄᕕᐊᓗᐃᑦ ᑭᖑᓪᓕᕐᐸᖓᓂ ᐊᖏᖃᑎᒋᒍᑎ)
  • ᓄᓇᕗᑦ ᑐᙵᕕᒃ ᐃᖕᑯᐊᐳᕆᓴᓐ (ᓄᓇᕗᑦ ᐊᖏᖃᑎᒋᒍᑎ)
  • ᐃᒪᑭᕕᒃ ᑯᐊᐳᕆᓴᓐ (ᔭᐃᒻᔅ ᐸᐃ ᐊᒻᒪᓗ ᐅᐊᖕᓇᖓᓂ ᑯᐱᒃ ᐊᖏᖃᑎᒋᒍᑎ, ᓄᓇᕕᒃ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒋᒍᑎᑦ)
  • ᓄᓇᑦᓯᐊᕗᑦ ᒐᕙᒪᖏᑦ (ᓚᐸᑐᐊ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒋᒍᑎᑦ)
1.5.
ᐃᓄᐃᑦ, ᑕᓐᓇ ᐊᑐᐊᒐᖅ ᐱᔾᔪᑎᒋᓪᓗᒍ, ᐃᓄᑐᐃᓐᓇᐃᑦ ᑎᑎᕋᕐᑕᐅᓯᒪᔪᑦ ᖁᓚᓂ ᐃᓄᐃᑦ ᐊᖏᖃᑎᒋᒍᑎᖏᓐᓂ ᑎᒥᐅᔪᓄᑦ ᒪᓕᒃᓗᒋᑦ ᐱᔪᓐᓇᕆᐊᖃᕐᓂᖏᑦ ᐃᓄᐃᑦ−ᑯᐃᓐ ᐊᖏᖃᑎᒋᒍᑎ ᐅᕙᓗᒻᓐᓂᑦ ᓇᖕᒥᓂᖅ ᐊᐅᓚᑦᑎᓂᖅ ᒐᕙᒪᐅᓗᓂ ᐊᖏᖃᑎᒋᒍᑎ, ᓇᒥᑐᐃᓐᓇᖅ ᓄᓇᖃᕋᓗᐊᕈᑎᒃ ᑲᓇᑕᒥ.
1.6.
ᑕᒃᑯᐊ ᐃᓄᐃᑦ ᐊᖏᖃᑎᒋᒍᑎᖏᓐᓂ ᑎᒥᐅᔪᓄᑦ ᑲᑎᖓᓪᓗᑎᒃ ᓂᕈᐊᕈᓐᓇᖃᑦᑕᕐᑐᑦ ᑲᑎᒪᔨᖏᓐᓂ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐊᒻᒪᓗ ᐃᓄᐃᑦ ᐅᑭᐅᕐᑕᕐᑐᓕᒪᒥ ᑲᑎᒪᔨᖏᑦ ᑲᓇᑕ (ICC-C). ᐃᓄᐃᑦ ᑕᐱᕇᑦ ᑲᓇᑕᒥ ᑭᒐᕐᑐᐃᔪᑦ ᑲᓇᑕᒥᑦᑐᓂᒃ ᐃᓄᖕᓂᒃ ᑎᒥᐅᔪᓂᒃ. ᐃᓄᐃᑦ ᐅᑭᐅᕐᑕᕐᑐᓕᒪᒥ ᑲᑎᒪᔨᖏᑦ ᑲᓇᑕ ᐱᓇᓱᖃᑦᑕᕐᑐᑦ ᐊᔪᖏᓐᓂᕐᓴᐅᓕᖁᓪᓗᒋᑦ ᑲᑎᖓᓂᖏᑦ ᐃᓄᐃᑦ ᐅᑭᐅᕐᑕᕐᑐᓕᒪᒥ, ᐃᒪᐃᓕᐅᕐᖢᑎᒃ, ᐃᓚᖓᓂ, ᐱᔪᓐᓇᕐᓯᓂᕐᓴᐅᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᑎᒍᑦ ᐊᒻᒪᓗᐱᓇᓱᒃᑕᖏᑎᒍ ᓄᓇᕐᔪᐊᕐᒥ ᑐᓴᐅᒪᑎᑦᑎᓪᓗᑎᒃ. ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕ ᐊᒻᒪᓗ ᑲᓇᑕᒥ ᐃᓄᐃᑦ ᒪᒃᑯᒃᑐᑦ ᑲᑎᒪᔨᖏᑦ ᐃᓚᒋᔭᐅᒋᓪᓗᑎᒃ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐃᓄᐃᑦ ᐅᑭᐅᕐᑕᕐᑐᓕᒪᒥ ᑲᑎᒪᔨᖏᑦ ᑲᓇᑕ ᑲᑎᒪᔨᐅᔪᑦ ᑭᒐᕐᑐᐃᓪᓗᑎᒃ ᓂᕈᐊᕐᕕᐅᖃᑦᑕᖏᑦᑐᒥ. ᑲᓇᑕ ᐊᖏᕐᓯᒪᔪᖅ ᑕᒃᑯᐊ ᓇᖕᒥᓂᖅ− ᐱᔪᒪᓂᖃᕐᓂᖏᑦ ᐊᐅᓚᑦᑎᓂᕐᒥᒃ ᓂᕈᐊᕐᑕᐅᓯᒪᔪᒃᑯᑦ ᐊᕿᒃᓯᒪᓗᓂ ᐊᒻᒪᓗ ᐃᒃᐱᒋᔭᐅᓗᑎᒃ ᐱᔪᓐᓇᐅᑎᖏᑦ ᐃᓄᐃᑦ ᐃᓚᐅᖃᑕᐅᔪᓐᓇᕐᓗᑎᒃ ᐱᔾᔪᑕᐅᔪᓂᒃ ᐊᑐᕐᓗᒍ ᑎᒥᐅᔪᑦ ᑐᖓᕕᖏᑦ.
1.7.
ᑲᓇᑕ ᐃᓕᓴᕐᓯᕗᖅ ᐃᓄᐃᑦ ᓄᓇᖓᑦ ᐊᔾᔨᐅᖏᑦᑐᓂᖓᓂᒃ ᓄᓇᒥ, ᐃᓕᖁᓯᖏᓪᓗ (ᐱᖃᓯᐅᑎᓗᒋᑦ ᓇᖕᒥᓂᖅ ᐅᖃᐅᓯᖃᕐᓂᖏᑦ), ᐊᒻᒪᓗ ᓂᕈᐊᕐᑕᐅᓯᒪᓂᒃᑯᑦ ᓄᓇᓕᒐᓚᖃᕐᕕᐅᔪᓂ ᐊᒻᒪᓗ ᑕᐃᒪᐃᓐᓂᖓᓄᑦ ᐊᑐᕐᑕᐅᕗᖅ ᑕᐃᒍᓯᖅ "ᐃᓄᐃᑦ ᓄᓇᖓᑦ" ᓄᓇᒋᔭᖓᓂᒃ ᓇᓗᓇᐃᒃᑯᑎᖃᕐᖢᑎᒃ, ᐃᑲᔪᑕᐅᔪᓐᓇᕐᒪᑦ ᐱᕙᓪᓕᐊᓂᖓᓄᒃ, ᐊᑐᕐᑕᐅᓂᖓᓄᑦ, ᐊᒻᒪᓗ ᐊᑐᓕᕐᑎᑕᐅᓂᖓᓄᑦ ᑲᓇᑕᒥ ᒐᕙᒪᒃᑯᑦ ᐊᑐᐊᒐᖏᓐᓂ, ᐊᐅᓚᑕᖏᓐᓂ, ᐱᔨᓯᕐᓂᖏᓐᓂ ᐊᒻᒪᓗ ᐱᒋᐊᕐᑎᑕᐅᔪᓂ ᐊᒃᑐᐃᓯᒪᔪᓂᒃ ᐃᓄᐃᑦ ᓄᓇᖓᑦ.
1.8.
ᑲᓇᑕ ᐃᑲᔪᕐᑐᐃᖕᒥᔪᑦ ᐃᓄᐃᑦ ᓄᓇᖓᑦ ᐱᒋᐊᕐᕋᓱᒃᑕᖓᓂᒃ, ᑐᑭᓯᓇᕐᓯᑎᑕᐅᓪᓗᓂ ᐊᑐᐊᒐᖅ, ᐱᕙᓪᓕᐊᑎᑕᐅᓗᑎᒃ, ᑭᓇᐅᔭᑎᒍᑦ, ᐊᒻᒪᓗ/ᐅᕝᕙᓘᓐᓃᑦ ᐊᑐᓕᕐᑎᑕᐅᓂᖓᓄᑦ ᑲᓇᑕᒥ ᒐᕙᒪᒃᑯᑦ ᐊᑐᐊᒐᖏᓐᓂ, ᐊᐅᓚᑕᖏᓐᓂ, ᐱᔨᓯᕐᓂᖏᓐᓂ ᐊᒻᒪᓗ ᐱᒋᐊᕐᑎᑕᐅᔪᓂ ᐊᒃᑐᐃᓯᒪᔪᓂᒃ ᐃᓄᐃᑦ ᓄᓇᖓᑦ ᐊᒻᒪᓗ/ᐅᕝᕙᓘᓐᓃᑦ ᐃᑲᔪᕐᑐᐃᓯᒪᔪᑦ ᐃᓄᖕᓂᒃ ᐊᑐᐊᒐᕐᒥᒃ ᐊᑐᑎᖃᕐᑎᑕᐅᔪᓄᑦ, ᐱᖃᓯᐅᑎᓗᒍ ᑕᐃᒃᑯᐊ ᒪᓐᓇ ᓄᓇᖃᕐᑐᑦ ᓯᓚᑖᓂ ᐃᓄᐃᑦ ᓄᓇᖓᑦ. ᑕᐃᒪᐃᒃᑯᓂ, ᑕᓐᓇ ᐊᑐᐊᒐᖅ ᑐᑭᒧᐊᒍᑕᐅᓂᐊᕐᒪᑦ ᑲᓇᑕᒥ ᒐᕙᒪᒃᑯᑦ ᐊᑐᐊᒐᖏᓐᓂ, ᐊᐅᓚᑕᖏᓐᓂ, ᐱᔨᓯᕐᓂᖏᓐᓂ ᐊᒻᒪᓗ ᐱᒋᐊᕐᑎᑕᐅᔪᓂ ᐱᖃᓯᐅᑎᓯᒪᔪᓂᒃ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᑦ ᐃᓕᓴᕆᔭᐅᓪᓗᑎᒃᓗ ᐃᓄᐃᑦ ᐱᓯᒪᖕᒪᑕ ᐊᒻᒪᓗ ᐱᕙᓪᓕᐊᑎᑦᑎᓐᓇᕐᓂᐊᕐᒪᑕ ᓇᖕᒥᓂᖅ ᐊᐅᓚᑦᑎᓂᕐᒥᒃ ᒐᕙᒪᖃᕐᓗᑎᒃ ᐱᔭᐅᕙᓪᓕᐊᓂᖓᓂᒃ ᐊᕿᒃᑕᐅᔭᕆᐊᓕᖕᓂᒃ ᐊᑐᕐᓂᐊᕐᑐᓂᒃ ᐃᓄᐃᑦ ᓄᓇᖓᑦ ᐊᒻᒪᓗ ᐃᓄᖕᓄᑦ ᑎᑎᕋᕐᑕᐅᓯᒪᔪᓄᑦ ᐃᓄᐃᑦ−ᑯᐃᓐ ᐊᖏᖃᑎᒋᒍᑎᓂ.
1.9.
ᒐᕙᒪᒃᑯᑦ ᑲᓇᑕ ᐃᓕᓴᕐᓯᓯᒪᔪᑦ ᐅᑯᐊ ᐃᓄᐃᑦ−ᑯᐃᓐ ᐊᖏᖃᑎᒋᒍᑎ ᐊᒻᒪᓗ ᓇᖕᒥᓂᖅ ᐊᐅᓚᑦᑎᓂᖅ ᒐᕙᒪᖃᕐᓂᖅ ᐊᖏᖃᑎᒋᒍᑎ ᐃᓗᓕᕆᔭᐅᖕᒪᑕ ᐱᓪᓚᕆᐅᓪᓗᑎᒃ ᐃᓄᐃᑦ−ᑯᐃᓐ ᐱᓇᓱᖃᑎᒋᖕᓂᖏᓐᓄᑦ ᐊᒻᒪᓗ ᑕᒃᑯᐊ ᐱᔪᓐᓇᐅᑎᑦ ᐊᒻᒪᓗ ᐱᓇᓱᒃᑕᐅᔪᑦ ᐃᓄᖕᓄᑦ ᐊᒻᒪᓗ ᐱᓇᓱᒃᑕᐅᔪᑦ ᑲᓇᑕ ᓄᖃᖓᑐᐃᓐᓇᖁᓇᒋᑦ ᐊᒻᒪᓗ ᐱᕙᓪᓕᐊᖏᓐᓇᖁᓪᓗᒋᑦ ᓴᕿᑉᐸᓪᓕᐊᓗᑎᒃ. ᐊᒃᑐᐊᓂᕆᖕᒪᒍ, ᐊᐅᓚᔾᔪᑕᐅᔪᑦ ᐊᒻᒪᓗ ᐃᖏᕋᓂᖓ ᐱᔭᕆᐊᖃᕐᑐᖅ ᑕᒃᑯᐊ ᐱᔪᓐᓇᐅᑎᑦ ᐱᓇᓱᒃᑕᐅᔪᓪᓗ ᑲᔪᓯᖁᓪᓗᒋᑦ ᑎᑭᑕᐅᕙᓪᓕᐊᓗᑎᒃᓗ. ᐃᓄᐃᑦ ᓄᓇᖓᑦ ᐊᑐᐊᒐᖅ ᐱᓪᓚᕆᐅᕗᖅ ᐃᓗᓕᕆᔭᐅᓪᓗᓂ ᑕᒪᑐᒧᖓ.
1.10.
ᑕᕙᓂ ᐱᑕᖃᖏᓚᖅ ᐃᓗᐊᕈᓐᓂᕐᑎᑦᑎᓂᖃᖏᓚᕐᓗ ᐅᕝᕙᓘᓐᓃᑦ ᓱᕙᓕᑭᐊᖑᕐᑎᑦᑎᖏᓚᖅ ᑲᓇᑕᐅᑉ ᐊᖏᕐᓯᒪᓂᖓᓂᒃ ᐱᔭᒃᓴᕆᔭᖏᓐᓂᒃᓗ ᐊᑐᕐᓗᒍ ᑲᖑᓇᕐᑐᓕᕆᓂᒃᑯᑦ ᐅᕝᕙᓘᓐᓃᑦ ᑕᑯᔭᐅᔪᓐᓴᕐᓂᖏᑎᒍ ᑎᑎᕋᕐᓯᒪᔪᑦ ᐱᖁᔭᖏᓐᓂ ᐊᑐᐊᒐᕐᓂᓗ, ᐅᕝᕙᓘᓐᓃᑦ ᑲᓇᑕᐅᑦ ᐅᓗᕆᐊᓇᕐᑐᒥᑎᑕᐅᓂᖓᓄᑦ ᐊᒻᒪᓗ ᓴᐳᑎᓯᒪᔭᕆᐊᖃᕐᓂᖓᓄᑦ.

2. ᐱᔾᔪᑎᖓ ᐊᑐᐊᒐᖅ

2.1.
ᑲᓇᑕ ᐃᓕᓴᕐᓯᔪᖅ ᐱᖃᑕᐅᖃᑦᑕᖏᓐᓂᖏᓐᓂᒃ ᐃᓄᓯᓕᕆᓂᒃᑯᑦ−ᑭᓇᐅᔭᓕᕆᓂᒃᑯᓪᓗ ᐊᒻᒪᓗ ᐃᓕᖁᓯᓕᕆᓂᒃᑯᑦ ᐊᔾᔨᐅᖏᑎᑕᐅᓂᖏᓐᓂᒃ ᐃᓄᐃᑦ ᐊᓯᖏᑦ ᑲᓇᑕᒥᐅᑦ. ᑕᓐᓇ ᐃᓄᖕᓄᑦ ᑐᕋᖓᔪᖅ ᐊᑐᐊᒐᖅ ᐱᓪᓚᕆᐅᕗᖅ ᐊᑐᕐᑕᐅᔪᓐᓇᕐᑐᖅ ᐃᓄᐃᑦ−ᑯᐃᓐ ᐸᓐᓇᒋᖕᓂᒃᑯᑦ ᑲᑎᒪᔨᖏᓐᓂᑦ ᐱᓇᓱᖃᑎᒋᖕᓂᕐᒥᒃ ᐸᓇᒋᒃᓗᑎᒃ ᓴᕿᑦᑎᓗᑎᒃ ᐃᓄᓯᓕᕆᓂᒃᑯᑦ−ᑭᓴᐅᔭᓕᕆᓂᒃᑯᑦ ᐊᒻᒪᓗ ᐃᓕᖁᓯᓕᕆᓂᒃᑯᑦ ᐊᔾᔨᐅᖏᑎᑕᐅᓂᖏᓐᓂᒃ ᐃᓄᐃᑦ ᐊᒻᒪᓗ ᐊᓯᖏᑦ ᑲᓇᑕᒥᐅᑦ. ᐱᖃᑕᐅᓂᖅ ᐊᔾᔨᒋᔭᐅᓕᕐᓂᕐᒥᒃ ᐱᔾᔪᑎᖃᖏᓚᖅ ᑭᓯᐊᓂᓕ ᑕᐃᒪᐃᖃᑕᐅᓂᕐᒥᒃ ᐊᒻᒪᓗ ᐱᔭᕆᐊᖃᕐᓂᕐᒥᒃ ᐊᐅᓚᓂᖓᓂᑦ ᐊᒻᒪᓗ ᐱᔭᐅᔪᓂᑦ. ᐱᓇᓱᒃᓗᒍ ᐱᖃᑕᐅᓂᖅ ᐱᔭᐃᔭᕆᐊᖃᕐᐳᒍᑦ ᐊᒧᕈᑕᐅᔪᓂᒃ, ᐊᕿᒋᐊᕐᓗᒋᓪᓗ ᐱᖏᓐᓂᐅᖃᑦᑕᕐᑐᑦ, ᐊᒻᒪᓗ ᓴᕿᑕᐅᓗᑎᒃ ᐊᑐᕐᑕᐅᔪᓐᓇᕐᑐᑦ ᐃᕕᕐᑎᕈᑕᐅᓗᑎᒃ ᐊᔾᔨᒋᔭᐅᖏᓐᓂᖏᓐᓄᑦ ᑐᕋᒐᖃᕐᓗᑎᒃ ᓴᕿᑦᑎᓂᕐᒥᒃ ᓇᓕᒧᒋᖕᓂᒃᑯᑦ ᐱᓇᓱᖃᑕᐅᓂᕐᒥᒃ ᑕᒪᒃᑭᓄᑦ.
2.2.
ᑐᕋᒐᕆᓗᒍ ᐱᖃᑕᐅᓂᖅ, ᑕᓐᓇ ᐊᑐᐊᒐᖅ ᐱᓇᓱᒃᑐᖅ ᐊᔪᕐᓴᕈᓐᓂᕐᓂᕐᒥᒃ ᐊᒻᒪᓗ ᐃᑲᔪᕐᑐᐃᓂᕐᒥᒃ ᓄᓇᓕᖕᓂᒃ ᐊᒻᒪᓗ ᐃᓄᑐᐃᓐᓇᐃᑦ ᖃᓄᐃᖏᑦᑎᐊᕐᓂᖏᓐᓂᒃ ᐃᓄᐃᑦ ᓄᓇᖓᑦ, ᐱᕙᓪᓕᐊᑎᓂᐊᕐᓗᓂᓗ ᑲᓇᑕᒥᐅᓄᑦ. ᑐᑭᒧᐊᒍᑕᐅᕗᖅ ᑲᓇᑕᐅᑦ ᒐᕙᒪᖏᓐᓂ ᐱᓇᓱᒃᕕᖏᓐᓂ ᐊᒻᒪᓗ ᐃᖃᓇᐃᔭᕐᕕᖏᓐᓂ ᐊᕿᒃᓯᒪᓪᓗᓂ, ᐱᕙᓪᓕᐊᓂᖓᓗ ᐊᒻᒪᓗ ᐊᑐᕐᑎᑕᐅᓂᖓ ᑲᓇᑕ ᒐᕙᒪᖏᓐᓂ ᐊᑐᐊᒐᖏᓐᓂ, ᐊᐅᓚᓂᖏᓐᓂ, ᐱᔨᓯᕐᓂᖏᓐᓂ, ᐊᒻᒪᓗ ᐱᒋᐊᕐᑕᐅᔪᓂ ᐊᑐᕐᑕᐅᓂᐊᕐᑐᓂ ᐃᓄᐃᑦ ᓄᓇᖓᑦ ᐊᒻᒪᓗ/ᐅᕝᕙᓘᓐᓃᑦ ᐱᕙᓪᓕᐅᑕᐅᓗᓂ ᐃᓄᐃᑦ, ᐱᖃᓯᐅᑎᓗᒋᑦ ᐊᐅᓚᓂᕆᔭᐅᔪᑦ ᑭᓱᑐᐃᓐᓇᕐᓄᑦ ᐊᑐᕆᐊᓕᑦ, ᐊᒻᒪᓗ ᖁᕙᕆᐊᕐᑕᐅᓗᑎᒃ ᐃᒃᐱᒋᔭᐅᓂᖏᑦ ᐊᒻᒪᓗ ᐃᑲᔪᕐᑕᐅᓂᖏᑦ ᐃᓄᐃᑦ ᓇᖕᒥᓂᖅ−ᐱᔪᒪᓂᖃᕐᓂᖏᑦ.
2.3.
ᑕᓇ ᐊᑐᐊᒐᖅ ᒪᓕᒃᓯᒪᔪᖅ ᑕᐅᕐᓯᖃᑎᒋᒃᓂᒃᑯᑦ ᓯᕗᓪᓕᐅᖁᔭᐅᔪᓂᒃ, ᑐᕋᒐᐅᔪᓂᒃ ᐊᒻᒪᓗ ᐃᓕᖁᓯᐅᔪᓂᒃ ᓇᓗᓇᐃᕐᑕᐅᓯᒪᔪᓂᒃ 2017 ᐃᓄᐃᑦ ᓄᓇᖓᑦ ᐱᓯᒪᓂᖓᓂᒃ ᐃᓄᐃᑦ−ᑯᐃᓐ ᐸᓐᓇᒋᓐᓂᖏᑦ ᐊᒻᒪᓗ ᖁᕙᕆᐊᕐᑎᑕᐅᓗᑎᒃ ᐃᓄᐃ−ᑯᐃᓐ ᐸᓐᓇᒋᖕᓂᖏᑦ ᑲᑎᒪᔨᖏᑦ, ᐊᒻᒪᓗ ᑕᐃᒪᐃᒃᑯᑎᒃ ᐱᕙᓪᓕᐊᑎᑦᑎᓗᑎᒃ ᑲᓇᑕ ᐊᖏᕐᓯᒪᓂᖓᓂᒃ ᑎᑭᑎᓂᐊᕐᓂᖓᓂᒃ ᐃᓗᐊᕐᓯᖃᑎᒋᖕᓂᒃᑯᑦ ᐃᓄᐃᑦ ᐊᑐᕐᓗᒍ ᓄᑕᐅᓯᕐᑕᐅᓂᖓ ᐃᓄᐃ−ᑯᐃᓐ ᐱᓇᓱᖃᑎᒋᖕᓂᖏᑦ. ᐊᒻᒪᓗᒃᑲᓐᓂᖅ, ᑕᓐᓇ ᐊᑐᐊᒐᖅ ᐃᑲᔪᕐᑐᐃᕗᖅ ᐱᑕᖃᕐᐸᒋᕐᑐᓂᒃ ᐊᖏᖃᑎᒋᒍᑎᓂᒃ ᐊᒻᒪᓗ ᓇᖕᒥᓂᖅ ᐊᐅᓚᑦᑎᓂᕐ ᒐᕙᒪᖃᕐᓂᒃᑯᑦ ᐊᖏᖃᑎᒋᒍᑎᑦ ᐃᓄᐃᑦ ᐊᒻᒪᓗ ᑯᐃᓐ ᐊᒻᒪᓗ ᐊᐅᓚᓂᖓᓂᒃ ᐊᑐᕐᑕᐅᔪᒥᒃ ᐃᑲᔪᕐᕈᑕᐅᓪᓗᓂ ᐊᑐᓕᕐᑎᑕᐅᓂᖓᓂᒃ ᐊᒻᒪᓗ ᕿᒥᕈᔭᐅᓂᖓᓂᒃ, ᑐᕋᒐᐅᔪᓪᓗ, ᐊᒻᒪᓗ ᐱᓇᓱᐊᖃᑎᒋᖕᓂᖏᑦ ᐊᕿᒃᓯᒪᔪᑦ ᐃᓗᐊᓂ, ᐊᒻᒪᓗ ᐊᓯᖏᑦ ᐊᒃᑐᐊᔪᑦ ᑲᓇᑕ ᒐᕙᒪᖏᑦ ᐊᑐᕐᑕᖏᑦ, ᐊᑐᐊᒐᐃᑦ ᐊᒻᒪᓗ ᑎᓕᓯᔾᔪᑕᐅᔪᑦ.
2.4.
ᑕᓐᓇ ᐊᑐᐊᒐᖅ ᐱᓇᓱᒃᑐᖅ ᐊᓯᕈᐃᓗᓂ ᐊᒻᒪᓗ ᑭᒐᕐᑐᐃᓗᓂ ᐊᖏᓂᕐᓴᒃᑯᑦ ᐊᖏᕐᓯᒪᓂᖏᓐᓂᒃ ᐊᑐᑎᖃᕐᑐᒃᑯᑦ ᐸᓐᓇᒋᖕᓂᕐᒥᒃ ᐊᒻᒪᓗ ᐱᓇᓱᐊᖃᑎᒋᖕᓂᕐᒥᒃ. ᐱᔾᔪᑎᒋᓪᓗᒍ ᐊᑐᓂ ᐅᑯᐊ, ᑕᓐᓇ ᐊᑐᐊᒐᖅ ᐱᑎᑦᑎᕗᖅ ᑐᑭᒧᐊᒍᑕᐅᔪᓐᓇᕐᑐᓂᒃ ᑕᒪᕐᒥᒃ ᑲᓇᑕ ᒐᕙᒪᖏᓐᓂ ᐃᖃᓇᐃᔭᕐᑎᐅᔪᑦ ᐱᓇᓱᐊᕐᑎᓪᓗᒋᑦ ᐃᖃᓇᐃᔭᕐᑎᓪᓗᒋᑦ ᐱᑎᑦᑎᓇᓱᖃᑦᑕᕐᓗᑎᒃ ᓴᕿᑦᑎᓗᑎᒃ ᐃᓄᓯᓕᕆᓂᒃᑯᑦ ᑭᓇᐅᔭᓕᕆᓂᒃᑯᓪᓗ ᐊᒻᒪᓗ ᐃᓕᖁᓯᓕᕆᓂᒃᑯᑦ ᐱᖃᑕᐅᓂᕐᒥᒃ ᐊᒻᒪᓗ ᐱᓇᓱᒃᑕᐅᔪᓐᓇᕐᓂᖏᑦ ᐊᒻᒪᓗ ᐊᑐᑎᖃᕐᓂᖏᑦ ᐊᑐᐊᒐᐃᑦ, ᐊᐅᓚᓂᐅᔪᑦ, ᐱᔨᓯᕐᓂᐅᔪᑦ ᐊᒻᒪᓗ ᐱᒋᐊᕐᑕᐅᔪᑦ ᐃᓄᖕᓄᑦ. ᓇᐃᓇᕐᓗᒍ, ᑕᓐᓇ ᐊᑐᐊᒐᖅ:
2.4.1.
ᐱᓪᓚᑦᑖᖑᔪᒃᑯᑦ ᐃᓕᓴᕆᔭᐅᓗᓂ ᐃᓄᐃᑦ ᓄᓇᖓᑦ ᐃᓄᖕᓄᑦ ᓄᓇᒋᔭᐅᓂᖓᓂᒃ ᐊᒻᒪᓗ ᐊᖏᕐᑕᐅᓗᓂ, ᐊᑐᐊᒐᖅ ᐱᔾᔪᑎᒋᓪᓗᒍ, ᓄᓇᖓᓂ ᑭᒃᓕᒋᔭᖓ ᐃᓄᐃᑦ ᓄᓇᖓᑦ ᒪᓕᒃᓯᒪᓂᖓᓂᒃ ᓄᓇᖑᐊᒃᑯᑦ ᑭᒃᓕᖓᓂᒃ ᓴᕿᑕᐅᓯᒪᔪᖅ ᒪᓐᓇ ᐊᑐᕐᑕᐅᔪᓂ ᐊᖏᖃᑎᒋᒍᑎᓂ ᐊᒻᒪᓗ ᓇᖕᒥᓂᖅ−ᒐᕙᒪᖃᕐᓂᕐᒥᒃ ᐊᖏᖃᑎᒋᒍᑎᓂᒃ ᐱᔭᕆᕐᑕᐅᖁᓪᓗᒋᑦ ᐃᓄᐃᑦ ᐊᒻᒪᓗ ᑯᐃᓐ.
2.4.2.
ᐊᖏᕐᑕᐅᓗᑎᒃ ᑕᒃᑯᐊ ᓇᓗᓇᐃᕐᑕᐅᔪᑦ ᐃᓄᐃᑦ ᐊᑐᕐᓗᒋᑦ ᐃᓄᐃᑦ ᐊᖏᖃᑎᒋᒍᑎᓂᑦ ᑎᒥᐅᔪᑦ ᐃᓄᓂᖏᓐᓂᒃ ᐱᔾᔪᑎᒋᓗᒍ ᐊᑐᐊᒐᖅ.
2.4.3.
ᐃᑲᔪᕐᑐᐃᓗᑎᒃ ᐃᓄᖕᓄᑐᐊ ᑐᕋᖓᔪᓂᒃ ᑐᓂᔭᐅᖃᑦᑕᕐᑐᓂᒃ ᑲᓇᑕ ᒐᕙᒪᖏᓐᓂᑦ ᐱᕕᐅᖃᑦᑕᕐᑐᓂᑦ ᐃᓄᐃᑦ ᑎᒥᖁᑎᖏᓐᓄᑦ ᑎᒥᐅᔪᓄᓪᓗ ᑎᒃᑯᐊᕐᑕᐅᓯᒪᔪᓄᑦ.
2.4.4.
ᐱᕙᓪᓕᕐᑎᑦᑎᓗᓂ ᑭᓇᐅᔭᑎᒍᑦ ᐱᕙᓪᓕᐊᓂᖓ ᐊᒻᒪᓗ ᐊᖏᓂᕐᓴᒥᒃ ᓇᖕᒥᓂᖅᕝᑕᑎᒋᓗᓂ ᐃᓗᐊᓂ ᐃᓄᐃᑦ ᓄᓇᖓᑦ.
2.4.5.
ᑐᕋᒐᐅᒃᑲᓐᓂᕐᓗᑎᒃᓗ ᑐᑭᒧᐊᒍᑕᐅᓗᑎᒃ ᑲᓇᑕ ᒐᕙᒪᖏᑦ ᐊᒻᒪᓗ ᐃᖃᓇᐃᔭᕐᑯᖏᑦ ᖃᓄᖅ ᐊᑐᕐᑕᐅᓂᐊᕐᒪᖓᑕ ᐃᓄᐃᑦ ᓄᓇᖓᑦ ᐱᓇᓱᒃᑕᐅᑎᓪᓗᒍ ᐃᓱᒪᒋᓗᒍ ᐊᑐᓕᕐᑎᑕᐅᓂᖓ ᐊᑐᐊᒐᐃᑦ, ᐊᐅᓚᓂᐅᔪᑦ, ᐱᔨᓯᕐᓂᐅᔪᑦ ᐊᒻᒪᓗ ᐱᒋᐊᕐᑕᐅᔪᑦ ᐃᓄᐃᑦ ᓄᓇᖃᕐᑐᑦ ᓯᓚᑖᓂ ᐃᓄᐃᑦ ᓄᓇᖓᑦ.
2.5.
ᑕᓐᓇ ᐊᑐᐊᒐᖅ ᐱᒋᐊᕈᑎᖃᕐᓯᒪᔪᖅ ᒪᓕᒃᓗᒍ ᐱᒋᐊᕐᑕᐅᓯᒪᔪᑦ ᐱᓇᓱᒃᑕᐅᕙᒋᕐᑐᑦ ᒐᕙᒪᒃᑯᑦ ᑲᓇᑕ ᐊᒻᒪᓗ ᐱᓪᓚᕆᐅᓕᕐᑎᓪᓗᒍ ᑲᓇ ᒐᕙᒪᖏᑦ ᐱᓇᓱᒃᑕᖏᑦ ᐃᑲᔪᕐᑐᐃᓗᑎᒃ ᐃᓄᐃᑦ ᓇᖕᒥᓂᖅ−ᐱᔪᒪᓂᕆᔭᖏᑦ. ᑕᐃᒪᐃᒃᑯᓂ, ᐊᕿᒃᓯᔾᔪᑕᐅᓂᐊᕐᒪᑦ ᐱᕙᓪᓕᐊᒃᑲᓐᓂᕐᓂᕐᒥᒃ ᐃᑲᔪᕐᑎᒋᒃᓗᑎᒃ ᐃᓄᐃᑦ ᐊᒻᒪᓗ ᑲᓇᑕ ᒐᕙᒪᖏᓐᓂ ᐊᒻᒪᓗ ᐃᖃᓇᐃᔭᕐᕕᖏᓐᓂ ᓇᓗᓇᐃᕐᓯᓗᑎᒃ ᐊᑐᑎᖃᓚᖑᔪᒃᑯᑦ ᐊᐅᓚᓂᖃᕐᓂᖓᓂᒃ ᐊᑐᓕᕐᑎᑕᐅᑎᓪᓗᒍ ᐃᓄᐃᑦ ᓄᓇᖓᑦ ᐱᒋᐊᕐᑕᐅᔭᕆᐊᓕᑦ ᐊᒻᒪᓗ ᐃᑲᔪᕐᑐᐃᓗᑎᒃ ᓇᖕᒥᓂᖅ−ᐱᔪᒪᓂᕆᔭᖏᑦ ᐃᓗᐊᓂ ᑕᑯᓄᖓᑐᐊ ᐊᐅᓚᓂᖏᓐᓂᒃ ᐊᒻᒪᓗ ᐊᑐᐊᒐᐃᑦ ᐃᓗᐊᓂ.
2.6.
ᑐᑭᓯᓇᕐᓯᑎᑕᐅᓂᖏᑦ ᐊᒻᒪᓗ ᐊᑐᓕᕐᑎᑕᐅᓂᖏᑦ ᐊᑐᐊᒐᖅ ᒪᓕᒃᓯᒪᓂᐊᕐᐳᖅ ᐱᖁᔭᑎᒍᑦ ᐊᕿᒃᓯᒪᔪᒥᒃ ᓇᓗᓇᐃᕐᑕᐅᓯᒪᔪᒥ ᑲᓇᑕᒥ ᑐᖓᕕᖓᓂ ᐊᒻᒪᓗ ᓴᕿᑕᐅᓂᖏᓐᓄᑦ ᐊᖏᖃᑎᒋᒍᑎᑦ ᓄᓇᓕᒐᓚᖃᕐᕕᐅᔪᓂ ᒐᕙᒪᐅᔪᓂᑦ. ᑕᓐᓇ ᐊᑐᐊᒐᖅ ᑎᒍᒥᐊᕐᐳᖅ ᐱᑎᑦᑎᓪᓗᓂᓗ ᓄᓇᖃᕐᖃᕐᓯᒪᔪᑦ ᐱᔪᓐᓇᐅᑎᖏᓐᓂᒃ ᐃᓕᓴᕆᔭᐅᓪᓗᑎᒃ ᐊᒻᒪᓗ ᓇᓗᓇᐃᕐᑕᐅᓪᓗᑎᒃ ᑎᑎᕋᕐᓯᒪᔪᒥ ᐃᓚᖓᓂ 35 ᑕᕙᓂ ᑲᓇᑕᒥ ᑐᙵᕕᐅᔪᖅ ᐱᖁᔭᕐᔪᐊᖅ, 1982, ᐱᖃᓯᐅᑎᓯᒪᓪᓗᓂ ᐃᓄᐃᑦ−ᑯᐃᓐ ᐊᖏᖃᑎᒋᒍᑎᑦ ᐊᒻᒪᓗ ᓇᖕᒥᓂᖅ ᐊᐅᓚᑦᑎᓂᑦᖅ ᒐᕙᒪᖃᕐᓂᖅ ᐊᖏᖃᑎᒋᒍᑎ ᐊᒻᒪᓗ ᐱᓯᒪᐃᓐᓇᕐᑕᖓ ᐱᔪᓐᓇᐅᑎᖓ ᓇᖕᒥᓂᖅ−ᒐᕙᒪᖃᕐᓂᕐᒥᒃ ᐊᒻᒪᓗ ᐊᒃᑐᐊᔪᑦ ᐱᖁᔭᑎᒍᑦ ᐱᔪᓐᓇᕐᑕᖏᓐᓂ. ᐊᒻᒪᓗᑦᑕᐅᖅ, ᑕᓐᓇ ᐊᑐᐊᒐᖅ ᐱᓪᒪᕆᐅᔪᒃᑯᑦ ᐊᐅᓚᓂᖓᓂᒃ ᐊᑐᓕᕐᑎᑕᐅᓂᖓᓄᑦ ᐱᔪᓐᓇᐅᑎᑦ ᓇᓗᓇᐃᕐᑕᐅᓯᒪᔪᑦ ᓄᓇᕐᔪᐊᕐᒥ ᓄᓇᓕᒐᓚᖃᕐᕕᐅᔪᑦ ᐱᓂᖃᕐᓂᖏᑦ ᐱᔪᓐᓇᐅᑎᖏᑦ ᓄᓇᖃᕐᖃᕐᓯᒪᔪᑦ ᐊᒻᒪᓗ ᑐᑭᒧᐊᒍᑕᐅᓗᓂ ᐱᓇᓱᒃᑕᐅᔪᓂᒃ ᐸᓇᒋᖕᓂᒃᑯᑦ ᐃᓄᐃᑦ ᖁᕙᕆᐊᖁᓪᓗᒋᑦ ᐱᔪᓐᓇᐅᑎᖏᑦ. ᑕᓐᓇ ᐊᑐᐊᒐᖅ ᐊᑐᕈᓐᓂᕐᑎᑦᑎᖏᓚᖅ ᓄᓇᕐᔪᐊᕐᒥ ᓄᓇᓕᒐᓚᖃᕐᕕᐅᔪᑦ ᐱᓂᖃᕐᓂᖏᑦ ᐱᔪᓐᓇᐅᑎᖏᑦ ᓄᓇᖃᕐᖃᕐᓯᒪᔪᑦ ᐅᕝᕙᓘᓐᓃᑦ ᐱᐅᔪᓐᓂᕐᑎᑦᑎᖏᓚᖅ ᐱᔪᓐᓴᐅᑎᖏᓐᓂᒃ ᐃᓄᐃᑦ ᐃᓕᓴᕆᔭᐅᓯᒪᔪᑦ ᑎᑎᕋᕐᓯᒪᔪᒥ ᐃᓚᖓᓂ 35, ᐃᒪᐃᖏᓚᕐᓗ ᐊᓯᓕᕐᑎᑦᑎᖏᓚᖅ ᓇᓕᐊᒃᓂᑐᐃᓐᓇᖅ ᐃᓚᐅᖃᐅᔪᑦ ᐱᓇᓱᒃᑕᖏᓐᓂᒃ ᐱᔭᕆᐊᖃᕐᑕᖏᓐᓂᒃ ᑕᕙᓂ ᐃᓄᐃ−ᑯᐃᓐ ᐊᖏᖃᑎᒋᒍᑎᓂ ᐅᕝᕙᓘᓐᓃᑦ ᓇᖕᒥᓂᖅ ᐊᐅᓚᑦᑎᓂᕐ ᒐᕙᒪᖃᕐᓂᖅ ᐊᖏᖃᑎᒋᒍᑎᓂᒃ.

3. ᑲᒪᒋᔭᖃᑦᑎᐊᕐᓂᖅ ᐊᑐᖅᑕᐅᔭᕆᐊᓕᓐᓂ

3.1.
ᐅᑯᐊ ᒪᓕᒃᑕᐅᔪᑦ ᐊᑐᕐᑕᐅᓂᐊᕐᐳᑦ ᐱᒋᐊᕐᕕᐅᓗᑎᒃ ᐃᑲᔪᕐᑎᒋᖕᓂᒃᑯᑦ ᐱᕙᓪᓕᐊᑎᑦᑎᓗᑎᒃ ᐃᓄᐃᑦ ᓄᓇᖓᑦ ᐊᑐᐊᒐᕐᓂᒃ, ᐊᒻᒪᓗ ᑐᑭᒧᐊᒃᑎᑦᑎᓗᑎᒃ ᐊᑐᓕᕐᑎᐅᓂᖏᓐᓂᑦ:
3.1.1.
ᓄᑕᐅᓯᕐᓂᖓ ᐃᓄᐃ−ᑯᐃᓐ ᐱᓇᓱᖃᑎᒋᖕᓂᖏᑦ ᐱᒋᐊᕐᕕᖃᕐᐳᖅ ᐃᓕᓴᕆᔭᐅᓂᖏᓐᓂᒃ ᐃᔪᓐᓴᐅᑎᖏᑦ, ᐃᒃᐱᒋᔭᐅᓂᖏᑦ, ᐊᐅᓚᑦᑎᖃᑎᒋᖕᓂᖅ ᐊᒻᒪᓗ ᐸᓇᒋᖕᓂᖅ ᐃᓚᒋᓗᓂᐅᒃ ᐊᖏᓂᕐᓴᒥᒃ ᑐᕋᒐᐅᔪᑦ ᐱᓇᓱᒃᓗᒍ ᐃᓗᐊᕐᓯᖃᑎᒋᖕᓂᖅ ᒐᕙᒪᒃᑯᑦ ᑲᓇᑕ ᐊᒻᒪᓗ ᓄᓇᖃᕐᖃᕐᓯᒪᔪᑦ.
3.1.2.
ᐃᓗᐃᑦᑐᓗᒍ, ᐊᑐᑎᖃᕐᑐᒃᑯᑦ ᐊᒻᒪᓗ ᕿᓚᒻᒥᐅᔪᒃᑯᑦ ᐊᑐᓕᕐᑎᑕᐅᓗᑎᒃ ᐱᔪᓐᓇᐅᑎᖏᑦ ᐃᓄᐃᑦ ᐃᓕᓴᕆᔭᐅᓯᒪᔪᑦ ᐊᒻᒪᓗ ᐊᖏᕐᑕᐅᓯᒪᔪᑦ ᑎᑎᕋᕐᓯᒪᒧᓂ ᐃᓚᖓᓂ 35, ᐱᖃᓯᐅᑎᓗᒋᑦ ᐱᔭᕆᐊᖃᕐᑕᖏᑦ ᐊᒻᒪᓗ ᑐᕋᒐᐅᔪᑦ ᐃᓄᐃᑦ−ᑯᐃᓐ ᐊᖏᖃᑎᒋᒍᑎᑦ ᐊᒻᒪᓗ ᓇᖕᒥᓂᖅ ᒐᕙᒪᖃᕐᓂᕐᒧᑦ ᐊᖏᖃᑎᒋᒍᑎᑦ, ᐊᒻᒪᓗ ᐱᔪᓐᓇᐅᑎᖏᑦ ᐊᖏᕐᑕᐅᓯᒪᔪᑦ ᓄᓇᕐᔪᐊᕐᒥ ᓄᓇᓕᒐᓚᖃᕐᕕᐅᔪᑦ ᐱᓂᖃᕐᓂᖏᑦ ᐱᔪᓐᓇᐅᑎᖏᑦ ᓄᓇᖃᕐᖃᕐᓯᒪᔪᑦ ᑐᖓᕕᒋᔭᐅᓗᑎᒃ ᓴᕿᑦᑎᔾᔪᑕᐅᓗᑎᒃ ᐊᔪᕐᓴᖏᓐᓂᕐᒥᒃ ᐃᓄᐃᑦ ᐊᒻᒪᓗ ᑐᕋᒐᐅᔪᑦ ᐱᕙᐅᓗᑎᒃ ᐊᑐᐊᒐᕐᒥ.
3.1.3.
ᐃᓄᐃᑦ ᐱᔪᓐᓇᐅᑎᖃᕐᑐᑦ ᓇᖕᒥᓂᖅ−ᐱᓇᓱᒍᒪᓂᕐᒥᒃ, ᐱᖃᓯᐅᑎᓪᓗᒍ ᐱᓯᒪᐃᓐᓇᕐᑕᖓ ᐱᔪᓐᓇᐅᑎᖓ ᓇᖕᒥᓂᖅ−ᒐᕙᒪᖃᕐᓂᖅ ᐊᒻᒪᓗ ᐊᒃᑐᐊᔪᑦ ᐱᔪᓐᓇᕐᑎᑕᐅᔪᑦ ᐱᖁᔭᑎᒍᑦ. ᑲᓇᑕ ᐃᖃᔪᕐᑐᐃᖏᓐᓇᕐᓂᐊᕐᑐᖅ ᐱᖁᔭᓕᐅᕐᕈᓐᓴᕐᓂᕐᒥᒃ, ᐊᐅᓚᑦᑎᓂᖅ ᐱᐅᓯᒋᐊᕐᓗᒍ ᐊᒻᒪᓗ/ᐅᕝᕙᓘᓐᓃᑦ ᐱᔪᓐᓇᕐᑎᑕᐅᔪᑦ ᐱᖁᔭᑎᒍᑦ ᓇᖕᒥᓂᖅ ᒐᕙᒪᖃᕐᓂᕐᒥᒃ ᐊᒻᒪᓗ ᓇᖕᒥᓂᖅ−ᒐᕙᒪᖃᕐᓗᓂ ᐊᔨᖃᑎᒋᖕᓂᕐᒥᒃ, ᐃᓕᓴᕆᔭᐅᓗᑎᒃ ᐱᔪᓐᓇᐅᑎᖏᑦ ᐊᒻᒪᓗ ᐅᖃᓪᓚᖃᑎᒋᒃᓗᑎᒃ ᐊᔨᖃᑎᒋᒃᓗᑎᒃᓗ ᐱᖁᔭᓂᒃ ᐱᒋᐊᕐᑕᐅᔪᓂᒃ, ᐊᒻᒪᓗ ᐊᓯᖏᓐᓂᒃ ᐊᐅᓚᓂᐅᔪᓂᒃ ᐱᖁᔭᑎᒍᑦ ᐱᔭᕆᐊᓕᖕᓂᒃ, ᐊᑲᐅᓇᕐᓯᒪᑎᓪᓗᒍ.
3.1.4.
ᐃᓄᐃᑦ ᖃᐅᔨᒪᓚᖑᖕᒪᑕ ᓄᓇᓕᖏᓐᓂ ᐊᒃᓱᕈᕐᓇᐅᑕᐅᔪᓂᒃ, ᓄᓇᓕᒐᓚᖃᕐᕕᐅᔪᓂ, ᐊᒻᒪᓗ ᐃᓄᖃᑎᒋᖕᓂᒃᑯᑦ ᐊᒻᒪᓗ ᐱᔭᕆᐊᖃᕐᑐᑦ, ᑕᐃᒪᐃᓐᓂᖓᓄᑦ, ᐱᑕᖃᐃᓐᓇᕐᑎᑦᑎᓗᑎᒃ ᐃᓚᐅᖃᑕᐅᓗᑎᒃ ᐱᓕᕆᐊᒃᓴᖃᕐᓗᑎᒃᓗ ᐱᕙᓪᓕᐊᓂᖓᓂᒃ ᐊᕿᒃᑕᐅᔭᕆᐊᓕᖕᓂᒃ ᐱᔾᔪᑕᐅᔪᓂᒃ ᐊᑐᑎᖃᕐᑐᓄᑦ ᐃᓄᖕᓄᑦ ᐊᒻᒪᓗ ᐅᕝᕙᓘᓐᓃᑦ ᐃᓄᐃᑦ ᓄᓇᖓᑦ.
3.1.5.
ᑲᓇᑕ ᒐᕙᒪᖏᑦ ᑭᓇᐅᔭᑎᒍᑦ ᑐᓂᔭᖏᑦ ᐃᓄᖕᓄᑦ ᐊᒻᒪᓗ ᐃᓄᐃᑦ ᓄᓇᖓᑦ ᐱᓪᓚᕆᐅᖕᒪᑕ ᐃᑲᔪᕐᑐᐃᔾᔪᑕᐅᓗᑎᒃ ᐱᔪᓐᓴᐅᑎᓄᑦ ᐃᓄᐃᑦ ᓇᖕᒥᓂᖅ−ᐱᓇᓱᒍᒪᓂᖏᑦ ᐊᒻᒪᓗ ᓇᖕᒥᓂᖅ−ᒐᕙᒪᖃᕐᓂᖅ, ᐱᐅᓯᒋᐊᕋᓱᒃᓗᒋᑦ ᐃᓄᓯᖏᑦ ᐃᓄᐃᑦ, ᐊᒻᒪᓗ ᑎᑭᐅᑎᓗᒋᑦ ᐃᓄᓯᓕᕆᓂᒃᑯᑦ−ᑭᓇᐅᔭᓕᕆᓂᒃᑯᑦ ᐊᒻᒪᓗ ᐃᓕᖁᓯᓕᕆᓂᒃᑯᑦ ᐱᖃᑕᐅᓂᖏᑦ ᐃᓄᐃᑦ ᐊᒻᒪᓗ ᐊᓯᖏᑦ ᑲᓇᑕᒥᐅᑕᐅᔪᑦ.

4. ᐃᓕᓴᕆᔭᐅᓂᖓ ᐃᓄᒃᑎᑐᑦ

4.1.
ᐃᓄᒃᑎᑐᑦ ᓯᕗᓪᓕᕐᐸᖑᖕᒪᑦ ᐅᖃᐅᓯᖓᓂ ᐊᑐᕐᑕᐅᔪᑦᖅ ᐃᓄᐃᑦ ᓄᓇᖓᑦ ᐊᒻᒪᓗ ᐅᓄᕐᓂᕐᓴᐅᔪᑦ ᐃᓄᐃᑦ ᓄᓇᖓᑦ ᓄᓇᖃᕐᑐᑦ ᐅᖃᓪᓚᐃᓐᓇᕐᒪᑕ ᐃᓄᒃᑎᑐᑦ ᐅᖃᐅᓯᖃᖕᖓᐅᑎᒋᓪᓗᒍᓗ, ᐅᖃᐅᓯᑐᐊᕆᓪᓗᒍᓗ ᐅᖃᐅᓯᕆᔪᒪᓪᓗᒍᓗ. ᑕᐃᒪᐃᑎᓪᓗᒍ, ᐱᓇᓱᒃᑕᐅᓂᖏᑦ ᐱᔨᓯᕐᓂᐅᔪᑦ ᐃᓄᒃᑎᑐᑦ ᐃᓄᐃᑦ ᓄᓇᖓᓂ ᐱᔭᕆᐊᖃᕐᐳᑦ ᐃᓄᑐᐃᓐᓇᕐᓄᑦ ᖃᓄᐃᖏᑦᑎᐊᕐᓂᖏᓐᓄᑦ, ᐊᑦᑕᕐᓇᕐᑕᐃᓕᒪᓂᕐᒧᑦ, ᐊᒻᒪᓗ ᑕᐃᒪᐃᑎᑕᐅᓗᑎᒃ ᐱᓯᒪᐃᓐᓇᕐᑕᖏᑦ ᖃᐅᔨᒪᔭᐅᔾᔪᑎᖓ ᐅᐱᓐᓇᐅᑎᒋᔭᖓ ᐃᓄᐃᑦ. ᐃᑲᔪᕐᑐᐃᓂᖅ ᐃᓄᒃᑎᑐᑦ ᑕᕙᓂ ᓯᕗᓪᓕᐅᓗᓂ ᑭᖑᓪᓕᐅᓗᓂᓗᓐᓂᑦ ᐅᖃᐅᓯᖓ ᒪᓕᒃᓯᒪᓗᓂ ᐊᖏᓂᕐᓴᐅᔪᒥᒃ ᐱᔾᔪᑎᖓᓂᒃ ᑕᕙᓂ, ᐊᓯᖏᓪᓗ, ᐃᖃᓇᐃᔭᖃᑎᒋᓗᒋᑦ ᐸᓐᓇᒋᓗᒋᑦ ᑕᑯᒃᓴᐅᔪᒃᑯᑦ ᐊᒻᒪᓗ ᐱᑎᑦᑎᓇᓱᒃᓗᑎᒃ ᐃᒃᐱᒍᓱᖃᑦᑕᐅᑎᑦᑎᐊᕐᓗᑎᒃ ᐃᓄᓯᐅᓚᐅᕐᑐᓂᒃ ᐊᒻᒪᓗ ᐱᓪᒪᕆᐅᓂᖓᓂᒃ ᐃᓄᒃᑎᑐᑦ, ᐊᒻᒪᓗ ᐱᕈᕐᓴᐃᓗᓂ ᐃᓄᓯᓕᕆᓂᒃᑯᑦ−ᑭᓇᐅᔭᓕᕆᓂᒃᑯᓪᓗ ᐊᒻᒪᓗ ᐃᓕᖁᓯᓕᕆᓂᒃᑯᑦ ᐱᖃᑕᐅᓂᖏᑦ ᐃᓄᐃᑦ ᐊᒻᒪᓗ ᐊᓯᖏᑦ ᑲᓇᑕᒥᐅᑕᐃᑦ.
4.2.
ᒪᓕᒃᓗᒍ ᓄᓇᖃᕐᖃᕐᓯᒪᔪᑦ ᐅᖃᐅᓯᖏᑦ ᐱᖁᔭᐃᑦ, ᑕᒃᑯᐊ ᓄᓇᕐᔪᐊᕐᒥ ᓄᓇᓕᒐᓚᖃᕐᕕᐅᔪᑦ ᐱᓂᖃᕐᓂᖏᑦ ᐱᔪᓐᓇᐅᑎᖏᑦ ᓄᓇᖃᕐᖃᕐᓯᒪᔪᑦ ᐊᒻᒪᓗ ᐅᖃᐅᓯᖓ ᐃᓕᓴᕆᔭᐅᓯᒪᔪᖅ ᐃᒪᐃᓕᖓᓂᖓ ᐃᓄᒃᑎᑐᑦ ᒪᕈᖕᒪᑎᒃ ᑎᓴᒪᐅᓕᖓᔪᓂ ᓄᓇᓕᒐᓚᖃᕐᕕᐅᔪᓂᑦ ᐃᓄᐃᑦ ᓄᓇᖓᑦ, ᑲᓇᑕ ᐱᓇᓱᐃᓐᓇᕐᓗᓂ ᐃᖃᓇᐃᔭᖃᑎᖃᕐᓗᓂ ᐸᓐᓇᒋᒃᓗᑎᒃ ᐃᓄᐃᑦ ᐊᒻᒪᓗ ᐊᔾᔨᐅᖏᑦᑐᓂᖏᑦ ᐃᒪᐃᓕᖓᓂᖏᑦ, ᐱᖃᓯᐅᑎᓗᒍ ᐊᑐᕐᑕᐅᔪᓂᒃ ᑐᑭᒧᐊᒍᑕᐅᔪᓂᒃ ᐱᔭᕆᐊᖃᕐᑐᓂᒃ ᐊᑲᐅᔪᒃᑯᑦ, ᐱᑕᖃᐃᓐᓴᕈᓐᓇᕐᑐᒃᑯᑦ ᐊᒻᒪᓗ ᐊᑯᓂᐅᔪᒧᑦ ᐱᑕᖃᕐᑎᑕᐅᓗᑎᒃ ᐱᒋᐊᓪᓚᒍᑕᐅᓗᓂ, ᐅᑎᕐᑎᑕᐅᓗᓂ, ᐊᑐᐃᓐᓇᕐᑕᐅᓗᓂ ᐊᒻᒪᓗ ᓴᖏᒃᓕᒋᐊᕐᓗᒍ ᐃᓄᒃᑎᑐᑦ. ᑕᐃᒪᐃᒃᑯᓂ ᐊᑐᓕᕐᑎᑕᐅᓂᐊᕐᒪᑕ ᖃᓄᑦᓕᖓᓕᕐᓂᖏᑦ ᐃᓄᒃᑎᑐᑦ ᓯᕗᓪᓕᐅᓗᓂ ᐊᒻᒪᓗ/ᐅᕝᕙᓘᓐᓃᑦ ᓯᕗᓕᑦᑕ ᐅᖃᐅᓯᕕᓂᕆᓂᐊᓄᑦ ᐅᓄᕐᓂᕐᓴᐅᔪᓄᑦ ᓄᓇᖃᕐᑎᐅᔪᓄᑦ ᓄᓇᓕᒐᓚᖃᕐᕕᐅᔪᓂ ᐃᓄᐃᑦ ᓄᓇᖓᓐᓂ.
4.3.
ᒪᓕᒃᓯᒪᓪᓗᓂ ᓄᓇᖃᕐᖃᕐᓯᒪᔪᑦ ᐅᖃᐅᓯᖏᑦ ᐱᖁᔭᐃᑦ, ᑲᓇᑕ ᐃᖃᓇᐃᔭᖃᑎᖃᐃᓐᓇᕐᓗᓂ ᐸᓐᓇᒋᒃᓗᓗᑎᒃ ᐃᓄᐃᑦ ᐱᓇᓱᓕᕋᖓᑕ ᑲᓇᑕᒥ ᒐᕙᒪᒃᑯᑦ ᐊᐅᓚᑕᖏᓐᓂ ᐊᒻᒪᓗ ᐱᔨᕋᕐᓂᖏᓐᓂ ᐃᓄᒃᑎᑐᑦ ᐃᓗᐊᓂ ᐃᓄᐃᑦ ᓄᓇᖏᑕ. ᑕᐃᒪᐃᓕᔪᓐᓇᕐᑐᑦ ᐱᕙᓪᓕᐊᑎᑦᑎᖃᑎᒋᒃᓗᑎᒃ ᒪᓕᒐᕐᓂᒃ, ᐊᖏᖃᑎᒋᒍᑎᒃᑯᓪᓗ ᐊᒻᒪᓗ ᐊᕿᒃᓯᖃᑎᒋᒃᓗᑎᒃ.

5. ᐊᑐᕐᑕᐅᓗᓂ ᐃᓄᐃᑦ ᓄᓇᖓᑦ ᐱᒋᐊᕐᕕᐅᓗᓂ

5.1.
ᐃᓱᒪᒋᓪᓗᒍ ᑕᒃᑯᓄᖓᑐᐊᖅ ᑐᕋᖓᔪᑦ ᐃᓄᐃᑦ ᓄᓇᖓᓄᑦ ᐱᔾᔪᑕᐅᔭᕆᐊᖃᕐᒪᑦ ᐱᕙᓪᓕᐊᓂᖏᑦ ᑲᓇᑕ ᒐᕙᒪᖏᑕ ᐊᑐᐊᒐᖏᑦ ᐊᒻᒪᓗ ᐊᐅᓚᑕᖏᑦ, ᐱᖃᓯᐅᑎᓪᓗᒍ ᑕᐃᒃᑯᐊ ᑭᓱᐃᑐᓐᓇᕐᒧᑦ ᐊᑐᕐᑕᐅᔪᑦ, ᐃᓄᐃᑦ ᑭᑭᑕᐅᖏᓐᓂᕐᓴᐅᖃᑦᑕᕐᓂᐊᕐᒪᑕ ᐅᕝᕙᓘᓐᓃᑦ ᐱᔪᓐᓇᖏᑎᑕᐅᖏᓪᓗᑎᒃ. ᐃᓕᓴᕆᓗᒍ ᐊᒻᒪᓗ ᐃᓱᒪᒋᓗᒍ ᐊᔾᔨᐅᖏᑦᑐᓂᖓ ᐃᓄᐃᑦ ᓄᓇᖓᑦ, ᑲᓇᑕ ᐱᒋᐊᕐᓗᓂ ᐃᓄᐃᑦ ᓄᓇᖓᑦ ᐊᑐᕐᓗᒍ ᐊᕿᒃᓯᒪᔭᖓ ᐊᒻᒪᓗ ᓄᑕᐅᓯᒋᐊᕐᓗᒍ ᑕᒪᕐᒥᒃ ᑲᓇᑕ ᒐᕙᒪᖏᑕ ᐊᑐᐊᒐᖏᑦ, ᐊᐅᓚᓂᖏᑦ, ᐱᔨᓯᕐᓂᖏᑦ ᐊᒻᒪᓗ ᐱᒋᐊᕐᑕᖏᑦ ᐊᑐᑎᖃᕐᑐᑦ ᐃᓄᐃᑦ ᓄᓇᖓᓄᑦ ᐊᒻᒪᓗ/ᐅᕝᕙᓘᓐᓃᑦ ᐱᔭᐅᔭᕆᐊᖃᕐᑎᓪᓗᒍ ᐱᕙᓪᓕᐊᑕᐅᓂᐊᕐᓗᓂ ᐃᓄᖕᓄᑦ, ᐱᖃᓯᐅᑎᓗᒋᑦ ᐃᓄᐃᑦ ᓯᓚᑕᓂᑦᑐᑦ ᐃᓄᐃᑦ ᓄᓇᖓᑦ.
5.2.
ᐱᒋᐊᕈᑎᒋᓗᒍ ᐃᓄᐃᑦ ᓄᓇᖓᑦ ᐊᑐᕐᓗᒍ ᑐᑭᖃᕐᐳᖅ ᐃᒪᓐᓇ:
5.2.1.
ᐊᐅᓚᑕᐅᔪᑦ ᒪᓕᒋᐊᖃᕐᓂᖏᑦ ᐊᒻᒪᓗ ᖃᓄᐃᓕᖓᔭᕆᐊᖃᕐᓂᖏᑦ, ᐱᖃᓯᐅᑎᓗᒍ ᐃᒪᐃᑦᑐᔭᕆᐊᖃᕐᓂᖏᑦ, ᐱᔪᓐᓇᖏᑎᑕᐅᓪᓗᑎᒃ ᐃᓄᐃᑦ, ᑕᐃᒪᐃᒃᑯᓂᓗ, ᐊᕿᒋᐊᕐᑕᐅᓗᓂ ᕿᓚᒻᒥᐅᔪᒃᑯᑦ.
5.2.2.
ᐱᐅᓯᒋᐊᕈᓂ ᑐᑭᒧᐊᒃᑕᐅᓂᖓ ᑲᓇᑕ ᒐᕙᒪᖏᓐᓂ ᐱᓇᓱᒃᕕᖏᓐᓂ, ᐃᖃᓇᐃᔭᕐᕕᖏᓐᓂ, ᐊᐅᓚᓂᖏᓐᓂ ᐊᒻᒪᓗ ᐃᖏᕋᓂᖏᑦ ᑐᕋᒐᖃᕐᓗᓂ ᑐᑭᒧᐊᒃᒍᑕᐅᓗᓂ ᐱᖃᑕᐅᓂᒃᑯᑦ ᐱᓇᓱᒍᓐᓇᕐᓗᑎᒃ ᐊᒻᒪᓗ ᐱᔪᓐᓇᕐᓗᑎᒃ ᑲᓇᑕ ᒐᕙᒪᖏᓐᓂᖓ ᐊᐅᓚᓂᖏᓐᓂᒃ, ᐱᔨᓯᕐᓂᖏᓐᓂᒃ ᐊᒻᒪᓗ ᐱᒋᐊᕐᑎᑕᖏᓐᓂᒃ ᐃᓗᐊᓂ ᐃᓄᐃᑦ ᓄᓇᖓᑦ ᐊᒻᒪᓗ ᐃᓄᐃᑦ ᑕᒪᕐᒥᒃ.
5.2.3.

ᐃᓚᐅᑎᑕᐅᓂᖏᑦ ᐃᓄᐃᑦ ᐱᒋᐊᕐᓂᖓᓂ ᐊᐅᓚᑕᐅᔪᓂ ᓄᑕᐅᓯᒋᐊᕐᓯᒪᓕᕐᑎᓪᓗᒍ ᐅᕝᕙᓘᓐᓃᑦ ᐊᕿᒃᓯᒪᓕᕐᑎᓪᓗᒍ ᐊᔪᕐᓇᕈᑕᐅᔪᑦ ᐊᒃᑐᐊᔪᑦ ᐱᕕᐅᓇᓱᒃᑎᓪᓗᒍ ᐊᒻᒪᓗ ᐱᔪᓐᓇᕆᐊᖃᕐᓂᖏᑦ ᑭᐅᔭᐅᑦᑎᐊᕐᓗᑎᒃ ᐊᒻᒪᓗ ᐱᕕᖃᕐᓂᐅᔪᑦ ᐊᖏᓚᖑᔪᒃᑯᑦ ᐃᒃᐱᖕᓇᐅᑎᔪᑦ ᐱᒋᐊᕐᑎᑕᐅᔪᒥᑦ ᐃᓚᖃᓯᐅᔾᔭᐅᓗᑎᒃ ᓯᕗᓂᐊᓂ ᐊᐅᓚᑕᐅᔪᖅ ᐊᑐᓕᖏᓐᓂᖓᓂ ᐊᒻᒪᓗ ᓴᕿᑕᐅᓂᖓᓂᑦ.

  1. ᑲᓇᑕ ᒐᕙᒪᖏᑕ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ ᐅᕝᕙᓘᓐᓃᑦ ᐱᒋᐊᕐᑎᑕᖏᑦ ᑐᕋᒐᖃᕐᒪᑕ ᐊᑕᐅᓯᐅᖏᑦᑐᒧᑦ ᐃᓄᐃᑦ ᓄᓇᓕᒐᓚᖃᕐᕕᐅᓂᖓᓄᑦ, ᑲᓇᑕ ᐃᓚᐅᑎᑦᑎᓗᓂ ᑕᒪᕐᒥᒃ ᐱᔪᒪᔪᑦ ᐃᓄᐃᑦ ᐊᖏᖃᑎᒋᒍᑎᑦ ᑎᒥᐅᔪᑦ ᐊᒻᒪᓗ ᐃᓄᐃᑦ ᑕᐱᕆᑦ ᑲᓇᑕᒥ ᐱᓇᓱᒃᕕᖓ ᐅᕝᕙᓘᓐᓃᑦ ᐃᖃᓇᐃᔭᕐᕕᖓ ᐱᔪᓐᓇᕐᑎᓪᓗᒋᑦ ᐊᐅᓚᓂᕆᔭᖓᓂᑦ ᑭᒃᓕᖃᕐᑎᑕᐅᖏᓪᓗᓂ ᐊᑕᐅᓯᕐᒧᑦ ᒪᕈᖕᓄᑐᐊᕐᓗᓐᓂᑦ ᐃᓄᐃᑦ ᓄᓇᓕᒐᓚᖃᕐᕕᖓᓄᑦ.
  2. ᑲᓇᑕ ᒐᕙᒪᖏᑕ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ ᐅᕝᕙᓘᓐᓃᑦ ᐱᒋᐊᕐᑎᑕᖏᑦ ᑕᒃᑯᓄᖓᑐᐊᖅ ᑐᕋᖓᓂᐊᕈᓂ ᐃᓄᐃᑦ ᓄᓇᓕᖓᓄᑦ ᐅᕝᕙᓘᓐᓃᑦ ᓄᓇᓕᒐᓚᖃᕐᕕᐅᔪᓂ, ᑲᓇᑕ ᐃᓚᐅᑎᑦᑎᓗᓂ ᐊᒃᑐᐊᔪᓄᑦ ᐃᓄᐃᑦ ᐊᖏᖃᑎᒋᒍᑎᑯᒃ ᑎᒥᐅᔪᓂᒃ.
  3. ᑲᓇᑕ ᒐᕙᒪᖏᑕ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ ᐅᕝᕙᓘᓐᓃᑦ ᐱᒋᐊᕐᑎᑕᖏᑦ ᐱᕙᓪᓕᐊᑕᐅᓇᓱᒃᑎᓪᓗᒋᑦ ᑕᐃᒃᑯᓄᖓ ᓇᓗᓇᐃᕐᑕᐅᓯᒪᔪᓄᑦ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᓄᑦ ᐃᓄᓂᖏᓐᓂᒃ ᓄᓇᖃᕐᓂᖏᓐᓂᒃ ᓯᓚᑕᓂ ᐃᓄᐃᑦ ᓄᓇᖓᑦ, ᑲᓇᑕ ᐃᓚᐅᑎᑦᑎᓂᐊᕐᐳᖅ ᐱᔪᒪᔪᓂᒃ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᓂᒃ ᐃᓚᒋᔭᐅᔪᖁᑎᖏᑦ ᐃᓱᒪᒋᔭᐅᑦᑎᐊᖁᓪᓗᒋᑦ ᓄᑕᐅᓯᒋᐊᕐᑕᐅᓂᖓᓂ ᐊᕿᒃᑕᐅᓂᖓᓂᓗ ᐊᐅᓚᓂᖓᓂ.
5.3.
ᐊᑐᕐᓗᒍ ᐃᓄᐃᑦ ᓄᓇᖓᑦ ᐱᒋᐊᕈᑕᐅᓗᓂ ᐱᖃᓯᐅᑎᓗᒋᑦ ᐃᓄᖕᓄᑐᐊᖅ ᑐᕋᖓᔪᑦ ᐃᓱᒪᒋᔭᐅᓗᑎᒃ ᐊᑐᓕᕐᑎᑕᐅᓂᖏᑦ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ, ᐅᕝᕙᓘᓐᓃᑦ ᐱᒋᐊᕐᑎᑕᖏᑦ, ᐊᒻᒪᓗ ᐱᖃᓯᐅᑎᓗᒍ ᐊᕿᒃᓱᕆᐊᒃᓐᓂᕐᓂᖏᑦ ᑲᓇᑕ ᒐᕙᒪᖏᑕ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ ᐅᕝᕙᓘᓐᓃᑦ ᐱᒋᐊᕐᑎᑕᖏᑦ, ᐃᕕᕐᑎᕈᑕᐅᓗᓂ ᐃᓄᐃᑦ ᓄᓇᖓᓄᑦ.

6. ᐃᑲᔪᕐᑐᐃᓂᖅ ᐃᓄᐃᑦ ᓇᖕᒥᓂᖅ−ᐱᔪᒪᓂᕆᔭᖏᑦ

6.1.
ᐱᔪᓐᓇᐅᑎᖏᑦ ᓇᖕᒥᓂᖅ−ᐱᔪᒪᓂᕆᔭᖏᑦ ᐃᓕᓴᕆᔭᐅᓯᒪᖕᒪᑦ ᐱᓪᓚᕆᐅᔭᕆᐊᖃᕐᓂᖓᓂᒃ ᐃᓄᑐᐃᓐᓇᐃᑦ ᐱᔪᓐᓇᐅᑎᖓᓂᒃ ᑕᕙᓂ ᓄᓇᕐᔪᐊᕐᒥ ᓄᓇᓕᒐᓚᖃᕐᕕᐅᔪᑦ ᐱᓂᖃᕐᓂᖏᑦ ᐱᔪᓐᓇᐅᑎᖏᑦ ᓄᓇᖃᕐᖃᕐᓯᒪᔪᑦ. ᑲᓇᑕ ᐃᓕᓴᕐᓯᔪᖅ ᐱᓯᒪᐃᓐᓇᕐᑕᖓᓂᒃ ᐱᔪᓐᓇᐅᑎᖓᓂᒃ ᐃᓄᐃᑦ ᓇᖕᒥᓂᖅ−ᐱᔪᒪᓂᕆᔭᖓᓂᒃ ᐱᖃᓯᐅᑎᓗᒍ ᓇᖕᒥᓂᖅ−ᒐᕙᒪᖃᕐᓂᖅ ᐊᒻᒪᓗ ᐊᑐᕐᑕᐅᓗᓂ ᐊᖏᖃᑎᒋᒍᑎᑦ ᐊᒻᒪᓗ ᓄᓇᖃᕐᖃᕐᓯᒪᔪᑦ ᐱᔪᓐᓴᐅᑎᖏᑦ, ᐃᓕᓴᕆᔭᐅᓯᒪᖕᒪᑕ ᐊᒻᒪᓗ ᓴᐳᔾᔭᐅᓯᒪᓪᓗᑎᒃ ᑎᑎᕋᕐᓯᒪᔪᒥ ᐃᓚᖓᓂ 35 ᑲᓇᑕᒥ ᑐᖓᕕᖓᓂ ᐱᖁᔭᕐᔪᐊᒥ. ᑲᓇᑕ ᐊᒻᒪᓗ ᓄᓇᓕᒐᓚᖃᕐᕕᐅᔪᑦ ᒪᓕᒐᖏᑦ, ᐱᖃᓯᐅᑎᓪᓗᒍ ᓇᖕᒥᓂᖅ−ᒐᕙᒪᖃᕐᓂᖅ ᐊᒻᒪᓗ ᐊᐅᓚᑦᑎᖃᑎᒋᖕᓂᖅ ᐊᖏᖃᑎᒋᒍᑎᒃᑯᑦ ᐃᓄᐃᑦ, ᒐᕙᒪᒃᑯᑦ ᑲᓇᑕ, ᐃᓚᖏᓪᓗ ᓄᓇᓕᒐᓚᖃᕐᕕᐅᔪᓂ ᒐᕙᒪᖏᓐᓂ, ᓇᓗᓇᐃᕐᓯᒪᓗᓂ ᖃᓄᖅ ᑕᓐᓇ ᐱᔪᓐᓇᐅᑎ ᐊᑐᕐᑕᐅᓂᐊᕐᒪᖓᑦ ᐃᓗᓕᖏᓐᓂ ᐃᓄᐃᑦ ᓄᓇᒋᔭᖏᓐᓂ. ᐅᓄᕐᒪᑕ ᐊᑐᕐᑕᐅᔪᓐᓇᕐᑐᑦ ᐃᑲᔪᑕᐅᔪᓐᓇᕐᑐᑦ ᐊᑐᓕᕐᑎᑕᐅᓇᓱᒃᓗᓂ ᐃᓄᐃᑦ ᓇᖕᒥᓂᖅ−ᐱᔪᒪᓂᕆᔭᖏᑦ, ᑭᓯᐊᓂ, ᐊᒻᒪᓗ ᖃᓄᖅ ᑕᓐᓇ ᐱᔪᓐᓇᐅᑎ ᓴᕿᔭᕐᑎᒋᓂᐊᕐᓂᖓ ᐱᕙᓪᓕᐊᒐᔭᕐᑎᓪᓗᒍ ᐊᑯᓂᐅᔪᒃᑯᑦ.
6.2.
ᐃᓄᐃᑦ ᐱᓇᓱᒃᑯᑎᒃ ᓇᖕᒥᓂᖅ−ᐱᔪᒪᓂᕆᔭᖓᓂᒃ ᐊᑐᕐᓗᒍ ᒪᓕᒐᐃᑦ ᐃᓗᐊᓂ, ᐱᖃᓯᐅᑎᓗᒋᑦ ᒪᓕᒐᓕᐅᕈᓐᓇᕐᓂᖅ ᑭᓱᑐᐃᓐᓇᕐᒧᑦ ᐊᒃᑐᐊᔪᓄᑦ ᓄᓇᖃᕐᖃᕐᓯᒪᔪᑦ ᐊᒻᒪᓗ/ᐅᕝᕙᓘᓐᓃᑦ ᐊᖏᖃᑎᒋᒍᑎᑦᒃᑯᑦ ᐱᔪᓐᓇᐅᑎᖏᑦ, ᑲᓇᑕ ᐃᑲᔪᕐᑐᐃᔪᖅ ᐊᑐᕐᑕᐅᓗᓂ ᓇᖕᒥᓂᖅ−ᐱᔪᒪᓂᕆᔭᖏᑦ ᐊᒻᒪᓗ ᓇᖕᒥᓂᖅ−ᒐᕙᒪᖃᕐᓂᖅ ᐊᔨᕈᑕᐅᓗᓂ, ᐃᓕᓴᕆᔭᐅᓗᑎᒃ ᐱᔪᓐᓇᐅᑎᖏᑦ ᐊᒻᒪᓗ ᐅᖃᓪᓚᖃᑎᒋᖕᓂᒃᑯᑦ ᐊᒻᒪᓗ ᐊᖃᑎᒋᖕᓂᒃᑯᑦ, ᒪᓕᒐᑎᒍᑦ ᐱᒋᐊᕐᑕᐅᔪᓂᒃ ᐊᒃᑐᐊᔪᓂᒃ ᒪᓕᒐᑎᒍᑦ ᐃᓗᐊᓂ. ᐅᕝᕙᓘᓐᓃᑦ ᐊᓯᐊᒍᑦ ᐊᑐᕐᑕᐅᒍᓂ ᐱᔭᕆᐊᖃᕐᓂᖓ ᒪᓕᒃᓗᒍ ᐃᑲᔪᑕᐅᓂᐊᕐᑎᓪᓗᒍ ᐱᓇᓱᒃᑕᖏᓐᓄᑦ.
6.3.
ᐃᓄᐃᑦ ᕿᓂᖏᑉᐸᑕ ᒪᓕᒐᑎᒍᑦ ᐃᓗᐊᓂᑦᑐᓂᒃ, ᑲᓇᑕ ᐃᖃᓇᐃᔭᖃᑎᖃᕐᓗᓂ ᐃᓄᐃᑦ ᐊᕿᒃᓯᓗᑎᒃ ᐊᑲᐅᓚᖑᔪᒃᑯᑦ ᐊᐅᓚᓂᕆᔭᐅᔪᒥᒃ ᐃᑲᔪᕐᑐᐃᓗᑎᒃ ᓇᖕᒥᓂᖅ−ᐱᔪᒪᔭᖃᕐᓂᖏᑦ ᐊᐅᓚᑕᐅᑎᓪᓗᒋᑦ ᑲᓇ ᒐᕙᒪᖏᑕ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ ᐅᕝᕙᓘᓐᓃᑦ ᐱᒋᐊᕐᑎᑕᖏᑦ ᐃᓄᐃᑦ ᐱᔪᒪᓂᖃᕐᑎᓪᓗᒋᑦ, ᐱᔪᒪᑎᓪᓗᒋᑦ ᐅᕝᕙᓘᓐᓃᑦ ᐱᔪᓐᓇᐅᑎᖃᕐᑎᓪᓗᒋᑦ, ᐱᖃᓯᐅᑎᓗᒍ ᑕᕗᖓᑲᐅᑎᒋ ᐃᓄᖕᓄᑐᐊᖅ ᑭᓇᐅᔭᖃᕐᑎᑦᑎᓗᑎᒃ.
6.4.
ᐊᑕᐅᓯᑐᐊᖅ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᖅ ᐱᓇᓱᒃᑯᓂ ᖁᕙᕆᐊᕐᑎᑦᑎᓇᓱᒃᓗᓂ ᐱᔪᓐᓇᐅᑎᖓᓂᒃ ᓇᖕᒥᓂᖅ−ᐱᔪᒪᓂᕆᔭᖓᓂᒃ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ ᐅᕝᕙᓘᓐᓃᑦ ᐱᒋᐊᕐᑎᑕᖏ, ᑲᓇᑕ ᐃᖃᓇᐃᔭᖃᑎᖃᕐᓗᓂ ᐊᑐᓂ ᐊᖏᖃᑎᒋᒍᑎᒃᑯᑦ ᑎᒥᐅᔪᑦ ᐱᔪᓐᓇᕐᓂᖃᕐᑐᐃᓇᐅᓗᑎᒃ. ᐊᑕᐅᓯᐅᖏᒃᑯᓂ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᑦ ᐱᓇᓱᒃᑯᑎᒃ ᖁᕙᕋᕐᑎᑦᑎᓇᓱᒃᓗᑎᒃ ᓇᖕᒥᓂᖅ−ᐱᔪᒪᓂᕆᔭᖓᓂᒃ ᑕᕙᓂ ᐃᓗᐊᓂ ᐊᐅᓚᑕᖏᑦ, ᐊᑐᐊᒐᖏᑦ, ᐱᔨᓯᕐᓂᖏᑦ ᐅᕝᕙᓘᓐᓃᑦ ᐱᒋᐊᕐᑎᑕᖏ, ᑲᓇᑕ ᐃᖃᓇᐃᔭᖃᑎᖃᕐᓗᓂ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᓂᒃ, ᐊᒻᒪᓗ ᐃᓄᐃᑦ ᑕᐱᕆᑦ ᑲᓇᑕᒥ, ᐃᓄᐃᑦ ᓇᖕᒥᓂᖅ−ᐱᔪᒪᓂᕆᔭᖏᑦ ᓯᕗᒧᐊᑦᑎᐊᖁᓪᓗᒍ ᐊᒻᒪᓗ ᐃᑲᔪᕐᑕᐅᓗᓂ ᐱᖃᑕᐅᓂᖏᓐᓂᒃ ᐃᓗᐊᓂ ᐃᓄᐃᑦ ᓄᓇᖓᑦ.
6.5.
ᐃᓄᐃᑦ ᕿᓂᕈᑎᒃ ᖁᕙᕆᐊᕐᑎᑦᑎᓇᓱᖕᓂᕐᒥᒃ ᓇᖕᒥᓂᖅ−ᐱᔪᒪᓂᕆᔭᖓᓂᒃ ᐱᖃᓯᐅᑎᓯᒪᑎᓪᓗᒍ ᓄᓇᓕᒐᓚᖃᕐᕕᐅᔪᓂ ᑲᓇᑕᐅᑦ ᐃᓗᐊᓂ ᒪᓕᒐᑎᒍᑦ ᐊᐅᓚᑕᐅᔪᓄᑦ, ᑲᓇ ᐊᒻᒪᓗ/ᐅᕝᕙᓘᓐᓃᑦ ᐃᓄᐃᑦ ᕿᓂᕐᓗᑎᒃ ᐃᓚᐅᑎᑦᑎᓴᓱᒃᓗᑎᒃ ᓄᓇᓕᒐᕋᖃᕐᕕᐅᔪᓂ ᒐᕙᒪᐅᔪᓂᒃ ᓄᑕᖑᔪᒃᑯᑦ ᐅᕝᕙᓘᓐᓃᑦ ᐱᑕᖃᕐᕋᒋᕐᑐᒃᑯᑦ ᐃᖏᕋᓂᐅᔪᒃᑯᑦ. ᐃᑲᔪᕐᑎᒋᖕᓂᒃᑯᑦ ᐊᑐᓕᕐᑎᑕᐅᒍᓂ, ᑲᔪᓯᑦᑎᐊᕐᓂᖃᕈᓂ ᐊᒻᒪ ᖃᖓᒃᑯᖓᓂᖓ ᓇᓗᓇᐃᕐᓯᒪᓂᐊᕐᐳᑦ. ᓄᓇᓕᒐᓚᖃᕐᕕᐅᔪᑦ ᐊᒻᒪᓗ/ᐅᕝᕙᓘᓐᓃᑦ ᒥᑭᓐᓂᕐᓴᐃᑦ ᐱᔪᒪᖏᒃᑯᑎᒃ ᐃᑲᔪᕐᑐᐃᔪᒪᖏᒃᑯᑎᒃ, ᐅᕝᕙᓘᓐᓃᑦ ᐃᑲᔪᕐᑐᐃᓂᖏᑦ ᑲᔪᓯᖏᒃᑯᓂ, ᑲᓇ ᐃᖃᓇᐃᔭᖃᑎᖃᕐᓗᓂ ᐃᓄᖕᓂᒃ ᐱᔪᓐᓇᕐᓂᖃᕐᑐᐃᓐᓇᐅᓗᑎᒃ ᐃᑲᔪᕐᑐᐃᓗᑎᒃ ᓇᖕᒥᓂᖅ−ᐱᔪᒪᓂᕆᔭᖓᓂᒃ ᒪᓕᒃᓯᒪᓗᓂ ᒪᓕᒐᑎᒍᑦ ᐊᑐᕈᓐᓇᕐᑕᖏᑦ ᐊᒻᒪᓗ ᑐᖓᕕᐅᔪᖅ ᐱᖁᔭᕐᔪᐊᑦ ᐊᑐᕐᓗᒍ.
6.6.
ᑲᓇᑕ ᒐᕙᒪᖏᑕ ᑭᓇᐅᔭᖃᕐᑎᑦᑎᓂᖏᑦ
6.6.1.
ᐃᓚᒋᓗᒍ ᐃᑲᔪᕐᑐᐃᓂᕐᒧᑦ ᐃᓄᐃᑦ ᓇᖕᒥᓂᖅ−ᐱᔪᒪᓂᕆᔭᖏᑦ, ᑲᓇᑕ ᒐᕙᒪᖏᑦ ᐊᒻᒪᓗ ᐃᖃᓇᐃᔭᕐᕕᖏᑦ ᑎᓕᔭᐅᕗᑦ ᐃᓱᒪᒃᓴᕐᓯᐅᖁᔭᐅᓪᓗᑎᒃ ᐊᔾᔨᐅᖏᑦᑐᓂᖏᑦ−ᑐᖓᕕᐅᓗᓂ ᐱᒋᐊᕐᑕᐅᓗᓂ ᑭᓇᐅᔭᖃᕐᑎᑕᐅᓗᑎᒃ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᑦ ᐅᕝᕙᓘᓐᓃᑦ ᑎᒥᐅᔪᑦ ᑎᒃᑯᐊᕐᑕᐅᓯᒪᔪᑦ ᐊᐅᓚᑦᑎᔨᐅᑎᑕᐅᓪᓗᑎᒃ ᑲᓇᑕ ᒐᕙᒪᖏᑦ ᑭᓇᐅᔭᖃᕐᑎᑦᑎᓪᓗᑎᒃ ᐊᐅᓚᓂᖏᑦ, ᐊᑐᐊᒐᐃᖏᑦ, ᐅᕝᕙᓘᓐᓃᑦ ᐱᒋᐊᕐᑎᑕᖏᑦ ᐱᔾᔪᑎᒋᓪᓗᒍ ᐱᓇᓱᒃᑎᓪᓗᒋᑦ ᐊᑐᕈᒪᓗᑎᒃ ᐱᔪᓐᓇᐅᑎᖓᓂᒃ ᓇᖕᒥᓂᖅ−ᐱᔪᒪᓂᕆᔭᖓᓂᒃ. ᐱᖃᓯᐅᑎᔪᓐᓇᕐᑐᖅ ᐊᓯᓕᕐᑕᐅᓗᓂ ᐱᑕᖃᕐᐸᒋᕐᑐᑦ ᑭᓇᐅᔭᖃᕈᑕᐅᔪᑦ ᐃᖏᕋᓂᖏᑦ ᐊᒻᒪᓗ/ᐅᕝᕙᓘᓐᓃᑦ ᓴᕿᑦᑎᓗᑎᒃ ᓄᑕᓂᒃ ᐃᖏᕋᓂᐅᔪᒥᒃ, ᓱᕐᓗ ᐊᕿᒃᓱᕐᑕᐅᓯᒪᔪᒥᒃ, ᓴᓂᕐᕙᒃᑕᐅᓯᒪᔪᒥᒃ ᐅᕝᕙᓘᓐᓃᑦ ᐃᓄᖕᓄᑐᐊᖅ ᑐᕋᖓᔪᓂᒃ ᑭᓇᐅᔭᖃᕐᑎᑕᐅᔪᓂᒃ ᐊᐅᓚᓂᐅᔪᓂᒃ.
6.6.2.
ᑭᓇᐅᔭᖃᕐᑎᑕᐅᔪᑦ ᑐᕋᖓᒃᐸᑕ ᐃᓄᖕᓄᑦ, ᐱᖃᓯᐅᑎᓗᒋᑦ ᐃᓗᓕᖏᑦ ᑭᓇᐅᔭᖃᕐᑎᑕᐅᔪᒧᑦ ᐊᐅᓚᓂᖓᓄᑦ ᑭᓱᑐᐃᓐᓇᕐᒧᑦ ᐊᑐᕐᑕᐅᔪᓄᑦ ᐅᕝᕙᓘᓐᓃᑦ ᐊᐅᓚᓂᐅᔪᒧᑦ ᑐᕋᕐᑐᒧᑦ ᓄᓇᖃᕐᖃᕐᓯᒪᔪᓄᑦ ᑭᓇᒃᑯᑐᐃᓐᓇᕐᓄᑦ, ᐃᓄᖕᓄᑐᐊ ᑭᓇᐅᔭᖃᕈᑕᐅᔪᑦ ᑐᓂᔭᐅᓯᒪᔪᑦ ᓇᓗᓇᐃᕐᓯᒪᑦᑎᐊᕐᓗᑎᒃ ᐊᒻᒪᓗ ᐅᓂᒃᑲᐅᓯᐅᑦᑎᐊᕐᓗᑎᒃ.

7. ᕿᒥᕈᔭᐅᓂᖓ ᑕᓐᓇ ᐊᑐᐊᒐᖅ ᐊᒻᒪᓗ ᐊᑐᓕᕐᑎᑕᐅᓂᖓ

7.1.
ᐃᓄᐃᑦ−ᑯᐃᓐ ᑲᑎᖓᓗᑎᒃ ᖃᐅᔨᓴᖃᑦᑕᕐᓗᑎᒃ ᐊᒻᒪᓗ ᕿᒥᕈᖃᑦᑕᕐᓗᑎᒃ ᐊᑐᓕᕐᑎᑕᐅᓂᖓᓂᒃ ᑕᓐᓇ ᐊᑐᐊᒐᖅ ᐊᑐᕐᓗᒍ ᐃᓄᐃᑦ−ᑯᐃᓐ ᐸᓐᓇᒋᖕᓂᒃᑯᑦ ᑲᑎᒪᔨᑦ.
7.2.
ᖃᐅᔨᓴᕐᑕᐅᓂᖓ ᐊᒻᒪᓗ ᕿᒥᕈᔭᐅᓂᖓ ᒪᓕᒋᐊᓕᑦ ᑲᖏᖓᓗᑎᒃ ᓴᕿᑕᐅᓗᑎᒃ ᐊᒻᒪᓗ ᐊᑐᕐᑕᐅᓗᑎᒃ ᐊᑐᕐᓗᒍ ᐃᓄᐃᑦ−ᑯᐃᓐ ᐸᓐᓇᒋᖕᓂᒃᑯᑦ ᑲᑎᒪᔨᑦ ᐃᓗᐊᓂ ᑕᕿᑦ 12 ᐊᖏᕐᑕᐅᓯᒪᓕᕐᑎᓪᓗᒍ ᐊᑐᐊᒐᖅ ᐊᒻᒪᓗ ᐱᖃᓯᐅᑎᓯᒪᓗᓂ ᒪᓕᒋᐊᓕᖕᓂᒃ ᐊᒃᑐᐊᔪᓂᒃ ᐊᑐᑎᖃᕐᓗᓂ ᑲᓇᑕ ᒐᕙᒪᒃᑯᑦ ᑭᓇᐅᔭᖃᕐᑎᑦᑎᓂᖏᑦ ᐊᑐᐊᒐᐃᑦ, ᐊᐅᓚᑕᐅᔪᑦ, ᐱᔨᓯᕐᓂᐅᔪᑦ ᐊᒻᒪᓗ ᐱᒋᐊᕐᑕᐅᔪᑦ ᑐᕋᖓᔪᑦ ᐱᕙᓪᓕᐊᑕᐅᓂᐊᕐᑐᑦ ᐃᓄᖕᓄᑦ ᐊᒻᒪᓗ ᒪᓕᒃᓯᒪᓗᓂ ᑐᕋᒐᐅᔪᓂᒃ ᐃᓄᐃᑦ−ᑯᐃᓐ ᐊᖏᖃᑎᒋᒍᑎᑦ ᐊᑐᓕᕐᑎᑕᐅᓂᖏᑦ ᐱᓇᓱᒃᑕᐅᔪᑦ. ᒐᕙᒪᒃᑯᑦ ᑲᓇᑕ, ᓯᕗᑲᕐᑕᕐᓗᑎᒃ ᑯᐃᓐᕝᓄᓇᖃᕐᖃᕐᓯᒪᔪᑦ ᐱᓇᓱᖃᑎᒋᖕᓂᖏᑦ ᐊᒻᒪᓗ ᐅᑭᐅᕐᑕᕐᑐᒥ ᐱᓇᓱᒃᑕᐅᔪᑦ ᑲᓇᑕ, ᐊᕋᒍᑕᒪᑦ ᐅᓂᒃᑲᓕᐅᖃᑦᑕᕐᓗᑎᒃ ᐊᑐᓂ ᐱᕙᓪᓕᐊᑎᑕᐅᓯᒪᔪᑦ ᐃᑲᔪᕐᑎᒋᒃᓂᒃᑯᑦ ᖃᐅᔨᓴᕐᓂᖅ ᐊᒻᒪᓗ ᕿᒥᕈᓂᖅ ᒪᓕᒋᐊᓕᖕᓂᒃ. ᑕᓐᓇ ᑎᑎᕋᕐᓯᒪᔪᖅ ᐃᓄᑐᐃᓐᓇᕐᓄᑦ ᑕᑯᔭᐅᔪᓐᓴᕐᓗᓂ, ᐱᖃᓯᐅᑎᓗᒍ ᐃᓄᒃᑎᑐᑦ.
7.3.
ᑕᓐᓇ ᐊᑐᐊᒐᖅ ᕿᒥᕈᔭᐅᓂᐊᕐᐳᖅ, ᐊᒻᒪᓗ ᐊᕿᒋᐊᕐᑕᐅᓗᓂ ᐱᔭᕆᐊᖃᕈᓂ, ᐊᕋᒍᑕᒪᑦ ᓯᕗᓪᓕᕐᐸᖏᓐᓂ ᐱᖓᓱᑦ ᐊᕋᒍᐃᑦ ᐊᖏᕐᑕᐅᓯᒪᓕᕐᑎᓪᓗᒍ, ᐊᒻᒪᓗ ᐊᖃᒍᑦ ᐱᖓᓱᑦ ᐊᓂᒍᕋᖓᑕ ᑐᖓᓂᓗᓐᓂᑦ ᐃᓄᐃᑦ−ᑯᐃᓐ ᐸᓐᓇᒋᖕᓂᒃᑯᑦ ᑲᑎᒪᔨᑦ, ᐃᓚᐅᓗᑎᒃ ᑯᐃᓐ−ᓄᓇᖃᕐᖃᕐᓯᒪᔪᑦ ᐱᓇᓱᖃᑎᒋᖕᓂᒃᑯᑦ ᓯᕗᓕᕐᑎᐅᓗᑎᒃ ᑐᑭᒧᐊᒃᑎᑦᑎᓗᑎᒃ ᑲᓇᑕ ᒐᕙᒪᖏᑦ ᑐᓴᕐᕕᐅᓯᒪᓗᑎᒃ ᐊᐅᓚᓂᖓᓂᑦ.

ᑐᑭᒧᐊᒍᑎᑦ ᓇᓗᓇᐃᕐᑕᐅᓯᒪᔪᓄᑦ ᑐᕋᖓᔪᓄᑦ ᐊᐅᓚᓂᐅᔪᓄᒃ ᐊᒻᒪᓗ ᐊᑐᐊᒐᐃᑦ ᐃᓗᐊᓂ

ᖃᐅᔨᓴᖅᑐᓕᕆᓂᖅ

1.
ᖃᐅᔨᓴᕐᓂᖅ ᐱᔭᐅᓗᓂ ᐃᓄᐃᑦ ᓄᓇᖓᓂ ᐊᒻᒪᓗ ᐱᔾᔪᑎᖃᕐᓗᓂ ᐃᓄᖕᓂᒃ ᐱᓪᓚᕆᐅᕗᖅ ᐃᑲᔪᕐᑐᑕᐅᓗᓂ ᖃᐅᔨᒪᔭᐅᔪᒃᑯᑦᑐᖓᕕᖃᕐᓗᓂ ᐊᑐᐊᒐᐃᑦ ᐱᕙᓪᓕᐊᓂᖏᑦ ᐊᒻᒪᓗ ᐊᕿᒃᓱᐃᓂᕐᒧᑦ. ᓄᓇᓕᐅᔪᓂ ᓂᕈᐊᕐᑕᐅᖃᑦᑕᕐᓂᒃᑯᑦ, ᐃᓕᖁᓯᓕᕆᓂᒃᑯᑦ, ᐃᓄᓯᓕᕆᓂᖅ ᑭᓇᐅᔭᓕᕆᓂᖅ, ᓴᓇᕕᐅᔪᑦ ᐊᒻᒪᓗ ᓯᓚᐅᑉ ᐊᓯᓪᓕᕐᐸᓪᓕᐊᓂᖓᓄᑦ ᐊᒃᓱᕈᑕᐅᔪᑦ ᐃᓄᐃᑦ ᓄᓇᖓᓂ ᐱᔭᕆᐊᖃᕐᑐᑦ ᐊᔾᔨᐅᖏᑦᑐᒃᑯᑦ ᖃᓄᕐᑐᕈᓐᓴᕐᓂᖅ ᐊᕿᒍᑎᒃᓴᓂᒃ ᐊᑐᕐᑕᐅᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᐅᔨᓴᕐᓂᖅ ᐱᕙᓪᓕᐊᑎᑕᐅᓂᖓ ᐃᑲᔪᕐᑎᒋᔭᐅᓗᑎᒃ ᐸᓇᒋᔭᐅᓗᑎᒃ ᐃᓄᐃᑦ. ᐃᑲᔪᕐᑐᐃᓂᖅ ᐃᓄᐃᑦ ᓇᖕᒥᓂᖅ−ᐱᓇᓱᒍᒪᔭᖏᑦ ᖃᐅᔨᓴᕐᓂᕐᒧᑦ ᐱᔭᕆᐊᖃᕐᑐᖅ ᐱᐅᓯᒋᐊᕋᓱᒃᓗᒍ ᐊᑐᑎᖃᑦᑎᐊᕐᓂᖓ, ᐱᔭᒃᓴᐅᓂᖓ ᐊᒻᒪᓗ ᐊᖏᕐᑕᐅᓯᒪᓂᖓ ᐃᓄᐃᑦ ᓄᓇᖓᓂ. ᒪᓕᒃᓯᒪᓗᓂ ᑲᓇᑕᒥ ᐃᓄᐃᑦ ᑐᕋᒐᐅᔪᑦ ᖃᐅᔨᓴᕐᓂᕐᒧᑦ (ᐃᓄᐃᑦ ᑕᐱᕇᑦ ᑲᓇᑕᒥ, 2018),ᐊᒻᒪᓗ ᐊᑐᓕᕐᑎᑕᐅᓂᖓᓄᑦ ᐸᕐᓇᐅᑎᑦ, ᑕᓐᓇ ᐊᑐᐊᒐᖅ ᐱᑎᑦᑎᓇᓱᒃᐳᖅ ᐃᒃᐱᒍᓱᑦᑎᐊᕐᓂᕐᒥᒃ ᐊᒻᒪᓗ ᐃᑲᔪᕐᑐᐃᓪᓗᓂ ᐃᓄᐃᑦ ᓇᖕᒥᓂᖅ−ᐱᓇᓱᒍᒪᓂᖏᑦ ᖃᐅᔨᓴᕐᓂᕐᒧᑦ ᑲᓇᑕ ᒐᕙᒪᖏᑕ ᐱᓇᓱᒃᕕᖏᓐᓂ ᐃᖃᓴᐃᔭᕐᕕᖏᓐᓂᓪᓗ.
2.

ᐊᑐᕐᓗᒍ ᓴᕿᑕᐅᓂᖓ ᐊᒻᒪᓗ ᐊᑐᓕᕐᑎᑕᐅᓂᖓ ᑲᓇᑕ ᒐᕙᒪᖏᑕ ᖃᐅᔨᓴᕐᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᐊᐅᓚᑕᐅᔪᑦ, ᐊᑐᐊᒐᐃᑦ, ᐊᒻᒪᓗ ᐱᒋᐊᕐᑎᑕᐅᓯᒪᔪᑦ ᐃᓗᐊᓂ ᐃᓄᐃᑦ ᓄᓇᖓᑦ ᐅᕝᕙᓘᓐᓃᑦ ᑐᕋᒐᖃᕐᑐᑦ ᐃᓄᖕᓄᑦ, ᑲᓇᑕ ᑐᑭᒧᐊᒃᑎᑦᑎᓂᐊᕐᐳᖅ ᓯᕗᓪᓕᐅᖁᔭᐅᔪᑦ ᒪᓕᒃᓗᒋᑦ ᑲᓇᑕᒥ ᐃᓄᐃᑦ ᑐᕋᒐᐅᔪᑦ ᖃᐅᔨᓴᕐᓂᕐᒧᑦ:

  • ᖁᕙᕆᐊᕐᑕᐅᓗᑎᒃ ᐃᓄᐃᑦ ᐊᐅᓚᑦᑎᓂᖏᑦ ᖃᐅᔨᓴᕐᓂᕐᒧᑦ;
  • ᐱᐅᓯᒋᐊᕐᑕᐅᓗᓂ ᐃᓕᖁᓯᕆᔭᐅᔪᑦ ᖃᐅᔨᓴᕐᓂᐅᑦ ᐊᐅᓚᓂᖏᑦ;
  • ᑭᓇᐅᔭᖃᕐᑎᑕᐅᔪᑦ ᒪᓕᒃᓴᕐᓗᑎᒃ ᐃᓄᐃᑦ ᖃᐅᔨᓴᕐᓂᕐᒧᑦ ᓯᕗᓪᓕᐅᖁᔭᖏᓐᓄᑦ;
  • ᐃᓄᐃᑦ ᐱᓴᓱᒍᓐᓇᑦᑎᐊᕐᒪᖓᑕ ᖃᐅᔨᔭᐅᒋᐊᖃᑦᑕᕐᓗᓂ, ᐱᖁᑎᖃᕐᑎᐅᓗᑎᒃ ᐊᒻᒪᓗ ᐊᐅᓚᑦᑎᓗᑎᒃ ᑎᙱᕋᕐᑕᐅᔪᓂᒃ ᑎᑎᕋᕐᑕᐅᓯᒪᔪᓂᒃᓗ; ᐊᒻᒪᓗ
  • ᐱᔪᓐᓇᕐᓯᕙᓪᓕᐊᑎᑕᐅᓗᑎᒃ ᐃᓄᐃ ᓄᓇᖓᓂ ᖃᐅᔨᓴᕐᓂᕐᒥᒃ.
3.

ᐊᒻᒪᓗᑦᑕᐅᖅ ᐃᖏᕋᓂᖓ ᓇᓗᓇᐃᕐᑕᐅᓯᒪᔪᖅ ᐊᑐᐊᒐᕐᒥ, ᑲᓇ ᒐᕙᒪᖏᑕ ᑭᓇᐅᔭᖃᕐᑎᑕᖏᑦ ᐅᕝᕙᓘᓐᓃᑦ ᐊᐅᓚᑕᖏᑦ ᖃᐅᔨᓴᕐᓂᕐᒧᑦ ᐊᐅᓚᓂᐅᔪᑦ, ᐊᑐᐊᒐᐃᑦ, ᐊᒻᒪᓗ ᐱᒋᐊᕐᑕᐅᓯᒪᔪᑦ ᐃᓄᐃᑦ ᓄᓇᖓᓂ ᐊᒻᒪᓗ/ᐅᕝᕙᓘᓐᓃᑦ ᐱᔾᔪᑎᖃᕐᑐᑦ ᐃᓄᖕᓂᒃ ᐃᒪᐃᑦᑕᕆᐊᖃᕐᐳᑦ:

  • ᐃᑲᔪᕐᑎᒋᔭᐅᓗᑎᒃ ᐃᓄᐃᑦ ᐊᖏᖃᑎᒋᒍᑎᒃᑯᑦ ᑎᒥᐅᔪᑦ ᐅᕝᕙᓘᓐᓃᑦ ᑎᓕᓯᒪᔭᖏᑦ ᐱᕙᓪᓕᐊᑎᑦᑎᓗᑎᒃ ᓯᕗᓪᓕᐅᔭᕆᐊᓕᖕᓂᒃ ᐊᒻᒪᓗ ᖃᐅᔨᒪᔭᐅᔪᒃᑯᑦ ᑐᖓᕕᖃᕐᓗᑎᒃ ᐱᔭᕆᐊᖃᕐᑐᖅ ᑐᓴᐅᒪᔭᐅᖁᓪᓗᒍ ᐊᑐᐊᒐᕐᒥᒃ ᐱᕙᓪᓕᐊᑎᑦᑎᓂᖅ ᐊᒻᒪᓗ ᐊᕿᒃᓱᐃᓂᖅ;
  • ᐃᑲᔪᕐᑐᕐᑕᐅᓗᑎᒃ ᐃᓄᐃᑦ ᐸᓇᒋᔭᐅᓗᑎᒃ ᐃᓗᐊᓂ ᐊᒻᒪᓗ ᓯᕗᑲᕐᑕᕐᓗᑎᒃ ᖃᐅᔨᓴᕐᓂᕐᒥᒃ ᐃᓄᐃᑦ ᓄᓇᖓᓂ, ᐱᖃᓯᐅᑎᓗᒍ ᐱᔪᓐᓇᕐᓯᕙᓪᓕᐊᓂᖅ ᐊᒻᒪᓗ ᐃᓄᐃᑦ ᐱᔪᒪᓂᖏᑦ ᒪᓕᒃᓗᒋᑦ ᐱᓇᓱᒍᓐᓇᕐᓗᑎᒃ, ᐱᖁᑎᖃᕐᓗᑎᒃ ᐊᒻᒪᓗ ᐊᐅᓚᑦᑎᓗᑎᒃ ᑎᑎᕋᕐᓯᒪᔪᓂᒃ ᐊᒻᒪᓗ ᑎᑎᕋᕐᑕᐅᓯᒪᔪᓂᒃ;
  • ᐃᑲᔪᕐᑐᕐᑕᐅᓗᑎᒃ ᐱᕙᓪᓕᐊᓂᖓ, ᐊᒻᒪᓗ ᒪᓕᒃᓗᒋᑦ ᑐᑭᒧᐊᒍᑕᐅᔪᑦ ᐊᒻᒪᓗ ᐊᐅᓚᓂᐅᔪᑦ, ᐃᓄᐃᑦ ᙳᓄᑲᕐᑕᕐᓗᑎᒃ ᖃᐅᔨᓴᕐᓂᐅᔪᑦ ᐃᓕᖁᓯᖓᓂᒃ ᑲᑎᒪᔨᐅᔪᑦ ᐊᒻᒪᓗ ᑲᑎᒪᔨᕋᓚᖑᔪᑦ ᐃᑲᔪᕐᑕᐅᓗᑎᒃ ᑲᓇᑕ ᒐᕙᒪᖏᑦ ᖃᐅᔨᓴᕐᓂᕐᒧᑦ ᒪᓕᒃᓯᒪᖁᓪᓗᒍ ᐃᓄᐃᑦ ᖃᐅᔨᓴᕐᓂᕐᒧᑦ ᓯᕗᓪᓕᐅᖁᔭᖏᓐᓂᒃ; ᐊᒻᒪᓗ
  • ᐱᐅᓯᒋᐊᕐᓗᒍ ᑐᑭᒧᐊᒃᑎᑕᐅᓂᖓ ᖃᐅᔨᓴᕐᓂᖅ ᑲᓇᑕ ᒐᕙᒪᖏᑕ ᐱᓇᓱᒃᕕᖏᓐᓂ ᐊᒻᒪᓗ ᐃᖃᓇᐃᔭᕐᕕᖏᓐᓂ ᐃᓄᐃᑦ ᓄᓇᖓᓂ ᐃᒃᐱᖕᓇᕐᓂᕐᓴᐅᖁᓪᓗᒍ ᖃᐅᔨᓴᕐᓂᖅ ᑭᓇᐅᔭᖃᕐᑎᑕᐅᔪᑦ ᐱᕙᓪᓕᐊᓂᖏᓐᓄᑦ ᓄᓇᓕᒐᓚᖃᕐᕕᐅᔪᑦ ᐃᓄᖏᓪᓗ.

ᑲᓇᑕ ᒐᕙᒪᖏᑦ ᐊᑭᑦᑐᕋᐅᑎᓂᒃᑯᑦ

1.

ᐊᔾᔨᒋᒃᑎᑕᐅᓂᖏᑦ ᐊᒻᒪᓗ ᐱᖃᑕᐅᓂᖏᑦ ᐱᓇᓱᒍᓐᓇᕐᓗᑎᒃ ᑲᓇᑕ ᒐᕙᒪᖏᑕ ᐊᑭᑦᑐᕋᐅᑎᔾᔪᑎᖏᓐᓂ ᐃᓄᐃᑦ ᓄᓇᖓᓂ ᐱᒧᓐᓴᕐᓯᕙᓪᓕᕈᑕᐅᓂᐊᕐᒪᑦ ᑭᓴᐅᑎᒍᑦ ᐱᕙᓪᓕᐊᓂᖏᑦ ᐊᒻᒪᓗ ᐃᑲᔪᕐᑐᐃᓗᓂ ᓄᑕᓂᒃ ᐊᒻᒪᓗ ᐱᑕᖃᕐᐸᒋᕐᑐᓂᒃ ᐃᓄᖕᓄᒃ ᑭᓇᐅᔭᒃᓴᕈᑕᐅᔪᓄᑦ ᐃᓄᐃᑦ ᓄᓇᖓᓂ. ᐱᔭᕆᕐᑕᐅᓂᖓ ᐱᑕᖃᕐᐸᒋᕐᑐᑦ ᐊᖏᖃᑎᒋᒍᑎᑦ ᐱᔭᕆᐊᖃᕐᓂᖏᑦ ᐊᒻᒪᓗ ᐃᑲᔪᕐᑐᐃᓗᑎᒃ ᑲᑎᖓᓗᑎᒃ ᑭᓴᐅᔭᒃᓴᕕᐅᔪᑦ ᐃᓄᖕᓄᑦ ᑭᓇᐅᔭᕐᓴᕐᕕᐅᔪᑦ ᐃᓄᐃᑦ ᓄᓇᖏᓐᓂ ᐱᓪᓚᕆᐅᕗᖅ ᑕᒪᑐᒧᖓ ᐱᓇᓱᒃᑕᐅᔪᒧᑦ. ᑕᒃᑯᐊ ᐱᓇᓱᒃᓗᒋᑦ ᑲᔪᓯᒋᐊᕐᓗᒋᑦ, ᑲᓇᑕ ᒐᕙᒪᖏᑦ ᐃᒪᐃᓐᓂᐊᕐᐳᑦ, ᒪᓕᒃᓗᒋᑦ ᐊᑐᕆᐊᖃᕐᑐᑦ ᐊᖏᖃᑎᒋᒍᑕᐅᔪᑦ ᐊᒻᒪᓗ ᐱᖁᔭᑎᒍᑦ ᐱᔭᕆᐊᓕᑦ, ᐱᖃᓯᐅᑎᓗᒋᑦ ᒐᕙᒪᒃᑯᑦ ᐊᑭᑦᑐᕋᐅᑎᓂᕐᒧᑦ ᒪᓕᒐᐃᑦ, ᐃᖃᓇᐃᔭᖃᑎᖃᕐᓗᑎᒃ ᐃᓄᖕᓂᒃ ᐃᒪᐃᓐᓇᓱᒃᓗᑎᒃ:

  • ᐊᕿᒃᓯᓗᑎᒃ ᐊᑐᕐᑕᐅᔪᓐᓇᕐᑐᓂᒃ, ᑐᑭᒧᐊᒍᑕᐅᔪᓐᓇᕐᑐᓂᒃ ᐊᒻᒪᓗ ᐊᑐᐊᒐᐅᔪᓂᒃ ᐊᑐᓕᕐᑎᑕᐅᓇᓱᒃᑎᓪᓗᒋᑦ ᐊᔪᓐᓇᕈᑕᐅᔪᑦ ᐊᒻᒪᓗ ᑲᓇᑕ ᒐᕙᒪᖏᑦ ᐊᑭᑦᑐᕋᐅᑎᓂᕐᒧᑦ ᐃᖃᓇᐃᔭᕐᑎᐅᔪᑦ ᐱᔪᓐᓇᕐᓂᕐᓴᐅᖁᓪᓗᒋᑦ ᐃᓕᓐᓂᐊᕐᓯᒪᓗᑎᒃᓗ ᑕᒪᕐᒥᒃ ᒪᓕᒋᐊᓕᑦ ᐊᑭᑦᑐᕋᐅᑎᓂᕐᒧᑦ ᐱᔭᕆᐊᓕᑦ ᐊᕿᒃᓯᒪᔪᑦ ᐃᓄᐃᑦ−ᑯᐃᓐ ᐊᖏᖃᑎᒋᒍᑎᒃᑯᑦ;
  • ᓴᓇᓗᑎᒃ ᐊᒻᒪᓗ ᐱᑕᖃᕐᑎᑦᑎᓗᑎᒃ ᐃᓄᐃᑦ ᑭᓴᐅᔭᒃᓴᕐᕕᖏᓐᓂᒃ ᐱᔪᓐᓇᕐᓯᑎᑕᐅᓗᑎᒃ ᐊᑭᑦᑐᕋᐅᑎᓂᕐᒧᑦ ᐃᒪᐅᖃᑕᐅᔪᓐᓇᕐᓯᓗᑎᒃ ᒐᕙᒪᒃᑯᑦ ᐊᑭᑦᑐᕋᐅᑎᓂᖏᓐᓄᑦ ᓯᕗᓪᓕᐅᔭᐅᔭᕆᐊᓕᑦ ᐃᓄᐃᑦ ᐱᓇᓱᒍᓐᓇᕐᓂᖏᑦ ᑲᓇᑕ ᒐᕙᒪᖏᑕ ᐊᑭᑦᑐᕋᐅᑎᖏᓐᓄᑦ, ᐊᑐᕐᓗᒋᑦ ᐱᑕᖃᕐᐸᒋᕐᑐᑦ ᐊᑐᕐᑕᐅᔪᑦ ᓱᕐᓗ ᑕᐃᒃᑯᐊ ᓇᓗᓇᐃᕐᑕᐅᓯᒪᔪᑦ ᓄᓇᕗᒧᑦ ᑐᕋᖓᔪᑦ ᐊᑭᑦᑐᕋᐅᑎᓂᕐᒧᑦ ᐊᑐᐊᒐᐃᑦ ᑎᔨᓯᔾᔪᑕᐅᔪᑦ, ᐊᒻᒪᓗ ᐱᕙᓪᓕᐊᑎᑦᑎᖃᑎᒋᒃᓗᑎᒃ ᑐᑭᐊᒃᑎᑦᑎᓗᑎᒃ ᒪᓕᒃᓗᒋᑦ ᐱᔭᕆᐊᓕᑦ ᐃᓄᐃᑦ−ᑯᐃᓐ ᐊᖏᖃᑎᒋᒍᑎᑦ ᐊᑭᑦᑐᕋᐅᑎᓂᕐᒧᑦ ᐱᔭᕆᐊᓕᑦ; ᐊᒻᒪᓗ
  • ᓇᓗᓇᐃᕐᑕᐅᓗᑎᒃ ᐊᒻᒪᓗ ᐱᔾᔪᑕᐅᓗᑎᒃ ᐊᔪᕈᑕᐅᔪᑦ ᐃᓄᖕᓄᑦ ᐱᓇᓱᒃᑎᓪᓗᒋᑦ ᐊᑭᑦᑐᕋᐅᑎᓂᕐᒥᒃ ᐱᕕᖃᕐᓂᐅᔪᓂᒃ, ᐱᐅᓯᒋᐊᕐᓗᒋᑦ ᐱᔭᒋᔭᕐᓯᒪᓂᖏᑦ ᐃᓄᐃᑦ ᑭᓇᐅᔭᒃᓴᕐᕕᖏᑦ ᐱᓇᓱᖃᑕᐅᔪᓐᓇᕐᓂᖏᑦ, ᐊᒻᒪᓗ ᐱᖃᑕᐅᑎᑦᑎᓂᕐᒥᒃ ᐱᑎᑦᑎᓇᓱᒃᓗᑎᒃ ᐊᑭᑦᑐᕋᐅᑎᓂᒃᑯᑦ ᐃᓗᐊᓂ ᐊᒻᒪᓗ ᐱᖃᑕᐅᓗᑎᒃ ᐃᓄᐃᑦ ᓄᓇᖏᓐᓂ.

ᐃᐅᒍᖓ 1 − ᐃᓄᐃᑦ ᓄᓇᓕᖏᑦ

ᐃᓅᕕᐊᓗᐃᑦ ᐊᕕᒃᑐᖅᓯᒪᕕᐊᓂ

ᓄᓇᕗᑦ

ᓄᓇᕕᒃ

ᓄᓇᑦᓯᐊᕗᑦ

ᐅᓪᓗᖓᓂ ᐋᖅᑭᒋᐊᖅᑕᐅᔪᖅ:
sasasas