ᓄᓇᕗᑦ ᓄᓇᖏᓐᓂᒃ ᓄᓇᒦᓐᖔᖅᑐᓂᓪᓗ ᐊᐅᓚᑦᓯᔪᓐᓇᐅᑎᑖᕐᐸᓪᓕᐊᓂᕐᒧᑦ ᐊᖏᕈᑕᐅᒋᐊᓐᖓᖅᑐᖅ

ᓇᓗᓇᐃᒃᑯᑕᑦ ᐊᒻᒪᓗ ᐱᓕᕆᒡᕕᒻᒥ ᖃᐅᔨᒋᐊᕐᕕᒃᓴᑦ

1.2 ᓇᓗᓇᐃᒃᑯᑕᑦ ᐊᑐᖅᑕᐅᔪᑦ ᑖᒃᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐊᒻᒪᓗ ᐊᕕᑦᑐᕐᓯᒪᔪᑦ ᑎᑎᕋᖅᓯᒪᓂᖏᑎᒍᑦ, ᐊᕕᑦᑐᕐᓯᓂᖏᓐᓄᑦ, ᐊᕕᑦᑐᕐᓯᒪᓂᐊᕈᓯᖏᓐᓄᑦ, ᑎᑎᕋᖅᓯᒪᔪᓄᑦ, ᐋᖅᑭᑦᓯᒪᔭᐅᔪᓄᑦ ᐊᒻᒪᓗ ᐊᓯᖏᓐᓄᑦ ᐊᕕᑦᑐᕐᓯᒪᓂᐊᕈᓯᕐᓄᑦ ᐊᒃᑐᐃᓂᖃᓐᖏᓚᑦ ᑐᑭᓕᐊᖑᓯᒪᓂᖏᓐᓂᒃ. ᑭᓯᐊᓂ ᐃᓗᓕᖏᑦ ᐊᓯᐊᒍᑦ ᐱᔭᕆᐊᖃᕐᐸᑕ, ᖃᐅᔨᒋᐊᕐᕕᒃᓴᑦ ᑖᒃᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᑎᑎᕋᖅᓯᒪᓂᖏᑦ, ᐊᕕᑦᑐᕐᓯᒪᓂᖏᑦ, ᑎᑎᕋᖅᑕᐅᓯᒪᔪᑦ, ᐋᖅᑭᑦᓯᒪᔭᐅᔪᑦ ᐊᒻᖁᒪᓗ ᐊᓯᖏᑦ ᐊᕕᑦᑐᕐᓯᒪᓂᐊᕈᓰᑦ ᑖᒃᑯᓄᓐᖓᖓᑉᐸᑕ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ−ᓄᑦ.

ᖃᐅᔨᒋᐊᕐᕕᒃᓴᖅ ᒪᓕᒐᕐᓅᖓᔪᓄᑦ

1.3 ᑭᓯᐊᓂ ᐊᓯᐊᒍᑦ ᓇᓗᓇᐃᖅᑕᐅᓯᒪᑉᐸᑦ, ᖃᐅᔨᒋᐊᕐᕕᒃᓴᑦ ᑖᒃᑯᓄᖓ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᒪᓕᒐᕐᓅᖓᔪᓂᒃ ᐃᓚᒋᔭᐅᓪᓗᑎᒃ ᐊᐅᓚᑦᓯᔾᔪᑎᓕᒫᑦ ᐊᒻᒪᓗ ᐊᐃᑉᐸᕈᑕᖏᑦ ᒪᓕᒐᑦᓴᓕᐊᖑᓯᒪᔪᑦ ᑖᒃᑯᑎᒎᓇ ᒪᓕᒐᖅᑎᒍᑦ.

1.4 ᑭᓯᐊᓂ ᐊᓯᐊᒍᑦ ᓇᓗᓇᐃᖅᑕᐅᓯᒪᑉᐸᑦ, ᖃᐅᔨᒋᐊᕐᕕᒃᓴᑦ ᒪᓕᒐᑦᓴᓄᑦ ᑕᑯᓐᓇᖅᑕᐅᒋᐊᓖᑦ ᖃᐅᔨᒋᐊᕐᕕᒃᓴᓂᒃ ᑕᑉᕗᖓ ᒪᓕᒐᑦᓴᒧᑦ ᐃᓚᒋᐊᖅᑕᐅᓯᒪᓂᖓᓄᑦ, ᐋᖅᑭᒋᐊᖅᑕᐅᓯᒪᓂᖓᒍᑦ, ᐅᖃᐅᓯᖏᑦ ᐊᓯᔾᔨᖅᑕᐅᓯᒪᓂᖏᓐᓂᒃ, ᐃᓚᒋᐊᕈᑕᐅᓯᒪᔪᓄᑦ, ᐅᐃᒍᔭᐅᓯᒪᓂᖓᓄᑦ, ᑲᔪᓯᑎᑕᐅᓯᒪᒃᑲᓂᕐᓂᖓᓄᑦ, ᑕᐅᖅᓯᖅᑕᐅᓯᒪᓂᖓᓄᑦ ᐅᑉᕙᓘᓐᓃᑦ ᑭᖑᑉᕕᐅᑕᐅᓯᒪᔪᒧᑦ ᖃᖓᓕᒫᖅ.

ᓈᓴᐅᑦ

1.5 ᑭᓯᐊᓂ ᐃᓗᓕᖏᓐᓂ ᐱᔭᕆᐊᖃᕐᐸᑦ, ᐅᖃᐅᓯᖅᑕᑦ ᑐᕌᖔᖅᑎᑕᐅᔪᑦ ᐊᑕᐅᓯᕐᒧᑦ ᓈᓴᐅᒻᒧᑦ ᐃᓚᒋᔭᐅᓪᓗᑎᒃ ᐅᓄᖅᑐᓅᖓᔪᑦ ᐊᒻᒪᓗ ᑭᐳᓪᓗᒍ.

ᐊᑐᖅᑕᐅᓂᖓ ᐅᖃᐅᓯᖅ "ᐃᓚᒋᔭᐅᓪᓗᑎᒃ"

1.6 ᑭᓯᐊᓂ ᐊᓯᐊᒍᑦ ᓇᓗᓇᐃᖅᑕᐅᓯᒪᑉᐸᑦ, ᐊᑐᖅᑕᐅᓂᖓ ᐅᖃᐅᓯᖅ "ᐃᓚᒋᔭᐅᓪᓗᑎᒃ" ᑐᑭᓕ "ᐃᓚᒋᔭᐅᓪᓗᑎᒃ ᑭᒡᓕᖃᖅᑎᑕᐅᒐᑎᒃ", ᐊᒻᒪᓗ ᐊᑐᖅᑕᐅᓂᖓ ᐅᖃᐅᓯᖅ "ᐃᓚᒋᔭᐅᓪᓗᑎᒃ" ᑐᑭᓕᒃ "ᐃᓚᒋᔭᐅᓪᓗᑎᒃ ᑭᒡᓕᖃᖅᑎᑕᐅᒐᑎᒃ."

ᓇᓗᓇᐃᕐᓯᒍᑎ ᐱᓇᓱᐊᖃᑕᐅᔪᒧᑦ

1.7 ᓇᓗᓇᐃᕐᓯᒪᔭᐅᔪᖅ ᐊᑕᐅᓯᕐᒧᑦ ᐱᓇᓱᐊᖃᑕᐅᔪᒧᑦ ᒪᕐᕉᓄᓪᓘᓐᓃᑦ ᐱᓇᓱᐊᖃᑕᐅᔫᓐᓄᑦ ᑎᑎᕋᖅᓯᒪᓂᖏᓐᓂ ᑖᒃᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᑐᑭᓕᐅᖅᑕᐅᔭᕆᐊᖃᓐᖏᓚᖅ ᓇᓗᓇᐃᕐᓯᒍᑕᐅᓂᖓᓂᒃ ᐅᑉᕙᓘᓐᓃᑦ ᐋᖅᑭᑦᑕᐅᓯᒪᔪᓂᒃ ᐱᓇᓱᐊᒐᑦᓴᓕᒫᓂᒃ ᐅᑉᕙᓘᓐᓃᑦ ᓇᓗᓇᐃᕐᓯᓂᖏᓐᓂᒃ ᐱᓇᓱᐊᖃᑕᐅᔪᑦ ᐅᖃᐅᓯᐅᓐᖏᑦᑐᑦ ᑖᒃᑯᓇᓂ ᑎᑎᕋᖅᓯᒪᓂᖏᓐᓂ.

ᐅᐃᒍᐃᑦ

1.8 ᑭᓯᐊᓂ ᐊᓯᐊᒍᑦ ᓇᓗᓇᐃᖅᑕᐅᓯᒪᑉᐸᑦ ᐅᐃᒍᐃᑦ ᑖᒃᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐋᖅᑭᑦᓯᒪᓂᖏᑎᒍᑦ ᐃᓚᖓᒍᑦ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐋᖅᑭᑦᓯᒪᔭᐅᑉᐸᑦ ᐃᓗᓕᖏᓐᓂ ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ.

ᐊᑎᕐᒥᓂᒃ ᓇᓗᓇᐃᒃᑯᑦᓰᒍᑎᑦ ᐊᒻᒪᓗ ᐊᖏᖅᑕᐅᓂᖏᑦ ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ

2.2 ᐊᑎᕐᒥᓂᒃ ᓇᓗᓇᐃᒃᑯᑦᓰᒍᑏᑦ ᑖᒃᑯᓄᖓ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐊᐃᕙᔨᒻᒪᕆᒻᒧᑦ ᐱᓇᓱᐊᖃᑕᐅᔪᒧᑦ ᓴᖅᑮᒍᑖ ᐊᑐᓕᖁᔨᔾᔪᑎᒥᓂᒃ ᐊᖏᖅᑕᐅᒋᐊᓕᒻᒥᒃ ᐊᒻᒪᓗ ᐊᑎᕐᒥᓂᒃ ᓇᓗᓇᐃᒃᑯᓰᓚᐅᖅᑎᓪᓗᒍ ᐊᐃᕙᔨᒻᒪᕆᒃ ᑐᓂᓯᔭᕆᐊᓕᒃ ᐊᑎᕐᒥᓂᒃ ᓇᓗᓇᐃᒃᑯᓯᕐᓯᒪᔪᒥᒃ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐊᖓᔪᖅᑳᕆᔭᒥᓄᑦ ᐃᓱᒪᒃᓴᕐᓯᐅᕈᑎᒃᓴᐅᓗᓂ ᐊᖏᖅᑕᐅᓇᓱᐊᕈᑎᒃᓴᖓᓄᑦ.

2.3 ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐊᑐᓕᕐᓂᐊᖅᑐᖅ ᐊᑎᓕᐅᖅᑕᐅᓚᐅᖅᑎᓪᓗᒍ ᐱᓇᓱᐊᖃᑎᒌᑦᑐᓄᑦ.

ᑐᓴᕆᐊᕈᑎᖃᕐᓂᖅ

2.4 ᐱᓇᓱᐊᖃᑎᒌᑦᑐᑦ ᓇᓗᓇᐃᕆᔪᑦ ᑭᖑᓂᐊᒍᑦ ᓇᓗᓇᐃᕐᓯᒍᑏᑦ ᐊᑎᕐᒥᓂ ᑖᒃᑯᓄᖓ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ−ᓄᑦ ᐅᖃᐅᓯᐅᔪᒥᒃ ᐊᕕᑦᑐᕐᓯᒪᓂᖓᓂ 2.2, ᑭᓯᐊᓂ ᑐᖔᒍᑦ ᐊᖏᖅᑕᐅᓂᕆᓚᐅᖅᑕᖓᑕ GC−ᑯᓐᓂᒃ, GC ᑐᓴᕆᐊᕐᕕᖃᕆᐊᓖᑦ ᐃᓚᖏᓐᓂᒃ ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᖏᓐᓂᒃ ᑖᒃᑯᓄᖓ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ−ᓅᖓᔪᓂᒃ ᐊᒻᒪᓗ ᑐᓴᕆᐊᕐᕕᖃᕐᓂᖓ ᓴᖅᑮᒍᓐᓇᖅᑐᖅ GC−ᑯᑦ ᑐᒃᓯᕋᐅᑎᖏᓐᓂᒃ GN−ᑯᑦ ᐊᒻᒪᓗ NTI−ᑯᑦ ᐋᖅᑭᒋᐊᕆᖁᔨᔾᔪᑎᖏᓐᓂᒃ ᐊᑎᕐᒥᒍᑦ ᓇᓗᓇᐃᒃᑯᓯᖅᑕᐅᓯᒪᔪᒥᒃ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐃᓚᓕᐅᔾᔭᐅᖁᓪᓗᒋᑦ ᐃᓱᒫᓘᑎᖏᑦ ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᑦ ᑐᓴᕆᐊᕐᓂᐅᔪᓃᓐᖔᖅᑐᑦ ᐸᕐᓇᑕᐅᓯᒪᔪᓂ ᑕᕐᕙᓂ ᑎᑎᕋᖅᓯᒪᓂᖓᓂ 2.4.

2.5 ᐊᐅᓚᑦᓯᒍᓐᓇᖁᓪᓗᒋᑦ ᑐᓴᕆᐊᕐᓂᐅᔪᓂᒃ ᑲᒪᒋᔭᐅᒍᓐᓇᖅᑐᓂᒃ ᐊᑐᓂᑦ ᐱᓇᓱᐊᖃᑎᒌᑦᑐᓄᑦ ᓇᓗᓇᐃᖅᑕᐅᒌᕐᐸᑦ ᐊᑎᕐᒥᒍᑦ ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐅᖃᐅᓯᐅᔪᖅ ᑎᑎᕋᖅᓯᒪᓂᖓᓂ 2.2, ᐊᑎᕐᒥᒍᑦ ᓇᓗᓇᐃᖅᑕᐅᓯᒪᔪᖅ ᑎᑎᕋᕆᐊᓐᖓᐅᑦ ᑖᒃᑯᓄᖓ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᑎᑎᖅᑕᐅᔭᕆᐊᖃᓐᖏᑦᑐᖅ ᐅᑉᕙᓘᓐᓃᑦ ᑲᓐᖑᓇᖅᑎᑕᐅᓂᕋᖅᑕᐅᒋᐊᖃᓐᖏᑦᑐᖅ.

2.6 ᐱᓇᓱᐊᖃᑎᒌᑦᑐᑦ ᓇᓗᓇᐃᕆᕗᑦ ᐊᑎᓕᐅᖅᑕᐅᓚᐅᑎᓪᓗᒍ ᑖᓐᓇ AIP, ᑐᓴᕆᐊᕐᕕᒋᔭᐅᓂᖏᑦ ᓇᓗᓇᐃᖅᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᖏᑦ ᑲᔪᒋᐊᖃᕐᓂᐊᖅᑐᑦ ᐊᒻᒪᓗ ᑐᓴᕆᐊᕐᕕᐅᓂᖏᑦ ᓴᖅᑭᕈᑕᐅᒍᓐᓇᕐᓗᑎᒃ GC ᑐᒃᓯᕋᐅᑎᖓᓂᒃ GN−ᑯᓐᓂᒃ ᐊᒻᒪᓗ ᑐᓐᖓᕕᒃᑯᓐᓅᖓᔪᓂᒃ ᑎᑎᕋᕐᓯᒪᔪᓂᒃ ᐃᓚᓕᐅᔾᔭᐅᒍᑎᒃᓴᖏᓐᓂᒃ ᐊᐅᓚᑦᓯᔪᓐᓇᐅᑎᓄᑦ ᐊᖏᖃᑎᒌᒍᑎᓂᒃ ᐃᓚᓕᐅᔾᔭᐅᖁᓪᓗᒋᑦ ᐃᓱᒫᓘᑕᐅᔪᑦ ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᖏᓐᓂᒃ ᐊᒃᑐᖅᑕᐅᓂᖃᑐᐃᓐᓇᕆᐊᓕᖕᓄᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᐅᓚᑕᐅᓂᖏᓐᓂ ᐱᔪᓐᓇᐅᑎᖃᕐᕕᒋᔭᒥᒍᑦ ᐊᕕᑦᑐᕐᓯᒪᓂᖓᒍᑦ 35 ᑐᓐᖓᕕᔾᔪᐊᖅ ᐱᖁᔭᖓᒍᑦ, 1982. ᐱᓇᓱᐊᖃᑎᒌᑦᑐᑦ ᓇᓗᓇᐃᕐᓯᒋᐊᒃᑲᓂᕐᐳᑦ ᑐᒃᓯᕋᐅᑏᑦ ᑎᑎᕋᕐᓯᒪᓂᖏᓐᓂᒃ ᐊᔾᔨᒋᓐᖏᑐᐃᓐᓇᕆᐊᖃᕐᒪᒋᑦ ᑎᑎᕋᕐᓯᒪᓂᖏᓐᓃᑦᑐᑦ AIP.

2.7 ᑕᐃᒪᐃᒐᓗᐊᖅᑎᓪᓗᒍ ᐊᓯᓕᒫᖏᑦ ᑎᑎᕋᕐᓯᒪᓂᖏᓐᓂ AIP, ᓄᓇᑦ ᑕᒫᓂ Ghotelnene K’odtįneh ᑎᓂᓱᓕᓐ ᐊᓪᓚᐃᑦ ᓇᓗᓇᐃᖅᑕᐅᓯᒪᔪᑦ ᓄᓇᖁᑎᖏᑦ ᐊᒻᒪᓗ ᐋᑕᐹᔅᑲ ᑎᓂᓱᓕᓐ ᐊᓪᓚᐃᑦ ᓄᓇᖁᑎᖏᑦ ᓇᓗᓇᐃᖅᑕᐅᓯᒪᔪᑦ ᐃᓚᓕᐅᔾᔭᐅᒋᐊᖃᓐᖏᓚᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᓄᒃᑎᖅᑕᐅᒋᐊᓖᑦ GN−ᑯᓐᓄᑦ ᒪᓕᓪᓗᒍ ᐊᕕᑦᑐᕐᓯᒪᓂᖓ 5.1 ᑭᓯᐊᓂ GC−ᑯᑦ ᑲᒪᒋᔭᖃᓕᕐᐸᑕ ᑐᓴᕆᐊᒃᑲᓐᓂᕐᓂᕐᒥᒃ, ᐃᓚᒋᔭᐅᓗᑎᒃ ᐃᓱᒪᒃᓴᕐᓯᐅᕈᑎᒃᓴᑦ ᓇᓕᑐᐃᓐᓇᖏᓐᓄᑦ ᓈᖕᒪᑦᑐᓂᒃ ᐃᓂᒃᓴᖃᕐᓂᕐᒧᑦ, Ghotelnene K’odtįneh ᑎᓂᓱᓕᓐ ᐊᓪᓚᐃᑦ ᐊᒻᒪᓗ ᐋᑕᐹᔅᑲ ᑎᓂᓱᓕᓐ ᐊᓪᓚᐃᑦ.

ᓇᓕᒧᖏᓐᓂᒃ ᐱᓇᓱᐊᒐᖃᖅᑐᑦ

2.8 ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᑲᔪᓯᑎᑕᐅᔪᓐᓇᖅᑐᖅ ᐃᖕᒥᒃᑰᖓᓗᑎᒃ ᐱᓕᕆᐊᖑᕙᓪᓕᐊᔪᑦ, ᐊᒻᒪᓗ ᐱᓕᕆᐊᖑᕙᓪᓕᐊᓂᖏᑎᒍᑦ ᑲᔪᓯᑎᑕᐅᕙᓪᓕᐊᔪᑦ ᐊᑕᐅᑦᓯᒃᑯᑦ ᑐᓐᖓᕕᒋᔭᐅᓂᕋᖅᑕᐅᓂᐊᖅᑐᑦ ᐊᑕᐅᓯᕐᒧᑦ ᑖᑦᓱᒧᖓᑦᓴᐃᓐᓇᖅ ᐱᓇᓱᐊᕈᑕᐅᔪᒧᑦ.

ᒪᓕᒐᖅᑎᒍᑦ ᖃᓄᐃᓕᖓᓂᐅᔪᑦ

2.9 ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᒪᓕᒐᖅᑎᒍᑦ ᐊᑕᐅᑎᓐᖏᑦᑐᑦ, ᑕᑉᐲᓯᒪᓐᖏᑦᑐᑦ ᒪᓕᒐᖅᑎᒎᖓᔪᓂᒃ ᑭᓇᑐᐃᓐᓇᕐᒧᑦ ᐅᑉᕙᓘᓐᓃᑦ ᐱᓇᓱᐊᖃᑕᐅᔪᒧᑦ ᐊᒻᒪᓗ ᑐᑭᓕᐅᖅᑕᐅᓯᒪᓐᖏᑦᑐᖅ ᓴᖅᑮᓂᕐᒥᒃ, ᐃᓕᓴᕐᓯᒪᓂᕐᒥᒃ ᐅᑉᕙᓘᓐᓃᑦ ᕿᐱᓗᓐᓂᕐᒥᒃ ᐱᔪᓐᓇᐅᑕᐅᔪᓂᒃ ᐱᓇᓱᐊᒐᑦᓴᐅᔪᓂᓪᓘᓐᓃᑦ.

2.10 ᐱᓇᓱᐊᖃᑕᐅᔪᑦ ᐃᓕᓴᕐᓯᕗᑦ ᐊᖏᕈᑎᖃᖅᑐᑎᓪᓗ ᐊᑐᓂᑦ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐊᒻᒪᓗ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐃᓱᓕᒍᑎᖃᕐᓯᒪᓂᖏᓐᓂᒃ ᑕᑉᐱᖅᑕᐅᓯᒪᒐᑎᒃ ᐃᓂᖏᓐᓂᒃ ᐱᓇᓱᐊᖃᑕᐅᔪᑦ ᑐᑭᓕᐅᖅᑕᐅᓯᒪᓂᖏᑎᒍᑦ ᑭᒡᓕᓕᐊᖑᓯᒪᓂᖏᑦ ᓄᓇᕗᒻᒥ ᓇᓗᓇᐃᖅᑕᐅᓯᒪᔪᒃᑯᑦ ᑎᑎᕋᖅᓯᒪᓂᖓᓂ 3 ᓄᓇᕗᑦ ᐱᖁᔭᖓᓂ (ᑲᓇᑕ).

ᑮᓇᐅᔭᐃᑦ ᑐᓂᐅᖅᑲᖅᑕᐅᕙᖕᓂᖏᑦ

2.11 ᑭᒡᓕᖃᖅᑎᑕᐅᓐᖏᓪᓗᑎᒃ ᑎᑎᕋᖅᓯᒪᓂᖏᓐᓃᑦᑐᑦ 2.7, ᐱᓇᓱᐊᖃᑎᒌᑦᑐᑦ ᓇᓗᓇᐃᕐᓯᕗᑦ ᓇᓕᑐᐃᓐᓇᖏᑦ GC ᐊᖏᕈᑎᒋᓯᒪᔭᖏᑦ ᐊᑭᓖᓂᐊᕐᓂᕐᒧᑦ ᐅᑉᕙᓘᓐᓃᑦ ᐊᑐᐃᓐᓇᐅᑎᑦᓯᓂᐊᕐᓂᕐᒧᑦ ᖃᑦᓯᑐᐃᓐᓇᕐᓂᒃ ᑮᓇᐅᔭᓂᒃ ᒪᓕᓪᓗᒋᑦ ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, ᐃᓚᒋᔭᐅᓗᑎᒃ ᐅᓄᕐᓂᖏᑦ ᓇᓗᓇᐃᕐᓯᒪᔪᑦ ᑎᑎᕋᕐᓂᖓᓂᖓᓂ 12, ᐃᓛᓐᓂᒃᑯᑦ ᒪᓕᖃᑦᑕᕆᐊᖃᕐᓂᐊᖅᑐᑦ ᑐᓂᐅᖅᑲᒐᒃᓴᑦ ᑮᓇᐅᔭᖁᑎᒋᔭᖏᓐᓂᒃ ᑲᓇᑕᐅᑉ ᐱᖁᔭᓕᐅᕐᕕᒡᔪᐊᖓᑕ.

2.12 ᑭᒡᓕᖃᖅᑎᑕᐅᓐᖏᓪᓗᑎᒃ ᑎᑎᕋᖅᓯᒪᓂᖏᓐᓃᑦᑐᑦ 2.7, ᐱᓇᓱᐊᖃᑎᒌᑦᑐᑦ ᓇᓗᓇᐃᕐᓯᕗᑦ ᓇᓕᑐᐃᓐᓇᖏᑦ GN ᐊᖏᕈᑎᒋᓯᒪᔭᖏᑦ ᐊᑭᓖᓂᐊᕐᓂᕐᒧᑦ ᐅᑉᕙᓘᓐᓃᑦ ᐊᑐᐃᓐᓇᐅᑎᑦᓯᓂᐊᕐᓂᕐᒧᑦ ᖃᑦᓯᑐᐃᓐᓇᕐᓂᒃ ᑮᓇᐅᔭᓂᒃ ᒪᓕᓪᓗᒋᑦ ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᖃᖓᓕᒫᖅ ᒪᓕᑦᓯᒪᖃᑦᑕᓂᐊᕐᐳᑦ ᑮᓇᐅᔭᓖᒍᑕᐅᔪᓂᒃ ᒪᓕᒐᓕᐅᕐᕕᒻᒥᒃ ᐊᒻᒪᓗ ᐊᑐᖅᑕᐅᒋᐊᓕᓐᓂᒃ ᓈᖕᒪᑦᑐᓂᒃ ᐊᖏᕈᑕᐅᓯᒪᓐᖏᑦᑐᓂᒃ ᑲᑎᓐᓂᖏᓐᓂᒃ ᑮᓇᐅᔭᓖᒍᑕᐅᔪᒧᑦ ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓄᑦ ᐊᑭᓕᕐᓱᐃᕕᐅᖏᐊᖃᕐᓯᒪᔪᒧᑦ.

ᐋᔩᕋᕈᑕᐅᓂᖓ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑏᑦ

3.1 ᐊᑎᓕᐅᖅᑕᐅᑎᓪᓗᒍ ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, ᐱᓇᓱᐊᖃᑎᒌᑦᑐᑦ ᐋᔩᕋᕈᑎᖃᕆᐊᓖᑦ ᐊᑎᓕᐅᕐᓗᒍᓗ ᑖᓐᓇ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑦ ᒪᕐᕉᒃ ᐊᕐᕌᒎᒃ ᐃᓗᐊᓂ ᐅᓪᓗᖓᓂᒃ ᐊᖏᖅᑕᐅᓚᐅᕐᓂᖓᑕ ᓄᒃᑎᐸᓪᓕᐊᓂᕐᒧᑦ ᑐᑭᒧᐊᒍᑎᒃᓴᓂ.

3.2 ᐱᓇᓱᐊᖃᑎᒌᑦᑐᑦ ᑐᕌᒐᕆᒋᐊᓕᖓ ᓄᒃᑎᓂᕐᒧᑦ ᐅᓪᓗᖓ ᐄᑉᕈ 1 ᐊᕐᕌᒍᒥ ᑎᑭᐅᑎᓯᒪᔪᓂᒃ ᐱᖓᓱᓄᑦ ᐊᕐᕌᒍᓄᑦ ᐅᓪᓗᖓᓂᒃ ᐊᑎᓕᐅᖅᑕᐅᓚᐅᖅᑎᓪᓗᒍ ᐊᐅᓚᑦᓯᔪᓐᓇᐅᑎᑖᕐᐸ ᓕᐊᓂᕐᒧᑦ ᐊᖏᖃᑎᒌᒍᑦ.

3.3 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑦ ᐋᖅᑭᑦᓯᒪᓂᐊᕐᐳᖅ ᐊᐅᓚᓂᕆᒋᐊᓕᖏᓐᓂᒃ ᐊᖏᕈᑕᐅᓂᖏᓐᓄᑦ ᐊᒻᒪᓗ ᑲᔪᓯᑎᑕᐅᓂᖏᓐᓄᑦ.

3.4 ᐋᔩᕋᖅᑎᓪᓗᐊᑕᐅᓂᐊᖅᑐᑦ ᓵᒦᖃᑎᒌᓪᓗᑎᒃ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓄᑦ ᐊᐃᕙᔨᒻᒪᕇᑦ ᑎᓕᔭᐅᓯᒪᔪᑦ ᐊᑐᓂᑦ ᐱᓇᓱᐊᖃᑎᒌᑦᑐᓂᒃ ᐋᔩᕌᕈᑕᐅᔪᒧᑦ (ᑖᒃᑯᐊ "ᐊᐃᕙᔨᒻᒪᕇᑦ") ᐊᒻᒪᓗ ᐋᔩᕋᖅᑎᖏᑦ ᐱᓇᓱᐊᕐᕕᒻᒥᓃᓐᖔᖅᑐᑦ.

3.5 ᐊᐃᕙᔨᒻᒪᕇᑦ ᐊᖏᖃᑎᒌᓯᒪᓂᒃᑯᑦ ᐱᓕᕆᐊᒃᓴᓖᑦ ᑐᑭᒧᐊᒃᑎᑦᓯᓂᕐᒥᒃ ᐊᐅᓚᑦᓯᓂᕐᒥᒃ ᐋᖅᑭᐅᒪᑦᓯᓂᕐᒥᓪᓗ ᐋᔩᕌᕈᑕᐅᔪᓂᒃ.

3.6 ᐊᐃᕙᔨᒻᒪᕇᑦ ᐋᖅᑭᑦᓱᐃᒋᐊᓖᑦ ᐱᓕᕆᐊᒃᓴᓄᑦ ᐸᕐᓇᐅᑎᓂᒃ ᐋᔩᕋᕐᓂᐅᔪᓄᑦ ᐃᓚᒋᔭᐅᓗᑎᒃ, ᑲᑎᒪᔾᔪᑎᒃᓴᑦ, ᓇᓗᓇᐃᔭᕐᓯᒪᔪᓂᒃ ᐱᓕᕆᐊᖑᓂᐊᕐᓂᖏᓐᓂᒃ ᐊᒻᒪᓗ ᓯᕗᓪᓕᐅᔾᔭᐅᔭᕆᐊᓕᓐᓂᒃ.

3.7 ᐊᐃᕙᔨᒻᒪᕇᑦ ᓴᖅᑮᒍᓐᓇᖅᑐᑦ ᐱᔭᕆᐊᑭᓪᓕᑎᕆᔨᓂᒃ ᐊᒻᒪᓗ ᑎᑎᕋᕆᐊᓐᖓᐅᑎᓕᕆᖃᑦᑕᓂᐊᖅᑐᓂᒃ ᐊᒻᒪᓗ ᐱᓕᕆᐊᒃᓴᓄᑦ ᐸᕐᓇᐅᑎᓂᒃ ᐊᒻᒪᓗ ᐅᓂᒃᑳᓕᐊᖑᒋᐊᓕᓐᓂᒃ ᑲᑐᔾᔨᖃᑎᒌᓂᒃ.

3.8 ᒪᓕᓪᓗᒋᑦ ᒪᓕᒐᑦᓴᑦ ᐅᑉᕙᓘᓐᓃᑦ ᑳᓐᑐᓛᒃᑯᑦ ᑲᓐᖑᓇᖅᑎᑕᐅᔪᓄᑦ ᑭᒡᓕᓕᐊᖑᓯᒪᔪᑦ, ᐱᓇᓱᐊᖃᑎᒌᑦᑐᑦ ᐊᑐᐃᓐᓇᐅᑎᑦᓯᖃᑦᑕᓂᐊᖅᑐᑦ ᐃᖕᒥᓐᓄᑦ ᑐᓴᐅᒪᓵᓕᒍᑕᐅᓂᐊᖅᑐᓂᒃ ᐋᔩᕌᕈᑕᐅᓂᖏᓐᓅᖓᔪᑎᒍᑦ.

3.9 GC-ᑯᑦ ᐊᒻᒪᓗ GN−ᑯᑦ ᐊᑐᐃᓐᓇᐅᑎᑦᓯᖃᑦᑕᕆᐊᓖᑦ, ᐊᕕᑦᑐᕐᓯᒪᔪᑎᒍᑦ ᐊᖏᕈᑎᒋᓯᒪᔭᒥᖕᓂᒃ, ᑮᓇᐅᔭᓕᑕᐅᓗᑎᒃ ᓈᒻᒪᑦᑐᓂᒃ ᑐᓐᖓᕕᒃᑯᑦ ᐃᑲᔫᑎᓂᒃ ᐃᓚᒋᔭᐅᓂᖏᓐᓄᑦ ᑐᓐᖓᕕᒃᑯᑦ ᐋᔩᕋᕈᑕᐅᓂᖓᓄᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ.

ᑐᓐᖓᕕᔾᔪᐊᖅ ᒪᓕᒐᕐᓄᑦ ᑲᓇᑕᒥ

4.1 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᑐᑭᓕᐅᖅᑕᐅᓯᒪᒋᐊᖃᓐᖏᑦᑐᑦ ᒪᓕᒐᑦ ᓴᓐᖏᓂᕐᓴᐅᒍᑎᒃᓴᖏᓐᓄᑦ ᑐᓂᔭᐅᓯᒪᔪᑦ ᒪᓕᒐᓕᐅᕐᕕᖏᓐᓄᑦ ᑲᓇᑕᒥ ᐊᕕᑦᑐᕐᓯᒪᓂᕐᓂ ᑎᑎᕋᖅᓯᒪᓂᖏᑎᒍᑦ 92, 92A ᐊᒻᒪᓗ 95 ᑲᓇᑕᐅᑉ ᑐᓐᖓᕕᔾᔪᐊᖓᑕ ᐱᖁᔭᖏᓐᓂ, 1867, ᐊᔾᔨᐸᓗᖏᓐᓅᖓᔪᓂ ᓇᓗᓇᐃᖅᑕᐅᓯᒪᓂᖏᓐᓂ ᐅᖃᐅᓯᐅᔪᑦ ᓇᓗᓇᐃᖅᑕᐅᓯᒪᔪᑦ ᑖᒃᑯᓇᓂ ᑎᑎᕋᖅᓯᒪᓂᖏᓐᓂ.

ᓴᓐᖏᓂᖃᕐᓂᕐᓴᑦ

4.2 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᑐᑭᓕᐅᖅᑕᐅᓯᒪᒋᐊᖃᓐᖏᑦᑐᑦ ᓴᐳᔾᔨᓯᒪᒍᑕᐅᓗᓂ ᐱᖁᔭᓂᒃ ᑲᓇᑕ ᐱᖁᔭᓕᐅᕐᕕᔾᔪᐊᖓᓂ ᓴᓐᖏᓐᓂᖃᕐᓂᕐᓴᐅᖁᓪᓗᒍ ᐅᑭᐅᖅᑕᖅᑑᑉ ᐊᕕᑦᑐᕐᓯᒪᓂᖓᓂ ᒪᓕᒐᖏᓐᓂ ᑎᑭᐅᑎᓯᒪᔪᒧᑦ ᓈᖕᒪᖏᓪᓕᐅᕈᑎᖃᕐᓂᕐᒥᖕᓄᑦ.

ᓴᐳᔾᔨᓯᒪᒍᑕᐅᔪᑦ

4.3 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒋᒍᑎᓃᓐᓂᐊᖅᑐᑦ ᓴᐳᔾᔨᓯᒪᒍᑎᒃᓴᑦ ᐱᓇᓱᐊᖃᑎᒌᑦᑐᓄᑦ ᐊᖏᕈᑕᐅᔪᑦ.

ᑎᒍᓯᓂᖅ ᑮᓇᐅᔭᓂᒃ

4.4 GC-ᑯᑦ ᐱᓇᓱᐊᒐᑦᓴᖏᑦ ᐊᑭᓖᓂᕐᒧᑦ ᖃᑦᓯᑐᐃᓐᓇᕐᓂᒃ ᑮᓇᐅᔭᓂᒃ ᒪᓕᓪᓗᒋᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᑉᖃᑎᒌᒍᑎᓄᑦ, ᐃᓚᒋᔭᐅᓗᑎᒃ ᖃᑦᓯᑐᐃᓐᓇᐃᑦ ᐅᖃᐅᓯᐅᔪᑦ ᑎᑎᕋᖅᓯᒪᓂᖓᓂ 12 ᑖᒃᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, ᐃᓛᓐᓂᒃᑯᑦ ᑎᒍᔭᐅᓂᖏᓐᓅᖓᖃᑦᑕᓂᐊᖅᑐᑦ ᑮᓇᐅᔭᑦ ᑲᓇᑕ ᐱᖁᔭᓕᐅᕐᕕᔾᔪᐊᖓᓄᑦ.

4.5 GN-ᑯᑦ ᐱᓇᓱᐊᒐᑦᓴᖏᑦ ᐊᑭᓖᓂᕐᒧᑦ ᖃᑦᓯᑐᐃᓐᓇᕐᓂᒃ ᒪᓕᓪᓗᒋᑦ ᐊᐅᓚᑦᓯᔪᓐᓇᐅᑎᑖᕐᐸ ᓕᐊᓂᕐᒧᑦ ᐊᖏᖃᑎᒌᒍᑏᑦ ᐃᓛᓐᓂᒃᑯᑦ ᑎᒍᔭᐅᓂᖏᓐᓅᖓᖃᑦᑕᓂᐊᖅᑐᑦ ᑮᓇᐅᔭᑦ ᒪᓕᒐᓕᐅᕐᕕᖕᒧᑦ ᐊᒻᒪᓗ ᐊᑐᖅᑕᐅᒋᐊᓖᑦ ᓈᖕᒪᓪᓗᑎᒃ ᐊᖏᕈᑕᐅᓯᒪᓐᖏᑦᑐᓂᒃ ᑲᑎᓐᓂᖏᓐᓂᒃ ᑎᒍᔭᐅᓯᒪᔪᓂᒃ ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓄᑦ ᐊᑭᓕᖅᑕᐅᕕᐅᒋᐊᓕᒻᒥ.

ᓄᓇᑦᓯᐊᒥ ᐅᖅᓱᐊᓗᓕᕆᔨᒃᑯᑦ ᐊᖏᕈᑎᓕᐊᕆᓯᒪᔭᖓ

4.6 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᑐᓂᓯᓯᒪᔭᕆᐊᓖᑦ ᑎᑭᐅᑎᓯᒪᔪᓂᒃ ᑎᑎᕋᖅᓯᒪᓂᖏᓐᓂ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᐊᒃᑐᐊᔪᑦ ᐅᖅᓱᐊᓗᓕᕆᓂᕐᒧᑦ ᒑᓯᓄᓪᓗ, ᑕᒪᒃᑯᐊ ᑎᑎᕋᖅᓯᒪᔪᑦ ᑐᓐᖓᕕᒋᔭᐅᔪᑦ ᑖᒃᑯᓄᓐᖓᖓᔪᓂᒃ, ᑭᓯᐊᓂ ᐃᓘᓐᓇᑎᐅᓐᖏᑦᑐᖅ, ᓄᓇᑦᓯᐊᖅ ᐅᖅᓱᐊᓗᓕᕆᓂᕐᒧᑦ ᒑᓯᓄᓪᓗ ᐊᖏᕈᑎᒋᓯᒪᔭᖏᑦ ᐅᐃᒍᖓᓃᑦᑐᑦ I-C-25 ᓄᐊᑦ ᐊᒥᐊᓕᒃᑲᒥ ᐊᑭᖃᓐᖏᑦᑐᒥᒃ ᑕᐅᖅᓰᖃᑎᒌᓐᓂᕐᒧᑦ ᐊᖏᕈᑎᓂ. ᓱᖅᑯᐃᖅᑕᐅᓯᒪᓂᕐᓴᐅᓂᖓᒍᑦ, ᐃᓱᓕᒍᑕᐅᔪᖅ ᑖᑦᓱᒧᖓ ᐊᑕᔪᒧᑦ ᓄᓇᑦᓯᐊᕐᒥ ᐅᖅᓱᐊᓗᓕᕆᓂᕐᒧᑦ ᒑᓯᒥᓪᓗ ᐊᖏᕈᑕᐅᓯᒪᔪᓂ ᑕᑉᐱᖅᑕᐅᓯᒪᓐᖏᓪᓗᓂ ᐃᓱᓕᒍᑕᐅᔪᖅ ᐊᓯᖏᓐᓄᑦ ᐊᑕᔪᓄᑦ ᐊᒃᑐᐊᔪᓄᑦ ᐅᖃᐅᓯᐅᔪᓄᑦ ᓇᓗᓇᐃᖅᑕᐅᒋᐊᓐᖓᕐᓯᒪᔪᓄᑦ ᐃᓚᓕᐅᔾᔭᐅᓯᒪᓂᖏᓐᓂᒃ ᑕᐃᒪᐃᑦᑐᒧᑦ ᐊᖏᕈᑕᐅᓯᒪᓂᖓᓄᑦ ᑭᓯᐊᓂ ᑖᒃᑯᓇᓂ ᐊᖏᕈᑕᐅᓯᒪᓐᖏᑦᑐᖅ ᐊᖏᖃᑎᒌᒍᑎᓂ.

ᐊᓯᖏᑦ ᐱᓕᕆᐊᒃᓴᑦ

4.7 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᓄᖅᑲᖅᑎᑕᐅᔪᖃᕐᓂᐊᓐᖏᓚᖅ ᑭᓇᑐᐃᓐᓇᕐᒥᒃ ᐃᓚᒋᔭᐅᔪᒪᔪᒥᒃ ᒐᕙᒪᑐᖃᒃᑯᓐᓂᒃ ᐅᑉᕙᓘᓐᓃᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᐱᓕᕆᐊᒃᓴᓂᒃ, ᐃᓚᒋᔭᐅᓗᑎᒃ ᑮᓇᐅᔭᑎᒍᑦ ᐃᑲᔫᑎᒃᓴᑦ ᑕᒪᒃᑯᓄᖓ ᐱᓕᕆᐊᒃᓴᓄᑦ, ᒪᓕᓪᓗᒋᑦ ᐊᑐᖅᑕᐅᒋᐊᓕᓐᓄᑦ ᐱᓕᕆᐊᒃᓴᓄᑦ ᒪᓕᒐᑦᓴᓕᐊᖑᓯᒪᔪᑦ, ᑕᒪᒃᑯᐊ ᑕᐃᒪᐃᒻᒪᑦ ᐱᓕᕆᐊᒃᓴᑦ ᓴᖅᑭᕐᔫᒥᖃᑦᑕᓂᐊᕐᓂᖏᓐᓄᑦ.

4.8 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᐊᒃᑐᐃᓂᖃᕐᓂᐊᖏᓚᖅ ᐱᔪᓐᓇᖅᑎᑕᐅᓂᖏᑦ NTI ᐅᑉᕙᓘᓐᓃᑦ GN ᑐᓂᔭᐅᓗᑎᒃ ᐃᑲᔪᖅᑕᐅᔾᔪᑎᓂᓪᓘᓐᓃᑦ ᒐᕙᒪᑐᖃᒃᑯᓐᓂ ᐱᓕᕆᐊᒃᓴᓂᒃ, ᒐᕙᒪᑐᖃᒃᑯᓐᓂᒃ ᑐᓐᓂᖅᑯᑎᓂᒃ ᐅᑉᕙᓘᓐᓃᑦ ᒐᕙᒪᑐᖃᒃᑯᓐᓂ ᐃᑲᔫᑎᒃᓴᓂᒃ ᐊᒃᑐᐊᔪᓂᒃ ᓄᓇᒧᑦ ᓄᓇᒦᓐᖔᖅᑐᓂᓪᓗ ᐊᐅᓚᑦᓯᓂᕐᒥᒃ ᒪᓕᓪᓗᒋᑦ ᐊᑐᖅᑕᐅᒋᐊᓖᑦ ᒪᓕᒐᑦᓴᓕᐊᖑᓯᒪᔪᑦ, ᑕᒪᒃᑯᐊ ᐱᓕᕆᐊᒃᓴᑦ, ᑐᓐᓂᖅᑯᑏᑦ ᐃᑲᔫᑏᓪᓗ ᓴᖅᑭᕐᔪᒥᖃᑦᑕᓂᐊᕐᓂᖏᓐᓄᑦ.

ᐊᖏᖅᑕᐅᓂᖓ ᐊᑐᓕᖅᑎᑕᐅᓂᖓᓗ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑏᑦ

4.9 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐊᑐᓕᕐᓂᐊᖅᑐᑦ ᐊᑎᓕᐅᓚᐅᖅᑎᓪᓗᒋᑦ ᐱᓇᓱᐊᖃᑎᒌᑦᑐᑦ.

ᐊᐅᓚᑦᓯᔾᔪᑕᐅᔪᖅ ᒪᓕᒐᖅ

4.10 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐊᐅᓚᑦᓯᒍᑕᐅᓂᐊᖅᑐᑦ ᑐᓐᖓᕕᖃᕐᓗᑎᓪᓗ ᒪᓕᓪᓗᒋᑦ ᒪᓕᒐᖏᑦ ᓄᓇᕗᑦ ᐊᒻᒪᓗ ᒪᓕᒐᖏᑦ ᑲᓇᑕ ᐊᑐᖅᑕᐅᒋᐊᖃᕐᓂᖏᑎᒍᑦ.

ᐱᔪᓐᓇᐅᑎᖃᕐᕕᒃ

4.11 ᓄᓇᕗᒻᒥ ᐃᖅᑲᖅᑐᐃᔨᒃᑯᑦ ᐊᐅᓚᑦᓯᔪᓐᓇᕐᕕᖃᕐᓂᐊᖅᑐᑦ ᐊᒃᑐᐊᔪᓂᒃ ᐊᐅᓚᔾᔭᑦᑕᐅᔪᓂᒃ ᐅᑉᕙᓘᓐᓃᑦ ᐊᐅᓚᑕᐅᔪᓂᒃ ᓴᖅᑭᖅᑐᓂᒃ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂᒃ.

4.12 ᐱᑕᖃᔾᔮᖏᑦᑐᖅ ᑎᑎᕋᖅᓯᒪᓂᖓᓂ 4.11 ᑐᓐᖓᕕᒋᔭᐅᓗᓂ ᑭᒡᓕᖃᖅᑎᑕᐅᓂᖓᒍᑦ ᐊᐅᓚᑦᓯᔪᓐᓇᓂᕐᒧᑦ ᐊᓯᓕᒫᖏᓐᓄᑦ ᐃᖅᑲᖅᑐᐃᕕᖕᓄᑦ, ᐃᓚᒋᔭᐅᓗᑎᒃ ᒐᕙᒪᑐᖃᒃᑯᑦ ᐃᖅᑲᖅᑐᐃᔨᕐᔪᐊᖏᑦ ᑲᓇᑕᒥ, ᑕᒪᓐᓇ ᐊᐅᓚᑦᓯᔪᓐᓇᕐᕕᖃᕐᓂᖅ ᐋᖅᑭᒋᐊᖅᑕᐅᔫᒥᖃᑦᑕᓂᐊᖅᑐᖅ ᒪᓕᒐᑦᓴᓕᐊᖑᔪᑎᒍᑦ ᐃᖅᑲᖅᑐᐃᕕᒃᑯᑦ ᓴᖅᑭᖅᑕᐅᔪᓂᒃ.

ᐊᒃᑑᒻᒪᑎᒌᓐᓂᖏᑦ ᑎᑎᕋᖅᓯᒪᓃᑦ ᑐᓗᖅᑕᐅᑎᔪᑦ

4.13 ᐊᔾᔨᒌᖏᑉᐸᑕ ᐅᑉᕙᓘᓐᓃᑦ ᑐᓗᖅᑕᕈᑎᒌᒃᐸᑕ ᑎᑎᕋᖅᓯᒪᓂᖏᓐᓂ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᐊᒻᒪᓗ ᑎᑎᕋᖅᓯᒪᓂᖏᓐᓂ ᐋᖅᑭᑦᓯᒪᔭᐅᔪᓂ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ, ᑎᑎᕋᖅᓯᒪᓂᖓ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᓴᓐᖏᓂᕐᓴᐅᓂᐊᕐᐳᖅ.

ᐊᒃᑑᒻᒪᑎᒌᓐᓂᖏᑦ ᑐᓗᖅᑕᐅᑎᔪᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑏᑦ

4.14 ᐊᔾᔨᒌᖏᑉᐸᑕ ᐅᑉᕙᓘᓐᓃᑦ ᑐᓗᖅᑕᕈᑎᒌᒃᐸᑕ ᑎᑎᕋᖅᓯᒪᓂᖏᓐᓂ ᐱᓕᕆᔪᓐᓇᐅᑎᒧᑦ ᑎᒍᓯᓂᕐᒧᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᐊᒻᒪᓗ ᓄᓇᕗᑦ ᐊᖏᕈᑎᖏᓐᓂ, ᐊᓯᓕᒫᖏᓐᓂ ᐊᑭᓕᖅᑕᐅᔾᔪᑎᒃᓴᓄᑦ ᐊᖏᖃᑎᒌᒍᑎᓂ ᐅᑉᕙᓘᓐᓃᑦ ᐊᓯᓕᒫᖏᓐᓂ ᓄᓇᖃᖅᑳᕐᓯᒪᔪᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖏᓐᓂ ᑐᑭᓕᐊᖑᓯᒪᔪᒥ ᑎᑎᕋᖅᓯᒪᓂᖓᓂ 35 ᑲᓇᑕᒥ ᑐᓐᖓᕕᔾᔪᐊᖓᓄᑦ ᐱᖁᔭᖅ, 1982, ᓄᓇᕗᑦ ᐊᖏᕈᑎᖏᑦ, ᐊᑭᓕᖅᑕᐅᔾᔪᑎᒃᓴᓄᑦ ᐊᖏᖃᑎᒌᒍᑏᑦ ᐅᑉᕙᓘᓐᓃᑦ ᐊᓯᓕᒫᖏᓐᓂ ᓄᓇᖃᖅᑳᕐᓯᒪᔪᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᓂ, ᖃᓄᐃᓕᖓᓂᖓᒍᑦ, ᓴᓐᖏᓂᕐᓴᐅᓂᐊᖅᑐᖅ ᑎᑭᐅᑎᓯᒪᓂᖓᒍᑦ ᓇᓕᒧᒌᓐᖏᓂᖓᒍᑦ ᐅᑉᕙᓘᓐᓃᑦ ᐊᒃᑑᒻᒪᑎᒌᓐᓂᖓᓄᑦ.

ᓇᓗᓇᐃᕐᓯᒋᐊᒃᑲᓐᓂᕈᑏᑦ

4.15 ᐱᓇᓱᐊᖃᑎᒌᑦᑐᑦ ᐃᑉᐱᒍᓱᑦᓯᐊᕐᓗᑎᒃ ᐊᔪᕐᓇᖏᓐᓂᓕᒫᖓᒍᑦ ᑲᒪᒋᐊᓖᑦ ᐊᒻᒪᓗ ᑎᑎᕋᕆᐊᒃᑲᓂᕐᓗᑎᒃ ᐅᑉᕙᓘᓐᓃᑦ ᐱᓕᕆᔾᔪᑎᓂᒃ ᐊᑐᖅᑕᐅᒋᐊᓕᓐᓂᒃ ᐅᑉᕙᓘᓐᓃᑦ ᐊᑐᖅᑕᐅᒍᒪᔪᓂᒃ ᐃᑲᔫᑎᓂᐊᖅᑐᓂᒃ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓄᑦ ᐊᒻᒪᓗ ᑲᔪᓯᑎᑦᓯᓗᑎᒃ ᑎᑎᕋᖅᓯᒪᓂᖏᓐᓂᒃ.

ᓈᓴᖅᑕᐅᓯᖓ ᐱᕕᒃᓴᓕᐅᕐᕕᐅᓯᒪᔪᖅ

4.16 ᑭᓯᐊᓂ ᐊᓯᐊᒍᑦ ᓇᓗᓇᐃᖅᑕᐅᓯᒪᑉᐸᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ, ᐱᕕᒃᓴᓕᐅᕐᕕᐅᓯᒪᔪᓂ ᐅᑉᕙᓘᓐᓃᑦ ᑭᖑᓂᐊᒍᑦ ᓈᓴᖅᑕᐅᓯᒪᓂᖏᑎᒍᑦ ᐅᑉᕙᓘᓐᓃᑦ ᐊᑭᓕᖅᑕᐅᒍᑕᐅᒋᐊᓖᑦ ᐅᑉᕙᓘᓐᓃᑦ ᑲᒪᒋᔭᐅᒋᐊᓖᑦ, ᓈᓴᖅᑕᐅᒋᐊᓖᑦ ᐃᓚᓕᐅᔾᔭᐅᖏᓪᓗᓂ ᐅᓪᓗᖅ ᐱᒋᐊᕐᕕᖓ ᐊᒻᒪᓗ ᐃᓚᓕᐅᔾᔭᐅᓗᓂ ᐅᓪᓗᖅ ᐃᓱᓕᑉᕕᖓ. ᑭᖑᓪᓕᕐᐹᖑᑉᐸᑦ ᐅᓪᓗᖅ ᐱᕕᒃᓴᓕᐅᕐᕕᐅᓯᒪᔪᒥ ᐱᓕᕆᓐᓇᐅᖏᑉᐸᑦ ᐅᓪᓗᖅ, ᐱᕕᒃᓴᓕᐅᕐᕕᐅᓂᖓ ᐃᓱᓕᒋᐊᓕᒃ ᖃᐅᖓᓂ ᐱᓕᕆᓐᓇᐅᑉ ᐅᓪᓗᕆᓕᕐᐸᐅᒃ.

ᐊᑐᕈᓐᓇᖅᑎᑕᐅᔪᑦ ᐃᓚᐃᓐᓇᖏᑦ ᒪᓕᒐᑦᓴᓕᐊᖑᓯᒪᔪᓂ

4.17 ᑭᓯᐊᓂ ᐊᓯᐊᒍᑦ ᓇᓗᓇᐃᖅᑕᐅᓯᒪᑉᐸᑦ ᐃᖅᑲᖅᑐᐃᕕᒃᑯᑦ ᐊᐅᓚᑦᓯᔪᓐᓇᕈᑕᐅᔪᖅ, ᓇᓕᑐᐃᓐᓇᖓᓂ ᑎᑎᕋᖅᓯᒪᔪᓂ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᓇᓗᓇᐃᖅᑕᐅᑉᐸᑦ ᐊᑐᕈᓐᓇᖏᓐᓂᖓᓂᒃ, ᒪᓕᒐᖅᑎᒍᑦ ᐊᔪᖅᑎᑕᐅᑉᐸᑦ ᐅᑉᕙᓘᓐᓃᑦ ᑲᔪᓯᑎᒐᑦᓴᐅᖏᑉᐸᑦ ᐊᒥᐊᒃᑯᖏᓐᓂᒃ ᑎᑎᕋᖅᓯᒪᓂᖏᑕ ᐃᓱᒪᒋᔭᐅᔭᕆᐊᖃᓐᖏᓚᖅ ᓇᓕᑐᐃᓐᓇᖏᓐᓄᑦ ᐱᓇᓱᐊᖃᑎᒌᑦᑐᓄᑦ ᑲᔪᓯᓯᒪᓐᖏᓐᓂᖓᓂᒃ ᐅᑉᕙᓘᓐᓃᑦ ᐱᐅᓈᕐᓯᒪᓐᖏᓐᓂᖓᓂᒃ.

4.18 ᐃᖅᑲᖅᑐᐃᕕᒃ ᐊᐅᓚᑦᓯᒍᓐᓇᖅᑐᖅ ᓇᓗᓇᐃᕐᓯᕋᑕᕐᐸᑦ ᓇᓕᑐᐃᓐᓇᖏᑦ ᑎᑎᕋᖅᓯᒪᔪᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᐊᑐᕈᓐᓇᖏᓐᓂᖏᓐᓂᒃ, ᒪᓕᒐᖅᑎᒍᑦ ᐊᔪᖅᑕᐅᓂᖓᓂᒃ ᐅᑉᕙᓘᓐᓃᑦ ᑲᔪᓯᑎᒐᑦᓴᐅᖏᓐᓂᖓᓂᒃ, ᐱᓇᓱᐊᖃᑎᒌᑦᑐᑦ ᐋᖅᑭᑦᓯᒪᑦᓯᐊᓂᕐᐹᒃᑯᑦ ᐋᖅᑭᒋᐊᕆᓇᓱᐊᕆᐊᓖᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂᒃ ᐋᖅᑭᒍᑎᒃᓴᖓᓂᒃ ᐅᑉᕙᓘᓐᓃᑦ ᑕᐅᖅᓰᒍᑎᒃᓴᒥᒃ ᑎᑎᕋᖅᓯᒪᓂᖓᓂᒃ ᑕᑉᕗᓐᖓᖓᔪᒥᒃ ᐱᔾᔪᑕᐅᔪᒧᑦ ᐅᖃᐅᓯᐅᔪᒧᑦ ᑎᑎᕋᖅᓯᒪᓂᖓᒍᑦ.

ᓴᒃᑯᑦᓯᒍᑎ

4.19 ᓴᒃᑯᑦᓯᒍᑕᐅᔪᖅ ᓈᖕᒪᒋᔭᐅᓂᑐᐃᓐᓇᖓᒍᑦ ᖃᓄᐃᓐᓂᖓ ᐅᑉᕙᓘᓐᓃᑦ ᐊᐅᓚᑕᐅᓐᖏᓐᓂᖓᒍᑦ ᐱᓇᓱᐊᒐᑦᓴᖅ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᒃᑯᑦ ᑲᔪᓯᔪᓐᓇᖏᓪᓚᖅ ᑭᓯᐊᓂ ᑎᑎᕋᖅᓯᒪᔪᒃᑯᑦ ᐊᑎᓕᐅᖅᑕᐅᓯᒪᓗᓂᓗ ᐱᓇᓱᐊᖃᑕᐅᔪᒧᑦ ᑐᓂᓯᔪᒧᑦ ᓴᒃᑯᑦᓯᖁᔨᔾᔪᑎᒥᒃ. ᓴᒃᑯᑦᓯᖁᔨᔾᔪᑎ ᑕᑉᕙᓂ ᑎᑎᕋᖅᓯᒪᓂᖓᓂ ᐊᒃᑐᐃᓂᖃᕈᓐᓇᓐᖏᓚᖅ ᐊᐅᓚᑕᐅᓂᖏᓐᓂᒃ ᐱᔪᓐᓇᐅᑎᓕᒫᑦ ᐊᓯᖏᑦ ᐅᑉᕙᓘᓐᓃᑦ ᐱᓇᓱᐊᒐᑦᓴᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ.

ᐋᖅᑭᒋᐊᕈᑎ

4.20 ᑭᓯᐊᓂ ᐊᓯᐊᒍᑦ ᐱᑕᖃᕐᐸᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ, ᑎᑎᕋᖅᓯᒪᓂᖏᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐋᖅᑭᒋᐊᖅᑕᐅᖃᑦᑕᕈᓐᓇᓂᐊᖅᑐᑦ ᑭᓯᐊᓂ ᑖᓐᓇ ᐋᖅᑭᒋᐊᕈᑕᐅᑉᐸᑦ ᐱᓇᓱᐊᖃᑎᒌᑦᑐᓄᑦ ᐊᒻᒪᓗ ᑖᒃᑯᓇᓐᖔᕐᓗᓂ ᑎᑎᕋᖅᓯᒪᓂᖏᓐᓂᒃ ᐊᖏᖃᑎᒌᒍᑎᒋᓯᒪᔭᖏᑕ.

ᓇᓕᒧᖏᓐᓂᒃ ᐱᓇᓱᐊᒐᖃᖅᑐᑦ

4.21 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐊᑎᓕᐅᖅᑕᐅᒍ ᓇᖅᑐᑦ ᖃᑦᓯᑐᐃᓐᓇᐅᓗᑎᒃ ᐱᓇᓱᐊᒐᕆᔭᖏᑎᒍᑦ, ᐊᑐᓂᑦ ᑖᒃᑯᓪᓚᕆᐅᓗᑎᒃ, ᐊᒻᒪᓗ ᑕᒪᕐᒥᒃ ᐊᑕᐅᑦᓯᑰᖅᑕᐅᓗᑎᒃ ᑐᓐᖓᕕᒋᔭᐅᒋᐊᓖᑦ ᐊᑕᐅᓯᕐᒧᑦ ᑎᑎᕋᖅᓯᒪᔪᒧᑦ. ᐱᓇᓱᐊᒐᕆᔭᐅᔪᑦ ᐊᐅᓪᓚᖅᑎᑕᐅᒋᐊᓖᑦ ᓱᒃᑲᔪᒃᑯᑦ ᐅᑉᕙᓘᓐᓃᑦ ᖃᕆᓴᐅᔭᒃᑯᑦ ᐊᔾᔨᓕᐅᒐᐅᓗᑎᒃ ᐊᒻᒪᓗ ᐊᑐᓂᑦ ᐊᐅᓪᓚᖅᑎᑕᐅᒋᐊᓕᒃ ᐱᓇᓱᐊᒐᕆᔭᐅᔪᑦ ᑖᒃᑯᓪᓚᕆᐅᓂᕋᖅᑕᐅᒋᐊᓖᑦ. ᐱᓇᓱᐊᖃᑕᐅᔪᑦ ᐊᐅᓪᓚᑎᑦᓯᔪᑦ ᓱᒃᑲᔪᒃᑯᑦ ᐅᑉᕙᓘᓐᓃᑦ ᖃᕆᓴᐅᔭᒃᑯᑦ ᑐᓂᓯᔭᕆᐊᖃᕐᒥᔪᑦ ᑖᒃᑯᓪᓚᕆᓐᓂᒃ ᐱᓇᓱᐊᒐᐅᔪᓂᒃ ᐊᓯᖏᓐᓄᑦ ᐱᓇᓱᐊᖃᑎᖏᓐᓄᑦ, ᑭᓯᐊᓂ ᑕᐃᒪᐃᓐᖏᑉᐸᑦ ᐊᑑᑎᖃᔾᔮᖏᑦᑐᖅ ᑲᔪᓯᑎᑕᐅᒋᐊᖃᕐᓂᖓᓄᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ.

ᖃᐅᔨᒃᑲᐃᔾᔪᑏᑦ ᑐᓴᐅᒪᔾᔪᑎᓕᕆᓂᕐᓗ

4.22 ᖃᐅᔨᒃᑲᐃᔾᔪᑏᑦ ᑐᓂᔭᐅᔭᕆᐊᓖᑦ ᐅᑉᕙᓘᓐᓃᑦ ᐅᖃᖃᑎᒌᒍᑕᐅᔭᕆᐊᓖᑦ ᐱᓇᓱᐊᖃᑕᐅᔪᓄᑦ ᒪᓕᓪᓗᒋᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᑎᑎᕋᖅᓯᒪᒋᐊᓖᑦ ᐊᒻᒪᓗ ᑲᔪᓯᔪᓐᓇᕐᓗᑎᒃ ᑐᓂᔭᐅᓂᖏᑦ ᐅᑉᕙᓘᓐᓃᑦ ᐋᖅᑭᑦᓯᒪᔭᐅᔪᑦ ᑐᓂᔭᐅᔭᖅᑐᕐᐸᑕ (i) ᓇᖕᒥᓂᖅ ᑐᓂᔭᖅᑐᕐᓗᒋᑦ, ᑭᓇᑐᐃᓐᓇᒧᓪᓘᓐᓃᑦ ᓇᓗᓇᐃᖅᑕᐅᓯᒪᔪᒧᑦ ᑖᒃᑯᓇᓐᖓᑦ ᐱᓇᓱᐊᖃᑕᐅᔪᓂᒃ ᐋᖅᑭᑦᓯᒪᔭᐅᓂᖏᑎᒍᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ, ᐅᑉᕙᓘᓐᓃᑦ ᑭᓇᑐᐃᓐᓇᕐᒧᑦ ᓇᓗᓇᓐᖏᑦᑐᒧᑦ ᐊᐅᓚᑦᓯᔨᐅᒋᐊᖓ ᑐᓂᔭᐅᔪᓐᓇᖅᑎᑕᐅᔪᖅ ᑐᓂᔭᐅᔭᖅᑐᖅᑐᓂᒃ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᑭᒡᒐᖅᑐᐃᓗᓂ ᑖᑦᓱᒥᖓ ᐃᓄᖕᓂᒃ ᑐᕌᕈᑎᖓᓂᒃ ᑎᑎᕋᖅᓯᒪᔪᒥ ᐋᖅᑭᓱᖅᑕᐅᓯᒪᔪᓂ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ; ᐅᑉᕙᓘᓐᓃᑦ (ii) ᐃᕐᖐᓐᓈᕈᑎᒃᑯᑦ, ᑕᑉᕗᖓ ᐅᑉᕙᓗᓐᓃᑦ ᑐᕌᕈᑎᒧᑦ ᑐᓂᓯᕕᐅᒋᐊᓕᒻᒧᑦ ᐅᑉᕙᓘᓐᓃᑦ ᐃᕐᖐᓐᓈᕈᑎᒃᑯᑦ ᑐᕌᕈᑎᖏᓐᓄᑦ, ᑎᑎᕋᖅᓯᒪᔭᐅᔪᒧᑦ ᐊᑭᐊᓂ ᐱᓇᓱᐊᖃᑕᐅᔫᑉ ᐊᑎᖓᑕ ᑎᑎᕋᖅᑕᐅᓯᒪᔪᖅ ᐋᖅᑭᑦᓯᒪᔭᐅᔪᓂ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᐅᑉᕙᓘᓐᓃᑦ ᐊᓯᖏᓐᓄᑦ ᑐᕌᕈᑎᓄᑦ ᐅᑉᕙᓘᓐᓃᑦ ᐃᕐᖐᓐᓈᕈᑎᓄᑦ ᐱᓇᓱᐊᖃᑕᐅᔪᒧᑦ ᓇᓗᓇᐃᖅᑕᐅᖃᑦᑕᖅᑐᓂ ᐊᓯᖏᓐᓄᑦ ᐱᓇᓱᐊᖃᑕᐅᔪᓄᑦ ᑕᐃᒫᑦᓴᐃᓐᓇᖅ.

4.23 ᖃᐅᔨᒃᑲᐃᔾᔪᑎ ᐅᑉᕙᓘᓐᓃᑦ ᐅᖃᖃᑎᒌᓐᓂᖅ ᑐᓂᔭᐅᓂᕋᐃᔾᔪᑕᐅᓂᐊᖅᑐᖅ ᐅᑉᕙᓘᓐᓃᑦ ᑐᓂᔭᐅᓂᖓᓂᒃ:

1. ᑐᓂᔭᐅᔭᖅᑐᕐᐸᑦ ᐃᖅᑲᓇᐃᔭᕐᓇᐃᑦ ᐃᑲᕐᕋᖏᓐᓂ ᐃᖅᑲᓇᐃᔭᕐᓇᐅᑎᓪᓗᒍ ᐅᓪᓗᖅ, ᑐᓂᔭᐅᑉᐸᑦ ᓇᓗᓇᐃᖅᑕᐅᓯᒪᔪᒧᑦ ᑖᒃᑯᓇᓐᖓᑦ ᐱᓇᓱᐊᖃᑕᐅᔪᓂᒃ ᐋᖅᑭᑦᓯᒪᓂᖓᒍᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ, ᐅᑉᕙᓘᓐᓃᑦ ᑭᓇᑐᐃᓐᓇᕐᒧᑦ ᓇᓗᓇᓐᖏᑦᑐᒧᑦ ᑐᓂᓯᕕᐅᔪᓐᓇᕆᐊᖓ ᑐᓂᔭᐅᔭᖅᑐᖅᑐᒥᒃ ᑭᒡᒐᖅᑐᐃᓗᓂ ᑖᑦᓱᒥᖓ ᑐᕌᕈᑎᖏᑎᒍᑦ ᐋᖅᑭᑦᓯᒪᔭᐅᔪᓂ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓄᑦ, ᐊᒻᒪᓗ ᑐᓂᔭᐅᓐᓂᖏᑉᐸᑦ ᐃᖅᑲᓇᐃᔭᕐᓇᐃᑦ ᐃᑲᕐᕕᖏᓐᓂ, ᐱᒋᐊᕐᓂᖓᓂ ᐱᓕᕆᓐᓇᐅᓂᖓ ᑭᖑᓪᓕᕐᒥ ᐱᓕᕆᓐᓇᐅᑉ ᐅᓪᓗᖓᓂ; ᐅᑉᕙᓘᓐᓃᑦ
2. ᐊᐅᓪᓚᖅᑎᑕᐅᑉᐸᑦ ᐃᕐᖐᓐᓈᕈᑎᒃᑯᑦ, ᐅᓪᓗᖓᓂ ᐊᐅᓪᓚᑎᑦᓯᔪᖅ ᓇᓗᓇᐃᕐᓯᕕᐅᓗᓂ ᖃᐅᔨᒃᑲᐃᔾᔪᑎᒃᑯᑦ ᐱᓯᒪᓕᕐᓂᖓᓂᒃ ᐃᕐᖐᓐᓈᕈᑎᒃᑯᑦ ᑭᐅᔭᐅᒍᑎᖓᒍᑦ, ᑖᓐᓇ ᐅᓪᓗᖅ ᐱᓕᕆᓐᓇᐅᑉᐸᑦ ᐊᒻᒪᓗ ᓇᓗᓇᐃᕐᓯᒍᑦ ᐱᔭᐅᓐᓂᕐᐸᑦ ᑐᖔᓂ ᑕᓪᓕᒪᓄᐊᓐᖏᓐᓂᖓᓂ ᐅᓐᓄᓴᒃᑯᑦ ᓄᓇᓖᑦ ᖃᐅᔨᓴᐅᑖᒍᑦ ᑐᓂᔭᐅᕕᖓᓂᒃ ᓇᓕᖅᑲᑖᕐᓂᖓᒍᓪᓘᓐᓃᑦ, ᓇᓕᐊᒃᑐᐃᓐᓇᖅ, ᑭᖑᓪᓕᕐᒥ ᐱᓕᕆᓐᓇᐅᑉ ᐅᓪᓗᖓᓂ.

ᑐᑭᓕᐊᖑᓯᒪᓂᖏᑦ ᐊᒻᒪᓗ ᓄᓇᖃᖅᑳᕐᓯᒪᔪᓄᑦ ᐱᔪᓐᓇᐅᑏᑦ ᐱᔪᒪᔭᐅᔪᓪᓗ

4.24 ᐊᐅᓚᑦᓯᔪᓐᓇᐅᑎᑖᕐᐸᓪᓕᐊᓂᕐᒧᑦ ᐊᖏᖃᑎᒌᒍᑦ ᑐᑭᓕᐅᖅᑕᐅᔭᕆᐊᓕᒃ ᒪᓕᑦᓯᒪᓗᓂ ᐃᓕᓴᕆᔭᐅᓯᒪᓂᖓᒍᑦ ᐊᒻᒪᓗ ᓇᓗᓇᐃᕐᓯᒍᑎᒥᒃ ᐊᑐᖅᑕᐅᔪᒥᒃ ᓄᓇᖃᖅᑳᕐᓯᒪᔪᑦ ᐊᒻᒪᓗ ᐊᖏᕈᑎᒃᑯᑦ ᐱᔪᓐᓇᐅᑏᑦ ᑎᑎᕋᖅᓯᒪᓂᖓᓂ 35 ᑲᓇᑕᒥ ᑐᓐᖓᕕᔾᔪᐊᖅ ᐱᖁᔭᖓᓂ, 1982 ᐊᒻᒪᓗ ᓱᖅᑯᐃᕐᓇᕆᐊᒃᑲᓂᕐᓂᖓᒍᑦ, ᑖᒃᑯᓇᓃᑦᑐᖃᓐᖏᓚᖅ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐅᑉᕙᓘᓐᓃᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ ᐅᑉᕙᓘᓐᓃᑦ ᑲᔪᓯᑎᑦᓯᒍᑎᖏᓐᓂᒃ ᒪᓕᒐᕐᓂᒃ, ᑐᑭᓯᔭᐅᒋᐊᓕᒃ ᓄᖑᑎᑕᐅᒍᑎᖓᓄᑦ ᐅᑉᕙᓘᓐᓃᑦ ᐃᑯᓪᓚᐅᒥᒍᑎᒃᓴᖏᓐᓂᒃ, ᐅᑉᕙᓘᓐᓃᑦ ᑭᒡᓕᖃᖅᑎᑕᐅᓗᓂ ᐅᑉᕙᓘᓐᓃᑦ ᐊᔪᖅᑎᑕᐅᓗᓂ ᓇᐅᒃᑯᑐᐃᓐᓇᖅ;

1. ᑲᓇᑕᒥ ᑐᓐᖓᕕᔾᔪᐊᖅ;
2. ᐊᑐᖅᑕᐅᔪᓂᒃ ᓄᓇᖃᖅᑳᕐᓯᒪᔪᑦ ᐊᖏᕈᑎᒃᑯᓘᓐᓃᑦ ᐱᔪᓐᓇᐅᑎᓂᒃ ᐃᓕᓴᕆᔭᐅᓯᒪᔪᓂᒃ ᐊᒻᒪᓗ ᓇᓗᓇᐃᖅᑕᐅᓯᒪᔪᓂᒃ ᑎᑎᕋᖅᓯᒪᓂᖏᑎᒍᑦ 35 ᑲᓇᑕᒥ ᑐᓐᖓᕕᔾᔪᐊᖓᓄᑦ ᐱᖁᔭᓂ, 1982;
3. ᐸᐸᑦᑎᓂᕐᒧᑦ ᐱᓕᕆᐊᒃᓴᓂᒃ ᐅᑉᕙᓘᓐᓃᑦ ᐱᓇᓱᐊᒐᑦᓴᖏᓐᓂᒃ ᑯᐃᓐ ᓄᓇᖃᖅᑳᕐᓯᒪᔪᓄᑦ ᑲᓇᑕᒥ, ᐃᓚᒋᔭᐅᓗᑎᒃ ᐱᓇᓱᐊᒐᑦᓴᓕᒫᑦ ᓴᖅᑭᖅᑐᑦ ᑐᓐᖓᕕᔾᔪᐊᖓᓂᒃ ᑲᓇᑕ; ᐅᑉᕙᓘᓐᓃᑦ
4. ᐊᖓᔪᖅᑲᐅᑎᓂᒃ, ᓴᖅᑮᓯᒪᔪᓂᒃ ᐅᑉᕙᓘᓐᓃᑦ ᒪᓕᒐᒃᑯᑦ ᓴᓐᖏᓂᕆᔭᐅᔪᓂᒃ ᐅᑉᕙᓘᓐᓃᑦ ᒪᓕᒐᖅᑎᒍᑦ ᐱᔪᓐᓇᐅᑎᖃᖅᑎᑕᐅᔪᓕᒫᓂᒃ GC-ᑯᓐᓂᒃ, ᑲᓇᑕᐅᑉ ᐱᖁᔭᓕᐅᕐᕕᔾᔪᐊᖓᓂᒃ, GN ᐅᑉᕙᓘᓐᓃᑦ ᒪᓕᒐᓕᐅᕐᕕᒻᒥ, ᖃᓄᐃᓐᓂᖓᒍᑦ ᒪᓕᑦᑕᐅᓗᓂ, ᐱᔪᓐᓇᐅᑎᖃᕈᑕᐅᒍᓐᓇᕐᓗᓂ ᐅᖃᐅᓯᐅᓯᒪᔪᓂ ᐊᕕᑦᑐᕐᓯᒪᓂᐊᕈᓯᖏᓐᓂ 4.24(b) ᐅᑉᕙᓘᓐᓃᑦ 4.24(c) ᒪᓕᑦᓯᒪᓗᑎᒃ ᑲᓇᑕᒥ ᑐᓐᖓᕕᔾᔪᐊᖅ ᐱᖁᔭᖏᓐᓂ, 1982.

4.25 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐊᖏᕈᑕᐅᓯᒪᔪᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐅᑉᕙᓘᓐᓃᑦ ᓄᒃᑎᕆᓂᕐᒧᑦ ᐊᐅᓚᑦᓯᔪᓐᓇᕐᕕᐅᔪᓂᒃ GC-ᑯᓐᓂᒃ GN−ᑯᓐᓄᑦ ᑐᑭᓕᐅᖅᑕᐅᓯᒪᓂᖓᒍᑦ ᑎᑎᕋᖅᓯᒪᓂᖏᓐᓂ 2.10.2 ᓄᓇᕗᑦ ᐊᖏᕈᑎᖏᓐᓂ.

ᐊᑭᓕᐅᓯᐊᕐᓂᕐᒧᑦ ᐊᖏᖃᑎᒌᒍᑏᑦ

4.26 ᑎᑎᕋᖅᓯᒪᔪᑦ ᓄᓇᖃᖅᑳᕐᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑎᖏᓐᓂ, ᐅᐃᒍᒋᓂᐊᖅᑕᖏᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ, ᑎᑎᕋᖅᓯᒪᓂᖏᓐᓃᖃᑕᐅᓗᑎᒃ ᓄᓇᕗᑦ ᐊᖏᕈᑎᖏᑦ, ᐄᔭᐅ ᑕᕆᐅᖓᓄᑦ ᓄᓇᑖᕐᓂᕐᒧᑦ ᐊᖏᕈᑎᓂ, ᓄᓇᕕᒃ ᐃᓄᐃᑦ ᓄᓇᑖᕐᓂᕐᒧᑦ ᐊᖏᕈᑎᖏᓐᓂ ᐊᒻᒪᓗ ᐊᓯᓕᒫᖏᓐᓂ ᐊᖏᕈᑎᓂ ᐃᓚᓕᐅᔾᔭᐅᓯᒪᒋᐊᖃᖅᑎᑕᐅᔪᓂ ᑎᑎᕋᖅᑕᐅᓯᒪᔪᓄᑦ ᒪᓕᓪᓗᒋᑦ ᐊᕕᑦᑐᕐᓯᒪᓂᖓᓄᑦ 4.27.

4.27 ᑎᑎᕋᖅᓯᒪᔪᑦ ᐅᖃᐅᓯᐅᔪᑦ ᐊᕕᑦᑐᕐᓯᒪᓂᖓᓂ 4.26 ᐃᓚᓕᐅᔾᔭᐅᓯᒪᓂᕋᖅᑕᐅᒋᐊᓖᑦ ᓇᓕᑐᐃᓐᓇᖏᓐᓄᑦ ᓄᓇᖃᖅᑳᕐᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑎᖏᓐᓄᑦ ᑐᑭᓕᐅᖅᑕᐅᓯᒪᓂᖓᒍᑦ ᑎᑎᕋᖅᓯᒪᓂᖓᓂ 35 ᑲᓇᑕᒥ ᑐᓐᖓᕕᔾᔪᐊᖓᓄᑦ ᐱᖁᔭᓂ, 1982 ᑖᒃᑯᑎᒎᓇ ᒐᕙᒪᒃᑯᑦ ᐱᓇᓱᐊᒐᑦᓴᖏᑎᒍᑦ ᑖᒃᑯᓇᓂ ᐊᖏᖃᑎᒌᒍᑎᓂ ᐊᒃᑐᖅᑕᐅᒍᓐᓇᕐᐳᑦ ᓄᒃᑎᖅᑕᐅᓂᖓᓄᑦ ᐊᐅᓚᑦᓯᔨᐅᔪᑦ ᐊᒻᒪᓗ ᐊᐅᓚᑕᐅᔪᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᒻᒪᓗ ᐱᔪᓐᓇᐅᑏᑦ ᐃᒪᕐᓅᖓᔪᓂᒃ ᑲᒥᓯᓇᒧᑦ ᒪᓕᓪᓗᒋᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ.

ᒐᕙᒪᒃᑯᑦ ᐱᓇᓱᐊᒐᑦᓴᖏᑦ ᐊᑭᓕᐅᓯᐊᕐᓂᕐᒧᑦ ᐊᖏᖃᑎᒌᒍᑎᓂ

4.28 ᐊᔪᕐᓇᕈᓐᓃᑐᐊᕐᐸᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, GC−ᑯᑦ ᐃᓯᕆᐊᓖᑦ ᐋᔩᕋᖃᑎᖃᕐᓂᕐᒧᑦ ᐊᑐᓂᑦ ᓄᓇᖃᖅᑳᑦᓯᒪᔪᓄᑦ ᐱᓇᓱᐊᖃᑕᐅᔪᓄᑦ ᐊᑭᓕᐅᓯᐊᓄᑦ ᐊᖏᖃᑎᒌᒍᑎᓂ ᐊᒃᑐᖅᑕᐅᔪᓄᑦ ᓄᒃᑎᖅᑕᐅᓂᖓᓄᑦ ᐊᐅᓚᑦᓯᔨᐅᔪᑦ ᐊᒻᒪᓗ ᐊᐅᓚᑕᐅᔪᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᒻᒪᓗ ᐱᔪᓐᓇᐅᑏᑦ ᐃᒪᕐᓅᖓᔪᓂᒃ ᑲᒥᓯᓇᒧᑦ ᒪᓕᓪᓗᒋᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ.

ᐊᐃᕙᔾᔪᑕᐅᔪᒧᑦ ᐋᖅᑭᒍᑕᐅᔪᖅ

4.29 ᐃᓚᒋᓗᓂᐅᒃ ᐊᐃᕙᔾᔪᑕᐅᔪᒧᑦ ᐋᖅᑭᒍᑎᒃᓴᒧᑦ ᐋᖅᑭᑦᓯᒪᔾᔪᑕᐅᔪᖅ ᐅᖃᐅᓯᐅᔪᖅ ᑎᑎᕋᖅᓯᒪᓂᖓᓂ 8, ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓃᒋᐊᖃᕐᐳᑦ ᑖᒃᑯᓄᖓ ᐊᓯᖏᑦ ᐊᐃᕙᔾᔪᑎᓄᑦ ᐋᖅᑭᒍᑎᒃᓴᑦ ᑎᑎᕋᖅᓯᒪᔪᑦ ᐱᓇᓱᐊᖃᑎᒌᑦᑐᓄᑦ ᐊᖏᕈᑕᐅᒐᔭᖅᑐᑦ.

ᐊᐅᓚᑦᓯᔨᐅᔪᑦ ᐊᒻᒪᓗ ᐊᐅᓚᑕᐅᔪᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᒻᒪᓗ ᐱᔪᓐᓇᐅᑏᑦ ᐃᒪᕐᓅᖓᔪᓄᑦ

5.1 ᐊᐅᓚᑦᓯᔪᓐᓇᐅᑎᑖᕐᐸᓪᓕᐊᓂᕐᒧᑦ ᐊᖏᖃᑎᒌᒍᑦ ᓄᒃᑎᕆᔾᔪᑕᐅᒍᓐᓇᓂᐊᖅᑐᖅ ᑲᒥᓯᓇᒧᑦ ᐊᐅᓚᑦᓯᔨᒧᑦ ᐊᒻᒪᓗ ᐊᐅᓚᑕᐅᔪᓂᒃ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᓂᒃ ᐃᒪᕐᒨᖓᔪᓂᒃ.

5.2 ᑕᐃᒪᐃᒃᑲᓗᐊᖅᑎᓪᓗᒍ ᓄᒃᑎᕆᓂᖅ ᑎᑎᕋᖅᓯᒪᓂᖓᓂ 5.1, ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑏᑦ ᐃᒪᕐᒨᖓᔪᑦ ᐱᖁᑎᖏᑦ ᑯᐃᓐ ᑭᒡᒐᑐᖅᑕᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᒃᑎᕆᓂᐅᑉ ᐅᓪᓗᖓᓂ ᓱᓕ ᐱᖁᑎᒌᓐᓇᓂᐊᖅᑕᖏᑦ ᑯᐃᓐ ᑭᒡᒐᑐᖅᑕᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ.

ᐊᑐᖅᑕᐅᔪᑦ ᐱᔪᓐᓇᐅᑏᑦ

5.3 ᓄᑦᑎᖅᑕᐅᓂᖏᑦ ᐊᐅᓚᑦᓯᔨᐅᔪᑦ ᐊᒻᒪᓗ ᐊᐅᓚᑕᐅᔪᑦ ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑏᑦ ᐃᒪᕐᒨᖓᔪᑦ ᑲᒥᓯᓇᒧᑦ ᐅᖃᐅᓯᐅᔪᒧᑦ ᑎᑎᕋᖅᓯᒪᓂᖓᓂ 5.1 ᐊᒃᑐᐃᓂᖃᔾᔮᖏᓚᑦ:

1. ᐊᑐᖅᑕᐅᔪᓕᒫᓂᒃ ᐱᔪᓐᓇᐅᑎᓂᒃ ᐊᒻᒪᓗ ᐱᔪᒐᕆᔭᐅᔪᓂᒃ ᐸᐸᑕᐅᔪᓂᓪᓘᓐᓃᑦ, ᐃᓚᒋᔭᐅᓗᑎᒃ ᐊᑐᖅᑕᐅᔪᑦ ᐱᔪᒪᔭᐅᔪᑦ, ᒐᕙᒪᒃᑯᑦ ᓄᓇᖁᑎᖏᓐᓅᖓᔪᑦ; ᐅᑉᕙᓘᓐᓃᑦ
2. ᐊᑐᖅᑕᐅᔪᑦ ᐱᔪᓐᓇᐅᑎᑦ, ᐃᓚᒋᔭᐅᓗᑎᒃ ᐊᑐᖅᑕᐅᔪᓕᒫᑦ ᐱᔪᒪᔭᐅᔪᑦ, ᐃᒪᕐᒨᖓᔪᑦ.

ᐊᐅᓚᑦᓯᓂᖏᑦ ᐊᐅᓚᑦᓯᔩᑦ ᐊᒻᒪᓗ ᐊᐅᓚᑕᐅᔪᑦ

5.4 ᐊᐅᓚᑦᓯᔩᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᒻᒪᓗ ᐱᔪᓐᓇᐅᑏᑦ ᐃᒪᕐᒨᖓᔪᓄᑦ ᑲᒥᓯᓇᒧᑦ ᐊᐅᓚᑕᐅᒋᐊᓖᑦ ᒪᓕᑦᓯᒪᓗᑎᒃ ᒪᓕᒐᑦᓴᓕᐊᖑᓯᒪᔪᓂᒃ ᐊᐅᓚᑦᓯᔾᔪᑎᓂᓪᓗ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ.

5.5 ᓄᒃᑎᖅᑕᐅᓂᖓᑕ ᐅᓪᓗᖓᓂ, ᑲᒥᓯᓇ ᐃᒪᐃᒍᓐᓇᖅᑐᖅ, ᒪᓕᓪᓗᒋᑦ ᒪᓕᒐᑦᓴᓕᐊᖑᓯᒪᔪᑦ ᐊᐅᓚᑦᓯᔾᔪᑏᓪᓗ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ, ᐊᑐᕐᓗᓂ, ᓂᐅᕐᕈᑎᖃᕐᓗᓂ ᐅᑉᕙᓘᓐᓃᑦ ᓴᒃᑯᐃᓗᓂᓘᓐᓃᑦ ᐃᓘᓐᓈᓂᒃ ᐅᑉᕙᓘᓐᓃᑦ ᒥᑭᓂᕐᓴᒥᒃ ᐱᔪᒪᔭᐅᔪᒥᒃ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᒻᒪᓗ ᐱᓯᒪᓗᓂᒋᑦ ᐊᑭᓖᒍᑕᐅᔪᑦ ᐊᑐᖅᑕᐅᔪᒧᑦ, ᓂᐅᕐᕈᑕᐅᔪᒧᑦ ᓴᒃᑯᑕᐅᔪᒧᓪᓘᓐᓃᑦ, ᐊᒻᒪᓗ ᐊᐅᓚᑦᓯᔪᓐᓇᕐᐳᑦ ᐱᔪᓐᓇᐅᑎᒥᒍᑦ ᐃᒪᕐᒨᖓᔪᓂᒃ, ᐅᑉᕙᓘᓐᓃᑦ ᓂᐅᕐᕈᑎᖃᕐᓗᓂ ᐅᑉᕙᓘᓐᓃᑦ ᓴᒃᑯᐃᓗᒋᑦ ᐊᒻᒪᓗ ᐱᓯᒪᓗᓂᒋᑦ ᐊᑭᓖᒍᑕᐅᔪᑦ ᐊᐅᓚᑕᐅᔪᓄᑦ, ᓂᐅᕐᕈᑕᐅᔪᓄᑦ ᓴᒃᑯᐃᒍᑎᓂᓪᓘᓐᓃᑦ.

ᒪᓕᒐᑦ ᐊᒻᒪᓗ ᒪᓕᒐᓕᐅᕈᓐᓇᖅᑎᑕᐅᔪᑦ

5.6 GC ᐊᖏᕐᓯᒪᐃᓐᓇᕆᐊᓕᒃ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂᒃ ᓴᖅᑮᓂᕐᒥᒃ ᑲᓇᑕ ᐱᖁᔭᓕᐅᕐᕕᔾᔪᐊᖓᓄᑦ ᐊᒻᒪᓗ ᐃᑲᔪᕐᓱᕐᓗᒋᑦ ᒐᕙᒪᒃᑯᑦ ᖃᐅᔨᓴᕈᑎᖏᑦ ᒪᓕᒐᓕᐅᕐᓂᕐᒧᑦ ᐊᑐᖅᑕᐅᒋᐊᓖᑦ ᐅᑯᓄᖓ:

1. ᓄᖅᑲᑎᓪᓗᒋᑦ ᑕᐅᖅᓯᕐᓗᒋᓪᓗ ᐋᖅᑭᒋᐊᕐᓗᒋᓪᓘᓐᓃᑦ ᓄᓇᕗᑦ ᐊᖏᕈᑎᖏᑦ (ᑲᓇᑕ) ᐃᒪᐃᒍᑎᒃᓴᖏᓐᓄᑦ:
   1. ᒪᓕᒐᓕᐅᕐᕕᒃ ᐱᔪᓐᓇᐅᑎᖃᕐᐳᖅ ᒪᓕᒐᓕᐅᕐᓂᕐᒥᒃ ᐊᒃᑐᐊᔪᒥᒃ ᒐᕙᒪᒃᑯᑦ ᓄᓇᖁᑎᖏᓐᓄᑦ, ᐃᒪᕐᓄᑦ, ᐊᒻᒪᓗ ᖃᓄᐃᑦᑑᓂᖓᒍᑦ ᐱᔪᓐᓇᐅᑎ ᐅᑉᕙᓘᓐᓃᑦ ᐱᔪᒪᔭᐅᔪᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐅᑉᕙᓘᓐᓃᑦ ᐱᔪᓐᓇᐅᑎᓂ ᐃᒪᕐᓅᖓᔪᓂ; ᐊᒻᒪᓗ
   2. ᑲᒥᓯᓇ ᐊᐅᓚᑦᓯᔨᐅᕗᖅ ᐊᒻᒪᓗ ᐊᐅᓚᑕᐅᔪᓂᒃ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᓂᒃ ᐃᒪᕐᓅᖓᔪᓂᒃ;
   3. ᒪᓕᒐᓕᐅᕐᕕᒃ ᒪᓕᒐᓕᐅᕈᓐᓇᖅᑐᖅ ᐊᒃᑐᐊᔪᓂᒃ:
      1. ᕿᓂᕐᓂᖅ ᐊᑐᒃᑲᓐᓂᕈᓐᓇᖏᑦᑐᓂᒃ ᓄᓇᒦᓐᖔᖅᑐᓂᒃ ᓄᓇᐅᑉ ᖃᓂᒋᔮᓂ ᐃᒫᓂ;
      2. ᐱᕙᓪᓕᐊᑎᑦᓯᓂᖅ, ᓴᐳᔾᔨᓯᒪᓂᖅ ᐊᒻᒪᓗ ᐊᐅᓚᑦᓯᓂᖅ ᐊᑐᒃᑲᓐᓂᕈᓐᓇᖏᑦᑐᓂᒃ ᓄᓇᒦᓐᖔᖅᑐᓂᒃ ᓄᓇᐅᑉ ᖃᓂᒋᔮᓂ ᐃᒫᓂ, ᐃᓚᒋᔭᐅᓗᑎᒃ ᒪᓕᒐᑦ ᐊᑦᑐᐊᔪᑦ ᓇᓗᓇᐃᖅᑕᐅᓯᒪᔪᒃᑯᑦ ᓴᖅᑭᓪᓗᐊᑕᖃᑦᑕᖅᑐᓂᒃ ᑖᒃᑯᓇᓐᖓᑦ ᓄᓇᒦᓐᖔᖅᑐᓂᒃ;
      3. ᐱᕙᓪᓕᐊᑎᑦᓯᓂᖅ, ᓴᐳᔾᔨᓯᒪᓂᖅ ᐊᒻᒪᓗ ᐊᐅᓚᑦᓯᓂᖅ ᐱᓕᕆᕕᐅᔪᓂᒃ ᓴᓇᔭᐅᓯᒪᔪᓂᓪᓗ ᓄᓇᐅᑉ ᖃᓂᒋᔮᓂ ᐃᒫᓂ ᐊᐅᓚᒍᑎᒃᓴᖏᓐᓄᑦ ᐊᒻᒪᓗ ᐆᒻᒪᖅᑯᑎᖃᕈᑎᒃᓴᓄᑦ;
      4. ᐅᖅᓱᐊᓗᓐᓄᑦ ᒑᓯᓄᓪᓗ ᓱᓪᓗᓖᑦ ᐊᑕᖏᖅᑐᑎᒃ ᓄᓇᐅᑉ ᖃᓂᒋᔮᓃᑦᑐᑦ ᐃᒫᓂ;
      5. ᐊᐅᓪᓚᖅᑎᑕᐅᓂᖏᑦ, ᓄᓇᕗᒻᒥᒃ ᐊᓯᐊᓄᑦ ᑲᓇᑕᐅᑉ ᐃᓚᖓᓄᑦ, ᓴᖅᑭᓪᓗᐊᑕᕐᓯᒪᔪᓂᒃ ᐊᑐᒃᑲᓐᓂᕈᓐᓇᖏᑦᑐᓂᒃ ᓄᓇᒦᓐᖔᖅᑐᓂᒃ ᓄᓇᐅᑉ ᖃᓂᒋᔮᓂ ᐃᒫᓂ, ᐊᒻᒪᓗ ᐆᒻᒪᖅᑯᑎᓕᐅᕈᑎᓄᑦ ᐊᐅᓚᔾᔪᑎᓂᒃ ᐅᑉᕙᓘᓐᓃᑦ ᓴᖅᑭᕐᓯᒪᔪᓂᒃ ᓴᓇᔭᐅᓯᒪᔪᓂᒃ ᓄᓇᐅᑉ ᖃᓂᒋᔮᓂ ᐃᒫᓂ; ᐊᒻᒪᓗ
      6. ᑮᓇᐅᔭᓕᐊᖑᓯᒪᔪᑦ ᓇᓗᓇᐃᖅᑕᐅᓯᒪᔪᒃᑯᑦ ᑖᒃᓯᑎᒍᑦ ᐊᑐᒃᑲᓐᓂᕈᓐᓇᖏᑦᑐᓄᑦ ᓄᓇᒦᓐᖔᖅᑐᓂᒃ ᓄᓇᐅᑉ ᖃᓂᒋᔮᓂ ᐃᒫᓂ ᐊᒻᒪᓗ ᓴᖅᑭᓪᓗᐊᑕᕐᓯᒪᔪᑦ ᑖᒃᑯᓇᓐᖓᑦ ᓄᓇᒦᓐᖔᖅᑐᓂᒃ ᐊᒻᒪᓗ ᐱᓕᕆᕕᒋᔭᐅᔪᓅᖓᔪᓂᒃ ᓴᓇᔭᐅᓯᒪᔪᓂᓪᓗ ᐅᖃᐅᓯᐅᔪᓂᒃ ᐊᕕᑦᑐᕐᓯᒪᓂᐊᕈᓯᖓᓂ 5.6(a)(iii)(C) ᐊᒻᒪᓗ ᐆᒻᒪᖅᑯᑎᓕᐅᕈᑎᓕᐊᕈᑏᑦ ᑖᒃᑯᓇᓐᖓᑦ;
   4. ᒪᓕᒐᓕᐊᖑᓯᒪᔪᑦ ᐊᑦᑐᐊᔪᑦ ᐱᓕᕆᐊᖑᔪᓂᒃ ᐅᖃᐅᓯᐅᔪᓂᒃ ᑎᑎᕋᖅᓯᒪᓂᐊᕈᓯᖓᓂ 5.6(a)(iii)(E) ᐊᐅᓚᑦᓯᒍᓐᓇᕈᑕᐅᓐᖏᓚᑦ ᐅᑉᕙᓘᓐᓃᑦ ᐊᑐᖅᑕᐅᓗᑎᒃ ᐱᕋᔭᓐᓂᕐᒧᑦ ᐊᑭᖏᓐᓄᑦ ᐅᑉᕙᓘᓐᓃᑦ ᓱᓇᒃᑯᑖᓄᑦ ᐊᐅᓪᓚᖅᑎᑕᐅᔪᓄᑦ;
   5. ᒪᓕᒐᓕᐊᖑᔪᑦ ᐊᑦᑐᐊᔪᑦ ᐱᓕᕆᐊᖑᔪᓂᒃ ᐅᖃᐅᓯᐅᔪᓂᒃ ᑎᑎᕋᖅᓯᒪᓂᐊᕈᓯᖓᓂ 5.6(a)(iii)(F) ᐊᐅᓚᑦᓯᒍᓐᓇᕈᑕᐅᓐᖏᓚᑦ ᐅᑉᕙᓘᓐᓃᑦ ᑖᒃᓰᔭᐅᑕᐅᓗᑎᒃ ᐊᔾᔨᒌᓐᖏᒍᑎᖏᓐᓄᑦ ᓴᓇᔭᐅᓂᖏᓐᓄᑦ ᐊᐅᓪᓚᖅᑎᑕᐅᓯᒪᓐᖏᑦᑐᑦ ᓴᓇᔭᐅᓐᖏᑐᓪᓗ ᐊᐅᓚᖅᑎᑕᐅᓯᒪᔪᑦ ᐊᓯᐊᓄᑦ ᑲᓇᑕᒥ; ᐊᒻᒪᓗ
   6. ᑲᔪᓯᑎᑕᐅᓂᖓ ᐅᑭᐅᖅᑕᖅᑐᒥ ᒐᕙᒪᖓᓄᑦ ᒪᓕᒐᖅ ᐊᒻᒪᓗ ᑭᒡᓕᓕᐊᖑᓯᒪᔪᓕᒫᑦ ᑕᐃᒪᐃᑦᑐᓄᑦ ᒪᓕᒐᕐᓄᑦ ᐅᖃᐅᓯᐅᔪᑦ ᑎᑎᕋᖅᓯᒪᓂᖏᓐᓂ 5.7-ᒥᒃ 5.11−ᒧᑦ ᑲᔪᓯᑎᑕᐅᒍᓐᓇᖅᑐᑦ;
2. ᓄᖅᑲᑎᓪᓗᒍ ᓄᓇᕗᒻᒥ ᐃᑦᑕᕐᓂᓴᓕᕆᓂᕐᒧᑦ ᐃᓕᖅᑯᓯᐅᕙᑦᑐᒥᓂᕐᓄᓪᓗ ᓄᓇᓄᑦ ᐊᐅᓚᑦᓯᔾᔪᑎᓕᐊᖑᓯᒪᔪᑦ ᓄᓇᕗᑦ ᐱᖁᔭᖓᒍᑦ (ᑲᓇᑕ);
3. ᓄᖅᑲᑎᓪᓗᒍ ᓄᓇᕗᒻᒥ ᐃᒪᖏᓐᓄᑦ ᐊᒻᒪᓗ ᓄᓇᐅᑉ ᖄᖓᓄᑦ ᐱᔪᓐᓇᐅᑎᓄᑦ ᐋᖅᑭᒋᐊᒃᑲᐃᔩᑦ ᐱᖁᔭᖓ (ᑲᓇᑕ) ᐊᒻᒪᓗ ᐊᐅᓚᑦᓯᔾᔪᑎᓕᐊᒥᓂᓕᒫᑦ ᑕᑉᕘᓇ ᐱᖁᔭᒃᑯᑦ;
4. ᐊᕕᑦᑐᕐᓯᒪᓂᐊᕈᓯᖓᒍᑦ 5.6(e), ᐋᖅᑭᒋᐊᕐᓗᒍ NuPPAA ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒧᑦ ᒥᓂᔅᑕᖃᖁᓪᓗᒍ, ᐊᑐᓕᕐᓗᓂ ᓄᒃᑎᖅᑕᐅᓂᖓᑕ ᐅᓪᓗᖓᓂ, ᑭᖑᓂᐊᒍᑦ ᐊᐅᓚᑕᖏᑦ ᒐᕙᒪᑐᖃᒃᑯᓐᓂ ᒥᓂᔅᑕ NuPPAA−ᑯᑦ ᓴᖅᑭᖃᑦᑕᕐᓂᖏᓐᓄᑦ ᑐᖏᑦᓯᐊᖓᓂ ᓄᒃᑎᖅᑕᐅᓂᐅᑉ ᐅᓪᓗᖓᑕ:
   1. ᐱᓕᕆᐊᓕᒫᓅᖓᔪᓂ ᓄᓇᐅᑉ ᖃᓂᒋᔮᓂ ᐃᒫᓂ ᑕᒫᓂᐅᓐᖏᑦᑐᖅ, ᐊᑕᖏᕐᓗᓂ ᐅᑉᕙᓘᓐᓃᑦ ᐃᓚᐃᓐᓇᖓ, ᒐᕙᒪᑐᖃᒃᑯᓐᓅᖓᔪᓂ:
      1. ᐊᐅᓚᑕᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᑎᑎᕋᖅᓯᒪᓂᖓᓂ 73.(1)(b) NuPPAA ᑲᒪᒋᔭᖃᖅᑎᐅᓗᓂ ᒥᓂᔅᑕ ᐊᓯᐊᓂᒃ ᒐᕙᒪᑐᖃᒃᑯᓐᓂ ᐅᑉᕙᓘᓐᓃᑦ ᐅᑭᐅᖅᑕᖅᑑᑉ ᐊᕕᑦᑐᕐᓯᒪᓂᖓᓂ ᒥᓂᔅᑕᒥᒃ ᑲᒪᒋᔭᖃᖅᑐᖃᖅᑎᓐᓇᒍ ᒥᓂᔅᑕᒥᒃ.
      2. ᐊᐅᓚᑕᖏᑦ ᒐᕙᒪᑐᖃᒃᑯᓂ ᒥᓂᔅᑕ ᐊᕕᑦᑐᕐᓯᒪᓂᐊᕈᓯᖓᒍᑦ 149.(3) NuPPAA−ᑯᑦ ᐱᖃᑦᑕᕐᓗᓂ ᑐᓂᐅᖅᑲᐃᖃᑦᑕᕐᓗᓂᓗ ᑎᑎᕋᖅᓯᒪᔪᓂᒃ ᑲᒪᒋᔭᖃᖅᑐᓄᑦ ᒥᓂᔅᑕᓄᑦ; ᐊᒻᒪᓗ
      3. ᐊᐅᓚᑕᖏᑦ ᒐᕙᒪᑐᖃᒃᑯᓐᓂ ᒥᓂᔅᑕ ᐊᕕᑦᑐᕐᓯᒪᓂᐊᕈᓯᖓᒍᑦ 149.(4) NuPPAA−ᑯᑦ ᐊᐅᓚᑦᓯᖃᑦᑕᕐᓗᓂ ᐱᓕᕆᐊᒃᓴᓂᒃ ᑲᒪᒋᔭᖃᖅᑐᒧᑦ ᒥᓂᔅᑕᒧᑦ ᐊᕕᑦᑐᕐᓯᒪᓂᐊᕈᓯᖓᓂ 200.(4) NuPPAA;
   2. ᑐᐊᕕᕐᓇᑎᓪᓗᒍ ᐊᑕᖏᖅᑐᒥᒃ ᓄᓇᐅᑉ ᖃᓂᒋᔮᓂ ᐃᒫᓂ ᐊᒻᒪᓗ ᑕᒫᓂᐅᓐᖏᑦᑐᖅ, ᐊᑕᖏᕐᓗᓂ ᐃᓚᐃᓐᓇᖓᓘᓐᓃᑦ, ᒐᕙᒪᑐᖃᒃᑯᓐᓅᖓᔪᒥ:
      1. ᐊᐅᓚᑕᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᑎᑎᕋᖅᓯᒪᓂᖓᓂ 152.(1)(c) NuPPAA ᓇᓗᓇᐃᒃᑯᑕᖅᑖᑎᑦᓯᓂᕐᒧᑦ ᑐᐊᕕᕐᓇᖅᑐᑕᖃᕐᓂᖓᓂᒃ;
      2. ᐊᐅᓚᑕᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᑎᑎᕋᖅᓯᒪᓂᖓᓂ 152.(2) NuPPAA ᐱᓯᒪᓕᕐᓂᕐᒧᑦ ᐅᓂᒃᑳᓂᒃ ᐃᖅᑲᓇᐃᔮᓄᑦ ᐊᐅᓚᓂᐅᔪᓂᓪᓘᓐᓃᑦ ᐋᖅᑭᒍᑎᒃᓴᓂᒃ ᑐᐊᕕᕐᓇᖅᑐᒧᑦ ᐅᑉᕙᓘᓐᓃᑦ ᐊᑐᖅᑕᐅᒋᐊᓕᓐᓂᒃ ᑭᖑᓂᐊᒍᑦ ᐃᓱᐊᓂ ᑐᐊᕕᕐᓇᑐᕐᓯᐅᕐᓂᐅᑉ;
      3. ᐊᐅᓚᑕᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᐊᕕᑦᑐᕐᓯᒪᓂᐊᕈᓯᖓᓂ 152.(3) NuPPAA ᐱᓯᒪᓕᕐᓂᕐᒧᑦ ᐅᓂᒃᑳᓂᒃ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖏᓐᓂᒃ;
      4. ᐊᐅᓚᑕᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᐊᕕᑦᑐᕐᓯᒪᓂᐊᕈᓯᖓᓂ 152.(4) NuPPAA ᐱᓯᒪᓕᕐᓂᕐᒧᑦ ᐅᓂᒃᑳᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ; ᐊᒻᒪᓗ
      5. ᐊᐅᓚᑕᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᐊᕕᑦᑐᕐᓯᒪᓂᐊᕈᓯᖓᓂ 152.(6) NuPPAA ᒪᓕᑦᑎᑦᓯᓂᕐᒥᒃ ᒪᓕᒐᑦᓴᓕᐊᖑᓯᒪᔪᓂᒃ ᐊᐅᓚᑦᓯᔾᔪᑎᓂᓪᓗ ᐊᐅᓚᑦᓯᒍᑎᓂᒃ ᐃᖅᑲᓇᐃᔮᓄᑦ ᐊᐅᓚᑕᐅᔪᓂᓪᓘᓐᓃᑦ ᐊᑐᖅᑕᐅᒋᐊᓕᓐᓂᒃ ᐃᓱᐊᓕ ᑐᐊᕕᕐᓇᖅᑐᓕᕆᓂᐅᑉ;
   3. ᐱᓕᕆᐊᒨᖓᔪᓂ ᐃᓚᐃᓐᓇᖓᓄᑦ "ᓇᓗᓇᐃᖅᑕᐅᓯᒪᔪᒥ" (ᓇᓗᓇᐃᕐᓯᒪᔭᐅᔪᒥ NuPPAA-ᒥ) ᐃᓚᐃᓐᓇᖓ ᐱᓕᕆᐊᖅ "ᓇᓗᓇᐃᖅᑕᐅᓯᒪᔪᒦᑦᑐᖅ" ᐊᑕᖏᕐᓗᓂ ᓄᓇᐅᑉ ᖃᓂᒋᔮᓂ ᐃᒫᓂ ᐊᒻᒪᓗ ᑕᒫᓂᐅᓐᖏᑦᑐᖅ, ᐊᑕᖏᕐᓗᓂ ᐃᓚᐃᓐᓇᖓᓘᓐᓃᑦ, ᒐᕙᒪᑐᖃᒃᑯᓐᓅᖓᔪᒥ, ᐊᐅᓚᑕᐅᔪᑦ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ ᐊᕕᑦᑐᕐᓯᒪᓂᐊᕈᓯᖓᒍᑦ 159(1) NuPPAA−ᒥ ᐊᖏᕈᑎᖃᖁᓪᓗᒍ ᐊᖏᖃᑎᒌᒍᒻᒥᒃ ᐋᖅᑭᐅᒪᒍᑎᒃᓴᒥᒃ ᕿᒥᕐᕈᓂᕐᒧᑦ ᑕᒪᑦᓱᒥᖓᐃᓐᓇᖅ ᐱᓕᕆᐊᒥᒃ; ᐊᒻᒪᓗ
   4. ᐊᐅᓚᑦᓯᓂᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᐊᕕᑦᑐᕐᓯᒪᓂᖓᒍᑦ 20 9 NuPPAA−ᑯᑦ ᑎᒃᑯᐊᕐᓯᓂᕐᒥᒃ ᑭᓇᒃᑯᑐᐃᓐᓇᕐᓂᒃ ᓇᓗᓇᐃᕐᓯᓂᐊᖅᑐᓂᒃ ᒪᓕᓐᓂᖏᓐᓂᒃ ᐅᑉᕙᓘᓐᓃᑦ ᓴᐳᔾᔨᓯᒪᒍᑎᒃᓴᓂᒃ ᒪᓕᓐᖏᑦᑐᓄᑦ NuPPAA−ᓄᑦ ᑕᒪᒃᑯᓄᓐᖓᖓᔪᓄᑦ ᐊᑕᖏᖅᑐᓄᑦ ᓄᓇᐅᑉ ᖃᓂᒋᔮᓃᑦᑐᓂ ᐃᒫᕐᓂ ᐊᒪᓗ ᑕᒫᓂᐅᓐᖏᑦᑐᖅ ᒐᕙᒪᑐᖃᒃᑯᓐᓅᖓᔪᓂ, ᐊᒻᒪᓗ ᐊᐅᓚᑕᖏᑦ ᒐᕙᒪᑐᖃᒃᑯᑦ ᒥᓂᔅᑕᖓᑕ ᐊᕕᑦᑐᕐᓯᒪᓂᐊᕈᓯᖓᒍᑦ 210(3) NuPPAA ᐱᑕᖃᖅᑎᑦᓯᖁᓪᓗᒋᑦ ᑎᒃᑯᐊᖅᑕᐅᓯᒪᔪᓂᒃ ᑭᒃᑯᑐᐃᓐᓇᕐᓂᒃ ᓇᓗᓇᐃᒃᑯᑕᓕᓐᓂᒃ.
5. ᐊᐅᓚᑕᐅᔪᓂ ᐊᕕᑦᑐᕐᓯᒪᓂᐊᕈᓯᖓᒍᑦ 5.6(d) ᐃᓚᓕᐅᔾᔭᐅᓯᒪᒋᐊᖃᓐᖏᑦᑐᑦ ᐊᐅᓚᑕᐅᔪᑦ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ ᐱᓕᕆᐊᒨᖓᔪᓂᒃ ᐅᖃᐅᓯᕆᔭᐅᓯᒪᔪᓂ ᕿᒥᕐᕈᓂᕐᒥᒃ ᒐᕙᒪᑐᖃᒃᑯᑦ ᐊᕙᑎᒥᒃ ᖃᐅᔨᓴᕐᓂᕐᒧᑦ ᖃᐅᔨᒪᔨᑕᖏᓐᓂᒃ ᒪᓕᓪᓗᒋᑦ ᑎᑎᕋᖅᓯᒪᓂᖓᓂ ᐊᕕᑦᑐᕐᓯᒪᓂᐊᕈᓯᕐᒥ 94.(1)(a)(i) NuPPAA-ᓂ.
6. ᐋᖅᑭᒋᐊᕐᓗᒋᑦ NuPPAA ᐊᐅᓚᑦᓯᒍᑎᒃᓴᓂᒃ, ᑲᔪᓯᓗᓂ ᓄᒃᑎᖅᑕᐅᓂᖓᑕ ᐅᓪᓗᖓᓂ, ᑲᑎᒪᔨᖏᑦ ᐊᒻᒪᓗ ᐃᒃᓯᕙᐅᖅᑕᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑎᒃᑯᐊᖅᑕᐅᒍᑎᒃᓴᖏᓐᓂᒃ ᐅᑯᓄᖓ:
   1. ᒪᕐᕉᒃ ᑲᑎᒪᔩᑦ ᑎᒃᑯᐊᖅᑕᐅᒋᐊᓖᒃ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ;
   2. ᒪᕐᕉᒃ ᑲᑎᒪᔩᑦ ᑎᒃᑯᐊᖅᑕᐅᒋᐊᓖᒃ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ;
   3. ᓯᑕᒪᑦ ᑲᑎᒪᔩᑦ ᑎᒃᑯᐊᖅᑕᐅᒋᐊᓖᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ ᓂᕈᐊᒐᑦᓴᓐᖑᖅᑎᑕᐅᓯᒪᓗᑎᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ;
   4. ᐃᒃᓯᕙᐅᑕᖅ ᑎᒃᑯᐊᖅᑕᐅᒋᐊᓕᒃ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ, ᑐᓴᕋᓱᐊᕈᑕᐅᓚᐅᖅᑎᓪᓗᒍ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᖓᓂᒃ, ᓂᕈᐊᒐᑦᓴᓐᖑᖅᑎᑕᐅᓯᒪᔪᓂᒃ ᐊᖏᕈᑕᐅᔪᓂᒃ ᐊᒻᒪᓗ ᑐᓂᔭᐅᓯᒪᔪᓂᒃ 8-ᓂᒃ ᑲᑎᒪᔨᐅᖃᑕᐅᔪᓂᒃ; ᐊᒻᒪᓗ
   5. ᑲᑎᒪᔩᑦ ᑕᒪᒃᑯᓇᓂ ᓇᓕᒧᒌᒥᒃ ᐊᑐᕐᓂᕐᒥᒃ ᐃᓐᓃᓯᒪᓂᕐᒥᓪᓗ ᑎᒃᑯᐊᖅᑕᐅᓂᐊᖅᑐᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ ᓂᕈᐊᒐᑦᓴᓕᐊᖑᓯᒪᔪᒥᒃ ᒪᑭᕕᒃᑯᓐᓂᒃ
7. ᐋᖅᑭᒋᐊᕐᓗᒋᑦ NuPPAA ᐊᐅᓚᑦᓯᒍᑎᒃᓴᓂᒃ, ᑲᔪᓯᓗᓂ ᓄᒃᑎᖅᑕᐅᓂᖓᑕ ᐅᓪᓗᖓᓂ, ᑲᑎᒪᔨᖏᑦ ᐊᒻᒪᓗ ᐃᒃᓯᕙᐅᖅᑕᖓ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖏᑦ ᑎᒃᑯᐊᖅᑕᐅᒍᑎᒃᓴᖏᓐᓂᒃ ᐅᑯᓄᖓ:
   1. ᒥᑭᓂᕐᐹᕆᓗᒍ ᐊᑕᐅᓯᕐᒥᒃ ᑲᑎᒪᔨᒥᒃ ᑎᒃᑯᐊᖅᑕᐅᔪᖃᕆᐊᓕᒃ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ;
   2. ᐊᒥᓲᓂᖏᑕ ᓇᓕᒧᖏᓐᓂᒃ ᑲᑎᒪᔩᑦ ᑎᒃᑯᐊᖅᑕᐅᓯᒪᔪᓄᑦ ᑎᑎᕋᖅᓯᒪᓂᖓᒍᑦ 5.6 (g)(i)
   3. ᒥᑭᓂᕐᐹᕆᓗᒍ ᐊᑉᕙᖏᑦ ᑲᑎᒪᔩᑦ, ᐊᓯᖏᑦ ᐃᒃᓯᕙᐅᑕᐅᑉ, ᑎᒃᑯᐊᖅᑕᐅᒋᐊᓖᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᑕ ᒥᓂᔅᑕᖓᓄᑦ ᓂᕈᐊᒐᑦᓴᓐᖑᖅᑎᑕᐅᓯᒪᔪᖅ ᓇᓗᓇᐃᖅᑕᐅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ;
   4. ᐃᒃᓯᕙᐅᑕᖅ ᑎᒃᑯᐊᖅᑕᐅᔭᕆᐊᓕᒃ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ, ᑐᓴᕋᓱᐊᕈᑕᐅᓚᐅᖅᑎᓪᓗᒍ ᒐᕙᒪᑐᖃᒃᑯᑦ ᒥᓂᔅᑕᖓᓂᒃ, ᓂᕈᐊᒐᑦᓴᓐᖑᖅᑎᑕᐅᓯᒪᔪᒥᒃ ᐊᖏᕈᑕᐅᓯᒪᔪᒥᒃ ᐊᒻᒪᓗ ᑐᓂᔭᐅᓯᒪᔪᒥᒃ ᑲᑎᒪᔨᐅᖃᑎᖏᓐᓄᑦ; ᐊᒻᒪᓗ
   5. ᑲᑎᒪᔩᑦ ᑕᒪᒃᑯᓇᓂ ᓇᓕᒧᒌᒥᒃ ᐊᑐᕐᓂᕐᒥᒃ ᐃᓐᓃᓯᒪᓂᕐᒥᓪᓗ ᑎᒃᑯᐊᖅᑕᐅᓂᐊᖅᑐᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ ᓂᕈᐊᒐᑦᓴᓕᐊᖑᓯᒪᔪᒥᒃ ᒪᑭᕕᒃᑯᓐᓂᒃ
8. ᐱᖁᔭᓕᐊᕆᓗᒍ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᓄᓇᓄᑦ ᐱᖁᔭᖅ (ᑲᓇᑕ); ᐊᒻᒪᓗ ᐊᐅᓚᑦᓯᔾᔪᑎᑦ ᐋᖅᑭᑦᑕᐅᓯᒪᔪᑦ ᐱᖁᔭᒃᑯᑦ, ᐊᑐᕋᑦᓴᐅᖏᑦᑐᑦ ᒐᕙᒪᒃᑯᑦ ᓄᓇᖁᑎᖏᓐᓅᖓᔪᓄᑦ;
9. ᐱᖁᔭᓕᐊᕆᓗᒍ ᑲᓇᑕᒥ ᐅᖅᓱᐊᓗᓐᓄᑦ ᒑᓯᓄᓪᓗ ᐊᐅᓚᓂᖏᓐᓄᑦ ᐱᖁᔭᖅ (ᑲᓇᑕ), ᐊᒻᒪᓗ ᐊᐅᓚᑦᓯᔾᔪᑎᑦ ᐋᖅᑭᑦᑕᐅᓯᒪᔪᑦ ᐱᖁᔭᒃᑯᑦ, ᐊᑐᕋᑦᓴᐅᖏᑦᑐᑦ ᓄᓇᐅᑉ ᖃᓂᒋᔮᓃᑦᑐᓄᑦ ᐃᒪᕐᓅᖓᔪᓄᑦ ᑭᓯᐊᓂ ᓄᓇᓄᑦ ᑲᒪᒋᔭᐅᔪᓄᑦ ᐊᐅᓚᑦᓯᔨᓄᑦ ᐊᒻᒪᓗ ᐊᐅᓚᑕᐅᔪᑦ GC−ᑯᓐᓂᒃ ᐊᒻᒪᓗ ᑭᓯᐊᓂ ᑎᑭᐅᑎᓯᒪᓂᖏᑦ ᑐᒃᓯᕋᐅᑏᑦ ᑕᐃᒪᐃᑦᑐᒧᑦ ᑐᒃᓯᕋᐅᑎᒧᑦ ᒪᓕᒐᑦᓴᒧᑦ ᓄᓇᐅᑉ ᖃᓂᒋᔮᓂ ᐃᒫᓂ ᐊᑐᖅᑕᐅᒋᐊᖃᑐᐃᓐᓇᕆᐊᓕᒃ ᒪᓕᓪᓗᒋᑦ ᐊᕕᑦᑐᕐᓯᒪᓂᐊᕈᓯᖓᓃᑦ 5.6(k);
10. ᑲᓇᑕᒥ ᐅᖅᓱᐊᓗᓕᕆᓂᕐᒧᑦ ᐱᖁᔭᕐᔪᐊᖅ (ᑲᓇᑕᒥ, ᐊᒻᒪᓗ ᒪᓕᒐᕋᓛᖏᑦ ᓴᖅᑭᑕᐅᓯᒪᔪᑦ ᐱᖁᔭᔪᐊᖅᑎᒍᑦ, ᐊᑐᓐᖏᑎᑕᐅᓗᑎᒃ ᒐᕙᒪᒃᑯᑦ ᓄᓇᖁᑎᖏᓐᓄᑦ ᑎᑭᓪᓗᒍ ᐊᑐᖅᑕᐅᓂᕆᔭᖏᑦ ᐱᖁᔭᕐᔪᐊᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᑐᕆᐊᖃᖅᑐᑦ ᒪᓕᒡᓗᒋᑦ ᑎᑎᕋᖅᓯᒪᓂᖓᓄᑦ 5.6(k);
11. ᖃᐅᔨᒪᒋᐊᕐᓂᖅ ᑲᓇᑕᒥ ᐅᖅᓱᐊᓗᓐᓄᑦ ᒑᓯᓄᓪᓗ ᐊᐅᓚᑕᐅᓂᖏᓐᓄᑦ ᐱᖁᔭᖅ (ᑲᓇᑕ), ᑲᓇᑕᒥ ᐅᖅᓱᐊᓗᓕᕆᔨᒃᑯᑦ ᐱᖁᔭᖓ (ᑲᓇᑕ) ᐊᒻᒪᓗ ᐊᑐᕆᐊᓖᑦ ᑎᑎᕋᖅᓯᒪᔪᑦ ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᖁᔭᓂ (ᑲᓇᑕ); ᐅᑉᕙᓘᓐᓃᑦ ᐊᓯᖏᓐᓄᑦ ᒐᕙᒪᑐᖃᒃᑯᑦ ᒪᓕᒐᖏᑦ, ᐊᐅᓚᔾᔪᑕᐅᖁᓪᓗᒋᑦ:
    1. ᐊᑕᐅᓯᕐᒨᖓᓕᖅᑕᐅᓂᖏᑦ ᓂᑭᑦᑖᖅᑐᑦ ᐊᑐᖅᑕᐅᕙᑦᑐᑦ ᐋᖅᑭᑦᑕᐅᓯᒪᔪᑦ ᐊᖏᖃᑎᒌᒍᑎᓂ ᐅᖃᐅᓯᐅᔪᑦ ᐊᕕᑦᑐᕐᓯᒪᓂᖓᓂ 6.5;
    2. ᓴᐳᔾᔭᐅᓯᒪᓂᖏᑦ ᑲᓐᖑᓇᖅᑐᑦ ᑐᓴᕈᑎᓕᐊᖑᓯᒪᔪᑦ GC−ᑯᓐᓂᒃ ᐅᑉᕙᓘᓐᓃ ᐱᖓᓱᐃᖏᓐᓂᒃ ᐱᓇᓱᐊᖃᑕᐅᔪᓂᒃ ᒪᓕᓪᓗᒋᑦ, ᐅᑉᕙᓘᓐᓃᑦ ᑲᔪᓯᕙᓪᓕᐊᒍᑕᐅᔪᑦ, ᐊᖏᖃᑎᒌᒍᑦ ᐅᖃᐅᓯᐅᔪᖅ ᐊᕕᑦᑐᕐᓯᒪᓂᖓᓂ 6.5; ᐊᒻᒪᓗ
    3. ᑲᒪᔨᒋᔭᐅᓂᖏᑦ NEB ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒥ ᒪᓕᒐᒃᑯᑦ ᓇᓗᓇᐃᖅᑕᐅᓯᒪᔪᖅ ᑎᑎᕋᖅᓯᒪᓂᖏᓐᓂ 5.8 ᐊᒻᒪᓗ 6.8;
12. ᐊᖏᕈᑕᐅᒋᐊᓖᑦ GC−ᑯᓐᓂᒃ ᐋᖅᑭᒋᐊᕈᑎᓕᒫᓄᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒥ ᒪᓕᒐᕐᓄᑦ ᐊᒃᑐᐃᓂᖃᕋᔭᖅᑐᓄᑦ ᐊᑕᐅᓯᕐᒨᖅᑕᐅᓂᖏᓐᓄᑦ ᓂᑭᑦᑖᖅᑐᑦ ᐃᑲᔫᑎᑦ ᐅᖃᐅᓯᐅᔪᑦ ᐊᖏᖃᑎᒌᒍᑎᓂ ᓇᓗᓇᐃᖅᑕᐅᓯᒪᓪᓗᑎᒃ ᑎᑎᕋᖅᓯᒪᓂᖓᓂ 6.5 ᐅᑉᕙᓘᓐᓃᑦ ᑭᒡᓕᓕᐅᕐᓯᒪᓗᒍ ᑐᒃᓯᕋᐅᑦ, ᐅᑉᕙᓘᓐᓃᑦ ᐊᑐᓕᖅᑎᑕᐅᓗᓂ, GN-ᑯᑦ ᑕᐃᒪᐃᑦᑐᒥᒃ ᐊᖏᖃᑎᒌᒍᑎᒥᒃ.
13. ᐃᒪᐃᑉᐸᑦ, ᐱᒋᐊᕐᓂᖓᓂᒃ ᑕᓪᓕᒪᓂᒃ ᐊᕐᕌᒍᓂᒃ ᓄᒃᑎᖅᑕᐅᓂᖓᑕ ᐅᓪᓗᖓᓂ, ᐊᒻᒪᓗ ᖃᖓᑐᐃᓐᓇᖅ ᑲᒪᒋᔭᐅᑎᓪᓗᒋᑦ ᒪᓕᓪᓗᒋᑦ ᑎᑎᕋᖅᓯᒪᓂᖓᒍᑦ 6.9, ᐊᖏᕈᑕᐅᒋᐊᓕᒃ GC−ᑯᓐᓄᑦ ᐋᖅᑭᒋᐊᕈᑎᓕᒫᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖏᓐᓂ ᒪᓕᒐᑦᓴᑦ ᐊᒃᑐᐃᓂᖃᕐᓂᐊᕐᐸᑕ ᐊᐅᓚᑦᓯᔾᔪᑎᑎᒍᑦ ᐊᐅᓚᑕᐅᔪᓂᒃ NEB-ᑯᑦ ᓄᓇᐅᑉ ᖃᓂᒋᔮᓂ ᐃᒫᓂ;
14. ᐊᐅᓚᔾᔪᑎᒃᓴᖃᕐᓗᓂ ᓄᒃᑎᕆᓂᕐᒨᖓᔪᑦ ᐊᒻᒪᓗ ᒪᓕᒐᑦ ᑲᔪᓯᑎᑕᐅᓯᒪᖁᓪᓗᒋᑦ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓅᖓᔪᑦ; ᐊᒻᒪᓗ
15. ᑭᖑᓂᐊᒍᑦ ᐋᖅᑭᒋᐊᖃᑦᑕᓕᕐᓗᒋᑦ ᒐᕙᒪᑐᖃᒃᑯᓐᓄᑦ ᒪᓕᒐᑦᓴᑦ ᐱᑕᖃᕆᐊᖃᕐᐸᑦ.

5.7 GN-ᑯᑦ ᐊᖏᕐᓯᒪᒋᐊᓖᑦ ᐊᐅᓚᑦᓯᔪᓐᓇᐅᑎᓄᑦ ᐊᖏᖃᑎᒌᒍᑎᓂᒃ ᑐᓴᖅᑎᑦᓯᒍᑎᒃᓴᓂᒃ ᒪᓕᒐᓕᐅᕐᕕᒻᒧᑦ ᐊᒻᒪᓗ ᐃᑲᔫᑎᓂᒃ ᒐᕙᒪᒃᑯᑦ ᖃᐅᔨᓴᕈᑎᖏᓐᓂᒃ ᒪᓕᒐᕐᓄᑦ ᑲᔪᓯᑎᑕᐅᓯᒪᔪᓂᒃ ᓄᒃᑎᖅᑕᓂᖓᑕ ᐅᓪᓗᖓᓂᒃ ᐊᒻᒪᓗ ᐃᒫᒃ, ᓄᒃᑎᖅᑕᐅᓂᖓᑕ ᐅᓪᓗᖓᓂ, ᐊᑐᖅᑕᐅᒋᐊᓖᑦ:

1. ᐅᔾᔨᓇᖅᑎᒋᐊᕐᓗᒍ ᑕᕐᕋᕆᔭᐅᒻᒪᑦ ᒪᓕᒐᕐᓂᒃ ᓄᖅᑲᖅᑎᑕᐅᓯᒪᔪᓂᒃ ᐅᑉᕙᓘᓐᓃᑦ ᐊᑐᕈᓐᓇᐃᖅᑎᑕᐅᓯᒪᔪᓂᒃ ᓄᓇᐅᑉ ᖃᓂᒋᔮᓂ ᐃᒫᓂ ᐅᑉᕙᓘᓐᓃᑦ ᒐᕙᒪᒃᑯᑦ ᓄᓇᖁᑎᖏᓐᓂᒃ ᒪᓕᓪᓗᒋᑦ ᑎᑎᕋᖅᓯᒪᓂᖓ 5.6 ᐃᓚᒋᔭᐅᓗᑎᒃ, ᓱᖅᑯᐃᖅᑕᐅᓯᒪᓗᑎᒃ, ᑎᑎᕋᖅᓯᒪᔪᑦ ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᖁᔭᓂ (ᑲᓇᑕ) ᐊᑐᕆᐊᓖᑦ NEB−ᑯᓐᓄᑦ ᑲᒪᔨᒋᔭᐅᓗᓂ ᐊᐅᓚᑦᓯᔨᒋᔭᐅᓗᓂ ᓄᓇᐅᑉ ᖃᓂᒋᔮᓂ ᐃᒫᓂ;
2. ᑭᖑᓂᐅᒍᑦ ᐊᔾᔨᒋᓗᓂᒋᑦ ᓄᓇᕗᒻᒥ ᐃᒪᖏᓐᓄ ᐊᒻᒪᓗ ᓄᓇᕗᒻᒥ ᓄᓇᐃᑦ ᖄᖏᓐᓄᑦ ᐋᖅᑭᒋᐊᒃᑲᐃᔩᑦ ᐱᖁᔭᖓ (ᑲᓇᑕ) ᐊᒻᒪᓗ ᐊᐅᓚᑦᓯᔾᔪᑏᑦ ᓴᖅᑭᖅᑕᐅᓯᒪᔪᑦ ᑕᑉᕘᓇ ᐱᖁᔭᒃᑯᑦ;
3. ᓇᓗᓇᐃᕐᓗᒍ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᑕᕐᕋᕆᓗᓂᐅᒃ ᒪᓕᒐᑦ ᐅᖃᐅᓯᐅᔪᑦ ᐊᕕᑦᑐᕐᓯᒪᓂᐊᕈᓯᕐᒥ 5.7(b) ᐊᐅᓚᑦᓯᒍᓐᓇᓂᐊᕐᓂᖓᓂᒃ ᑖᓐᓇᑐᐊᖅ ᒐᕙᒪᑐᖃᒃᑯᓐᓂ ᒥᓂᔅᑕ ᐃᒪᐃᒍᓐᓇᕐᓂᖓᓂᒃ, ᐊᑦᑐᐊᔪᒧᑦ ᒐᕙᒪᑐᖃᒃᑯᓐᓅᖓᔪᓂᒃ, ᐊᐅᓚᑦᓯᓗᓂ ᐅᑯᑎᒎᓇ ᓴᓐᖏᓂᖃᕐᕕᖏᑎᒍᑦ ᐊᐅᓚᑕᐅᔪᓂᓪᓗ ᒪᓕᒐᓕᐅᕐᕕᒻᒥ ᒪᓕᒐᓕᐊᖑᓯᒪᔪᒃᑯᑦ:
   1. ᐊᖏᖅᑕᐅᓗᓂ ᑐᓂᔭᐅᓂᖓ, ᓄᑖᓐᖑᖅᑎᑕᐅᓂᖓ ᐅᑉᕙᓘᓐᓃᑦ ᐋᖅᑭᒋᐊᕈᑕᐅᔪᖅ ᓚᐃᓴᒧᑦ ᐱᔪᓐᓇᐅᑕᐅᔪᖅ ᐊᑐᕐᓂᕐᒥᒃ ᐃᒪᖏᓐᓂᒃ ᐅᑉᕙᓘᓐᓃᑦ ᐊᒃᑕᑯᓂᒃ ᐃᒪᖏᓐᓂᒃ;
   2. ᐊᖏᕈᑎᒋᓗᒍ ᓇᓗᓇᐃᕐᓯᒍᑦ ᐅᕘᓇ, ᐃᓱᒪᒋᔭᐅᔪᒃᑯᓘᓐᓃᑦ, ᐃᒪᓕᕆᔨᒃᑯᑦ ᑲᑎᒪᔨᖏᓐᓄᑦ ᐋᖅᑭᒋᐊᖅᑕᐅᓂᖓ, ᓄᖅᑲᖅᑎᑕᐅᓂᖓᓘᓐᓃᑦ, ᓚᐃᓴᖃᕆᐊᖃᕐᓂᖓᓂᒃ ᑐᐊᕕᕐᓇᖅᑐᒥᒃ;
   3. ᐊᖏᖅᑕᐅᓗᓂ ᑕᑕᑎᒐᑦᓴᖅ ᒥᐊᓂᕐᓯᒍᑕᐅᔪᒧᑦ ᓴᖅᑭᖅᑕᐅᓯᒪᔪᒧᑦ ᑕᑉᕗᓐᖓᖓᔪᓂᒃ ᓚᐃᓴᒧᑦ ᐊᒻᒪᓗ ᑎᒍᒥᐊᕐᓗᓂ ᐊᑐᖅᑕᐅᑎᑦᓯᓗᓂ ᑕᒪᑦᓱᒧᖓ ᒥᐊᓂᕐᓯᒍᑎᒥᒃ;
   4. ᐊᐅᓚᑦᓯᓂᖅ ᓴᓐᖏᓂᕆᔭᐅᔪᓂᒃ ᐊᐅᓚᑕᐅᔪᓂᓪᓗ ᒪᑭᒪᔾᔪᑕᐅᔪᓂᒃ ᐊᔾᔨᖏᓐᓂᒃ ᑕᐃᒃᑯᐊ ᐋᖅᑭᓱᖅᑕᐅᓯᒪᔪᑦ ᐊᕕᑦᑐᕐᓯᒪᓂᐊᕈᓯᖏᓐᓂ 87(3) ᐊᒻᒪᓗ 89(1) ᓄᓇᕗᒻᒥ ᐃᒪᖏᓐᓄᑦ ᐊᒻᒪᓗ ᓄᓇᕗᒻᒥ ᓄᓇᐃᑦ ᖄᖏᓐᓄᑦ ᐋᖅᑭᒋᐊᒃᑲᐃᔩᑦ ᐱᖁᔭᖏᓐᓂ (ᑲᓇᑕ 25), ᐅᖃᕐᓯᒪᒻᒪᑦ ᑐᖏᓪᓛᐱᐊᓂ ᓄᒃᑎᖅᑕᐅᓂᖓᑕ ᐅᓪᓗᖓᓂ; ᐊᒻᒪᓗ
   5. ᑎᒃᑯᐊᕐᓯᓗᑎᒃ ᖃᐅᔨᓴᖅᑎᓂᒃ ᐊᒻᒪᓗ ᐱᔪᓐᓇᐅᑎᑖᖅᑎᓪᓗᒋᑦ ᐊᐅᓚᑦᓯᓂᕐᒥᓪᓗ ᒪᑭᒪᔾᔪᑎᒃᓴᓂᒃ ᑕᐃᒫᑦᓴᐃᓐᓇᖅ ᑕᐃᒃᑯᐊᑎᑐᑦ ᐊᕕᑦᑐᕐᓯᒪᓂᐊᕈᓯᖓᓃᑦᑐᑦ 87(2) ᐊᒻᒪᓗ (4), 87.1 ᐊᒻᒪᓗ 94.02 ᓄᓇᕗᒻᒥ ᐃᒪᖏᓐᓄᑦ ᐊᒻᒪᓗ ᓄᓇᕗᒻᒥ ᓄᓇᐃᑦ ᖄᖏᓐᓄᑦ ᐋᖅᑭᒋᐊᒃᑲᐃᔩᑦ ᐱᖁᔭᖏᓐᓂ (ᑲᓇᑕ ), ᐅᖃᕐᓯᒪᒻᒪᑦ ᑐᖏᓪᓛᐱᐊᓂ ᓄᒃᑎᖅᑕᐅᓂᖓᑕ ᐅᓪᓗᖓᓂ;
4. ᑐᓂᓯᕕᒋᓗᒋᑦ ᓈᖕᒪᑦᑐᓂᒃ ᓴᓂᕐᕙᐃᕕᐅᓗᑎᒃ ᓴᓐᖏᓂᕐᓂᒃ ᐊᐅᓚᑦᓯᓂᕐᒥᓪᓗ ᐅᖃᐅᓯᐅᔪᒥᒃ 5.8(c) ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᐊᒻᒪᓗ ᒐᕙᒪᑐᖃᒃᑯᓐᓂ ᒥᓂᔅᑖᓐᓄᑦ ᐱᓕᕆᐊᖃᕆᐊᖃᕐᓂᖏᓐᓂᒃ ᑕᒪᒃᑮᓐᓂ ᒐᕙᒪᑐᖃᒃᑯᓐᓅᖓᔪᓂ ᓯᓚᑖᓂᓗ ᑎᒍᓯᒪᓗᒋᑦ ᐊᒃᑐᐊᔪᑦ ᐱᔾᔪᑎᓪᓗᐊᑕᑦ ᐃᓚᒋᔭᐅᓗᑎᒃ ᐊᒡᒍᕐᓯᒪᓂᖏᑦ ᐱᓕᕆᐊᒃᓴᖏᑕ ᑕᒫᓂ ᐅᑉᕙᓗᓐᓃᑦ ᓯᓚᑖᓂ ᒐᕙᒪᑐᖃᒃᑯᓐᓅᖓᔪᓂ.
5. ᑐᓂᓯᕕᒋᓗᒋᑦ ᐊᑭᓕᑦᓴᑦ ᐅᖃᐅᓯᐅᔪᑦ ᐊᕕᑦᑐᕐᓯᒪᓂᖏᓐᓂ 87(5) ᐊᒻᒪᓗ 89(2) ᓄᓇᕗᒻᒥ ᐃᒪᖏᓐᓄᑦ ᐊᒻᒪᓗ ᓄᓇᕗᒻᒥ ᓄᓇᐃᑦ ᖄᖏᓐᓄᑦ ᐋᖅᑭᒋᐊᒃᑲᐃᔩᑦ ᐱᖁᔭᖏᓐᓂ (ᑲᓇᑕ 25) ᒐᕙᒪᑐᖃᒃᑯᓐᓅᖓᔪᓂ ᐊᑭᓕᓴᑦ ᑐᓂᔭᐅᒋᐊᓖᑦ ᑯᐃᓐᒧᑦ ᑭᒡᒐᑐᖅᑕᐅᓪᓗᓂ ᑲᓇᑕ ᒐᕙᒪᒃᑯᖏᓐᓄᑦ.
6. ᑐᓂᓗᒋᑦ ᐋᖅᑭᒋᐊᕈᑕᐅᔪᓕᒫᑦ ᒪᓕᒐᕐᓄᑦ ᐅᖃᐅᓯᐅᔪᒧᑦ ᐊᕕᑦᑐᕐᓯᒪᓂᐊᕈᓯᖓᓂ 5.7(b) ᐊᓯᔾᔩᒍᑕᐅᒋᐊᖃᓐᖏᑦᑐᑦ ᓴᓐᖏᓂᕆᔭᐅᔪᓕᒫᓂᒃ ᐊᐅᓚᑕᐅᔪᓂᓪᓘᓐᓃᑦ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ ᑎᑎᕋᖅᓯᒪᓂᖓᒍᑦ 5.7(c)(i)−ᒥᒃ (v)−ᒧᑦ ᐊᖏᖅᑕᐅᓚᐅᖅᑳᕋᑎᒃ GC−ᑯᓐᓂᒃ.
7. ᑐᓂᓗᒋᑦ, ᐊᑐᓕᕆᐊᕐᓗᓂ ᓄᒃᑎᖅᑕᐅᓂᐅᑉ ᐅᓪᓗᖓᓂ, ᑲᑎᒪᔨᖏᑦ ᐃᒃᓯᕙᐅᑕᖓᓗ ᓄᓇᕗᒻᒥ ᐃᒪᓕᕆᔨᒃᑯᑦ ᑲᑎᒪᔨᖏᑦ ᑎᒃᑯᐊᖅᑕᐅᒋᐊᓖᑦ ᐃᒪᐃᓕᖓᔪᑦ:
   1. ᒪᕐᕉᒃ ᑲᑎᒪᔩᒃ ᑎᒃᑯᐊᖅᑕᐅᒋᐊᓖᒃ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ;
   2. ᒪᕐᕉᒃ ᑲᑎᒪᔩᑦ ᑎᒃᑯᐊᖅᑕᐅᒋᐊᓖᒃ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ;
   3. ᓯᑕᒪᑦ ᑲᑎᒪᔩᑦ ᑎᒃᑯᐊᖅᑕᐅᒋᐊᓖᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ ᓂᕈᐊᒐᑦᓴᓐᖑᖅᑎᑕᐅᓯᒪᓗᑎᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ;
   4. ᐃᒃᓯᕙᐅᑕᖅ ᑎᒃᑯᐊᖅᑕᐅᒋᐊᓕᒃ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒥ ᒥᓂᔅᑕᖓᓄᑦ, ᑐᓴᕋᓱᐊᕈᑕᐅᓚᐅᖅᑎᓪᓗᒍ 8-ᓂᒃ ᑲᑎᒪᔨᐅᖃᑕᐅᔪᓂᒃ; ᐊᒻᒪᓗ
   5. ᑲᑎᒪᔩᑦ ᑕᒪᒃᑯᓇᓂ ᐊᑐᕐᓂᕐᒥᒃ ᐃᓐᓃᓯᒪᓂᕐᒥᓪᓗ ᑎᒃᑯᐊᖅᑕᐅᒋᐊᓖᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓄᑦ ᒥᓂᔅᑕᒧᑦ ᓂᕈᐊᒐᑦᓴᓕᐊᖑᓯᒪᔪᒥᒃ ᒪᑭᕕᒃᑯᓐᓂᒃ
8. ᑐᓂᓗᒋᑦ ᓄᒃᑎᖅᑕᐅᓂᖏᓐᓅᖓᔪᓄᑦ ᐊᒻᒪᓗ ᒪᓕᒐᑦ ᐊᑐᓕᖅᑎᑕᐅᓗᑎᒃ ᐊᖏᕈᑎᑎᒍᑦ; ᐊᒻᒪᓗ
9. ᑭᖑᓂᐊᒍᑦ ᐋᖅᑭᒋᐊᖅᑕᐅᖃᑦᑕᕐᓗᑎᒃ ᐊᓯᖏᓐᓄᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒥ ᒪᓕᒐᕐᓄᑦ ᐱᔭᕆᐊᖃᕐᓂᖏᑎᒍᑦ.

ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᐅᖅᓱᐊᓗᓐᓄᑦ ᒑᓯᒧᓪᓗ ᒪᓕᒐᑦ

5.8 ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᖅ ᐅᖃᐅᓯᐅᔪᖅ ᐊᕕᑦᑐᕐᓯᒪᓂᐊᕈᓯᖓᓂ 5.7(a) ᐊᔾᔨᓪᓗᐊᑲᓴᑦᓯᐊᖓ ᑲᓇᑕᒥ ᐅᖅᓱᐊᓗᓐᓂᒃ ᒑᓯᓂᓪᓗ ᐊᐅᓚᓂᖏᓐᓄᑦ ᐱᖁᔭᖅ (ᑲᓇᑕ), ᑲᓇᑕᒥ ᐅᖅᓱᐊᓗᓕᕆᔨᒃᑯᑦ ᐱᖁᔭᖓ (ᑲᓇᑕ) ᐊᒻᒪᓗ ᐊᑐᖅᑕᐅᒋᐊᓖᑦ ᑎᑎᕋᖅᓯᒪᔪᑦ ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᖁᔭᓂ (ᑲᓇᑕ), ᒪᓂᒪᑎᑦᓯᒋᐊᓖᑦ NEB ᐃᒪᐃᒍᓐᓇᕈᑎᒃᓴᖏᓐᓂᒃ, ᓄᓇᐅᑉ ᖃᓂᒋᔮᓃᑦᑐᓂ ᐃᒪᕐᓅᖓᔪᓂ, ᐊᐅᓚᑦᓰᓇᕐᓗᑎᒃ ᐊᔾᔨᖏᓐᓂᒃ ᒪᓕᒐᒃᑯᑦ ᐊᐅᓚᑕᐅᔪᓂᒃ ᐅᖅᓱᐊᓗᓕᕆᓂᕐᒨᖓᔪᓂᒃ ᒑᓯᓄᓪᓗ ᑖᒃᑯᑎᒎᓇ ᐊᔾᔨᖏᑎᒍᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒥ ᒪᓕᒐᕐᓂ NEB-ᑯᓐᓄᑦ ᐊᐅᓚᑦᓯᒍᑕᐅᓯᒪᔪᓂᒃ ᑲᓇᑕᒥ ᐅᖅᓱᐊᓗᓐᓄᑦ ᒑᓯᒧᓪᓗ ᐊᐅᓚᑦᓯᒍᑎᓄᑦ ᐱᖁᔭᑎᒍᑦ (ᑲᓇᑕ) ᐊᒻᒪᓗ ᑲᓇᑕᒥ ᐅᖅᓱᐊᓗᓕᕆᔨᒃᑯᑦ ᐱᖁᔭᖓ 26 (ᑲᓇᑕ) ᐊᒻᒪᓗ ᐊᑐᕆᐊᓖᑦ ᑎᑎᕋᖅᑕᐅᓯᒪᒧᓂ ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᖁᔭᖅ (ᑲᓇᑕ), ᑐᖏᑦᓯᐊᖓᓂ ᓄᒃᑎᖅᑕᐅᓂᐅᑉ ᐅᓪᓗᖓᑕ.

5.9 ᓇᓗᓇᐃᕆᐊᒃᑲᓐᓂᕈᑎᒃᓴᒧᑦ, ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᖅ ᐅᖃᐅᓯᐅᔪᖅ ᐊᕕᑦᑐᕐᓯᒪᓂᐊᕈᓯᖓᓂ 5.7(a) ᐊᔾᔨᒋᒋᐊᓕᖓ ᐃᑲᔫᑎᒃᓴᓄᑦ ᐸᕐᓇᐅᑏᑦ ᑎᑎᕋᖅᓯᒪᔪᑦ ᑲᓇᑕᒥ ᐅᖅᓱᐊᓗᓐᓄᑦ ᒑᓯᓄᓪᓗ ᐊᐅᓚᓂᖏᓐᓄᑦ ᐱᖁᔭᖅ (ᑲᓇᑕ) ᐊᒻᒪᓗ ᑲᓇᑕᒥ ᐅᖅᓱᐊᓗᓕᕆᔨᒃᑯᑦ ᐱᖁᔭᖅ (ᑲᓇᑕ).

5.10 ᐃᒪᐃᑉᐸᑦ, ᐊᖏᖃᑎᒌᒍᑎᓂ ᐅᖃᐅᓯᐅᔪᖅ ᐊᕕᑦᑐᕐᓯᒪᓂᖓᓂ 6.5 ᑲᔪᓯᓯᒪᑎᓪᓗᒍ ᐊᑐᓕᕐᓯᒪᑎᓪᓗᒍᓗ, GC−ᑯᑦ ᐋᖅᑭᒋᐊᕆᕐᐸᑕ ᑲᓇᑕᒥ ᐅᖅᓱᐊᓗᓐᓄᑦ ᒑᓯᓄᓪᓗ ᐊᐅᓚᓂᖏᓐᓄᑦ ᐱᖁᔭᖅ (ᑲᓇᑕ), ᑲᓇᑕᒥ ᐅᖅᓱᐊᓗᓕᕆᔨᒃᑯᑦ ᐱᖁᔭᖓ (ᑲᓇᑕ), ᑎᑎᕋᖅᑕᐅᓯᒪᒋᐊᓖᓪᓗ ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᖁᔭᓂ (ᑲᓇᑕ) ᐊᔾᔨᖏᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᑦ ᒪᓕᓪᓗᒋᑦ ᐊᕕᑦᑐᕐᓯᒪᓂᖓᓄᑦ 5.8 ᐅᑉᕙᓘᓐᓃᑦ ᐊᐅᓚᑦᓯᔾᔪᑎᓕᐊᖑᓯᒪᔪᑦ ᑖᒃᑯᑎᒎᓇ ᐱᖁᔭᑎᒍᑦ ᐅᑉᕙᓘᓐᓃᑦ ᑖᒃᑯᓄᓐᖓᖓᔪᑦ ᑎᑎᕋᖅᑕᐅᓯᒪᔪᓄᑦ, GN ᓴᖅᑮᒋᐊᓕᒃ ᒪᓕᒐᓕᐅᕐᕕᒻᒥ ᐊᒻᒪᓗ ᐃᑲᔪᕐᓱᐃᓗᓂ ᒐᕙᒪᐅᓂᕐᒧᑦ ᖃᐅᔨᓴᕈᑎᓂᒃ ᒪᓕᒐᕐᓂᒃ ᐊᔾᔨᒋᑦᓯᐊᕐᓗᓂᒋᑦ ᐋᖅᑭᒋᐊᕈᑕᐅᔪᑦ.

5.11 ᑎᑎᕋᖅᓯᒪᓂᖓᓂ 5.10 ᐊᑐᓐᖏᑦᑐᖅ ᑲᒪᔭᐅᔪᓄᑦ ᑖᒃᑯᓄᓐᖓᖓᔪᓂᒃ ᐊᖏᕈᑕᐅᒋᐊᑐᓐᖏᑦᑐᓂᒃ GC-ᑯᓐᓂᒃ ᒪᓕᓪᓗᒋᑦ ᐊᕕᑦᑐᕐᓯᒪᓂᐊᕈᓯᖏᒃ 5.6(l) ᐅᑉᕙᓘᓐᓃᑦ 5.6(m).

5.12 ᐋᔩᕋᕈᑕᐅᓂᖏᓐᓂ ᐊᐅᓚᑦᓯᔪᓐᓇᐅᑎᑖᕐᐸᓪᓕᐊᓂᕐᒧᑦ ᐊᖏᖃᑎᒌᒍᑏᑦ GC ᐊᒻᒪᓗ GN ᐋᔩᕋᕈᑎᖃᕐᓂᐊᕐᐳᑦ ᖃᐅᔨᓴᕈᑕᐅᒍᓐᓇᖅᑐᓂᒃ ᐋᖅᑭᐅᒪᒍᑎᒃᓴᓂᒃ ᐱᓕᕆᐊᒥᒍᑦ ᐅᖅᓱᐊᓗᓐᓄᑦ ᒑᓯᒧᓪᓗ ᒪᓕᒐᕐᓂᒃ, ᐃᓚᒋᔭᐅᓗᑎᒃ ᐊᐅᓚᑦᓯᔾᔪᑎᓕᐊᖑᓯᒪᔪᓄᑦ ᐊᐅᓚᔾᔪᑕᐅᔪᑦ NEB−ᑯᓐᓄᑦ.

ᐋᖅᑭᒋᐊᕈᑏᑦ ᓄᓇᕗᑦ ᐊᖏᕈᑎᖏᓐᓄᑦ

5.13 ᐱᓇᓱᐊᖃᑎᒌᑦᑐᑦ ᓇᓗᓇᐃᕐᓯᕗᑦ ᐊᑐᓕᖅᑎᑕᐅᖁᓪᓗᒋᑦ ᐃᓚᖏᑦ ᑎᑎᕋᖅᓯᒪᓃᑦ ᑖᒃᑯᓇᓂ ᑎᑎᕋᖅᓯᒪᓂᖓᓂ ᐃᓗᓕᕆᓂᐊᖅᑕᖏᓐᓂᒃ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ, ᐋᖅᑭᒋᐊᕈᑕᐅᒋᐊᖃᕐᓂᐊᕐᐳᑦ ᓄᓇᕗᑦ ᐊᖏᕈᑎᖏᓐᓄᑦ ᒪᓕᓪᓗᒋᑦ ᐊᐅᓚᓂᐅᔭᕆᐊᓖᑦ ᑎᑎᕋᖅᓯᒪᔪᑦ 2.13.1 ᓄᓇᕗᒻᒥ ᐊᖏᕈᑎᓂ. ᐋᖅᑭᒋᐊᕈᑕᐅᖁᔭᐅᔪᑦ ᐅᑯᓄᓐᖓᖓᓂᐊᖅᑐᑦ:

1. 12.2.6 ᐃᓚᒋᔭᐅᔪᓄᑦ ᐊᒻᒪᓗ ᑎᒃᑯᐊᓯᔾᔪᑏᑦ NIRB−ᑯᓐᓄᑦ ("ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ");
2. 13.3.1 ᐃᓚᒋᔭᐅᔪᓄᑦ ᐊᒻᒪᓗ ᑎᒃᑯᐊᓯᔾᔪᑏᑦ NWB−ᑯᓐᓄᑦ ("ᓄᓇᕗᒻᒥ ᐃᒪᓕᕆᔨᒃᑯᑦ ᑲᑎᒪᔨᖏᑦ"); ᐊᒻᒪᓗ
3. 11.4.5−ᒥᒃ 11.4.13−ᒧᑦ ᐋᖅᑭᑦᓯᒪᓂᖓ ᐊᒻᒪᓗ ᑎᒃᑯᐊᕐᓯᓂᖅ NPC−ᑯᓐᓄᑦ ("ᓄᓇᕗᒻᒥ ᐸᕐᓇᐃᔩᑦ ᑲᒥᓴᓐ");

ᒪᓕᒐᕐᓄᑦ ᐊᒻᒪᓗ ᓄᓇᕗᑦ ᐊᖏᕈᑎᖏᓐᓄᑦ ᐋᖅᑭᒋᐊᕈᑎᓄᑦ ᒪᓕᒐᑦᓴᑦ

5.14 ᕿᓚᒥᐅᓂᕐᐹᒃᑯᑦ ᐊᔪᕐᓇᕈᓐᓃᑐᐊᕐᐸᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, ᐱᓇᓱᐊᖃᑎᒌᑦᑐᑦ ᐋᖅᑭᑦᓱᐃᒋᐊᓖᑦ ᒪᓕᒐᑦᓴᓂᒃ ᑖᒃᑯᓄᓐᖓᖓᔪᓂᒃ ᕿᒥᕐᕈᔭᐅᓂᖏᓐᓄᑦ:

1. ᒪᓕᒐᑦ ᐅᖃᐅᓯᐅᔪᑦ ᐊᕕᑦᑐᕐᓯᒪᓂᖏᓐᓂ 5.6 ᐊᒻᒪᓗ 5.7 ᑐᓐᖔᓂ ᓴᖅᑮᓂᖏᑕ ᑲᓇᑕᒥ ᐱᖁᔭᓕᐅᕐᕕᔾᔪᐊᒧᑦ ᐅᑉᕙᓘᓐᓃᑦ ᒪᓕᒐᓕᐅᕐᕕᒻᒧᑦ, ᐊᒻᒪᓗ
2. ᐋᖅᑭᒋᐊᕈᑏᑦ ᓄᓇᕗᑦ ᐊᖏᕈᑎᖏᓐᓄᑦ ᐅᖃᐅᓯᐅᔪᑦ ᐊᕕᑦᑐᕐᓯᒪᓂᖓᓂ 5.13.

ᐱᔨᑦᓯᕈᑏᑦ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ

5.15 ᓄᒃᑎᖅᑕᐅᓂᖓᑕ ᐅᓪᓗᖓᓂ, ᐱᓕᕆᐊᒃᓴᑎᒍᑦ ᐱᔨᑦᓯᕈᑕᐅᔪᓂᓪᓗ GN−ᑯᓐᓂᒃ ᑕᑉᕙᖔᖅᑐᓂᒃ ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂᒃ, ᑭᓇᑐᐃᓐᓇᖅ ᐱᔪᓐᓇᐅᑎᖃᕐᐳᖅ ᐅᖃᖃᑎᖃᕐᓂᕐᒥᒃ, ᐊᒻᒪᓗ ᐱᔨᑦᓯᖅᑕᐅᓂᕐᒥᒃ ᐊᑐᐃᓐᓇᐅᔪᓂᒃ ᐅᑯᓇᓐᖓᑦ, GN ᐃᓕᓴᕆᔭᐅᓯᒪᔪᓂᒃ ᐅᖃᐅᓯᕐᓂᒃ ᓄᓇᕗᒻᒥ ᒪᓕᓪᓗᒋᑦ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐱᖁᔭᖓ (ᓄᓇᕗᑦ).

ᓴᖅᑭᐅᒪᔪᑦ ᐱᔪᒐᕆᔭᐅᔪᑦ

5.16 ᒪᓕᓪᓗᒋᑦ ᐊᕕᑦᑐᕐᓯᒪᓂᖏᑦ 5.17, 5.18, 5.19 ᐊᒻᒪᓗ 5.20, ᐊᑐᓂᑦ ᓴᖅᑭᐅᒪᔪᑦ ᐱᔪᒐᕆᔭᐅᔪᑦ ᐊᐅᓚᑕᐅᒋᐊᓖᑦ ᐊᒻᒪᓗ ᐊᐅᓚᑦᓯᔾᔪᑕᐅᓗᑎᓪᓗ ᓄᒃᑎᖅᑕᐅᓂᖓᑕ ᐅᓪᓗᖓᓂ ᒪᓕᓪᓗᒋᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᑦ.

5.17 ᓄᒃᑎᖅᑕᐅᓂᖓᑕ ᐅᓪᓗᖓᓂ, ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᖅ ᒪᓕᒐᑦᓴᓕᐅᒃᑲᓐᓂᕈᑕᐅᒋᐊᑐᓐᖏᑦᑐᖅ ᐊᐅᓇᑦᓯᔾᔪᑕᐅᔪᓄᑦ ᐱᔪᒐᕆᔭᐅᔪᓄᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᑦ ᐃᓕᖓᓐᖏᑉᐸᑕ ᓴᖅᑭᐅᒪᓂᖓᒍᑦ ᐊᔾᔨᐸᓗᖏᑎᒍᑦ ᐊᑐᖅᑕᐅᔪᑦ ᐱᔪᒐᕆᔭᐅᔪᑦ ᐊᔾᔨᐸᓗᖏᓐᓄᑦ ᐱᔪᓐᓇᐅᑎᓄᑦ ᐱᔪᒐᕆᔭᐅᔪᓄᓪᓗ ᑐᓂᔭᐅᒍᓐᓇᖅᑐᓄᑦ, ᑐᓐᓂᖅᑯᑕᐅᔪᓄᑦ ᐅᑉᕙᓘᓐᓃᑦ ᑎᒍᒥᐊᖅᑕᐅᔪᓄᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᒃᑯᑦ, ᐊᔾᔨᒐᓚᒋᒐᓗᐊᕐᐸᖏᑦ ᐊᔾᔨᒐᓚᒋᓐᖏᒃᑲᓗᐊᕐᐸᖏᓪᓘᓐᓃᑦ ᐱᔪᓐᓇᐅᑏᑦ ᐱᔪᒐᕆᔭᐅᔪᓪᓗ ᐊᑐᖅᑕᐅᔪᑦ ᓴᖅᑭᐅᒪᓂᖏᑎᒍᑦ.

5.18 ᐊᕕᑦᑐᕐᓯᒪᓂᖓᒍᑦ 5.19 ᐊᒻᒪᓗ ᓄᒃᑎᖅᑕᐅᓂᖓᑕ ᐅᓪᓗᖓᓂ, ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᒍᑦ ᒪᓕᒐᖅ ᓄᖅᑲᑎᑦᓯᒍᑕᐅᒍᓐᓇᖅᑐᑐᐊᖅ, ᓄᖅᑲᖓᑎᑦᓯᓂᕐᒥᒃ ᑭᒡᓕᖃᖅᑎᑦᓯᓂᕐᒥᓘᓐᓃᑦ ᐊᑐᖅᑕᐅᔪᒥᒃ ᐱᔪᒪᔭᐅᔪᒥᒃ ᐃᒪᐃᑉᐸᑦ:

1. ᑐᖏᑦᓯᐊᖓᓂ ᓄᒃᑎᖅᑕᐅᓂᖓᑕ ᐅᓪᓗᖓᓂ, ᐊᑐᖅᑕᐅᔪᖅ ᐱᔪᒐᕆᔭᐅᔪᖅ ᓄᖅᑲᖅᑎᑕᐅᒐᔭᕐᓂᕐᐸᑦ, ᓄᖅᖓᑎᑕᐅᑉᐸᑦ ᑭᒡᓕᖃᖅᑎᑕᐅᑉᐸᓘᓐᓃᑦ ᐊᔾᔨᓪᓗᐊᖓᒍᑦ ᖃᓄᐃᓕᐅᕐᓂᐅᔪᑎᒍᑦ; ᐅᑉᕙᓘᓐᓃᑦ
2. ᓄᖅᑎᖅᑕᐅᑉᐸᑦ, ᓄᖅᑲᖓᑎᑕᐅᑉᐸᑦ ᑭᒡᓕᖃᖅᑎᑕᐅᑉᐸᓘᓐᓃᑦ ᒪᓕᑦᓯᒪᓐᖏᓐᓂᖓᒍᑦ ᒪᓕᒐᑦᓴᕆᔭᐅᔪᓂᒃ ᐊᐅᓚᑕᐅᓂᖏᓐᓅᖓᔪᓂᒃ ᐊᑐᖅᑕᐅᔪᓂᒃ ᐱᔪᒐᕆᔭᐅᔪᓂᒃ ᐊᒻᒪᓗ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᒍᑦ ᒪᓕᒐᑦ ᐃᓕᖓᓐᖏᑉᐸᑕ ᓴᖅᑭᐅᒪᓂᖓᒍᑦ ᐊᔾᔨᐸᓗᖏᑎᒍᑦ ᐊᑐᖅᑕᐅᔪᑦ ᐱᔪᒐᕆᔭᐅᔪᑦ ᐊᔾᔨᐸᓗᖏᓐᓄᑦ ᐱᔪᓐᓇᐅᑎᓄᑦ ᐱᔪᒐᕆᔭᐅᔪᓄᓪᓗ ᑐᓂᔭᐅᒍᓐᓇᖅᑐᓄᑦ, ᑐᓐᓂᖅᑯᑕᐅᔪᓄᑦ ᐅᑉᕙᓘᓐᓃᑦ ᑎᒍᒥᐊᖅᑕᐅᔪᓄᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᒃᑯᑦ, ᐊᔾᔨᒐᓚᒋᒐᓗᐊᕐᐸᖏᑦ ᐊᔾᔨᒐᓚᒋᓐᖏᒃᑲᓗᐊᕐᐸᖏᓪᓘᓐᓃᑦ ᐱᔪᓐᓇᐅᑏᑦ ᐱᔪᒐᕆᔭᐅᔪᓪᓗ ᐊᑐᖅᑕᐅᔪᑦ ᓴᖅᑭᐅᒪᓂᖏᑎᒍᑦ.

5.19 ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᒍᑦ ᒪᓕᒐᖅ ᓄᖅᑲᑎᑦᓯᒍᑕᐅᓇᔭᓐᖏᓚᖅ, ᓄᖅᑲᖓᑎᑦᓯᒍᑕᐅᓗᓂ ᐅᑉᕙᓘᓐᓃᑦ ᑭᒡᓕᖃᖅᑎᑕᐅᓗᓂ ᐊᑐᖅᑕᐅᔪᓄᑦ ᐱᔪᒪᔭᐅᔪᓄᑦ ᒪᓕᓪᓗᒋᑦ ᐊᕕᑦᑐᕐᓯᒪᓂᐊᕈᓯᖓᓃᑦᑐᑦ 5.18(b), ᐊᑐᖅᑕᐅᓂᖏᑦ ᐱᔪᒐᕆᔭᐅᔪᑦ ᐱᔪᓐᓇᐅᑕᐅᑉᐸᑦ ᐅᑉᕙᓘᓐᓃᑦ ᐱᔪᒪᔭᐅᑉᐸᑦ ᓴᖅᑭᕐᓯᒪᓗᓂ ᐅᑯᓇᓐᖓᑦ

1. ᑎᑎᕋᖅᓯᒪᔪᒥᒃ ᑐᒃᓯᕋᐅᒻᒥᒃ, ᐊᑐᖅᑐᐊᓂᕐᒧᑦ ᑎᑎᕋᖅᓯᒪᔪᒥᒃ ᑐᒃᓯᕋᐅᒻᒥᒃ ᐅᑉᕙᓘᓐᓃᑦ ᑮᓇᐅᔭᓕᐅᕈᑎᒃᓴᒥᒃ ᐱᔪᓐᓇᐅᒻᒥᒃ ᑐᓂᔭᐅᔪᒥᒃ ᒪᓕᓪᓗᒋᑦ ᓄᓇᕗᒻᒥ ᐅᔭᕋᓐᓂᐊᓂᕐᒧᑦ ᐊᐅᓚᑦᓯᔾᔪᑏᑦ (ᑲᓇᑕ); ᐅᑉᕙᓘᓐᓃᑦ
2. "ᐱᔪᒐᕆᔭᐅᔪᖅ" ᑐᑭᖓᒍᑦ ᐊᕕᑦᑐᕐᓯᒪᓂᖓᓂ 2 ᑲᓇᑕᒥ ᐅᖅᓱᐊᓗᓕᕆᓂᕐᒧᑦ ᐱᖁᔭᓂ (ᑲᓇᑕ);

5.20 ᐊᑐᓂᑦ ᐊᑐᖅᑕᐅᔪᑦ ᐱᔪᒐᕆᔭᐅᔪᑦ ᑲᔪᓰᓐᓇᓂᐊᖅᑐᑦ ᐱᕕᓕᒫᖓᒍᑦ ᑲᔪᓯᑎᑕᐅᓂᖓᒍᓪᓗ:

1. ᐊᑐᖅᑕᐅᔪᖅ ᐱᔪᒐᕆᔭᐅᔪᒧᑦ ᐃᓱᓕᑉᕕᒃᓴᖓᓄᑦ ᑎᑭᓐᖏᓐᓂᖓᓂ ᐅᑉᕙᓘᓐᓃᑦ ᓴᒃᑯᑕᐅᓐᖏᓐᓂᖓᓂ;
2. ᑎᒍᒥᐊᖅᑐᖅ ᐊᑐᖅᑕᐅᔪᓂᒃ ᐱᔪᒐᕆᔭᐅᔪᓂᒃ ᐊᒻᒪᓗ GN ᐊᖏᕐᐸᑕ ᐊᑐᖅᑕᐅᔪᑦ ᐱᔪᒐᕆᔭᐅᔪᓄᑦ ᓄᖅᑲᖅᑎᑕᐅᒋᐊᖃᕐᓂᖓᓂᒃ ᑕᐅᖅᓯᖅᑕᐅᒋᐊᖃᕐᓂᖓᓂᓪᓗ ᐱᔪᓐᓇᐅᑎᒃᑯᑦ ᐱᔪᒐᕆᔭᐅᔪᒃᑯᓘᓐᓃᑦ ᑐᓂᔭᐅᔪᓂᒃ GN−ᑯᓐᓂᒃ;
3. ᑎᒍᒥᐊᖅᑐᖅ ᐊᑐᖅᑕᐅᔪᓂᒃ ᐱᔪᒐᕆᔭᐅᔪᓂᒃ ᓱᒃᑲᐃᓪᓕᒍᑕᐅᓯᒪᓐᖏᑉᐸᑦ ᐱᔪᓐᓇᐅᑦ, ᐊᒻᒪᓗ ᑎᒍᒥᐊᖅᑐᖅ ᐊᑐᖅᑕᐅᔪᓂᒃ ᐱᔪᒐᕆᔭᐅᔪᓂᒃ ᐊᒻᒪᓗ ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᖏᑦ ᐊᖏᕐᐸᑕ ᐊᑐᖅᑕᐅᔪᖅ ᐱᔪᒐᕆᔭᐅᔪᓄᑦ ᓄᖅᑲᖅᑎᑕᐅᒋᐊᖃᕐᓂᖓᓂᒃ ᒪᓕᓪᓗᒋᑦ ᒪᓕᒐᑦᓴᑦ ᑮᓇᐅᔭᓕᑕᐅᓂᕐᒧᑦ ᐊᖏᖃᑎᒌᒍᑎᓂ;
4. ᐊᑐᖅᑕᐅᔪᑦ ᐱᔪᒐᕆᔭᐅᔪᓂᒃ ᐅᑉᕙᓘᓐᓃᑦ ᐱᔪᓐᓇᐅᑎᑎᒍᑦ ᑭᒡᓕᖃᖅᑎᑕᐅᓐᖏᑉᐸᑦ, ᓄᖅᑲᖓᑎᑕᐅᓗᓂ ᓄᖅᑲᖅᑎᑕᐅᓯᒪᓗᓂᓘᓐᓃᑦ ᒪᓕᓪᓗᒋᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᑦᓴᑦ ᒪᓕᓪᓗᒋᑦ ᐊᕕᑦᑐᕐᓯᒪᓂᖓᓂ 5.18; ᐅᑉᕙᓘᓐᓃᑦ
5. ᐊᑐᖅᑕᐅᔪᑦ ᐱᔪᒐᕆᔭᐅᔪᓂ ᑎᒍᔭᐅᓯᒪᑉᐸᑕ ᐊᒻᒪᓗ ᑎᒍᒥᐊᕈᓐᓇᐅᑎᓕᒃ ᐊᑭᓕᖅᑕᐅᑉᐸ ᒪᓕᓪᓗᒋᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᓂ ᒪᓕᒐᑦ.

ᐃᓯᕈᓐᓇᕐᓂᖅ ᓄᓇᒧᑦ

5.21 ᐊᐅᓚᑦᓯᔪᓐᓇᐅᑎᓄᑦ ᐊᖏᖃᑎᒌᒍᑎᓃᓐᓂᐊᖅᑐᖅ GN ᑐᓂᓯᓗᓂ GC−ᑯᓐᓄᑦ ᐃᓯᕈᓐᓇᐅᑎᒥᒃ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐃᒪᕐᓄᓪᓗ GC−ᑯᑦ ᑲᔪᓯᑎᑦᓯᒍᓐᓇᖁᓪᓗᒋᑦ ᐊᖏᕈᑎᒋᓯᒪᔭᒥᓂᒃ ᐊᐅᓚᑦᓯᔪᓐᓇᐅᑎᓄᑦ ᐊᖏᖃᑎᒌᒍᑎᒃᑯᑦ ᐊᒻᒪᓗ ᑲᔪᓯᑎᑦᓯᓂᕐᒥᒃ ᓇᓕᑐᐃᓐᓇᖏᓐᓂᒃ GC−ᑯᑦ ᐊᓯᖏᓐᓂᒃ ᐱᓕᕆᐊᒃᓴᖏᓐᓂᒃ ᓄᓇᕗᒻᒥ. ᐃᓯᕈᓐᓇᕐᓂᖅ ᐅᖃᐅᓯᐅᔪᖅ ᑖᒃᑯᓇᓂ ᐊᑭᓖᒍᑕᐅᒋᐊᖃᓐᖏᑦᑐᖅ GC−ᑯᓐᓄᑦ ᐊᒻᒪᓗ ᐊᑐᕈᓐᓇᐅᒋᐊᖃᓐᖏᑦᑐᖅ ᐊᑭᓕᐅᑎᓂᒃ ᑮᓇᐅᔭᓂᒃ ᐅᑉᕙᓘᓐᓃᑦ ᐊᑭᓖᒍᑕᐅᓯᒪᔪᓂᒃ GN−ᑯᓐᓂᒃ.

ᑎᑎᕋᖅᑕᐅᓯᒪᔪᑦ ᐃᓚᓕᐅᔾᔭᐅᓯᒪᓐᖏᑦᑐᓄᑦ

5.22 ᐊᔪᕐᓇᕈᓐᓃᑐᐊᕐᐸᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, ᑭᓯᐊᓂ ᒥᑦᓯᑎᓐᓂᐅᓐᖏᑦᑐᖅ 6 ᑕᖅᑮᑦ ᑐᖔᓂ ᐊᑎᓕᐅᖅᑕᐅᓂᕆᓂᐊᕐᓯᒪᔭᖓᑕ ᐊᐅᓚᑦᓯᔪᓐᓇᓂᕐᒧᑦ ᐊᖏᖃᑎᒌᒍᑎᑦ, GC-ᑯᑦ ᑐᓂᓯᔭᕆᐊᓖᑦ ᐱᓕᕆᖃᑕᐅᔪᓄᑦ ᓯᕗᓪᓕᐹᕐᓯᐅᑎᓂᒃ ᑎᑎᕋᖅᓯᒪᔪᓂᒃ ᐃᓗᓕᖃᕆᐊᓕᓐᓂᒃ ᑎᑎᕋᖅᓯᒪᔪᓂᒃ ᓇᓗᓇᐃᖅᑐᕐᓯᒪᔪᓂᓪᓗ ᓄᓇᓂᒃ ᐊᒻᒪᓗ ᐱᔪᓐᓇᐅᑎᓂᒃ ᐃᒪᕐᓅᖓᔪᓂᒃ ᐅᑉᕙᓘᓐᓃᑦ ᐱᔪᒐᕆᔭᐅᔪᓂᒃ ᑖᒃᑯᓇᓂ (ᐃᓚᒋᔭᐅᓗᑎᒃ ᐃᖅᑲᑦ, ᐅᔭᕋᓐᓂᐊᕋᑦᓴᑦ, ᐅᖅᓱᐊᓗᓐᓂᐊᕐᓂᖅ, ᐃᓪᓗᐃᑦ ᐊᓯᖏᑦ ᑎᑎᕋᖅᑕᐅᓯᒪᔪᑦ ᒐᕙᒪᑐᖃᒃᑯᑦ ᐃᓪᓗᖁᑎᖏᑦ, ᓴᓇᔭᐅᓯᒪᔪᑦ, ᐋᖅᑭᒋᐊᕈᑏᑦ ᐊᒻᒪᓗ ᐊᓯᖏᑦ ᓴᓇᔭᐅᓯᒪᔪᑦ, ᑕᒫᓂ, ᖁᓛᓂ ᐊᑖᓂᓘᓐᓃᑦ ᖄᖏᓐᓂ ᓄᓇᑦ), ᐃᓚᓕᐅᔾᔭᐅᓯᒪᒋᐊᖃᓐᖏᑦᑐᑦ ᓄᒃᑎᖅᑕᐅᓂᖏᓐᓄᑦ ᐊᐅᓚᑦᓯᔾᔪᑕᐅᔪᑦ ᐊᐅᓚᑕᐅᔪᓪᓗ ᑲᒥᓯᓇᒧᑦ ᒪᓕᓪᓗᒋᑦ ᐊᐅᓚᑦᓯᔪᓐᓇᓂᕐᒧᑦ ᐊᖏᖃᑎᒌᒍᑏᑦ.

5.23 ᓯᕗᓪᓕᐹᕐᓯᐅᑦ ᑎᑎᕋᖅᓯᒪᓂᖓ ᐅᖃᐅᓯᐅᔪᖅ ᐊᕕᑦᑐᕐᓯᒪᓂᖓᓂ 5.22 ᐃᒪᐃᓕᖓᔪᓂᒃ ᐃᓚᖃᕆᐊᓕᒃ:

1. ᓄᓇᑦ ᓇᓗᓇᐃᖅᑕᐅᓯᒪᔪᑦ ᒥᓂᔅᑕᐅᑎᓄᑦ ᑎᓕᓯᔾᔪᑏᑦ, P.C. 2019-576 2016 374 (ᓴᒃᑯᐃᒍᑎ ᓄᓇᒥᒃ ᓴᒃᑯᑕᐅᓯᒪᔪᓂᒃ ᓇᓗᓇᐃᖅᑕᐅᓯᒪᔪᓂᒃ ᖃᐅᔨᒪᔾᔪᑎᓂᒃ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᖓᑕ ᓄᓇᖏᓐᓂᒃ ᓄᓇᕗᒻᒥ (ᑭᕙᓪᓕᖅ) ᑎᓕᓯᔾᔪᑎ) ᐅᑉᕙᓘᓐᓃᑦ ᑎᓕᓯᔾᔪᑎᖓ ᒥᓂᔅᑕᐅᑏᑦ ᑕᐅᖅᓯᐅᑕᐅᔪᖅ ᓄᑖᓐᖑᕆᐊᖅᑎᑦᓯᒍᑎᓘᓐᓃᑦ ᑎᓕᓯᔾᔪᑎ; ᐊᒻᒪᓗ
2. ᐊᓯᓕᒫᖏᑦ ᓄᓇᑦ ᑭᑉᐹᕆᑦᑐᑦ ᓇᓗᓇᐃᖅᑕᐅᓯᒪᔪᑦ ᓇᓗᓇᐃᖅᑕᐅᒋᐊᓖᑦ ᐅᑯᓇᓐᖓᑦ:
   1. Ghotelnene K’odtįneh ᐊᓪᓚᐃᑦ ᑎᓂᓱᓕᒃ ᐊᒻᒪᓗ ᑕᑯᑦᓴᐅᔪᑦ Ghotelnene K’odtįneh Denesųlįne Benene ᓄᓇᓐᖑᐊᒥ;
   2. ᐋᑕᐹᔅᑲ ᐊᓪᓚᐃᑦ ᑎᓂᓱᓕᓐᓂ ᐊᒻᒪᓗ ᑕᑯᑦᓴᐅᔪᑦ Nuhetsíekwi Benéné ᓄᓇᓐᖑᐊᓂ; ᐊᒻᒪᓗ
   3. ᑐᓐᖓᕕᒃᑯᑦ ᐊᒻᒪᓗ ᑕᑯᑦᓴᐅᔪᑦ ᐃᓄᐃᑦ ᓄᓇᖁᑎᖏᓐᓄᑦ ᓄᓇᓐᖑᐊᓂ,
   4. Ghotelnene K’odtįneh ᑎᓂᓱᓕᓐ ᐊᓪᓚᐃᑦ ᐊᒻᒪᓗ ᑐᓐᖓᕕᒃᑯᑦ ᐊᒻᒪᓗ ᑕᑯᑦᓴᐅᔪᖅ ᓄᓇ Néné ᓄᓇᖏᑦ ᓄᓇᓐᖑᐊᒦᑦᑐᑦ; ᐊᒻᒪᓗ
   5. ᐋᑕᐹᔅᑲ ᑎᓂᓱᓕᓐ ᐊᓪᓚᐃᑦ ᐊᒻᒪᓗ Ghotelnene K’odtįneh ᑎᓂᓱᓕᓐ ᐊᓪᓚᐃᑦ ᐊᒻᒪᓗ ᑕᑯᑦᓴᐅᔪᑦ Nih Ahtla bedta ghodtih ᓄᓇᖏᑦ ᓄᓇᓐᖑᐊᒦᑦᑐᑦ,

1. ᐊᒃᑐᐊᔪᑦ ᐋᔩᕋᕈᑕᐅᔪᓄᑦ ᐊᖏᕈᑕᐅᓯᒪᔪᓂ ᓄᓇᖃᖅᑳᕐᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑎᖏᓐᓂ ᐊᓪᓚᐃᑦ Ghotelnene K’odtįneh ᑎᓂᓱᓕᓐ ᐊᒻᒪᓗ ᐋᑕᐹᔅᑲ ᑎᓂᓱᓕᓐ.

5.24 ᓯᕗᓪᓕᐹᕐᓯᐅᑦ ᓈᓴᖅᑕᐅᒋᐊᕐᖓᕈᑎᖏᓐᓂ ᑕᐃᔭᐅᓯᒪᔪᖅ ᑎᑎᕋᖅᓯᒪᓂᖓᓂ 5.22 ᐋᖅᑭᒋᐊᖅᑕᐅᒍᓐᓇᖅᑐᖅ GC-ᑯᓐᓂᒃ ᓇᖕᒥᓂᖅ ᐃᓱᒪᕐᓲᑎᒋᓗᒍ.

5.25 ᓯᕗᓪᓕᐹᕐᓯᐅᑦ ᑎᑎᕋᖅᑕᐅᓯᒪᔪᓄᑦ ᐊᕕᑦᑐᕐᓯᒪᓂᖓᓃᑦᑐᓂ 5.22, ᐋᖅᑭᒋᐊᖅᑕᐅᓯᒪᓂᖓᒍᑦ ᐊᕕᑦᑐᕐᓯᒪᓂᖓᓂ 5.24, ᐃᓚᓕᐅᔾᔭᐅᓯᒪᒋᐊᓕᒃ ᐅᐃᒍᖓᓄᑦ, ᐃᓚᒋᔭᐅᓗᓂ, ᐊᐅᓚᑦᓯᔾᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓂ.

5.26 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑏᑦ ᐅᐃᒍᖓᓅᖅᑕᐅᒋᐊᓕᒃ ᐅᖃᐅᓯᐅᔪᖅ ᐊᕕᑦᑐᕐᓯᒪᓂᖓᓂ 5.25 ᐋᖅᑭᒋᐊᖅᑕᐅᒍᓐᓇᖅᑐᖅ GC−ᑯᓐᓂᒃ ᖃᖓᑐᐃᓐᓇᖅ ᑐᖔᓂ ᓄᒃᑎᖅᑕᐅᓂᖓᑕ ᐅᓪᓗᖅ ᐱᔾᔪᑕᐅᓗᑎᒃ:

1. ᐃᓇᖏᖅᑕᐅᓗᓂ ᓇᓗᓇᐃᔭᕐᓯᒪᔪᑦ ᓄᓇᑦ ᐅᑉᕙᓘᓐᓃᑦ ᐱᔪᓐᓇᐅᑏᑦ ᐃᒪᖏᓐᓅᖓᔪᑦ ᓇᓕᖅᑯᑦᓯᓯᒪᓂᕐᓴᒥᒃ ᓇᓗᓇᐃᔭᐅᒻᒥᒃ;
2. ᐋᖅᑭᒋᐊᖅᑕᐅᓗᓂ ᓇᓗᓇᐃᔭᖅᑕᐅᓯᒪᓂᖓ ᓄᓇᑦ ᐱᔪᓐᓇᐅᑏᓪᓗ ᐃᒪᖏᓐᓅᖓᔪᑦ ᓇᓕᖅᑯᑦᓯᓯᒪᓂᕐᓴᒥᒃ ᓄᓇᖏᓐᓅᖓᔪᓄᑦ ᐱᔪᓐᓇᐅᑎᓄᓪᓘᓐᓃᑦ ᐃᒪᖏᓐᓄᑦ ᐊᑐᖅᑕᐅᒋᐊᓕᓐᓂᒃ ᐱᔾᔪᑕᐅᓗᑎᒃ ᒐᕙᓚᑐᖃᒃᑯᓐᓂ ᐱᓕᕆᒡᕕᓐᓄᑦ ᐅᑉᕙᓘᓐᓃᑦ ᐊᐅᓚᑕᐅᔪᓂᒃ ᒐᕙᒪᑐᖃᒃᑯᓐᓂ ᑭᒡᒐᑐᖅᑎᖏᓐᓄᑦ ᑯᐊᐳᕇᓴᓄᑦ;
3. ᐃᓚᓕᐅᔾᔨᓂᖅ ᓄᓇᓂᒃ ᐱᔪᓐᓇᐅᑎᓂᓪᓘᓐᓃᑦ ᐃᒪᖏᓐᓅᖓᔪᓂᒃ ᐊᑐᖅᑕᐅᒋᐊᓕᓐᓂᒃ ᐱᔾᔪᑕᐅᓗᑎᒃ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓄᑦ ᐅᑉᕙᓘᓐᓃᑦ ᐊᐅᓚᑕᐅᔪᓂᒃ ᒐᕙᒪᑐᖃᒃᑯᓐᓂ ᑭᒡᒐᑐᖅᑎᓄᑦ ᑯᐊᐳᕇᓴᓄᑦ; ᐅᑉᕙᓘᓐᓃᑦ
4. ᐲᖅᑕᐅᓗᑎᒃ ᓄᓇᑦ ᐱᔪᓐᓇᐅᑏᓪᓘᓐᓃᑦ ᐃᒪᖏᓐᓅᖓᔪᓂᒃ ᐊᑐᖅᑕᐅᒋᐊᖃᓐᖏᑦᑐᓂᒃ ᐱᔾᔪᑕᐅᓗᑎᒃ ᒐᕙᒪᑐᖃᒃᑯᑦ ᐱᓕᕆᒡᕕᖏᑦ ᐅᑉᕙᓘᓐᓃᑦ ᐊᐅᓚᑕᐅᔪᓂᒃ ᒐᕙᒪᑐᖃᒃᑯᓐᓂ ᑭᒡᒐᑐᖅᑎᓄᑦ ᑯᐊᐳᕇᓴᓄᑦ.

5.27 ᐊᐅᓚᑦᓯᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓃᒋᐊᓕᒃ ᐃᒪᐃᑉᐸᑕ, ᐱᖓᓱᓂ ᐊᕐᕌᒍᓂ ᓄᒃᑎᖅᑕᐅᓂᖓᑕ ᐅᓪᓗᖓᑕ ᑭᖑᓂᐊᓂ, ᓇᓗᓇᐃᖅᑕᐅᑉᐸᑦ GC−ᑯᓐᓂᒃ ᒐᕙᒪᒃᑯᓐᓄᑦ ᓄᓇᖁᑕᐅᔪᑦ ᐅᑉᕙᓘᓐᓃᑦ ᐱᔪᓐᓇᐅᑏᑦ ᐃᒪᖏᓐᓄᑦ ᐃᓚᓕᐅᔾᔭᐅᓯᒪᓐᖏᑦᑐᑦ ᓄᒃᑎᖅᑕᐅᔪᓄᑦ ᐃᒪᐃᓐᓂᕐᐸᑕ, ᓄᒃᑎᖅᑕᐅᓂᖓᑕ ᐅᓪᓗᖓᓂ, ᐊᑐᖅᑕᐅᒋᐊᓖᑦ ᐱᔾᔪᑎᖏᓐᓄᑦ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓄᑦ ᐅᑉᕙᓘᓐᓃᑦ ᒐᕙᒪᑐᖃᒃᑯᓐᓂᒃ ᑭᒡᒐᑐᖅᑎᓄᑦ ᑯᐊᐳᕇᓴᓄᑦ, GC-ᑯᑦ ᐃᒪᐃᒋᐊᓖᑦ, ᑐᓴᕆᐊᕐᕕᖃᓚᐅᖅᑎᓪᓗᒋᑦ GN−ᑯᓐᓂᒃ, ᖃᐅᔨᒃᑲᐃᔾᔪᑎᑖᖅᑎᑦᓯᓗᑎᒃ GN−ᑯᓐᓂᒃ ᐋᖅᑭᑦᓯᒪᔾᔪᑎᓂᒃ;

1. ᐱᔾᔪᑕᐅᔪᓂᒃ ᒐᕙᒪᒃᑯᑦ ᓄᓇᖁᑎᖏᑦ ᐅᑉᕙᓘᓐᓃᑦ ᐱᔪᓐᓇᐅᑏᑦ ᐃᒪᕐᓄᑦ ᐊᑐᖅᑕᐅᒋᐊᖃᕐᐸᑕ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓄᑦ ᐅᑉᕙᓘᓐᓃᑦ ᒐᕙᒪᑐᖃᒃᑯᓐᓂ ᑭᒡᒐᑐᖅᑎᓄᑦ ᑯᐊᐳᕇᓴᓄᑦ ᐊᒻᒪᓗ ᓇᓗᓇᐃᕐᓯᓯᒪᓗᑎᒃ ᓱᒻᒪᑦ ᒐᕙᒪᒃᑯᑦ ᓄᓇᖁᑎᖏᑦ ᐅᑉᕙᓘᓐᓃᑦ ᐱᔪᓐᓇᐅᑏᑦ ᐃᒪᕐᓅᖓᔪᓂᒃ ᐊᑐᖅᑕᐅᒋᐊᖃᕐᒪᖔᑕ, ᓄᒃᑎᖅᑕᐅᓂᖓᑕ ᐅᓪᓗᖓᓂ;
2. ᓇᓗᓇᐃᔭᖅᑕᐅᓗᑎᒃ ᓱᒻᒪᑦ ᒐᕙᒪᒃᑯᑦ ᓄᓇᖁᑎᖏᑦ ᐅᑉᕙᓘᓐᓃᑦ ᐱᔪᓐᓇᐅᑏᑦ ᐃᒪᕐᓅᖓᔪᓂᒃ ᐃᓚᓕᐅᔾᔭᐅᓂᓐᖏᒻᒪᖔᑕ ᓄᒃᑎᖅᑕᐅᓂᖓᑕ ᐅᓪᓗᖓᓂ; ᐊᒻᒪᓗ
3. ᑭᒡᓕᓕᐊᖑᓯᒪᔪᑦ ᐊᒻᒪᓗ ᑕᐅᖅᓯᐅᑕᐅᓯᒪᔪᑦ ᒐᕙᒪᒃᑯᑦ ᓄᓇᖁᑎᖏᑦ ᐅᑉᕙᓘᓐᓃᑦ ᓇᓃᒻᒪᖔᑕ ᐱᔪᓐᓇᐅᑏᑦ ᐃᒪᕐᓅᖓᔪᑦ ᐊᑐᖅᑕᐅᒋᐊᓖᑦ.

5.28 ᐊᔪᕐᓇᕈᓐᓃᑐᐊᕐᐸᑦ ᕿᓚᖕᒥᐅᓂᕐᐹᒃᑯᑦ ᖃᐅᔨᒃᑲᐃᔾᔪᑎᑖᓚᐅᖅᑎᓪᓗᒋᑦ ᐅᖃᐅᓯᐅᔪᓂ ᐊᕕᑦᑐᕐᓯᒪᓂᖓᓂ 5.27 ᑲᒥᓯᓇ ᓴᒃᑯᐃᒋᐊᖃᕐᐳᖅ GC−ᑯᓐᓂᒃ ᐊᐅᓚᑕᐅᔪᓂᒃ ᐊᒻᒪᓗ ᐊᐅᓚᑦᓯᒍᑕᐅᔪᓂᒃ ᑖᒃᑯᓂᖓ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐅᑉᕙᓘᓐᓃᑦ ᐱᔪᓐᓇᐅᑎᓂᒃ ᐃᒪᕐᓅᖓᔪᓂᒃ GC−ᑯᓐᓄᑦ ᐃᑲᔫᑕᐅᓂᐊᖅᑐᓂᒃ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓄᑦ ᐅᑉᕙᓘᓐᓃᑦ ᒐᕙᒪᑐᖃᒃᑯᓐᓂᒃ ᑭᒡᒐᑐᖅᑎᖏᓐᓄᑦ ᑯᐊᐳᕇᓴᓄᑦ.

ᐃᓂᒃᓴᓕᐅᕐᓯᒪᓂᖅ ᓇᓗᓇᐃᒃᑯᑕᒃᑯᑦ ᐅᑉᕙᓗᓐᓃᑦ ᑐᓂᔭᐅᓯᒪᔪᒥᒃ ᐊᑐᖅᑐᐊᕈᑎᒃᑯᑦ

5.29 ᐱᓇᓱᐊᖃᑎᒌᑦᑐᑦ ᓇᓗᓇᐃᕆᕗᑦ GC−ᑯᑦ ᐃᓚᖏᓐᓂᒃ ᓄᓇᑦ ᐱᔪᓐᓇᐅᑏᓪᓗ ᐋᖅᑭᒋᐊᕆᒋᐊᖃᕐᓂᐊᕐᓂᖏᓐᓂᒃ ᓴᓂᕐᕙᖅᑕᐅᓯᒪᔪᓂᒃ ᓇᓗᓇᐃᖅᑕᐅᓯᒪᔪᒃᑯᑦ, ᐊᒻᒪᓗ ᐃᓛᓐᓂᒃᑯᑦ ᓄᓇᑦ ᐱᔪᓐᓇᐅᑏᓪᓗ ᓈᖕᒪᓈᕐᓯᒪᓂᕐᓴᒃᑯᑦ ᐋᖅᑭᒋᐊᖅᑕᐅᓗᑎᒃ ᐊᖏᖅᑕᐅᓗᑎᒃ ᐊᑐᖅᑐᐊᕈᑎᖏᑦ GN ᐊᒻᒪᓗ GC.

5.30 ᐱᔪᓐᓇᕐᓯᑐᐊᕈᑎᒃ ᐊᑎᓕᐅᖅᑕᐅᓚᐅᖅᑎᓪᓗᒍ ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, ᑭᓯᐊᓂ ᒥᑦᓯᑎᓐᓅᖏᑦᑐᖅ ᑕᖅᑮᑦ ᐊᕐᕕᓂᓖᑦ ᐊᑎᓕᐅᖅᑕᐅᓂᒃᓴᖓᑕ ᐊᐅᓚᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑦ, GC−ᑯᑦ ᑐᓂᓯᔭᕆᐊᓖᑦ ᐱᓇᓱᐊᖃᑎᒋᔭᒥᓄᑦ ᑎᑎᕋᖅᓯᒪᔪᓂᒃ, ᐃᓗᓕᖃᕆᐊᓕᓐᓂᒃ ᑎᑎᕋᖅᑕᐅᓯᒪᔪᓂᒃ ᐊᒻᒪᓗ ᓇᓗᓇᐃᖅᑐᖅᑕᐅᓯᒪᔪᓂᒃ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᓂᒃ ᐃᒪᖏᓐᓄᑦ ᐊᒻᒪᓗ ᐋᖅᑭᑦᓯᒪᓂᖏᑎᒍᑦ (ᓴᓂᕐᕙᖅᑕᐅᓯᒪᔪᖅ ᓇᓗᓇᐃᖅᑕᐅᓯᒪᓂᒃᑯᑦ ᐊᑐᖅᑐᐊᕈᑎᒃᑯᓘᓐᓃᑦ), ᐊᑐᖅᑕᐅᒋᐊᓕᓐᓂᒃ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓄᑦ ᐅᑉᕙᓘᓐᓃᑦ ᒐᕙᒪᑐᖃᒃᑯᑦ ᑭᒡᒐᑐᖅᑎᖏᓐᓄᑦ ᑯᐊᐳᕇᓴᓄᑦ ᑭᓯᐊᓂ ᐃᓚᓕᐅᔾᔭᐅᓯᒪᓐᖏᓪᓗᓂ ᓄᒃᑎᖅᑕᐅᓂᖓᓂᒃ GC−ᑯᓐᓄᑦ ᑖᒃᑯᓇᓃᑎᓐᓇᒍ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ.

5.31 ᑐᓴᕆᐊᕐᓂᖃᓚᐅᖅᑎᓪᓗᒋᑦ GN-ᑯᑦ ᑎᑎᕋᖅᑕᐅᓯᒪᔪᑦ ᓇᓗᓇᐃᕐᓯᒪᓂᖓᓂ 5.30, GC−ᑯᑦ ᐃᓂᖅᓯᒋᐊᓖᑦ ᑎᑎᕋᖅᓯᒪᔪᓂᒃ, ᐃᓚᒋᔭᐅᓗᑎᒃ GC−ᑯᑦ ᐱᓇᓱᐊᖅᑕᖏᑦ ᐱᓕᕆᔾᔪᑎᒃᓴᑦ ᐊᑐᖅᑕᐅᒋᐊᓖᑦ ᑎᑎᕋᖅᑕᐅᓯᒪᓗᑎᒃ ᒐᕙᒪᑦ ᓄᓇᖁᑎᖏᓐᓄᑦ ᐊᒻᒪᓗ ᐱᔪᓐᓇᐅᑎᖏᓐᓄᑦ ᐃᒪᕐᓅᖓᔪᓂᒃ, ᐊᒻᒪᓗ ᑐᓂᓗᒋᑦ ᑎᑎᕋᖅᓯᒪᔪᑦ GN−ᑯᓐᓄᑦ NTI−ᑯᓄᓪᓗ.

5.32 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓖᑦ ᒐᕙᒪᒃᑯᑦ ᓄᓇᖁᑎᖏᑦ ᓇᓗᓇᐃᖅᑕᐅᓯᒪᔪᑦ ᓄᓇᑦ ᓴᓂᕐᕙᖅᑕᐅᒋᐊᖃᕐᓂᖏᓐᓂᒃ ᑎᑎᕋᖅᓯᒪᓂᖏᑎᒍᑦ 5.31 ᖁᓛᓃᑦᑐᓂ, ᓴᓂᕐᕙᖅᑕᐅᒋᐊᓖᑦ GN−ᑯᓐᓂᒃ ᐊᑐᖅᑕᐅᖁᓪᓗᒋᑦ ᑖᒃᑯᓇᓐᖓᑦ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓂᒃ ᐅᑉᕙᓘᓐᓃᑦ ᒐᕙᒪᑐᖃᒃᑯᑦ ᑭᒡᒐᑐᖅᑎᖏᓐᓂᒃ ᑯᐊᐳᕇᓴᓂ, ᐃᓯᕈᑎᒃᓴᓂᒃ ᓇᖕᒥᓂᖁᑎᖏᓐᓄᑦ ᑎᑎᕋᖅᑕᐅᓯᒪᔪᓂᒃ ᐊᑐᓕᕆᐊᕐᓗᓂ ᓄᒃᑎᖅᑕᐅᓂᖓᑕ ᐅᓪᓗᖓ.

5.33 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓖᑦ ᒐᕙᒪᒃᑯᑦ ᓄᓇᖁᑎᖏᑦ ᓇᓗᓇᐃᖅᑕᐅᓯᒪᔪᑦ ᓄᓇᑦ ᐊᑐᖅᑐᐊᖅᑕᐅᒍᓐᓇᕐᓂᖏᓐᓂᒃ ᑎᑎᕋᖅᓯᒪᓂᖏᑎᒍᑦ 5.31 ᐊᑐᖅᑐᐊᖅᑕᐅᒋᐊᓖᑦ ᐊᑐᕆᐊᓕᖕᓄᑦ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓂᒃ ᐅᑉᕙᓘᓐᓃᑦ ᒐᕙᒪᑐᖃᒃᑯᑦ ᑭᒡᒐᑐᖅᑎᖏᓐᓂᒃ ᑯᐊᐳᕇᓴᓂ, ᐊᒻᒪᓗ ᑖᓐᓇ ᐊᑐᖅᑐᐊᕈᑎ ᑎᑎᕋᖅᑕᐅᒋᐊᓕᒃ GN−ᑯᓐᓂᒃ ᐃᓯᕐᓂᕐᒧᑦ ᓇᖕᒥᓂᖁᑎᖏᓐᓄᑦ ᑎᑎᕋᖅᓯᒪᔪᓂ ᓄᒃᑎᖅᑕᐅᓂᖓᑕ ᐅᓪᓗᖓᓂ.

5.34 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᖃᑕᐅᒋᐊᓖᑦ ᐊᑐᖅᑕᐅᖃᑦᑕᓲᑦ ᒪᓕᒐᑦᓴᑦ ᐊᐅᓚᑦᓯᔾᔪᑏᓪᓗ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᑐᖅᑐᐊᖅᑕᐅᔪᑦ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓄᑦ ᐅᑉᕙᓘᓐᓃᑦ ᒐᕙᒪᑐᖃᒃᑯᓐᓂᒃ ᑭᒡᒐᖅᑐᐃᔪᓄᑦ ᑯᐊᐳᕇᓴᓄᑦ.

ᑎᒍᓯᓂᖏᑦ ᐊᓪᓚᕕᓕᕆᔾᔪᑎᑦ ᐊᐅᓚᑕᐅᖏᑦ ᐊᒻᒪᓗ ᐊᐅᓚᑕᖏᓐᓂᒃ GC-ᑯᑦ

5.35 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᓐᓂᐊᖅᑐᖅ GC−ᑯᑦ ᑎᒍᓯᔪᓐᓇᕐᓂᖏᓐᓂᒃ ᑲᒥᓯᓇᒥᒃ ᐊᐅᓚᑦᓯᔾᔪᑎᓂᒃ ᐊᐅᓚᑕᐅᓂᖏᓐᓂᓪᓗ ᓇᓕᑐᐃᓐᓇᖏᓐᓄᑦ ᓄᓇᑦ ᐱᔪᓐᓇᐅᑏᓪᓘᓐᓃᑦ ᐃᒪᕐᒨᖓᔪᑦ GC−ᑯᑦ ᓇᓗᓇᐃᖅᑕᖏᑦ ᐱᔭᕆᐊᖃᕐᒪᖔᑕ ᐅᑯᓄᖓ:

1. ᑲᓇᑕᒥ ᐱᔪᒪᔭᐅᔪᖅ, ᐃᓚᒋᔭᐅᓪᓗᑎᒃ:
   1. ᑲᓇᑕᒥ ᓴᐳᓐᓂᐊᖅᑏᑦ ᒥᐊᓂᕐᓯᔩᓪᓘᓐᓃᑦ;
   2. ᓴᓇᔭᐅᓯᒪᔪᖅ, ᐊᓯᔾᔨᕈᑎᖏᓪᓘᓐᓃᑦ ᑭᒡᓕᓕᐊᖑᓯᒪᔪᑦ, ᑲᓇᑕᒥ ᒥᕐᖑᐃᓯᕐᕕᒻᒥ, ᑲᓇᑕᒥ ᒥᕐᖑᐃᓯᕐᕕᒃᓴᖅ ᓴᓂᕐᕙᖅᑕᐅᓯᒪᔪᖅ, ᑲᓇᑕᒥ ᓄᓇᑐᖃᖏᑦ ᐅᑉᕙᓘᓐᓃᑦ ᓴᐳᔾᔭᐅᓯᒪᔪᑦ ᒐᕙᒪᑐᖃᒃᑯᑦ ᒪᓕᒐᖏᑎᒍᑦ; ᐅᑉᕙᓘᓐᓃᑦ
   3. ᓴᖅᑮᓂᖅ ᐱᖁᑎᕐᔪᐊᖑᔭᕆᐊᓕᖕᒥᒃ ᐱᓇᓱᐊᒐᑦᓴᒧᑦ ᐃᖏᕐᕋᔾᔪᑎᓕᕆᓂᕐᒨᖓᔪᒥᒃ ᐊᐅᓚᔪᓐᓇᐅᑎᓄᓪᓘᓐᓃᑦ;
2. ᑲᔪᓯᑎᑕᐅᓂᖓ ᐱᓇᓱᐊᒐᑦᓴᖅ ᓄᓇᖃᖅᑳᕐᓯᒪᔪᓄᑦ ᐊᖏᕈᑎᑎᒍᓪᓘᓐᓃᑦ ᐱᔪᓐᓇᐅᑎᓅᖓᔪᖅ ᐃᓕᓴᕆᔭᐅᓯᒪᔪᖅ ᐊᒻᒪᓗ ᓇᓗᓇᐃᖅᑕᐅᓯᒪᔪᖅ ᐊᕕᑦᑐᕐᓯᒪᓂᖓᒍᑦ 35 ᑐᓐᖓᕕᔾᔪᐊᖅ ᐱᖁᔭᖓ, 1982 (ᑲᓇᑕ); ᐅᑉᕙᓘᓐᓃᑦ
3. ᐊᖏᕈᑕᐅᓯᒪᔪᖅ ᓄᓇᖃᖅᑳᕐᓯᒪᔪᑦ ᓄᓇᑖᕈᑎᖓᒍᑦ ᐅᑉᕙᓘᓐᓃᑦ ᑲᔪᓯᑎᑕᐅᓂᖓᒍᑦ ᓄᓇᖃᖅᑳᕐᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑏᑦ, ᓄᓇᕗᒻᒥ ᐊᖏᕈᑏᑦ ᐅᑉᕙᓘᓐᓃᑦ ᐊᓯᖏᑦ ᐊᖏᕈᑕᐅᓯᒪᔪᑦ ᐊᖏᕈᑎᒃᑯᑦ ᐅᑉᕙᓘᓐᓃᑦ ᐊᖏᕈᑕᐅᓯᒪᔪᑦ ᐅᑉᕙᓘᓐᓃᑦ ᓇᖕᒥᓂᖅ−ᒐᕙᒪᖃᕐᓂᕐᒧᑦ ᐊᖏᖃᑎᒌᒍᑎᓂ.

5.36 ᐊᐅᓚᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎᓃᒋᐊᓖᑦ ᑐᖔᓂ ᑎᒍᔭᐅᓂᖓᑕ ᐊᐅᓚᑦᓯᓂᐅᔪᑦ ᐊᒻᒪᓗ ᐊᐅᓚᑕᐅᔪᑦ ᓄᓇᑦ ᐅᑉᕙᓘᓐᓃᑦ ᐱᔪᓐᓇᐅᑏᑦ ᐃᒪᖏᓐᓅᖓᔪᑦ ᑲᒥᓯᓇᒥᒃ ᒪᓕᓪᓗᒋᑦ ᑎᑎᕋᖅᓯᒪᔪᑦ 5.35, GC ᐃᒪᐃᒋᐊᓖᑦ:

1. ᓇᓗᓇᐃᕐᓗᒍ, ᑐᓂᓯᓗᓂ ᖃᐅᔨᒃᑲᐃᔾᔪᑎᒥᒃ GN−ᑯᓐᓄᑦ NTI−ᑯᓄᓪᓗ:
   1. ᐱᔾᔪᑖ ᓇᓕᖏᑦ ᓄᓇᑦ ᑎᒍᔭᐅᒻᒪᖔᑕ ᐊᒻᒪᓗ ᓇᓃᓐᓂᖏᑦ ᐊᒻᒪᓗ ᑕᐅᖅᓯᐅᑕᐅᔪᑦ ᓄᓇᑦ ᑎᒍᔭᐅᔪᑦ; ᐊᒻᒪᓗ
   2. ᐱᔾᔪᑖ ᓇᓕᖏᓐᓄᑦ ᐱᔪᓐᓇᐅᑎᓄᑦ ᐃᒪᕐᓅᖓᔪᑦ ᑎᒍᔭᐅᒻᒪᖔᑕ ᐊᒻᒪᓗ ᓇᓃᓐᓂᖏᑦ ᒪᐃᑦ ᑎᒍᔭᐅᓂᐊᖅᑐᑦ; ᐊᒻᒪᓗ
2. ᑭᓯᐊᓂ ᑕᒪᒃᑯᓇᓂ ᑲᒪᖃᑕᐅᔪᓂ ᑲᓇᑕᒥ ᓴᐳᓐᓂᐊᖅᑏᑦ ᒥᐊᓂᕐᓯᔩᓪᓗ, ᖃᐅᔨᒋᐊᕐᕕᒋᓗᒋᑦ GN ᐊᒻᒪᓗ NTI ᑭᒡᓕᖏᓐᓂᒃ ᓄᓇᑦ ᐊᒻᒪᓗ ᓇᓃᓐᓂᖏᓐᓂᒃ ᐃᒪᑦ ᑎᒍᔭᐅᔪᑦᓴᒫᑦ.

5.37 ᐊᐅᓚᑦᓯᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓖᑦ GN-ᑯᓐᓂᒃ ᐊᔪᖅᑎᑕᐅᒐᕙᖅᑐᑦ ᑐᓂᓯᓂᕐᒥᒃ ᐱᔪᒪᔭᐅᔪᓂᒃ ᐅᑉᕙᓘᓐᓃᑦ ᐱᔪᓐᓇᐅᑎᑖᖅᑎᑕᐅᓯᒪᔪᓂ ᐊᐅᓚᑕᐅᔪᓄᑦ, ᐅᑭᐅᖅᑕᖅᑐᒥ ᒪᓕᒐᑦᓴᖏᑎᒍᑦ, ᐃᓗᐊᓃᑦᑐᑦ ᐅᑉᕙᓘᓐᓃᑦ ᓄᓇᒦᑦᑐᑦ ᐊᐅᓚᑦᓯᔨᐅᔪᓃᑦᑐᑦ ᐊᐅᓚᑕᐅᔪᓂᓘᓐᓃᑦ ᑲᒥᓯᓇᒧᑦ ᐅᑉᕙᓘᓐᓃᑦ ᐊᑐᕐᓂᕐᒥᒃ ᐃᒪᕐᓂᒃ ᐅᑉᕙᓘᓐᓃᑦ ᑯᕕᖅᑕᕕᓐᓂ ᐃᒪᕐᓄᑦ, GC-ᑯᓐᓂᒃ ᐊᔪᖅᑎᑕᐅᒋᐊᖃᕋᓱᒋᔭᐅᑉᐸᑦ:

1. ᐱᔾᔪᑎᒋᓪᓗᒍ ᑕᒪᓐᓇ ᐊᑐᕐᓂᖅ ᐃᒪᕐᓂᒃ, ᐅᑉᕙᓘᓐᓃᑦ ᑯᕕᖅᑕᖅᑕᐅᔪᓂᒃ ᐃᒪᕐᓄᑦ, ᑕᑯᒋᐊᕋᑦᓴᐅᓇᔭᓐᖏᑦᑐᖅ ᑖᒃᑯᓄᖓ ᐅᑉᕙᓘᓐᓃᑦ ᐊᑉᕕᐊᕋᔭᖅᑐᖅ ᑖᑦᓱᒧᖓ ᐱᓇᓱᐊᒐᐅᔪᒧᑦ ᑲᓇᑕᒥ ᐱᔪᒪᔭᐅᔪᒧᑦ;
2. ᑐᖔᓂ ᐊᐅᓚᑕᐅᓂᖏᑕ ᐊᒻᒪᓗ ᐊᐅᓚᑕᐅᔪᑦ ᓄᓇᑦ ᐅᑉᕙᓘᓐᓃᑦ ᐱᔪᓐᓇᐅᑏᑦ ᐃᒪᕐᓅᖓᔪᑦ ᑎᒍᔭᐅᑉᐸᑕ GC−ᑯᓐᓄᑦ ᒪᓕᓪᓗᒋᑦ ᐊᕕᑦᑐᕐᓯᒪᓂᐊᕈᓯᖏᑦ 5.35(a), 5.35(b) or 5.35(c); ᐅᑉᕙᓘᓐᓃᑦ
3. ᐊᖏᕈᑕᐅᓯᒪᔪᒧᑦ ᓄᓇᖃᖅᑳᕐᓯᒪᔪᓄᑦ ᓄᓇᑖᕐᓂᕐᒧᑦ, ᐃᓚᒋᔭᐅᓗᑎᒃ ᐱᔾᔪᑕᐅᔪᑦ ᐊᑐᖅᑕᐅᓚᐅᐱᓪᓚᑦᑐᓄᑦ ᐆᑦᑐᕋᐅᑎᓄᑦ ᐊᖏᕈᑕᐅᓇᓱᐊᖅᑐᒧᑦ ᓄᓇᖃᖅᑳᕐᓯᒪᔪᑦ ᓄᓇᑖᕈᑎᖏᓐᓄᑦ, ᐅᑉᕙᓘᓐᓃᑦ ᑲᔪᓯᑎᑕᐅᔪᒥᒃ ᓄᓇᖃᖅᑳᕐᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑎᖏᓐᓂ, ᓄᓇᕗᒻᒥ ᐊᖏᕈᑎᓂ ᐅᑉᕙᓘᓐᓃᑦ ᐊᓯᖏᓐᓂ ᐊᖏᕈᑕᐅᓯᒪᔪᓂ ᐊᖏᕈᑎᓂ ᐅᑉᕙᓘᓐᓃᑦ ᐊᖏᕈᑎᓂ ᐅᑉᕙᓘᓐᓃᑦ ᓇᖕᒥᓂᖅ−ᒐᕙᒪᖃᕐᓂᕐᒧᑦ ᐊᖏᕈᑎᓂ.

5.38 ᑐᖔᓂ ᐊᔪᖅᑎᑕᐅᓂᖓᑕ ᐅᖃᐅᓯᐅᔪᓂ ᑎᑎᕋᖅᓯᒪᓂᖏᓐᓂ 5.37 GC−ᑯᑦ ᐃᒪᐃᓕᐅᕆᐊᓖᑦ:

1. ᖃᐅᔨᒃᑲᐃᓗᑎᒃ GN−ᑯᓐᓂᒃ ᐊᒻᒪᓗ NTI−ᑯᓐᓂᒃ ᑐᒃᓯᕋᐅᑕᐅᔪᒥᒃ ᐊᔪᖅᑎᑦᓯᓂᕐᒧᑦ ᐊᒻᒪᓗ ᑐᓴᕆᐊᕐᓗᑎᒃ GN−ᑯᓐᓂᒃ ᐊᒻᒪᓗ NTI−ᑯᓐᓂᒃ ᐅᑯᓄᓐᖓᖓᔪᓂᒃ:
   1. ᑭᒡᓕᖏᑦ ᐊᒻᒪᓗ ᑕᐅᖅᓯᐅᑕᐅᔪᑦ ᓄᓇᑦ ᒪᓕᒋᐊᓖᑦ ᑐᒃᓯᕋᐅᑕᐅᔪᒥᒃ ᐊᔪᖅᑎᑦᓯᓂᕐᒧᑦ;
   2. ᓇᓃᓐᓂᖏᑦ ᐃᒪᐃᑦ ᒪᓕᒋᐊᓖᑦ ᑐᒃᓯᕋᐅᑕᐅᔪᒥᒃ ᐊᔪᖅᑎᑦᓯᓂᕐᒧᑦ; ᐊᒻᒪᓗ
   3. ᐱᔪᒪᔭᖏᑦ ᐊᐅᓚᑕᐅᔪᓪᓘᓐᓃᑦ ᑐᓂᔭᐅᔪᒧᑦ ᐅᑉᕙᓘᓐᓃᑦ ᐊᔪᓐᖏᔾᔪᑎᑖᖅᑎᑦᓯᓂᕐᒧᑦ ᐊᔪᖅᑎᑦᓯᒍᑕᐅᓂᐊᖅᑐᑦ; ᐊᒻᒪᓗ
2. (b) ᖃᐅᔨᒃᑲᖅᑕᐅᓗᑎᒃ ᑭᒃᑯᑐᐃᓐᓇᐃᑦ ᑐᒃᓯᕋᐅᑕᐅᔪᒥᒃ ᐊᔪᖅᑎᑦᓯᓂᕐᒥᒃ ᐊᒻᒪᓗ ᐃᓱᒪᒋᓗᒋᑦ ᑭᒡᒐᖅᑐᐃᔾᔪᑏᑦ ᑐᓂᔭᐅᓯᒪᔪᑦ ᐱᕕᒃᓴᖃᖅᑎᑕᐅᒋᐊᕐᓯᒪᔪᒥᒃ ᑭᖑᓂᐊᒍᑦ ᖃᐅᔨᒃᑲᐃᔾᔪᑎᑖᖅᑎᑦᓯᒍᑎᐅᑉ.

5.39 ᓴᒃᑯᑕᐅᔾᔪᑎᖓ ᐊᐅᓚᑦᓯᔨᐅᔪᑦ ᐊᒻᒪᓗ ᐊᐅᓚᑕᐅᔪᑦ ᑲᒥᓯᓇᒧᑦ, ᑎᒍᓯᒍᑏᑦ ᐊᐅᓚᑦᓯᓂᕐᒥᒃ ᐊᐅᓚᑕᐅᔪᓂᓪᓗ ᓄᓇᓂᒃ ᐊᒻᒪᓗ ᐱᔪᓐᓇᐅᑎᓂᒃ ᐃᒪᕐᒨᖓᔪᓂᒃ GC−ᑯᓐᓂᒃ, ᐊᔪᖅᑎᑦᓯᒍᑕᐅᔪᖅ ᑐᓂᓯᓂᕐᒥᒃ ᐱᔪᒪᔭᐅᔪᓂᒃ ᓄᓇᓂᒃ ᐅᑉᕙᓘᓐᓃᑦ ᐱᔪᓐᓇᖅᑎᑕᐅᒍᑏᑦ ᐊᐅᓚᓂᐅᔪᓂᒃ ᑖᒃᑯᓇᓐᖓᑦ, ᐊᒻᒪᓗ ᐊᔪᖅᑎᑦᓯᒍᑕᐅᔪᑦ ᐊᑐᖅᑕᐅᒍᑎᒃᓴᖏᓐᓂᒃ ᐃᒪᐃᑦ ᐅᑉᕙᓘᓐᓃᑦ ᐅᐊᑦᑕᑯᑦ ᐃᒪᕐᓄᑦ ᐃᒪᐃᒋᐊᓖᑦ, ᒪᓕᓪᓗᒋᑦ ᑎᑎᕋᖅᓯᒪᓂᖓᓂ 5.40, ᐊᑭᓕᕐᓲᑎᒃᓴᖃᓐᖏᓪᓗᑎᒃ ᑮᓇᐅᔭᓂᒃ ᐅᑯᓇᓐᖓᑦ, ᐅᑉᕙᓘᓐᓃᑦ ᐊᑭᓖᒍᑎᒃᓴᓂᒃ ᐅᑯᓄᖓ, GN.

5.40 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓖᑦ GC-ᑯᓐᓂᒃ ᑎᒍᔭᐅᑉᐸᑕ, ᐅᑉᕙᓘᓐᓃᑦ ᓴᒃᑯᑕᐅᓐᓂᕐᐸᑕ, ᐊᐅᓚᑦᓯᔨᐅᔪᑦ ᐊᒻᒪᓗ ᐊᐅᓚᑕᐅᔪᑦ ᓄᓇᑦ ᒪᓕᓪᓗᒋᑦ ᑎᑎᕋᖅᓯᒪᓂᖏᓐᓂ 5.28, 5.35, ᐅᑉᕙᓘᓐᓃᑦ 8.36, GC−ᑯᑦ ᐊᑭᓖᒋᐊᓖᑦ GN −ᑯᓐᓄᑦ ᐱᐅᓯᒋᐊᕈᑕᐅᓯᒪᔪᓕᒫᓂᒃ GN−ᑯᓐᓂᒃ ᑕᒪᒃᑯᓄᖓ ᓄᓇᓄᑦ.

5.41 ᐊᔪᕐᓇᕈᓐᓃᑐᐊᕐᐸᑦ ᕿᓚᒥᐅᓂᕐᐹᒃᑯᑦ ᑎᒍᔭᐅᓚᐅᖅᑎᓪᓗᒍ ᐅᑉᕙᓘᓐᓃᑦ ᓴᒃᑯᑕᐅᓚᐅᖅᑎᓪᓗᒍ ᐅᖃᐅᓯᐅᔪᖅ ᑎᑎᕋᖅᓯᒪᓂᖓᓂ 5.40, GC−ᑯᑦ ᐊᒻᒪᓗ GN-ᑯᑦ ᐊᖏᖃᑎᒌᒐᓱᐊᕆᐊᖃᕐᐴᒃ ᐅᓄᕐᓂᖏᓐᓂᒃ ᐊᑭᓕᖅᑕᐅᒋᐊᓕᓐᓂᒃ ᐊᒃᑐᐊᔪᓂᒃ ᑕᒪᒃᑯᓇᓐᖓᑦ ᑎᒍᔭᐅᔪᓂᒃ ᓴᒃᑯᑕᐅᔪᓂᓪᓘᓐᓃᑦ.

5.42 GC−ᑯᑦ ᐊᒻᒪᓗ GN−ᑯᑦ ᐊᖏᖃᑎᒌᒍᓐᓇᖏᑉᐸᑎᒃ ᐅᓄᕐᓂᖏᓐᓂᒃ ᐊᑭᓕᖅᑕᐅᒋᐊᓕᖕᓂᒃ ᐅᖃᐅᓯᐅᔪᒥ ᑎᑎᕋᖅᓯᒪᓂᖓᓂ 5.40, GC ᐊᒻᒪᓗ GN ᖃᐅᔨᒋᐊᕈᑎᖃᕆᐊᓖᒃ ᐊᖏᖃᑎᒌᓪᓗᑎᒃ ᐊᑭᑦᑐᕆᐊᕈᑎᓄᑦ ᖃᐅᔨᒪᔪᕐᔪᐊᒧᑦ.

5.43 ᑐᓂᔭᐅᓚᐅᖅᑎᓪᓗᒋᑦ ᖃᐅᔨᒋᐊᕐᕕᒋᓯᒪᔭᖓᓂᒃ ᐅᖃᐅᓯᐅᔪᒥᒃ ᑎᑎᕋᖅᓯᒪᓂᖓᓂ 5.42 ᐊᑭᑦᑐᕆᐊᕈᑎᓄᑦ ᖃᐅᔨᒪᔪᕐᔪᐊᖅ ᓇᓗᓇᐃᕆᓂᐊᕐᐳᖅ ᐱᐅᓯᒋᐊᒃᑲᓐᓂᕈᑎᒃᓴᒥᒃ ᐊᑭᒋᓇᔭᖅᑕᖓᓂᒃ ᐊᒻᒪᓗ ᑖᓐᓇ ᐅᓄᕐᓂᖓ ᐊᑭᓕᖅᑕᐅᓂᐊᕐᐳᖅ ᐅᖃᐅᓯᐅᔪᒥ ᑎᑎᕋᖅᓯᒪᓂᖓᓂ 5.40.

ᐱᔪᒐᕆᔭᐅᔪᑦ ᓴᖅᑭᖅᑕᐅᔪᑦ ᓄᒃᑎᖅᑕᐅᓂᖓᑕ ᐅᓪᓗᖅ ᑭᖑᓂᐊᓂ

5.44 ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑎᖏᑦ ᐃᒪᕐᒨᖓᔪᓄᑦ:

1. ᓴᒃᑯᑕᐅᓂᖓ GC−ᑯᓐᓄᑦ ᑎᑎᕋᖅᓯᒪᓂᖏᑎᒍᑦ 5.28, ᐅᑉᕙᓘᓐᓃᑦ 8.36; ᐅᑉᕙᓘᓐᓃᑦ
2. ᐅᑎᖅᑎᑕᐅᔪᖅ GC−ᑯᓐᓂᒃ ᑎᑎᕋᖅᓯᒪᓂᖓᒍᑦ 5.35;

ᒪᓕᓐᓂᐊᖅᑐᖅ ᐊᑐᖅᑕᐅᔪᓂᒃ ᐱᔪᒐᕆᔭᐅᔪᓂᒃ ᐊᒻᒪᓗ ᐱᖓᔪᐃᒋᔭᐅᔪᑦ ᐱᔪᒐᕆᔭᖏᓐᓂᒃ ᓴᖅᑭᖅᑕᐅᔪᓂᒃ ᑭᖑᓂᐊᒍᑦ ᓄᒃᑎᖅᑕᐅᓂᐅᑉ ᐅᓪᓗᖓᑕ ᑲᒪᒋᔭᐅᔭᕆᐊᓕᒃ GC−ᑯᓐᓂᒃ ᑕᐃᒫᑦᓴᐃᓐᓇᖅ ᑲᒪᒋᔭᐅᓂᖏᑎᑐᑦ ᑎᑎᕋᖅᑕᐅᓯᒪᔪᓂ 5.16, 5.17, 5.18, 5.19, ᐊᒻᒪᓗ 5.20, ᐊᓯᔾᔨᕆᐊᖃᖅᑎᑕᐅᓯᒪᔪᓂ.

ᓯᕗᓂᕐᒥ ᓄᒃᑎᖅᑕᐅᔪᒃᓴᑦ ᑲᒥᓯᓇᒧᑦ

5.45 ᐊᖏᖃᑎᒌᒍᑎᑕᐅᓯᒪᔪᓂ GN−ᑯᓐᓄᑦ, GC−ᑯᑦ ᓇᓗᓇᐃᕐᐸᒍ ᐊᑐᕆᐊᑐᒍᓐᓃᕐᓂᕐᒥᒃ ᓄᓇᓂᒃ ᐅᑉᕙᓘᓐᓃᑦ ᐱᔪᓐᓇᐅᑎᓂᒃ ᐃᒪᕐᒨᖓᔪᓂᒃ ᐃᓚᓕᐅᔾᔭᐅᓯᒪᓐᖏᑦᑐᓂᒃ ᓄᒃᑎᖅᑕᐅᔪᓂᒃ ᐊᐅᓚᑦᓯᔨᐅᔪᓂᒃ ᐊᒻᒪᓗ ᐊᐅᓚᑕᐅᔪᓂᒃ ᑲᒥᓯᓇᒧᑦ ᐅᑉᕙᓘᓐᓃᑦ ᑭᖑᓂᐊᒍᑦ ᓴᒃᑯᑕᐅᔪᓂᒃ ᑎᑎᕋᖅᓯᒪᓂᖏᑎᒍᑦ 5.28 ᐅᑉᕙᓘᓐᓃᑦ 8.36 ᐅᑉᕙᓘᓐᓃᑦ ᐅᑎᖅᑎᑕᐅᓐᓂᕐᐸᑕ ᑎᑎᕋᖅᓯᒪᓂᖓᒍᑦ 5.35, GC ᑐᒃᓯᕋᕈᓐᓇᖅᑐᖅ ᓄᒃᑎᕆᔪᒪᓂᕐᒥᒃ ᐊᐅᓚᑦᓯᔨᐅᔪᓂᒃ ᐊᒻᒪᓗ ᐊᐅᓚᑕᐅᔪᓂᒃ ᑖᒃᑯᓄᖓ ᓄᓇᓄᑦ ᐅᑉᕙᓘᓐᓃᑦ ᐱᔪᓐᓇᐅᑎᓄᑦ ᐃᒪᕐᒨᖓᔪᓂ ᑲᒥᓯᓇᒧᑦ. ᓱᖅᑯᐃᖅᑕᐅᑦᓯᐊᖁᓪᓗᒍ, GN ᐱᔪᓐᓇᐅᑎᖃᕐᓂᐊᖅᑐᖅ ᒪᓕᒐᑦᓴᓕᐅᕐᓂᕐᒥᒃ ᓈᖕᒪᒋᔭᒥᒍᑦ ᑖᑦᓱᒧᖓ ᓇᖕᒥᓂᖅ ᐋᖅᑭᓪᓗᒍ, ᐊᖏᕈᑎᖃᕐᓗᑎᒃ ᓈᖕᒪᑦᓴᓂᕐᒥᒃ ᓄᒃᑎᖅᑕᐅᔪᒥᒃ ᐊᐅᓚᑦᓯᔨᐅᔪᓂᒃ ᐊᒻᒪᓗ ᐊᐅᓚᑕᐅᔪᓂᒃ ᑕᒪᒃᑯᓄᖓ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐅᑉᕙᓘᓐᓃᑦ ᐱᔪᓐᓇᐅᑎᓂᒃ ᐃᒪᕐᒨᖓᔪᓄᑦ.

ᐊᑦᑕᓇᐃᕐᓯᒪᒍᑎ

5.46 ᐊᐅᓚᑦᓯᔪᓐᓇᓂᕐᒧᑦ ᐊᖏᖃᑎᒌᒍᑎᓃᒋᐊᓖᑦ GC−ᑯᑦ ᐊᒻᒪᓗ GN−ᑯᑦ ᐃᒪᐃᓕᐅᕆᐊᖃᕐᓂᖏᓐᓂᒃ, ᑎᓕᔭᐅᓂᕐᒧᑦ ᐱᔪᓐᓇᐅᑎᑖᖅᑎᑕᐅᓯᒪᓂᕐᒥᒍᑦ GC−ᑯᓐᓂᒃ GN-ᑯᓐᓄᑦ, ᐅᑉᕙᓘᓐᓃᑦ ᐊᓯᐊᒍᑦ ᐊᖏᕈᑕᐅᒍᓐᓇᑐᒃᑯᑦ, ᐊᑦᑕᓇᐃᕐᓯᒪᒍᑕᐅᔪᓕᒫᑦ ᑎᒍᒥᐊᖅᑕᖏᑦ ᐊᒃᑐᐊᔪᑦ ᐊᑐᖅᑕᐅᔪᓂ ᐱᔪᒐᕆᔭᐅᔪᓂ ᐊᑐᐃᓐᓇᐅᖁᓪᓗᒋᑦ ᐊᐅᓚᑕᐅᒋᐊᓖᑦ GN−ᑯᓐᓂᒃ ᓄᒃᑎᖅᑕᐅᓂᖓᑕ ᐅᓪᓗᖓᓂ.

5.47 ᐊᔪᕐᓇᕈᓐᓃᑐᐊᕐᐸᑦ ᕿᓚᒥᐅᓂᕐᐹᒃᑯᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᑖᒃᑯᐊ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, ᑭᓯᐊᓂ ᑐᖔᓂᐅᓐᖏᑦᑐᖅ ᐊᑕᐅᓯᖅ ᐊᕐᕌᒍ, ᑐᖔᓂ ᓂᕆᐅᒋᔭᐅᔪᖅ ᐅᓪᓗᖓ ᐊᑎᓕᐅᖅᑕᐅᓂᐊᕐᓂᖓᑕ ᐊᐅᓚᔪᓐᓇᐅᑎᑖᕐᓂᕐᒧᑦ ᐊᖏᖃᑎᒌᒍᑎ, GC−ᑯᑦ ᑐᓂᓯᒋᐊᓖᑦ GN-ᑯᓐᓄᑦ ᑎᑎᕋᖅᓯᒪᔪᓂᒃ ᐊᑦᑕᓇᐃᕐᓯᒪᒍᑎᓂᒃ ᑎᒍᒥᐊᖅᑕᐅᑎᓪᓗᒍ GC−ᑯᓐᓂᒃ ᐊᑐᖅᑕᐅᔪᓂᒃ ᐱᔪᒐᕆᔭᐅᔪᓅᖓᔪᓂ, ᐃᓚᐅᓗᑎᒃ ᐋᖅᑭᑦᓯᒪᓂᖏᑦ ᐊᒻᒪᓗ ᑭᐳᒍᑕᐅᔪᑦ ᓄᓇᓄᑦ ᑕᐃᒪᐃᑦᑐᒃᑯᑦ ᐊᑦᑕᓇᐃᕐᓯᒪᔪᒃᑯᑦ. GC-ᑯᑦ ᓴᖅᑮᓯᒪᑉᐸᑕ ᑭᐳᒍᑕᐅᔪᓂᒃ ᓄᓇᓄᑦ ᑕᒪᒃᑯᓄᖓ ᐊᑦᑕᓇᐃᕐᓯᒪᒍᑎᓂᒃ, ᐊᑐᖅᑕᐅᓚᑦᑖᖅᑐᓄᑦ ᑐᓐᖓᕕᒋᔭᐅᔪᖅ ᐊᐅᓚᔾᔭᐃᒍᑕᐅᓯᒪᔪᕐᓘᓐᓃᑦ ᓴᖅᑮᓂᕐᒥᒃ ᑕᐃᒪᐃᑦᑐᒥᒃ ᓄᓇᒥᒃ ᑭᐳᒍᑕᐅᔪᒥᒃ ᑐᓂᔭᐅᒋᐊᖃᕐᓂᐊᖅᑐᖅ. GC−ᑯᑦ ᑐᓴᖅᑎᑦᓯᓂᐊᖅᑐᑦ ᐱᕙᓪᓕᐊᓯᒪᓂᖓᓂᒃ ᑕᐃᒪᐃᑦᑐᒥᒃ ᑎᑎᕋᖅᓯᒪᔪᒥᒃ ᑐᓴᐅᒪᔭᐅᔪᖅ ᐊᓯᔾᔨᕐᐸᑦ ᐊᒻᒪᓗ ᐃᕐᖐᓐᓇᖅ ᑐᓂᓯᔭᕆᐊᓕᒃ GN−ᑯᓐᓄᑦ ᐊᓐᖑᑎᑎᑕᐅᓯᒪᔪᓂᒃ ᑎᑎᕋᖅᓯᒪᔪᒃᑯᑦ.

ᑐᒃᓯᕋᐅᑏᑦ

5.48 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓖᑦ ᑎᑎᕋᖅᓯᒪᔪᑦ ᑲᒪᒍᑎᒃᓴᑦ ᑐᒃᓯᕋᐅᓯᐊᖑᔪᓂᒃ ᑲᒪᒋᓯᒪᒋᐊᓕᖕᓂᒃ ᓄᒃᑎᖅᑕᐅᓂᖓᑕ ᐅᓪᓗᖓᓂ ᑲᓲᒪᔪᓂᒃ ᐊᐅᓚᑦᓯᔨᐅᔪᓄᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᒻᒪᓗ ᐱᔪᓐᓇᐅᑎᖃᕐᓂᕐᒧᑦ ᐃᒪᕐᒨᖓᔪᓂᒃ.

ᓂᕆᐅᒋᔭᐅᔪᑦ, ᐊᑭᓕᕆᐊᓖᑦ, ᓂᖏᖅᑕᐅᑏᑦ, ᐊᑐᖅᑐᐊᕈᑏᑦ ᐊᒻᒪᓗ ᐊᑭᓕᕆᐊᓖᑦ

5.49 GC−ᑯᑦ ᐃᒪᐃᓕᐅᕆᐊᓖᑦ:

1. ᐱᓕᕆᐊᒃᓴᓖᑦ NAO−ᓅᖓᔪᓕᒫᓂᒃ ᐊᑭᓕᕆᐊᓕᖕᓂᒃ ᐋᖅᑭᑦᓯᒪᓂᓕᓐᓂᒃ ᐊᑭᓕᖅᑕᐅᕕᒃᓴᒫᖏᑎᒍᑦ ᑐᖔᓂ ᓄᒃᑎᖅᑕᐅᓂᖓᑕ ᐅᓪᓗᖅ, ᐃᓚᒋᔭᐅᓗᑎᒃ ᑮᓇᐅᔭᖃᐅᑏᑦ ᐱᖁᑎᓄᑦ ᐱᔨᑦᓯᕈᑎᓄᓪᓗ ᓂᐅᕕᐊᖑᓯᒪᔪᓄᑦ, ᐊᑐᖅᑐᐊᕈᑕᐅᔪᓄᑦ ᐅᑉᕙᓘᓐᓃᑦ ᑎᒍᔭᐅᓯᒪᔪᓄᑦ ᐊᓯᖏᑎᒍᑦ ᐋᖅᑭᑦᓯᒪᔭᐅᔪᑎᒍᑦ; ᐊᒻᒪᓗ
2. ᑐᓂᔭᐅᓗᑎᒃ GN−ᑯᓐᓂᒃ NAO−ᓅᖓᔪᓕᒫᓂᒃ ᓂᕆᐅᒋᔭᐅᔪᓂᒃ, ᓂᖏᖅᑕᐅᑎᓂᒃ, ᐊᑐᖅᑐᐊᕈᑎᓂᒃ, ᐊᑭᓕᖅᑕᐅᒋᐊᓕᓐᓂᒃ, ᐊᑭᓖᒍᑎᓂᒃ ᐅᑉᕙᓘᓐᓃᑦ ᐊᓯᖏᓐᓂᒃ ᐊᑭᓕᒐᑦᓴᓕᐊᖑᔪᓂᒃ ᐱᕕᒃᓴᖃᖅᑎᑕᕕᖓᒍᑦ ᑐᖔᓂ ᓄᒃᑎᖅᑕᐅᓂᐅᑉ ᐅᓪᓗᖓᑕ.

5.50 GC−ᑯᑦ ᐊᑭᓖᒋᐊᓖᑦ GN−ᑯᓐᓄᑦ ᓂᖏᖅᑕᐅᑎᓂᒃ, ᐊᑐᖅᑐᐊᕈᑎᓂᒃ, ᐊᑭᓕᕆᐊᓕᓐᓂᒃ, ᐊᑭᓖᒍᑎᓂᒃ ᐅᑉᕙᓘᓐᓃᑦ ᐊᓯᖏᓐᓂᒃ ᐊᑭᓕᒐᑦᓴᓕᐊᖑᓯᒪᔪᓂᒃ, ᐃᓚᒋᔭᐅᓇᑎᒃ ᑖᒃᓰᑦ, ᒐᕙᒪᒃᑯᑦ ᓄᓇᖁᑎᖏᓐᓅᖓᔪᓂᒃ ᐊᒻᒪᓗ ᐱᔪᓐᓇᐅᑏᑦ ᐃᒪᕐᒨᖓᔪᓄᑦ GC−ᑯᓐᓄᑦ ᑐᓂᔭᐅᒋᐊᓖᑦ ᐊᒻᒪᓗ ᐱᕕᒃᓴᖃᖅᑎᑕᐅᓂᖓᒍᑦ ᑭᖑᓂᐊᒍᑦ ᓄᒃᑎᖅᑕᐅᓂᖓᑕ ᐅᓪᓗᖓᓂ.

5.51 ᐊᓯᐊᒍᑦ ᐊᖏᕈᑎᓕᐊᖑᓯᒪᓐᖏᑉᐸᑦ, GN−ᑯᑦ ᐱᓕᕆᐊᒃᓴᖃᔾᔮᖏᑦᑐᖅ ᐊᑭᓕᕐᓱᕆᐊᓕᓐᓂᒃ ᐊᐅᓚᑕᐅᒐᔪᐃᑦᑐᑎᒍᑦ ᐊᑭᓕᒐᓴᓕᐊᖑᓯᒪᔪᓂᒃ GC−ᑯᓐᓂᒃ, ᐊᑭᓕᕆᐊᖃᕋᔭᖅᑐᓂᒃ ᑭᖑᓂᐊᒍᑦ ᓄᒃᑎᖅᑕᐅᓂᐅᑉ ᐅᓪᓗᖓᑕ.

ᐱᓕᕆᔾᔪᓰᑦ ᐊᑭᓕᑦᓴᐃᑎᑦᓯᓂᕐᒧᑦ ᐊᒻᒪᓗ ᐊᑭᓖᒍᑎᓂᒃ ᐊᑭᓕᕆᐊᓕᖕᓂᒃ

5.52 GC ᐊᒻᒪᓗ GN ᓇᓗᓇᐃᕆᒋᐊᓖᑦ ᐊᒻᒪᓗ ᐋᖅᑭᑦᓱᐃᓗᑎᒃ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓂ, ᐱᓕᕆᔾᔪᓯᕐᓂᒃ ᐊᑭᓕᑦᓴᐃᑎᑦᓯᓂᕐᒧᑦ ᐊᒻᒪᓗ ᐊᑭᓖᒍᑎᓂᒃ ᐊᑭᓕᕆᐊᓕᖕᓂᒃ ᖃᑦᓯᑐᐃᓐᓇᕐᓂᒃ ᐊᑭᓕᕆᐊᓕᖕᓂᒃ ᐅᑉᕙᓘᓐᓃᑦ ᓂᕆᐅᒋᔭᐅᔪᓂᒃ ᑎᑎᕋᖅᓯᒪᓂᖏᑎᒍᑦ 5.49, 5.50 ᐊᒻᒪᓗ 5.51.

ᑲᑎᒪᔨᓄᑦ ᐃᓚᒋᔭᐅᓂᖅ

5.53 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓖᑦ ᑎᑎᕋᖅᓯᒪᔪᑦ ᐋᖅᑭᑦᓱᐃᔾᔪᑏᑦ ᑲᔪᓯᔾᔪᑎᒃᓴᓄᑦ ᐊᒻᒪᓗ ᐋᖅᑭᑦᓯᒪᓂᖏᓐᓄᑦ ᑲᑎᒪᔩᑦ ᐊᒃᑐᐊᔪᑦ ᐊᐅᓚᑦᓯᔨᐅᔪᓄᑦ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᓄᑦ ᐃᒪᕐᒨᖓᔪᓂᒃ.

ᑲᑎᒪᓃᑦ ᐊᒻᒪᓗ ᑲᔪᓯᑎᑦᓯᓂᖅ

5.54 GC-ᑯᑦ ᑲᒪᒋᔭᖃᐃᓐᓇᕆᐊᓖᑦ ᑲᔪᓯᑎᑦᓯᖃᑦᑕᓂᕐᒥᒃ ᐊᐅᓚᑕᐅᔪᓕᒫᓂᒃ ᐱᒋᐊᖅᑎᑕᐅᓯᒪᔪᓂᒃ GC−ᑯᓐᓂᒃ ᑐᖔᓂ ᓄᒃᑎᖅᑕᐅᓂᐅᑉ ᐅᓪᓗᖓᑕ ᒐᕙᒪᑐᖃᒃᑯᑦ ᒪᓕᒐᖏᑎᒍᑦ, ᓄᖅᑲᖅᑎᑕᐅᓯᒪᔪᓂᒃ, ᐊᑐᕆᐊᑐᓐᖏᓐᓂᕋᖅᑕᐅᔪᓂᒃ ᐅᑉᕙᓘᓐᓃᑦ ᑕᐅᖅᓯᖅᑕᐅᔪᓂᒃ ᓄᒃᑎᖅᑕᐅᓂᖓᑕ ᐅᓪᓗᖓᓂ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᒃᑯᑦ, ᓵᖓᓃᑦᑐᑦ ᐃᖅᑲᖅᑐᐃᕖᑦ, ᑭᓯᐊᓂ ᓱᓕ ᐋᖅᑭᑦᑕᐅᒌᕐᓯᒪᓐᖏᑦᑐᑦ ᓄᒃᑎᖅᑕᐅᓂᖓᑕ ᐅᓪᓗᖓᓂ.

5.55 ᓄᒃᑎᖅᑕᐅᓂᖓᑕ ᐅᓪᓗᖓᓂ, GN-ᑯᑦ ᑲᒪᒋᔭᑦᓴᖃᕐᓂᐊᕐᐳᑦ ᓇᓗᓇᐃᕆᓂᕐᒥᒃ ᐱᒋᐊᕐᓂᐊᕐᒪᖔᕐᒥᒃ ᐅᑉᕙᓘᓐᓃᑦ ᑲᔪᓯᑎᑦᓯᑐᐃᓐᓇᓂᐊᕐᒪᖔᕐᒥᒃ ᐊᐅᓚᑦᓯᓂᕐᒥᒃ ᒐᕙᒪᑐᖃᒃᑯᑦ ᒪᓕᒐᖏᑎᒍᑦ ᓄᖅᑲᖅᑎᑕᐅᓯᒪᔪᓂᒃ, ᐊᑐᕆᐊᑐᓐᖏᓐᓂᕋᖅᑕᐅᔪᓂᒃ ᐅᑉᕙᓘᓐᓃᑦ ᑕᐅᖅᓯᖅᑕᐅᔪᓂᒃ ᓄᒃᑎᖅᑕᐅᓂᖓᑕ ᐅᓪᓗᖓᓂ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᒃᑯᑦ. ᐃᑲᔪᖅᑕᐅᖁᓪᓗᒋᑦ GN ᓇᓗᓇᐃᕆᓇᓱᐊᕐᓂᖏᓐᓂ, ᒪᓕᓪᓗᒋᑦ ᑭᒡᓕᖃᖅᑎᑦᓯᒍᑕᐅᔪᑦ ᐊᑐᖅᑕᐅᒋᐊᓕᖕᓂᒃ ᒪᓕᒐᑦᓴᓂᒃ, GC-ᑯᑦ ᑐᓂᓯᒋᐊᓖᑦ GN-ᑯᓐᓄᑦ ᐊᒃᑐᐊᔪᓕᒫᓂᒃ ᑐᓴᐅᒪᔾᔪᑎᒃᓴᓂᒃ ᐊᒻᒪᓗ ᑎᑎᕋᖅᓯᒪᔪᓂᒃ ᐊᒃᑐᐊᔪᓂᒃ ᑖᒃᑯᓄᖓ ᑲᔪᓯᑎᑦᓯᕙᓪᓕᐊᓂᕐᒧᑦ ᐊᐅᓚᑦᑕᐅᓂᖏᓐᓄᑦ.

ᓇᓗᓇᐃᔭᖅᑕᐅᓂᖏᑦ ᐋᖅᑭᑦᓯᒪᔭᐅᓂᖏᓪᓗ ᓄᓇᑦ

8.1 ᐊᔪᕐᓇᕈᓐᓃᑐᐊᕐᐸᑦ ᐊᑎᓕᐅᖅᑕᐅᒌᑐᐊᕐᐸᑦ ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, GC−ᑯᑦ ᐋᖅᑭᑦᓱᐃᒋᐊᓖᑦ ᐊᒻᒪᓗ ᑐᓂᓗᒋᑦ ᐊᓯᖏᓐᓄᑦ ᐱᓇᓱᐊᖃᑕᐅᔪᓄᑦ ᓯᕗᓪᓕᐹᕐᓯᐅᑏᑦ ᑎᑎᕋᖅᑕᐅᓯᒪᔪᑦ ᓄᓇᑦ ᑕᑉᕙᓃᒋᐊᓖᑦ ᓄᓇᑦ ᒪᓕᓪᓗᒋᑦ ᐅᑯᐊ ᐃᓚᖏᑦ ᐊᒻᒪᓗ ᐋᖅᑭᑦᓯᒪᔭᐅᓂᖏᓪᓗ ᓄᓇᑦ ᒐᕙᒪᒃᑯᑦ ᓄᓇᖁᑎᖏᓐᓂ:

1. ᐃᓚᖓ A - ᐊᐅᓚᑕᐅᕕᐅᔪᑦ ᓄᓇᑦ;
2. ᐃᓚᖓ B - ᓄᓇᑦ ᓴᓗᒻᒪᓴᖅᑕᐅᒋᐊᓖᑦ;
3. ᐃᓚᖓ C − ᓴᓗᒻᒪᓴᖅᑕᐅᓯᒪᔪᑦ ᓄᓇᑦ; ᐊᒻᒪᓗ
4. ᐃᓚᖓ D - ᓴᒃᑯᑕᐅᓯᒪᔪᑦ ᓄᓇᑦ, ᐃᓚᒋᔭᐅᓗᑎᒃ ᐊᑐᓂᑦ ᓄᓇᑦ ᑲᔪᓯᑎᑕᐅᓯᒪᔪᑦ ᒪᓕᒐᑦᓴᑎᒍᑦ ᐊᕕᑦᑐᕐᓯᒪᓂᐊᕈᓯᖏᓐᓂ 8.15(a)−ᒥᒃ 8.15(d)−ᒧᑦ.

8.2 ᓯᕗᓪᓕᐹᕐᓯᐅᑏᑦ ᓈᓴᖅᑕᐅᓯᒪᔪᑦ ᓄᓇᑦ ᑲᑎᕐᓱᖅᑕᐅᓯᒪᔪᑦ GC−ᑯᓐᓂᒃ ᑎᑎᕋᖅᓯᒪᓂᖓᒍᑦ 8.1 ᐃᓚᓕᐅᔾᔭᐅᓯᒪᒋᐊᓖᑦ ᐅᑯᐊ ᑐᓴᐅᒪᔾᔪᑎᒃᓴᑦ:

1. ᐊᑐᓂᑦ ᓄᓇᖏᑎᒍᑦ ᑎᑎᕋᖅᑕᐅᓯᒪᔪᓂ ᐃᓚᖓ A − ᐊᐅᓚᑕᐅᕕᐅᔪᑦ ᓄᓇᑦ:
   1. ᓇᓃᓐᓂᖏᑦ ᐊᖏᓂᖏᓪᓗ, ᐊᑐᐃᓐᓇᐅᑉᐸᑕ, ᓄᓇᓄᑦ;
   2. ᓇᐃᓈᕐᓯᒪᔪᓂᒃ ᑐᓴᐅᒪᔾᔪᑎᓂᒃ ᖃᐅᔨᒪᔭᐅᔪᓂᒃ GC−ᑯᓐᓄᑦ ᖃᓄᐃᑦᑑᓂᖓᓂᒃ ᓄᓇᑦ ᐊᑐᖅᑕᐅᓂᖓ ᐱᓕᕆᕕᒋᔭᐅᔪᒥ; ᐊᒻᒪᓗ
   3. ᓇᐃᓈᕐᓯᒪᔪᓂᒃ ᖃᐅᔨᒪᔭᐅᔪᓂᒃ ᓇᓪᓕᐅᒃᑯᒪᔾᔩᒍᑕᐅᓯᒪᔪᓂᒃ ᐴᖅᑕᐅᓯᒪᔪᓂᒃ ᓄᓇᓅᖓᔪᑦ;
2. ᐊᑐᓂᑦ ᓄᓇᓅᖓᔪᑦ ᑎᑎᕋᖅᑕᐅᓯᒪᓂᖏᑎᒍᑦ ᐃᓚᖓᓂ B − ᓄᓇᑦ ᓴᓗᒻᒪᓴᖅᑕᐅᔭᕆᐊᓖᑦ:
   1. ᓇᓃᓐᓂᖏᑦ ᐊᖏᓂᖏᓪᓗ (ᐊᔪᕐᓇᖏᓐᓂᓕᒫᖓᒍᑦ ᑐᓂᔭᐅᓯᒪᔪᑦ) ᓄᓇᓅᖓᔪᑦ;
   2. ᒐᕙᒪᑐᖃᒃᑯᑦ ᓄᓇᖁᑎᖓᓂᒃ ᓇᓗᓇᐃᕐᓯᔾᔪᑎ ᒐᕙᒪᑐᖃᒃᑯᑦ ᓱᕈᓐᓇᖅᑐᓕᓐᓂᒃ ᓄᓇᓂᒃ ᑎᑎᕋᖅᓯᒪᔭᖏᓐᓂ; ᐊᒻᒪᓗ
   3. ᖃᓄᐃᑦᑑᓂᖏᑦ ᐊᓯᐊᒎᕐᕕᒃᓴᖅᑕᖃᕐᐸᑦ ᓴᓗᒻᒪᓴᖅᑕᐅᒋᐊᓕᖕᓄᑦ ᓄᓇᖏᓐᓂ;
3. ᐊᑐᓂᑦ ᓄᓇᖏᓐᓅᖓᔪᓂ ᑎᑎᕋᖅᑕᐅᓯᒪᓂᖏᓐᓂ ᐃᓚᖓ C − ᓴᓗᒻᒪᓴᖅᑕᐅᓯᒪᔪᑦ ᓄᓇᑦ:
   1. ᓇᓃᓐᓂᖏᑦ ᐊᖏᓂᖏᓪᓗ (ᐊᔪᕐᓇᖏᓐᓂᓕᒫᖓᒍᑦ ᑐᓂᔭᐅᓯᒪᔪᑦ) ᓄᓇᖓᓅᖓᔪᓂ;
   2. ᖃᓄᐃᑦᑑᓂᖏᑦ ᐊᓯᐊᒎᕐᕕᒃᓴᖅᑕᖃᕐᐸᑦ ᓴᓗᒻᒪᓴᖅᑕᐅᒋᐊᓕᖕᓄᑦ ᓄᓇᓂ;
   3. ᐆᑦᑐᕋᖅᑕᐅᓯᒪᓂᖏᑕ ᐊᖏᓂᖏᑦ ᓴᓗᒻᒪᓴᖅᑕᐅᒋᐊᓖᑦ ᐊᓯᐊᒎᕐᕕᒃᓴᖏᑎᒍᑦ; ᐊᒻᒪᓗ
   4. ᓇᐃᓈᕐᓯᒪᔪᑦ ᐊᐅᓚᑕᐅᖏᓐᓇᖅᑐᑦ ᓴᓗᒻᒪᓴᖅᑕᐅᓂᖏᑦ ᓄᓇᑦ; ᐊᒻᒪᓗ
4. ᑖᒃᑯᓄᓐᖓᖓᔪᑦ ᐊᑐᓂᑦ ᓄᓇᖏᓐᓄᑦ ᑎᑎᕋᖅᑕᐅᓯᒪᔪᓂ ᐃᓚᖓ D – ᓴᒃᑯᑕᐅᓯᒪᔪᑦ ᓄᓇᑦ:
   1. ᓇᓃᓐᓂᖏᑦ ᐊᖏᓂᖏᓪᓗ, ᐊᑐᐃᓐᓇᐅᑉᐸᑕ; ᐊᒻᒪᓗ
   2. ᑐᓐᖓᕕᒋᔭᐅᔪᖅ ᓇᓗᓇᐃᖅᑕᐅᓯᒪᓂᖓᒍᑦ ᓄᓇ ᓴᒃᑯᑕᐅᓯᒪᔪᓂ ᓄᓇᓂ.

8.3 ᐊᔪᕐᓇᕈᓐᓃᑐᐊᕐᐸᑦ ᐊᑎᓕᐅᖅᑕᐅᒌᑐᐊᕐᐸᑦ ᑖᓐᓇ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ, GC−ᑯᑦ ᑐᓂᓯᒋᐊᓖᑦ ᓯᕗᓪᓕᐹᕐᓯᐅᑎᓂᒃ ᑎᑎᕋᖅᓯᒪᔪᓂᒃ ᓄᓇᓂᒃ GN-ᑯᓐᓄᑦ ᐊᒻᒪᓗ NTI−ᑯᓐᓄᑦ ᕿᒥᕐᕈᔭᒃᓴᖏᓐᓂᒃ ᐊᒻᒪᓗ ᐅᖃᐅᓯᒃᓴᖃᕐᕕᒋᓗᒋᑦ.

8.4 ᑎᑎᕋᖅᑕᐅᓚᐅᖅᑎᓪᓗᒋᑦ ᓯᕗᓪᓕᐹᕐᓯᐅᑏᑦ ᑎᑎᕋᖅᑕᐅᓯᒪᔪᑦ ᓄᓇᑦ ᐱᓇᓱᐊᖃᑎᒌᑦᑐᑦ ᐊᖏᖃᑎᒌᑉᐳᑦ:

1. ᓴᖅᑮᓂᕐᒥᒃ ᐱᔭᕆᐊᑭᓪᓕᑎᕆᔨᓂᒃ, ᐃᓚᒋᔭᐅᓗᑎᒃ ᖃᐅᔨᒪᓂᓖᑦ ᑎᒃᑯᐊᖅᑕᐅᓯᒪᔪᑦ ᐱᓇᓱᐊᖃᑎᒌᑦᑐᓄᑦ, ᓴᖅᑮᔪᒃᓴᒫᖑᓗᑎᒃ ᒪᓕᒐᑦᓴᓂᒃ ᐊᐅᓚᑦᓯᔾᔪᑕᐅᓂᐊᖅᑐᓂᒃ ᐃᖅᑲᓇᐃᔭᐅᑕᐅᓗᑎᓪᓗ ᑲᑐᔾᔨᖃᑎᒌᑦᑐᓄᑦ ᐊᐅᓚᑦᓯᒍᑕᐅᓗᑎᒃ, ᕿᒥᕐᕈᔭᐅᓂᖏᓐᓂᒃ ᐊᒻᒪᓗ ᐅᖃᐅᓯᒃᓴᖃᕐᕕᐅᓂᖏᓐᓂᒃ ᓯᕗᓪᓕᐹᕐᓯᐅᑎᖏᓐᓂ ᑎᑎᕋᖅᑕᐅᓯᒪᔪᓄᑦ ᓄᓇᓄᑦ; ᐊᒻᒪᓗ
2. ᐊᑐᐃᓐᓇᕈᕐᓗᒋᑦ ᐊᓯᖏᓐᓄᑦ ᐱᓇᓱᐊᖃᑕᐅᔪᓄᑦ ᐱᔭᕆᐊᑭᓪᓕᑎᕆᔨᒃᑯᑎᒍᑦ, ᒪᓕᓪᓗᒋᑦ ᓴᖅᑭᕐᓯᒪᔭᖏᑦ ᒪᓕᒐᑦᓴᖏᑦ, ᑐᓴᒪᔭᐅᒋᐊᓕᓕᒫᑦ ᑎᒍᓯᒪᔭᖏᓐᓄᑦ ᐊᐅᓚᑕᖏᓐᓄᓘᓐᓃᑦ ᐊᒃᑐᐊᔪᑦ ᓄᓇᓄᑦ ᑎᑎᕋᖅᓯᒪᔪᓄᑦ ᓯᕗᓪᓕᐹᕐᓯᐅᑎᓂ ᑎᑎᕋᖅᓯᒪᓂᖏᓐᓂ ᓄᓇᑦ, ᐃᓚᒋᔭᐅᓗᑎᒃ ᐱᖅᑯᓯᒃᑯᑦ ᖃᐅᔨᒪᓂᐅᔪᑦ, ᓄᓇᓖᑦ ᐃᓱᒫᓘᑎᖏᑦ, ᑐᓴᐅᒪᔾᔪᑎᒃᓴᑦ ᐊᒃᑐᐊᔪᑦ ᓴᓗᒻᒪᓴᖅᑕᐅᔪᒧᑦ ᐅᑉᕙᓘᓐᓃᑦ ᐅᓗᕆᐊᓇᖅᑐᓕᕆᓂᕐᒧᑦ ᐸᕐᓇᐅᑏᑦ ᐊᒻᒪᓗ ᐊᓯᓕᒫᖏᑦ ᑐᓴᐅᒪᔭᐅᔭᕆᐊᓖᑦ ᖃᐅᔨᒪᔭᐅᔪᑦ ᓄᓇᖏᓐᓅᖓᔪᓂᒃ ᑎᑎᕋᖅᑕᐅᓯᒪᔪᓂ ᑕᒪᒃᑯᓄᖓ ᑎᑎᕋᖅᑕᐅᓯᒪᓂᐅᔪᓄᑦ.

8.5 ᐃᓱᒪᒋᓗᒋᑦ ᑕᐅᖅᓰᒍᑕᐅᔪᑦ ᑐᓴᐅᒪᔾᔪᑎᒃᓴᑦ ᑎᑎᕋᖅᓯᒪᓂᖏᓐᓃᑦᑐᑦ 8.3 ᐊᒻᒪᓗ 8.4, ᓯᕗᓪᓕᐹᕐᓯᐅᑎᓃᑦᑐᑦ ᑎᑎᕋᖅᑕᐅᓯᒪᔪᑦ ᓄᓇᑦ ᐃᒪᐃᓕᐅᕈᑕᐅᓂᐊᕐᐳᑦ, ᐊᑎᓕᐅᖅᑕᐅᓚᐅᓐᖏᓐᓂᖓᓂᒃ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑦ, ᐊᔾᔨᒌᓐᖏᓐᓂᖏᑦ ᐅᑯᑎᒎᓇ ᐋᖅᑭᓱᖅᑕᐅᓗᑎᒃ:

1. GC−ᑯᑦ ᐃᓚᓕᐅᔾᔨᒋᐊᓖᑦ ᓄᓇᒥᒃ ᐃᓚᖓᓄᑦ D − ᓴᒃᑯᑕᐅᓯᒪᔪᓄᑦ ᓄᓇᓄᑦ ᑕᑉᕗᓐᖓᖓᔪᖅ ᓄᓇᒧᑦ:
   1. ᑎᑭᐅᑎᓯᒪᑉᐸᑦ ᒪᓕᒋᐊᓕᖕᓄᑦ ᐊᕕᑦᑐᕐᓯᒪᓂᐊᕈᑎᖏᓐᓂ 8.15(a)-ᒥᒃ 8.15(d)−ᒧᑦ;
   2. ᓄᓇᖓ ᐊᓯᔾᔨᖅᑕᐅᓯᒪᓂᖃᕐᐸᑦ ᐊᐅᓚᑕᐅᓂᕆᓯᒪᔭᖏᓐᓂᒃ ᐊᐅᓚᑕᐅᔪᓂᒃ ᐅᑯᓇᓐᖓᑦ, ᐅᑉᕙᓘᓐᓃᑦ ᕿᒡᒐᑐᐃᔪᓄᑦ, GN−ᑯᓐᓂᒃ; ᐊᒻᒪᓗ
   3. ᐊᐅᓚᑦᓯᕕᒋᔭᐅᑉᐸᑦ ᓄᓇ ᐊᐅᓚᑦᓯᔨᐅᔪᖅ GN−ᑯᓃᓐᖔᕐᓗᓂ ᐅᑉᕙᓘᓐᓃᑦ ᑭᒡᒐᖅᑐᐃᑎᑕᐅᓗᓂ GN-ᑯᓐᓂᒃ;
2. GC-ᑯᓐᓂᒃ ᐲᖅᑕᐅᒋᐊᓕᒃ ᓄᓇ ᐃᓚᖓ D-ᒥᒃ − ᓴᒃᑯᑕᐅᓯᒪᔪᑦ ᓄᓇᑦ ᓄᓇᖓᓅᖓᔪᖅ ᑎᑭᐅᑎᓯᒪᓐᖏᑉᐸᑦ ᒪᓕᒋᐊᓕᖕᓂᒃ ᐊᕕᑦᑐᕐᓯᒪᓂᐊᕈᓯᖏᓐᓄᑦ 8.5(a)(i), 8.5(a)(ii) ᐅᑉᕙᓘᓐᓃᑦ 8.5(a)(iii);
3. GC ᐃᓚᓕᐅᔾᔨᒍᓐᓇᖅᑐᖅ ᓄᓇᒥᒃ ᐃᓚᖓᓄᑦ C − ᓴᓗᒻᒪᓴᖅᑕᐅᓯᒪᔪᑦ ᓄᓇᑦ ᐅᑉᕙᓘᓐᓃᑦ ᐃᓚᖓ B - ᓄᓇᑦ ᓴᓗᒻᒪᓴᖅᑕᐅᒋᐊᓖᑦ;
4. GC ᐃᓚᓕᐅᔾᔨᒋᐊᓖᑦ ᐃᓚᖓᓄᑦ B − ᓄᓇᑦ ᓴᓗᒻᒪᓴᖅᑕᐅᒋᐊᓖᑦ ᕿᒪᐃᓐᓇᒃᑲᑯᓄᑦ ᓄᓇᓄᑦ ᒐᕙᒪᑦ ᓄᓇᖁᑎᖏᓐᓂ ᐊᓯᐊᒎᕐᕕᒃᓴᖃᖅᑎᑕᐅᔪᓂ ᓴᓗᒻᒪᓴᖅᑕᐅᒋᐊᓕᖕᓄᑦ ᐊᑎᓕᐅᖅᑕᐅᓚᐅᓐᖏᓐᓂᖓᓂ ᑖᓐᓇ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑦ;
5. GC ᐃᓚᓕᐅᔾᔨᒍᓐᓇᖅᑐᖅ ᓄᓇᒥᒃ ᐲᖅᓯᓗᓂᓘᓐᓃᑦ ᓄᓇᒥᒃ ᐃᓚᖓᓂᒃ A− ᐊᐅᓚᑦᓯᕕᐅᔪᑦ ᓄᓇᑦ; ᐊᒻᒪᓗ
6. ᐊᓯᓕᒫᖏᑦ ᐊᓯᔾᔨᖅᑕᐅᕈᑕᐅᔪᑦ ᓯᕗᓪᓕᐸᕐᓯᐅᑎᓂ ᑎᑎᕋᖅᓯᒪᔪᓂ ᓄᓇᓂ ᐊᓯᔾᔨᖅᑕᐅᒍᓐᓇᖅᑐᑦ GC−ᑯᓐᓂᒃ ᐊᑎᓕᐅᖅᑕᐅᓯᒪᓗᑎᒃ ᐊᖏᖅᑕᐅᓂᖏᑦ GN-ᑯᓐᓄᑦ.

GC−ᑯᑦ ᖃᐅᔨᒋᐊᕐᕕᖃᕆᐊᓖᑦ ᐊᓯᖏᓐᓂᒃ ᐱᓇᓱᐊᖃᑕᐅᔪᓂᒃ ᐊᓯᔾᔨᕈᑕᐅᖁᔭᐅᔪᓂᒃ ᓯᕗᓪᓕᐹᕐᓯᐅᑎᓄᑦ ᑎᑎᕋᖅᓯᒪᔪᓄᑦ ᓄᓇᓄᑦ ᐅᖃᐅᓯᐅᔪᓄᑦ ᐊᕕᑦᑐᕐᓯᒪᓂᐊᕈᓯᖏᓐᓂ 8.5(a)−ᒥᒃ 8.5(e)−ᒧᑦ.

8.7 ᓯᕗᓪᓕᐹᕐᓯᐅᑎᓂ ᑎᑎᕋᖅᓯᒪᔪᑦ ᓄᓇᑦ, ᐋᖅᑭᒋᐊᕐᓯᒪᔪᑦ ᑎᑎᕋᖅᓯᒪᓂᖓᒍᑦ 8.8 ᐱᐊᓂᒃᑕᐅᓯᒪᒋᐊᓖᑦ ᐊᑎᓕᐅᖅᑕᐅᓚᐅᓐᖏᓐᓂᖏᓐᓂ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑏᑦ, ᐊᒻᒪᓗ ᑐᓐᖓᕕᓕᐊᖑᓯᒪᓗᑎᒃ ᐋᖅᑭᑦᓯᒪᔪᒃᑯᑦ ᐅᐃᒍᓕᐅᔾᔭᐅᒋᐊᓕᖕᓄᑦ ᑖᒃᑯᓄᖓ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓄᑦ.

8.8 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓕᒃ ᐊᔾᔨᒌᓐᖏᒍᑎᓄᑦ, ᐊᔾᔨᐸᓗᒋᓗᓂᐅᒃ ᐋᖅᑭᑦᓯᒪᓂᖓᑕ ᑎᑎᕋᖅᓯᒪᓂᖓᓂ 8.5, ᐋᖅᑭᑦᓯᒪᓂᖏᓐᓂ ᓄᓇᑦ ᐅᖃᐅᓯᐅᔪᑦ ᑎᑎᕋᖅᓯᒪᓂᖓᓂ 8.7 ᐊᑯᓐᓂᖏᓐᓂ ᐊᑎᓕᐅᖅᑕᐅᓂᖓᑕ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑏᑦ ᐊᒻᒪᓗ ᓄᒃᑎᖅᑕᐅᓂᐅᑉ ᐅᓪᓗᖓᑕ.

8.9 ᐊᔪᕐᓇᕈᓐᓃᑐᐊᕐᐸᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑏᑦ, ᑭᓯᐊᓂ ᒥᑦᓯᑎᓐᓅᖏᑦᑐᖅ ᐊᕐᕕᓂᓖᑦ ᑕᖅᑮᑦ ᑐᖔᓂ ᓂᕆᐅᒋᔭᐅᓂᖓᑕ ᓄᒃᑎᕆᓂᕐᒧᑦ ᐅᓪᓗᖅ, ᐋᖅᑭᒋᐊᕐᓯᒪᔪᑦ ᑎᑎᕋᖅᓯᒪᓂᖏᑦ ᓄᓇᑦ ᐱᐊᓂᒃᑕᐅᓯᒪᒋᐊᓖᑦ ᐊᒻᒪᓗ ᑐᓂᔭᐅᓯᒪᓗᑎᒃ ᐊᓯᖏᓐᓄᑦ ᐱᓇᓱᐊᖃᑕᐅᔪᓄᑦ GC−ᑯᓐᓂᒃ. ᐱᐊᓂᒍᑏᑦ ᑎᑎᕋᖅᓯᒪᔪᓄᑦ ᓄᓇᓄᑦ ᑐᓂᔭᐅᒋᐊᓕᒃ GC−ᑯᓐᓂᒃ ᐊᓯᖏᓐᓄᑦ ᐱᓇᓱᐊᖃᑕᐅᔪᓄᑦ ᐊᔪᕐᓇᕈᓐᓃᑐᐊᕐᐸᑦ ᑭᖑᓂᐊᒍᑦ ᓄᒃᑎᖅᑕᐅᓂᖅ ᐅᓪᓗᖓᑕ.

ᒪᓕᒐᖅᑎᒍᑦ ᐊᖏᕈᑕᐅᓯᒪᔪᑦ ᓄᓇᑦ

8.10 ᐱᓇᓱᖃᑎᒌᑦ ᐊᖏᖃᑎᒌᑉᐳᑦ ᒪᓕᒐᖅᑎᒍᑦ ᐊᖏᕈᑕᐅᓯᒪᔪᑦ ᓄᓇᑦ ᐲᖅᑕᐅᓯᒪᒋᐊᖃᕐᓂᖏᓐᓂᒃ ᓄᒃᑎᖅᑕᐅᔪᓂᒃ ᐊᐅᓚᑦᓯᔨᐅᔪᓂᒃ ᐊᒻᒪᓗ ᐊᐅᓚᑕᐅᔪᓂᒃ ᐅᖃᐅᓯᐅᔪᓂ ᑎᑎᕋᖅᓯᒪᓂᖓᓂ 5.1 ᐊᒻᒪᓗ ᑕᐃᒪᐃᒻᒪᑦ ᐊᑐᕆᐊᑐᓐᖏᑦᑐᑦ ᒪᓕᓪᓗᒋᑦ ᑖᒃᑯᐊ ᐊᖏᕈᑕᐅᒋᐊᓐᖓᖅᑐᑦ ᐅᑉᕙᓘᓐᓃᑦ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑏᑦ.

ᐱᓕᕆᐊᒃᓴᑦ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ

8.11 ᐱᓇᓱᐊᖃᑎᒌᑦᑐᑦ ᐋᖅᑭᑦᓱᐃᒋᐊᓖᑦ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓂᒃ ᓴᓂᕐᕙᐃᓂᕐᒥᒃ ᐱᓕᕆᐊᒃᓴᓂᒃ ᐊᐅᓚᑦᓯᔨᖏᓐᓄᑦ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᐱᓇᓱᐊᖃᑎᒌᑦᑐᓕᒫᓄᑦ ᐊᑐᕐᓗᒋᑦ ᐅᑯᐊ ᑐᓐᖓᕕᓕᐊᖑᓯᒪᔪᑦ:

1. GC-ᑯᑦ ᐱᓕᕆᐊᒃᓴᖏᑦ ᐊᐅᓚᑦᓯᓂᖅ ᐊᒃᑐᖅᑕᐅᓯᒪᔪᓂᒃ ᓄᓇᓂᒃ ᒐᕙᒪᒃᑯᑦ ᓄᓇᖁᑎᖏᓐᓂ ᐊᑕᖏᖅᑐᑎᒃ ᓴᖅᑭᖅᑕᐅᓯᒪᔪᓂᒃ ᑐᖔᓂ ᓄᒃᑎᖅᑕᐅᓂᐅᑉ ᐅᓪᓗᖓᑕ; ᐊᒻᒪᓗ
2. GN−ᑯᑦ ᐱᓕᕆᐊᒃᓴᖏᑦ ᐊᐅᓚᑦᓯᓂᖅ ᐊᒃᑐᖅᑕᐅᓯᒪᔪᓂᒃ ᓄᓇᓂᒃ ᒐᕙᒪᒃᑯᑦ ᓄᓇᖁᑎᖏᓐᓂ ᐊᑕᖏᖅᑐᑎᒃ ᓴᖅᑭᖅᑕᐅᓯᒪᔪᓂᒃ ᑐᖔᓂ ᓄᒃᑎᖅᑕᐅᓂᐅᑉ ᐅᓪᓗᖓᑕ.

8.12 ᐊᐅᓚᑦᓯᔪᓐᓇᐅᑎᓂ ᐊᖏᖃᑎᒌᒍᑎᓂ ᐊᒃᑐᐃᓂᖃᔾᔮᖏᓚᖅ ᐊᑭᓖᑎᑦᓯᒍᑎᓂᒃ, ᐱᓇᓱᐊᒐᑦᓴᓂᒃ ᐅᑉᕙᓘᓐᓃᑦ ᐱᓕᕆᐊᒃᓴᓂᒃ ᑭᓇᑐᐃᓐᓇᕐᒧᑦ, ᐊᓯᖏᓐᓂᒃ ᐱᓇᓱᐊᖃᑕᐅᔪᑦ, ᐊᐅᓚᑦᓯᓂᕐᒥᒃ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ.

8.13 ᑕᐃᒪᐃᒃᑲᓗᐊᖅᑎᓪᓗᒍ ᑎᑎᕋᖅᓯᒪᔪᑦ ᑖᒃᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐅᑉᕙᓘᓐᓃᑦ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑏᑦ, GC−ᑯᑦ ᐱᓕᕆᐊᒃᓴᕆᓐᖏᑕᖓ ᓴᓗᒻᒪᕐᓴᐃᓂᕐᒧᑦ ᐊᓯᔾᔨᕈᑕᐅᔪᓂᒃ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᐅᓚᑕᐅᓂᖏᑎᒍᑦ ᐊᐅᓚᑕᐅᔪᓂᒃ ᑖᒃᑯᓄᖓ ᐅᑉᕙᓘᓐᓃᑦ ᑭᒡᒐᑐᖅᑕᐅᔪᓂᒃ GN−ᑯᓐᓄᑦ; ᐊᒻᒪᓗ GN−ᑯᑦ ᐱᓕᕆᐊᒃᓴᖃᔾᔮᖏᑦᑐᑦ ᓴᓗᒻᒪᕐᓴᐃᓂᕐᒧᑦ ᐊᓯᔾᔨᕈᑕᐅᔪᓂᒃ ᒐᕙᒪᒃᑯᑦ ᓄᓇᖁᑎᖏᓐᓂ ᐊᐅᓚᑕᐅᓂᖏᑎᒍᑦ ᐊᐅᓚᑕᐅᔪᓂᒃ ᑖᒃᑯᓄᖓ ᐅᑉᕙᓘᓐᓃᑦ ᑭᒡᒐᑐᖅᑕᐅᔪᓂᒃ GC−ᑯᓐᓂᒃ.

8.14 ᐊᐅᓚᑦᓯᔪᓐᓇᐅᑎᓂ ᐊᖏᖃᑎᒌᒍᑎᓂ ᐊᒃᑐᐃᓂᖃᔾᔮᖏᓚᖅ ᐊᑭᓖᑎᑦᓯᒍᑎᓂᒃ, ᐱᓇᓱᐊᒐᑦᓴᓂᒃ ᐅᑉᕙᓘᓐᓃᑦ ᐱᓕᕆᐊᒃᓴᓂᒃ ᐱᓇᓱᐊᖃᑎᒌᑦᑐᓄᑦ ᑖᒃᑯᓄᓐᖓᖓᔪᓂᒃ ᓄᓇᓄᑦ ᒐᕙᒪᒃᑯᑦ ᓄᓇᖁᑎᖏᓐᓃᖏᑦᑐᓄᑦ.

8.15 ᑕᐃᒪᐃᒃᑲᓗᐊᖅᑎᓪᓗᒍ ᑎᑎᕋᖅᓯᒪᔪᑦ ᑖᒃᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐅᑉᕙᓘᓐᓃᑦ ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑏᑦ, GN−ᑯᑦ ᐱᓕᕆᐊᕆᓂᐊᖅᑕᖓ ᓴᓗᒻᒪᕐᓴᐃᓂᕐᒧᑦ ᐊᓯᔾᔨᕈᑕᐅᔪᓂᒃ ᕿᒪᐃᓐᓇᒃᑲᑯᓂ ᓄᓇᓂ ᓴᖅᑭᖅᑐᓂᒃ ᐱᓕᕆᕕᐅᓂᖏᓐᓂᒃ ᐅᑉᕙᓘᓐᓃᑦ ᐱᓕᕆᐊᖑᔪᓂᒃ ᐊᐅᓚᑦᓯᔨᓕᒥᓂᐅᑎᓪᓗᒍ ᓄᒃᑎᖅᑕᐅᓂᖓᑕ ᐅᓪᓗᖓᓂ:

1. ᐊᖏᖅᑕᐅᒋᐊᓐᖓᕈᑎᒥᓂᖓ ᐱᕙᓪᓕᐊᑎᑕᐅᔪᒧᑦ ᐱᓕᕆᐊᒧᓪᓘᓐᓃᑦ ᐱᔾᔪᑎᖃᕐᓂᕐᐸᑦ ᐅᑯᓂᖓ:
   1. ᐊᕙᑎ ᖃᐅᔨᓴᖅᑕᐅᓂᖓᓄᑦ ᑲᑎᒪᔨᖏᓐᓂᒃ ᕿᒥᕐᕈᔭᐅᓂᖓ ᐊᕙᑎᒥᒃ ᖃᐅᔨᓴᕐᓂᕐᒧᑦ ᐊᒻᒪᓗ ᕿᒥᕐᕈᔭᐅᓂᐊᕐᓂᖓᓄᑦ ᐊᑐᐊᕐᓯᔾᔪᑎᒃᑯᑦ ᑎᓕᓯᔾᔪᑏᑦ, ᔫᓂ 21, 1984;
   2. ᖃᐅᔨᓴᕐᓂᖓ ᕿᒥᕐᕈᓂᕐᒧᑦ ᑲᑎᒪᔩᑦ ᐅᑉᕙᓘᓐᓃᑦ ᑲᑐᔾᔨᔪᓄᑦ ᕿᒥᕐᕈᓂᕐᒧᑦ ᑲᑎᒪᔩᑦ, ᐅᑉᕙᓘᓐᓃᑦ ᐊᑕᖏᕐᓗᒍ ᖃᐅᔨᓴᕐᓂᖅ ᑖᒃᑯᑎᒎᓇ ᑲᓇᑕᒥ ᐊᕙᑎᒥᒃ ᖃᐅᔨᓴᕐᓂᕐᒧᑦ ᐱᖁᔭᖅ (ᑲᓇᑕ);
   3. ᐊᕙᑎ ᖃᐅᔨᓴᖅᑕᐅᓂᖓ, ᖃᐅᔨᓴᖅᑕᐅᓂᖓ ᕿᒥᕐᕈᔩᑦ ᑲᑎᒪᔨᖏᓐᓄᑦ ᐅᑉᕙᓘᓐᓃᑦ ᑲᑐᔾᔨᔪᓄᑦ ᕿᒥᕐᕈᓂᕐᒧᑦ ᑲᑎᒪᔩᑦ, ᑖᒃᑯᑎᒎᓇ ᑲᓇᑕᒥ ᐊᕙᑎᒥᒃ ᖃᐅᔨᓴᕐᓂᕐᒧᑦ ᐱᖁᔭᖅ (2012) (ᑲᓇᑕ);
   4. ᖃᐅᔨᓇᓱᐊᖅᑕᐅᓂᖓ ᐊᑐᕐᓗᒍ ᐃᓚᖓ 4 ᐃᓛᒃᑯᑦ 12 ᓄᓇᕗᒻᒥ ᐊᖏᕈᑎᓂ ᐅᑉᕙᓘᓐᓃᑦ ᕿᒥᕐᕈᓂᖅ ᐊᑐᕐᓗᒍ ᐃᓚᖓ 5 ᐃᓚᖓ 6−ᓘᓐᓃᑦ ᐃᓛᒃᑯᑦ 12 ᓄᓇᕗᒻᒥ ᐊᖏᕈᑎᓂ; ᐅᑉᕙᓘᓐᓃᑦ
   5. ᖃᐅᔨᓇᓱᐊᖅᑕᐅᓂᖓ ᐅᑉᕙᓘᓐᓃᑦ ᕿᒥᕐᕈᔭᐅᓂᖓ ᐃᓛᖓ 3-ᖓᒍᑦ ᓄᓇᕗᒻᒥ ᐸᕐᓇᓐᓂᕐᒧᑦ ᐊᒻᒪᓗ ᐱᓕᕆᐊᓂᒃ ᖃᐅᔨᓴᕐᓂᕐᒧᑦ ᐱᖁᔭᖅ (ᑲᓇᑕ);
2. ᐊᖏᖅᑕᐅᓚᐅᖅᑐᑦ ᐃᓚᖓ 1-ᖓᒍᑦ ᓄᓇᕗᒻᒥ ᐃᒪᖏᓐᓂᒃ ᐊᒻᒪᓗ ᓄᓇᕗᒻᒥ ᓄᓇᐅᑉ ᖄᖓᓄᑦ ᐱᔪᓐᓇᐅᑎᓂᒃ ᐋᖅᑭᒋᐊᒃᑲᐃᔩᑦ ᐱᖁᔭᖓ 43 (ᑲᓇᑕH;
3. ᓇᓪᓕᐅᒃᑯᒪᔾᔨᖅᑕᐅᓯᒪᓂᖏᓐᓂᒃ ᐅᓄᕐᓂᖏᑦ ᓇᓗᓇᐃᖅᑕᐅᔪᑦ ᐊᐅᓚᑕᐅᓂᖏᓐᓂ ᐊᕕᑦᑐᕐᓯᒪᓂᐊᕈᓯᒃᑯᑦ 8:15(a) ᖁᓛᓃᑦᑐᓂ ᓴᖅᑭᖅᑕᐅᓯᒪᔪᑦ; ᐊᒻᒪᓗ
4. ᓱᓇᒃᑯᑖᒃᑰᖓᑎᓪᓗᒋᑦ ᐊᑐᖅᑕᐅᒋᐊᓕᓐᓂᒃ ᒪᓕᒐᕐᓂᒃ, ᐊᐅᓚᑦᓯᔾᔪᑎᓂᒃ, ᐱᔪᓐᓇᐅᑎᓂᒃ ᓚᐃᓴᓂᓪᓗ ᐊᒃᑐᐊᔪᓂᒃ ᐃᓯᕐᓗᓐᓄᑦ, ᓄᓇᒥᒃ ᐊᑐᕐᓂᕐᒧᑦ ᐅᑉᕙᓘᓐᓃᑦ ᐃᒥᕐᒥᒃ ᐊᑐᕐᓂᕐᒧᑦ ᓄᒃᑎᖅᑕᐅᓂᖓᑕ ᐅᓪᓗᖓᓂ.

ᓴᓗᒻᒪᓴᖅᑕᐅᓂᖓᓄᑦ ᓄᓇ ᐊᑐᖅᑕᐅᖃᑦᑕᓲᑦ

8.16 ᓴᓗᒻᒪᓴᖅᑕᐅᓂᖓᓄᑦ ᓄᓇ GC−ᑯᑦ ᐱᓕᕆᐊᒃᓴᖓᒍᑦ ᐊᐅᓚᑦᓯᔪᓐᓇᐅᑎᓄᑦ ᐊᖏᖃᑎᒌᒍᑎᒃᑯᑦ ᐃᒪᐃᒋᐊᓕᒃ, ᓯᕗᓪᓕᕐᐹᒥ, ᑐᓐᖓᕕᖃᕐᓗᓂ ᑖᒃᑯᓂᖓ ᐊᑐᖅᑕᐅᖃᑦᑕᓲᓂᒃ ᐃᓗᓕᖏᓐᓂᒃ ᐊᑐᖅᑕᐅᒋᐊᓕᓐᓂ ᒐᕙᒪᑐᖃᒃᑯᑦ ᒪᓕᒐᖏᓐᓂ ᑖᒃᑯᓄᓐᖓᖓᔪᓂᒃ ᓱᕈᓐᓇᖅᑐᓄᑦ ᐊᕙᑎᒧᑦ, ᐃᓗᓯᕐᒧᑦ ᐅᑉᕙᓘᓐᓃᑦ ᐊᑦᑕᓇᐃᕐᓯᒪᓂᕐᒧᑦ ᐊᑐᖅᑕᐅᖃᑦᑕᓲᑦ ᓴᖅᑭᐅᒪᓂᖏᑎᒍᑦ, ᓴᖅᑭᐅᒪᖃᑦᑕᕐᓯᒪᔪᓄᑦ, ᓄᓇ ᓴᓗᒻᒪᓴᖅᑕᐅᑎᓪᓗᒍ, ᐅᑉᕙᓘᓐᓃᑦ ᓴᓗᒻᒪᓴᖅᑕᒥᓂᐅᑎᓪᓗᒍ, ᐊᐅᓚᑕᐅᓪᓗᓂ.

8.17 ᑕᑉᕗᖓ ᐊᑐᖅᑕᐅᖃᑦᑕᓲᓂᒃ ᐱᑕᖃᓐᖏᑉᐸᑦ ᐅᖃᐅᓯᐅᔪᓂᒃ ᑎᑎᕋᖅᓯᒪᓂᖓᓂ 8.16 ᐱᑕᖃᕐᐸᑦ, ᐱᑕᖃᕐᓂᐸᓪᓘᓐᓃᑦ, ᓄᓇ ᓴᓗᒻᒪᓴᖅᑕᐅᑎᓪᓗᒍ GC−ᑯᑦ ᐱᓕᕆᐊᒃᓴᖏᑎᒍᑦ, ᓴᓗᒻᒪᓴᖅᑕᒥᓂᐅᑎᓪᓗᒍᓘᓐᓃᑦ, ᐊᐅᓚᑕᐅᓗᓂ, ᑕᒪᓐᓇ ᓴᓗᒻᒪᕐᓴᐃᓂᖅ ᓄᓇᒥᒃ ᐃᒪᐃᒋᐊᓕᒃ, ᐅᑉᕙᓘᓐᓃᑦ ᐃᒪᐃᑦᑐᒥᓂᐅᒋᐊᓕᒃ, ᐊᑐᖅᑕᐅᓗᑎᒃ ᑖᒃᑯᐊ ᐊᑐᖅᑕᐅᖃᑦᑕᓲᑦ ᐃᓗᓕᖏᓐᓂ ᐅᑯᓇᓂ:

1. (a) CCME ᐊᑐᐊᕐᓯᔾᔪᑏᑦ ᑲᑐᔾᔨᒍᑕᐅᓗᑎᒃ ᐅᓗᕆᐊᓇᖅᑐᒥᒃ ᖃᐅᔨᓴᕐᓂᕐᒧᑦ ᐋᖅᑭᑦᓯᒪᔭᐅᔪᑦ ᐊᑐᐊᕐᓯᔾᔪᑎᓃᑦᑐᑦ, ᐅᑉᕙᓘᓐᓃᑦ
2. AMSRP.

8.18 ᓄᓇᒥᒃ ᓴᓗᒻᒪᕐᓴᐃᓂᕐᒨᖓᔪᑦ ᐊᐅᓚᑕᐅᔪᑦ GC−ᑯᓐᓂᒃ ᑭᖑᓂᐊᒍᑦ ᓄᒃᑎᖅᑕᐅᓂᐅᑉ ᐅᓪᓗᖓᑕ, ᑐᕌᖓᔪᓂᒃ ᐱᑕᖃᓐᖏᑉᐸᑦ ᐊᑐᖅᑕᐅᖃᑦᑕᓲᓂᒃ ᐅᖃᐅᓯᐅᔪᓂᒃ ᑎᑎᕋᖅᓯᒪᓂᖏᓐᓂ 8.16 ᐊᒻᒪᓗ 8.17 ᐱᑕᖃᕐᐸᑦ, ᐅᑉᕙᓘᓐᓃᑦ ᐱᑕᖃᓂᕐᐸᑦ, ᓴᓗᒻᒪᓴᖅᑕᐅᑎᓪᓗᒍ ᓄᓇ GC-ᑯᑦ ᐱᓕᕆᐊᒃᓴᖓᒍᑦ, ᐅᑉᕙᓘᓐᓃᑦ ᓴᓗᒻᒪᓴᖅᑕᒥᓂᐅᑉᐸᑦ, ᐊᐅᓚᑕᐅᓗᓂ, ᐊᓱᐃᓛᒃ ᐊᑐᖅᑕᐅᒋᐊᓖᑦ ᐃᓗᓕᖏᓐᓃᑦᑐᑦ ᑐᕌᖓᔪᑦ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒥ ᒪᓕᒐᕐᓂ ᑖᒃᑯᓄᓐᖓᖓᔪᑦ ᓱᕈᓐᓇᖅᑐᓂᒃ ᐊᕙᑎᒧᑦ, ᐃᓗᓯᕐᒧᑦ ᐅᑉᕙᓘᓐᓃᑦ ᐊᑦᑕᓇᐃᕐᓯᒪᓂᕐᒧᑦ ᓲᕐᓗ ᐊᑐᖅᑕᐅᖃᑦᑕᓲᑦ ᐱᑕᖃᕐᐸᑕ ᓴᓗᒻᒪᓴᖅᑕᐅᑎᓪᓗᒍ, ᓴᓗᒻᒪᓴᖅᑕᒥᓂᐅᑎᓪᓗᒍᓘᓐᓃᑦ, ᐊᐅᓚᑕᐅᓂᖓ ᐊᑐᕆᐊᖃᕐᐳᖅ.

8.19 ᐱᑕᖃᓐᖏᑉᐸᑕ ᐊᑐᖅᑕᐅᒋᐊᖃᓲᑦ ᐅᖃᐅᓯᐅᔪᑦ ᑎᑎᕋᖅᓯᒪᓂᖏᓐᓂ 8.16, 8.17 ᐊᒻᒪᓗ 8.18 ᐊᑐᖅᑕᐅᒋᐊᖃᓲᑦ ᐊᑐᖅᑎᑕᐅᔪᑦ ᐊᖏᕈᑕᐅᓯᒪᒋᐊᓖᑦ GC−ᑯᓐᓂᒃ ᐊᒻᒪᓗ GN−ᑯᓐᓂᒃ ᑐᓴᕋᓱᐊᕐᕕᐅᓚᐅᖅᑎᓪᓗᒋᑦ NTI-ᑯᑦ.

8.20 ᓄᓇ ᓴᓗᒻᒪᓴᖅᑕᐅᓂᖓ GC−ᑯᓐᓂᒃ ᐱᓕᕆᐊᒃᓴᐅᑎᓪᓗᒍ DND-DEW ᓈᓚᑉᕕᒥᓂᕐᓂ ᐃᒪᐃᒋᐊᓕᒃ, ᐃᒪᐃᓯᒪᒋᐊᓕᓪᓘᓐᓃᑦ, ᐊᐅᓚᑕᐅᓯᒪᓗᓂ ᒪᓕᓪᓗᒋᑦ DND-NTI DEW ᓈᓚᑉᕕᒥᓂᕐᓄᑦ ᐊᕙᑎᒧᑦ ᐊᖏᖃᑎᒌᒍᑎᒃᑯᑦ.

8.21 ᐊᐅᓚᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓕᒃ GC−ᑯᑦ ᐊᒻᒪᓗ GN-ᑯᑦ ᑐᓴᕋᓱᐊᖃᑎᒌᒋᐊᖃᕐᓂᖓ ᐃᖕᒥᓐᓄᑦ ᐊᒻᒪᓗ NTI- ᑯᓐᓂᒃ ᓴᖅᑭᖅᑕᐅᖏᓐᓂᖓᓂ ᒪᓕᒐᖅ ᐊᑐᓕᖅᑕᐅᒋᐊᓕᒃ ᐅᑉᕙᓘᓐᓃᑦ ᐊᔾᔨᒌᓐᖏᑦᑐᑦ ᐊᑐᖅᑕᐅᒋᐊᓖᑦ ᐊᑐᕋᑦᓴᑦ ᓄᓇ ᓴᓗᒻᒪᓴᖅᑕᐅᓂᖓᓄᑦ.

ᐊᐅᓚᑦᓯᕕᐅᔪᑦ ᓄᓇᑦ

8.22 ᐊᐅᓚᑦᓯᔪᓐᓇᐅᑎᓄᑦ ᐊᖏᖃᑎᒌᒍᑎᓃᒋᐊᓖᑦ GC−ᑯᓐᓂᒃ ᐃᕐᖐᓐᓇᖅ ᓴᒃᑯᑕᐅᒋᐊᖃᕋᓱᒋᔭᐅᔪᑦ ᐱᓇᓱᐊᒐᑦᓴᓂᒃ ᐊᐅᓚᑦᓯᕕᒋᔭᐅᔪᓂᒃ ᓄᓇᓂᒃ ᐊᒻᒪᓗ ᑖᓐᓇ ᓄᓇ ᓴᒃᑯᑕᐅᓯᒪᔪᓃᓪᓗᓂ ᓄᓇᖓ ᓯᕗᓪᓕᐅᓗᓂ ᐅᑯᓇᓐᖓᑦ:

1. ᐅᐃᒍᔭᐅᒍᑎᖓ ᓄᑖᓐᖑᕆᐊᖅᑕᐅᒍᑎᖓᓘᓐᓃᑦ ᐊᑐᖅᑐᐊᕈᑎ, ᓚᐃᓴ, ᐱᔪᓐᓇᐅᑦ ᐅᑉᕙᓘᓐᓃᑦ ᐊᓯᐊᓄᑦ ᐱᔪᓐᓇᐅᑎᒧᑦ ᐅᑉᕙᓘᓐᓃᑦ ᐱᔪᒪᔭᐅᔪᒧᑦ ᐊᐅᓚᑦᓯᕕᐅᔪᒧᑦ ᓄᓇᒧᑦ ᓄᒃᑎᖅᑕᐅᓂᖓᑕ ᐅᓪᓗᖓᓂ GN-ᑯᑦ ᐱᔪᓐᓇᐅᑎᖃᕐᕕᒋᔭᖓᒍᑦ ᐅᐃᒍᓯᓂᕐᒥᒃ ᓄᑖᓐᖑᕆᐊᕆᓂᕐᒥᓘᓐᓃᑦ ᐊᑐᖅᑐᐊᕈᑎᒥᒃ, ᓚᐃᓴ, ᐱᔪᓐᓇᐅᑦ ᐅᑉᕙᓘᓐᓃᑦ ᐊᓯᐊᒍᑦ ᐱᔪᓐᓇᐅᑎᒃᑯᑦ ᐱᔪᒪᔭᐅᔪᒃᑯᓘᓐᓃᑦ; ᐅᑉᕙᓘᓐᓃᑦ
2. 7-ᖓᓂ ᐊᕐᕌᒍᖃᓕᕐᓂᖓᓂ ᓄᒃᑎᖅᑕᐅᓂᖓᑕ ᐅᓪᓗᖓ.

8.23 ᑎᑎᕋᖅᓯᒪᓂᖓᒍᑦ 8.22 ᐃᒪᐃᑉᐸᑦ:

1. ᐊᐅᓚᑦᓯᕕᐅᔪᖅ ᓄᓇ ᒐᕙᒪᒃᑯᑦ ᓄᓇᖁᑎᖓᓐᓃᑦᑐᖅ ᕿᒪᒃᑕᐅᒃᐸᑦ ᐃᓄᖃᕈᓃᕐᓗ; ᐅᕝᕙᓘᓐᓃᑦ
2. ᐊᐅᓚᑦᓯᕕᐅᔪᕕᓂᖅ ᓄᓇ ᒐᕙᒪᒃᑯᑦ ᓄᓇᖁᑎᖓᓐᓂ ᕿᒪᒃᑕᐅᒃᐸᑦ ᐃᓄᖃᕈᓐᓃᕐᓗᓂ; ᐅᕝᕙᓘᓐᓃᑦ
3. ᑮᓇᐅᔭᐃᕈᑎᒃᐸᑦ ᑖᓐᓇ ᐊᐅᓚᑕᐅᔪᖅ ᒐᕙᒪᒃᑯᑦ ᓄᓇᖁᑎᖓᓐᓂ ᑮᓇᐅᔭᐃᕈᑎᓂᖓᓄᑦ ᓄᖅᑲᖅᑐᕕᓂᐅᓗᓂ ᕿᒪᒃᑕᐅᓗᓂ ᓄᓇ;

ᑕᐃᒪᓕ, ᕿᒪᒃᑕᐅᒃᐸᑦ ᐃᓄᖃᕈᓐᓃᕐᓗᓂ ("ᕿᒻᒪᑯ ᐊᐅᓚᑦᓯᕕᐅᔪᕕᓂᖅ ᓄᓇ"), ᑲᓇᑕᐅᑉ ᒐᕙᒪᒃᑯᖏᑕ ᐊᑭᓕᕆᐊᖃᕋᔭᖅᑕᖓ ᓴᓗᒻᒪᖅᓴᖅᑕᐅᓂᖓᑕ ᕿᒻᒪᑯ ᐊᐅᓚᑦᑎᕕᐅᔪᕕᓂᖅ ᓄᓇ ᐃᓱᒪᓕᐅᕈᑕᐅᓗᓂ ᒪᓕᒃᑕᐅᓗᑎᒃ ᐃᓚᖓᓂ ᑎᑎᕋᖅᓯᒪᓂᖓᓂ ᓈᓴᐅᑎᖏᑦ ᐱᒋᐊᕐᓗᒍ 8.39 ᑎᑭᓪᓗᒍ 8.50.

8.24 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᑐᓂᓯᔭᕆᐊᖃᖅᑐᖅ ᓄᓇᕗᑦ ᒐᕙᒪᒃᑯᖏᓐᓂᒃ ᐱᓕᕆᔭᕆᐊᖃᖅᑐᑦ ᐊᒃᓱᕈᕐᓗᑎᒃ ᐃᓘᓐᓇᒋᑦ ᐊᑐᕋᓱᐊᕐᓗᒋᑦ ᐱᓕᕆᔪᓐᓇᖅᑕᖏᑦ (ᐱᖃᓯᐅᑎᓪᓗᒍ ᐱᖁᔭᕐᔪᐊᖅᑎᒍᑦ ᐊᑐᕆᐊᖃᕈᑎᒃ ᐊᑐᕐᓂᕐᒥᒃ) ᐊᑐᐃᓐᓇᐅᔪᓂᒃ, ᐅᑎᖅᑎᑦᓯᖁᓪᓗᒋᑦ ᐊᑭᓕᒃᓴᕆᔭᐅᔪᓂᒃ ᐅᕝᕙᓘᓐᓃᑦ ᐊᑭᓕᖅᑕᐅᖁᓪᓗᒋᑦ ᑮᓇᐅᔭᓂᑦ ᐊᑐᐃᓐᓇᐅᔪᓂᑦ, ᑕᐃᒪᓕ ᑮᓇᐅᔭᐃᕈᑎᓗᓂ ᓄᖅᑲᖅᐸᓪᓕᐊᓕᖅᐸᑦ ᐊᐅᓚᑕᐅᓚᐅᖅᑐᖅ ᓄᓇ ᐅᕝᕙᓘᓐᓃᑦ ᕿᒻᒪᑰᔪᖅ ᐊᐅᓚᑦᓯᕕᐅᔪᕕᓂᖅ ᓄᓇ.

8.25 ᑕᐃᒪᓕ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐃᓱᒪᓕᐅᕐᓂᖅᐸᑕ ᑐᐊᕕᕐᓇᕐᓂᖓᓂᒃ ᐅᕝᕙᓘᓐᓃᑦ ᐱᓕᕆᔭᐅᔭᕆᐊᖃᖅᐸᑦ, ᐊᖏᖃᑎᒌᒍᑎᓕᐅᕈᓐᓇᖅᑐᑦ ᐱᔪᓐᓇᖁᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᐊᑭᓕᒃᓴᕆᔭᐅᔪᓂᒃ ᐱᒐᓱᐊᕈᓐᓇᕐᓂᐊᕐᒪᑕ ᐊᑭᓕᖅᑕᐅᖁᓪᓗᒋᑦ ᓄᓇᕗᑦ ᒐᕙᒪᒃᑯᖏᑦ ᐅᕝᕙᓘᓐᓂᑦ ᑮᓇᐅᔭᑦ ᐊᑐᐃᓐᓇᐅᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ ᓄᖑᑎᑕᐅᓕᖅᑎᓪᓗᒍ ᐊᐅᓚᑕᐅᓚᐅᖅᑐᖅ.

8.26 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᑦ ᐱᔪᓐᓇᖅᓯᑐᐊᖅᐸᑕ ᐊᑭᓕᖅᓯᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐅᓄᕐᓂᖃᖅᑐᓂᒃ ᐊᔾᔨᖏᓐᓂᒃ ᐊᑭᓕᒃᓴᕆᔭᐅᓚᐅᖅᑐᓄᑦ ᐊᑭᓕᐅᑕᐅᔪᓂᑦ ᐅᕝᕙᓘᓐᓃᑦ ᑮᓇᐅᔭᓂᒃ ᐱᔭᐅᔪᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ ᕿᒪᒃᑕᐅᑎᓪᓗᒍ ᐊᐅᓚᑦᓯᕕᐅᓚᐅᖅᑐᖅ ᓄᓇ ᑕᐃᒪᐃᓐᓂᖓᓄᑦ ᓄᓇ ᓴᓗᒻᒪᖅᓴᖅᑕᐅᔭᕆᐊᖃᓕᓚᐅᕐᓂᖓᓄᑦ ᕿᒪᒃᑕᐅᓚᐅᖅᓯᒪᓂᖓᓄᑦ ᐊᐅᓚᑦᓯᕕᐅᓚᐅᖅᑐᖅ ᓄᓇᒋᔭᐅᔪᕕᓂᖅ ᑲᓇᑕᐅᑉ ᒐᕙᒪᒃᑯᖏᑦ ᐊᑭᓕᖅᓯᔭᕆᐊᖃᖅᑐᑦ ᒪᓕᒡᑕᐅᓗᑎᒃ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ, ᐃᓚᓐᖓᕐᓗᒍ ᑐᕋᐃᓐᓇᖅᑐᒃᑯᑦ ᐊᑭᓕᖅᑕᐅᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐅᑎᖅᑎᑦᓯᒐᓱᐊᖅᑎᓪᓗᒋᑦ ᐊᑭᓕᒃᓴᕆᔭᐅᔪᒥᒃ ᐅᕝᕙᓘᓐᓃᑦ ᑮᓇᐅᔭᓕᐅᖅᑎᓪᓗᒋᑦ ᐱᓕᕆᔭᐅᓂᖓᓄᑦ.

8.27 ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᐅᔪᖅ ᑐᓂᓯᔭᕆᐊᖃᖅᑐᖅ ᓄᓇᕗᑦ ᒐᕙᒪᒃᑯᖏᓐᓄᑦ ᐱᔪᓐᓇᖅᓯᑐᐊᖅᐸᑕ ᐊᑭᓕᖅᓯᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐅᓄᕐᓂᖃᕐᓗᑎᒃ ᐊᔾᔨᖏᓐᓂᒃ ᑐᖅᑯᖅᑕᐅᓯᒪᔪᑦ ᑐᕌᖓᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᐅᔪᑦ ᐊᒻᒪ ᐊᒃᑐᐊᓂᖃᖅᑐᑦ ᓴᓗᒻᒪᖅᓴᐃᓂᕐᒧᑦ ᐱᓕᕆᐊᕆᔭᕆᐊᖃᖅᑕᖏᓐᓄᑦ ᒪᓕᒡᓗᒋᑦ ᕿᒻᒪᑯ ᓄᓇ ᐊᐅᓚᑦᓯᕕᐅᔪᕕᓂᖅ ᐃᓱᒪᓕᐅᕈᑕᐅᓐᓂᖅᐸᑦ ᓄᑖᖑᓗᓂ ᐊᐅᓚᑦᓯᕕᐅᓂᐊᓕᕐᓂᖓᓂ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᒪᓕᒡᓗᒍ ᐃᓚᖓᓂ ᑎᑎᕋᖅᓯᒪᓂᖏᓐᓂ 8.42, 8.47 ᐅᕝᕙᓘᓐᓃᑦ 8.65

8.28 ᑕᐃᒪᓕ ᐅᑎᖅᑎᑦᓯᓂᖅᐸᑕ ᒪᓕᒡᓗᒋᑦ ᐃᓚᖓᓂ ᑎᑎᕋᖅᓯᒪᓂᖏᓐᓂ ᐅᖃᖅᓯᒪᔪᑦ 8.24, 8.25 ᐊᒻᒪᓗ 8.26, ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᔭᕆᐊᖃᖅᐳᑦ ᐅᕝᕙᓘᓐᓃᑦ ᐸᖅᑭᒡᓯᓗᑎᒃ ᐊᒻᒪ ᒥᐊᓂᖅᓯᓗᑎᒃ ᐅᕝᕙᓘᓐᓃᑦ ᐱᒋᐊᖅᑕᐅᓂᕆᔭᖓᓄᑦ ᓴᓗᒻᒪᖅᓴᐃᓂᐅᑉ ᑕᐃᒃᓱᒥᖓ ᕿᒻᒪᑯᒥᒃ ᐊᐅᓚᑦᓯᕕᐅᓚᐅᖅᑐᒥᒃ ᓄᓇᒥᒃ ᐅᕝᕙᓘᓐᓃᑦ ᓄᑖᒥᒃ ᓄᓇᒥᒃ ᓴᓗᒻᒪᖅᓴᐃᔭᕆᐊᖃᖅᑎᓪᓗᒋᑦ ᓇᓕᐊᑐᐃᓐᓇᖅ ᐊᑐᖅᑕᐅᓐᓂᖅᐸᑦ ᐃᒪᐃᑦᑑᔭᕆᐊᖃᖅᑐᖅ:

1. ᐱᔪᓐᓇᖅᓯᑐᐊᖅᐸᑕ,
2. ᐱᓕᕆᐊᖃᕐᓗᑎᒃ ᐃᓄᐃᑦ ᖃᓄᐃᖏᑦᓯᐊᖁᓪᓗᒋᑦ ᓴᐳᒻᒥᔭᐅᖁᓪᓗᒋᑦ ᐊᒻᒪᓗ ᐊᑦᑕᕐᓇᖏᑦᑐᒦᖁᓪᓗᒋᑦ ᐊᒻᒪᓗ ᐊᕙᑎᒋᔭᐅᔪᖅ ᓴᐳᒥᔭᐅᓗᓂ, ᐊᒻᒪᓗ
3. ᐱᓕᕆᔭᖓᓂᑦ ᑮᓇᐅᔭᓂᒃ ᐅᑎᖅᑎᑦᓯᓐᓂᖅᐸᑕ ᒪᓕᒡᓗᒍ ᓇᓗᓇᐃᖅᑕᐅᓯᒪᓂᕆᔭᖓ ᐃᓚᖓᓂ ᑎᑎᕋᖅᓯᒪᓂᖓᓂ 8.28 ᑐᓂᔭᐅᑎᓪᓗᒋᑦ ᐸᖅᑭᒡᓯᔾᔪᑎᒃᓴᓂᒃ ᐊᒻᒪ ᒥᐊᓂᖅᓯᔾᔪᑎᒃᓴᓂᒃ ᐅᕝᕙᓘᓐᓃᑦ ᓴᓗᒻᒪᖅᓴᖅᑕᐅᔾᔪᑎᒃᓴᖓᓂᒃ ᓄᓇᐅᑉ ᕿᒻᒪᑰᑉ ᐊᐅᓚᑦᓯᕕᐅᔪᕕᓂᐅᑉ ᐅᕝᕙᓘᓐᓃᑦ ᓄᑖᒥᒃ ᓄᓇᒥᒃ ᐊᑐᖅᑕᐅᓂᐊᖅᑐᒥᒃ ᓴᓗᒻᒪᖅᓴᐃᔭᕆᐊᖃᖅᑎᓪᓗᒋᑦ ᑮᓇᐅᔭᓂᒃ ᐅᑎᖅᑎᑦᓯᑎᓪᓗᒋᑦ, ᓇᓕᐊᖕᓂᑐᐃᓐᓇᖅ ᐊᑐᕐᓗᑎᒃ.

ᓄᓇᐃᑦ ᓴᓗᒻᒪᖅᓴᖅᑕᐅᔭᕆᐊᓖᑦ

8.29 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᑦ ᑐᓂᓯᔭᕆᐊᖃᖅᑐᑦ ᐃᓘᓐᓇᖏᑦ ᓄᓇᕕᓂᐅᔪᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᐅᓪᓗᐊᓂ ᓄᒃᑎᖅᑕᐅᓂᒃᓴᖓᑕ ᑭᑭᑕᐅᓯᒪᔭᕆᐊᖃᖅᐳᑦ ᓄᒃᑎᖅᑕᐅᔪᓂᑦ ᐊᒡᓚᒡᕕᓕᕆᔾᔪᑎᖏᓐᓂ ᐊᒻᒪᓗ ᐊᐅᓚᑕᐅᔾᔪᑎᖏᓐᓂ ᓇᓗᓇᐃᖅᑕᐅᓯᒪᔪᑦ ᒪᓕᒡᓗᒋᑦ ᐃᓚᖓᓂ ᑎᑎᕋᖅᓯᒪᓂᖓᓂ 5.1 ᐊᒻᒪᓗ ᐱᖃᓯᐅᔾᔭᐅᓯᒪᔭᕆᐊᖃᖅᑐᑦ ᐱᖁᑎᑦ ᑎᑎᕋᖅᑕᐅᓯᒪᓂᖏᓐᓂ ᑭᑭᑕᐅᔪᑦ ᒪᓕᒡᓗᒍ ᐃᓚᖓᓂ ᑎᑎᕋᖅᓯᒪᓂᖓ 5.25.

8.30 ᑕᐃᒪᐃᓐᖏᒍᓐᓇᖅᑐᖅ ᐊᓯᐊᒍᑦ ᐅᖃᐅᑕᐅᓯᒪᒃᐸᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᑭᓕᖅᓯᔭᕆᐊᖃᖅᑐᑦ ᓴᓗᒻᒪᖅᓴᖅᑕᐅᓂᖓᓄᑦ ᐅᕝᕙᓘᓐᓃᑦ ᐊᓯᔾᔨᖅᓯᔭᕆᐊᖃᖅᑎᓪᓗᖏᑦ ᓴᓗᒻᒪᖅᓴᐃᑎᓪᓗᒋᑦ ᓄᓇᒋᔭᐅᓚᐅᖅᑐᕕᓂᕐᒥᒃ ᓴᓗᒻᒪᕆᐊᖃᖅᑐᒥᒃ.

ᓄᑖᑦ ᓄᓇᐃᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ

8.31 ᐊᓯᐊᒍᑦ ᑭᓯᐊᓂ ᐅᖃᐅᑕᐅᓯᒪᒃᐸᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᓂ, ᐃᒪᐃᑦᑕᕆᐊᖃᖅᐳᑦ ᐊᑐᓂ ᓄᑖᒥ ᓄᓇᒥᒃ ᓴᓗᒻᒪᖅᓴᐃᔭᕆᐊᖃᖅᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᐊᑭᓕᖅᓯᔭᕆᐊᖃᖅᑐᑦ ᓴᓗᒻᒪᖅᓴᖅᑕᐅᓂᖓᓄᑦ ᓄᓇᐅᑉ ᐊᓯᔾᔨᖅᑕᐅᔭᕆᐊᖃᖅᐸᓪᓗ ᓴᓗᒻᒪᖅᓴᖅᑕᐅᓗᓂ ᓄᓇᒋᔭᐅᔪᕕᓂᐅᑎᓪᓗᒍ ᒐᕙᒪᒃᑯᑦ ᓄᓇᖁᑎᖓᓐᓄᑦ ᓯᕗᕐᖓᒍᑦ ᓄᒃᑎᖅᑕᐅᓂᖓᑕ ᐅᓪᓘᑉ ᓄᓇᖁᑎᒋᔭᐅᔪᕕᓂᐅᑎᓪᓗᒍ.

8.32 ᐊᑐᖏᓪᓗᒍ ᐃᓚᖓᓂ ᑎᑎᕋᖅᓯᒪᓂᖓ 8.31, ᑲᓇᑕᐅᑉ ᒐᕙᒪᒃᑯᖏᑦ ᓴᓗᒻᒪᖅᓴᐃᒋᐊᑐᑎᒐᔭᖏᑦᑐᑦ ᓄᓇᒥᒃ ᓄᑖᒥᒃ ᓄᓇᒥᒃ ᓴᓗᒻᒪᕆᐊᖃᖅᑐᒥᒃ ᐃᒪᐃᑦᑑᒃᐸᑦ, ᑭᖑᕐᖓᒍᑦ ᐅᓪᓗᖓᑕ ᓄᒃᑎᖅᑕᐅᓚᐅᖅᑎᓪᓗᒍ, ᓄᓇᕗᑦ ᒐᕙᒪᒃᑯᖏᑦ ᐱᓕᕆᔪᓐᓇᓪᓗᐊᓚᐅᖅᑎᓪᓗᒋᑦ ᓱᕈᖅᑎᖅᑕᐅᖁᓇᒍ ᓄᓇ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ. ᐊᖏᖃᑎᒌᖏᔾᔪᑕᐅᔪᓄᑦ ᐱᔾᔪᑕᐅᔪᑦ ᓴᖅᑭᑦᑐᑦ ᐅᕙᓐᖓᑦ ᑎᑎᕋᖅᓯᒪᓂᖓᓂᑦ ᐃᓱᒪᒋᔭᐅᓂᐊᖅᐳᑦ ᒪᓕᒃᓯᒪᓂᖏᓐᓂᒃ ᐊᐅᓚᑦᓯᔾᔪᑎᐅᔪᓂᒃ ᓇᓗᓇᐃᖅᑕᐅᓯᒪᔪᓂ ᐃᓚᖓᓂ ᑎᑎᕋᖅᓯᒪᓂᖓᓂ ᐱᒋᐊᕐᓗᒍ 8.46 ᑎᑭᓪᓗᒍ 8.50.

8.33 ᑕᐃᒪᓕ ᐃᓱᒪᓕᐅᕐᓂᖅᐸᑕ ᑖᓐᓇ ᕿᒻᒪᑰᔪᖅ ᓄᓇ ᐊᐅᓚᑦᓯᕕᐅᔪᕕᓂᖅ, ᑎᑎᕋᖅᑕᐅᓯᒪᕕᖕᒥ ᑎᑎᕋᖅᑕᐅᓯᒪᓐᖏᑎᓪᓗᒍ ᐅᕝᕙᓘᓐᓃᑦ ᓴᓗᒻᒪᖅᓴᖅᑕᐅᓯᒪᔪᖅ ᓄᓇ. ᓄᑖᒥᒃ ᓄᓇᒥᒃ ᓴᓗᒻᒪᖅᓴᕆᐊᖃᖅᑎᓪᓗᒍ, ᑕᐃᒪᐃᑉᐸᑦ ᑲᓇᑕᐅᑉ ᒐᕙᒪᒃᑯᖏᑦ ᑐᒃᓯᕋᐅᑎᓕᐅᕈᓐᓇᖅᑐᑦ, ᑎᑎᕋᕐᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ, ᑲᒥᓴᓇ ᓴᒃᑯᐃᖁᓪᓗᒍ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᓪᓚᕕᓕᕆᔾᔪᑎᓂᒃ ᐊᒻᒪ ᐊᐅᓚᑦᓯᔾᔪᑎᓂᒃ ᓄᑖᖑᔪᒧᑦ ᓄᓇᒧᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᒧᑦ ᑲᓇᑕᐅᑉ ᒐᕙᒪᒃᑯᖏᑦ ᐊᐅᓚᑦᓯᔭᕆᐊᖃᖅᑎᓪᓗᒋᑦ ᒥᐊᓂᖅᓯᓗᑎᒃ ᓄᑖᒥᒃ ᓄᓇᒥᒃ ᓴᓗᒻᒪᖅᓴᖅᑕᐅᔭᕆᐊᖃᖅᑐᒥᒃ ᒪᓕᒡᓗᒋᑦ ᐅᑯᑎᒎᓇᖅ ᐅᖃᖅᓯᒪᔪᑦ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᐅᔪᓂ. ᑕᐃᒪᓕ ᑲᒪᒋᔭᐅᓚᐅᕐᓂᖓ ᒥᐊᓂᕆᔭᐅᓂᕆᔭᖓ ᑲᓇᑕᐅᑉ ᒐᕙᒪᒃᑯᓐᓄᑦ ᐱᓪᓗᒍ ᓴᓗᒻᒪᖅᓴᖅᑕᐅᔭᕆᐊᖃᓕᖅᐸᑦ ᓄᓇ ᓄᑖᖅ ᓴᓗᒻᒪᖅᓴᕆᐊᖃᖅᑐᖅ, ᑖᓐᓇ ᓄᓇ ᓴᓗᒻᒪᖅᑕᐅᔭᕆᐊᖃᓪᓚᕆᒃᐳᖅ.

8.34 ᑎᑎᕋᖅᓯᒪᓂᖓ. ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᐃᓗᐊᒍᑦ ᐊᖏᖃᑕᐅᓯᒪᔪᖅ ᑎᓕᓯᖁᓪᓗᒍ ᐃᓄᖕᒥᒃ, ᒪᓕᒡᓗᒍ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 4.22, ᖃᐅᔨᒃᑲᐃᔾᔪᑎᓂᒃ ᑐᓂᔭᐅᖃᑦᑕᕐᓂᐊᖅᑐᒥᒃ ᐅᕝᕙᓘᓐᓃᑦ ᑐᓴᐅᒪᑎᑕᐅᖃᑦᑕᕐᓂᐊᖅᑐᒥᒃ ᐊᖏᖃᑎᒋᔭᐅᔪᖅ ᒪᓕᒡᓗᒍ ᐅᑯᐊ ᑎᑎᕋᖅᓯᒪᓂᖓ.

8.35 ᑎᑎᕋᖅᓯᒪᔪᑎᒍᑦ ᑐᒃᓯᕋᐅᑎ ᑕᐃᔭᐅᓯᒪᔪᖅ ᐃᓚᖓᓂ ᑎᑎᕋᖅᓯᒪᓂᖓᓂ 8.33 ᓇᓗᓇᐃᖅᓯᔭᕆᐊᖃᖅᑐᖅ ᑭᒡᓕᒋᔭᖓᓂᒃ ᓄᓇᐅᑉ ᑲᓇᑕᐅᑉ ᒐᕙᒪᒃᑯᖏᑕ ᑐᒃᓯᕋᖅᑕᖓᓐᓂᒃ ᑲᒥᓴᓇ ᑐᓂᓯᖁᓪᓗᒍ ᓴᒃᑯᐃᔾᔪᑎᒥᒃ, ᑭᒡᓕᖏᑦ ᑖᒃᑯᐊ ᐃᓗᐊᓂ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᓇᓗᓇᐃᖅᓯᒪᓗᑎᒃ, ᐊᒻᒪ, ᐱᔭᕆᐊᖃᖅᐸᑦ, ᑐᓐᖓᕕᖃᕐᓗᑎᒃ ᐅᓪᓗᒥᐅᔪᖅ ᐊᑐᖅᑕᐅᔪᓂᒃ ᐅᔭᕋᖕᓂᐊᕐᓂᕐᒧᑦ ᓇᑉᐸᖅᑎᑕᐅᓯᒪᔪᓄᑦ ᐅᕝᕙᓘᓐᓃᑦ ᐊᓯᖏᓐᓄᑦ ᐊᑐᖅᑕᐅᔪᓄᑦ ᑐᓂᕐᕈᑎᐅᔪᓄᑦ ᐱᔪᓐᓇᐅᑎᐅᔪᓂᒃ ᐊᑐᕐᓗᑎᒃ.

8.36 ᑲᒥᓴᓇ ᓴᒃᑯᐃᔭᕆᐊᖃᖅᐳᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᓪᓚᕕᓕᕆᔾᔪᑎᖏᓐᓂᒃ ᐊᒻᒪᓗ ᐊᐅᓚᑕᐅᓂᖓᓄᑦ ᓄᑖᑉ ᓄᓇᐅᑉ ᓴᓗᒻᒪᖅᓴᖅᑕᐅᔭᕆᐊᖃᖅᑑᑉ ᐃᓗᐊᓂ 180 ᐅᓪᓗᐃᑦ ᐱᒋᐊᕐᕕᒋᒍ ᐅᓪᓗᐊ ᑐᒃᓯᕋᐅᑎᓕᐅᕐᓂᕆᔭᐅᓚᐅᖅᑐᖅ ᒪᓕᒡᓗᒍ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᓂ 8.33 ᐱᔾᔪᑎᖃᖅᑐᑦᖅ ᑕᐃᒪᐃᑦᑐᓂᒃ ᓄᓇᓂᒃ, ᐱᓕᕆᐊᒃᓴᖏᓐᓂᒃ ᐱᓕᕆᓐᓂᖏᑉᐸᑕ ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᒋᔭᐅᓇᔭᖅᑐᖅ ᓴᒃᑯᐃᓂᖏᓐᓂᒃ ᐱᓕᕆᐊᒃᓴᕆᓚᐅᖅᑕᖏᓐᓂᒃ ᓄᓇᒧᑦ ᐊᒻᒪ ᓄᓇ ᓴᒃᑯᑕᐅᓯᒪᓕᕐᓗᓂ.

ᓴᓗᒻᒪᖅᓴᖅᑕᐅᓯᒪᔪᑦ ᓄᓇᐃᑦ

8.37 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᐃᓗᓕᖃᕆᐊᖃᖅᐳᖅ ᓄᓇ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᐅᕝᕙᓘᓐᓃᑦ ᓄᑖᖅ ᓄᓇ ᓴᓗᒻᒪᖅᑕᐅᔭᕆᐊᖃᖅᐸᑦ, ᓴᓗᒻᒪᓂᕋᖅᑕᐅᓕᕈᓐᓇᖅᐳᖅ, ᐃᒪᐃᑦᑑᒃᐸ ᓄᓇ:

1. ᓴᓗᒻᒪᖅᓴᖅᑕᐅᒃᑲᓐᓂᕆᐊᖃᖏᓪᓗᓂ ᑐᓐᖓᕕᒋᓗᒋᑦ ᖃᐅᔨᓴᐃᔾᔪᑕᐅᓚᐅᖅᑐᑦ ᐱᓕᕆᐊᖑᑎᓪᓗᒍ I-ᒥ ᐊᒻᒪᓗ II-ᒥ ᓄᓇ ᖃᐅᔨᓴᖅᑕᐅᑎᓪᓗᒍ; ᐊᒻᒪᓗ
2. ᐱᔭᕇᖅᑕᐅᓚᐅᖅᑎᓪᓗᒍ ᓴᓗᒻᒪᖅᓴᐃᓂᐅᔪᖅ ᓄᓇᒥᒃ ᓴᓗᒻᒪᕆᐊᖃᖅᑐᓂᒃ ᐱᖃᓯᐅᑎᓪᓗᒍ, ᓇᓗᓇᐃᖅᓯᔾᔪᑎᐅᔪᑦ, ᐅᑯᓄᖓ:
   1. ᓴᓗᒻᒪᖅᓴᐃᓂᕐᒧᑦ ᐱᓕᕆᐊᒃᓴᖏᓐᓄᑦ ᑐᕌᒐᒃᓴᖏᑦ ᐱᔭᕇᖅᑕᐅᔪᐃᓐᓇᐅᒃᐸᑕ; ᐊᒻᒪᓗ
   2. ᐊᑐᕆᐊᖃᖅᑐᑦ ᓯᕕᑐᔪᒧᑦ ᒥᐊᓂᖅᓯᔾᔪᑕᐅᓗᑎᒃ ᐊᐅᓚᑦᓯᔾᔪᑕᐅᓗᑎᒃ ᐊᒻᒪᓗ ᓯᕕᑐᔪᔪᑦ ᓄᖅᑲᖅᐸᓪᓕᐊᓂᕐᒧᑦ ᒪᓕᒐᖏᑦ ᐊᖑᒻᒪᑎᔭᐅᔪᐃᓐᓇᐅᓚᐅᖅᑎᓪᓗᒋᑦ.

8.38 ᐱᔭᕇᖅᑕᐅᒃᐸᑦ ᓴᓗᒻᒪᖅᓴᐃᓂᐅᔪᖅ ᓄᓇᒥᒃ ᓴᓗᒻᒪᕆᐊᖃᖅᑐᒥᒃ ᐅᕝᕙᓘᓐᓃᑦ ᓄᑖᒥᒃ ᓄᓇᒥᒃ ᓴᓗᒻᒪᕆᐊᖃᖅᑐᒥᒃ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐅᑯᓂᖓ ᑐᓴᒐᒃᓴᓂᒃ:

1. ᓇᓃᓐᓂᖓ ᓄᓇᐅᑉ ᐊᒻᒪᓗ ᖃᓄᐃᓕᖓᓂᖓ ᓄᓇᐅᑉ;
2. ᖃᓄᐃᓕᐅᕐᓗᑎᒃ ᐊᓯᕈᖅᑕᐅᔭᕆᐊᖃᖅᑎᒋᖕᒪᖔᑦ ᓄᓇ ᓴᓗᒻᒪᖅᓴᖅᑕᐅᑎᓪᓗᒍ;
3. ᐱᓕᕆᔭᐅᔪᑦ ᓴᓗᒻᒪᖅᓴᕆᐊᖃᖅᑐᖅ ᐊᓯᕈᕐᓂᐊᕐᓗᒍ; ᐊᒻᒪᓗ
4. ᐊᑐᓕᖁᔭᓕᐊᑦ ᐊᒃᑐᐊᓂᖃᖅᑐᑦ ᑲᔪᓯᔪᒃᑯᑦ ᒥᐊᓂᕆᔭᐅᓂᖓ ᐊᐅᓚᑕᐅᓂᖓ ᓴᓗᒻᒪᖅᓴᐃᔾᔪᑎᐅᔪᑦ, ᐱᑕᖃᖅᐸᑦ.

ᐱᔪᓐᓇᐅᑏᑦ ᓇᓗᓇᐃᖅᓯᓂᕐᒧᑦ ᓴᓗᒻᒪᖅᑕᐅᔭᕆᐊᖃᖅᑐᓂᒃ

8.39 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᓇᓗᓇᐃᖅᓯᓯᒪᔭᕆᐊᖃᖅᐳᖅ ᑭᖑᕐᖓᒍᑦ ᓄᒃᑎᕆᓚᐅᖅᑎᓪᓗᒋᑦ ᐅᓪᓗᖓᑕ, ᓄᓇᕗᑦ ᒐᕙᒪᒃᑯᖏᑦ ᓇᓗᓇᐃᖅᓯᔪᒪᒍᑎᒃ ᓇᓗᓇᐃᖅᓯᔪᓐᓇᖁᓪᓗᒋᑦ ᑐᓂᓯᓗᑎᒃ ᑎᑎᖅᑲᓂᒃ ᑐᓴᖅᑎᑦᑎᔾᔪᑎᓂᒃ ᕿᒻᒪᑯ ᓄᓇ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᐱᓪᓗᒍ ᐅᕝᕙᓘᓐᓃᑦ ᑎᑎᕋᖃᓯᐅᔾᔭᐅᓯᒪᖏᑦᑐᖅ ᓄᓇ ᒐᕙᒪᒃᑯᑦ ᓄᓇᖁᑎᖓᓐᓃᑦᑐᖅ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᑕᐃᒪᐃᑉᐸᑦ ᓄᓇᕗᑦ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᖃᐅᔨᒪᔾᔪᑎᓂᒃ ᓇᓗᓇᐃᓐᖑᖅᓯᔾᔪᑎᓂᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᑲᔪᖅᑐᐃᔪᒥᒃ ᑐᓴᖅᑎᑦᑎᔾᔪᑎᒋᔭᖓᓐᓄᑦ ᓇᓗᓇᐃᖅᓯᔾᔪᑎᑎᒍᑦ.

8.40 ᓇᓗᓇᓐᖑᖅᓯᔾᔪᑎᑦ ᖃᐅᔨᒪᔾᔪᑎᑦ ᐱᔭᐅᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐅᑯᐊᖑᕗᑦ ᐊᑐᕐᓗᒍ ᑎᑎᕋᖅᓯᒪᓂᖓ 8.39 ᐱᖃᓯᐅᔾᔨᓯᒪᔭᕆᐊᖃᖅᐳᑦ ᐱᔭᕇᖅᓯᒪᓗᓂ ᐱᓕᕆᐊᒃᓴᖅ ᓇᓕᐊᑐᐃᓐᓇᖅ I ᐊᒻᒪᓗ II ᐊᕙᑎᖓᓂᒃ ᓄᓇᐅᑉ ᖃᐅᔨᓴᐃᔾᔪᑎᐅᔪᓂᒃ ᒪᓕᒃᓯᒪᓗᑎᒃ ᐅᓪᓗᒥᒧᑦ ᐊᑐᖅᑕᐅᔪᓂᒃ ᑲᓇᑕᒥᐅᑦ ᒪᓕᒐᓕᕆᓂᕐᒧᑦ ᑲᑐᔾᔨᖃᑎᒌᖏᓐᓄᑦ ᐊᔾᔨᒌᓕᖅᑎᑕᐅᓯᒪᔪᑦ ᒪᓕᒐᖏᓐᓂᒃ ᐊᑐᖅᑕᐅᔭᕆᐊᖃᖅᑐᑦ ᖃᐅᔨᓴᐃᔾᔪᑎᓄᑦ ᐅᕝᕙᓘᓐᓃᑦ ᑐᓴᒐᒃᓴᖓ ᖃᓄᐃᓕᖓᖕᒪᖔᑦ ᐊᔾᔨᑲᓴᒋᓗᓂᐅᒃ ᐊᒻᒪ ᐃᓗᓕᖏᑦ ᒪᓕᒃᓯᒪᓗᑎᒃ ᐱᓕᕆᔭᐅᔪᖅ I ᐊᒻᒪᓗ II ᐊᕙᑎᖓ ᓄᓇᐅᑉ ᖃᐅᔨᓴᐃᔾᔪᑎᖓᓐᓂᒃ.

8.41 ᑲᓇᑕᐅᑉ ᒐᕙᒪᒃᑯᖏᑕ ᑲᒪᒋᔭᕆᐊᖃᖅᑕᖓᑦ ᓴᓗᒻᒪᖅᓴᐃᓂᕐᒧᑦ ᓇᓕᐊᖕᓂᑐᐃᓐᓇᖅ ᐊᓯᕈᖅᑕᐅᔭᕆᐊᖃᖅᑐᓂᒃ ᓴᓗᒻᒪᖅᓴᐃᓗᑎᒃ ᕿᒻᒪᑯᓂ ᐊᐅᓚᑦᓯᕕᐅᓪᓗᑎᒃ ᓄᓇᒋᔭᐅᔪᕕᓂᕐᓂᒃ, ᓇᓗᓇᐃᖅᑕᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓂᑦ ᓴᓗᒻᒪᕆᐊᖃᕐᓂᖏᓐᓂᒃ ᒪᓕᒡᓗᒍ ᑎᑎᕋᖅᓯᒪᓂᖓ 8.39, ᐊᐅᓚᑕᐅᓂᐊᖅᐳᖅ ᑕᐃᒪᓐᖓᑦ ᑕᑯᒃᓴᐅᑎᑦᓯᓂᒃᑯᑦ ᓄᓇᕗᑦ ᒐᕙᒪᒃᑯᖏᑦ ᒪᓕᑦᓯᐊᓚᐅᕐᓂᖏᓐᓂᒃ ᐃᓘᓐᓇᖏᓐᓂᒃ ᐱᓕᕆᔭᕆᐊᖃᖅᑕᖏᓐᓂᒃ (ᐱᖃᓯᐅᑎᓪᓗᒋᑦ ᐱᖁᔭᖅᑎᒍᑦ ᐱᓕᕆᒐᓱᐊᕐᓂᖅ) ᐊᑐᐃᓐᓇᔪᓂᒃ ᑐᓂᓯᖁᓪᓗᒋᑦ ᓴᓗᒻᒪᖅᓴᐃᔾᔪᑎᒃᓴᓂᒃ ᐃᓄᖕᒧᑦ ᐊᓯᐊᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐱᖃᓯᐅᑎᓪᓗᒍ ᐊᐅᓚᑦᓯᔨ ᐅᕝᕙᓘᓐᓃᑦ ᐊᐅᓚᑦᓯᔨᐅᓚᐅᖅᑐᖅ.

8.42 ᑲᓇᑕᐅᑉ ᒐᕙᒪᒃᑯᖏᑦ ᕿᒥᕐᕈᐊᕆᐊᖃᖅᐳᑦ ᖃᐅᔨᒪᔾᔪᓂᒃ ᓇᓗᓇᐃᖅᓯᒍᑎᐅᔪᓂᒃ ᑐᓂᔭᐅᓯᒪᔪᓂᒃ ᒪᓕᒡᓗᒍ ᑎᑎᕋᖅᓯᒪᓂᖓ 8.39 ᐊᒻᒪ ᑐᓴᕆᐊᕐᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ ᐱᔾᔪᑎᒋᓪᓗᒍ ᖃᐅᔨᒪᔾᔪᑎᑦ ᓇᓗᓇᐃᖅᓯᔾᔪᑎᑦ ᐊᒻᒪᓗ ᑐᓴᖅᑎᑦᑎᔾᔪᑎᑦ ᓇᓗᓇᐃᖅᓯᔾᔪᑎᖓᑦ ᓄᓇᕗᑦ ᒐᕙᒪᒃᑯᖏᑕ ᒪᓕᒡᓗᒍ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 8.39, ᒪᓕᒡᓗᒍ ᐱᓕᕆᔭᐅᓚᐅᖅᑎᓪᓗᒍ ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᓕᐅᕆᐊᖃᖅᐳᑦ ᐃᒪᓐᓇ:

1. ᖃᐅᔨᒪᔾᔪᑎᓂᒃ ᓇᓗᓇᐃᓐᖑᕈᑎᓂᒃ ᐱᔭᕆᐊᑲᒃᑲᓐᓂᖅᐸᑕ ᐃᓱᒪᓕᐅᕈᓐᓇᕐᓂᐊᕐᒪᑕ ᖃᓄᐃᓕᖓᖕᒪᖔᑦ ᓄᓇ ᐱᔾᔪᑕᐅᔪᖅ;
2. ᕿᒻᒪᑯ ᓄᓇ ᐊᐅᓚᑦᓯᕕᐅᔪᕕᓂᖅ ᓄᑖᖑᓪᓗᓂ ᓄᓇᒥᒃ ᓴᓗᒻᒪᕆᐊᖃᖅᑐᖅ ᐃᒪᐃᑉᐸᑦ:
   1. ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᒃᐸᑕ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᓄᓇ ᓱᕈᖅᓯᒪᓚᐅᕐᓂᖓᓂᒃ ᒐᕙᒪᒃᑯᑦ ᓄᓇᖁᑎᖓᓐᓂ ᓯᕗᕐᖓᒍᑦ ᓄᒃᑎᖅᑕᐅᓚᐅᕐᓂᖓᑕ ᐅᓪᓗᐊᑕ; ᐊᒻᒪᓗ
   2. ᑲᓇᑕᐅᑉ ᒐᕙᒪᒃᑯᖏᑦ ᓈᒻᒪᒃᓴᖅᐸᑕ ᓄᓇᕗᑦ ᒐᕙᒪᒃᑯᖏᑦ ᐱᓕᕆᔭᖏᑎᒍᑦ ᐊᖑᒻᒪᑎᓚᐅᕐᓂᖏᓐᓂᒃ ᐱᓕᕆᐊᒃᓴᕆᔭᖏᓐᓂᒃ ᑕᐃᔭᐅᓯᒪᔪᓂᒃ ᑎᑎᕋᖅᓯᒪᓂᖓᓂ 8.41-ᒥ ᐊᒃᓱᕈᕐᓗᑎᒃ ᐱᓇᓱᐊᖁᓪᓗᒋᑦ ᐊᑐᕐᓗᑎᒃ ᐱᓕᕆᔪᓐᓇᖅᑕᖏᓐᓂᒃ (ᐱᖃᓯᐅᑎᓪᓗᒍ ᐱᖁᔭᖅᑎᒍᑦ ᐱᓕᕆᒐᓱᐊᕐᓂᖅ) ᑐᓂᓯᖁᓪᓗᒋᑦ ᓴᓗᒻᒪᖅᓴᐃᔾᔪᑎᒃᓴᓂᒃ ᐃᓄᖕᒧᑦ ᐊᓯᐊᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐱᖃᓯᐅᑎᓪᓗᒍ ᐊᐅᓚᑦᓯᔨ ᐅᕝᕙᓘᓐᓃᑦ ᐊᐅᓚᑦᓯᔨᐅᓚᐅᖅᑐᖅ; ᐅᕝᕙᓘᓐᓃᑦ
3. ᑎᑎᕋᖃᓯᐅᔾᔭᐅᓯᒪᖏᑦᑐᖅ ᓄᓇ ᓄᑖᖑᓗᓂ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᐃᒪᐃᑦᑑᒃᐸᑦ:
   1. ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᖃᖅᐸᑕ ᓴᓗᒻᒪᖅᓴᖅᑕᐅᔭᕆᐊᖃᕐᓂᖓᓂᒃ ᓄᓇ ᓱᕈᖅᑕᐅᓂᑯ ᒐᕙᒪᒃᑯᑦ ᓄᓇᖁᑎᖓᓐᓂ ᐱᑕᖃᕇᓚᐅᕐᓂᖓᓂᒃ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ; ᐊᒻᒪᓗ
   2. ᑲᓇᑕᐅᑉ ᒐᕙᒪᒃᑯᖏᑦ ᓈᒻᒪᒃᓴᖅᐸᑕ ᓄᓇ ᕿᒻᒪᑰᓚᐅᕐᓂᖓᓂᒃ ᐅᓪᓗᐊᓂ ᓄᒃᑎᕆᓂᐅᑉ ᐅᓪᓗᐊ ᐱᒋᐊᕐᕕᒋᓗᒍ.

8.43 ᑲᓇᑕᐅᑉ ᒐᕙᒪᒃᑯᖏᑦ ᑐᓴᖅᑎᑦᑎᔭᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐃᓱᒪᓕᐅᕈᑎᒋᔭᖏᓐᓂᒃ ᒪᓕᒡᓗᒍ ᑎᑎᕋᖅᓯᒪᓂᖓ 8.42 ᕿᒻᒪᑯ ᐊᐅᓚᑦᓯᕕᐅᔪᕕᓂᖅ ᓄᓇᒋᔭᐅᓪᓗᓂ ᐅᕝᕙᓘᓐᓃᑦ ᑎᑎᕋᖃᓯᐅᔾᔭᐅᓯᒪᖏᑦᑐᖅ ᓄᓇ ᐅᕝᕙᓘᓐᓂᑦ ᓄᑖᖑᖏᑦᑐᒥᒃ ᓄᓇᒥᒃ ᓴᓗᒻᒪᖅᑕᐅᔭᕆᐊᖃᖅᑐᒥᒃ

8.44 ᑕᐃᒪᓕ ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᓕᐅᖅᐸᑕ ᒪᓕᒡᓗᒍ ᑎᑎᕋᖅᓯᒪᓂᖓ 8.42 ᕿᒻᒪᑯ ᓄᓇ ᐊᐅᓚᑦᓯᕕᐅᔪᕕᓂᖅ ᐅᕝᕙᓘᓐᓃᑦ ᑎᑎᕋᖃᓯᐅᔾᔭᐅᓯᒪᖏᑦᑐᖅ ᓄᓇ ᓄᑖᖑᓗᓂ ᓄᓇ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ, ᑕᐃᒪᐃᑦᑐᑦ ᓄᓇᐃ ᐱᒋᐊᕐᕕᒋᓗᒍ ᐅᓪᓗᐊ ᐃᓱᒪᓕᐅᕈᑕᐅᓚᐅᖅᑐᖅ ᓄᑖᖑᓗᓂ ᓄᓇ ᐊᑐᖅᑕᐅᓂᐊᕐᓗᓂ ᓴᓗᒻᒪᖅᓴᖅᑕᐅᔭᕆᐊᖃᕐᓂᖓᓂᒃ.

ᐊᖏᖃᑎᒌᒍᓐᓇᖏᓐᓂᖅ ᓄᓇ ᓴᓗᒻᒪᖅᓴᖅᑕᐅᔭᕆᐊᖃᕐᒪᖔᑦ ᓴᓗᒻᒪᖅᓴᖅᑕᐅᒋᐊᑐᖏᒻᒪᖔᓪᓗ

8.45 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᐱᑕᖃᖅᑎᑦᓯᔭᕆᐊᖃᖅᐳᖅ ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᓕᐅᖅᐸᑕ ᒪᓕᒡᓗᒍ ᑎᑎᕋᖅᓯᒪᓂᖓ 8.42 ᕿᒻᒪᑯ ᐊᐅᓚᑦᓯᕕᐅᔪᕕᓂᖅ ᓄᓇ ᐅᕝᕙᓘᓐᓃᑦ ᑎᑎᕋᖃᓯᐅᔾᔭᐅᓯᒪᖏᑦᑐᖅ ᓄᓇ ᓄᑖᖑᖏᓐᓂᖓᓂᒃ ᓴᓗᒻᒪᖅᑕᐅᔭᕆᐊᖃᕐᓂᖓᓂᒃ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᖃᖏᑉᐸᑕ ᑲᓇᑕᐅᑉ ᒐᕙᒪᒃᑯᖏᑕ ᐃᓱᒪᓕᐊᖓᓐᓂᒃ, ᓄᓇᕗᑦ ᒐᕙᒪᒃᑯᖏᑦ ᑐᓂᓯᔪᓐᓇᖅᑐᑦ ᑕᒪᑐᒧᖓ ᐋᖅᑭᒡᑕᐅᖁᓪᓗᒍ ᒪᓕᒡᓗᒍ ᐱᐅᓯᐅᔭᕆᐊᖃᖅᑐᑦ ᒪᓕᒐᖏᑦ ᓇᓗᓇᐃᖅᑕᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖏᓐᓂ ᐱᒋᐊᕐᓗᒍ 8.46 ᑎᑭᓪᓗᒍ 8.50.

8.46 ᐊᖏᖃᑎᒌᒍᓐᓇᐃᓪᓕᔪᓄᑦ ᐋᖅᑭᖃᑎᒌᒃᑎᑦᓯᓂᕐᒧᑦ ᑲᑎᒪᔨᐅᔪᑦ ᓴᖅᑭᑕᐅᔭᕆᐊᖃᖅᐳᑦ ᐱᖓᓱᓂᒃ ᑲᑎᒪᔨᖃᕐᓗᑎᒃ, ᓂᕈᐊᖅᑕᐅᓗᑎᒡᓗ ᐃᒪᓐᓇ:

1. ᐊᑕᐅᓯᖅ ᑭᒡᒐᖅᑐᖅᑎ ᓂᕈᐊᖅᑕᐅᓯᒪᔪᖅ ᓄᓇᕗᑦ ᒐᕙᒪᒃᑯᖏᓐᓄᑦ;
2. ᐊᑕᐅᓯᖅ ᑭᒡᒐᖅᑐᖅᑎ ᓂᕈᐊᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ; ᐊᒻᒪᓗ
3. ᐊᑕᐅᓯᖅ ᐃᒻᒥᒃᑰᖅᑐᖅ ᖃᐅᔨᒪᔪᒻᒪᕆᒃ, ᐃᓕᓴᕆᔭᐅᔾᔪᑎᖃᖅᑐᖅ ᐃᓕᓐᓂᐊᖅᓯᓴᒪᓂᖓᓄᑦ ᐊᒻᒪᓗ ᐱᓕᕆᓕᒪᓗᓂ ᕿᒥᕐᕈᓇᖕᓂᕐᒥᒃ ᐊᒻᒪᓗ ᐃᓱᒪᓕᐅᕈᑎᖃᕐᓂᕐᒥᒃ ᑕᐃᒪᐃᑦᑐᒥᒃ, ᑲᑐᔾᔨᓪᓗᑎᒃ ᓂᕈᐊᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ.

8.47 ᑕᐃᒪᓕ ᐱᓕᕆᐊᖃᓕᕐᓂᖅᐸᑕ ᑕᐃᔭᐅᔪᒥᒃ ᐋᖅᑭᒡᑕᐅᔭᕆᐊᖃᖅᑐᒥᒃ ᓄᓇᕗᑦ ᒐᕙᒪᒃᑯᖏᓐᓂ ᒪᓕᒡᓗᒍ ᑎᑎᕋᖅᓯᒪᓂᖓ 8.45, ᐊᖏᖃᑎᒌᒍᓐᓇᐃᓪᓕᔾᔪᑕᐅᔪᒧᑦ ᐋᖅᑭᒋᐊᖅᓯᔨᑦ ᑲᑎᒪᔨᖏᑦ ᕿᒥᕐᕈᓇᒋᐊᖃᖅᐳᑦ ᖃᐅᔨᒪᔾᔪᑎᐅᔪᓂᒃ ᓇᓗᓇᐃᓐᖑᖅᓯᔾᔪᑎᓂᒃ ᐊᒻᒪᓗ ᑎᑎᖅᑲᓂᒃ ᑐᓂᔭᐅᓯᒪᔪᓂᒃ ᐊᖏᖃᑎᒌᒃᓯᒪᔪᓄᑦ ᐱᔾᔪᖃᖅᑐᓂᒃ ᐊᖏᖃᑎᒌᖏᔾᔪᑎᐅᔪᒧᑦ ᐱᓪᓗᒍ ᕿᒻᒪᑯ ᓄᓇ ᐊᐅᓚᑦᓯᕕᐅᔪᕕᓂᖅ ᐅᕝᕙᓘᓐᓃᑦ ᑎᑎᕋᖅᑕᐅᖃᓯᐅᔾᔭᐅᓯᒪᖏᑦᑐᒥ ᓄᓇᒥ ᐊᒻᒪᓗ ᐃᒪᓐᓇ ᐃᓱᒪᓕᐅᕈᑎᒋᔭᕆᐊᖃᖅᐸᐅᒃ:

1. ᕿᒻᒪᑯ ᐊᐅᓚᑦᓯᕕᐅᔪᕕᓂᖅ ᓄᓇ ᓄᑖᖑᓗᓂ ᓴᓗᒻᒪᖅᑕᐅᔭᕆᐊᖃᖅᐸᑦ ᐃᓄᐃᓴᖕᓂᖅᐹᖑᔪᒃ ᒪᕐᕉᒃ ᑲᑎᒪᔨᐅᖃᑕᐅᔪᒃ ᑲᑎᒪᔨᓂᑦ ᐃᓱᒪᓕᐅᕐᓗᑎᒃ:
   1. ᐊᓯᕈᐃᔭᕆᐊᖃᖅᐸᑕ ᓴᓗᒻᒪᖅᓴᐃᓗᑎᒃ ᓄᓇᒥᒃ ᓱᕈᖅᑕᐅᔪᕕᓂᕐᒥᒃ ᒐᕙᒪᒃᑯᑦ ᓄᓇᖁᑎᖓᓐᓂ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ; ᐊᒻᒪᓗ
   2. ᓄᓇᕗᑦ ᒐᕙᒪᒃᑯᖏᑦ ᐱᓕᕆᓯᒪᓕᖅᐸᑕ ᐊᖑᒻᒪᑎᓗᑎᒃ ᑎᑎᕋᖅᓯᒪᓂᖓᓂᒃ 8.41 ᐊᒃᓱᕈᕐᓗᑎᒃ ᐱᓕᕆᖁᓪᓗᒋᑦ ᐃᓘᓐᓇᖏᓐᓂᒃ ᐱᓕᕆᔪᓐᓇᖅᑕᖏᓐᓂᒃ (ᐱᖃᓯᐅᑎᓗᒍ ᐱᖁᔭᖅᑎᒍᑦ ᐱᓕᕆᒐᓱᐊᕐᓂᖅ) ᐊᑐᐃᓐᓇᐅᔪᓂᒃ ᑖᒃᑯᓄᖓ ᑐᓂᓯᖁᓪᓗᒋᑦ ᑲᒪᒋᔭᖃᕐᓂᕐᒥᒃ ᓴᓗᒻᒪᖅᓴᖅᑕᐅᓂᖓᑕ ᓄᓇᐅᑉ ᓴᓗᒻᒪᕆᐊᖃᖅᑑᑉ ᐃᓄᖕᒧᑦ ᐊᓯᐊᓄᑦ ᑲᓇᑕᐅᑉ ᒐᕙᒪᒃᑯᖏᑕ, ᐱᖃᓯᐅᑎᓪᓗᒍ ᐊᓯᐊᓄᑦ ᐊᐅᓚᑦᓯᔨᐅᑉ ᐅᕝᕙᓘᓐᓂᑦ ᐊᐅᓚᑦᓯᔨᐅᓚᐅᖅᑑᑉ; ᐅᕝᕙᓘᓐᓃᑦ
2. ᑎᑎᕋᖃᓯᐅᔾᔭᐅᓯᒪᖏᑦᑐᖅ ᓄᓇ ᓄᑖᖑᓪᓗᓂ ᐊᑐᖅᑕᐅᓂᐊᖅᑐᖅ ᓴᓗᒻᒪᓴᖅᑕᐅᔭᕆᐊᖃᖅᑎᓪᓗᒍ ᐃᓄᐃᓴᖕᓂᖅᐹᖑᔪᒃ ᒪᕐᕉᒃ ᑲᑎᒪᔨᐅᖃᑕᐅᔫᒃ ᐃᓱᒪᓕᐅᕐᓗᑎᒃ ᐃᒪᓐᓇ:
   1. ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᐊᓯᕈᖅᑕᔭᕆᐊᖃᖅᑎᓪᓗᒍ ᓄᓇ ᓱᕈᖅᑕᐅᔪᕕᓂᖅ ᒐᕙᒪᒃᑯᑦ ᓄᓇᖁᑎᖓᓐᓂ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ; ᐊᒻᒪᓗ
   2. ᓄᓇᕗᑦ ᒐᕙᒪᒃᑯᑦ ᐃᓱᒪᓕᐅᖅᑎᓪᓗᒋᑦ ᓄᓇ ᕿᒻᒪᑰᓚᐅᕐᓂᖓᓂᒃ ᑕᐃᔅᓱᒪᓂ ᓄᒃᑎᕆᓂᕐᒧᑦ ᐅᓪᓗᖓᓂ.

8.48 ᑕᐃᒪᓕ ᐊᖏᖃᑎᒌᒍᓐᓇᐃᓪᓕᔾᔪᑕᐅᔪᒧᑦ ᐋᖅᑭᒡᓯᓂᕐᒧᑦ ᑲᑎᒪᔨᐅᔪᑦ ᐃᓱᒪᓕᐅᖅᐸᑕ ᒪᓕᒡᓗᒍ ᑎᑎᕋᖅᓯᒪᓂᖓ 8.48 ᑖᓐᓇ ᕿᒻᒪᑯ ᓄᓇ ᐊᐅᓚᑦᓯᕕᐅᔪᕕᓂᖅ ᐅᕝᕙᓘᓐᓃᑦ ᑎᑎᕋᖃᓯᐅᔾᔭᐅᓯᒪᖏᑦᑐᖅ ᓄᓇ ᓄᑖᖑᓗᓂ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ, ᑕᐃᒪᐃᑦᑐᖅ ᓄᓇ ᐃᒪᐃᑦᑕᕆᐊᖃᖅᐳᖅ ᐱᒋᐊᕐᕕᒋᓗᒍ ᐅᓪᓗᐊ ᐃᓱᒪᓕᐅᕐᕕᐅᔪᖅ ᓄᑖᖅ ᓄᓇ ᓴᓗᒻᒪᖅᑕᐅᔭᕆᐊᖃᕐᓂᖓᓂᒃ. ᑕᐃᒪᓕ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᒋᐊᖅᓯᔨᑦ ᑲᑎᒪᔨᖏᑦ ᐃᓱᒪᓕᐅᕐᓂᖅᐸᑕ ᒪᓕᒡᓗᒍ ᑎᑎᕋᖅᓯᒪᓂᖓ 8.48

8.49 ᐃᒻᒥᒃᑰᖅᑐᖅ ᖃᐅᔨᒪᔨᑕᐅᔪᖅ ᑕᐃᔭᐅᓯᒪᔪᖅ ᑎᑎᕋᖅᓯᒪᓂᖓᑕ ᐃᒪᖓᓂ 8.46(c) ᑐᓴᖅᑎᑦᓯᔭᕆᐊᖃᖅᐳᖅ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᒻᒪ ᓄᓇᕗᑦ ᒐᕙᒪᒃᑯᖏᓐᓂᒃ ᐃᓱᒪᓕᐅᕈᑕᐅᔪᒥᒃ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᒡᓱᐃᔨᑦ ᑲᑎᒪᔨᖏᓐᓂᑦ ᒪᓕᒡᓗᒍ ᑎᑎᕋᖅᓯᒪᓂᖓ 8.47.

8.50 ᐊᑐᓂ ᐊᖏᖃᑎᒌᒍᓐᓇᐃᓪᓕᔫᒃ ᐊᑭᓕᖅᓯᔭᕆᐊᖃᖅᐳᖅ ᓇᖕᒥᓂᖅ ᐊᑭᓕᕆᐊᖃᖅᑕᖏᓐᓂᒃ ᐊᒻᒪᓗ ᐊᑭᒋᔭᖏᓐᓂᒃ ᑭᒡᒐᖅᑎᖅᑎᐅᔪᑉ ᓂᕆᐊᖅᑕᐅᔪᑉ ᐊᑐᓂ ᐊᖏᖃᑎᒌᒍᑎᓂᒃ ᐊᑎᓕᐅᖅᓯᒪᔪᑦ ᒪᓕᒡᓗᒍ ᑎᑎᕋᖅᓯᒪᓂᖓ 8.46(a) ᐅᕝᕙᓘᓐᓃᑦ 8.46(b) ᓇᓕᐊᑐᐃᓐᓇᖅ ᒪᓕᒡᓗᒍ ᖃᓄᐃᓐᓂᐅᔪᖅ, ᐊᒻᒪᓗ ᐊᕕᒡᓗᐊᕐᓗᑎᒃ ᐊᑭᓕᖅᓯᔭᕆᐊᖃᖅᑐᑦ ᐊᑭᓕᕆᐊᖃᖅᑐᓂᒃ ᐃᒻᒥᒃᑰᖅᑐᒥᒃ ᖃᐅᔨᒪᔨᑕᐅᔪᒥᒃ ᓂᕈᐊᖅᑕᐅᓚᐅᖅᑐᒥᒃ ᒪᓕᒡᓗᒍ ᐃᓚᖓᓂ ᑎᑎᕋᖅᓯᒪᓂᖏᑦ 8.46(c).

ᓄᒃᑎᖅᑕᐅᓂᖏᑦ ᓄᓇᐃᑦ ᑲᒥᓴᓇᒧᑦ

8.51 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᑐᓂᓯᔭᕆᐊᖃᖅᐅᖅ ᒪᓕᒡᓗᒍ ᐊᖏᖃᑎᒌᒍᑕᐅᔪᖅ ᓄᓇᕗᑦ ᒐᕙᒪᒃᑯᖏᓐᓄᑦ, ᓄᓇ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᐃᓗᐊᓃᑎᓪᓗᒍ ᐊᓪᓚᕕᒃᑯᑦ ᐊᐅᓚᑕᐅᓂᖓᑕ ᐊᒻᒪᓗ ᐊᐅᓚᑕᐅᑎᓪᓗᒍ ᓄᓇ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔪᒪᒍᑎᒃ ᓄᒃᑎᕆᓂᕐᒥᒃ ᐊᓪᓚᕕᖕᒥ ᐊᐅᓚᑕᐅᔾᔪᑎᖏᓐᓂᒃ ᐊᒻᒪᓗ ᓄᓇᐅᑉ ᐊᐅᓚᑕᐅᓂᖓᓄᑦ ᓴᓗᒻᒪᖅᓴᖅᑕᐅᔭᕆᐊᖃᖅᑑᑉ ᑲᒥᓴᓇᒧᑦ ᑐᓂᓯᔪᓐᓇᖅᑐᑦ ᐊᒻᒪᓗ, ᐊᑐᖏᓪᓗᒍ ᑕᐃᒪᐃᑦᑐᓄᑦ ᓄᒃᑎᕆᓂᐅᔪᖅ, ᓄᓇᐅᑉ ᓴᓗᒻᒪᖅᓴᖅᑕᐅᓂᖓ ᑲᔪᓯᔭᕆᐊᖃᖅᐳᖅ.

8.52 ᖃᖓᑐᐃᓐᓇᒃᑯᑦ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᓄᓇᕗᑦ ᒐᕙᒪᒃᑯᖏᑦ ᑐᒃᓯᕋᐅᑎᓕᐅᕈᓐᓇᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑎᑎᕋᖅᓯᒪᔪᒃᑯᑦ ᑲᓇᑕᐅᑉ ᒐᕙᒪᒃᑯᖏᑦ ᓄᒃᑎᕆᖁᓪᓗᒋᑦ ᑲᒥᓴᓇᒧᑦ ᑐᓂᓯᓗᑎᒃ ᐊᓪᓚᕕᖕᒥ ᐊᐅᓚᑕᐅᓂᕆᔭᖓᓄᑦ ᐊᒻᒪ ᓄᓇᐅᑉ ᐊᐅᓚᑕᐅᓂᕆᔭᖓᓄᑦ ᓴᓗᒻᒪᖅᓴᖅᑕᐅᔭᕆᐊᖃᖅᑑᑉ, ᓄᑖᒥᒃ ᓄᓇᒥᒃ ᓴᓗᒻᒪᖅᓴᖅᑕᐅᔭᕆᐊᖃᖅᑐᖃᖅᐸᑦ ᐅᕝᕙᓘᓐᓃᑦ ᓴᓗᒻᒪᖅᓴᖅᑕᐅᓯᒪᔪᒥᒃ. ᑕᐃᒪ ᐱᓚᐅᖅᑎᓪᓗᒋᑦ ᑐᒃᓯᕋᐅᑎᒥᒃ ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ, ᐱᔪᓐᓇᖅᓯᑐᐊᕈᑎᒃ, ᐱᒋᐊᖅᑎᑕᐅᓗᓂ ᐊᐅᓚᓂᕆᔭᖓ ᓄᒃᑎᕆᓂᕐᒧᑦ ᐊᓪᓚᕕᒃᑯᑦ ᐱᓕᕆᐊᖃᕐᓂᕐᒧᑦ ᐊᒻᒪᓗ ᐊᐅᓚᑦᓯᔾᔪᑎᐅᔪᑦ ᓄᓇᒥᒃ ᑲᒥᓴᓇᒧᑦ ᐊᒻᒪᓗ ᓄᓇ ᑕᐃᓐᓇ ᐊᑯᓚᐃᑦᑐᒃᑯᑦ ᑭᖑᕐᖓᒍᑦ ᐅᓪᓗᐊᑕ ᓄᒃᑎᖅᑕᐅᓚᐅᖅᑎᓪᓗᒍ, ᓴᒃᑯᑕᐅᓗᓂ ᓄᓇ.

ᑐᓂᓯᖃᑦᑕᕆᐊᖃᖏᓐᓂᖅ ᐱᔪᓐᓇᐅᑎᓂᒃ

8.53 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᐳᖅ ᑐᒃᓯᕋᕐᕕᐅᓚᐅᖅᑎᓪᓗᒍ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᓄᓇᕗᑦ ᒐᕙᒪᒃᑯᖏᑦ ᓄᖅᑲᖅᑎᑦᓯᔭᕆᐊᖃᖅᐳᑦ ᑐᓂᓯᓂᕐᒥᒃ ᐱᔪᒪᔪᓄᑦ ᓇᓕᐊᖕᓄᑐᐃᓐᓇᖅ ᐅᕝᕙᓘᓐᓃᑦ ᐱᔪᓐᓇᐅᑎᒥᒃ ᑐᓂᓯᒋᐊᖃᖏᑦᑐᑦ ᐱᓕᕆᔾᔪᑕᐅᓂᐊᕐᓗᓂ ᐊᑖᒍᑦ ᐊᑐᕐᓗᑎᒃ ᓄᓇᕗᑦ ᐱᖁᔭᖓᓂᒃ ᐃᓗᐊᓂ ᓄᑖᑦ ᓄᓇᐃᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᓕᐅᓚᐅᖅᑎᓪᓗᒋᑦ ᓄᖅᑲᑳᖅᑎᑦᓯᔭᕆᐊᖃᕐᓂᕐᒥᒃ:

1. ᐱᓕᕆᐊᖃᕐᓂᐊᕐᓗᑎᒃ ᐅᕝᕙᓘᓐᓃᑦ ᓴᓗᒻᒪᖅᓴᕆᐊᖃᖅᑐᖅ ᓄᓇᒥ ᒥᑭᓕᑎᒋᐊᕐᓗᒍ; ᐅᕝᕙᓘᓐᓃᑦ
2. ᓱᕋᑦᑎᖅᑕᐅᖁᓇᒍ ᐅᕝᕙᓘᓐᓂᑦ ᐊᓯᕈᖅᑕᐅᖁᓇᒍ ᓴᓗᒻᒪᖅᓴᖅᑕᐅᔭᕆᐊᖃᖅᑐᒥ ᓄᓇᒥ ᑕᐃᑲᓂ.

8.54 ᐊᑐᕆᖃᓐᖏᑎᑦᓯᓂᖅ ᓄᖅᑲᖔᖅᑎᑦᓯᓂᖅ ᑕᐃᔭᐅᔪᖅ ᐃᓗᐊᓂ ᑎᑎᕋᖅᓯᒪᓂᖓᓂ 8.53 ᐊᑐᖅᑕᐅᖏᓐᓇᕐᓂᐊᖅᐳᖅ ᑭᓯᐊᓂ ᑲᓇᑕᐅᑉ ᒐᕙᒪᒃᑯᖏᑦ ᑐᓴᖅᑎᑦᑎᒃᐸᑕ ᓄᓇᕗᑦ ᒐᕙᒪᒃᑯᖏᓐᓂᒃ ᑖᒃᑯᐊ ᐃᓘᓐᓇᖏᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᓄᓇᒥ ᓴᓗᒪᓕᕐᓂᖏᓐᓂᒃ ᐅᕝᕙᓘᓐᓂᑦ ᑎᑭᒐᓱᐊᕐᓂᖓᓂ ᑕᐃᓐᓇ ᐅᓪᓗᖅ ᐊᖏᕈᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ.

ᓴᒃᑯᑕᐅᓂᖓ

8.55 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᐳᖅ ᐅᑯᓂᖓ ᓄᒃᑎᕆᓂᐅᑉ ᐅᓪᓗᐊᓂᒃ, ᑲᓇᑕᐅᑉ ᒐᕙᒪᒃᑯᖏᑦ ᓴᒃᑯᐃᔭᕆᐊᖃᖅᐳᑦ ᑲᒪᒋᔭᖃᕐᓂᕆᔭᖓᓐᓂᒃ ᓴᓗᒻᒪᖅᓴᐃᓂᕐᒧᑦ ᐃᒪᓐᓇᐃᑎᓪᓗᒍ:

1. ᓴᒃᑯᑕᐅᓯᒪᓕᖅᑎᓪᓗᒍ ᓄᓇ, ᐃᓱᒪᓕᐅᕈᑕᐅᔭᕆᐊᖃᖅᑎᓪᓗᒍ ᓱᓕ ᒪᓕᒡᓗᒋᑦ ᑎᑎᕋᖅᓯᒪᓂᖏᑦ 8.42 ᐅᕝᕙᓘᓐᓃᑦ 8.47 ᑖᓐᓇ ᓄᓇ ᓄᑖᖑᓪᓗᓂ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ; ᐊᒻᒪᓗ
2. ᓴᓗᒻᒪᖅᓴᖅᑕᐅᓯᒪᔪᑦ ᓄᓇᐃᑦ, ᒪᓕᒡᓗᒋᑦ ᓇᓪᓕᐅᒃᑯᒫᖏᑦ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 8.59-ᒥ.

8.56 ᑕᐃᒪᓕ ᓄᓇᕗᑦ ᒐᕙᒪᒃᑯᖏᑦ ᒪᓕᖕᓂᖏᑉᐸᑕ ᑐᒃᓯᕋᐅᑕᐅᓯᒪᔪᒥᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᖅᑲᖔᖅᑎᑦᓯᔾᔪᑎᒥᒃ ᐊᑐᕐᓗᒍ ᑎᑎᕋᖅᓯᒪᓂᖓ 8.53 ᐱᔪᓐᓇᖅᓯᑐᐊᖅᐸᑕ, ᐊᒻᒪ ᖃᖓᑐᐃᓐᓇᕐᒃᑯᑦ ᐃᓗᐊᓂ ᐅᓪᓗᐃᑦ 120-ᖑᔪᑦ, ᐅᕝᕙᓘᓐᓃᑦ ᓄᓇᕗᑦ ᒐᕙᒪᒃᑯᖏᑦ ᒪᓕᖕᓂᖏᑉᐸᑕ ᓄᖅᑲᖔᖅᑎᑦᓯᔾᔪᑎᒥᒃ ᐊᑐᕆᐊᖃᖅᑐᒥᒃ ᑭᓯᐊᓂ ᑲᓇᑕᐅᑉ ᒐᕙᒪᒃᑯᖏᑦ ᑐᓴᖅᑎᑦᑎᓚᐅᖅᑎᓪᓗᒋᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐃᓘᓐᓇᖏᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᓄᓇᐃᑦ ᓴᓗᒻᒪᖅᑕᐅᒐᓱᐊᕐᓂᖏᓐᓂ ᐊᑐᖅᑕᐅᓗᑎᒃ ᐊᒻᒪᓗ ᐊᑐᖅᑕᐅᖏᑉᐸᑕ ᐱᓕᕆᔭᕆᐊᖃᖅᑕᖏᑦ ᓄᓇᕗᑦ ᒐᕙᒪᒃᑯᖏᑕ ᓄᖅᑲᖔᖅᑎᑦᓯᔭᕆᐊᖃᕐᓂᕐᒧᑦ ᐊᓯᕈᐃᖁᓇᒋᑦ ᓄᓇᒥᒃ, ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᒋᔭᐅᒐᔭᖅᑐᑦ ᐃᕐᖐᓐᓇᖅ ᓴᒃᑯᐃᓂᖏᓐᓂᒃ ᐱᓕᕆᐊᒃᓴᕆᔭᕋᓗᐊᖏᓐᓂᒃ ᓄᑖᒧᑦ ᓄᓇᒧᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᒧᑦ ᐊᒻᒪᓗ ᑕᐃᒪᐃᑦᑐᑦ ᓄᓇᐃᑦ ᓴᒃᑯᑕᐅᔭᕆᐊᖃᖅᐳᑦ.

8.57 ᑕᐃᒪᓕ ᓄᓇᕗᑦ ᒐᕙᒪᒃᑯᖏᑦ ᑐᓐᓂᖅᑯᓯᖃᖅᐸᑕ, ᑐᓂᓯᒃᐸᑕ ᐅᕝᕙᓘᓐᓃᖅ ᓄᑖᕆᐊᖅᓯᒃᐸᑕ ᓄᓇᒧᑦ ᐊᑐᖅᑐᐊᕈᑎᒥᒃ, ᓚᐃᓴᓐᓯᒥᒃ, ᐱᔪᓐᓇᐅᑎᒥᒃ ᐅᕝᕙᓘᓐᓃᑦ ᐊᓯᐊᓂᒃ ᐱᔪᓐᓇᐅᑎᒋᔭᐅᔪᒥᒃ ᐅᕝᕙᓘᓐᓃᑦ ᐱᔪᒪᓂᕆᔭᐅᔪᓂᒃ ᐅᕝᕙᓘᓐᓃᑦ ᐊᖏᖅᓯᒃᐸᑕ ᐅᕝᕙᓘᓐᓃᑦ ᐱᓕᕆᐊᖃᕐᓂᖅᐸᑕ ᐱᖁᑎᒋᔭᐅᔪᓄᑦ ᐊᒡᕕᐊᕐᓗᑎᒃ ᐅᓪᓗᒥᐅᔪᖅ ᐅᕝᕙᓘᓐᓃᑦ ᓯᕗᓂᒃᓴᒥ ᓴᓗᒻᒪᖅᓴᐃᓂᒃᓴᖓᓐᓄᑦ ᑲᓇᑕᐅᑉ ᒐᕙᒪᒃᑯᖏᑕ ᒪᓕᒡᓗᒍ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᓴᓗᒻᒪᖅᓴᖅᑕᐅᔭᕆᐊᖃᖅᑐᓄᑦ ᓄᓇᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᒋᔭᐅᒐᔭᖅᐳᑦ ᐃᕐᖐᓐᓇᖅ ᓴᒃᑯᐃᓂᖏᓐᓂᒃ ᓴᓗᒻᒪᖅᓴᖅᑕᐅᔭᕆᐊᖃᖅᑐᓄᑦ ᐱᓕᕆᐊᒃᓴᖏᓐᓂᒃ ᐊᒃᑐᐊᓂᖃᖅᑐᓂᒃ ᓄᓇᒧᑦ ᓴᓗᒻᒪᕆᐊᖃᖅᑐᒧᑦ.

8.58 ᑎᑎᕋᖅᓯᒪᓂᖓ 8.57 ᐊᑐᖅᑕᐅᒋᐊᖃᖏᑦᑐᖅ ᑐᓂᕐᕈᑎᓄᑦ, ᑐᓂᔭᐅᓂᖓᓄᑦ ᐅᕝᕙᓘᓐᓃᑦ ᓄᑖᕈᕆᐊᖅᑕᐅᓂᖓᓄᑦ ᖃᓄᐃᓐᓂᐅᔪᑦ ᓄᓇᕗᑦ ᒐᕙᒪᒃᑯᖏᑕ ᐱᔪᓐᓇᐅᑎᖃᕐᕕᒋᓚᐅᓐᖏᑕᖏᑦ ᕿᐱᓗᒃᓯᓂᕐᒧᑦ ᑐᓂᕐᕈᑎᒥᒃ, ᑐᓂᔭᐅᔪᓂᒃ, ᐅᕝᕙᓘᓐᓃᑦ ᓄᑖᕈᕆᐊᕈᑎᓂᒃ.

ᓇᓪᓕᐅᒃᑯᒫᖅ

8.59 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᖅ ᑲᓇᑕᐅᑉ ᒐᕙᒪᒃᑯᖏᑦ ᓇᓪᓕᐅᒃᑯᒫᖃᖅᑎᑦᓯᓗᑎᒃ ᓴᓗᒻᒪᖅᓴᖅᑕᐅᔭᕆᐊᖃᖅᑐᓂᒃ ᓄᓇᓂᒃ ᒐᕙᒪᒃᑯᑦ ᓄᓇᖁᑎᖓᑕ ᐃᓗᐊᓂ ᐱᒋᐊᕐᓗᒍ ᐅᓪᓗᐊᓂ ᐊᓪᓚᕕᒃᑯᑦ ᐱᓕᕆᔭᐅᓂᖓ ᐊᒻᒪᓗ ᐊᐅᓚᑕᐅᓂᕆᔭᖓ ᓄᓇᐅᑉ ᓄᒃᑎᖅᑕᐅᑎᓪᓗᒍ ᑲᒥᓴᓇᒧᑦ, ᐃᓘᓐᓇᖏᑦ ᓴᓗᒻᒪᖅᓴᖅᑕᐅᔭᕆᐊᖃᓚᐅᖅᑐᑦ ᓱᕈᖅᑕᕕᓂᐅᔪᑦ ᒐᕙᒪᒃᑯᑦ ᓄᓇᖁᑎᖏᓐᓂ ᓴᓗᒻᒪᖅᓴᖅᑕᐅᔪᕕᓂᐅᑎᓪᓗᒋᑦ ᓯᕗᕐᖓᒍᑦ ᐅᓪᓗᐊᑕ ᓄᒃᑎᕆᓂᐅᑉ ᓴᓗᒪᓂᕋᖅᑕᐅᓕᕈᓐᓇᖅᐅᑦ ᒪᓕᒃᑕᐅᓗᑎᒃ ᐊᔾᔨᒌᓕᖅᑎᑕᐅᓯᒪᔪᑦ ᒪᓕᒐᖏᑦ ᐊᒻᒪ ᓴᓗᒻᒪᖅᓴᐃᓂᕐᒧᑦ ᒪᓕᒐᖏᑦ ᐊᑐᖅᑕᐅᕙᒃᑐᑦ ᓴᓗᒻᒪᖅᓴᐃᑎᓪᓗᒋᑦ ᓄᓇᓂᒃ.

8.60 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᓇᓪᓕᐅᒃᑯᒫᖃᖅᑎᑦᓯᔭᕆᐊᖃᖅᑐᖅ ᒪᓕᒡᓗᒍ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 8.59 ᐊᑐᕈᓐᓃᕋᔭᖅᑐᖅ ᐃᒪᓐᓇᐃᑉᐸᑦ ᐊᒻᒪ ᑎᑭᐅᑎᓗᒋᑦ ᓄᓇᕗᑦ ᒐᕙᒪᒃᑯᖏᑕ ᓄᑖᕈᕆᐊᖅᓯᓂᖓᑦ, ᑐᓂᕐᕈᓯᖃᕐᓂᖓᑦ ᐅᕝᕙᓘᓐᓃᑦ ᑐᓂᓯᓂᒧᑦ ᓇᓕᐊᖕᓂᑐᐃᓐᓇᖅ ᓚᐃᓴᓐᓯᒥᒃ, ᐱᔪᓐᓇᐅᑎᒥᒃ ᐅᕝᕙᓘᓐᓃᑦ ᐊᓯᖏᓐᓂᒃ ᐱᔪᓐᓇᐅᑎᐅᔪᓂᒃ ᐅᕝᕙᓘᓐᓃᑦ ᐱᔪᒪᓂᐅᔪᓂᑦ, ᐅᕝᕙᓘᓐᓃᑦ ᐱᔪᓐᓇᐅᑎᓂᒃ ᑐᓂᓯᑎᓪᓗᒍ ᐅᕝᕙᓘᓐᓃᑦ ᐱᓕᕆᐊᖃᖅᑎᓪᓗᒍ, ᓄᓇᒥ ᓴᓗᒻᒪᖅᓴᖅᑕᐅᓯᒪᔪᒥ ᐅᕝᕙᓘᓐᓃᑦ ᐃᓚᖓᓂ, ᐱᓕᕆᓚᐅᖅᑎᓪᓗᒋᑦ ᐱᖁᑎᒋᔭᐅᔪᑦ ᓇᓚᒎᖏᑦᑐᒃᑯᑦ ᐊᒃᑐᖅᑕᐅᑎᓪᓗᒋᑦ ᓴᓗᒻᒪᖅᓴᖅᑕᐅᓯᒪᔪᖅ ᓄᓇ, ᐅᕝᕙᓘᓐᓃᑦ ᐃᓚᖓ.

8.61 ᑎᑎᕋᖅᓯᒪᓂᖓᓂ 8.60 ᐊᑐᕆᐊᖃᖏᑦᑐᖅ ᐃᒪᓐᓇᐃᑎᓪᓗᒍ ᓄᓇᕗᑦ ᒐᕙᒪᒃᑯᖏᑦ ᐱᔪᓐᓇᐅᑎᖃᕐᓂᖏᑎᓪᓗᒋᑦ ᕿᐱᓗᒃᓯᓂᕐᒥᒃ ᓄᑖᕈᕆᐊᖅᓯᓂᕐᒧᑦ, ᑐᓂᕐᕈᓯᖃᕐᓂᕐᒧᑦ ᐅᕝᕙᓘᓐᓃᑦ ᑐᓂᓯᓂᒧᑦ ᓇᓕᐊᖕᓂᑐᐃᓐᓇᖅ ᓚᐃᓴᓐᓯᒥᒃ, ᐱᔪᓐᓇᐅᑎᒥᒃ ᐅᕝᕙᓘᓐᓃᑦ ᐊᓯᖏᓐᓂᒃ ᐱᔪᓐᓇᐅᑎᐅᔪᓂᒃ ᐅᕝᕙᓘᓐᓃᑦ ᐱᔪᒪᓂᐅᔪᓂᑦ, ᐅᕝᕙᓘᓐᓃᑦ ᐱᔪᓐᓇᐅᑎᓂᒃ ᑐᓂᓯᑎᓪᓗᒍ ᐅᕝᕙᓘᓐᓃᑦ ᐱᓕᕆᐊᖃᖅᑎᓪᓗᒍ, ᓄᓇᒥ ᓴᓗᒻᒪᖅᓴᖅᑕᐅᓯᒪᔪᒥ ᐅᕝᕙᓘᓐᓃᑦ ᐃᓚᖓᓂ, ᐱᓕᕆᓚᐅᖅᑎᓪᓗᒋᑦ ᐱᖁᑎᒋᔭᐅᔪᑦ ᓇᓚᒎᖏᑦᑐᒃᑯᑦ ᐊᒃᑐᖅᑕᐅᑎᓪᓗᒋᑦ ᓴᓗᒻᒪᖅᓴᖅᑕᐅᓯᒪᔪᖅ ᓄᓇ, ᐅᕝᕙᓘᓐᓃᑦ ᐃᓚᖓ.

8.62 ᑕᐃᒪᓕ ᐊᖏᖅᑕᐅᓯᒪᓗᑎᒃ ᐱᓕᕆᐊᖃᕐᓂᖅᐸᑕ ᐱᒋᐊᕐᕕᒋᓗᒍ ᐊᒻᒪᓗ ᑭᖑᕐᖓᒍᑦ ᐅᓪᓗᖓᑕ ᓄᒃᑎᕆᓂᐅᑉ ᑕᐃᑲᓂ ᖃᓂᒋᔭᖓᓂᓘᓐᓃᑦ ᓴᓗᒻᒪᖅᓴᖅᑕᐅᔭᕆᐊᖃᖅᑑᑉ ᓄᓇᐅᑉ ᐊᑐᖅᑕᐅᑎᓪᓗᒍ ᓇᓪᓕᐅᒃᑯᒫᖅ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 8.59 ᐊᑐᖅᑕᐅᔭᕆᐊᖃᖅᐳᖅ, ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᒋᔭᐅᒐᔭᖅᐳᑦ ᐊᖑᒻᒪᑎᓚᐅᕐᓂᖏᓐᓂᒃ ᓇᓪᓕᐅᒃᑯᒫᓂᒃ ᐃᓗᐊᓂ ᓴᓗᒻᒪᖅᓴᖅᑕᐅᔭᕆᐊᖃᖅᑑᑉ ᓄᓇᐅᑉ ᐊᒃᑐᖅᑕᐅᓯᒪᔫᑉ ᐊᖏᖅᑕᐅᓯᒪᓇᑎᒃ ᐱᓕᕆᐊᖃᖅᑐᕕᓂᕐᓄᑦ ᐊᒻᒪᓗ ᑲᒪᒋᔭᐅᓇᔭᖅᐳᖅ ᑕᒪᓐᓇ ᐊᐅᓚᑕᐅᓗᓂ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑭᓴᖅᑐᐃᒋᐊᕐᓂᕆᔭᖓᑦ.

8.63 ᑲᓇᑕᐅᑉ ᒐᕙᒪᒃᑯᖏᑦ ᓴᓗᒻᒪᖅᓴᐃᒋᐊᑐᖏᑦᑐᑦ ᐊᓯᕈᖅᑕᐅᔭᕆᐊᖃᖅᑐᒥᒃ ᓇᓕᐊᖕᓂᑐᐃᓐᓇᖅ ᓇᓪᓕᐅᒃᑯᒫᖓ ᑎᑎᕋᖅᑕᐅᓯᒪᓂᖓᓂ 8.59 ᐊᑐᕈᓐᓃᖅᑎᓪᓗᒍ, ᐱᖃᓯᐅᑎᓪᓗᒍ ᒪᓕᒃᑕᐅᓗᓂ ᑎᑎᕋᖅᓯᒪᓂᖓ 8.60.

8.64 ᑕᐃᒪᓕ ᓄᓇᕗᑦ ᒐᕙᒪᒃᑯᖏᑦ ᑐᓴᖅᑎᑦᓯᒃᐸᑕ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᖑᒻᒪᑎᓚᐅᖏᓐᓂᖏᓐᓂᒃ ᓇᓪᓕᐅᒃᑯᒫᖑᔭᕆᐊᖃᖅᑐᓂᒃ ᑕᐃᔭᐅᓯᒪᔪᓂᒃ ᐃᓗᐊᓂ ᑎᑎᕋᖅᓯᒪᓂᖓᑕ 8.59, ᓄᓇᕗᑦ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ, ᓯᕗᕐᖓᒍᑦ ᕿᓂᓚᐅᖏᓐᓂᖏᓐᓂᒃ ᐊᓯᖏᓐᓂᒃ ᐋᖅᑭᒋᐊᕈᑎᓂᒃ, ᑐᒃᓯᕋᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇ ᓄᑖᖑᓪᓗᓂ ᓴᓗᒻᒪᖅᓴᖅᑕᐅᔭᕆᐊᖃᕐᓂᖓᓂᒃ.

8.65 ᑕᐃᒪᓕ ᑲᓇᑕᐅᑉ ᒐᕙᒪᒃᑯᖏᑦ ᑐᓂᔭᐅᓐᓂᖅᐸᑕ ᑐᒃᓯᕋᐅᑎᒥᒃ ᒪᓕᒡᓗᒍ ᑎᑎᕋᖅᓯᒪᓂᖓ 8.64 ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᓕᐅᕋᔭᖅᐳᑦ ᑖᓐᓇ ᓄᓇ ᓄᑖᖑᓪᓗᓂ ᓴᓗᒻᒪᖅᓴᖅᑕᐅᔭᕆᐊᖃᕐᓂᖓᓂᒃ ᑲᓇᑕᐅᑉ ᒐᕙᒪᒃᑯᖏᑦ ᐊᖏᖃᑎᖃᖅᐸᑕ ᐱᓕᕆᐊᒃᓴᖏᓐᓂᒃ ᓇᓪᓕᐅᒃᑯᒫᓃᑦᑐᓂᒃ ᐊᖑᒻᒪᑎᓚᐅᖏᓐᓂᖏᓐᓂᒃ ᑎᑎᕋᖅᓯᒪᓂᖓᓃᑦᑐᒥᒃ 8.59.

ᐃᓯᕈᓐᓇᕐᓂᖏᑦ ᓄᓇᒧᑦ ᑲᓇᑕᐅᑉ ᒐᕙᒪᒃᑯᖏᑦ

8.66 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᑐᓂᓯᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐱᔪᓐᓇᐅᑎᒥᒃ ᐃᓯᕈᓐᓇᖁᓪᓗᒋᑦ ᒐᕙᒪᒃᑯᑦ ᓄᓇᖁᑎᖏᓐᓄᑦ ᐊᒻᒪᓗ ᐃᒥᖁᑎᖏᓐᓄᑦ ᐊᒻᒪᓗ ᐱᔪᓐᓇᐅᑎᖃᖅᑐᑦ ᐊᑐᕈᓐᓇᖁᓪᓗᒋᑦ ᓄᓇᒥᐅᑕᐅᔪᓂᒃ ᐃᓗᐊᓃᑦᑐᓂᒃ ᐅᕝᕙᓘᓐᓃᑦ ᒐᕙᒪᒃᑯᑦ ᓄᓇᖁᑎᖏᓐᓃᑦᑐᓂᒃ ᐱᓕᕆᐊᖃᖁᓪᓗᒋᑦ ᑲᒪᒋᔭᕆᐊᖃᖅᑕᖏᓐᓂᒃ ᒥᐊᓂᖅᓯᑎᓪᓗᒋᑦ ᐊᒃᑐᖅᑕᐅᓯᒪᔪᓂᒃ ᓄᓇᓂᒃ ᐃᓗᐊᓃᑦᑐᓂᒃ ᒐᕙᒪᒃᑯᑦ ᓄᓇᖁᑎᖏᑕ.

8.67 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᑐᓂᓯᔭᕆᐊᖃᖅᑐᖅ ᐊᓯᐊᒍᑦ ᐅᖃᐅᑕᐅᓯᒪᒃᐸᑦ ᑭᓯᐊᓂ ᐊᖏᕈᑕᐅᓯᒪᓗᓂ ᑲᓇᑕᐅᑉ ᒐᕙᒪᒃᑯᖏᓄᑦ ᐊᒻᒪ ᓄᓇᕗᑦ ᒐᕙᒪᒃᑯᖏᓄᑦ ᐊᑐᖅᑐᐊᕆᐊᖃᖏᑦᑐᑦ, ᐊᑭᓕᖅᐸᒌᒋᐊᓕᖕᓂᒃ ᐱᑕᖃᕆᐊᑐᖏᑦᑐᖅ, ᐊᑭᓕᐅᑎᓂᒃ ᐊᓯᖏᓐᓂᒃ ᐅᑎᖅᑎᑦᓯᒍᑎᓂᒃ ᐊᑭᓕᖅᓯᒋᐊᑐᖏᑦᑐᑦ ᑲᓇᑕᐅᑉ ᒐᕙᒪᒃᑯᖏᑦ ᐊᑐᖅᑎᓪᓗᒋᑦ ᐱᔪᓐᓇᐅᑎᖏᓐᓂᒃ ᐃᓯᕈᓐᓇᕐᓂᕐᒧᑦ ᓄᓇᒧᑦ ᐅᕝᕙᓘᓐᓃᑦ ᐊᑐᕈᓐᓇᕐᓂᕐᒧᑦ ᓄᓇᒥᐅᑕᐅᔪᓂᒃ ᒪᓕᒡᓗᒍ 8.66 ᐅᕝᕙᓘᓐᓃᑦ ᐊᓯᖏᓐᓂᒃ ᐊᑭᓕᕆᐊᖃᖅᑕᖏᓐᓄᑦ ᓄᓇᕗᑦ ᒐᕙᒪᒃᑯᖏᑕ ᐊᑭᓕᒃᓴᖅᑖᕆᔭᖏᓐᓄᑦ ᐊᒃᑐᐊᓂᖃᖅᑐᓂᒃ ᓄᓇᒥᐅᑕᓕᕆᓂᕐᒧᑦ ᐅᕝᕙᓘᓐᓃᑦ ᓄᓇᒧᑦ ᐃᓯᕐᓂᕐᒧᑦ.

8.68 ᒪᓕᒡᓗᒍ ᑎᑎᕋᖅᓯᒪᓂᖓ 8.69, ᓯᕗᕐᖓᒍᑦ ᐊᑐᓚᐅᖏᓐᓂᖏᓐᓂᒃ ᐱᔪᓐᓇᐅᑎᒥᒃ ᐃᓯᕈᓐᓇᕐᓂᕐᒧᑦ ᓄᓇᒧᑦ ᐅᕝᕙᓘᓐᓃᑦ ᐱᔪᓐᓇᐅᑎᒥᒃ ᐊᑐᕈᓐᓇᕐᓂᕐᒧᑦ ᓄᓇᒥᐅᑕᐅᔪᒥᒃ ᒪᓕᒡᓗᒍ ᑎᑎᕋᖅᓯᒪᓂᖓ 8.66 ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ, ᐱᔪᓐᓇᖅᓯᑐᐊᕈᑎᒃ ᑐᓂᓯᓗᑎᒃ ᑐᓴᖅᑎᑦᑎᔾᔪᑎᒥᒃ ᓄᓇᕗᑦ ᒐᕙᒪᒃᑯᖏᓐᓄᑦ.

8.69 ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᒋᐊᑐᖏᑦᑐᑦ ᑐᓴᖅᑎᑦᑎᔾᔪᑎᒥᒃ ᑕᐃᔭᐅᓯᒪᔪᒥᒃ ᐃᓗᐊᓂ ᑎᑎᕋᖅᓯᒪᓂᖓᓂ 8.68 ᐊᑐᖅᑎᓪᓗᒋᑦ ᐱᔪᓐᓇᐅᑎᒥᒃ ᓄᓇᒧᑦ ᐃᓯᕈᓐᓇᕐᓂᕐᒧᑦ ᐅᕝᕙᓘᓐᓃᑦ ᐊᑐᖅᑎᓪᓗᒋᑦ ᓄᓇᒥᐅᑕᓕᕆᓂᕐᒧᑦ ᑐᐊᕕᕐᓇᖅᑐᒃᑯᑦ ᐱᓕᕆᐊᖃᖅᑎᓪᓗᒋᑦ ᐅᓗᕆᐊᓇᖅᑐᖃᖅᑎᓪᓗᒍ ᐋᓐᓂᐊᖅᑖᕈᑕᐅᔪᓐᓇᕐᓗᓂ ᐅᕝᕙᓘᓐᓃᑦ ᐃᓄᖕᒧᑦ ᐊᑦᑕᕐᓇᕐᓗᓂ, ᐱᖁᑎᒋᔭᐅᔪᖅ ᐅᕝᕙᓘᓐᓃᑦ ᐊᕙᑎᒥᐅᑕᐅᔪᖅ.

8.70 ᐱᓕᕆᐊᒃᓴᖏᑦ ᑲᓇᑕᐅᑉ ᒐᕙᒪᒃᑯᖏᑕ ᐊᑖᒍᑦᖅ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᑉ in ᐱᔾᔪᑎᒋᓪᓗᒋᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᒐᕙᒪᒃᑯᑦ ᓄᓇᖁᑎᖏᑕ ᐃᓗᐊᓂ ᐊᑐᕆᐊᖃᕐᓂᐊᖅᑐᑦ ᐱᔪᓐᓇᐅᑎᓂᒃ ᐃᓯᕈᓐᓇᖁᑎᓂᒃ ᓄᓇᓄᑦ ᐊᒻᒪᓗ ᐱᔪᓐᓇᐅᑎᓂᒃ ᐊᑐᕐᓗᑎᒃ ᓄᓇᒥᐅᑕᓂᒃ ᐊᑐᕈᓐᓇᕐᓂᐊᕐᒪᑕ ᐅᕝᕙᓘᓐᓃᑦ ᓄᓇᓂ ᓇᓗᓇᐃᖅᑕᐅᓯᒪᔪᓂ ᑎᑎᕋᖅᓯᒪᓂᖓᓂᒃ 8.66.

ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᑦ ᐱᕕᒃᓴᐅᔪᑦ

8.71 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᓄᑦ ᐊᒻᒪ ᓄᓇᕗᑦ ᒐᕙᒪᒃᑯᖏᓄᑦ ᐃᑲᔪᖅᑐᐃᔾᔪᑎᐅᔪᓂᒃ ᐊᒻᒪ ᐃᑲᔪᖅᑐᕈᑎᖏᓐᓂᒃ ᐃᓄᐃᑦ ᑎᒥᖁᑎᑕ ᐱᔅᓇᔅᖑᔪᑦ ᐊᑭᑦᑐᕋᐅᑎᖃᑕᐅᔪᓐᓇᖁᓪᓗᒋᑦ ᑳᓐᑐᕌᓂᒃ ᐱᓇᓱᐊᖅᑎᓪᓗᒋᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᓄᑦ ᓄᓇᓄᑦ, ᒪᓕᒃᑕᐅᓗᓂ ᑎᑎᕋᖅᓯᒪᓂᖓ 24 ᓄᓇᕗᒥ ᐊᖏᕈᑎᓂ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ, ᓄᓇᕗᒥ ᓇᖕᒥᓂᓕᖕᓂᒃ ᐃᑲᔫᑎ ᒪᓕᒐᕋᓛᖏᑦ ᐊᑐᖅᑕᐅᓗᑎᒃ (ᑕᐃᔭᐅᕙᖕᒥᔪᖅ NNI ᒪᓕᒐᕋᓛᖏᓐᓂᒃ).

ᑮᓇᐅᔭᑦ ᓇᓪᓕᐅᒃᑯᒫᖏᑦ ᑐᖅᑯᖅᑕᐅᓯᒪᔪᑦ ᑎᒍᒥᐊᖅᑕᑦ

8.72 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᖅ ᐊᑐᖏᓪᓗᒋᑦ ᐊᓯᖏᑦ ᒪᓕᒐᕆᔭᐅᔪᑦ ᐊᑖᓃᑦᑐᑦ ᐅᑯᐊ, ᑲᓇᑕᐅᑉ ᒐᕙᒪᒃᑯᖏᑦ ᐱᓯᒪᒃᓯᔭᕆᐊᖃᖅᑐᑦ ᑮᓇᐅᔭᓂᒃ ᑐᖅᑯᖅᑕᐅᓯᒪᔪᓂᒃ ᑎᒍᒥᐊᖅᓯᔭᕆᐊᖃᖅᐳᑦ ᑕᐃᑲᓂ ᐅᓪᓗᐊᓂ ᓄᒃᑎᕆᓂᕐᒧᑦ ᓴᓗᒻᒪᖅᓴᐃᔾᔪᑎᒃᓴᓂᒃ ᓄᓇᒧᑦ ᑮᓇᐅᔭᖁᑎᖏᓐᓂᒃ ᓇᓪᓕᐅᒃᑯᒫᖏᓐᓂ.

ᐊᒃᑐᖅᑕᐅᓯᒪᔪᑦ ᓄᓇᐃᑦ ᒥᐊᓂᕆᔭᐅᓂᖏᓐᓄᑦ ᑲᑎᒪᔨᕋᓛᑦ

8.73 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᖅ ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐅᓪᓗᐊᑕ ᓄᒃᑎᕆᓂᐅᑉ, ᑖᒃᑯᐊ ᐊᑎᓕᐅᖅᓯᒪᔪᑦ ᐊᖏᖃᑎᒌᒍᒻᒧᑦ ᓴᖅᑭᑦᑎᔭᕆᐊᖃᖅᑐᑦ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᓂᒃ (ᑕᐃᔭᐅᔪᑦ "ISMC"). ᑖᒃᑯᐊ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᑦ ᕿᒥᕐᕈᖃᑦᑕᕐᓂᐊᖅᑐᑦ, ᐅᖃᐅᓯᖃᕐᓗᑎᒃ, ᑲᑎᒪᔾᔪᑎᖃᕐᓗᑎᒃ, ᐊᒻᒪᓗ ᐅᖃᐅᔾᔨᒋᐊᖃᑦᑕᕐᓗᑎᒃ ᐊᑐᓕᖁᔭᓕᐅᕐᓗᑎᒡᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᒥᐊᓂᕆᔭᐅᓂᖏᓐᓄᑦ ᐊᒃᑐᖅᑕᐅᓯᒪᔪᑦ ᓄᓇᐃᑦ ᑲᓇᑕᐅᑉ ᒐᕙᒪᒃᑯᖏᑕ ᐱᖁᔭᕐᔪᐊᖅᑎᒍᑦ ᑲᒪᒋᔭᖏᓐᓂᒃ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ.

8.74 ᓯᕗᕐᖓᒍᑦ ᐊᑎᓕᐅᖅᑕᐅᓚᐅᖅᑳᖅᑎᓐᓇᒍ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᑖᒃᑯᐊ ᐊᖏᖃᑎᒌᒃᑐᑦ ᓴᓇᔭᕆᐊᖃᖅᑐᑦ ᒪᓕᒐᕆᓂᐊᖅᑕᖏᓐᓂᒃ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᖏᑕ. ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᖏᑕ ᒪᓕᒐᖏᑦ ᐃᓕᔭᐅᓯᒪᔭᕆᐊᖃᖅᐳᑦ ᐅᐃᒍᒋᓗᓂᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐊᒻᒪᓗ ᐃᓗᓕᖃᕆᐊᖃᖅᑐᑦ ᐅᑯᓂᖓ:

1. ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᑦ ᑲᑎᒪᖃᑦᑕᕐᓂᐊᕐᓗᑎᒃ ᐃᓄᐃᓴᖕᓂᖅᐹᖑᓗᒍ ᒪᕐᕈᐊᖅᑎ ᐊᕐᕌᒍᒥ;
2. ᑲᓇᑕᐅᑉ ᒐᕙᒪᒃᑯᖏᑦᑐᓂᓯᖃᑦᑕᕐᓗᑎᒃ ᐊᕐᕌᒍᑕᒫᖅᓯᐅᒻᒥᒃ ᐅᓂᒃᑳᓕᐊᒥᒃ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᖏᓐᓄᑦ ᑖᒃᑯᐊ ᒥᒃᓵᓄᑦ ᑐᓴᒐᒃᓴᖃᕐᓗᑎᒃ ᐅᑯᓂᖓ:
   1. ᖃᓄᐃᓕᖓᓕᕐᒪᖔᑦ ᐱᕙᓪᓕᐊᓂᕆᔭᖓᑦ, ᓯᕗᓪᓕᐅᑎᓯᒪᔭᖏᑦ ᐊᒻᒪᓗ ᐃᖅᑲᓇᐃᔭᖅᑕᐅᓂᐊᖅᑐᓄᑦ ᐸᕐᓇᐅᑎᖏᑦ ᓴᓗᒻᒪᖅᓴᐃᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ;
   2. ᖃᓄᕐᓗ ᐊᒃᑐᐃᓯᒪᖕᒪᖔᑦ ᐅᕝᕙᓘᓐᓃᑦ ᓂᕆᐅᒋᔭᐅᔪᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᖅᑕᐅᓂᐊᖅᑐᑦ ᓴᓗᒻᒪᖅᓴᖅᑕᐅᔪᓄᑦ ᑕᒪᒃᑯᐊ ᐱᖃᓯᐅᔾᔭᐅᓯᒪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ;
   3. ᓇᐃᓈᖅᓯᒪᓗᒋᑦ ᐅᓂᒃᑳᑦ ᐱᐅᓯᕆᔭᖓ ᐊᒻᒪ ᐅᓄᕐᓂᕆᔭᖏᑦ ᓄᓇᒥᐅᑕᐅᔪᑦ ᐊᑐᖅᑕᐅᔪᑦ ᒪᓕᒃᑕᐅᓪᓗᓂ ᑎᑎᕋᖅᓯᒪᓂᖓ 8.66; ᐊᒻᒪᓗ
   4. ᐊᔾᔨᔾᒌᓕᖅᑎᑕᐅᓯᒪᔪᑦ ᒪᓕᒐᐃᑦ ᐊᑐᖅᑕᐅᔪᑦ ᓴᓗᒻᒪᖅᓴᐃᑎᓪᓗᒋᑦ ᐱᓕᕆᔭᖏᑎᒍᑦ ᑲᓇᑕᐅᑉ ᒐᕙᒪᒃᑯᖏᑕ;
3. ᑖᒃᑯᐊ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᖏᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᐊᒃᑐᐃᓂᕆᔭᖓᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᑕ ᒥᐊᓂᕆᔭᐅᓂᕆᔭᖓᓄᑦ ᓄᓇᐃᑦ ᓱᕈᖅᑕᐅᓯᒪᔪᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᑯᖏᑕ ᐊᑭᓕᕆᐊᖃᖅᑕᖏᑦ ᐱᖁᔭᕐᔪᐊᖅᑎᒍᑦ; ᐊᒻᒪᓗ
4. ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᖏᑦ ᑐᓂᓯᖃᑦᑕᕆᐊᖃᖅᑐᑦ ᐅᖃᐅᔾᔨᒋᐊᕈᑎᖏᓐᓂᒃ, ᐊᑐᓕᖁᔭᓕᐊᖏᓐᓂᒃ ᐊᒻᒪᓗ ᓯᕗᓪᓕᐅᑎᔭᖏᓐᓂᒃ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᓱᒪᒃᓴᖅᓯᐅᕈᑕᐅᔭᕆᐊᖃᖅᑐᑦ ᐱᓪᓗᒋᑦ.

8.75 ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᓇᓕᐊᖕᓂᑐᐃᓐᓇᖅ ᐅᖃᐅᔾᔭᐅᒋᐊᕈᑎᒋᔭᖏᓐᓂᒃ ᐊᒻᒪᓗ ᐊᑐᓕᖁᔭᓕᐊᖑᔪᓂᒃ ᐊᒃᑐᖅᑕᐅᓯᒪᔪᓄᑦ ᓄᓇᓄᑦ ᒥᐊᓂᖅᓯᓂᐊᖅᑐᓂᒃ ᑲᑎᒪᔨᕋᓛᖏᑕ, ᐱᖃᓯᐅᑎᓪᓗᒍ ᐊᑭᓴᖅᑐᐃᒋᐊᕐᓂᖅ ᐅᖃᐅᔾᔭᐅᒋᐊᕈᑎᓂᒃ ᐊᒻᒪᓗ ᐊᑐᓕᖁᔭᓕᐊᖑᔪᓂᒃ, ᓯᕗᕐᖓᒍᑦ ᐃᓱᒪᓕᐅᕈᑎᖃᓚᐅᖏᓐᓂᖏᓐᓂ ᑲᑎᒪᔾᔪᑕᐅᔪᒧᑦ ᐊᑐᕐᓗᒍ ᑎᑎᕋᖅᓯᒪᓂᖓ 8.74.

8.76 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᓂᐊᖅᑐᖅ ᐊᑐᖏᓪᓗᒋᑦ ᐊᓯᖏᑦ ᒪᓕᒐᐃᑦ ᐅᑯᓇᓂ ᑎᑎᕋᖅᑕᐅᓯᒪᔪᑦ, ᐃᓘᓐᓇᖏᑦ ᐃᓱᒪᓕᐅᕈᑕᐅᔪᑦ ᐊᒃᑐᐊᓂᖃᖅᑐᑦ ᒥᐊᓂᕆᔭᐅᓂᖏᓐᓄᑦ ᐊᒃᑐᖅᑕᐅᓯᒪᔪᑦ ᓄᓇᐃᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᓯᕗᓪᓕᐅᔾᔭᐅᓯᒪᓂᕆᔭᖓᓄᑦ ᒥᐊᓂᕆᔭᐅᓂᖏᓐᓄᑦ ᐊᒃᑐᖅᑕᐅᓯᒪᔪᑦ ᓄᓇᐃᑦ ᐊᒻᒪᓗ ᓴᓗᒻᒪᖅᓴᐃᓪᓗᑎᒃ ᐱᓕᕆᔭᐅᔪᑦ ᒪᓕᒡᓗᒍ ᐱᓕᕆᐊᒃᓴᓂᒃ ᑐᓂᓯᓂᕐᒧᑦ ᐊᖏᖃᑎᒌᒍᑎᐅᔪᖅ ᑖᒃᑯᐊ ᑲᒪᒋᔭᐅᓂᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑖᒃᑯᓄᖓᑐᐊᖅ.

ᐊᕐᕌᒍᑦ ᖁᓕᑦ ᐊᓂᒍᖅᑎᓗᒋᑦ ᕿᒥᕐᕈᓂᖅ

8.77 ᐊᖏᖃᑎᒌᒍᑎᖃᖅᑐᑦ ᐃᓕᓴᖅᓯᕗᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᓪᖓ ᐊᒃᑐᐃᓂᖃᑉᕐᒪᑦ ᐊᒻᒪᓗ ᓱᓕ ᐊᒃᑐᐃᕙᓪᓕᐊᖏᓐᓇᕐᓂᐊᖅᑐᖅ ᓄᓇᕗᒥ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᓯᔾᔨᖅᓯᔪᓐᓇᕐᒪᑦ ᒥᐊᓂᕆᔭᐅᔾᔪᑎᖏᓐᓂᒃ ᓴᓗᒻᒪᖅᓴᖅᑕᐅᔭᕆᐊᖃᖅᑐᑦ ᓄᓇᐃᑦ. ᑕᐃᒪᐃᒻᒪᑦ, ᑕᒪᕐᒥᒃ ᐊᖏᖃᑎᒌᒃᑐᑦ ᐅᖃᐅᓯᖃᕆᐊᖃᖅᑐᑦ ᐱᔭᕆᐊᖃᕐᓂᖏᓐᓂᒃ ᐃᓗᐊᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐃᓗᓕᖃᖁᓪᓗᒋᑦ ᐱᕕᒃᓴᐅᔪᒥᒃ ᕿᒥᕐᕈᖃᑦᑕᕐᓂᐊᕐᒪᑕ ᐊᕐᕌᒍᑦ ᖁᓕᑦ ᐊᓂᒍᕌᖓᑕ ᐱᒋᐊᕐᕕᒋᓗᒍ ᐅᓪᓗᐊ ᓄᒃᑎᕆᓂᐅᑉ ᖃᐅᔨᒋᐊᕈᓐᓇᖁᓪᓗᒋᑦ ᐱᓕᕆᒃᑲᓐᓂᕆᐊᖃᕐᒪᖔᑦ ᓇᓕᐊᑐᐃᓐᓇᖅ ᐊᖏᖃᑕᐅᓯᒪᔪᖅ ᐱᓕᕆᐊᖃᕐᓗᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᑕ ᐊᒃᑐᖅᑕᐅᖏᓐᓂᒃ ᒥᐊᓂᕆᔭᐅᔪᒧᑦ ᓄᓇᒧᑦ ᓴᓗᒻᒪᖅᓴᖅᑕᐅᔭᕆᐊᖃᖅᑐᒧᑦ.

ᐊᓯᖏᑎᒍᑦ ᐋᖅᑭᒡᓱᐃᓂᖅ

8.78 ᐃᓗᐊᓃᑦᑐᑦ ᓇᓕᐊᑐᐃᓐᓇᖅ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᑉ ᐃᓱᒪᒋᔭᐅᒋᐊᑐᖏᑦᑐᖅ ᑲᓇᑕᐅᑉ ᒐᕙᒪᒃᑯᖏᑦ, ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦ, ᐅᕝᕙᓘᓐᓃᑦ ᓇᓕᐊᑐᐃᓐᓇᖅ ᒪᕐᕉᒃ ᐃᒻᒥᒃᑯᑦ ᐃᓛᒃᑰᖅᑐᒥᒃ ᐊᖏᖃᑎᒌᒍᑎᓕᐅᕐᓂᖏᓐᓂᒃ ᐱᔾᔪᑎᒋᓪᓗᒍ ᓴᓗᒻᒪᖅᓴᖅᑕᐅᔭᕆᐊᖃᖅᑐᖅ ᓄᓇ. ᑕᐃᒪᐃᑦᑐᑦ ᐃᒻᒥᒃᑰᖅᑐᑦ ᐊᖏᕈᑎᐅᔪᑦ ᐊᒃᑐᐃᓂᖃᕈᓐᓇᖏᑦᑐᑦ ᐱᔪᓐᓇᐅᑎᒥᒃ ᐅᕝᕙᓘᓐᓃᑦ ᐊᔭᐅᖅᑐᐃᔭᕆᐊᖃᖏᑦᑐᑦ ᐱᓕᕆᐊᒃᓴᕆᓂᐊᖅᑕᖓᓂᒃ ᓇᓕᐊᑐᐃᓐᓇᐅᑉ ᐊᖏᖃᑕᐅᓯᒪᔪᑉ ᐃᒻᒥᒃᑰᖅᑐᒃᑯᑦ ᐊᖏᖃᑎᒌᒍᑎᑎᒍᑦ.

ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐅᐸᓗᖓᐃᔭᐅᑏᑦ

9.1 ᐊᖏᖃᑎᒌᒃᓯᒪᔪᑦ ᐊᖏᖅᓯᒪᑦᑎᐊᖅᑐᑦ ᐃᖅᑲᓇᐃᔭᖃᑎᒌᖕᓂᕐᒥᒃ ᐃᑲᔪᖃᑎᒌᒡᓗᑎᒃ, ᐃᓗᐊᓂ ᐊᑐᕐᓗᒍ ᓇᓗᓇᐃᖅᑕᐅᓯᒪᔪᑉ ᐱᕕᒃᓴᓕᐊᖑᓯᒪᓪᓗᑎᒃ ᑎᑎᕋᖅᓯᒪᓂᖏᓐᓂ 9.6 ᐊᒻᒪᓗ 9.8, ᓴᓇᖁᓪᓗᒋᑦ ᐊᒻᒪᓗ ᐊᑐᓕᖅᑎᑦᓯᖁᓪᓗᒋᑦ ᓄᒃᑎᕆᓕᖅᑎᓪᓗᒋᑦ ᐊᑐᖅᑕᐅᓂᐊᖅᑐᓂᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᕐᓂᒧᑦ ᐅᐸᓗᖓᐃᔭᐅᑏᑦᓂᒃ (ᑕᐃᔭᐅᔪᑦ "ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ") ᐊᑐᕐᓗᑎᒃ ᑮᓇᐅᔭᓂᒃ ᐊᖏᕈᑕᐅᓯᒪᔪᓂᒃ ᐊᑐᖅᑕᐅᓂᐊᕐᓗᑎᒃ ᒪᓕᒡᓗᒋᑦ ᑎᑎᕋᖅᓯᒪᓂᖓ 12.14 ᐅᑯᓇᓂ ᐊᖏᖃᑎᒌᒍᑎᓂ ᓯᕗᓪᓕᖅᓯᐅᑎᓂ.

9.2 ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦ ᓴᓇᔭᕆᐊᖃᖅᑐᑦ ᐊᒻᒪᓗ ᐊᑐᓕᖅᑎᑦᑎᓗᑎᒃ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐅᐸᓗᖓᐃᔭᐅᑎᓂᒃ (ᑕᐃᔭᐅᔪᑦ "ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ") ᒪᓕᒡᓗᒋᑦ ᐃᓗᐊᓂ ᓇᓗᓇᐃᖅᑕᐅᓯᒪᔪᑉ ᐱᕕᒃᓴᓕᐊᖑᓯᒪᔪᑉ ᑎᑎᕋᖅᓯᒪᓂᖏᓐᓂ 9.7 ᐊᒻᒪᓗ 9.9 ᐊᑐᕐᓗᑎᒃ ᑮᓇᐅᔭᓂᒃ ᐊᖏᕈᑕᐅᓯᒪᔪᓂᒃ ᐊᑐᖅᑕᐅᓂᐊᕐᓗᑎᒃ ᒪᓕᒡᓗᒋᑦ ᑎᑎᕋᖅᓯᒪᓂᖓ 12.19 ᐅᑯᓇᓂ ᐊᖏᖃᑎᒌᒍᑎᓂ ᓯᕗᓪᓕᖅᓯᐅᑎᓂ.

ᑐᓐᖓᕕᖓᑕ ᑐᕌᒐᒃᓴᖓ

9.3 ᑐᓐᖓᕕᖏᑕ ᑐᕌᒐᒃᓴᖏᑦ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐊᒻᒪᓗ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ (ᑲᑎᓪᓗᒋᒃ ᐊᒻᒪ ᑭᖑᕐᖓᒍᑦ "ᐅᐸᓗᖓᐃᔭᐅᑏᑦ") ᐊᑐᑦᓯᐊᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᖁᓪᓗᒋᑦ ᓇᐅᒃᑯᑐᐃᓐᓇᖅ ᐃᖅᑲᓇᐃᔮᒃᓴᐅᔪᓂ ᓴᖅᑭᑕᐅᓂᐊᖅᑐᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᑎᒍᓯᓂᖏᓐᓄᑦ ᐱᓕᕆᐊᒃᓴᓂᒃ ᐊᑕᐅᑦᓯᒃᑯᓪᓗ ᓯᕗᒧᐊᒃᑎᑦᓯᓗᑎᒃ ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᖅᑎᖃᕈᓐᓇᑦᓯᐊᖁᓪᓗᒋᑦ ᐊᒥᒐᖏᑦᑐᓂᒃ ᐱᓕᕆᐊᖃᕈᓐᓇᕐᓂᐊᕐᒪᑕ ᐱᓕᕆᐊᒃᓴᓂᒃ ᑎᒍᔭᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᓂᒃ.

ᐊᒃᑐᐊᓂᖓ ᑎᑎᕋᖅᓯᒪᓂᖓᓄᑦ 23-ᒧᑦ ᓄᓇᕗᑦ ᐊᖏᖃᑎᒌᒍᑎᖏᓐᓂ

9.4 ᐅᐸᓗᖓᐃᔭᐅᑏᑦᐅᔪᑦ ᐃᓕᓴᖅᓯᔭᕆᐊᖃᖅᑐᑦ ᐊᒻᒪ ᒪᓕᒃᓯᒪᓗᑎᒃ ᑎᑎᕋᖅᓯᒪᓂᖓᓂᒃ 23-ᒥᒃ ᓄᓇᕗᒥ ᐊᖏᖃᑎᒌᒍᑎᓃᑦᑐᓂᒃ.

ᓄᓇᕗᑦ ᒐᕙᒪᒃᑯᖏᑕ ᐊᐅᓚᑦᓯᓂᖏᑕ ᐋᖅᑭᒡᓱᖅᓯᒪᓂᖓᑦ

9.5 ᐊᖏᖃᑎᒌᒍᑎᓕᐅᖅᑐᑦ ᐃᓕᓴᖅᓯᕗᑦ ᐋᖅᑭᒡᓯᒪᓂᕆᔭᖓ ᓄᓇᕗᑦ ᒐᕙᒪᒃᑯᖏᑕ ᐊᐅᓚᑦᓯᔾᔪᑎᖏᑕ ᐱᒻᒪᕆᐅᓂᖓᓂᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐸᕐᓇᐅᑎᖃᕐᓂᐊᖅᑎᓪᓗᒋᑦ ᐊᑐᕐᓗᑎᒃ ᑎᑎᕋᖅᓯᒪᓂᖓᓂᒃ 9-ᒥᒃ.

ᖃᖓᐅᓂᐊᕐᓂᖓ

9.6 ᐊᖏᖃᑎᒌᒍᑎᓕᐅᖅᑐᑦ ᐃᖅᑲᓇᐃᔭᕆᐊᖃᖅᐳᑦ ᐊᒃᓱᕈᕐᓗᑎᒃ ᐊᒻᒪᓗ ᓯᕗᓪᓕᐅᑎᔭᐅᓯᒪᓗᓂ ᐱᔭᕇᖅᑕᐅᔭᕆᐊᖃᕐᓂᖓ ᐊᒻᒪᓗ ᐊᖏᖅᑕᐅᔭᕆᐊᖃᕐᓂᖓ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦᐅᔪᑦ. ᐊᖏᖃᑎᒌᒍᑎᓕᐅᖅᑐᑦ ᐱᔭᕇᖅᓯᔭᕆᐊᖃᖅᐳᑦ ᐊᒻᒪᓗ ᐊᖏᖅᓯᓗᑎᒃ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦᐅᓂᐊᖅᑐᓂᒃ ᐃᓗᐊᓂ ᑕᖅᑭᑦ ᐱᖓᓲᔪᖅᑐᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᓯᕗᓪᓕᖅᓯᐅᑎᐅᔪᑦ ᐊᖏᖃᑎᒌᒍᑏᑦ

9.7 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐃᓗᓕᖃᕆᐊᖃᖅᑐᖅ ᖃᖓᒃᑯᑦ ᓴᓇᔭᐅᓂᐊᕐᒪᖔᑕ ᓇᓗᓇᐃᖅᓯᓯᒪᔪᓂᒃ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ.

ᐊᑯᓂᐅᓂᖓ

9.8 ᑖᒃᑯᐊ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏ, ᓴᓇᔭᐅᓯᒪᓪᓗᑎᒃ ᐊᖏᖃᑎᒌᒍᑎᓕᐅᖅᓯᒪᔪᓄᑦ, ᐱᒋᐊᖅᑕᐅᔭᕆᐊᖃᖅᐳᑦ ᐊᖏᖅᑕᐅᓗᑎᒃ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐊᒻᒪᓗ ᐃᓱᓕᑎᓪᓗᒍ ᓄᒃᑎᕆᓂᕐᒧᑦ ᐅᓪᓗᖓ.

9.9 ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ ᐱᒋᐊᕐᓂᐊᖅᐳᑦ ᐅᓪᓗᐊᓂ ᓄᒃᑎᕆᓂᕐᒧᑦ ᐅᓪᓗᖓᓂ ᐊᒻᒪᓗ ᐊᑐᓕᖅᑎᑕᐅᓂᐊᖅᐳᑦ ᐱᕕᒃᓴᓕᐊᖑᓯᒪᔪᖅ ᒪᓕᒡᓗᒍ ᐃᓱᒪᓕᐅᕈᑎᒋᓯᒪᔭᖓᑦ ᓄᓇᕗᑦ ᒐᕙᒪᒃᑯᖏᑕ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦᑕ. ᑕᐃᒪᐃᑦᑐᓂᒃ ᐱᒋᐊᕈᑎᐅᔪᖅ ᐊᑯᓂᐅᓂᐊᕆᐊᖃᖅᐳᖅ ᑐᖔᓂ ᐊᕐᕌᒍᑦ ᑕᓪᓕᓪᒪᑦ ᐱᒋᐊᕐᕕᒋᓗᒍ ᓄᒃᑎᕆᓂᕐᒧᑦ ᐅᓪᓗᐊ. ᓯᕗᕐᖓᒍᑦ ᐃᓱᓕᓚᐅᖅᑎᓐᓇᒍ ᐱᕕᒃᓴᓕᐊᖑᓯᒪᔪᖅ, ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦ ᕿᒥᕐᕈᔭᕆᐊᖃᖅᑐᑦ ᖃᐅᔨᓴᐃᓗᑎᒃ ᐱᓕᕆᔭᕆᐊᖃᕐᒪᖔᑕ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ ᐊᑐᖅᑕᐅᓂᖓ ᐃᓱᓕᓚᐅᖅᑎᓪᓗᒍ. ᐅᖓᕙᕆᐊᖅᑕᐅᔭᕆᐊᖃᕐᒪᖔᑕ ᕿᒥᕐᕈᓇᒃᑕᐅᓂᒃᓴᕆᔭᖓ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ.

ᐃᓗᓕᖏᑦ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ

9.10 ᑖᒃᑯᐊ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐃᓗᓕᖃᕆᐊᖃᖅᑐᑦ ᐃᒪᐃᑦᑐᓂᒃ:

1. ᓇᐅᑦᑎᖅᓱᐃᓂᖅ: ᒪᓕᒐᖏᑦ ᐱᖓᓲᓂᓐᖔᖅᑐᓂᒃ ᐅᖃᐅᔾᔨᒋᐊᖅᑎᓂᒃ ᑲᑎᒪᔨᕋᓛᖃᕐᓗᑎᒃ ᓇᐅᑦᑎᖅᓱᐊᖃᕐᓂᐊᖅᑐᓂᒃ ᐊᑐᓕᖅᑎᑕᐅᓂᕆᔭᖏᓐᓄᑦ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐊᒻᒪᓗ ᐅᖃᐅᔾᔨᖏᐊᖃᑦᑕᕐᓗᓂ, ᑕᓯᐅᖅᓯᖃᑦᑕᕐᓗᑎᒃ, ᐊᒻᒪᓗ ᐊᑐᓕᖁᔭᓕᐅᖃᑦᑕᕐᓗᑎᒃ ᐱᔨᑦᓯᕈᑎᒋᔭᕆᐊᖃᖅᑕᖏᑦ ᐱᓪᓗᒋᑦ.
2. ᐱᓕᕆᐊᑦ ᒥᐊᓂᕆᔭᐅᓂᖏᑦ ᐊᐅᓚᑕᐅᓂᖏᑦ ᐊᓪᓚᕕᖕᒥ ᐊᒻᒪᓗ ᐱᔨᑦᓯᕈᑕᐅᓂᖏᑦ: ᓴᐅᓂᕆᔭᖏᑕ ᐋᖅᑭᒡᓯᒪᓂᕆᓂᐊᖅᑕᖏᑦ ᐱᓕᕆᐊᑦ ᒥᐊᓂᕆᔭᐅᔾᔪᑎᖏᓐᓄᑦ, ᐊᓪᓚᕕᖕᒥ ᐊᐅᓚᑕᐅᓂᖏᓐᓄᑦ, ᐊᒻᒪᓗ ᐱᔨᑦᓯᕈᑕᐅᓂᖏᓐᓄᑦ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᑖᒃᑯᐊ ᑐᓐᖓᕕᖃᕋᔭᖅᑐᑦ ᖃᓄᑎᒋ ᑮᓇᐅᔭᓂᒃ ᐊᑐᐃᓐᓇᐅᕕᐅᓂᕆᔭᖏᑦ ᒪᓕᒡᓗᒋᑦ.
3. ᐊᕙᑎ: ᐃᓕᓴᖅᓯᓗᑎᒃ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐃᓗᐊᓂ ᐃᓱᒪᒃᓴᖅᓯᐅᕈᑎᖃᖅᓯᒪᖕᒪᑕ ᒫᓐᓇ ᐊᐅᓚᑕᐅᔪᓂᒃ ᐊᕙᑎᒋᔭᐅᔪᓂᒃ ᐊᒻᒪᓗ ᐃᖅᑲᓇᐃᔭᖅᑎᖁᑎᒋᔭᐅᔪᓂᒃ ᓄᓇᕗᑦ ᐃᓗᐊᓂ.
4. ᐃᖅᑲᓇᐃᔭᖅᑎᑖᖅᐸᓪᓕᐊᓂᖅ:
   1. ᐃᔨᒋᓂᖅᓴᐅᓗᑎᒃ ᐱᑐᒃᑎᑦᓯᓂᕐᒥᒃ ᐊᒻᒪᓗ ᑐᕌᒐᖃᕐᓂᕐᒥᒃ ᐃᓕᓐᓂᐊᖅᑐᓂᒃ ᐃᓚᐅᔪᓂᒃ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐃᖅᑲᓇᐃᔭᕐᓂᕐᒧᑦ ᐱᕕᒃᓴᐅᔪᓄᑦ.
   2. ᐅᓪᓗᖓᓂ ᓄᒃᑎᕆᓂᐅᑉ ᐃᓕᓴᖅᓯᓗᑎᒃ ᐃᓚᖏᑦ ᓯᓚᖅᑲᑎᑦᑎᓐᓃᑦᑐᑦ ᐊᑐᖅᑕᐅᒋᐊᖃᑐᐃᓐᓇᕆᐊᖃᕐᒪᑕ ᐱᓕᕆᖃᑕᐅᓂᐊᖅᑎᓪᓗᒋᑦ ᓯᕗᒧᐊᒃᑎᑦᓯᖁᓪᓗᒋᑦ ᓄᓇᕗᑦ ᒐᕙᒪᒃᑯᖏᑦ ᐱᑦᔨᓯᕈᑎᒃᓴᖏᓐᓂᒃ ᑐᓂᔭᐅᓯᒪᔪᓂᒃ ᐱᓕᕆᐊᒃᓴᓂᒃ ᐊᒻᒪᓗ ᐱᔨᑦᓯᕈᑎᒃᓴᓂᒃ.
   3. ᐃᓕᓴᖅᓯᓗᑎᒃ ᐃᖅᑲᓇᐃᔭᖅᑎᑖᕋᓱᐊᕐᓂᕐᒧᑦ ᐱᓕᕆᐊᖃᕈᓐᓇᕐᒪᑕ ᑖᒃᑯᐊ ᐊᖏᖃᑎᒌᒍᑎᓕᐅᖅᓯᒪᔪᑦ ᐱᓕᕆᔪᒪᓂᖃᕐᒪᑕ ᐃᓕᓐᓂᐊᖅᑎᐅᔪᑦ ᐃᖅᑲᓇᐃᔮᓄᑦ ᓄᒃᑎᖁᓪᓕᒋᑦ ᐱᓕᒻᒪᒃᓴᖅᑕᐅᓂᕆᔭᖏᑦ ᐱᔭᕇᓚᐅᖅᑎᓪᓗᒋᑦ.
5. ᕿᒥᕐᕈᓇᖕᓂᖅ: ᐱᐅᓯᐅᔪᖅ ᓇᐅᑦᑎᖅᓱᐊᖃᕐᓂᐊᕐᓗᓂ ᐊᒻᒪᓗ ᕿᒥᕐᕈᓇᖃᑦᑕᕐᓂᐊᕐᓗᓂ ᑲᔪᓯᔪᓂᒃ ᐱᓕᕆᐊᖑᔪᓂᒃ ᑕᐃᒪᐃᓕᐅᖅᑎᓪᓗᒋᑦ ᐋᖅᑭᒋᐊᕆᔪᓐᓇᕐᓂᐊᕐᒪᑕ ᐊᒻᒪ ᑕᒻᒪᖅᑐᓂᒃ ᐋᖅᑭᒡᓯᖃᑦᑕᕐᓗᑎᒃ ᐱᔭᕆᐊᖃᕌᖓᑕ.
6. ᐃᓕᓐᓂᐊᕐᓂᖅ, ᐱᓕᒻᒪᒃᓴᕐᓂᖅ ᐊᒻᒪᓗ ᓯᕗᕐᖓᒍᑦ ᐃᖅᑲᓇᐃᔭᓚᐅᖅᑎᓐᓇᒋᑦ ᐱᒋᐊᕈᑎᒃᓴᑦ: ᐱᓕᕆᐊᒃᓴᑦ ᐃᓗᓕᑯᓘᔭᖏᑦ, ᐱᖃᓯᐅᑎᓪᓗᒋᑦ ᐱᓕᒻᒪᒃᓴᐅᑎᑦ ᐊᒻᒪᓗ ᐃᓕᓴᕆᔭᐅᔾᔪᑎᑦ ᐃᓕᓐᓂᐊᖅᑎᓄᑦ, ᐃᖅᑲᓇᐃᔭᓯᓐᓇᖅᑎᓪᓗᒋᑦ ᐃᓕᓐᓂᐊᖅᑐᑦ, ᐊᕙᓗᔭᐅᓯᒪᓗᓂ ᐃᓕᓐᓂᐊᖅᑐᖅ ᐃᑲᔪᖅᑐᐃᔾᔪᑎᓄᑦ, ᐱᓕᕆᐊᖏᑦ ᖁᕝᕙᕆᐊᖅᑕᐅᖃᑦᑕᕐᓂᖏᑦ ᐊᒻᒪᓗ ᒥᐊᓂᖅᓯᓂᖅ, ᐱᖃᓯᐅᑎᓪᓗᒍ ᑎᒥᐅᑉ ᐋᖅᑭᒡᓱᖅᓯᒪᓂᖓᑕ ᐋᖅᑭᒡᓯᒪᓂᖓ ᓇᐅᑦᑎᖅᓱᐊᖃᕐᓂᒃᑯᑦ ᐱᓕᕆᐊᖑᔪᑉ ᐱᔨᑦᓯᕈᑕᐅᓂᕆᔭᖓᓂᒃ.

ᐱᓕᕆᐊᑉ ᐃᓗᓕᖏᑦ

9.11 ᑖᒃᑯᐊ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐱᖃᓯᐅᔾᔨᓯᒪᔭᕆᐊᖃᖅᐳᑦ ᐱᓕᕆᐊᑦ ᐃᓗᓕᖏᓐᓂ:

1. ᐱᓕᒻᒪᒃᓴᓂᖅ ᐊᒻᒪᓗ ᐃᓕᓴᕆᔭᐅᔾᔪᑎᖃᖅᑐᑦ ᐃᓕᓐᓂᐊᕐᓃᑦ: ᓯᕗᕐᖓᒍᑦ ᐱᓕᒻᒪᒃᓴᖅᑕᐅᓗᑎᒃ ᐃᓕᓴᖅᑕᐅᓂᕆᔭᖓᑦ ᓂᕆᐅᒋᔭᐅᕗᖅ ᐱᔨᑦᓯᕈᑕᐅᒐᔭᕐᓂᖓᓂᒃ ᓄᓇᕗᒥ ᐊᒻᒪᓗ ᐊᐅᓚᑕᐅᓗᓂ ᓄᓇᕗᑦ ᓯᓚᑦᑐᓴᕐᕕᖓᓐᓂ, ᑖᒃᑯᐊ ᑐᕌᒐᖃᓪᓗᐊᖅᑐᑦ ᐃᓕᓐᓂᐊᖅᑎᐅᔪᓄᑦ 12-ᒥᒃ ᖁᕝᕙᓯᖕᓂᖃᖅᑐᓂᒃ ᐱᔭᕇᖅᓯᓯᒪᔪᓄᑦ ᐅᕝᕙᓘᓐᓃᑦ ᐊᔾᔨᖓᓂᒃ ᐱᓕᕆᔪᓐᓇᐅᑎᖃᖅᑐᓄᑦ, ᐊᒻᒪ ᐱᖃᓯᐅᔾᔨᓯᒪᔭᕆᐊᖃᖅᑐᑦ ᐅᑯᓂᖓ:
   1. ᐱᓕᒻᒪᒃᓴᖅᑕᐅᓗᓂ ᓯᕗᕐᖓᒍᑦ ᐃᓕᓯᒪᔭᕆᐊᖃᖅᑕᖏᓐᓂᒃ ᐃᓕᓐᓂᐊᖁᓪᓗᒍ ᖁᕝᕙᓯᖕᓂᖅᓴᒧᑦ ᓯᓚᑦᑐᓴᕐᕕᖕᒧᑦ ᐃᓕᓴᖅᑕᐅᕙᒃᑐᓂᒃ ᐃᓕᓐᓂᐊᖁᓪᓗᒍ; ᐊᒻᒪᓗ
   2. ᐸᕐᓇᒃᑕᐅᓗᓂ ᐱᓕᒻᒪᒃᓴᖅᑕᐅᓗᓂ ᐃᓕᓐᓂᐊᖅᑎᑕᐅᓗᓂ ᐸᕐᓇᒃᓯᒪᑦᓯᐊᖁᓪᓗᒍ ᖁᕝᕙᓯᖕᓂᖅᓴᒧᑦ ᐃᓕᓐᓂᐊᕈᑎᓂᒃ ᐃᓕᓴᓕᖅᐸᑦ.

1. ᐱᔾᔪᑎᒋᓪᓗᒋᑦ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ, ᖁᕝᕙᓯᖕᓂᖅᓴᒥ ᐃᓕᓴᕈᑎᐅᔪᑦ ᐱᖃᓯᐅᔾᔨᓯᒪᒐᔭᖅᐳᑦ ᓯᓚᑦᑐᓴᕐᕕᖕᒥ ᐅᕝᕙᓘᓐᓂᑦ ᓯᓚᑦᑐᓴᕐᕕᒡᔪᐊᕐᒥ ᐃᓕᓴᕆᔭᐅᔾᔪᑎᐅᔪᑦ, ᐃᓕᓴᕆᔭᐅᑎᑦ ᐃᓕᓐᓂᐊᕐᓂᕐᒥᓂᒃ ᐱᔭᕇᖅᓯᓚᐅᕐᓂᖓᓄᑦ.

2. ᐃᖅᑲᓇᐃᔭᓯᓐᓈᑦ ᐃᓕᓐᓂᐊᖅᑐᑦ: ᑖᒃᑯᐊ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐱᖃᓯᐅᔾᔨᓯᒪᔭᕆᐊᖃᖅᑐᑦ ᐊᔾᔨᒌᖏᑦᑐᓂᒃ ᐃᖅᑲᓇᐃᔭᕐᓗᑎᒃ ᐃᓕᓐᓂᐊᕈᑎᒃᓴᓄᑦ ᐱᒋᐊᕈᑎᓂᒃ, ᐱᖃᓯᐅᑎᓪᓗᒋᑦ ᐊᑐᖅᑕᐅᓂᐊᖅᑐᓂᒃ ᐃᓕᓐᓂᐊᖅᑎᐅᔪᓄᑦ ᐱᓕᕆᓕᒻᒪᒃᓴᓂᕐᒧᑦ (ᓲᕐᓗ ᑯᐊᐸᒃᑯᓐᓄᑦ ᐅᕝᕙᓘᓐᓃᑦ ᐊᐅᔭᒃᑯᑦ ᐃᓕᓐᓂᐊᖅᑎᑦ ᐃᖅᑲᓇᐃᔭᖃᑦᑕᕐᓂᖏᑎᒍᑦ), ᐊᒻᒪᓗ ᐊᑐᖅᑕᐅᓗᑎᒃ ᑕᐃᒃᑯᓄᖓ ᐃᖅᑲᓇᐃᔭᖅᑎᐅᔪᓄᑦ ᒫᓐᓇ ᐱᓕᒻᒪᒃᓴᕈᑕᐅᓗᑎᒃ, ᐃᖅᑲᓇᐃᔭᓕᒻᒪᒃᓴᕈᑕᐅᓗᑎᒃ, ᐊᒻᒪᓗ ᓇᓗᖅᑯᑎᖏᓐᓂᖅᓴᐅᓕᖁᓪᓗᒋᑦ ᐃᖅᑲᓇᐃᔮᒧᑦ ᖁᕝᕙᓯᖕᓂᖅᓴᒧᑦ ᐃᓕᓴᐅᔪᓐᓇᕐᓂᐊᕐᒪᑕ (ᓲᕐᓗ ᐃᓕᓐᓂᐊᖅᑐᑦ ᐃᖅᑲᓇᐃᔮᕆᓂᐊᖅᑕᖏᓐᓂᒃ, ᐃᖅᑲᓇᐃᔭᖅᑕᐅᓂᐊᖅᑐᓂᒃ ᑎᓕᓯᔾᔪᑎᖃᕐᓂᖅ, ᐃᑲᔪᖅᑕᐅᓂᕆᔭᖏᑦ, ᐊᑐᖅᑐᐊᖅᑕᐅᓂᖏᑦ ᐃᖅᑲᓇᐃᔭᕐᕕᖕᒥ, ᑕᐅᖅᓰᖃᑎᒌᒍᓐᓇᕐᓂᖏᑦ, ᐃᖅᑲᓇᐃᔭᖅᑎᐅᔪᓪᓗ ᐃᓕᓐᓂᐊᖅᑎᓴᐅᓂᖏᑦ).
3. ᐃᓕᓐᓂᐊᖅᑎᓂᒃ ᐃᑲᔪᖅᑐᐃᓂᖅ: ᑖᒃᑯᐊ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐃᒪᐃᑦᑕᕆᐊᖃᖅᐳᑦ, ᐱᖃᓯᐅᔾᔨᓯᒪᓗᑎᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᒻᒪᓗ ᑮᓇᐅᔭᓕᕆᓂᕐᒧᑦ ᑮᓇᐅᔭᖁᑎᒋᔭᐅᔪᓂᒃ ᐊᑐᖅᑕᐅᓂᐊᖅᑐᓂᒃ ᐃᓕᓐᓂᐊᖅᑎᐅᔪᑦ ᓯᕗᒧᐊᑦᑎᐊᕈᑎᒃᓴᖏᓐᓂᒃ, ᐱᕙᓪᓕᐊᑎᑦᓯᓗᑎᒃ ᐃᖅᑲᓇᐃᔭᖅᑎᓂᒃ ᐊᔪᕈᓐᓃᖅᓴᐃᓂᕐᒥᒃ ᐃᖅᑲᓇᐃᔭᖅᑎᑖᖑᔭᕆᐊᖃᖅᑐᓄᑦ, ᐊᒻᒪ ᐃᖅᑲᓇᐃᔭᖅᑎᑖᕐᓗᑎᒃ ᐃᓄᖕᓂᒃ ᐅᕝᕙᓘᓐᓃᑦ ᐃᓕᓐᓂᐊᖅᑎᑕᐅᓗᑎᒃ ᐱᓕᒻᒪᒃᓴᖅᑕᐅᓂᐊᕐᒪ ᐊᔪᕈᓐᓃᖅᓴᖅᑕᐅᓗᑎᒃ ᐃᓕᓐᓂᐊᖅᓯᒪᔪᒧᑦ ᐃᖅᑲᓇᐃᔮᖑᔪᒧᑦ, ᐱᕕᖃᖅᑎᑦᓯᓗᑎᒃ ᑕᓯᐅᖅᑕᐅᓗᑎᒃ ᐊᒻᒪᓗ ᐃᑲᔪᖅᑐᖅᑕᐅᓗᑎᒃ ᐃᖅᑲᓇᐃᔭᖅᑎᑖᖑᒐᓱᐊᖅᑐᑦ, ᑮᓇᐅᔭᑎᒍᓪᓗ ᐃᑲᔪᖅᑕᐅᓗᑎᒃ, ᐃᓕᓐᓂᐊᖅᑎᓪᓗᒋᓪᓗ ᐃᑲᔪᖅᑕᐅᓗᑎᒃ, ᐃᑲᔪᖅᑕᐅᔾᔪᑎᖃᕐᓗᑎᒡᓗ ᐱᓕᒻᒪᒃᓴᕈᑎᒋᔭᖏᑦ, ᐋᖅᑭᒡᓱᖅᑕᐅᓯᒪᓗᑎᒃ ᐊᑐᓂ ᐃᓕᓴᐅᑕᐅᔪᓄᑦ ᐃᑲᔪᕈᑎᒃᓴᓄᑦ ᐸᕐᓇᐅᑎᑦ, ᐊᒻᒪ ᐃᓚᐅᔪᑦ ᐊᖑᒻᒪᑎᔭᐅᓗᑎᒃ.
4. ᐱᓕᕆᐊᑉ ᖁᕝᕙᕆᐊᖅᑕᐅᓂᖓ: ᑖᒃᑯᐊ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐱᖃᑎᓯᐅᔾᔨᓯᒪᔭᕆᐊᖃᖅᐳᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᒻᒪᓗ ᑮᓇᐅᔭᓕᕆᓂᕐᒧᑦ ᐊᑐᕆᐊᖃᖅᑐᓂᒃ ᑕᖅᑲᒃᑯᓄᖓ ᑕᑯᒃᓴᐅᑎᑕᐅᓂᖓᓄᑦ ᐊᒻᒪᓗ ᑲᔪᖏᖅᓴᐅᑕᐅᓂᖏᓐᓄᑦ ᐱᓕᕆᐊᖑᔪᑦ, ᐱᓕᕆᖃᑕᐅᓂᐊᖅᑐᑦ ᐃᓚᐅᓂᐊᖅᑐᑦ ᕿᓂᖅᑕᐅᓂᖏᓐᓂ, ᐊᒻᒪᓗ ᓴᓇᔭᐅᓂᖏᑦ ᑐᓴᐅᒪᑎᑦᓯᓂᕐᒧᑦ ᐅᐸᓗᖓᐃᔭᐅᑎᐅᔪᑦ, ᓂᐅᕐᕈᑎᖃᕐᓂᖅ, ᐃᖅᑲᓇᐃᔮᒥᒃ ᖁᕝᕙᕆᐊᖅᓯᓂᖅ, ᐊᒻᒪᓗ ᐃᖅᑲᓇᐃᔭᖅᑎᑖᕋᓱᐊᕐᓂᖅ ᐱᖃᓯᐅᔾᔨᓯᒪᔭᕆᐊᖃᖅᐳᖅ ᐱᓕᕆᖃᑎᒌᖕᓂᐅᔪᒥᒃ ᐃᓕᓐᓂᐊᕐᕕᐊᓗᖕᓂᒃ, ᕼᐊᒪᓚᓂᒃ, ᓄᓇᓕᖕᓂ ᑎᒥᐅᔪᓂᒃ, ᓄᓇᕗᒥ ᓯᓚᑦᑐᓴᕐᕕᖕᒥᒃ, ᓄᓇᕗᑦ ᒐᕙᒪᒃᑯᖏᑕ ᐱᓕᕆᕕᖏᓐᓂᒃ, ᐊᒻᒪᓗ ᐊᓯᖏᓐᓂᒃ ᑎᒥᐅᔪᓂᒃ.

ᑭᖑᕐᖓᒍᑦ ᑎᒍᓯᑎᓚᐅᖅᑎᓪᓗᒋᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐅᐸᓗᖓᐅᔭᐅᑎᑦ

9.12 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐃᓗᓕᖃᕆᐊᖃᖅᑐᖅ ᑎᑎᕋᖅᓯᒪᓂᒃᑯᑦ ᐱᕕᖃᖅᑎᑦᓯᓗᓂ ᑲᔪᓯᖁᓪᓗᒍ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᐅᔪᖅ, ᐱᓕᒻᒪᒃᓴᐃᓂᖅ ᐊᒻᒪᓗ ᐃᑲᔪᖅᑐᐃᓂᖅ ᑭᖑᕐᖓᒍᑦ ᓄᒃᑎᕆᓚᐅᖅᑎᓪᓗᒋᑦ ᐅᓪᓗᓕᐊᑕ ᐊᖅᑯᑎᒋᓗᒍ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ. ᐃᑲᔪᖅᑐᐃᔾᔪᑕᐅᓗᓂ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑎᓄᑦ, ᑖᒃᑯᐊ ᑎᑎᕋᖅᓯᒪᓂᖓ ᐊᑐᕐᓗᒍ ᓴᖅᑭᑦᑎᔾᔪᑕᐅᓂᐊᖅᑐᖅ ᑲᑐᔾᔨᓗᑎᒃ ᕿᒥᕐᕈᓂᐅᔪᒥᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᖃᐅᔨᓴᐃᓂᐊᕐᒪᑕ ᐊᑐᓕᖅᑎᑕᐅᕙᓪᓕᐊᓂᕆᔭᖓᓂᒃ ᓄᒃᑎᕆᓂᖏᓐᓂ ᐅᐸᓗᖓᐅᔭᐅᑎᐅᔪᑦ ᖃᐅᔨᓴᐃᓗᑎᒃ ᑐᕌᒐᒃᓴᕆᔭᖏᑦ ᐱᔭᕇᖅᑕᐅᕙᓪᓕᐊᖕᒪᖔᑕ ᐊᒻᒪᓗ ᐃᓱᒪᓕᐅᕐᓗᑎᒃ ᑲᔪᓯᔭᕆᐊᖃᕐᒪᖔᑕ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᑎᓂᖅ, ᐱᓕᒻᒪᒃᓴᐃᓂᖅ ᐊᒻᒪᓗ ᐃᑲᔪᖅᑐᐃᓂᖅ.

9.13 ᑖᒃᑯᐊ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ ᐃᒪᐃᑦᑕᕆᐊᖃᖅᐳᑦ:

1. ᑮᓇᐅᔭᖃᖅᑎᑕᐅᓗᑎᒃ ᑮᓇᐅᔭᓂᑦ ᐊᖏᕈᑕᐅᓯᒪᔪᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐃᓗᐊᓂ ᑎᑎᕋᖅᓯᒪᓂᖓᓂ 12.19;
2. ᐱᖃᓯᐅᔾᔨᓯᒪᓗᓂ ᐸᕐᓇᐅᑎᒥᒃ ᐊᒻᒪᓗ ᑮᓇᐅᔭᓄᑦ ᐊᑐᕈᒫᖅᑐᓂᒃ ᑲᔪᓯᖁᓪᓗᒍ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᐅᔪᖅ, ᐱᓕᒻᒪᒃᓴᐃᓂᖅ ᐊᒻᒪᓗ ᐃᑲᔪᖅᑐᐃᓂᖅ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ; ᐊᒻᒪᓗ
3. ᐱᖃᑎᓯᐅᔾᔨᓯᒪᓗᓂ ᐊᐅᓚᓂᐅᔪᓂᒃ, ᐱᖃᓯᐅᔾᔨᓯᒪᓗᑎᒃ ᑭᒡᓕᖏᓐᓂᒃ, ᐃᑲᔪᖅᓯᔾᔪᑕᐅᓂᐊᖅᑐᓂᒃ ᕿᒥᕐᕈᑎᓪᓗᒋᑦ ᒪᓕᒡᓗᒍ ᑎᑎᕋᖅᓯᒪᓂᖓ 9.9.

ᑮᓇᐅᔭᓕᕆᓂᕐᒧᑦ ᐃᓱᒪᒃᓴᖅᓯᐅᕈᑏᑦ

9.14 GC ᑲᓇᑕᐅᑉ ᒐᕙᒪᒃᑯᖏᑕ ᑮᓇᐅᔭᖃᖅᑎᑕᖏᑦ ᐅᐸᓗᖓᐃᔭᐅᑎᓄᑦ ᑭᒡᓕᖃᕐᓂᐊᖅᐳᑦ ᑮᓇᐅᔭᖃᖅᑎᑦᓯᓂᕆᔭᖓ ᒪᓕᒃᑕᐅᓗᑎᒃ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.

ᑐᕌᒐᖅ

10.1 ᑐᕌᒐᒃᓴᖓ ᐅᑯᓇᓂ ᑎᑎᕋᖅᓯᒪᓂᖓᓂ 10-ᒥ ᐊᑐᖅᑕᐅᑦᓯᐊᖁᓪᓗᒍ ᐊᖏᖅᑕᐅᓯᒪᔪᑦ ᐃᖅᑲᓇᐃᔮᑦ ᑐᓂᔭᐅᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑦ ᐊᒃᑐᖅᑕᐅᓯᒪᔪᑦ.

ᐊᒃᑐᐊᓂᖓ ᑎᑎᕋᖅᓯᒪᓂᖓ 9-ᒧᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ

10.2 ᓇᓕᐊᑐᐃᓐᓇᖅ ᐅᑯᓇᓂ ᑎᑎᕋᖅᓯᒪᓂᖓᓂ 9-ᒦᑦᑐᑦ ᐃᓱᒪᒋᔭᐅᒋᐊᑐᖏᑦᑐᑦ ᐲᖅᓯᕕᐅᓗᑎᒃ ᐅᕝᕙᓘᓐᓃᑦ ᒥᑭᓕᑎᑦᓯᒋᐊᖃᖏᑦᑐᑦ ᐱᔪᓐᓇᐅᑎᐅᔪᓂᒃ ᐅᕝᕙᓘᓐᓃᑦ ᐱᓕᕆᐊᒃᓴᕆᔭᖏᓐᓂᒃ ᐊᖏᖃᑎᒌᖃᑕᐅᓯᒪᔪᑦ ᒪᓕᒡᓗᒍ ᐅᑯᐊ ᑎᑎᕋᖅᓯᒪᓂᐅᔪᑦ.

ᐃᑲᔪᖃᑎᒌᖕᓂᖅ

10.3 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᒃᐳᑦ ᐃᖅᑲᓇᐃᔭᖃᑎᒌᒍᒪᓪᓗᑎᒃ ᐃᑲᔪᖃᑎᒌᒡᓗᑎᒃ ᐃᓗᐊᓂ ᐊᑐᓕᐅᖅᑕᐅᓚᐅᕐᓂᖓᓂ ᐅᑯᐊ ᓯᕗᓪᓕᖅᓯᐅᑏᑦ ᐊᖏᖃᑎᒌᒍᑏᑦ ᐊᒻᒪᓗ ᓄᒃᑎᕆᓂᕐᒧᑦ ᐅᓪᓗᐊᑕ ᓯᕗᒧᐊᒃᑎᑦᓯᖁᓪᓗᒋᑦ ᐋᖅᑭᑦᑎᐊᖅᓯᒪᔪᒥᒃ ᒥᐊᓂᕆᔭᐅᓂᐊᕐᒪᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᔾᔪᑎᐅᔪᑦ ᑕᐃᔭᐅᓯᒪᔪᑦ ᐃᓗᐊᓂ ᐅᑯᐊ ᑎᑎᕋᖅᓯᒪᓂᐅᔪᑦ, ᑕᐃᒪᐃᑦᑐᒥᒃ ᐃᑲᔪᖃᑎᒌᖕᓂᖃᖅᑎᓪᓗᒋᑦ ᐱᖃᓯᐅᔾᔨᓯᒪᔭᕆᐊᖃᖅᑐᑦ ᓴᖅᑭᑦᑎᓂᕐᒥᒃ, ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᓯᕗᓪᓕᖅᓯᐅᑎᓂᒃ ᐊᖏᖃᑎᒌᒍᑎᐅᔪᑦ, ᐃᖅᑲᓇᐃᔭᖅᑎᑦ ᓄᒃᑎᖅᑕᐅᓂᖏᓐᓄᑦ ᐱᔭᕆᐊᑭᒡᓕᑎᑦᓯᔨᑦ ᑲᑎᒪᔨᒋᓂᐊᖅᑕᖏᓐᓂᒃ ("ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᓄᑦ ᐱᔭᕆᐊᑭᒡᓕᑎᑦᓯᔨᑦ") ᑲᑎᒪᔨᖃᕐᓗᑎᒃ ᑭᒡᒐᖅᑐᖅᑎᐅᔪᓂᑦ ᐊᑐᓂ ᐊᖏᖃᑕᐅᓯᒪᔪᓂᓐᖔᕐᓗᑎᒃ.

10.4 ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᓄᑦ ᐱᔭᕆᐊᑭᒡᓕᑎᑦᑎᔨᑦ ᑲᑎᒪᔨᖏᑦ ᓴᓇᓂᐊᖅᑐᑦ ᐃᖅᑲᓇᐃᔭᖅᑎᑦ ᓄᒃᑎᖅᑕᐅᓂᖏᓐᓄᑦ ᐸᕐᓇᐅᑎᐅᔪᓂᒃ ("ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᐱᓕᕆᔾᔪᑎᒃᓴᓄᑦ ᐸᕐᓇᐅᑎ") ᓯᕗᒧᐊᒃᑎᑦᓯᖁᓪᓗᒋᑦ ᐊᑐᖅᑕᐅᔪᓐᓇᑦᓯᐊᖅᑐᒥᒃ ᒥᐊᓂᖅᓯᔾᔪᑎᒥᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᔾᔪᑎᐅᔪᓂᒃ ᑕᐃᔭᐅᔪᓂᒃ ᐅᑯᓇᓂ ᑎᑎᕋᖅᓯᒪᓂᐅᔪᓂ. ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᓄᑦ ᐱᓕᕆᔭᐅᓂᖓᓄᑦ ᐸᕐᓇᐅᑎ ᓴᓇᔭᐅᔭᕆᐊᖃᖅᑐᖅ ᖃᓄᐃᑦᑑᓂᕆᔭᖓᓂᒃ, ᖃᖓᒃᑯᑦ ᐱᕕᖃᕐᓂᐊᕐᒪᖔᑦ ᐊᒻᒪᓗ ᑲᒪᑦᓯᐊᖅᑐᓂᒃ ᒐᕙᒪᖃᕐᓗᑎᒃ ᐱᓕᕆᑦᓯᐊᖅᑐᓂᒃ ᐱᓕᕆᔭᕆᐊᖃᖅᑎᑕᐅᔪᓂᒃ ᓯᕗᓪᓕᖅᓯᐅᑎᑦ ᐊᖏᖃᑎᒌᒍᑎᑦ ᐃᓗᐊᓂ ᐊᒻᒪᓗ ᓄᒃᑎᕆᓂᕐᒧᑦ ᐅᓪᓗᐊ ᐊᑐᖅᑕᐅᖁᓪᓗᒍ ᓄᒃᑎᖅᑕᐅᓂᕆᔭᖏᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᑦ ᑕᐃᒃᑯᐊ ᐊᖏᖅᓯᒪᔪᑦ ᐃᖅᑲᓇᐃᔮᒥᒃ ᒪᓂᒪᕕᐅᑎᓪᓗᒋᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᑐᕐᓗᒍ ᑕᐃᔭᐅᓯᒪᔪᖅ ᑎᑎᕋᖅᓯᒪᓂᖓᓂ 10.11, ᐱᖃᓯᐅᑎᓗᒋᑦ ᑐᓴᒐᒃᓴᓂᒃ ᐊᒥᖅᑳᕐᓂᖅᐊᒻᒪᓗ ᑐᓴᐅᒪᑎᑦᓯᓂᐅᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓂᒃ ᐃᖅᑲᓇᐃᔮᖓ ᑎᒍᔭᐅᓂᐊᓕᕐᓂᖓᓄᑦ ᐃᖅᑲᓇᐃᔭᖔᓕᕐᓗᓂ ᓄᓇᕗᑦ ᒐᕙᒪᒃᑯᖏᓐᓄᑦ.

10.5 ᐱᔪᓐᓇᖅᓯᑐᐊᖅᐸᑕ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᐅᑯᐊ ᓯᕗᓪᓕᖅᓯᐅᑎᑦ ᐊᖏᖃᑎᒌᒍᑎᐅᔪᑦ, ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᑦᑕᕆᐊᖃᖅᐳᑦ, ᒪᓕᒡᓗᒋᑦ ᑲᓐᖑᓇᖅᑐᓕᕆᓂᕐᒧᑦ ᒪᓕᒐᑎᒍᑦ ᓴᖅᑭᑕᐅᔭᕆᐊᖃᖏᑦᑐᑦ, ᑐᓂᓯᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ, ᐊᑐᖅᑕᐅᓂᐊᖅᑐᓂᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐸᕐᓇᐅᑎᓕᐅᕐᓂᕐᒧᑦ ᐊᒻᒪᓗ ᐋᖅᑭᒡᓱᐃᓂᕐᒧᑦ ᑎᒥᐅᑉ ᐋᖅᑭᒡᓱᖅᓯᒪᓂᕆᓂᐊᖅᑕᖓᓄᑦ, ᐱᖃᓯᐅᔾᔨᓯᒪᓗᑎᒃ ᐅᑯᓂᖓ ᑐᓴᒐᒃᓴᓂᒃ:

1. ᓇᓃᓐᓂᖓ, ᐃᓕᓐᓂᐊᖅᓯᒪᓂᐅᔭᕆᐊᖃᖅᑐᒧᑦ ᐊᔾᔨᒌᓕᖅᑎᑕᐅᓯᒪᔪᑦ ᒪᓕᒐᖏᑦ ᐃᖅᑲᓇᐃᔮᑉ ᑭᓲᖕᒪᖔᑦ ᓇᓗᓇᐃᖅᓯᔾᔪᑎ ᐊᒻᒪᓗ ᐊᒃᑐᐊᕕᒋᔭᖏᑦ ᑲᑐᔾᔨᖃᑎᒌᖑᔪᑦ ᐊᒻᒪᓗ ᓇᓃᓐᓂᕆᔭᖏᑦ ᐊᑐᕐᓗᒋᑦ NAO ᐊᒻᒪᓗ CNGO-ᖑᔪᑦ ᐃᖅᑲᓇᐃᔮᖑᔪᑦ ᐊᒃᑐᐊᓂᖃᖅᑐᑦ ᐊᓪᓚᕕᖕᒥ ᐊᐅᓚᑦᓯᓂᕐᒧᑦ ᐊᒻᒪ ᐊᐅᓚᑕᐅᓂᖏᓐᓄᑦ ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑎᑦ ᐊᒃᑐᐊᓂᖃᖅᑐᑦ ᐃᒥᓕᕆᓂᕐᒧᑦ ᐊᐅᓚᑦᓯᔾᔪᑎᓄᑦ
2. ᓇᓗᓇᐃᖅᑕᐅᓗᑎᒃ ᐃᑲᔫᓯᐊᒃᓴᑦ ᐊᒻᒪ ᐃᖅᑲᓇᐃᔭᕐᓗᓂ ᑮᓇᐅᔾᔭᒃᓵᕆᓂᐊᖅᑕᖏᑦ ᐊᑐᓂ ᐃᓗᐊᓂ NAO ᐊᒻᒪᓗ CNGO-ᖑᔪᑦ ᐃᖅᑲᓇᐃᔮᖑᔪᑦ ᐊᒃᑐᐊᓂᖃᖅᑐᑦ ᐊᓪᓚᕕᖕᒥ ᐊᐅᓚᑦᓯᓂᕐᒧᑦ ᐊᒻᒪ ᐊᐅᓚᑕᐅᓂᖏᓐᓄᑦ ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑎᑦ ᐊᒃᑐᐊᓂᖃᖅᑐᑦ ᐃᒥᓕᕆᓂᕐᒧᑦ ᐊᐅᓚᑦᓯᔾᔪᑎᓄᑦ; ᐊᒻᒪᓗ
3. ᐊᒡᒍᖅᑐᖅᓯᒪᓗᒋᑦ NAO ᐊᒻᒪᓗ CNGO-ᖑᔪᑦ ᐃᖅᑲᓇᐃᔮᑦ ᐊᒃᑐᐊᓂᖃᖅᑐᑦ ᐊᓪᓚᕕᓕᕆᓂᕐᒧᑦ ᐊᒻᒪᓗ ᐊᐅᓚᑕᐅᓂᖏᓐᓄᑦ ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑎᑦ ᐃᒥᓕᕆᓂᕐᒧᑦ ᒫᓐᓇᐅᔪᖅ ᐃᓐᓄᒃᑕᐅᓯᒪᔪᑦ ᐊᒻᒪ ᓇᓕᐊᒃ ᐃᓄᖃᖏᒻᒪᖔᑕ.

10.6 ᑐᓂᓯᑎᓪᓗᒋᑦ ᑐᓴᒐᒃᓴᓂᒃ ᑕᐃᔭᐅᓯᒪᔪᓂᒃ ᑎᑎᕋᖅᓯᒪᓂᖓᓂ 10.5-ᒥ, ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᐅᖃᖅᐳᑦ, ᑎᑭᓪᓗᒍ ᐱᔪᓐᓇᐅᑎᑎᒍᑦ ᐊᑐᕈᓐᓇᕐᓂᕆᔭᖏᑦ ᑲᓐᖑᓇᖅᑐᓂᒃ ᓴᖅᑭᑦᑎᔭᕆᐊᖃᖏᓐᓂᕐᒧᑦ, ᕿᓂᕐᓗᑎᒃ ᑐᓂᔭᐅᓂᐊᕐᒪᑕ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᓈᓴᐅᑎᒥᒃ, ᓇᓃᓐᓂᖓᓂᒃ, ᐃᓕᓐᓂᐊᖅᑕᐅᓯᒪᔭᕆᐊᖃᖅᑐᑦ ᐊᔾᔨᒌᓕᖅᑎᑕᐅᓯᒪᔪᑦ ᒪᓕᒐᖏᑦ, ᐃᖅᑲᓇᐃᔮᑉ ᑭᓱᓕᕆᔨᐅᓂᖓᓄᑦ ᓇᓗᓇᐃᖅᓯᔾᔪᑎᑦ ᐊᒻᒪᓗ ᐊᒃᑐᐊᓂᖃᕐᕕᒋᔭᖏᑦ ᑲᑐᔾᔨᖃᑎᒌᖑᔪᑦ ᐊᒻᒪᓗ ᓇᓃᓐᓂᕆᔭᖏᑦ NAO ᐊᒻᒪᓗ CNGO-ᖑᔪᑦ ᐃᖅᑲᓇᐃᔮᑦ ᐊᒃᑐᐊᓂᖃᖅᑐᑦ ᐊᓪᓚᕕᓕᕆᓂᕐᒧᑦ ᐊᒻᒪᓗ ᐊᐅᓚᑕᐅᓂᖏᓐᓄᑦ ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑎᑦ ᐃᒥᓕᕆᓂᕐᒧᑦ ᐃᓐᓄᒃᑕᐅᓯᒪᔪᑦ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ.

10.7 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᖅ ᐊᕐᕌᒍ ᐊᑕᐅᓯᖅ ᐊᓂᒍᓚᐅᖅᑎᓐᓇᒍ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ, ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᑦᑕᕆᐊᖃᖅᐳᑦ, ᒪᓕᒡᓗᒋᑦ ᑲᓐᖑᓇᖅᑐᓕᕆᓂᕐᒧᑦ ᒪᓕᒐᐅᔪᑦ ᓴᖅᑭᑦᑎᔭᕆᐊᖃᖏᓐᓂᕐᒧᑦ, ᑐᓂᓯᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᓇᓃᓐᓂᖓᓂᒃ, ᐃᓕᓐᓂᐊᖅᑕᐅᓯᒪᔭᕆᐊᖃᖅᑐᑦ ᐊᔾᔨᒌᓕᖅᑎᑕᐅᓯᒪᔪᑦ ᒪᓕᒐᖏᑦ, ᐃᖅᑲᓇᐃᔮᑉ ᑭᓱᓕᕆᔨᐅᓂᖓᓄᑦ ᓇᓗᓇᐃᖅᓯᔾᔪᑎᑦ ᐊᒻᒪᓗ ᐊᒃᑐᐊᓂᖃᕐᕕᒋᔭᖏᑦ ᑲᑐᔾᔨᖃᑎᒌᖑᔪᑦ ᐊᒻᒪᓗ ᓇᓃᓐᓂᕆᔭᖏᑦ NAO ᐊᒻᒪᓗ CNGO-ᖑᔪᑦ ᐃᖅᑲᓇᐃᔮᑦ ᐊᒃᑐᐊᓂᖃᖅᑐᑦ ᐊᓪᓚᕕᓕᕆᓂᕐᒧᑦ ᐊᒻᒪᓗ ᐊᐅᓚᑕᐅᓂᖏᓐᓄᑦ ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐃᒥᓕᕆᓂᕐᒧᑦ ᓱᒃᑲᐃᒡᓕᑎᕈᑎᐅᔪᑦ ᑭᓯᐊᓂᓕ ᓂᕆᐅᒋᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᓐᓄᒃᑕᐅᓂᐊᖅᑐᒋᔭᐅᓇᑎᒃ ᐅᓪᓗᐊᓂ ᓄᒃᑎᕆᓂᐅᑉ ᐱᔾᔪᑎᒋᓪᓗᒋᑦ ᐃᓚᖏᑦ ᐃᖅᑲᓇᐃᔮᒥᒃ ᕿᒪᐃᓂᖏᓐᓄᑦ ᐅᕝᕙᓘᓐᓃᑦ ᐃᓂᒃᓴᖃᓐᖏᒧᑦ. ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᑐᓴᐅᒪᔾᔪᑎᓂᒃ ᑕᐃᒪᐃᑦᑐᓂᒃ ᑐᓂᓯᖃᑦᑕᕐᓗᑎᒃ ᑎᑭᒐᓱᐊᕐᓂᖓᓂ ᓄᒃᑎᕆᓂᐅᑉ ᐅᓪᓗᐊ. ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᑦ ᐸᕐᓇᐅᑎᖏᑦ ᑭᐅᓯᓯᒪᔭᕆᐊᖃᖅᐳᑦ ᐱᓂᐊᕐᓂᖃᕐᕕᐅᔭᕆᐊᖃᕐᓂᖏᓐᓂᒃ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᑦ ᓄᖅᑲᕐᓂᐊᖅᑐᒋᔭᐅᔪᑦ ᐅᕝᕙᓘᓐᓂᑦ ᐃᓂᒃᓴᖃᓐᖏᒧᑦ ᐅᓪᓗᐊᓂ ᓄᒃᑎᕆᓂᐅᑉ.

10.8 ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᐅᑯᐊ ᓯᕗᓪᓕᖅᓯᐅᑎᐅᔪᑦ ᐊᖏᖃᑎᒌᒍᑎᐅᔪᑦ, ᓄᓇᕗᑦ ᒐᕙᒪᒃᑯᖏᑦ ᓴᓇᔭᕆᐊᖃᖅᐳᑦ ᓯᕗᓪᓕᖅᓯᐅᑎᓂᒃ ᐋᖅᑭᒡᓱᖅᓯᒪᓂᖓᓄᑦ ᑎᒥᐅᔪᑉ ᐊᒻᒪ ᑐᓂᔭᓗᑎᒃ ᐊᓯᖏᓐᓄᑦ ᐊᖏᖃᑎᒌᒍᑎᓕᐅᖃᑕᐅᓯᒪᔪᓄᑦ.

ᓄᓇᕗᑦ ᒐᕙᒪᒃᑯᖏᑕ ᑎᒥᐅᓂᖓᑕ ᐋᖅᑭᒡᓱᖅᓯᒪᓂᖓ

10.9 ᐊᖏᖃᑎᒌᒃᓯᒪᔪᑦ ᐃᓕᓴᖅᓯᕗᑦ ᐋᖅᑭᒡᓱᖅᓯᒪᓂᖓ ᓄᓇᕗᑦ ᒐᕙᒪᒃᑯᖏᑕ ᑎᒥᐅᓂᖓᑕ ᐱᒻᒪᕆᐅᓂᖓᓂᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐸᕐᓇᐅᑎᓕᐅᖅᑎᓪᓗᒋᑦ ᐊᒃᑐᐊᓂᖃᖅᑐᓂᒃ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ.

10.10 ᑲᓇᑕᐅᑉ ᒐᕙᒪᒃᑯᖏᑦ ᐊᖏᖃᑎᖃᖅᐳᑦ ᑐᓴᐅᒪᑎᑦᓯᔭᕆᐊᒃᓴᖅ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ ᑎᒥᐅᔪᑉ ᐋᖅᑭᒡᓱᖅᓯᒪᓂᕆᔭᖓ ᐊᓯᔾᔨᖅᑐᕕᓂᐅᒃᐸᑦ ᐊᒃᑐᐃᓂᖃᕐᓗᓂ ᐊᓪᓚᕕᒃᑯᑦ ᐊᐅᓚᑕᐅᓂᖓᓄᑦ ᐊᒻᒪᓗ ᐊᐅᓚᑕᐅᓂᖏᓐᓄᑦ ᒐᕙᒪᒃᑯᑦ ᓄᓇᖁᑎᖏᑕ ᐊᒻᒪᓗ ᐱᔪᓐᓇᐅᑏᑦ ᐃᒥᓕᕆᓂᕐᒧᑦ ᐊᐅᓚᑦᓯᔾᔪᑎᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ, ᐱᖃᓯᐅᔾᔨᓯᒪᓗᑎᒃ ᓇᓕᐊᖕᓂᑐᐃᓐᓇᖅ ᐊᓯᔾᔨᖅᑕᐅᔪᕕᓂᕐᓂᒃ ᐃᓂᐅᔪᓄᑦ ᐃᖅᑲᓇᐃᔮᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᐊᓪᓚᕕᖕᒥ ᐊᐅᓚᑦᓯᔨᐅᔪᑦ ᐊᒻᒪᓗ ᐊᐅᓚᑕᐅᓂᖏᑦ ᒐᕙᒪᒃᑯᑦ ᓄᓇᖁᑎᖏᑕ ᐊᒻᒪᓗ ᐱᔪᓐᓇᐅᑎᖏᑦ ᐊᒃᑐᐊᓂᖃᖅᑐᑦ ᐃᒥᓕᕆᓂᕐᒧᑦ:

1. ᐊᓯᔾᔨᖅᑐᖃᖅᐸᑦ ᓇᓃᓐᓂᖓᓂᒃ ᐃᖅᑲᓇᐃᔮᑉ;
2. ᐊᓯᔾᔨᖅᑐᑦ ᐊᖓᔪᖅᑳᕆᔭᖓ ᐃᖅᑲᓇᐃᔮᑉ ᐃᓂᖓᑕ ᐅᓂᒃᑳᓕᐅᕐᕕᒋᕙᒃᑕᖓ; ᐅᕝᕙᓘᓐᓃᑦ
3. ᐊᓯᔾᔨᖅᐸᑕ ᐃᓕᓐᓂᐊᖅᓯᒪᓂᐅᔭᕆᐊᖃᖅᑐᑦ ᐊᔾᔨᒌᓕᖅᑎᑕᐅᓯᒪᔪᑦ ᒪᓕᒐᖏᑦ, ᐃᖅᑲᓇᐃᔮᑉ ᑭᓱᓕᕆᔨᐅᓂᖓᓄᑦ ᓇᓗᓇᐃᖅᓯᔾᔪᑎᐅᔪᑦ ᐊᒻᒪᓗ ᐊᒃᑐᐊᕕᒋᔭᖏᑦ ᑎᒥᐅᔪᑦ ᐊᒻᒪᓗ ᐳᖅᑐᓂᕆᔭᖓ ᐃᖅᑲᓇᐃᔮᑉ.

ᒪᓂᒪᒃᓯᓂᖅ ᐃᖅᑲᓇᐃᔮᒥᒃ

10.11 ᐃᓘᓇᖏᑦ ᖃᐅᒪᑖᓐ ᐃᖅᑲᓇᐃᔭᖅᑎᓪᓚᕆᒋᔭᐅᔪᑦ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᑦ ᑐᓂᔭᐅᓯᒪᔭᕆᐊᖃᖅᐳᑦ ᒪᓂᒪᒃᓯᕕᐅᓗᑎᒃ ᐃᖅᑲᓇᐃᔮᒥᒃ ᐃᖅᑲᓇᐃᔮᕇᓐᓇᕐᓂᐊᕐᓗᓂᐅᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᕐᓗᓂ ᐊᒻᒪᓗ ᐃᓘᓐᓇᖏᑦ ᐅᓪᓗᑉ ᐃᓚᖓᓄᑦ ᐃᖅᑲᓇᐃᔭᖅᑎᒋᔭᐅᔪᑦ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᑦ ᑐᓂᔭᐅᔭᕆᐊᖃᖅᐳᑦ ᒪᓂᒪᕕᐅᓗᑎᒃ ᒥᑭᓐᓂᖅᓴᐅᖏᑦᑐᒥᒃ ᐃᖅᑲᓇᐃᔮᕆᓚᐅᖅᑕᖓᓄᑦ ᐊᔾᔨᖃᕐᓗᓂ ᐅᓪᓗᑉ ᐃᓚᖓᓂ ᐃᖅᑲᓇᐃᔭᖃᑦᑕᕐᓗᓂ ᐃᖅᑲᓇᐃᔭᖅᑎᒋᔭᐅᖏᓐᓇᕐᓂᐊᕐᓗᓂ ᓄᓇᕗᑦ ᒐᕙᒪᒃᑯᖏᓐᓄᑦ, ᐊᒻᒪᓗ ᑕᐃᒪᐃᑦᑐᑦ ᐊᑐᐃᓐᓇᕈᖅᑕᐅᔪᑦ ᐃᖅᑲᓇᐃᔮᒃᓴᐅᔪᑦ ᒪᓂᒪᑎᑕᐅᕆᐊᖃᖅᐳᑦ ᐅᓪᓗᐊᓂ ᐊᖏᕈᑕᐅᓯᒪᔪᒥ ᑕᒪᒃᑮᖕᓄᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪ ᓄᓇᕗᑦ ᒐᕙᒪᒃᑯᖏᓐᓄᑦ ᐱᓪᓗᒍ ᐅᓪᓗᐊᓂ ᒪᓂᒪᕕᐅᑎᓪᓗᒋᑦ ᐊᑐᓂ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᑦ ᑐᓂᔭᐅᖁᓪᓗᒋᑦ ᐊᓂᒍᓚᐅᖏᓐᓂᖏᓐᓂ ᑕᖅᑭᑦ 6-ᖑᔪᑦ ᓯᕗᕐᖓᒍᑦ ᐅᓪᓗᐊᑕ ᓄᒃᑎᖅᑕᐅᓂᒃᓴᐅᑉ.

10.12 ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᑦᑕᕆᐊᖃᖅᐳᑦ, ᒪᓕᒡᓗᒋᑦ ᑲᓐᖑᓇᖅᑐᓕᕆᓂᕐᒧᑦ ᓴᖅᑭᑦᑕᕆᐊᖃᖏᑦᑐᑦ, ᑐᓂᓯᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᑐᓴᒐᒃᓴᓂᒃ ᐊᑐᖅᑕᐅᔭᕆᐊᖃᖅᑐᓂᒃ ᐸᕐᓇᒃᑎᓪᓗᒋᑦ ᐃᖅᑲᓇᐃᔮᒃᓴᒥᒃ ᒪᓂᒪᑎᑦᓯᓂᕐᒧᑦ ᐊᑐᕐᓗᒍ ᑎᑎᕋᖅᓯᒪᓂᖓ 10.11.

10.13 ᑐᓴᒐᒃᓴᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 10.12 ᑐᓂᔭᐅᔭᕆᐊᖃᖅᐳᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᓂᒍᓚᐅᖏᓐᓂᖏᓐᓂ ᑕᖅᑭᑦ 12 ᓯᕗᕐᖓᒍᑦ ᓄᒃᑎᕆᓂᐅ ᐅᓪᓗᐊᑕ ᐊᒻᒪᓗ ᐅᓪᓗᒥᓯᐅᑎᑦ ᑐᓴᒐᒃᓴᑦ ᑐᓂᔭᐅᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᕆᐊᖃᖅᑐᑦ ᒪᓕᒡᓗᒋᑦ ᓯᕗᕐᖓᒍᑦ ᐅᓪᓗᐊᑕ ᐃᖅᑲᓇᐃᔮᑦ ᒪᓂᒪᑎᑕᐅᓂᒃᓴᖓᑕ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 10.11.

10.14 ᐃᓕᓴᖅᓯᓪᓗᑎᒃ ᐋᖅᑭᒡᓱᖅᓯᒪᓂᕆᔭᖓ ᐊᒻᒪᓗ ᐊᐅᓚᑦᓯᖃᑦᑕᕐᓂᕆᔭᖏᑦ ᐊᔾᔨᒌᖏᒻᒪᑕ ᓄᓇᕗᑦ ᒐᕙᒪᒃᑯᖏᑕ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑕ, ᓄᓇᕗᑦ ᒐᕙᒪᒃᑯᖏᑦ ᐃᒪᐃᑦᑕᕆᐊᖃᖅᐳᑦ, ᑎᑭᓪᓗᒍ ᐱᓕᕆᔪᓐᓇᕐᓂᖓᑦ, ᓴᖅᑭᑦᑎᓗᑎᒃ ᐃᖅᑲᓇᐃᔮᒃᓴᓂᒃ ᐃᓗᐊᓂ ᐃᖅᑲᓇᐃᔮᑦ ᓴᖅᑭᑕᐅᓯᒪᔪᑦ ᐱᓕᕆᐊᒃᓴᓂᒃ ᑎᒍᓯᕙᓪᓕᐊᓂᖏᑎᒍᑦ ᐊᔾᔨᑲᓴᖃᖅᑐᓂᒃ ᐃᖅᑲᓇᐃᔮᕆᔭᐅᔪᓂᒃ ᐊᒻᒪᓗ ᐊᖓᔪᖅᑳᖑᓂᕆᔭᐅᔪᓂᒃ ᐃᖅᑲᓇᐃᔮᓂᒃ ᓴᖅᑭᑦᑎᕕᐅᓗᑎᒃ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑦ ᐃᕐᖐᓐᓇᖅ ᓯᕗᕐᖓᒍᑦ ᐃᖅᑲᓇᐃᔮᒃᓴᒥᒃ ᒪᓂᒪᕕᐅᓚᐅᖏᓐᓂᖏᓐᓂ ᐊᑐᕐᓗᒋᑦ ᓇᓗᓇᐃᖅᑎᖅᑕᐅᓯᒪᔪᑦ ᐅᑯᓇᓂ.

10.15 ᓄᓇᕗᑦ ᒐᕙᒪᒃᑯᖏᑕ ᒪᓂᒪᑎᑕᖏᑦ ᐃᖅᑲᓇᐃᔮᒃᓴᑦ ᐊᑐᓂ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᒪᐃᓕᖓᔭᕆᐊᖃᖅᐳᑦ:

1. ᑭᒡᒐᖅᑐᐃᓗᑎᒃ ᐃᖅᑲᓇᐃᔮᒥᒃ ᐊᔾᔨᑲᓴᒋᓗᓂᐅᒃ ᐋᖅᑭᒡᓱᖅᓯᒪᓂᖏᑦ ᐱᓕᕆᐊᒃᓴᖏᑕ ᐊᖓᔪᖅᑳᖑᓂᖓᑕ ᐃᖅᑲᓇᐃᔮᕆᓚᐅᖅᑕᖓᓄᑦ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᖅ ᑐᓂᔭᐅᓗᓂ ᐃᕐᖐᓐᓇᖅ ᓯᕗᕐᖓᒍᑦ ᐊᓯᖏᓐᓂᒃ ᐃᖅᑲᓇᐃᔭᖅᑎᒃᓴᓂᒃ ᓴᖅᑭᑕᐅᓯᒪᔪᓄᑦ ᐊᑐᐃᓐᓇᕈᐃᕕᐅᓚᐅᖏᓐᓂᖓᓂ ᓴᖅᑭᑕᐅᓯᒪᔪᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐱᓕᕆᐊᒃᓴᓂᒃ ᑎᒍᓯᓂᒃᑯᑦ.
2. ᐱᕕᖃᖅᑎᑦᓯᓗᓂ ᐃᕐᖐᓐᓇᖅ ᐃᖅᑲᓇᐃᔮᒥᒃ ᓄᓇᓕᖕᓃᑦᑐᒥᒃ ᐊᔾᔨᑲᓴᖃᖅᑐᒥᒃ ᓇᓃᓐᓂᕆᔭᖓᓂᒃ ᐃᖅᑲᓇᐃᔮᖓᑕ ᐊᒃᑐᖅᑕᐅᓯᒪᔪᑉ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᒧᑦ ᓯᕗᕐᖓᒍᑦ ᐊᑐᐃᓐᓇᕈᐃᓚᐅᖏᓐᓂᖏᓐᓂᒃ ᐃᖅᑲᓇᐃᔮᒃᓴᒥᒃ, ᐃᖅᑲᓇᐃᔮᖅ ᑖᓐᓇ ᓄᓇᕗᑦ ᐃᓗᐊᓃᓐᓂᐊᖅᑎᓪᓗᒍ;
3. ᐱᕕᖃᖅᑎᑦᓯᓗᑎᒃ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᖅ ᓄᒃᑎᖅᑕᐅᓂᐊᖏᓐᓂᖓᓂᒃ ᐊᓯᐊᓄᑦ ᓄᓇᓕᖕᓄᑦ ᐊᕐᕌᒍᑦ ᑕᓪᓕᒪᓐ ᐊᓂᒍᓚᐅᖏᓐᓂᖓᓂ ᐱᒋᐊᕐᕕᒋᓗᒍ ᓄᒃᑎᕆᓂᐅᑉ ᐅᓪᓗᐊ;
4. ᐊᖑᒻᒪᑎᓗᑎᒃ ᐅᕝᕙᓘᓐᓃᑦ ᐅᖓᑖᓄᖓᓗᑎᒃ ᒪᓕᒃᓯᒪᓂᕆᔭᖏᑦ ᒪᓕᒐᖏᓐᓂᒃ Type 2-ᒥᒃ ᐱᔨᑦᓯᕐᓂᕆᔭᐅᔪᒧᑦ ᐱᒋᐊᕈᑎᐅᔪᑦ ᓇᓕᕌᕈᑎᖏᑦ ᒪᓕᒃᓯᒪᓗᓂ ᐃᓚᖓᓂ VII-ᒥ ᑎᑎᕋᖅᑕᐅᓯᒪᔪᓂ ᑲᓇᑕᓕᒫᒥ ᑲᑐᔾᔨᓪᓗᑎᒃ ᑲᑎᒪᔨᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᐋᖅᑭᒋᐊᕈᑎᓄᑦ ᑎᓕᓯᔾᔪᑎᐅᔪᑦ (ᑲᓇᑕ) ᐅᕝᕙᓘᓐᓂᑦ ᐊᔾᔨᒋᔭᖏᑦ ᐃᖅᑲᓇᐃᔮᑦ ᓇᓗᓇᐃᖅᑕᐅᓯᒪᔪᑦ ᐃᖅᑲᓇᐃᔭᖅᑎᑦ ᐊᖏᖃᑎᒌᒍᑎᖏᓐᓂ ᐊᑐᖅᑕᐅᔪᑦ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᓄᑦ; ᐊᒻᒪᓗ
5. ᐊᕐᕌᒍᑦ ᑕᓪᓕᒪᑦ ᐃᓗᐊᓂ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ, ᑐᓂᓯᓗᑎᒃ ᑮᓇᐅᔾᔭᒃᓵᕆᔭᐅᔪᓂᒃ, ᐃᑲᔫᓯᐊᕆᔭᐅᔪᓂᒃ ᐊᒻᒪᓗ ᐊᓯᖏᓐᓂᒃ ᐅᓄᕐᓂᕆᖃᖅᑐᓂᒃ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᑮᓇᐅᔭᑦ ᐊᑭᖏᑦ ᐊᑐᕐᓗᒋᑦ ᐊᔾᔨᖃᕐᓗᑎᒃ, ᑭᓯᐊᓂᓕ ᑐᖔᓂᐅᖏᑦᑐᖅ, ᑲᓇᑕᐅᑉ ᒐᕙᒪᒃᑯᖏᑕ ᐊᑭᓕᐅᑎᒋᕙᒃᑕᖏᓐᓄᑦ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᑲᓇᐃᔭᖅᑎᖏᓐᓄᑦ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ ᐊᑐᕐᓗᑎᒃ ᐃᓱᒪᓕᐅᕈᑕᐅᓯᒪᔪᒥᒃ ᑎᑎᕋᖅᓯᒪᓂᓐᖓᓂᒃ 10.19(b)-ᒥᒃ.

10.16 ᐊᒃᑐᖅᑕᐅᓯᒪᔪᖃᖅᑎᓪᓗᒍ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᒧᑦ, ᑕᐃᑦᓱᒪᓂ ᐅᓪᓗᐊᓂ ᓄᒃᑎᕆᓂᐅᑉ, ᐃᒡᓗᖃᖅᑎᓪᓗᒍ ᐃᖅᑲᓇᐃᔭᖅᑎᑦ ᐃᒡᓗᖓᓐᓂ ᓄᒃᑎᖅᑕᐅᓂᐅᓴᔪᒥ ᓄᓇᕗᑦ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ, ᐅᓪᓗᐊᓂ ᓄᒃᑎᕆᓂᐅᑉ, ᐊᑐᐃᓐᓇᕆᐅᓗᑎᒃ ᐃᖅᑲᓇᐃᔭᖅᑎᑦ ᑭᒡᓗᒃᓴᖓᓂᒃ ᐊᒃᑐᖅᑕᐅᓯᒪᔪᒧᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖓᓐᓄᑦ.

10.17 ᒪᓕᒡᓗᒍ ᑎᑎᕋᖅᓯᒪᓂᖓ 10.16, ᓄᓇᕗᑦ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ ᓯᕗᒧᐊᒃᑎᑦᓯᓗᑎᒃ, ᑎᑭᓪᓗᒍ ᐱᓕᕆᔪᓐᓇᕐᓂᖓᑦ, ᒪᓕᒐᖏᑦ ᐊᖏᖃᑎᒌᒍᑎᐅᔪᑦ ᐊᑐᖅᑐᐊᕐᓂᕐᒧᑦ ᐃᖅᑲᓇᐃᔭᖅᑎᑦ ᐃᒡᓗᖁᑎᖓᓂᑦ ᐊᖏᕈᑕᐅᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖓᓐᓄ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᐊᑐᐃᓐᓇᕈᐃᖁᓪᓗᒋᑦ ᑖᒃᑯᓄᖓ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᓄᓇᕗᑦ ᒐᕙᒪᒃᑯᖏᑦ ᐃᕐᖐᓐᓇᖅ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

10.18 ᐃᒪᐃᒻᒪᑦ ᐊᑐᖅᑐᐊᕈᑎᑦ ᐅᓄᕐᓂᖏᑦ ᓄᒃᑎᖅᑕᐅᔪᓄᑦ ᐃᖅᑲᓇᐃᔭᖅᑎᓄᑦ ᐃᒡᓗᖃᖅᑐᓄᑦ ᐃᖅᑲᓇᐃᔭᖅᑎᑦ ᐃᒡᓗᖁᑎᖏᓐᓄᑦ ᐋᖅᑭᒡᑕᐅᔭᕆᐊᖃᖅᐳᑦ ᒪᓕᒃᑕᐅᓗᑎᒃ ᑭᓱᑐᐃᓐᓇᕐᓄᑦ ᑐᕋᖓᔪᑦ ᐊᑐᐊᒐᖏᑦ ᓄᓇᕗᑦ ᒐᕙᒪᒃᑯᖏᑕ, ᓄᓇᕗᑦ ᒐᕙᒪᒃᑯᖏᑦ ᓯᕗᒧᐊᒃᑎᑦᓯᔭᕆᐊᖃᖅᐳᑦ ᐊᓯᔾᔨᖅᑕᐅᔪᑦ ᑕᒪᒃᑯᐊ ᐊᔾᔨᒋᖏᓐᓂᖏᑦ ᐊᑐᖅᑐᐊᕈᑎᑦ ᐊᑭᓕᖅᑕᐅᖁᓪᓗᒋᑦ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖓᓐᓄᑦ, ᐊᔾᔨᒋᖏᓐᓂᕆᔭᖓ ᐊᑭᓕᖅᑕᐅᒐᔭᕐᓗᓂ ᒪᓕᒃᑕᐅᓗᓂ ᑮᓇᐅᔾᔭᒃᓵᕆᔭᐅᔪᖅ, ᐃᑲᔫᓯᐊᖏᑦ ᐊᒻᒪᓗ ᐊᓯᖏᑦ ᐊᑐᐃᓐᓇᕈᖅᑕᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᐃᕐᖐᓐᓇᖅ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᒪᓕᒃᑕᐅᓗᑎᒃ ᑎᑎᕋᖅᓯᒪᓂᖓᓂ ᓇᓗᓇᐃᖅᑕᐅᓯᒪᔪᖅ 10.15(e)-ᒥ.

10.19 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᓱᒪᓕᐅᕆᐊᖃᖅᑐᑦ ᓯᕗᕐᖓᒍᑦ ᐊᑎᓕᐅᖅᑕᐅᓚᐅᖏᓐᓂᖓᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ:

1. ᑲᓇᑕᐅᑉ ᒐᕙᒪᒃᑯᖏᑕ ᐊᑭᓕᖅᓯᓂᖏᑦ ᐅᑎᖅᑎᑦᓯᕕᐅᓗᑎᒃ ᐊᑐᓂ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑦ ᐱᔪᓐᓇᕐᓂᐊᖅᐳᑦ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᐊᒻᒪᓗ ᑮᓇᐅᔾᔭᒃᓵᕆᓂᐊᖅᑕᖏᑦ ᐋᖅᑭᒡᑕᐅᓗᑎᒃ ᒪᓕᒡᓗᒋᑦ ᓄᓇᕗᑦ ᒐᕙᒪᒃᑯᖏᑕ ᐊᑭᓕᖅᓱᐃᓂᕐᒧᑦ ᐊᐅᓚᑦᓯᓂᕆᔭᖓᑦ ᐊᒻᒪᓗ ᑖᒃᑯᐊ ᓄᓇᕗᑦ ᒐᕙᒃᒪᑯᖏᑕ ᐃᑲᔪᕈᑎᖏᑦ ᐊᒻᒪ ᐊᓯᖏᑦ ᐅᓄᕐᓂᕆᔭᖏᑦ ᐊᑭᓕᖅᑕᐅᓗᑎᒃ ᐊᑐᓂ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᐱᖃᑕᐅᔪᓐᓇᖅᑐᓄᑦ ᐃᕐᖐᓐᓇᖅ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ; ᐊᒻᒪᓗ
2. ᐊᖅᑭᒡᓯᒪᓂᖓ, ᐊᑯᓂᐅᓂᕆᔭᖓ, ᐊᒻᒪ ᐅᓄᕐᓂᖏᑦ ᑮᓇᐅᔾᔭᒃᓵᑦ, ᐃᑲᔫᓯᐊᑦ, ᐊᒻᒪᓗ ᐊᓯᖏᑦ ᐅᓄᕐᓂᐅᔪᑦ ᐊᑐᐃᓐᓇᕈᖅᑕᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᑐᓂ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᐅᔪᓄᑦ ᐊᖑᒻᒪᑎᖁᓪᓗᒋᑦ ᒪᓕᒐᕐᓂᒃ ᐱᓕᕆᔭᕆᐊᖃᖅᑕᖏᓐᓂᒃ ᑎᑎᕋᖅᓯᒪᓂᖏᓐᓂ 10.15(e) ᐊᒻᒪᓗ ᑎᑎᕋᖅᓯᒪᓂᖓᓂ 10.18.

10.20 ᐱᔾᔪᑎᒋᓪᓗᒍ ᐃᓚᖓᓂ ᑎᑎᕋᖅᓯᒪᓂᖓ 10.15(e), ᓇᓕᐊᑐᐃᓐᓇᖅ ᓄᒃᑎᕐᓂᕐᒧᑦ ᐃᑲᔪᕈᑎᐅᔪᑦ ᐅᕝᕙᓘᓐᓃᑦ ᐊᑭᓕᐅᑎᐅᔪᑦ ᓄᖅᑲᕐᓂᖓᓄᑦ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᐱᖃᓯᐅᔾᔭᐅᔭᕆᐊᖃᖏᑦᑐᑦ ᐋᖅᑭᒡᓯᓕᖅᑎᓪᓗᒋᑦ ᐊᑭᒋᓂᐊᖅᑕᖏᓐᓂᒃ ᑮᓇᐅᔾᔭᒃᓵᖑᔪᑦ ᐊᒻᒪᓗ ᐃᑲᔫᓯᐊᒃᓴᕆᔭᖏᑦ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑕ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᐃᕐᖐᓐᓇᖅ.

10.21 ᐊᑐᓂ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑦ ᐱᕕᖃᖅᑎᑕᐅᓂᐊᖅᐳᑦ 60-ᓂᒃ ᐅᓪᓗᓂᒃ ᐊᑐᕐᓗᒋᑦ ᐅᓪᓗᖅᓯᐅᑎᑦ ᐅᓪᓗᖏᑦ ᐊᖏᖅᓯᔪᓐᓇᕐᓂᐊᕐᒪᑕ ᑎᑎᖅᑲᑎᒍᑦ ᐃᖅᑲᓇᐃᔮᒥᒃ ᒪᓂᒪᕕᐅᑎᓪᓗᒋᑦ ᐊᑐᕐᓗᒍ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᕐᒥ 10.11-ᒥ.

10.22 ᐊᑐᓂ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑦ ᐊᖏᖅᓯᔪᑦ ᒪᓂᒪᕕᐅᔾᔪᑎᖏᓐᓂᒃ ᐃᖅᑲᓇᐃᔮᒃᓴᓂᒃ ᓄᓇᕗᑦ ᒐᕙᒪᒃᑯᖏᓐᓂ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖓᓂ 10.11-ᒥ ᐃᒪᐃᑦᑕᕆᐊᖃᖅᐳᑦ:

1. ᐱᒋᐊᕐᕕᒋᓗᒍ ᓄᒃᑎᕆᓂᐅᑉ ᐅᓪᓗᐊᑕ, ᐱᖃᑕᐅᔪᓐᓇᕐᓗᓂ ᐃᓚᐅᔪᓐᓇᕐᓂᕐᒧᑦ ᐋᓐᓂᐊᖅᑐᓕᕆᔭᐅᓂᕐᒧᑦ, ᑎᒥᒃᑯᑦ ᐱᒡᒐᕈᑎᖃᓕᖅᑎᓪᓗᒋᑦ ᓇᓪᓕᐅᒃᑯᒫᒥᒃ, ᐃᓅᓯᕐᒧᑦ ᓇᓪᓕᐅᒃᑯᒫᒧᑦ, ᑐᖁᑎᓪᓗᒍ ᐃᑲᔫᓯᐊᒃᓴᓄᑦ, ᑭᒍᓯᕆᔭᐅᔾᔪᑎᓄᑦ, ᓄᖅᑲᕈᒻᒪᓯᐊᒃᓴᓄᑦ ᐸᕐᓇᐅᑎᑦ, ᐊᒻᒪᓗ ᐊᓯᖏᑦ ᐊᑐᖅᑕᐅᖃᑦᑕᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐃᑲᔪᕈᑕᐅᓪᓗᑎᒃ ᒪᓕᒡᓗᒋᑦ, ᐊᑐᖅᑕᐅᒃᐸᑕ, ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᐊᖏᖃᑎᒌᒍᑎᐅᔪᑦ, ᓄᓇᕗᑦ ᒐᕙᒪᒃᑯᖏᓐᓂ ᐊᖓᔪᖅᑲᐅᑎᑦ ᑭᑭᑕᐅᓯᒪᔪᑦ ᒪᓕᒐᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᐊᖓᔪᖅᑲᐅᑎᑦ ᒥᐊᓂᖅᓯᔨᐅᔪᑦ ᒪᓕᒐᖏᑦ ᐊᑐᖅᑎᑕᐅᖏᓪᓗᑎᒃ ᐅᑕᖅᑭᔭᕆᐊᖃᕐᕕᐅᔪᓂᒃ, ᑭᓯᐊᓂ ᐃᖅᑲᓇᐃᔭᖅᑎ ᐅᑕᖅᑭᔭᕆᐊᖃᖅᑎᑕᐅᒃᐸᑦ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ;
2. ᐱᒋᐊᕐᕕᒋᓗᒍ ᓄᒃᑎᕆᓂᐅᑉ ᐅᓪᓗᖓᓂ, ᐊᑐᖏᓪᓗᓂ ᐃᖅᑲᓇᐃᔭᓕᓵᖅᑐᑉ ᖃᐅᔨᖅᑕᐅᕕᒋᔭᖓ ᑭᓯᐊᓂ ᐃᖅᑲᓇᐃᔭᖅᑎ ᑖᓐᓇ ᖃᐅᔨᓴᖅᑕᐅᕕᖃᕆᐊᖃᖅᐸᑦ ᓄᓇᕗᑦ ᒐᕙᒪᒃᑯᖏᓐᓂᑦ ᑕᐃᒪᐃᑎᑕᐅᓗᓂ ᑭᖑᕐᖓᒍᑦ ᐅᓪᓗᖓᑕ ᓄᒃᑎᕆᓂᐅᑉ, ᓇᓕᐊᑐᐃᓐᓇᐅᒐᓗᐊᖅᐸᑦ ᖃᐅᔨᓴᖅᑕᐅᕕᐅᓂᖓ ᐃᖅᑲᓇᐃᔭᖅᑎᑖᖑᔪᑉ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑯᓂᐅᓂᖓ ᒪᓕᒃᓯᒪᑐᐃᓐᓇᕐᓂᐊᖅᑐᖅ ᖃᐅᔨᓴᖅᑕᐅᕕᒋᔭᕆᐊᖃᖅᑕᖓᓄᑦ ᐅᖓᑖᓄᖏᑦᑐᖅ;
3. ᐱᒋᐊᕐᕕᒋᓗᒍ ᓄᒃᑎᕆᓂᐅᑉ ᐅᓪᓗᐊ, ᐱᖃᑕᐅᔪᓐᓇᕐᓗᓂ ᓄᓇᕗᑦ ᒐᕙᒪᒃᑯᖏᑕ ᐃᑲᔪᕈᑎᒋᕙᒃᑕᖏᓐᓄ ᑐᓐᖓᕕᖃᕐᓗᑎᒃ ᐃᖅᑲᓇᐃᔭᖅᑎᐅᑉ:
   1. ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᓯᒪᓂᕆᔭᖓᑕ ᐊᓂᐅᓂᕆᔭᖓᓂᒃ, ᐊᒻᒪᓗ
   2. ᑲᔪᓯᔪᒃᑯᑦ ᐃᖅᑲᓇᐃᔭᖅᑎᒋᔭᐅᓂᐊᕐᓂᖓᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ;
4. ᐅᓪᓗᐊᓂ ᓄᒃᑎᕆᓂᐅᑉ ᐅᓪᓗᐊᑕ, ᑐᓂᔭᐅᓗᓂ ᓯᕗᕐᖓᒍᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᕐᕌᒍᒧᑦ ᐊᑕᐅᓯᕐᒧᑦ ᐱᔪᓐᓇᖅᑕᖓᓂᒃ ᕿᑲᕈᑎᒃᓴᓂᒃ, ᐋᖅᑭᒡᑕᐅᓯᒪᓗᑎᒃ ᖃᑦᓯᐅᓂᖏᑦ, ᐱᔪᓐᓇᖅᐸᑦ, ᒪᓕᒃᑕᐅᓯᒪᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎᐅᔪᑦ, ᓄᓇᕗᑦ ᒐᕙᒪᒃᑯᖏᑕ ᐊᖓᔪᖅᑲᐅᑎᑦ ᑭᑭᑕᐅᓯᒪᔪᑦ ᐃᖅᑲᓇᐃᔭᖅᑎᑦ ᒪᓕᒐᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑕ ᐊᖓᔪᖅᑲᐅᑎᑦ ᐃᖅᑲᓇᐃᔭᖅᑎᑦ ᒪᓕᒐᖏᑦ, ᑐᓐᖓᕕᒋᓗᒋᑦ ᐊᑯᓂᐅᓂᕆᔭᖏᑦ ᐃᖅᑲᓇᐃᔭᖅᑎᐅᑉ ᐃᖅᑲᓇᐃᔭᖅᓯᒪᓂᕆᔭᖓ ᑲᓇᑕᐅᑉ ᒐᕙᒪᒃᑯᖏᓐᓄᑦ;
5. ᐅᓪᓗᐊᓂ ᓄᒃᑎᕆᓂᐅᑉ ᐅᓪᓗᐊᑕ, ᐃᓚᒋᓗᓂᐅᒃ ᕿᑲᕐᓂᕐᒧᑦ ᓄᖅᑲᖔᕈᑎᓂᒃ ᓯᕗᕐᖓᒍᑦ ᑐᓂᔭᐅᓂᖓᑕ ᐊᑖᒍᑦ ᑎᑎᕋᖅᓯᒪᓂᖓᑕ 10.22(d), ᐃᕐᖐᓐᓇᖅ ᑐᓂᔭᐅᖁᓪᓗᒍ ᓄᓇᕗᑦ ᒐᕙᒪᒃᑯᖏᓐᓂᑦ ᕿᑲᕈᑎᓄᑦ ᑎᑎᕈᑎᓂᒃ ᐊᔾᔨᒋᓗᓂᒋᑦ ᑲᓇᑕᐅᑉ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᓪᓗᒍ ᕿᑲᕈᑎᒃᓴᖏᓐᓂᒃ ᓄᐊᓯᒪᔭᖏᓐᓂᒃ ᐊᒻᒪ ᐊᑐᖅᑕᐅᓯᒪᖏᑦᑐᑦ ᐊᒃᑐᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᑎᑭᓪᓗᒍ ᐅᓄᕐᓂᖅᐹᖑᔪᓐᓇᖅᑐᑦ ᐊᕐᕌᒍᑉ ᐊᑕᐅᓯᑉ ᐱᔭᐅᔪᓐᓇᖅᑐᑦ ᕿᑲᕈᑎᒃᓴᓄᑦ ᓄᐊᑕᐅᔪᓐᓇᖅᑐᑦ ᐊᑐᕐᓗᑎᒃ ᐊᑐᖅᑕᐅᔪᓂᒃ ᓄᓇᕗᑦ ᒐᕙᒪᒃᑯᖏᑕ ᓄᐊᑦᓯᔾᔪᑎᒋᔭᖏᑕ ᐅᓄᕐᓂᕆᔭᖏᓐᓂᒃ; ᐊᒻᒪᓗ
6. ᐅᓪᓗᐊᓂ ᓄᒃᑎᕆᓂᐅᑉ ᐅᓪᓗᐊᑕ, ᐱᖃᑕᐅᔪᓐᓇᖅᓯᓗᑎᒃ ᖃᓂᒪᓂᕐᒧᑦ ᕿᑲᕈᑎᓄᑦ ᓄᐊᑕᐅᕙᒃᑐᓂᒃ ᐊᔾᔨᖃᕐᓗᓂ ᐅᓄᕐᓂᕆᔭᖏᓐᓂᒃ ᓄᐊᓯᒪᔭᖏᓐᓂᒃ ᐊᒻᒪᓗ ᐊᑐᖅᓯᒪᓐᖏᑕᖏᓐᓂᒃ ᖃᓂᒪᓂᕐᒧᑦ ᕿᑲᕈᑎᖏᓐᓂᒃ ᐊᑐᐃᓐᓇᐅᔪᑦ ᓄᒃᑎᖅᑕᐅᓯᒪᔪᒧᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᐅᔪᒧᑦ ᐃᕐᖐᓐᓇᖅ ᑐᓂᔭᐅᓗᓂ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᐊᒻᒪᓗ ᓄᐊᑦᑎᕙᓪᓕᐊᓕᕐᓗᑎᒃ ᖃᓂᒪᓂᕐᒧᑦ ᕿᑲᕈᑎᒃᓴᓂᒃ ᒪᓕᒃᑕᐅᓗᑎᒃ, ᐊᑐᖅᑕᐅᒃᐸᑕ, ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᑦ ᐊᖏᖃᑎᒌᒍᑎᖏᑦ, ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᑦ ᐊᖓᔪᖅᑲᐅᑎᑦ ᒪᓕᒐᖏᑦ ᐊᒻᒪᓗ ᐊᖓᔪᖅᑲᐅᑎᑦ ᒥᐊᓂᖅᓯᔨᑦ ᐃᖅᑲᓇᐃᔭᖅᑎᑦ ᒪᓕᒐᖏᑦ.

10.23 ᐊᑐᓂ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑕ ᐊᑐᖅᓯᒪᓐᖏᑕᖏᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᖅᑎᓪᓗᒍ ᓄᐊᓯᒪᔭᖏᑦ ᕿᑲᕈᑎᑦ ᐅᖓᑖᓄᐊᖅᓯᒪᔪᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 10.22(e) ᐊᑭᓕᖅᓯᔾᔪᑕᐅᒐᔭᖅᐳᑦ ᐃᓘᓐᓇᖓ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖓᓐᓄᑦ ᓄᖅᑲᓚᐅᖅᑎᓪᓗᒍ ᐃᖅᑲᓇᐃᔭᕐᓂᕆᔭᖓᓂᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ.

10.24 ᓄᓇᕗᑦ ᒐᕙᒪᒃᑯᖏᑦ ᒪᓕᒐᖅᑎᒍᑦ ᐱᓕᕆᒋᐊᑐᓂᖓᖏᑦᑐᑦ ᐅᕝᕙᓘᓐᓃᑦ ᒪᓕᒐᖅᑎᒍᑦ ᐊᑭᓕᖅᓯᒋᐊᑐᓂᐊᖏᑦᑐᑦ ᓄᒃᑎᕐᓂᕐᒧᑦ ᐃᑲᔪᕈᑎᓂᒃ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᑦ ᓄᖅᑲᕐᓂᖏᓐᓄᑦ ᐊᑭᓕᐅᑎᓂᒃ ᐊᒃᑐᖅᑕᐅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᓴᖅᑭᓯᒪᔪᑦ ᐃᖅᑲᓇᐃᔭᕐᓂᕆᓚᐅᖅᑕᖓᓐᓂᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ.

10.25 ᐱᔾᔪᑎᒋᓪᓗᒋᑦ ᓄᖅᑲᕈᒻᒪᓯᐊᒃᓴᓄᑦ ᐸᕐᓇᐅᑏᑦ ᐊᒻᒪ ᐊᑐᖅᑕᐅᓂᐊᖅᑎᓪᓗᒋᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᓄᖅᑲᖅᑎᓪᓗᒋᑦ ᐊᑭᓕᐅᑎᑦ ᐱᖁᔭᕐᔪᐊᖏᑦ (ᑲᓇᑕᒥ), ᐃᖅᑲᓇᐃᔭᖅᑎᑕᐅᓂᖏᑕ ᐊᑯᓂᐅᓂᕆᔭᖏᑦ ᐊᑐᓂ ᐊᒃᑐᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᓐᓄᑦ ᐊᖏᖅᓯᔪᑦ ᒪᓂᒪᕕᐅᑎᓪᓗᒋᑦ ᐃᖅᑲᓇᐃᔮᒃᓴᒥᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐃᓱᒪᒋᔭᐅᓂᐊᖅᐳᑦ ᓱᕐᕋᒃᑕᐅᓯᒪᖏᑦᑐᑎᑐᑦ ᐃᖅᓇᐃᔭᖅᑎ ᓄᖅᑲᕋᓗᐊᖅᑎᓪᓗᒍ ᐃᖅᑲᓇᐃᔭᕈᓐᓃᕋᓗᐊᖅᑎᓪᓗᒍ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᔾᔪᑎᒋᓪᓗᒍ ᐱᓕᕆᐊᒃᓴᓂᒃ ᑎᒍᓯᕐᓂᐅᔪᖅ.

10.26 ᐱᓕᕆᐊᒃᓴᓂᒃ ᓴᖅᑭᑦᑐᑎᖃᖏᓪᓗᓂ ᖃᓄᐃᑦᑐᑐᐃᓐᓇᕐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐅᕝᕙᓘᓐᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ, ᓄᓇᕗᑦ ᒐᕙᒪᒃᑯᖏᑦ ᐃᓱᒪᒃᓴᖅᓯᐅᕈᑎᖃᕆᐊᖃᖅᐳᑦ ᐊᑐᐃᓐᓇᕈᐃᓂᕐᒥᒃ ᒪᓂᒪᒃᓯᕐᓗᑎᒃ ᐊᑐᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐅᓪᓗᑉ ᐃᓚᖓᓄᑦ ᐃᖅᑲᓇᐃᔭᖅᑎᒋᔭᐅᔪᓂᒃ ᓄᖅᑲᖅᑎᑕᐅᒐᔭᖅᑐᓂᒃ ᓄᒃᑎᕆᓂᐅᑉ ᐅᓪᓗᖓᓂ ᓴᖅᑭᓚᕿᓯᒪᔪᓂᒃ ᐱᓕᕆᐊᒃᓴᓂᒃ ᑎᒍᓯᓂᕐᒥᑦ.

ᓄᓇᕗᑦ ᒐᕙᒪᒃᑯᖏᓐᓄᑦ ᑲᑐᔾᔨᖃᑎᒌᑦ ᐊᖏᖃᑎᒌᒍᑎᖏᑦ

10.27 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᓕᓴᖅᓯᕗᑦ ᐃᓗᓕᕆᔭᖏᑦ ᐊᖏᖃᑎᒌᒍᑎᓕᐅᖅᓯᒪᔪᑦ ᓄᓇᕗᑦ ᒐᕙᒪᒃᑯᖏᑕ ᑲᑐᔾᔨᖃᑎᒌᖏᑕ ᐊᖏᕈᑎᖏᓐᓄᑦ ᒪᓕᒃᓯᒪᔭᕆᐊᖃᖅᑐᑦ ᐋᖅᑭᒋᐊᕈᑎᒋᔭᐅᓯᒪᔪᓂᒃ ᐊᖏᖃᑎᒌᒍᑎᓄᑦ ᐊᑐᓕᖅᑎᑕᐅᖁᓪᓗᒋᑦ ᐃᓗᓕᕆᔭᖏᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᑦ ᒪᓕᒃᓯᒪᓗᑎᒃ ᐅᑯᓄᖓ ᑎᑎᕋᖅᓯᒪᓂᐅᔪᓄᑦ.

ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ

11.1 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᑦ ᓄᒃᑎᕆᔪᓐᓇᖁᓪᓗᒋᑦ ᑲᒥᓴᓇᒧᑦ, ᐱᒋᐊᕐᓗᒍ ᐅᓪᓗᐊᓂ ᓄᒃᑎᕆᓂᐅᑉ, ᐊᓪᓚᕕᖕᒥ ᐊᐅᓚᑕᐅᓂᖏᑦ ᐊᒻᒪᓗ ᐊᐅᓚᑕᐅᓂᖏᓐᓂᒃ ᑎᑎᕋᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓂᒃ.

11.2 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᓕᓴᖅᓯᕗᑦ ᑎᑎᕋᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ ᐊᑦᑕᑕᖅᓯᒪᔪᑦ ᐅᐃᒍᖓ 1-ᖑᓪᓗᓂ ᐅᑯᓄᖓ ᑎᑎᕋᖅᓯᒪᔪᓄᑦ ᓯᕗᓪᓕᖅᓯᐅᑎᐅᓪᓗᓂ ᑎᑎᕋᖅᓯᒪᔪᖁᑎᒋᔭᐅᕗᖅ ᐊᒻᒪ ᐋᖅᑭᒋᐊᖅᑕᐅᑐᐃᓐᓇᕆᐊᖃᖅᑐᖅ ᓯᕗᕐᖓᒍᑦ ᑭᖑᓪᓕᖅᐹᖅᓯᐅᑎᑦ ᐃᓱᒪᒃᓴᖅᓯᐅᕈᑕᐅᓚᐅᖏᓐᓂᖏᓐᓂ ᑎᑎᕋᖅᓯᒪᓂᖓᓃᑦᑐᑦ 11.3.

11.3 ᑲᓇᑕᐅᑉ ᒐᕙᒪᒃᑯᖏᑦ, ᑐᓴᕋᓱᐊᓚᐅᕐᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ, ᓴᓇᔭᕆᐊᖃᖅᑐᑦ ᑎᑎᕋᖅᓯᒪᔪᓂᒃ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓂᒃ ᓄᒃᑎᖅᑕᐅᔭᕆᐊᖃᖅᑐᓂᒃ ᒪᓕᒡᓗᒍ ᑎᑎᕋᖅᓯᒪᓂᖓ 11.1, ᑖᒃᑯᐊ ᑎᑎᕋᖅᓯᒪᔪᑦ ᑭᖑᓪᓕᖅᐹᖅᓯᐅᑎᖏᑦ ᐋᖅᑭᒡᑕᐅᔭᕆᐊᖃᖅᑐᑦ ᓯᕗᕐᖓᒍᑦ ᐊᑎᓕᐅᖅᑕᐅᓚᐅᖏᓐᓂᖓᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ.

11.4 ᑕᐃᒪᓕ NAO ᐅᕝᕙᓘᓐᓃᑦ CNGO ᐃᖅᑲᓇᐃᔭᖅᑎᐅᔪᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᐃᒡᓗᖃᖅᐸᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓂ ᐊᐅᓚᑕᐅᔪᒥᒃ ᐊᓪᓚᕕᒃᑎᒍᑦ ᐊᒻᒪᓗ ᐊᐅᓚᑕᐅᓪᓗᓂ ᐃᓄᓕᕆᔨᑐᖃᒃᑯᑦ ᐱᓕᕆᕕᖓᓐᓄᑦ ᓲᕐᓗ Federal Building ᓱᕈᓯᒃᑯᕕᕕᓂᐅᑉ ᐃᓚᖓ ᑎᑎᕋᖅᑕᐅᖃᓯᐅᔾᔭᐅᓯᒪᖏᒻᒪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᓐᖏᓄᑦ, ᐃᓄᓕᕆᔨᑐᖃᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᒍᑎᓕᐅᕆᐊᖃᖅᑐᑦ ᐃᓂᖃᕐᕕᐅᓂᐊᕐᓂᖓᓄᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᑖᓐᓇ ᐊᖏᕈᑎᐅᓂᐊᕐᓗᓂ, ᐊᓯᐊᒍᑦ ᐊᖏᕈᑕᐅᓯᒪᖏᑉᐸᑦ, ᐃᒪᐃᑦᑑᔭᕆᐊᖃᖅᐳᖅ:

1. ᐊᑐᓕᖅᑎᑕᐅᓗᓂ ᐅᓪᓗᖓᓂ ᓄᒃᑎᕆᓂᐅᑉ ᐅᓪᓗᖓᑕ.
2. ᐃᓂᖃᖅᑎᑦᓯᔭᕆᐊᖃᖅᐳᖅ ᐃᒡᓗᒋᓂᐊᕐᒪᒍ ᓄᓇᕗᑦ ᒐᕙᒪᒃᑯᖏᑕ ᐃᓂᖁᑎᒋᔭᖓᓂᒃ ᐃᒡᓗᒋᔭᐅᔪᒧᑦ ᐃᖅᑲᓇᐃᔭᖅᑎᐅᔪᒧᑦ NAO ᐅᕝᕙᓘᓐᓃᑦ CNGO ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᒪᓕᒡᓗᒋᑦ ᑲᒪᒋᔭᒃᓴᕆᔭᐅᔪᑦ ᓄᒃᑎᕆᓂᕐᒧᑦ ᒪᓕᒐᕆᔭᖏᑦ ᐃᓗᐊᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᓂ;
3. ᐱᕕᖃᖅᑎᑦᓯᓗᑎᒃ ᐊᑯᓂᐅᓂᕆᔭᖓᓂᒃ ᐊᖏᖃᑎᒌᒍᑎᐅᔪᑦ ᐊᑐᖅᑕᐅᖏᓐᓇᖁᓪᓗᒍ; ᐊᒻᒪᓗ
4. ᐱᕕᖃᖅᑎᑦᓯᖁᓪᓗᒍ ᒪᓕᒐᖃᕐᓗᑎᒃ ᐊᒻᒪ ᐃᒡᓗᑦ ᖃᓄᐃᓕᖓᔭᕆᐊᖃᕐᓂᖏᓐᓄᑦ ᒪᓕᒐᖃᕐᓗᑎᒃ ᓄᓇᕗᑦ ᒐᕙᒪᒃᑯᖏᑕ ᐃᒡᓗᖁᑎᖏᓐᓂ ᐃᒡᓗᖃᖅᑐᑦ ᒪᓕᒃᓯᒪᓗᑎᒃ ᓂᐅᕐᕈᑎᖃᖅᑎᐅᔪᑦ ᐊᑐᖅᑐᐊᖅᑎᑦᓯᔨᐅᔪᑦ ᐱᖅᑯᓯᖏᓐᓂᒃ ᐊᔾᔨᖏᓐᓂᒃ ᐃᒡᓗᖁᑎᖃᖅᑐᑦ.

11.5 ᑕᐃᒪᓕ ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᒃᐸᑕ ᐃᓂᖃᐃᓐᓇᕐᓗᑎᒃ ᐃᓗᐊᓂ ᑎᑎᕋᖅᑕᐅᓯᒪᔪᑉ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓂ ᐊᐅᓚᑦᑎᕕᒋᓗᓂᔾᔪᒃ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᓄᓇᕗᑦ ᒐᕙᒪᒃᑯᖏᑦ ᐃᒪᐃᑦᑕᕆᐊᖃᖅᐳᑦ, ᑐᒃᓯᕋᕐᕕᐅᓚᐅᖅᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᐊᖏᖃᑎᒌᒍᑎᓕᐅᕐᓗᑎᒃ ᐃᒡᓗᒥᒃ ᓇᔪᒐᖃᕐᓂᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᑦ, ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᑖᒃᑯᐊ ᐊᖏᕈᑎᐅᔪᑦ ᐊᑐᖅᑕᐅᓗᑎᒃ ᐊᓯᐊᒍᑦ ᐊᖏᕈᑎᖃᖏᑉᐸᑕ, ᐃᒪᐃᑦᑕᕆᐊᖃᖅᐳᑦ:

1. ᐊᑐᓕᖅᑎᑕᐅᓗᓂ ᐅᓪᓗᖓᓂ ᓄᒃᑎᕆᓂᐅᑉ ᐅᓪᓗᖓᑕ;
2. ᐱᕕᖃᖅᑎᑦᓯᓗᑎᒃ ᐃᓂᖃᕈᓐᓇᖅᑎᑦᓯᓗᑎᒃ ᐃᓂᒋᔭᐅᓚᐅᖅᑐᒥᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ;
3. ᐱᕕᖃᖅᑎᑦᓯᓗᑎᒃ ᐊᑯᓂᐅᓂᕆᔭᖓᓂᒃ ᐊᖏᖃᑎᒌᒍᑎᐅᔪᑦ ᐊᑐᖅᑕᐅᓂᐊᕐᓂᕆᔭᖓᑕ; ᐊᒻᒪᓗ
4. ᒪᓕᒐᖃᖅᑎᑦᑎᓗᑎᒃ ᐊᒻᒪ ᐋᖅᑭᒡᓯᒪᓂᔭᕆᐊᖃᖅᑐᓂᒃ ᐊᑐᕆᐊᖃᖅᑕᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᓂᒃ ᓇᔪᖅᑎᓪᓗᒋᑦ ᑐᓐᖓᕕᒋᓗᒋᑦ ᓂᐅᕐᕈᑎᖃᖅᐸᒃᑐᑦ ᐊᑐᖅᑐᐊᖅᑎᑦᓯᔨᑦ ᐱᖅᑯᓯᖏᑦ ᐊᑐᖅᑎᓪᓗᒋᑦ ᑕᐃᒪᐃᑦᑐᑦᓴᐃᓐᓇᕐᒥᒃ ᐊᔾᔨᑲᓴᖓᓂᒃ ᐃᒡᓗᒥᒃ.

11.6 ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐱᕕᒃᓴᐅᔪᒥᒃ ᖃᐅᔨᓴᐃᔪᓐᓇᕐᓂᐊᕐᒪᑕ ᑎᑎᕋᖅᑕᐅᓯᒪᔪᓂᒃ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓂᒃ ᐊᒻᒪᓗ ᖃᐅᔨᓴᐃᓂᖃᓕᖅᐸᑕ ᐱᓕᕆᐊᖃᕐᓗᑎᒃ ᐸᒡᕕᓴᐃᖏᓐᓂᖅᐹᖑᔪᒥᒃ ᐊᑐᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᑕ ᐊᐅᓚᑕᖏᓐᓄᑦ.

11.7 ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᑎᑦᓯᓂᐊᖅᑐᑦ ᖃᐅᔨᓴᐃᖃᑦᑕᕐᓂᕆᔭᖏᓐᓂᒃ ᓱᕋᒃᓯᒪᔪᓂᒃ ᓴᓇᖃᑦᑕᕐᓗᑎᒃ ᑎᑎᕋᖅᑕᐅᓯᒪᔪᓂ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓂ ᑎᑭᑉᐸᑦ ᑭᓯᐊᓂ ᓄᒃᑎᕆᓂᕐᒧᑦ ᐅᓪᓗᖓ.

11.8 11.8 ᐱᔾᔪᑎᒋᓪᓗᒋᑦ ᐊᑐᓂ ᑎᑎᕋᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ, ᐱᔪᓐᓇᖅᓯᑐᐊᕈᑎᒃ ᑭᖑᕐᖓᒍᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᐅᔪᖅ, ᑐᓂᓯᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ ᒫᓐᓇᐅᔪᖅ ᐱᓕᕆᐊᖅ I-ᖑᔪᒥᒃ ᐊᕙᑎ ᓄᓇ ᖃᐅᔨᓴᖅᑕᐅᓚᐅᖅᑎᓪᓗᒍ ᐅᓂᒃᑳᓕᐊᒥᒃ.

11.9 ᑕᐃᒪᓕ ᐃᓗᐊᓂ ᐱᓕᕆᐊᑉ I ᐊᕙᑎᒥᒃ ᖃᐅᔨᓴᐃᓂᖃᖅᑎᓪᓗᒋᑦ ᑕᐃᔭᐅᔪᒥ ᑎᑎᕋᖅᓯᒪᓂᖓᓂ 11.8-ᒥ ᓇᓗᓇᐃᖅᓯᒃᐸᑕ ᓱᕈᖅᓯᒪᔪᖃᕐᓂᖓᓂᒃ, ᖁᕝᕙᓯᖕᓂᖅᓴᒃᑯᑦ ᐊᕙᑎ ᖃᐅᔨᓴᖅᑕᐅᔭᕆᐊᖃᖅᐳᖅ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪᓗ ᑐᓂᔭᐅᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐱᔪᓐᓇᖅᓯᑐᐊᖅᐸᑕ ᐱᔭᐅᓚᐅᖅᑎᓪᓗᒍ ᐱᓕᕆᐊᒥ I-ᒥ ᐊᕙᑎᒧᑦ ᓄᓇᒥᒃ ᖃᐅᔨᓴᐃᔾᔪᑎᐅᔪᖅ, ᐊᒻᒪᓗ ᑕᒪᓐᓇ ᐱᓕᕆᔭᐅᔭᕆᐊᖃᖅᑐᖅ ᐊᓂᒍᓚᐅᖅᑎᓐᓇᒋᑦ ᑕᖅᑭᑦ ᐱᖓᓲᔪᖅᑐᑦ (ᐊᕐᕕᓂᓕᑦ) ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.10 ᑲᓇᑕᐅᑉ ᒐᕙᒪᒃᑯᖏᑦ ᑲᒪᒋᔭᖃᕐᓗᑎᒃ ᐊᑭᓕᖅᓯᔭᕆᐊᖅᐳᑦ ᓴᓗᒻᒪᖅᓴᐃᓂᕐᒧᑦ, ᒪᓕᒡᓗᒋᑦ CCME ᒪᓕᒐᖏᑦ, ᐊᒥᒐᖅᓯᔪᖃᕐᓂᖅᐸᑦ ᓇᓗᓇᐃᖅᑕᐅᓯᒪᔪᓂ ᐊᑖᓂ ᐊᕙᑎᐅᑉ ᓄᓇᐅᑉ ᖃᐅᔨᓴᖅᑕᐅᓂᖓᑕ ᐅᓂᒃᑳᓕᐊᓂ ᑕᐃᔭᐅᓯᒪᔪᓂ ᐃᓗᐊᓂ ᑎᑎᕋᖅᓯᒪᓂᖏᑕ 11.8 ᐅᕝᕙᓘᓐᓃᑦ 11.9.

11.11 ᐊᑐᓂ ᑎᑎᕋᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ ᐃᒪᐃᑦᑕᕆᐊᖃᖅᐳᑦ, ᐅᓪᓗᐊᓂ ᓄᒃᑎᕆᓂᐅᑉ ᐅᓪᓗᖓᑕ, ᐃᒡᓗ ᖃᓄᐃᓕᖓᓂᖓ ᓈᒻᒪᒋᐊᖃᖅᑐᖅ ᐅᑯᓄᖓ:

1. ᐊᖑᒻᒪᑎᓗᓂ ᐊᐅᓚᑦᑕᕆᐊᖃᖅᑐᑦ ᒪᓕᒐᖏᓐᓄᑦ ᐊᒃᑐᐊᓂᖃᖅᑐᑦ ᐃᒡᓗ ᐊᐅᓚᑦᑕᕆᐊᖃᖅᑐᖅ ᐊᑐᖅᑕᐅᓂᐊᕐᒪᑦ ᐃᕐᖐᓐᓇᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ; ᐊᒻᒪᓗ
2. ᐊᖑᒻᒪᑎᓗᓂ ᐃᓄᐃᓴᖕᓂᖅᐹᖑᔪᒃᑯᑦ ᐱᖁᔭᖏᓐᓂᒃ ᐊᒻᒪᓗ ᒪᓕᒐᖏᓐᓂᒃ ᑎᒥᒧᑦ ᑲᑉᐱᐊᓇᕆᐊᖃᖏᓐᓂᖓᓂᒃ ᐊᒻᒪᓗ ᐅᓗᕆᐊᓇᕆᐊᖃᖏᓐᓂᕐᒧᑦ ᒪᓕᒐᖏᑦ ᐃᒡᓗᑉ ᐊᖑᒻᒪᑎᓗᓂ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.12 ᑲᓇᑕᐅᑉ ᒐᕙᒪᒃᑯᖏᑦ ᐅᖃᖃᑎᖃᕋᔭᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐱᔾᔪᑎᑕᖃᕐᓂᖅᐸᑦ ᓇᓗᓇᐃᖅᑕᐅᓯᒪᔪᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐃᓗᐊᓂ ᑎᑎᕋᖅᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ ᐊᖑᒻᒪᑎᖏᑦᑐᑦ ᐱᖁᔭᕐᓂᒃ ᐊᒻᒪᓗ ᒪᓕᒐᖏᓐᓂᒃ ᑎᒥᒧᑦ ᐅᓗᕆᐊᓇᕆᐊᖃᖏᓐᓂᖏᓐᓂᒃ ᒪᓕᒐᖏᓐᓂᒃ ᐃᒡᓗ ᐃᕐᖐᓐᓇᖅ ᑲᒪᒋᔭᐅᓗᓂ ᓄᒃᑎᖅᑕᐅᓚᐅᖅᑎᓪᓗᒍ.

11.13 ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᔭᕆᐊᖃᖅᐳᑦ ᐱᔭᕇᖅᓯᓇᓱᐊᕐᓗᑎᒃ ᓴᓗᒻᒪᖅᓴᖅᑕᖏᓐᓂᒃ ᑕᐃᔭᐅᔪᓂ ᑎᑎᕋᖅᓯᒪᓂᖓᓂ 11.10, ᐊᒻᒪᓗ ᐋᖅᑭᒡᑕᐅᓗᑎᒃ ᐊᒥᒐᖅᓯᓂᕆᔭᐅᔪᑦ ᐊᖑᒻᒪᑎᖏᑦᑐᑦᒪᓕᒐᖏᓐᓂᒃ ᑎᑎᕋᖅᓯᒪᓂᕐᒥᒃ 11.11 ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ. ᓴᓗᒻᒪᖅᓴᐃᔭᕆᐊᖃᖅᑎᓪᓗᒋᑦ ᐊᖑᒻᒪᑎᖏᑦᑐᒥᒃ ᑕᒪᓐᓇ ᐱᔭᕇᖅᑕᐅᓯᒪᑎᓐᓄᒍ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ:

1. ᐱᔭᕇᖅᓗᑎᒃ ᓴᓗᒻᒪᖅᓴᖅᑕᖏᓐᓂᒃ ᐅᕝᕙᓘᓐᓃᑦ ᓴᓗᒻᒪᖅᓴᖅᑕᖏᓐᓂᒃ ᐊᒥᒐᖅᓯᔪᓂᒃ ᐱᓕᕆᔭᐅᓗᑎᒃ ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ; ᐅᕝᕙᓘᓐᓃᑦ
2. ᒪᓕᒡᓗᒍ ᐊᖏᕈᑎᒋᔭᐅᓯᒪᔪᖅ ᓄᓇᕗᑦ ᒐᕙᒪᒃᑯᖏᓐᓄᑦ, ᐊᑭᓕᖅᓯᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᑮᓇᐅᔭᓂᒃ ᐱᔭᕇᖅᓯᖏᓐᓂᖏᓐᓄᑦ ᑲᓇᑕᐅᑉ ᒐᕙᒪᒃᑯᖏᑦ ᓴᓗᒻᒪᖅᓴᖅᑕᖏᓐᓄᑦ ᐅᕝᕙᓘᓐᓃᑦ ᐱᓕᕆᔭᕆᐊᖃᖅᑐᓂᒃ ᐊᖑᒻᒪᑎᖏᑦᑐᓂᒃ ᓴᓗᒻᒪᖅᓴᐃᖏᓐᓂᖏᓐᓄᑦ.

11.14 ᐊᑐᓂ ᑎᑎᕋᖅᑕᐅᓯᒪᔪᑦ ᑲᓇᑕᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ ᐊᓪᓚᕕᒃᑎᒍᑦ ᑲᒪᒋᔭᐅᔪᑦ ᐊᒻᒪᓗ ᐊᐅᓚᑕᐅᔪᑦ ᓴᓇᔪᓕᕆᔨᒃᑯᑦ ᑲᓇᑕᒥ ᐱᓕᕆᕕᖓᓐᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ ᑐᓂᓯᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ ᑲᔪᓯᔪᒃᑯᑦ ᑮᓇᐅᔭᖃᖅᑎᑦᓯᔾᔪᑕᐅᓂᐊᖅᑐᓂᒃ ᐅᑯᓄᖓ:

1. ᐊᑭᓕᖅᓯᔾᔪᑎᑦ ᑖᒃᓯᔭᓐᖏᖔᕐᓗᑎᒃ; ᐊᒻᒪᓗ
2. ᐊᐅᓚᑕᐅᓂᖓ ᐊᒻᒪᓗ ᐋᖅᑭᐅᒪᔾᔪᑎᖏᑦ,

ᐅᓄᕐᓂᖏᑦ ᐊᔾᔨᖃᕐᓗᑎᒃ ᐅᓄᕐᓂᕆᔭᖏᓐᓂᒃ ᓴᓇᔪᓕᕆᔨᒃᑯᑦ ᑲᓇᑕᒥ ᐱᓕᕆᕕᖓᑦᑕ ᑮᓇᐅᔭᖃᖅᑎᑦᓯᓂᕆᓚᐅᖅᑕᖓᓐᓂᒃ ᑎᑎᕋᖅᑕᐅᓯᒪᔪᒧᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖓᓐᓄᑦ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.15 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᓕᓴᖅᓯᕗᑦ ᑖᒃᑯᐊ ᑮᓇᐅᔭᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 11.14 ᐱᖃᓯᐅᔾᔭᐅᓯᒪᓂᖏᓐᓂᒃ ᑲᔪᓯᔪᒃᑯᑦ ᑮᓇᐅᔭᖃᖅᑎᑦᓯᔾᔪᑎᓂ ᑕᐃᔭᐅᓯᒪᔪᓂ ᐃᓗᐊᓂ ᑎᑎᕋᖅᓯᒪᓂᖓᑕ 12.20.

ᓇᖕᒥᓂᕆᔭᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᑦ

11.16 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᓕᓴᖅᓯᕗᑦ ᓇᖕᒥᓂᕆᔭᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᑦ ᑎᑎᕋᖅᑕᐅᓯᒪᔪᑦ ᐅᐃᒍᖓᓂ 1-ᒥ ᐅᑯᓄᖓ ᑎᑎᕋᖅᓯᒪᔪᓄᑦ ᐅᐃᒍᓕᐊᕆᓯᒪᔪᑦ ᓯᕗᓪᓕᖅᓯᐅᑎᑐᐃᓐᓇᖕᒪᑕ ᑎᑎᕋᖅᓯᒪᔪᑦ ᐊᒻᒪᓗ ᐋᖅᑭᒋᐊᖅᑕᐅᑐᐃᓐᓇᕆᐊᖃᖅᑐᑦ ᓯᕗᕐᖓᒍᑦ ᐱᔭᕇᖅᑕᐅᓚᐅᖏᓐᓂᖏᓐᓂ ᑎᑎᕋᖅᓯᒪᓂᖏᑦ 11.17 ᐊᒻᒪᓗ 11.18.

11.17 ᑲᓇᑕᐅᑉ ᒐᕙᒪᒃᑯᖏᑦ ᑐᓴᕋᓱᐊᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᓯᔾᔨᖅᑐᖃᕐᓂᖅᐸᑦ ᑎᑎᕋᖅᓯᒪᔪᖁᑎᖏᓐᓂ ᑕᐃᔭᐅᓯᒪᔪᓂ ᐃᓗᐊᓂ ᑎᑎᕋᖅᓯᒪᓂᖓᑕ 11.16 ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐃᓕᓯᓂᐊᖅᐳᑦ ᑎᑎᖅᑲᓂᒃ ᐃᓗᐊᓄᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᓄᑦ.

11.18 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᓂᐊᖅᐳᑦ ᐃᒪᓐᓇ ᑲᓇᑕᐅᑉ ᒐᕙᒪᒃᑯᖏᑦ ᑐᓴᕋᓱᐊᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᓯᔾᔨᖅᑐᖃᕐᓂᖅᐸᑦ ᑎᑎᕋᖅᑕᐅᓯᒪᔪᓄᑦ ᐅᐃᒍᖓᓃᑦᑐᓂᒃ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᑦ ᒪᓕᒡᓗᒍ ᑎᑎᕋᖅᓯᒪᓂᖓ 11.17 ᑭᖑᕐᖓᒍᑦ ᑲᓇᑕᐅᑉ ᒐᕙᒪᒃᑯᖏᑦ ᐱᔭᕇᖅᓯᓗᑎᒃ ᑎᑎᕋᖅᑕᖏᓐᓂᒃ ᐊᒻᒪ ᑐᓂᓗᓂᒋᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᓂᒍᓚᐅᖏᓐᓂᖏᓐᓂ ᑕᖅᑭᑦ ᐱᖓᓲᔪᖅᑐᑦ (ᐊᕐᕕᓂᓕᑦ) ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.19 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᑦ ᓄᒃᑎᕆᓗᑎᒃ ᑲᒥᓴᓇᒧᑦ, ᐅᓪᓗᐊᓂ ᓄᒃᑎᕆᓂᐅᑉ, ᐊᓪᓚᕕᓕᕆᔾᔪᑎᖏᓐᓂᒃ ᐊᒻᒪᓗ ᐊᐅᓚᑦᑎᔾᔪᑎᖏᓐᓂᒃ ᓇᖕᒥᓂᕆᔭᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗ ᑎᑎᕋᖅᑕᐅᓯᒪᔪᑦ ᐃᓗᐊᓂ ᑭᖑᓪᓕᖅᐹᕐᒥ ᑎᑎᕋᖅᑕᐅᓯᒪᔪᑦ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.18-ᒥ.

11.20 ᑎᑎᕋᖅᓯᒪᓂᖏᑦ 11.8 ᑎᑭᓪᓗᒍ 11.13 ᐊᑐᖅᑕᐅᔭᕆᐊᖃᖅᐳᑦ ᓇᖕᒥᓂᕆᔭᐅᔪᓄᑦ ᐃᖅᑲᓇᐃᔭᖅᑎᓄᑦ ᐃᒡᓗᓄᑦ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖏᓐᓂ 11.17 ᐊᒻᒪᓗ 11.18. ᐊᔾᔨᖓᓂᒃ ᐱᐅᓯᖃᕐᓗᑎᒃ ᐊᑐᕆᐊᖃᖅᑐᑦ ᑎᑎᕋᖅᑕᐅᓯᒪᔪᓄᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓄᑦ.

ᑲᓇᑕᐅᑉ ᒐᕙᒪᒃᑯᖏᑕ ᐊᑐᖅᑐᐊᖅᑕᖏᑦ

11.21 ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐅᓪᓗᐊᓂ, ᐊᑐᓕᖅᑎᑕᐅᓗᓂ ᑕᕝᕙᓂ, ᓄᒃᑎᕆᓂᐅᑉ ᐅᓪᓗᖓᓂ, ᐊᑐᖅᑐᐊᖅᑕᐅᔾᔪᑎᑦ ᑎᑎᕋᖅᑕᐅᓯᒪᔪᑦ ᐅᐃᒍᖓᓂ 2-ᒥ ᐅᑯᓇᓂ ᑎᑎᕋᖅᓯᒪᓂᕐᓂ. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐃᓕᓴᖅᓯᕗᑦ ᑎᑎᕋᖅᓯᒪᔪᑦ ᐅᑯᓄᖓ ᐅᐃᒍᓯᒪᔪᑦ 2-ᖑᓪᓗᑎᒃ ᓯᕗᓪᓕᖅᓯᐅᑎᐅᓂᖏᓐᓂᒃ ᑎᑎᖅᑲᑦ ᐊᒻᒪᓗ ᐋᖅᑭᒋᐊᖅᑕᐅᔪᓐᓇᖅᑐᑦ ᓯᕗᕐᖓᒍᑦ ᑭᖑᓪᓕᖅᐹᖅᓯᐅᑎᑦ ᑎᑎᕋᖅᑕᐅᓚᐅᖏᓐᓂᖏᓐᓂ.

11.22 ᓴᓇᔪᓕᕆᔨᒃᑯᑦ ᑲᓇᑕᒥ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᒍᑎᓕᐅᕐᓗᑎᒃ ᐃᒡᓗᒥᒃ ᓇᔪᕐᓂᕐᒧᑦ ᓄᓇᕗᑦ ᒐᕙᒪᒃᑯᖏᑕ ᐊᑐᖅᑐᐊᖅᑎᓪᓗᓂᒋᑦ ᐃᒪᐃᓕᖓᑎᓪᓗᒍ:

1. ᓴᓇᔪᓕᕆᔨᒃᑯᑦ ᑲᓇᑕᒥ ᐊᑐᖅᑐᐊᖅᑎᓪᓗᒋᑦ ᐃᒡᓗᒥᒃ, ᐃᒡᓗ ᓇᔪᖅᑕᐅᓗᓂ, ᐊᑕᖏᕐᓗᒍ ᐅᕝᕙᓘᓐᓂᑦ ᐃᓚᐃᓐᓇᖓ, ᐊᑐᖅᑕᐅᑎᓪᓗᒍ ᐃᖅᑲᓇᐃᔭᖅᑎᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᐱᓪᓗᒋᑦ ᑲᒪᒋᔭᕆᐊᖃᖅᑕᖏᑦ ᓄᑭᑎᖅᑕᐅᓯᒪᔪᑦ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐊᒻᒪᓗ ᑎᒍᒥᐊᖅᑕᐅᓂᐊᕐᓂᖓᓂᒃ ᐊᑐᖅᑐᐊᕈᑎᐅᔪᖅ ᓴᓇᔪᓕᕆᔨᒃᑯᑦ ᑲᓇᑕᒥ ᐱᓕᕆᕕᖓᓐᓄᑦ ᐱᔭᕆᐊᖃᖅᑎᓪᓗᒍ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᑲᓇᑕᐅᑉ ᒐᕙᒪᒃᑯᖏᑕ ᐱᓕᕆᐊᖓᓄᑦ ᐊᑐᖅᑕᐅᓂᐊᖅᑎᓪᓗᒍ; ᐅᕝᕙᓘᓐᓃᑦ
2. ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ ᑲᒪᒋᔭᐅᑎᓪᓗᒍ ᐊᓪᓚᕕᓕᕆᓂᒃᑯᑦ ᐊᒻᒪᓗ ᐊᐅᓚᑕᐅᑎᓪᓗᒍ ᓴᓇᔪᓕᕆᔨᒃᑯᑦ ᑲᓇᑕᒥ, ᑎᑎᕋᖃᓯᐅᔾᔭᐅᓯᒪᓐᖏᑎᓪᓗᒍ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᓐᓄᑦ ᓇᔪᖅᑕᐅᓗᓂ ᐃᖅᑲᓇᐃᔭᖅᑎᐅᔪᒧᑦ NAO ᐅᕝᕙᓘᓐᓃᑦ CNGO-ᖑᔪᒧᑦ ᐱᓪᓗᒋᑦ ᑲᒪᒋᔭᕆᐊᖃᖅᑐᑦ ᓄᒃᑎᖅᑕᐅᔭᕆᐊᖃᖅᑐᑦ ᒪᓕᒡᓗᒍ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑏᑦ.

11.23 ᑭᓯᐊᓂ ᐊᓯᐊᒍᑦ ᐊᖏᕈᑕᐅᓯᒪᒃᐸᑦ ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᓴᓇᔪᓕᕆᔨᒃᑯᑦ ᑲᓇᑕᒥ ᐱᓕᕆᕕᖓᑦ, ᐊᖏᖃᑎᒌᒡᓗᑎᒃ ᓇᔪᖅᓯᓂᖓᓂᒃ ᐃᒡᓗᒥᒃ ᑕᐃᔭᐅᓯᒪᔪᒥ ᑎᑎᕋᖅᓯᒪᓂᖓᓂ 11.22 ᐃᒪᐃᑦᑕᕆᐊᖃᖅᐳᖅ:

1. ᐊᑐᓕᖅᑎᑕᐅᓗᓂ ᓄᒃᑎᕆᓂᐅᑉ ᐅᓪᓗᖓᓂ;
2. ᐃᓂᒋᔭᐅᔪᓐᓇᕐᓗᓂ ᓄᓇᕗᑦ ᒐᕙᒪᒃᑯᖏᓐᓄᑦ ᓇᔪᖅᑕᐅᑎᓪᓗᒍ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᐱᔾᔪᑎᒋᓪᓗᒋᑦ ᑲᒪᒋᔭᒃᓴᖏᑦ ᓄᒃᑎᖅᑕᐅᑎᓪᓗᒋᑦ ᒪᓕᒡᓗᒍ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑏ;
3. ᑐᓂᓯᓗᑎᒃ ᐊᑭᒋᓂᐊᖅᑕᖏᓐᓂᒃ ᐊᑐᖅᑐᐊᕐᓂᖏᓐᓄᑦ, ᒪᓕᒐᖏᓐᓂᒃ ᐊᔾᔨᖃᕐᓗᑎᒃ ᐊᑐᖅᑕᐅᔪᓄᑦ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO ᓇᔪᖅᑕᐅᔪᓄᑦ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ;
4. ᑐᓂᓯᓗᑎᒃ ᒪᓕᒐᖃᖅᑎᑕᐅᓗᑎᒃ ᐊᑯᓂᐅᓂᕆᓂᐊᖅᑕᖓ ᐊᖏᖃᑎᒌᒍᑎᑦ ᐊᑐᖅᑕᐅᓂᐊᕐᓂᕆᔭᖓᓄᑦ; ᐊᒻᒪᓗ
5. ᒪᓕᒡᓗᒍ ᑎᑎᕋᖅᓯᒪᓂᖓ 11.23(c), ᐱᕕᖃᖅᑎᑦᓯᓗᑎᒃ ᐊᓯᖏᓐᓂᒃ ᒪᓕᒐᕐᓂᒃ ᐊᒻᒪ ᖃᓄᐃᓐᓂᐅᔭᕆᐊᖃᖅᑐᓂᒃ ᓄᓇᕗᑦ ᒐᕙᒪᒃᑯᖏᑕ ᐃᒡᓗᒥᒃ ᓇᔪᖅᓯᓂᖃᖅᑎᓪᓗᒋᑦ ᑐᓐᖓᕕᒋᔭᖏᑦ ᐊᑐᖅᑕᐅᓗᑎᒃ ᓂᐅᕐᕈᑎᖃᖅᑎᐅᔪᑦ ᐊᑐᖅᑐᐊᖅᑎᑦᓯᓂᕐᒧᑦ ᐱᖅᑯᓯᕆᔭᖏᑦ ᑕᐃᒪᐃᑦᑐᓂᒃ ᐃᒡᓗᓂᒃ ᐊᔾᔨᑲᓴᖏᓐᓂᒃ ᐊᑐᖅᐸᒃᑕᖏᓐᓄᑦ.

ᐊᑐᖅᑐᐊᖅᑕᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᑦ

11.24 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᓕᓴᖅᓯᕗᑦ ᐊᑐᖅᑐᐊᖅᑕᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᑦ ᑎᑎᕋᖅᓯᒪᓂᖓ 11 ᓇᓗᓇᐃᖅᑕᐅᓯᒪᔪᑦ ᐃᓗᐊᓂ ᐅᐃᒍᖓᓂ 2−ᒥ ᐅᑯᓇᓂ ᑎᑎᕋᖅᓯᒪᓂᖓᓂ 11-ᒥ ᓯᕗᓪᓕᖅᓯᐅᑎᑐᐃᓐᓇᐅᖕᒪᑕ ᐊᒻᒪ ᐋᖅᑭᒋᐊᖅᑕᐅᑐᐃᓐᓇᕆᐊᖃᖅᑐᑦ ᓯᕗᕐᖓᒍᑦ ᑭᖑᓪᓕᖅᐹᖅᓯᐅᑎᑦ ᐃᓱᒪᒃᓴᖅᓯᐅᕈᑕᐅᓚᐅᖏᓐᓂᖏᓐᓂ ᑎᑎᕋᖅᓯᒪᓂᖏᑦ 11.25 ᐊᒻᒪᓗ 11.26.

11.25 ᑲᓇᑕᐅᑉ ᒐᕙᒪᒃᑯᖏᑦ ᑐᓴᕋᓱᐊᕐᕕᖃᕐᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ ᐊᓯᔾᔨᖅᑐᖃᕐᓂᖅᐸᑦ ᑎᑎᕋᖅᓯᒪᔪᖁᑎᖏᓐᓂ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖓᓂ 11.24-ᒥ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᐅᓪᓗᒥᓯᐅᑎᕈᖅᑕᐅᓯᒪᔪᓂᒃ ᑎᑎᖅᑲᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐅᐃᒍᓕᐊᕆᔭᐅᓗᑎᒃ ᐱᓕᕆᐊᒃᓴᓄᑦ ᑎᒍᓯᓂᕐᒧᑦ ᐊᖏᖃᑎᒌᒍᑎᓄᑦ.

11.26 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᑐᓴᕋᓱᐊᕐᕕᖃᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐊᓯᔾᔨᖅᑐᖃᕐᓂᖅᐸᑦ ᑎᑎᕋᖅᓯᒪᔪᓄᑦ ᐅᑯᓄᖓ ᐅᐃᒍᓕᐊᕆᓯᒪᔪᓄᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᓄᑦ ᒪᓕᒡᓗᒍ ᑎᑎᕋᖅᓯᒪᓂᖓ 11.25 ᑭᖑᕐᖓᒍᑦ ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᓄᑖᕈᕆᐊᖅᓯᒪᔪᓂᒃ ᐅᓪᓗᒥᓯᐅᑎᕈᖅᓯᒪᔪᓂᒃ ᓯᕗᓪᓕᖅᓯᐅᑎᓂᒃ ᑎᑎᕋᖅᓯᒪᔪᓂᒃ ᐃᓗᐊᓂ ᑕᖅᑭᑦ ᐱᖓᓲᔪᖅᑐᑦ (ᐊᕐᕕᓂᓕᑦ) ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᐊᒻᒪ ᑭᖑᓪᓕᖅᐹᖅᓯᐅᑎᑦ ᑎᑎᖅᑲᖏᑦ ᑕᖅᑭᑦ ᐱᖓᓱᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.27 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᕕᖃᖅᑎᑦᓯᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐱᓕᕆᔪᓐᓇᕐᓂᖏᑦ ᐊᑐᕐᓗᒋᑦ ᑐᓂᓯᓂᐊᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᐅᓪᓗᐊᓂ ᓄᒃᑎᕆᓂᐅᑉ ᐅᓪᓗᐊᑕ, ᑲᓇᑕᐅᑉ ᒐᕙᒪᒃᑯᖏᑕ ᓄᓇᓂᒃ ᐊᑐᖅᑐᐊᕈᑎᖏᓐᓂᒃ, ᐱᖃᓯᐅᑎᓪᓗᒋᑦ ᐃᓘᓐᓇᖏᑦ ᐱᔪᓐᓇᐅᑎᐅᔪᑦ ᐊᒻᒪᓗ ᐱᓕᕆᐊᒃᓴᕆᔭᖏᑦ ᒪᓕᒐᖅᑎᒍᑦ ᑲᓇᑕᐅᑉ ᒐᕙᒪᒃᑯᖏᑕ, ᐊᑐᓂ ᐊᑐᖅᑐᐊᖅᑕᐅᔪᓄᑦ ᓇᓗᓇᐃᖅᑕᐅᓯᒪᔪᓄᑦ ᑭᖑᓪᓕᖅᐹᖅᓯᐅᑎᓂ ᑎᑎᕋᖅᑕᐅᓯᒪᔪᓂ ᑕᐃᔭᐅᔪᓂ ᑎᑎᕋᖅᓯᒪᓂᖓᓂ 11.26.

11.28 ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑎᑎᕋᖅᓯᒪᔪᓂᒃ ᐊᑐᖅᑐᐊᖅᑕᐅᔪᓂᒃ ᓇᓗᓇᐃᖅᑕᐅᓯᒪᔪᓂ ᑭᖑᓕᖅᐹᖅᓯᐅᑎᑦ ᑎᑎᖅᑲᑦ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.26 ᓄᒃᑎᖅᑕᐅᔭᕆᐊᖃᖅᑐᑦ.

11.29 ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑎᑎᕋᖅᓯᒪᔪᓂᒃ ᐊᑐᖅᑐᐊᖅᑕᐅᔪᓂᒃ ᓇᓗᓇᐃᖅᑕᐅᓯᒪᔪᓂᒃ ᑭᖑᓪᓕᖅᐹᖅᓯᐅᑎᓂ ᑎᑎᖅᑲᓂ ᑕᐃᔭᐅᔪᓂ ᑎᑎᕋᖅᓯᒪᓂᖓᓂ 11.26-ᒥ ᓄᒃᑎᖅᑕᐅᒋᐊᖃᖏᑦᑐᑦ ᐊᒻᒪᓗ ᓇᐃᓈᖅᓯᒪᓗᒋᑦ ᐱᓕᕆᔭᐅᒐᓱᐊᓚᐅᖅᑐᑦ ᑎᒍᓯᒐᓱᐊᖅᑎᓪᓗᒋᑦ ᐊᑐᖅᑐᐊᕈᑎᐅᔪᒥᒃ.

11.30 ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐱᕕᒃᓴᖃᖅᑎᑦᓯᓗᑎᒃ ᖃᐅᔨᓴᐃᔪᓐᓇᕐᓂᐊᕐᒪᑕ ᐃᒡᓗᓂᒃ ᐊᑐᖅᑐᐊᖅᑕᐅᔪᓂᒃ ᐃᖅᑲᓇᐃᔭᖅᑎᓄᑦ ᑕᐃᔭᐅᓯᒪᔪᓂ ᑎᑎᖅᑲᖁᑎᒋᔭᐅᔪᓂ ᓇᓗᓇᐃᖅᑕᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖏᓐᓂ 11.24, 11.25 ᐊᒻᒪᓗ 11.26.

11.31 ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᓂᐊᖅᑐᑦ ᐊᑯᓚᐃᑦᑐᒃᑯᑦ ᓱᕋᒃᓯᒪᔪᓕᕆᓂᕆᖃᑦᑕᕐᓂᐊᖅᑐᑦ ᓴᓇᓗᑎᒃ ᐊᑐᖅᑐᖅᐊᑕᐅᔪᓄᑦ ᐃᒡᓗᓄᑦ ᑕᐃᔭᐅᓯᒪᔪᓂ ᑭᖑᓪᓕᖅᐹᕐᒥ ᑎᑎᖅᑲᖁᑎᒋᔭᐅᔪᓂ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖏᑕ 11.24, 11.25 ᐊᒻᒪᓗ 11.26 ᑎᑭᒐᓱᐊᕐᓂᖓᓂ ᓄᒃᑎᕆᓂᐅᑉ ᐅᓪᓗᖓ.

ᓄᒃᑕᕈᓐᓇᖅᑐᑦ ᐱᖁᑏᑦ

11.32 ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᐅᑯᐊ ᓯᕗᓪᓕᖅᓯᐅᑎᐅᔪᑦ ᐊᖏᖃᑎᒌᒍᑏᑦ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᓯᕗᓪᓕᖅᓯᐅᑎᓂᒃ ᑎᑎᖅᑲᓂᒃ ᓄᒃᑕᕈᓐᓇᖅᑐᑦ ᐱᖁᑎᒋᔭᐅᔪᑦ ᑐᕌᖓᔪᑦ ᐅᕝᕙᓘᓐᓃᑦ ᐊᑐᖅᑕᐅᔪᑦ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᐱᔾᔪᑎᒋᓪᓗᒋᑦ ᑲᒪᒋᔭᕆᐊᖃᖅᑐᑦ ᓄᒃᑎᖅᑕᐅᓯᒪᔪᓄᑦ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᐅᔪᖅ. ᑎᑎᕋᖅᓯᒪᔪᖅ ᓇᓗᓇᐃᖅᓯᔪᓐᓇᕐᒥᔪᖅ ᐅᕝᕙᓘᓐᓃᑦ ᑭᓲᓂᖏᓐᓂᒃ ᓇᓗᓇᐃᖅᓯᓗᑎᒃ ᐱᖁᑎᓂᒃ ᓄᒃᑕᕈᓐᓇᖅᑐᓂᒃ ᐊᑐᓂ, ᖃᓄᐃᑦᑑᓂᖏᓐᓂᒃ ᐊᑐᕐᓗᑎᒃ ᐅᕝᕙᓘᓐᓃᑦ ᐊᔾᔨᒌᖏᑦᑑᓂᖏᓐᓂᒃ.

11.33 ᑲᓇᑕᐅᑉ ᒐᕙᒪᒃᑯᖏᑦ ᓄᑖᕈᕆᐊᖅᓯᔭᕆᐊᖃᖅᐳᑦ ᐅᓪᓗᒥᓯᐅᑎᕈᕐᓗᒋᑦ ᑎᑎᖅᑲᖁᑎᒋᔭᖏᑦ ᓇᓗᓇᐃᖅᑕᐅᓯᒪᔪᑦ ᑎᑎᕋᖅᓯᒪᓂᖓᓂ 11.32-ᒥ ᐊᑯᓚᐃᑦᑐᒃᑯᑦ ᓄᑖᕈᕆᐊᖅᑕᐅᖃᑦᑕᕐᓗᑎᒃ ᐊᒻᒪᓗ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.34 ᑐᒃᓯᕋᓚᐅᖅᑎᓪᓗᒋᑦ ᓄᓇᕗᑦ ᒐᕙᒪᒃᑯᖏᑦ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐱᕕᒃᓴᖃᑦᓯᐊᖅᑎᑦᓯᓗᑎᒃ ᖃᐅᔨᓴᐃᔪᓐᓇᕐᓂᐊᕐᒪᑕ ᓄᒃᑕᕈᓐᓇᖅᑐᓂᒃ ᐱᖁᑎᓂᒃ ᓇᓗᓇᐃᖅᑕᐅᓯᒪᔪᓂᒃ ᐅᕝᕙᓘᓐᓃᑦ ᐅᖃᐅᑕᐅᓯᒪᔪᓂᒃ ᑎᑎᖅᑲᖁᑎᓂ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖓᓂ 11.32, ᓄᑖᕈᕆᐊᖅᑕᐅᓯᒪᓗᓂ ᐅᓪᓗᒥᓯᐅᑎᕈᕐᓗᒍ ᒪᓕᒡᓗᒍ ᑎᑎᕋᖅᓯᒪᓂᖓ 11.33. ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᖃᖅᐳᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐋᖅᑭᒡᓯᖁᓪᓗᒋᑦ ᖃᐅᔨᓴᐃᕕᒃᓴᒥᒃ ᐊᒻᒪᓗ ᖃᐅᔨᓴᐃᖁᓪᓗᒋᑦ ᐊᑐᕐᓗᑎᒃ ᐸᒡᕕᓴᐃᖏᓐᓂᖅᐹᖑᔪᒥᒃ ᑲᓇᑕᐅᑉ ᒐᕙᒪᒃᑯᖏᑕ ᐊᐅᓚᑕᖏᓐᓄᑦ.

11.35 ᐊᑐᓂ ᓄᒃᑕᕈᓐᓇᖅᑐᑦ ᐱᖁᑎᑦ ᑎᑎᕋᖅᑕᐅᓯᒪᔪᑦ ᑕᐃᔭᐅᓯᒪᔪᒃᑯᑦ ᑎᑎᕋᖅᓯᒪᓂᖓᒍᑦ 11.32, ᐅᓪᓗᒥᓯᐅᑎᕈᖅᑕᐅᓗᓂ ᒪᓕᒡᓗᒍ ᑎᑎᕋᖅᓯᒪᓂᖓ 11.33, ᐃᒪᐃᑦᑕᕆᐊᖃᖅᐳᑦ, ᐅᓪᓗᐊᓂ ᓄᒃᑎᕆᓂᐅᑉ, ᓴᓇᔭᐅᔭᕆᐊᖃᕐᓂᖓ ᐊᖑᒻᒪᑎᓗᓂ ᐊᐅᓚᑦᑐᓐᓇᑦᓯᐊᕐᓗᑎᒃ ᐊᑐᖅᑕᐅᔪᓐᓇᕐᓗᓂ ᐱᖁᑎᐅᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.36 ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᑎᑦᓯᓗᑎᒃ ᐊᑯᓚᐃᑦᑐᒃᑯᑦ ᓱᕋᒃᓯᒪᔪᓕᕆᓂᕆᖃᑦᑕᖅᑕᖓᑦ ᓄᒃᑕᕈᓐᓇᖅᑐᓄᑦ ᐱᖁᑎᓄᑦ ᑎᑭᒐᓱᐊᕐᓂᖓᓂ ᐅᓪᓗᖓ ᓄᒃᑎᕆᓂᐅᑉ.

11.37 ᐅᓪᓗᐊᓂ ᓄᒃᑎᕆᓂᐅᑉ ᑲᓇᑕᐅᑉ ᒐᕙᒪᒃᑯᖏᑦ ᓄᒃᑎᕆᔭᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓄᑦ ᓄᒃᑕᕈᓐᓇᖅᑐᓂᒃ ᐱᖁᑎᓂᒃ ᓇᓗᓇᐃᖅᑕᐅᓯᒪᔪᓂ ᐃᓗᐊᓂ ᑎᑎᕋᖅᓯᒪᓂᖓᓂ 11.32, ᐅᓪᓗᒥᓯᐅᑎᕈᖅᑕᐅᓯᒪᓂᖓ ᒪᓕᒃᓯᒪᓗᓂ ᑎᑎᕋᖅᓯᒪᓂᖓᓄᑦ 11.33.

ᑐᓴᐅᒪᔾᔪᑏᑦ ᖃᕆᑕᐅᔭᒐᓚᐃᑦ ᐱᖁᑏᑦ

11.38 ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᓯᕗᓪᓕᖅᓯᐅᑎ ᐊᖏᖃᑎᒌᒍᑎ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐊᒥᖅᑳᕆᐊᖃᖅᐳᑦ ᑐᓴᒐᒃᓴᓂᒃ ᑐᓂᓯᓗᑎᒃ ᐊᒃᑐᐊᓂᖃᖅᑐᓂᒃ ᖃᕆᑕᐅᔭᓄᑦ ᑐᓴᐅᒪᔾᔪᑎᓄᑦ ᐱᖁᑎᒋᔭᐅᔪᓄᑦ ᐊᑐᖅᑕᐅᓂᐊᕐᒪᑕ ᐸᕐᓇᐅᑎᓕᐅᕈᑕᐅᓗᑎᒃ ᑲᑎᓐᖓᓗᒋᑦ ᖃᕆᑕᐅᔭᒐᓚᐃᑦ ᑐᓴᐅᒪᔾᔪᑎᑦ ᐱᖁᑎᒋᔭᐅᔪᑦ ᐃᓕᔭᐅᓗᑎᒃ ᓄᓇᕗᑦ ᒐᕙᒪᒃᑯᖏᑕ ᐱᖁᑎᕐᔪᐊᖁᑎᖏᓐᓄᑦ ᐊᐅᓚᑦᓯᔾᔪᑎᓄᑦ.

11.39 ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᖃᑎᖃᕆᐊᖃᖅᐳᑦ ᐃᑲᔪᖃᑎᒌᒡᓗᑎᒃ ᑖᒃᑯᐊ ᐊᑎᓕᐅᖃᑕᐅᓯᒪᔪᑦ ᓯᕗᓪᓕᖅᓯᐅᑎᓄᑦ ᐊᖏᖃᑎᖐᖑᑎᓄᑦ ᐊᒻᒪᓗ ᓄᒃᑎᕆᓂᐅᑉ ᐅᓪᓗᐊ ᐊᑐᖅᑕᐅᑦᓯᐊᕐᓗᓂ ᐱᖃᓯᐅᔾᔨᓂᐊᕐᒪᑕ ᑐᓴᐅᒪᔾᔪᑎᓂᒃ ᖃᕆᑕᐅᔭᒐᓚᖕᓂᒃ ᐱᖁᑎᒋᔭᐅᔪᓄᑦ ᐃᓕᔭᐅᓗᑎᒃ ᓄᓇᕗᑦ ᒐᕙᒪᒃᑯᖏᑕ ᐱᖁᑎᒋᔭᖏᓐᓄᑦ, ᑕᐃᒪᐃᑦᑐᓂᒃ ᐃᑲᔪᖃᑎᒌᓂᖅᑕᖃᖅᑎᓪᓗᒍ ᐱᖃᓯᐅᔾᔨᔭᕆᐊᖃᖅᑐᑦ ᓴᓇᓗᑎᒃ ᑐᓴᐅᒪᔾᔪᑎᓄᑦ ᖃᕆᑕᐅᔭᐃᑦ ᐱᓕᕆᔭᐅᓂᒃᓴᖏᓐᓄᑦ ᐸᕐᓇᐅᑎᓂᒃ ᐊᒻᒪᓗ ᐊᑯᓚᐃᑦᑐᒃᑯᑦ ᑲᑎᒪᖃᑦᑕᕐᓗᑎᒃ ᑲᑎᒪᔨᑦ ᑐᓴᐅᒪᔾᔪᑎᓄᑦ ᖃᕆᑕᐅᔭᓕᕆᔨᑦ ᐱᔭᕆᐊᑭᒡᓕᑎᑦᓯᔨᖏᑦ ᑭᒡᒐᖅᑐᖅᑎᖃᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᓂᓐᖔᖅᑐᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᓐᖔᖅᑐᓂᒃ.

11.40 ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᓯᕗᓪᓕᖅᓯᐅᑎ ᐊᖏᖃᑎᒌᒍᑎᐅᔪᖅ, ᑐᓴᐅᒪᔾᔪᑎᓄᑦ ᖃᕆᑕᐅᔭᓄᑦ ᐱᔭᕆᐊᑭᒡᓕᑎᑦᓯᔨᖏᑦ ᑲᑎᒪᔨᖏᑦ ᓴᓇᔭᕆᐊᖃᖅᐳᑦ ᑐᓴᐅᒪᔾᔪᑎᑦ ᖃᕆᑕᐅᔭᑦ ᐱᖁᑎᒋᔭᐅᔪᑦ ᐃᖅᑲᓇᐃᔭᖅᑕᐅᓂᖏᓐᓄᑦ ᐸᕐᓇᐅᑎᓂᒃ ᑭᐅᔪᓐᓇᖁᓪᓗᒋᑦ ᐅᑯᓂᖓ:

1. ᓇᓗᓇᐃᖅᑕᐅᓂᖓ ᐊᒻᒪᓗ ᖃᐅᔨᓴᖅᑕᐅᓂᖓ ᑐᓴᐅᒪᔾᔪᑎ ᖃᕆᑕᐅᔭᑦ ᐱᖁᑎᑦ ᓄᒃᑎᖅᑕᐅᔭᕆᐊᖃᖅᑐᑦ;
2. ᖃᕆᑕᐅᔭᒧᑦ ᐊᓯᐊᓄᑦ ᐊᔾᔨᖃᕐᒪᖔᑦ ᐃᓱᒫᓗᒍᑎᐅᔪᑦ ᑐᓴᐅᒪᔾᔪᑎᓄᑦ ᖃᕆᑕᐅᔭᓄᑦ ᐱᖁᑎᒋᔭᐅᔪᓄᑦ; ᐊᒻᒪᓗ
3. ᐋᖅᑭᒡᓱᑦᑎᐊᖅᓯᒪᔪᒃᑯᑦ ᓄᒃᑎᕆᓗᑎᒃ ᐊᒻᒪ ᐃᓚᐅᑎᑦᓯᓗᑎᒃ ᑐᓴᐅᒪᔾᔪᑎᓂᒃ ᖃᕆᐅᔭᓂᒃ ᐱᖁᑎᒋᔭᐅᔪᓂᒃ ᓄᓇᕗᑦ ᒐᕙᒪᒃᑯᖏᑕ ᐱᖁᑎᖏᓐᓄᑦ ᐊᐅᓚᑦᓯᔾᔪᑎᐅᔪᓄᑦ.

11.41 ᐊᑐᓂ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐃᒪᐃᑦᑕᕆᐊᖃᖅᐳᑦ, ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᑐᓴᕋᓱᐊᖃᑎᒌᒡᓗᑎᒃ ᐱᓪᓗᒋᑦ ᐱᖁᑎᒋᔭᐅᔪᑦ ᑮᓇᐅᔭᐃᕐᕕᐅᓯᒪᔪᑦ ᑐᓴᐅᒪᔾᔪᑎᑦ ᖃᕆᑕᐅᔭᑦ.

ᐃᔾᔪᐊᖅᑕᐅᔾᔭᐃᒃᑯᑎᓄᑦ ᐱᔪᓐᓇᐅᑎᑦ ᑎᑎᕋᖅᑕᐅᓯᒪᔪᓄᑦ

11.42 ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᐳᑦ ᐃᔾᔪᐊᖅᑕᐅᔾᔭᐃᒃᑯᑎᒧᑦ ᐱᔪᓐᓇᐅᑎᒥᒃ, ᐅᕝᕙᓘᓐᓃᑦ ᓚᐃᓴᓐᓯᒥᒃ ᐊᑐᖅᑕᐅᓂᐊᖅᑐᒥᒃ, ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᖅᑕᐅᓂᐊᖅᑎᓪᓗᒍ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᐱᓕᕆᐊᖃᖅᑎᓪᓗᒋᑦ ᑲᒪᒋᔭᒃᓴᖏᓐᓂᒃ ᓄᒃᑎᖅᑕᐅᓯᒪᔪᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑏᑦ.

11.43 ᐊᑐᖏᓪᓗᒍ ᑎᑎᕋᖅᓯᒪᓂᖓ 11.42, ᐃᔾᔪᐊᖅᑕᐅᔾᔭᐃᒃᑯᑎᓄᑦ ᐱᔪᓐᓇᐅᑎ ᐊᑐᖅᑕᐅᔪᓐᓇᖅᑐᖅ ᐅᓂᒃᑳᖅᑐᐊᓄᑦ, ᐅᖃᐅᑕᐅᕙᒃᑐᓄᑦ, ᑎᑎᕋᐅᔭᒐᕐᓄᑦ ᐊᒻᒪᓗ ᐊᓯᖏᓐᓄᑦ ᐃᓚᒋᐊᕈᑎᐅᔪᓄᑦ ᓄᓇᓐᖑᐊᓄᑦ ᓴᓇᔭᐅᓯᒪᔪᓄᑦ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᑎᓕᔭᐅᓯᒪᓂᖏᑦ ᒪᓕᒡᓗᒋᑦ ᑎᑎᕋᖅᓯᒪᓂᖓᓄᑦ 11.42, ᐊᒻᒪᓗ ᐊᓯᖏᓐᓄᑦ ᐃᔾᔪᐊᖅᑕᐅᔾᔭᐃᒃᑯᑎᓄᑦ ᐱᔪᓐᓇᐅᑎᓄᑦ ᓇᖕᒥᓂᕆᔭᐅᔪᓄᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᓇᓐᖑᐊᑎᒍᑦ, ᐱᖃᓯᐅᑎᓪᓗᒍ ᓄᓇᐅᑉ ᐋᖅᑭᒡᓱᖅᓯᒪᓂᖓᓄᑦ ᑐᓴᒐᒃᓴᐅᔪᑦ, ᐱᖃᓯᐅᔾᔭᐅᓯᒪᖏᑦᑐᑦ ᐃᓕᔭᐅᓂᔭᖓᓄᑦ ᐃᔾᔪᐊᖅᑕᐅᔾᔭᐃᒃᑯᑎᓄᑦ ᐱᔪᓐᓇᐅᑎᓄᑦ ᑕᐃᔭᐅᓯᒪᔪᓂ ᐃᓗᐊᓂ ᑎᑎᕋᖅᓯᒪᓂᖓᓂ 11.42.

11.44 ᐊᑐᖏᓪᓗᒍ ᑎᑎᕋᖅᓯᒪᓂᖓ 11.43 ᐊᑐᕆᐊᖃᖅᐳᖅ ᐊᑑᑎᖃᖅᑐᒥᒃ ᓚᐃᓴᓐᓯᒥᒃ ᑐᓂᔭᐅᓯᒪᔪᒥᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᖅᑕᐅᓂᐊᕐᒪᑕ ᓄᓇᓐᖑᐊᓄᑦ ᐅᕝᕙᓘᓐᓃᑦ ᐱᔪᓐᓇᖅᑎᑕᐅᓂᐊᖏᒻᒪᑦ ᓄᓇᕗᑦ ᒐᕙᒪᒃᑯᖏᑦ ᑎᒍᓯᓂᕐᒥᒃ ᓚᐃᓴᓐᓯᒥᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒃᑐᐊᓂᖃᖅᑐᓂᑦ ᓄᓇᓐᖑᐊᓄᑦ.

11.45 ᐃᒪᐃᑉᐸᑦ, ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐊᑎᓕᐅᖅᑕᐅᓚᐅᖅᑎᓪᓗᒍ, ᓄᓇᕗᑦ ᒐᕙᒪᒃᑯᖏᑦ ᐱᔭᕆᐊᖃᖅᐳᑦ, ᑲᔪᓯᖁᓪᓗᒍ ᐱᓕᕆᐊᒃᓴᕆᔭᖏᑦ ᑲᒪᒋᔭᒃᓴᖏᑦ ᓄᒃᑎᖅᑕᐅᓯᒪᔪᑦ ᒪᓕᒡᓗᒍ ᐱᓕᕆᐊᒃᓴᓂᒃ ᑎᐳᓯᕐᓂᒧᑦ ᐊᖏᖃᑎᒌᒍᑎᐅᔪᑦ, ᐊᑐᖁᓪᓗᒋᑦ ᐃᖅᑲᓇᐃᔭᖅᑕᐅᓯᒪᔪᓂᒃ ᑲᓇᑕᐅᑉ ᒐᕙᒪᒃᑯᖏᑕ ᓇᖕᒥᓂᖃᖅᑎᓪᓗᒋᑦ ᐃᔾᔪᐊᖅᑕᐅᔾᔭᐃᒃᑯᑎᓄᑦ ᐱᔪᓐᓇᐅᑎᓂᒃ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐋᖅᑭᒡᓯᖃᑎᒌᒋᐊᖃᖅᐳᑦ ᓯᕗᒧᐊᒃᑎᑦᓯᖁᓪᓗᒋᑦ ᐊᒥᒐᖏᑦᑐᓂᒃ ᐊᔾᔨᖏᓐᓂᒃ ᐃᖅᑲᓇᐃᔭᖅᑕᐅᓯᒪᔪᑦ ᐊᑐᐃᓐᓇᕈᐃᖁᓪᓗᒋᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᐱᖃᓯᐅᑎᓪᓗᒋᑦ, ᑭᓯᐊᓂ ᑖᒃᑯᓄᖓᑐᐊᖅ ᑭᒡᓕᖃᖏᑦᑐᖅ, ᐋᖅᑭᒡᓱᖅᓯᒪᓂᖏᓐᓂᒃ ᑎᓕᓯᓂᐅᑉ, ᐅᕝᕙᓘᓐᓃᑦ ᓚᐃᓴᓐᓯᑖᖅᑎᑦᓯᓂᐅᑉ ᐃᔾᔪᐊᖅᑕᐅᔾᔭᐃᑯᑎᐅᑉ ᐱᔪᓐᓇᐅᑎᖓᓂᒃ ᓴᓇᔭᐅᓯᒪᔪᒧᑦ.

ᖃᕆᑕᐅᔭᐅᑉ ᓂᐱᒃᓴᔭᖏᑦ ᐱᓕᕆᔾᔪᑎᐅᔪᑦ ᐃᔾᔪᐊᖅᑕᐅᔾᔭᐃᒃᑯᑎᓄᑦ ᐱᔪᓐᓇᐅᑎᖏᑦ ᐊᒻᒪᓗ ᓚᐃᓴᓐᓰᑦ

11.46 ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓇᓗᓇᐃᖅᓯᔾᔪᑎᒥᒃ ᐃᔾᔪᐊᖅᑕᐅᔾᔭᐃᒃᑯᑎᒧᑦ ᐱᔪᓐᓇᐅᑎᒥᒃ, ᐅᕝᕙᓘᓐᓃᑦ ᓚᐃᓴᓐᓯᒥᒃ ᐊᑐᖅᑕᐅᓂᐊᖅᑐᒥᒃ, ᓄᓇᕗᑦ ᒐᕙᒪᒃᑯᖏᓐᓄᑦ ᖃᕆᑕᐅᔭᑎᒍᑦ ᐱᓕᕆᔾᔪᑕᐅᓗᑎᒃ ᐊᑐᖅᑕᐅᖃᑦᑕᖅᑐᑦ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᐊᐅᓚᑦᓯᑎᓪᓗᒋᑦ ᐊᓪᓚᕕᖕᒥ ᐱᓕᕆᔭᕆᐊᖃᖅᑐᓂᒃ ᐊᒻᒪ ᐊᐅᓚᑦᓯᑎᓪᓗᒋᑦ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᖏᓐᓂᒃ ᐃᒥᓕᕆᓂᕐᒧᑦ ᐊᐅᓚᑦᑎᔾᔪᑎᑦ ᒥᒃᓵᓄᓕᖓᔪᓂᒃ.

11.47 ᖃᕆᑕᐅᔭᐅᑉ ᓂᐱᒃᓴᔭᖓ ᐊᑐᖅᑕᐅᖃᑦᑕᖅᑎᓪᓗᒍ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᐊᒃᑐᐊᓂᖃᖅᑐᑦ ᐊᓪᓚᕕᓕᕆᓂᕐᒧᑦ ᐊᒻᒪᓗ ᐊᐅᓚᑕᐅᓂᖏᓐᓄᑦ ᒐᕙᒪᒃᑯᑦ ᓄᓇᖁᑎᖏᑦ ᐊᒻᒪᓗ ᐱᔪᓐᓇᐅᑎᑦ ᐃᒥᓕᕆᓂᕐᒧᑦ ᐊᐅᓚᑦᑎᔾᔪᑎᓄᑦ ᐱᓪᓗᒋᑦ ᐊᔪᖅᑎᓪᓗᒋᑦ, ᐅᕝᕙᓘᓐᓃᑦ ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐊᖏᖃᑎᒌᒍᓐᓇᐃᓪᓕᑎᓪᓗᒋᑦ, ᑐᓂᔭᐅᔭᕆᐊᖃᖅᐳᖅ ᐅᕝᕙᓘᓐᓃᑦ ᓚᐃᓴᓐᓯᒥᒃ ᑐᓂᔭᐅᓗᓂ ᓄᓇᕗᑦ ᒐᕙᒪᒃᑯᖏᑦ ᒪᓕᒡᓗᒍ ᑎᑎᕋᖅᓯᒪᓂᖓ 11.42, ᑲᓇᑕᐅᑉ ᒐᕙᒪᒃᑯᖏᑦ ᓯᕗᒧᐊᒃᑎᑦᓯᔭᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᑦ ᐊᑐᖁᓪᓗᒋᑦ ᖃᕆᑕᐅᔭᒧᑦ ᓂᐱᒃᓴᔭᖓᓂᒃ ᐊᑐᕆᐊᖃᕐᓂᖏᑦ ᒪᓕᒡᓗᒋᑦ ᓄᓇᕗᑦ ᒐᕙᒪᒃᑯᖏᑕ ᐱᓕᕆᐊᒃᓴᕆᔭᖏᓐᓂᒃ ᐱᓕᕆᔪᓐᓇᖁᓪᓗᒋᑦ ᓄᒃᑎᖅᑕᐅᓯᒪᔪᓂᒃ ᐃᓗᐊᖑᑦ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᑎᒍᑦ.

ᑳᓐᑐᕌᑦ

11.48 ᓯᕗᕐᖓᒍᑦ ᐊᑎᓕᐅᖅᑕᐅᓚᐅᖏᓐᓂᖓᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑎᑎᕋᖅᓯᒪᔪᓂᒃ ᐃᓘᓐᓇᖏᑦ ᑳᓐᑐᕌᒃᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᒪᐃᑦᑐᑦ:

1. ᐅᑯᐊ ᐃᖅᑲᓇᐃᔭᖅᑎᐅᔪᓄᑦ NAO ᐅᕝᕙᓘᓐᓃᑦ CNGO-ᖑᔪᓄᑦ ᐱᓕᕆᐊᕆᔭᖏᑦ ᐊᑐᖅᑕᐅᒋᐊᑐᓂᐊᕈᓐᓃᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ; ᐊᒻᒪᓗ
2. ᐃᖅᑲᓇᐃᔭᕐᕕᖓᑕ ᐃᓱᓕᕝᕕᒃᓴᖓ ᑎᑭᐅᑎᓯᒪᓕᖅᑎᓪᓗᒍ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.49 ᑲᓇᑕᐅᑉ ᒐᕙᒪᒃᑯᖏᑦ ᓇᓗᓇᐃᖅᓯᔭᕆᐊᖃᖅᐳᑦ ᑎᑎᕋᖅᓯᒪᔪᓂ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖓᑕ ᐃᓗᐊᓂ 11.48 ᑳᓐᑐᕌᒃᑕᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᖏᕈᑕᐅᓯᒪᔪᑦ ᑎᒍᔭᐅᓂᐊᖅᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐃᓘᓐᓇᖏᑦ ᑲᓇᑕᐅᑉ ᒐᕙᒪᒃᑯᖏᑕ ᐱᔪᓐᓇᐅᑎᖏᑦ ᐊᒻᒪ ᐱᓕᕆᐊᒃᓴᕆᔭᖏᑦ ᐱᖃᓯᐅᑎᓗᒋᑦ ᐅᓪᓗᖓᓂ ᓄᒃᑎᕆᓐᓇᐅᑉ.

11.50 ᑲᓇᑕᐅᑉ ᒐᕙᒪᒃᑯᖏᑦ ᑐᓴᕋᓱᐊᕐᕕᖃᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐱᓪᓗᒋᑦ ᑎᑎᖅᑲᖁᑎᖏᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 11.48 ᑭᖑᕐᖓᒍᑦ ᑲᓇᑕᐅᑉ ᒐᕙᒪᒃᑯᖏᑦ ᑭᖑᓪᓕᖅᐹᖅᓯᐅᑎᓂᒃ ᑎᑎᕋᕐᓂᐊᖅᑐᑦ ᐊᒻᒪ ᑐᓂᔭᐅᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ.

11.51 ᑕᐃᒪᓕ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᓴᓇᒃᐸᑕ ᐅᕝᕙᓘᓐᓃᑦ ᐋᖅᑭᒋᐊᕆᒃᐸᑕ ᑎᑎᖅᑲᖁᑎᒋᔭᐅᔪᓂᒃ ᑳᓐᑐᕌᒃᑕᐅᓯᒪᔪᓄᑦ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖓᓂ 11.48-ᒥ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᑐᓴᖅᑎᑦᑎᔭᕆᐊᖃᖅᐳᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐃᓗᐊᓂ 15 ᐅᓪᓗᑦ ᐱᒋᐊᕐᕕᒋᓗᒍ ᐅᓪᓗᐊ ᐋᖅᑭᒋᐊᖅᓯᕕᐅᓚᐅᖅᑐᖅ.

11.52 ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᖃᕆᐊᖃᖅᑐᑦ ᑎᒍᓯᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑕ ᐃᓘᓐᓇᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᑕ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐱᓕᕆᐊᒃᓴᖏᓐᓂᒃ, ᐱᒋᐊᕐᓗᒍ ᐅᓪᓗᐊᓂ ᓄᒃᑎᕆᓂᐅᑉ ᐅᓪᓗᐊᑕ, ᐊᑖᒍᑦ ᐊᑐᓂ ᑳᓐᑐᕌᖑᔪᑦ ᑎᑎᕋᖅᑕᐅᓯᒪᔪᑦ ᑭᖑᓪᓕᖅᐹᖅᓯᐅᑎᓂ ᑎᑎᖅᑲᖁᑎᓂ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.48.

11.53 ᑕᐃᒪᓕ ᑳᓐᑐᕌᖑᔪᖅ ᑎᑎᕋᖅᑕᐅᓯᒪᔪᖅ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖓᓂ 11.48-ᒥ ᐱᔪᓐᓇᖅᑎᑦᓯᖏᑉᐸᑦ ᓄᓇᕗᑦ ᒐᕙᒪᒃᑯᖏᓐᓂᒃ ᑎᒍᓯᔪᓐᓇᖅᑎᑦᓯᖏᓪᓗᓂ ᑲᓇᑕᐅᑉ ᒐᕙᒪᒃᑯᖏᑕ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐱᓕᕆᔭᕆᐊᖃᖅᑕᖏᓐᓂ ᓇᓗᓇᐃᖅᑕᐅᓯᒪᔪᓂ ᑎᑎᕋᖅᓯᒪᓂᖓᓂ 11.49, ᐅᕝᕙᓘᓐᓃᑦ ᐃᓚᒋᔭᐅᔪᖅ ᑳᓐᑐᕌᒧᑦ ᐊᖏᕐᓂᖏᑉᐸᑦ ᐊᖏᖅᓯᒪᔭᕆᐊᖃᖅᑎᓪᓗᒍ ᑳᓐᑐᕌᑉ ᐃᓗᐊᒍᑦ ᐱᓕᕆᔪᓐᓇᖁᓪᓗᒋᑦ, ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ, ᐱᖁᔭᖅ ᑕᐃᔭᐅᓯᒪᔪᖅ ᑎᑎᕋᖅᓯᒪᓂᖓᓂ 5.6-ᒥ, ᐱᕕᖃᖅᑎᑦᓯᓂᐊᖅᐳᑦ ᐱᓕᕆᐊᒃᓴᖏᑦ ᑲᔪᓯᖁᓪᓗᒋᑦ ᐊᒻᒪᓗ ᐊᑭᓕᖅᑕᐅᓗᑎᒃ ᓇᓕᐊᑐᐃᓐᓇᖅ ᑳᓐᑐᕌᒃᑕᐅᓯᒪᔪᖅ, ᐊᓯᒋᔭᖏᑦ ᓄᓇᕗᑦ ᒐᕙᒪᒃᑯᖏᑕ, ᐊᑭᓕᖅᑕᐅᓗᑎᒃ ᐊᑭᖏᓐᓄᑦ ᐅᕝᕙᓘᓐᓃᑦ ᐊᓯᐅᔨᔭᖏᓐᓄᑦ, ᓴᖅᑭᓯᒪᔪᓂᑦ, ᐱᑕᖃᖅᐸᑦ, ᐃᓱᒪᒋᔭᐅᓯᒪᔪᓂᑦ ᑕᐃᒪᐃᑦᓱᕆᔭᐅᔪᓂᑦ.

11.54 ᑕᐃᒪᓕ ᓂᕆᐅᓇᖏᑦᑐᒥᒃ ᓴᖅᑭᑦᑐᖃᖅᑎᓪᓗᒍ ᓄᑖᕐᒥᒃ ᓂᐅᕕᕆᐊᖃᖅᑐᒥᒃ ᐱᔾᔪᑎᖃᖅᑐᒥᒃ ᐃᒡᓗᒧᑦ, ᐱᖁᑎᒋᔭᐅᔪᒧᑦ, ᑎᑎᕋᖅᑕᐅᓯᒪᔪᖁᑎᖏᑦ ᐊᒻᒪᓗ ᐱᔨᑦᓯᖅᑕᐅᓂᖏᓐᓄᑦ ᑎᑎᖅᑲᖁᑎᒋᔭᐅᔪᑦ ᒪᓕᒡᓗᒋᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐃᑲᔪᖅᑐᐃᔭᕆᐊᖃᖅᐳᑦ ᐊᒻᒪ ᐃᑲᔪᖅᓯᓗᑎᒃ ᐃᓄᐃᑦ ᑎᒥᖁᑎᖏᓐᓄᑦ ᐱᖃᑕᐅᔪᓐᓇᕐᓂᐊᕐᒪᑕ ᐊᑭᑦᑐᕋᐅᑎᑎᓪᓗᒋᑦ ᓄᑖᓂᒃ ᑳᓐᑐᕌᓂᒃ ᐱᒐᓱᐊᖅᑐᓄᑦ, ᒪᓕᒃᑕᐅᓗᑎᒃ ᑎᑎᕋᖅᓯᒪᓂᖓ 24 ᓄᓇᕗᒥ ᐊᖏᕈᑎᓂ ᐊᒻᒪᓗ, ᓄᓇᕗᑦ ᒐᕙᒪᒃᑯᖏᑦ, ᓄᓇᕗᒥ ᓇᖕᒥᓂᓕᖕᓂᒃ ᐃᑲᔪᕈᑎᑦ ᒪᓕᒐᖏᑦ (ᑕᐅᔭᐅᕙᖕᒥᔪᑦ NNI ᒪᓕᒐᖏᓐᓂᒃ).

ᑎᑎᖅᑲᖁᑏᑦ

11.55 ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐅᑯᐊ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᓯᕗᓪᓕᖅᓯᐅᑎᑦ ᐊᖏᖃᑎᒌᒍᑎᔪᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᓴᓇᔭᕆᐊᖃᖅᑐᑦ ᐃᓘᓐᓇᖏᑦ ᑎᑎᕋᖅᑕᐅᓗᑎᒃ ᑎᑎᖅᑲᖁᑎᒋᔭᐅᔪᑦ, ᐅᕝᕙᓘᓐᓃᑦ ᖃᓄᐃᓕᖓᓂᕆᔭᖏᑦ ᑎᑎᖅᑲᖁᑎᒋᔭᐅᔪᑦ, ᐊᐅᓚᑕᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᑐᖅᑕᐅᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐱᓕᕆᔭᕆᐊᖃᖅᑕᖏᓐᓂᒃ ᐱᓕᕆᐊᖃᖅᑎᓪᓗᒋᑦ ᓄᒃᑎᖅᑕᐅᓯᒪᔪᓂᒃ ᒪᓕᒡᓗᒍ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑏᑦ.

11.56 ᒪᓕᒡᓗᒋᑦ ᐊᑐᖅᑕᐅᔭᕆᐊᖃᖅᑐᑦ ᐱᖁᔭᐃᑦ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐅᓪᓗᐊᓂ ᐅᕝᕙᓘᓐᓂᑦ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᑎᑎᖅᑲᖁᑎᓂᒃ ᐅᕝᕙᓘᓐᓃᑦ ᐊᔾᔨᖏᓐᓂᒃ ᐃᓘᓐᓇᖏᑕ ᑎᑎᖅᑲᖁᑎᖏᓐᓂᒃ ᑕᐃᔭᐅᓯᒪᔪᓂ ᑎᑎᕋᖅᓯᒪᓂᖓᓂ 11.55-ᒥ.

11.57 ᑐᒃᓯᕋᖅᐸᑕ ᓄᓇᕗᑦ ᒐᕙᒪᒃᑯᖏᑦ ᐱᕕᖃᖅᑎᑕᐅᑦᓯᐊᕐᓗᑎᒃ, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᑎᑎᖅᑲᖁᑎᓂᒃ ᐅᕝᕙᓘᓐᓃᑦ ᐊᔾᔨᖏᓐᓂᒃ ᑎᑎᖅᑲᖁᑎᑦ ᑐᓂᔭᐅᓯᒪᖏᑦᑐᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒡᓗᒍ ᑎᑎᕋᖅᓯᒪᓂᖓ 11.56, ᑎᑎᖅᑲᖁᑎᒋᔭᐅᔪᖅ ᐊᐅᓚᑕᐅᑎᓪᓗᒍ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᐊᒃᑐᐊᓂᖃᖅᑎᓪᓗᒍ ᑲᒪᒋᔭᒃᓴᖏᓐᓄᑦ ᓄᒃᑎᖅᑕᐅᓯᒪᔪᓄᑦ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒡᓗᒍ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᐅᔪᖅ.

11.58 ᐊᑐᖏᓪᓗᒋᑦ ᑎᑎᕋᖅᓯᒪᓂᖏᑦ 11.56 ᐅᕝᕙᓘᓐᓃᑦ 11.57, ᖃᓄᐃᑐᐃᓐᓇᖅ ᐱᔾᔪᑎᖃᕐᓗᑎᒃ ᑎᑎᖅᑲᖁᑎᒋᔭᐅᕐᖓᖅᑐᖅ ᓄᒃᑎᖅᑕᐅᔪᓐᓇᖏᑉᐸᑦ ᐅᕝᕙᓘᓐᓃᑦ ᐊᔾᔨᓕᐅᖅᑕᐅᔪᓐᓇᖏᑉᐸᑦ, ᑎᑎᖅᑲᖁᑎᒋᔭᐅᔪᖅ ᐊᑐᖅᑐᐊᖅᑕᐅᔪᓐᓇᖅᑐᖅ ᒪᓕᒐᖃᕐᓗᑎᒃ ᐊᖏᕈᑕᐅᓯᒪᔪᓂᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ.

11.59 ᓯᕗᕐᖓᒍᑦ ᑐᓂᓯᓚᐅᖏᓐᓂᖏᓐᓂ ᑎᑎᖅᑲᖁᑎᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ, ᐃᓄᓕᕆᔨᑐᖃᒃᑯᑦ ᐱᓕᕆᕕᖓᑦᑕ ᑎᑎᖅᑲᖁᑎᖏᓐᓄᑦ ᐱᓯᒪᒃᓯᕐᓂᕐᒧᑦ ᐊᒻᒪᓗ ᓴᒃᑯᐃᓂᕐᒧᑦ ᐱᓕᕆᕕᒃᓴᓕᐊᖑᓯᒪᔪᑦ ᐊᑐᖅᑕᐅᔭᕆᐊᖃᖅᐳᑦ.

11.60 ᑎᑎᖅᑲᑦ ᑐᓂᔭᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒡᓗᒋᑦ ᑎᑎᖅᕋᖅᓯᒪᓂᖓ 11.58 ᐱᓯᒪᔭᐅᔭᕆᐊᖃᖅᐳᑦ ᐊᒻᒪᓗ ᐊᐅᓚᑕᐅᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᐊᑐᖅᑕᐅᓗᑎᒃ ᑎᒍᓯᓂᕐᒧᑦ ᑐᓴᒐᒃᓴᓂᒃ ᐊᒻᒪᓗ ᓴᐳᒻᒥᒃᓯᓂᕐᒧᑦ ᑲᓐᖑᓇᖅᑐᓂᒃ ᐱᖁᔭᕐᔪᐊᕐᓂᒃ (ᓄᓇᕗᑦ) ᐊᑐᕐᓗᑎᒃ ᐊᒻᒪᓗ ᐊᓯᖏᓐᓂᒃ ᓄᓇᕗᑦ ᐱᖁᔭᕐᔪᐊᕆᔭᖏᓐᓂᒃ ᐊᑐᖅᑕᐅᔪᓂᒃ, ᓇᓕᐊᑐᐃᓐᓇᖅ ᐊᑐᕐᓗᒍ, ᑎᑎᖅᑲᑎᒋᔭᐅᔪᓄᑦ.

11.61 ᐊᑐᖏᓪᓗᒍ ᑎᑎᕋᖅᓯᒪᓂᖏᑦ 11.56, 11.57 ᐅᕝᕙᓘᓐᓃᑦ 11.58, ᓯᕗᕐᖓᒍᑦ ᑐᓂᔭᐅᓚᐅᖏᓐᓂᖏᓐᓂ ᑎᑎᖅᑲᖁᑎᒋᔭᐅᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᐲᔭᐃᔪᓐᓇᖅᑐᑦ ᑐᓴᒐᒃᓴᓂᒃ ᐊᒃᑐᐊᓂᖃᖅᑐᓂᒃ ᐱᔨᑦᓯᖅᓯᖅᑐᑦ ᐊᒻᒪ ᐱᔨᑦᓯᖅᑕᐅᔪᑦ ᓴᐳᒻᒥᐅᓯᖅᑕᐅᓯᒪᓂᕆᔭᖏᓐᓄᑦ.

11.62 ᐊᑐᖏᓪᓗᒍ ᑎᑎᕋᖅᓯᒪᓂᖏᑦ 11.56, 11.57 ᐅᕝᕙᓘᓐᓃᑦ 11.58, ᓯᕗᕐᖓᒍᑦ ᑐᓂᓯᓚᐅᖏᓐᓂᖏᓐᓂ ᑎᑎᖅᑲᖁᑎᒋᔭᐅᔪᓂᒃ ᓄᓇᓄᑦ ᒐᕙᒪᒃᑯᖏᓐᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᐃᒪᐃᓕᐅᕆᐊᖃᖅᐳᑦ:

1. ᐲᔭᐃᓗᑎᒃ ᑐᓴᒐᒃᓴᓂᒃ ᐊᒃᑐᐊᓂᖃᖅᑐᓂᒃ ᑲᓐᖑᓇᖅᑐᓂᒃ ᑯᐃᓐ ᐊᐅᓚᑦᓯᔨᑦ ᑲᑎᒪᔨᖁᑎᖏᓐᓂᓐᖔᖅᑐᓂᒃ;
2. ᒪᓕᒡᓗᒍ ᑎᑎᕋᖅᓯᒪᓂᖓ 11.64, ᐲᔭᐃᓗᑎᒃ ᐃᒻᒥᒧᑦ ᑐᕌᖓᓂᖃᖅᑐᓂᒃ ᑐᓴᒐᒃᓴᓂᒃ ᒪᓕᒡᓗᖑ ᓇᓗᓇᐃᖅᑕᐅᓯᒪᔪᖅ ᑲᓐᖑᓇᖅᑐᓕᕆᓂᕐᒧᑦ ᐱᖁᔭᕐᔪᐊᖅ (ᑲᓇᑕᒥ); ᐊᒻᒪᓗ
3. ᒪᓕᒡᓗᒍ ᑎᑎᕋᖅᓯᒪᓂᖓ 11.66, ᐲᔭᐃᓗᑎᒃ ᑐᓴᒐᒃᓴᓂᒃ ᐱᔭᐅᓯᒪᔪᓂᒃ ᒐᕙᒪᒃᑯᑦ ᓯᓚᑖᓂᓐᖔᖅᑐᓂᒃ ᒪᓕᒡᓗᒋᑦ ᑐᑭᓕᐊᕆᔭᐅᓯᒪᔪᑦ ᑎᒍᓯᓂᕐᒧᑦ ᑐᓴᒐᒃᓴᓂᒃ ᐱᖁᔭᕐᔪᐊᑎᒍᑦ (ᑲᓇᑕ).

11.63 ᑕᐃᒪᓕ ᑐᓴᒐᒃᓴᑦ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.62-ᒥ ᐲᖅᑕᐅᓯᒪᒃᐸᑕ ᑎᑎᖅᑲᖁᑎᓂᑦ, ᑲᓇᑕᐅᑉ ᒐᕙᒪᒃᑯᖏᑦ ᖃᐅᔨᒃᑲᐃᔭᕆᐊᖃᖅᐳᑦ ᑎᑎᖅᑲᑎᒍᑦ ᓇᓗᓇᐃᖅᓯᓯᒪᓗᑎᒃ ᑐᓴᒐᒃᓴᑦ ᐲᖅᑕᐅᓚᐅᕐᓂᖏᓐᓂᒃ ᐊᒻᒪ ᑐᓂᖓᕕᒋᔭᖓ ᒪᓕᒃᓯᒪᓚᐅᕐᓂᖓᓂᒃ ᑎᑎᕋᖅᓯᒪᓂᖓᓂᒃ 11.62-ᒥᒃ ᑕᐃᒪᐃᒻᒪᑦ ᑐᓴᒐᒃᓴᑦ ᐲᖅᑕᐅᔾᔪᑎᒋᓚᐅᖅᑕᖓ.

11.64 ᑕᐃᒪᓕ ᑎᑎᖅᑲᖁᑎ ᑐᓂᔭᐅᔪᕕᓂᐅᑎᓪᓗᒍ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᕐᓗᑎᒃ ᑎᑎᕋᖅᓯᒪᓂᖏᓐᓂᒃ 11.56, 11.57 ᐅᕝᕙᓘᓐᓃᑦ 11.58 ᐃᓗᓕᖃᖅᐸᑦ ᐃᒻᒥᒧᑦ ᑐᕌᖓᔪᓂᒃ ᑐᓴᒐᒃᓴᓂᒃ ᐃᓗᐊᓂ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.62(b) ᑭᓯᐊᓂᓕ ᑐᓴᒐᒃᓴᖅ ᐱᔭᐅᔭᕆᐊᖃᖅᑎᓪᓗᒍ ᐊᑐᖅᑕᐅᔭᕆᐊᖃᖅᑎᓪᓗᒍ ᐱᓕᕆᐊᒃᓴᖏᓐᓂᒃ ᐱᓕᕆᔪᓐᓇᖁᓪᓗᒋᑦ ᓄᓇᕗᑦ ᒐᕙᒪᒃᑯᖏᑦ ᐊᑐᕐᓗᑎᒃ ᐱᓕᕆᐊᒃᓴᓂᒃ ᓄᒃᑎᖅᑕᐅᓂᑯᓂᒃ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᑦ, ᑕᐃᒪᐃᑎᓪᓗᒍ ᑐᓴᒐᒃᓴᑦ ᐲᖅᑕᐅᔭᕆᐊᖃᖏᑦᑐᑦ ᑎᑎᖅᑲᖁᑎᓂᑦ.

11.65 ᐊᑐᖅᑕᐅᓂᖏᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐃᒻᒥᒧᑦ ᑐᕌᖓᔪᑦ ᑐᓴᒐᒃᓴᑦ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.64 ᒪᓕᒃᓯᒪᔭᕆᐊᖃᖅᑐᑦ ᑎᒍᓯᓂᕐᒧᑦ ᑐᓴᒐᒃᓴᓂᒃ ᐊᒻᒪ ᓴᐳᒻᒥᐅᓯᖅᑕᐅᓯᒪᓂᖏᑦ ᑲᓐᖑᓇᖅᑐᑦ ᐱᖁᔭᕐᔪᐊᖏᓐᓂᒃ (ᓄᓇᕗᑦ) ᐊᒻᒪᓗ ᐊᓯᖏᓐᓂᒃ ᐊᑐᖅᑕᐅᔪᓂᒃ ᒪᓕᒐᐅᔪᓂᒃ ᓄᓇᕗᒥ ᐱᖁᔭᕐᔪᐊᑎᒍᑦ ᐊᒃᑐᐊᓂᖃᖅᑐᑦ ᑎᒍᓯᓂᕐᒧᑦ ᑐᓴᒐᒃᓴᓂᒃ ᐅᕝᕙᓘᓐᓃᑦ ᓴᐳᒻᒥᐅᓯᖅᓯᓯᒪᓂᕐᒧᑦ ᑲᓐᖑᓇᖅᑐᓂᒃ.

11.66 ᑎᑎᖅᑲᖁᑎᐅᔪᖅ ᑐᓂᔭᐅᓯᒪᑎᓪᓗᒍ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒃᓯᒪᓗᑎᒃ ᑎᑎᕋᖅᓯᒪᓂᖏᓐᓂᒃ 11.56, 11.57 ᐅᕝᕙᓘᓐᓃᑦ 11.58 ᐃᓗᓕᖃᖅᐸᑦ ᒐᕙᒪᒃᑯᑦ ᓯᓚᑖᓂᓐᖔᖅᑐᒧᑦ ᑐᓴᒐᒃᓴᓂᒃ ᑕᐃᔭᐅᓯᒪᔪᓂᒃ ᑎᑎᕋᖅᓯᒪᓂᖓᓂ 11.62(c) ᑭᓯᐊᓂᓕ ᑐᓴᒐᒃᓴᖅ ᐱᔭᐅᔭᕆᐊᖃᖅᑎᓪᓗᒍ ᐊᑐᖅᑕᐅᔭᕆᐊᖃᖅᑎᓪᓗᒍ ᐱᓕᕆᐊᒃᓴᖏᓐᓂᒃ ᐱᓕᕆᔪᓐᓇᖁᓪᓗᒋᑦ ᓄᓇᕗᑦ ᒐᕙᒪᒃᑯᖏᑦ ᐊᑐᕐᓗᑎᒃ ᐱᓕᕆᐊᒃᓴᓂᒃ ᓄᒃᑎᖅᑕᐅᓂᑯᓂᒃ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᑦ, ᑕᐃᒪᐃᑎᓪᓗᒍ ᑐᓴᒐᒃᓴᑦ ᐲᖅᑕᐅᔭᕆᐊᖃᖏᑦᑐᑦ ᑎᑎᖅᑲᖁᑎᓂᑦ.

11.67 ᑕᐃᒪᓕ ᒐᕙᒪᒃᑯᑦ ᓯᓚᑖᓂᓐᖔᖅᑐᑦ ᑐᓴᒐᒃᓴᖁᑎᖏᑦ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.62(c)-ᒥ ᐱᖃᓯᐅᔾᔭᐅᓯᒪᕗᑦ ᑎᑎᖅᑲᖁᑎᓂ ᑐᓂᔭᐅᓯᒪᔪᓂ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒡᓗᒍ ᑎᑎᕋᖅᓯᒪᓂᖏᑦ 11.56, 11.57 ᐅᕝᕙᓘᓐᓃᑦ 11.58, ᓄᓇᕗᑦ ᒐᕙᒪᒃᑯᖏᑦ ᑲᓐᖑᓇᖅᑑᑎᑦᓰᓐᓇᕆᐊᖃᖅᐳᑦ ᑐᓴᒐᒃᓴᓂᒃ ᑐᓂᔭᐅᓯᒪᔪᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ.

11.68 ᓄᓇᕗᑦ ᒐᕙᒪᒃᑯᖏᑦ ᐃᓱᒪᓕᐅᕆᐊᖃᖅᐳᑦ, ᑐᓴᕋᓱᐊᓚᐅᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᐋᖅᑭᒋᐊᕆᔭᕆᐊᖃᕐᓂᐊᕐᒪᖔᑕ ᐱᖁᔭᕐᔪᐊᖏᓐᓂᒃ ᒪᓕᒃᓯᒪᓕᖁᓪᓗᒋᑦ ᐱᓕᕆᐊᒃᓴᕆᔭᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᐱᓪᓗᒋᑦ ᐊᑐᕆᐊᖃᕐᓂᖏᑦ ᑲᓐᖑᓇᖅᑐᑦ ᐅᕝᕙᓘᓐᓃᑦ ᑲᓐᖑᓇᖅᑑᑎᑕᐅᔭᕆᐊᖃᕐᓂᖏᑦ ᐃᒻᒥᒧᑦ ᑐᕌᖓᔪᑦ ᑐᓴᒐᒃᓴᑦ ᐃᓗᐊᓃᑦᑐᑦ ᑎᑎᖅᑲᖁᑎᒋᔭᐅᔪᑦ ᑐᓂᔭᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ ᒪᓕᒡᓗᒋᑦ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᕈᑎᐅᔪᑦ. ᑕᐃᒪᓕ ᑕᐃᒪᐃᑦᑐᑦ ᐱᖁᔭᐃᑦ ᐊᓯᔾᔨᕆᐊᖃᖅᐸᑕ, ᓄᓇᕗᑦ ᒐᕙᒪᒃᑯᖏᑦ ᓴᖅᑭᑦᑎᔭᕆᐊᖃᖅᐳᑦ ᐊᒻᒪ ᐃᑲᔪᖅᑐᐃᓗᑎᒃ ᒐᕙᒪᐅᓂᖓᑦ ᐊᑐᕐᓗᒍ ᐱᖁᔭᕐᒥᒃ ᐋᖅᑭᒋᐊᕆᔭᕆᐊᖃᕐᓂᕐᒥᒃ.

11.69 ᑲᓇᑕᐅᑉ ᒐᕙᒪᒃᑯᖏᑕ ᐱᖁᔭᕐᔪᐊᖓ ᑐᓂᓯᔭᕆᐊᖃᖅᐳᑦ ᐃᒪᐃᑦᑐᓂᒃ:

1. ᑎᑎᖅᑲᓂᒃ ᑐᓂᔭᐅᓯᒪᔪᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᕐᓗᑎᒃ ᑎᑎᕋᖅᓯᒪᓂᖏᓐᓂᒃ 11.56, 11.57 ᐅᕝᕙᓘᓐᓃᑦ 11.58 ᒪᓕᒃᓯᒪᔭᕆᐊᖃᖅᑐᑦ ᐱᔨᑦᓯᖅᑕᐅᔪᑦ ᐱᔨᑦᓯᖅᓯᔪᕐᓗ ᑲᓐᖑᓇᖅᑑᑎᑕᐅᔭᕆᐊᖃᕐᓂᖏᓐᓄᑦ ᐱᖁᔭᕐᓂᒃ ᐃᕐᖐᓐᓇᖅ ᓯᕗᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ ᑲᓐᖑᓇᖅᑑᑎᑕᐅᖏᓐᓇᐱᕆᐊᖃᖅᐳᑦ ᒪᓕᒃᑕᐅᓗᑎᒃ ᐱᔨᑦᓯᖅᑕᐅᔪᑦ ᐊᒻᒪ ᐱᔨᑦᓯᖅᑐᖅ ᑲᓐᖑᓇᖅᑑᑎᑕᐅᔭᕆᐊᖃᕐᓂᖏᑦ ᐱᔪᓐᓇᐅᑎᖏᑦ ᐊᑐᖏᓪᓗᒋᑦ ᑎᑎᖅᑲᑦ ᑐᓂᔭᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ; ᐊᒻᒪᓗ
2. ᐱᔨᑦᓯᖅᑕᐅᔪᑦ ᐊᒻᒪ ᐱᔨᑦᓯᖅᑐᖅ ᑲᓐᖑᓇᖅᑑᑎᑕᐅᔭᕆᐊᖃᕐᓂᖏᑦ ᐱᔪᓐᓇᐅᑎᖏᑦ ᐱᖁᓯᐅᑎᔭᐅᓯᒪᔪᓄᑦ ᑎᑎᖅᑲᓄᑦ ᐊᑐᕐᓗᒍ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 11.69(a) ᐊᑐᓐᖏᑲᐃᓐᓇᖅᑎᑕᐅᔭᕆᐊᖃᓐᖏᓚᑦ ᓄᓇᕗᑦ ᒐᕙᒪᒃᑯᖏᓐᓂᑦ ᑭᓯᐊᓂ ᐊᖏᖅᑕᐅᓯᒪᓗᑎᒃ ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ ᐊᒻᒪᓗ ᐅᑭᐅᖅᑕᖅᑐᕐᒥᐅᑦ ᐱᕙᓪᓕᐊᑎᑕᐅᓂᖏᓐᓄᑦ ᑲᒪᔪᒧᑦ ᐊᒻᒪᓗ, ᑭᒡᓕᓕᐅᖅᓯᒪᖏᓪᓗᑎᒃ, ᑲᔪᓯᔪᒃᑯᑦ, ᓄᓇᕗᑦ ᒐᕙᒪᒃᑯᖏᑦ ᐃᒪᐃᑦᑕᕆᐊᖃᓐᖏᓚᑦ, ᑎᑎᕋᖅᓯᒪᔪᑎᒍᑦ ᐊᖏᖅᑕᐅᓯᒪᖏᓪᓗᑎᒃ ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ ᐊᒻᒪᓗ ᐅᑭᐅᖅᑕᖅᑐᕐᒥᐅᑦ ᐱᕙᓪᓕᐊᑎᑕᐅᓂᖏᓐᓄᑦ ᑲᒪᔪᒧᑦ:
   1. ᐊᑐᕐᓗᑎᒃ ᑎᑎᖅᑲᓂᒃ ᐃᓗᐊᓂ ᑕᐃᔭᐅᓯᒪᔪᓂᒃ ᑎᑎᕋᖅᓯᒪᓂᖓᓂ 11.69(a) ᐃᖅᑲᖅᑐᐃᕕᐅᑉ ᐃᓗᐊᒍᑦ; ᐅᕝᕙᓘᓐᓃᑦ
   2. ᓴᖅᑭᑦᑎᓗᑎᒃ ᑎᑎᖅᑲᖁᑎᓂᒃ ᐃᓗᐊᓂ ᑕᐃᔭᐅᓯᒪᔪᓂᒃ ᑎᑎᕋᖅᓯᒪᓂᖓᓂ 11.69(a) ᑭᓇᑐᐃᓐᓇᕐᒧᑦ ᐃᖅᑲᓇᐃᔭᖅᑎᐅᑉ ᐊᓯᐊᓄᑦ ᐊᒻᒪᓗ ᑭᒡᒐᖅᑎᖅᑎᐅᔪᑉ ᐊᓯᐊᓄᑦ, ᑖᒃᑯᐊ ᐱᖁᔭᕐᔪᐊᑎᒍᑦ ᐊᑐᖅᑕᐅᔪᑎᒎᖅᑐᑦ.

ᐅᐃᒍᖓ 1 ᑎᑎᕋᖅᓯᒪᓂᖓᑕ 11

ᐱᒋᐊᕐᓂᖓᓂ ᑎᑎᕋᖁᑎᒋᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐃᒡᓗᖁᑎᖏᑦ ᐊᒻᒪᓗ ᓇᖕᒥᓂᕆᔭᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᖁᑎᒋᔭᐅᔪᑦ ᓄᒃᑎᖅᑕᐅᔭᕆᐊᖃᖅᑐᑦ:

ᐅᐃᒍᖓ 2 ᑎᑎᕋᖅᓯᒪᓂᖓᑕ 11

ᓯᕗᓪᓕᖅᓯᐅᑎᑦ ᑎᑎᕋᖅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᑕ ᐊᑐᖅᑐᐊᖅᑕᖏᑦ ᑐᓂᔭᐅᔭᕆᐊᖃᖅᑐᑦ:

ᐊᑐᖅᑐᐊᖅᑕᐅᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᑦ:

ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐃᓗᓕᖃᕆᐊᖃᖅᑐᑦ ᐱᒋᐊᕐᓂᖓᓂ ᑎᑎᖅᑲᖁᑎᒋᔭᐅᔪᓂᒃ ᐊᑐᖅᑐᐊᖅᑕᐅᔪᓂᒃ ᐃᒡᓗᓂᒃ ᐃᖅᑲᓇᐃᔭᖅᑎᓄᑦ ᐃᒡᓗᒋᔭᐅᓪᓗᑎᒃ.

ᐊᑕᐅᓯᐊᕐᓗᑎᒃ ᑮᓇᐅᔭᖃᖅᑎᑕᐅᔪᑦ ᐱᓕᕆᔾᔪᑕᐅᓂᐊᕐᓗᑎᒃ ᓄᒃᑎᕆᓂᖏᓐᓂ

12.1 ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑲᑎᓪᓗᒋᑦ ᐅᖓᑖᓄᖏᑦᑐᖅ $67,250,000-ᓂᒃ ᐊᑕᐅᓯᐊᕐᓗᒍ ᑮᓇᐅᔭᖃᖅᑎᑦᓯᓗᑎᒃ ᐊᑐᖅᑕᐅᓂᐊᖅᑐᑦ ᐊᑕᐅᓯᐊᕐᓗᑎᒃ ᓄᒃᑎᕆᓂᕐᒧᑦ ᐱᓕᕆᔾᔪᑕᐅᓗᑎᒃ ᐱᖃᓯᐅᑎᓗᒋᑦ ᐱᓕᕆᔭᐅᓂᖏᑦ ᐅᐃᒍᖓᓂ 1-ᒥ ᑕᐃᔭᐅᓯᒪᔪᑦ ᐅᑯᓄᖓ ᐅᐃᒍᓕᐊᕆᓯᒪᔪᑦ ᑎᑎᕋᖅᓯᒪᓂᖓᓄᑦ 12.

12.2 ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐅᓄᕐᓂᖃᖅᑐᓂᒃ ᐅᖓᑖᓄᖏᑦᑐᖅ $1,750,000 ᐊᑕᐅᓯᐊᕐᓗᒍ ᑮᓇᐅᔭᖃᖅᑎᑦᓯᓗᑎᒃ ᐊᑐᖅᑕᐅᓂᐊᖅᑐᑦ ᐊᑕᐅᓯᐊᕐᓗᑎᒃ ᓄᒃᑎᕆᓂᕐᒧᑦ ᐱᓕᕆᔾᔪᑕᐅᓗᑎᒃ ᐱᖃᓯᐅᑎᓗᒋᑦ ᐱᓕᕆᔭᐅᓂᖏᑦ ᐅᐃᒍᖓᓂ 2-ᒥ ᐅᐃᒍᓕᐊᕆᓯᒪᔪᑦ ᑎᑎᕋᖅᓯᒪᓂᖓᓄᑦ 12

ᐊᑕᐅᓯᐊᕐᓗᑎᒃ ᐊᑐᖅᑕᐅᓂᐊᖅᑐᑦ ᐱᓕᕆᐊᒃᓴᓂᒃ ᓄᒃᑎᕆᓂᖏᓐᓂ ᑮᓇᐅᔭᖃᖅᑎᑕᐅᔾᔪᑎᑦ ᐊᑯᓐᓂᐊᓂ ᓯᕗᓪᓕᖅᓯᐅᑎᑦ ᐊᖏᖃᑎᒌᒍᑎᑦ ᐊᒻᒪᓗ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᑦ

12.3 ᑲᑎᓪᓗᒋᑦ ᐅᓄᕐᓂᕆᔭᖏᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᓂ 12.1, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐅᓄᕐᓂᖃᖅᑐᓂᒃ $6,000,000 ᐊᑯᓐᓂᐊᓂ ᐊᑎᓕᐅᖅᑕᐅᓂᖓᑕ ᓯᕗᓪᓕᖅᓯᐅᑎᑦ ᐊᖏᖃᑎᒌᒍᑎᑦ ᐊᒻᒪᓗ ᐊᑎᓕᐅᖅᑕᐅᓂᖓᑕ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᑉ ᐱᓕᕆᔪᓐᓇᖁᓪᓗᒋᑦ ᐊᑕᐅᓯᐊᕐᓗᑎᒃ ᓄᒃᑎᕆᓂᖏᓐᓂ ᐱᓕᕆᐊᒃᓴᓂᒃ ᐱᖃᓯᐅᑎᓗᒋᑦ ᐱᓕᕆᐊᒃᓴᑦ ᓇᓗᓇᐃᖅᑕᐅᓯᒪᔪᑦ ᐃᓚᖓᓂ 1-ᒥ ᐅᐃᒍᓕᐊᕆᓯᒪᔪᓂ 1-ᒥ ᐅᑯᓄᖓ ᑎᑎᕋᖅᓯᒪᓂᖓ 12-ᒧᑦ.

12.4 ᑮᓇᐅᔭᑦ ᐃᑲᔪᕈᑎᖏᑦ ᑲᓇᑕᐅᑉ ᒐᕙᒪᒃᑯᖏᑕ ᑕᐃᔭᐅᔪᑦ ᐃᓗᐊᓂ ᑎᑎᕋᖅᓯᒪᓂᖓᓂ 12.3 ᑐᓂᔭᐅᔭᕆᐊᖃᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐃᒪᐃᓕᖓᓗᑎᒃ:

1. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᒍᑎᓕᐅᕆᐊᖃᖅᐳᑦ ᑮᓇᐅᔭᖃᖅᑎᑦᓯᓂᕐᒧᑦ, ᐊᑐᓕᕆᐊᕐᓗᓂ ᐄᑉᐳ 1, 2020, ᒪᓕᒃᓯᒪᓗᑎᒃ ᑲᓇᑕᐅᑉ ᒐᕙᒪᒃᑯᖏᑦ ᒪᓕᒋᐊᖃᕐᓂᖏᓐᓂᒃ ᑮᓇᐅᔭᖃᖅᑎᑦᓯᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐅᓄᕐᓂᖃᖅᑐᓂᒃ $3,000,000-ᓂᒃ; ᐊᒻᒪᓗ
2. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᒍᑎᓕᐅᕆᐊᖃᖅᐳᑦ ᑮᓇᐅᔭᖃᖅᑎᑦᓯᓂᕐᒧᑦ, ᐊᑐᓕᕆᐊᕐᓗᓂ ᐄᑉᐳ 1, 2021, ᒪᓕᒃᓯᒪᓗᑎᒃ ᑲᓇᑕᐅᑉ ᒐᕙᒪᒃᑯᖏᑦ ᒪᓕᒋᐊᖃᕐᓂᖏᓐᓂᒃ ᑮᓇᐅᔭᖃᖅᑎᑦᓯᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐅᓄᕐᓂᖃᖅᑐᓂᒃ $3,000,000-ᓂᒃᒪᓕᒃᓯᒪᓗᑎᒃ ᑲᓇᑕᐅᑉ ᒐᕙᒪᒃᑯᖏᑦ ᒪᓕᒋᐊᖃᕐᓂᖏᓐᓂᒃ ᑮᓇᐅᔭᖃᖅᑎᑦᓯᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐅᓄᕐᓂᖃᖅᑐᓂᒃ $3,000,000-ᓂᒃ.

12.5 ᑕᕝᕙᓐᖔᖅᑐᓂᑦ ᐅᓄᕐᓂᖏᓐᓂᒃ ᑕᐃᔭᐅᓯᒪᔪᓂᑦ ᑎᑎᕋᖅᓯᒪᓂᖓᓂ 12.2, ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᐳᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐅᓄᕐᓂᖃᖅᑐᓂᒃ $650,000 ᐊᑯᓐᓂᐊᓂ ᐊᑎᓕᐅᖅᑕᐅᓂᖓᑕ ᓯᕗᓪᓕᖅᓯᐅᑎᑦ ᐊᖏᖃᑎᒌᒍᑎᑦ ᐊᒻᒪᓗ ᐊᑎᓕᐅᖅᑕᐅᓂᖓᑕ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᑎᑎᕋᖅᓯᒪᓂᖓ 12. ᐊᑐᖅᑕᐅᓂᐊᖅᑎᓪᓗᒋᑦ ᐱᓕᕆᔾᔪᑕᐅᓗᑎᒃ ᐊᑕᐅᓯᐊᕐᓗᑎᒃ ᓄᒃᑎᕆᓂᕐᒧᑦ ᐱᓕᕆᐊᓂᒃ ᐱᖃᓯᐅᑎᓗᒋᑦ ᐱᓕᕆᔾᔪᑕᐅᓗᓂ ᓇᓗᓇᐃᖅᑕᐅᓯᒪᔪᓂᒃ ᐃᓚᖓᓂ 1-ᒥ ᐅᐃᒍᖓᓂ 2-ᒥ ᐅᑯᓇᓂ ᑎᑎᕋᖅᓯᒪᓂᖓᓂ 12-ᒥ.

12.6 ᐃᑲᔪᖅᓯᔾᔪᑎᑦ ᑮᓇᐅᔭᑦ ᑐᓂᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓇᓗᓇᐃᖅᑕᐅᓯᒪᔪᒃᑯᑦ ᑎᑎᕋᖅᓯᒪᓂᖓᓂ 12.5-ᒥ ᑲᓇᑕᐅᑉ ᒐᕙᒪᒃᑯᖏᑦ ᐊᑭᓕᖅᓯᔭᕆᐊᖃᖅᐳᑦ ᐃᒪᐃᑦᑐᒥᒃ ᐋᖅᑭᒡᓯᒪᓂᖃᕐᓗᑎᒃ:

1. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᖏᖃᑎᒌᒍᑎᓕᐅᕆᐊᖃᖅᐳᑦ ᑮᓇᐅᔭᖃᖅᑎᑦᓯᓂᕐᒧᑦ, ᐊᑐᓕᕆᐊᕐᓗᓂ ᐄᑉᐳ 1, 2020, ᒪᓕᒡᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᐳᑦ ᑮᓇᐅᔭᓂᒃ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐅᓄᕐᓂᖃᖅᑐᓂᒃ $325,000; ᐊᒻᒪᓗ
2. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᖏᖃᑎᒌᒍᑎᓕᐅᕆᐊᖃᖅᐳᑦ ᑮᓇᐅᔭᖃᖅᑎᑦᓯᓂᕐᒧᑦ, ᐊᑐᓕᕆᐊᕐᓗᓂ ᐄᑉᐳ 1, 2021, ᒪᓕᒡᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᓯᐳᑦ ᑮᓇᐅᔭᓂᒃ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐅᓄᕐᓂᖃᖅᑐᓂᒃ $325,000.

ᑮᓇᐅᔭᖃᖅᑎᑦᓯᓂᕐᒧᑦ ᐊᖏᖃᑎᒌᒍᑎᐅᔪᑦ - ᐊᑕᐅᓯᐊᕐᓗᑎᒃ ᓄᒃᑎᕆᓂᖏᓐᓂ ᐱᓕᕆᔾᔪᑎᒃᓴᓂᒃ

12.7 ᑮᓇᐅᔭᖃᖅᑎᑦᓯᓂᕐᒧᑦ ᐊᖏᖃᑎᒌᒍᑎᐅᔪᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖏᓐᓂ 12.4 ᐊᒻᒪᓗ 12.6 ᒪᓕᒃᓯᒪᔭᕆᐊᖃᖅᐳᑦ ᑲᓇᑕᐅᑉ ᒐᕙᒪᒃᑯᖏᑕ ᐊᑐᐊᒐᖓᓐᓂᒃ ᓄᒃᑎᕆᓂᕐᒧᑦ ᐊᑭᓕᐅᑎᓄᑦ ᐊᒻᒪᓗ, ᐊᓯᖏᓐᓄᑦ ᒪᓕᒐᐅᔪᓄᑦ, ᑐᓂᓯᓗᑎᒃ:

1. ᐊᑭᓕᐅᑕᐅᓂᐊᕐᓂᖏᓐᓄᑦ ᖃᖓᐅᓂᖓᑕ ᐸᕐᓇᒃᓯᒪᔪᓂᒃ;
2. ᐅᓂᒃᑳᓕᐅᕆᐊᖃᕐᓂᕐᒧᑦ ᒪᓕᒐᖏᑦ;
3. ᑎᑎᕋᖅᓯᒪᔪᑦ ᐊᑕᐅᓯᐊᕐᓗᑎᒃ ᓄᒃᑎᕆᓂᕐᒧᑦ ᐱᓕᕆᔭᐅᓂᐊᖅᑐᑦ ᐊᑐᓂ ᐊᖏᖃᑎᒌᖃᑕᐅᓯᒪᔪᓄᑦ ᐊᕐᕌᒍᑉ ᐃᓗᐊᓂ; ᐊᒻᒪᓗ
4. ᑐᓂᓯᓗᑎᒃ ᐃᒪᐃᓕᓐᓂᖅᐸᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐱᔭᕇᖅᑕᐅᓐᓂᖏᑉᐸᑦ, ᑲᓇᑕᐅᑉ ᒐᕙᒪᒃᑯᖏᑦ ᐱᔭᕆᐊᖃᕋᔭᖅᑐᑦ ᐅᑎᖅᑎᑦᓯᕕᐅᓗᑎᒃ ᑮᓇᐅᔭᓂᒃ ᐊᑐᖅᑕᐅᖏᓐᓂᑯᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᓄᒃᑎᖅᑕᐅᓚᐅᖅᑐᑦ ᑐᓂᔭᐅᓪᓗᑎᒃ ᐱᓕᕆᔾᔪᑕᐅᓂᐊᕐᒪᑕ ᐊᑕᐅᓯᐊᕐᓗᑎᒃ ᐱᓕᕆᐊᒃᓴᐅᔪᓂᒃ ᒪᓕᒡᓗᒍ ᑎᑎᕋᖅᓯᒪᓂᖓ 12.7(c).

ᐊᑕᐅᓯᐊᕐᓗᑎᒃ ᓄᑎᕆᓂᕐᒧᑦ ᑮᓇᐅᔭᖃᖅᑎᑕᐅᓂᖓ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᑦ

12.8 ᖃᖓᐅᓂᖓ ᐊᒻᒪᓗ ᑮᓇᐅᔭᖃᖅᑎᑦᓯᕐᓂᒧᑦ ᐊᐅᓚᓂᐅᔪᖅ ᐊᑭᓕᖅᑐᐃᔾᔪᑎᒋᓂᐊᖅᑕᖏᑦ ᑲᓇᑕᐅᑉ ᒐᕙᒪᒃᑯᖏᑕ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒥᐊᒃᑯᖏᑦ ᐅᓄᕐᓂᖃᖅᑐᑦ $61,250,000 (ᑲᑎᓪᓗᒋᑦ ᐅᓄᕐᓂᖏᑦ $67,250,000 ᑕᐃᔭᐅᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.1 ᐃᓚᓐᖓᕐᓗᒍ $6,000,000-ᓂᒃ ᑕᐃᔭᐅᔪᓂᒃ ᐃᓗᐊᓂ ᑎᑎᕋᖅᓯᒪᓂᖓᑕ 12.3) ᐋᖅᑭᒡᑕᐅᔭᕆᐊᖃᖅᑐᑦ ᑎᑎᕋᖅᑕᐅᓯᒪᓗᑎᒃ ᐃᓗᐊᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑏᑦ.

12.9 ᐊᑭᓕᐅᑎᖏᑦ ᑲᓇᑕᐅᑉ ᒐᕙᒪᒃᑯᖏᑕ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒥᐊᒃᑯᒋᔭᓂᒃ ᐅᓄᕐᓂᖃᖅᑐᓂᒃ $61,250,000-ᓂᒃ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.8 ᒪᓕᒃᓯᒪᓂᐊᖅᐳᖅ ᐊᖏᖃᑎᒌᖃᑕᐅᓂᐊᖅᑐᑦ ᐊᑎᓕᐅᕆᒃᐸᑕ ᐱᓕᕆᐊᕐᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᓂᒃ. ᐊᑭᓕᖅᓯᔾᔪᑎᖏᑦ ᑲᓇᑕᐅᑉ ᒐᕙᒪᒃᑯᖏᑕ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒥᐊᒃᑯᖏᓐᓂᒃ ᐅᓄᕐᓂᖃᖅᑐᓂᒃ $61,250,000 ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.8

12.10 ᑭᓯᐊᓂ ᐊᓯᐊᒍᑦ ᐊᖏᕈᑕᐅᓯᒪᒃᐸᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᕈᑎᐅᔪᑎᒍᑦ, ᐊᑭᓕᖅᑕᐅᓂᖏᑦ ᑮᓇᐅᔭᑎᒍᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.9 ᑎᑎᕋᖅᓯᒪᓂᖓ 12. ᐊᑐᖅᑕᐅᓂᐊᖅᐳᑦ ᐊᑕᐅᓯᐊᕐᓗᑎᒃ ᓄᒃᑎᕆᓂᕐᒧᑦ ᐱᓕᕆᔾᔪᑕᐅᓗᑎᒃ ᐊᒻᒪᓗ ᐱᓕᕆᔭᐅᔭᕆᐊᖃᖅᑐᑦ ᓂᕆᐅᒋᔭᐅᔪᑦ ᐱᓕᕆᔭᐅᓗᑎᒃ ᐱᖃᓯᐅᔾᔭᐅᓯᒪᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓗᐊᓂ ᐃᓚᖓᓂ 2 ᐊᒻᒪᓗ ᐃᓚᖓᓂ 3 ᐅᐃᒍᖓᓂ 1-ᒦᑦᑐᑦ ᐅᑯᓇᓂ ᑎᑎᕋᖅᓯᒪᓂᖓᓂ 12-ᒥ.

12.11 ᖃᖓᐅᓂᖓ ᐊᒻᒪᓗ ᑮᓇᐅᔭᖃᖅᑎᑕᐅᓂᖓᓄᑦ ᐊᐅᓚᓂᕆᔭᖏᑦ ᐊᑭᓕᖅᓯᓂᖓᑦᑕ ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐊᒥᐊᒃᑯᓂᓐᖔᖅᑐᑦ ᐅᓄᕐᓂᖃᖅᑐᑦ $1,100,000-ᓂᒃ (ᑲᑎᓪᓗᒋᑦ ᐅᓄᕐᓂᖏᑦ $1,750,000 ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.2 ᐃᓚᓐᖓᕐᓗᒍ $650,000 ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.5) ᑎᑎᕋᖅᑕᐅᓯᒪᔭᕆᐊᖃᖅᐳᑦ ᐃᓗᐊᓂ ᐱᓕᕆᐊᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᓂ.

12.12 ᐊᑭᓕᖅᓯᓂᖓᑦᑕ ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐊᒥᐊᒃᑯᓂᓐᖔᖅᑐᑦ ᐅᓄᕐᓂᖃᖅᑐᑦ $1,100,000 ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.11 ᒪᓕᒃᓯᒪᓂᐊᖅᐳᖅ ᐊᖏᖃᑎᒌᖃᑕᐅᓂᐊᖅᑐᑦ ᐊᑎᓕᐅᕆᒃᐸᑕ ᐱᓕᕆᐊᕐᒃᓴᓂᒃ ᑎᒍᓯᕐᓂᒧᑦ ᐊᖏᖃᑎᒌᒍᑎᓂᒃ.

12.13 ᑭᓯᐊᓂ ᐊᓯᐊᒍᑦ ᐊᖏᕈᑕᐅᓯᒪᒃᐸᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᕈᑎᐅᔪᑎᒍᑦ, ᐊᑭᓕᖅᑕᐅᓂᖏᑦ ᑮᓇᐅᔭᑎᒍᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.11 ᐊᑐᖅᑕᐅᓂᐊᖅᐳᑦ ᐊᑕᐅᓯᐊᕐᓗᑎᒃ ᓄᒃᑎᕆᓂᕐᒧᑦ ᐱᓕᕆᔾᔪᑕᐅᓗᑎᒃ ᐊᒻᒪᓗ ᐱᓕᕆᔭᐅᔭᕆᐊᖃᖅᑐᑦ ᓂᕆᐅᒋᔭᐅᔪᑦ ᐱᓕᕆᔭᐅᓗᑎᒃ ᐱᖃᓯᐅᔾᔭᐅᓯᒪᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓗᐊᓂ ᐃᓚᖓᓂ 2 ᐊᒻᒪᓗ ᐃᓚᖓᓂ 2 ᐅᐃᒍᖓᓂ 2-ᒦᑦᑐᑦ ᐅᑯᓇᓂ ᑎᑎᕋᖅᓯᒪᓂᖓᓂ 12-ᒥ.

ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᔾᔪᑎᓂᒃ ᑮᓇᐅᔭᖃᖅᑎᑦᓯᓂᖅ - ᑭᖑᕐᖓᒍᑦ ᓯᕗᓪᓕᖅᓯᐅᑎᒧᑦ ᐊᖏᖃᑎᒌᒍᑎᓕᐅᓚᐅᖅᑎᓪᓗᒋᑦ

12.14 ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᔭᕆᐊᖃᖅᐳᑦ ᐃᑲᔪᖅᓯᔾᔪᑎᓂᒃ ᑲᑎᓪᓗᒋᑦ ᐅᓄᕐᓂᖃᖅᑐᓂᒃ $15,000,000 ᑮᓇᐅᔭᖃᖅᑎᑦᓯᔾᔪᑕᐅᓗᓂ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐱᓕᕆᔾᔪᑕᐅᓗᓂ ᑕᐃᔭᐅᓯᒪᔪᖅ ᐊᑐᕐᓗᒍ ᑎᑎᕋᖅᓯᒪᓂᖓᓂ 9 ᐊᑯᓐᓂᐊᓂ ᐊᑐᖅᑕᐅᓂᐊᖅᑎᓪᓗᒋᑦ ᐊᑯᓐᓂᖏᓐᓂ ᐅᓪᓗᑦ ᐊᖏᖅᑕᐅᓂᖏᑕ ᓄᒃᑎᕆᓂᖏᓐᓂ ᐅᐸᓗᖓᐃᔭᐅᑏᑦ ᐊᒻᒪᓗ ᓄᒃᑎᕆᓂᐅᑉ ᐅᓪᓗᐊᑕ. ᑲᓇᑕᐅᑉ ᒐᕙᒪᒃᑯᖏᑦ ᖄᒃᑲᓐᓂᐊᒍᑦ ᑮᓇᐅᔭᖃᖅᑎᑦᓯᒋᐊᑐᓂᐊᖏᑦᑐᑦ ᐱᓕᕆᐊᒃᓴᓄᑦ ᑕᐃᔭᐅᓯᒪᔪᓄᑦ ᐃᓗᐊᓂ ᑎᑎᕋᖅᓯᒪᓂᖓᓂ 9-ᒥ.

12.15 ᑕᐃᑲᓐᖔᖅᑐᓂᑦ ᑲᑎᓪᓗᒋᑦ ᐅᓄᕐᓂᕆᔭᖏᓐᓂᑦ ᑕᐃᔭᐅᓯᒪᔪᓂᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.14, ᑲᓇᑕᐅᑉ ᒐᕙᒪᒃᑯᖏᑦ ᐊᑐᐃᓐᓇᕈᐃᔭᕆᐊᖃᖅᐳᑦ ᓯᕗᕐᖓᒍᑦ ᐊᑎᓕᐅᖅᑕᐅᓚᐅᖏᓐᓂᖓᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐅᓄᕐᓂᖃᖅᑐᓂᒃ $6,000,000 ᐃᒪᐃᓕᖓᓗᒍ ᑐᓂᔭᐅᓂᐊᖅᑎᓪᓗᒋᑦ:

1. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᒍᑎᓕᐅᕈᑎᖃᕆᐊᖃᖅᐳᑦ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᕈᑎᓂᒃ, ᐊᑐᓕᕆᐊᕐᓗᓂ ᐄᑉᐳ 1, 2020, ᒪᓕᒡᓗᒍ ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖃᖅᑎᑦᓯᔭᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐅᓄᕐᓂᖃᖅᑐᓂᒃ $3,000,000; ᐊᒻᒪᓗ
2. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᒍᑎᓕᐅᕈᑎᖃᕆᐊᖃᖅᐳᑦ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᕈᑎᓂᒃ, ᐊᑐᓕᕆᐊᕐᓗᓂ ᐄᑉᐳ 1, 2021, ᒪᓕᒡᓗᒍ ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖃᖅᑎᑦᓯᔭᕆᐊᖃᖅᐳᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐅᓄᕐᓂᖃᖅᑐᓂᒃ $3,000,000.

12.16 ᓇᓕᐊᑐᐃᓐᓇᖅ ᐊᑭᓕᐅᑕᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑮᓇᐅᔭᐃᑦ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.15 ᐊᑭᓕᐅᑕᐅᔭᕆᐊᖃᖅᐳᑦ ᒪᓕᒃᑕᐅᓗᑎᒃ ᑲᓇᑕᐅᑉ ᒐᕙᒪᒃᑯᖏᑕ ᓄᒃᑎᕆᓂᕐᒧᑦ ᐊᑭᓕᖅᓯᓂᕐᒧᑦ ᐊᑐᐊᒐᖏᑦ.

12.17 ᖃᖓᐅᓂᖓ ᐊᒻᒪᓗ ᑮᓇᐅᔭᖃᖅᑎᑕᐅᓂᖓᓄᑦ ᐊᐅᓚᓂᕆᔭᖏᑦ ᐊᑭᓕᖅᓯᓂᖓᑦ ᐊᒥᐊᒃᑯᖏᓐᓂᑦ $9,000,000 (ᐅᓄᕐᓂᖏᑦ ᑲᑎᓪᓗᒋᑦ $15,000,000 ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.14 ᐃᓚᓐᖓᕐᓗᒍ $6,000,000 ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.15) ᑎᑎᕋᖅᑕᐅᓯᒪᓂᐊᖅᐳᑦ ᓇᓗᓇᐃᖅᑕᐅᓯᒪᓗᑎᒃ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᓂ.

12.18 ᐃᑲᔪᖅᓯᔾᔪᑎᓄᑦ ᐊᑭᓕᐅᑎᖏᑦ ᑲᓇᑕᐅᑉ ᒐᕙᒪᒃᑯᖏᑕ ᐊᒥᐊᒃᑯᖏᓐᓂᓐᖔᖅᑐᑦ $9,000,000 ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.17, ᒪᓕᒃᓯᒪᔭᕆᐊᖃᖅᐳᑦ ᐊᖏᖃᑎᒌᒍᑎᓕᐅᕐᓂᐊᖅᑐᑦ ᐊᑎᓕᐅᖅᐸᑕ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᓂᒃ.

ᑲᔪᓯᔪᒃᑯᑦ ᑮᓇᐅᔭᖃᖅᑎᑦᓯᓂᖅ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᔾᔪᑕᐅᓂᐊᖅᑐᓂᒃ

12.19 ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑏᑦ. ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ, ᓄᓇᕗᑦ ᒐᕙᒪᒃᑯᖏᑦ ᐊᑐᐃᓐᓇᕆᐅᔭᕆᐊᖃᖅᐳᑦ ᐊᕐᕌᒍᑕᒫᓐ ᑮᓇᐅᔭᖃᖅᑎᑦᓯᓂᕐᒥᒃ $5,000,000-ᓂᒃ ᐊᑐᓕᖅᑎᑦᓯᔾᔪᑕᐅᓂᐊᖅᑐᓂᒃ ᑭᖑᕐᖓᒍᑦ ᐱᓕᕆᐊᒃᓴᓂᒃ ᑎᒍᓯᓚᐅᖅᑎᓪᓗᒋᑦ ᐅᐸᓗᖓᐃᔭᐅᑎᓂᒃ.

ᑲᔪᓯᔪᒃᑯᑦ ᑮᓇᐅᔭᖃᖅᑎᑦᓯᓂᖓᑦ ᓄᓇᕗᑦ ᒐᕙᒪᒃᑯᖏᓐᓄᑦ

12.20 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᑐᓂᓯᔭᕆᐊᖃᖅᐳᑦ ᓄᒃᑎᕆᓂᒃᑯᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᕐᕌᒍᑕᒫᓐ ᑮᓇᐅᔭᖃᖅᑎᑦᓯᖃᑦᑕᕐᓗᑎᒃ $84,000,000-ᓂᒃ ᐋᖅᑭᒋᐊᖅᑕᐅᓂᐊᕐᓗᑎᒃ, ᐅᓪᓗᐊᓂ ᓄᒃᑎᕆᓂᐅᑉ, ᑖᒃᓯᔭᖅᓯᒪᖏᑦᑐᑦ ᑮᓇᐅᔭᑦ ᐊᑭᓕᐅᑕᐅᓚᐅᖅᑐᑦ ᑭᒡᓕᖓ ᐋᖅᑭᒡᑕᐅᓗᓂ ᐊᑐᖅᑕᐅᓗᑎᒃ ᑲᓇᑕᐅᑉ ᒐᕙᒪᒃᑯᖏᑕ ᐊᒻᒪᓗ ᑲᓇᑕᐅ ᐊᒡᒍᖅᑐᖅᓯᒪᓂᖓᓂ ᒐᕙᒪᐅᔪᑦ ᐊᕐᕌᒍᑕᒫᓐ ᑮᓇᐅᔭᖃᖅᑎᑕᐅᓂᖏᓐᓄᑦ ᐱᖁᔭᕐᔪᐊᓂᒃ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑕ ᐊᒻᒪ ᑲᓇᑕᐅᑉ ᐊᒡᒍᖅᑐᖅᓯᒪᓂᐊᓂ ᒐᕙᒪᐅᔪᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᒪᓕᒐᖏᑦ, 2007 ᐅᕝᕙᓘᓐᓃᑦ ᐊᑐᖅᑕᐅᔪᑦ ᐱᓕᕆᐊᑦ ᐊᐅᓚᑦᑎᔾᔪᑕᐅᓪᓗᑎᒃ ᑮᓇᐅᔭᖃᖅᑎᑦᓯᓂᖏᓐᓄᑦ ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᑦ ᒐᕙᒪᒃᑯᖏᓐᓄᑦ.

ᑲᔪᓯᔪᒃᑯᑦ ᑮᓇᐅᔭᖃᖅᑎᑦᓯᓂᖓᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ

12.21 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᑐᓂᓯᔭᕆᐊᖃᖅᐳᑦ ᑮᓇᐅᔭᖃᖅᑎᑦᓯᓗᑎᒃ ᓄᒃᑎᕆᓂᒃᑯᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐊᕐᕌᒍᑕᒫᓐ ᐅᓂᕐᓂᖃᖅᑐᓂᒃ $3,000,000.

12.22 ᓄᓇᕗᑦ ᑐᓐᖓᕕᒃ ᑎᒥᖓᑦ ᐃᓕᓴᖅᓯᕗᑦ ᑲᔪᓯᔪᒃᑯᑦ ᑮᓇᐅᔭᖃᖅᑎᑕᐅᓂᐊᕐᓂᖏᓐᓂᒃ ᐅᓄᕐᓂᖃᖅᑐᓂᒃ $3,000,000 ᐊᑐᕐᓗᒍ ᑕᐃᔭᐅᓯᒪᔪᑦ ᐃᓗᐊᓂ ᑎᑎᕋᖅᓯᒪᓂᖓᑕ 12.21 ᐱᖃᓯᐅᔾᔨᓯᒪᔪᖅ ᑲᑎᓪᓗᒋᑦ ᐅᓄᕐᓂᕆᔭᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᑕ ᑮᓇᐅᔭᖃᖅᑎᑦᓯᓂᕆᓂᐊᖅᑕᖏᑦ ᐃᓘᓐᓇᖏᓐᓄᑦ ᐊᑭᓕᐅᑎᒋᓯᒪᔭᖏᓐᓄᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᓴᖅᑭᓯᒪᔪᓂᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᐅᑯᓇᓐᖓᓪᓗ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᖓᑕ, ᐱᖃᓯᐅᑎᓗᒋᑦ ᐊᑭᖏᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᑭᓕᕆᐊᖃᖅᓯᒪᔭᖏᑦ ᐱᓕᕆᓂᖏᑎᒍᑦ ᑎᑎᕋᖅᓯᒪᓂᖓ 7-ᒥ ᐅᑯᓇᓂ ᓯᕗᓪᓕᖅᓯᐅᑎᓂ ᐊᖏᖃᑎᒌᒍᑎᓂ ᐊᒻᒪᓗ ᐊᑭᖏᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐃᓚᐅᓂᕆᓚᐅᖅᑕᖓ ᐊᒃᑐᖅᑕᐅᓯᒪᔪᑦ ᓄᓇᐃᑦ ᒥᐊᓂᕆᔭᐅᓂᖏᓐᓄᑦ ᑲᑎᒪᔨᕋᓛᓄᑦ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 8.73.

12.23 ᐱᒋᐊᕐᕕᒋᓗᒍ ᓯᕗᓪᓕᖅᐹᖅ ᓇᓪᓕᐅᑎᕕᒋᔭᖓ ᓄᒃᑎᕆᓂᐅᑉ ᐅᓪᓗᐊᑕ ᐊᒻᒪᓗ ᐊᕐᕌᒍᑕᒫᓐ ᑭᖑᕐᖓᒍᑦ ᐊᑭᓕᐅᑎᐅᕙᒃᑐᑦ ᒪᓕᒡᓗᒍ ᑎᑎᕋᖅᓯᒪᓂᖓ 12.21 ᐋᖅᑭᒋᐊᖅᑕᐅᔭᕆᐊᖃᖅᐳᖅ ᐱᖃᓯᐅᔾᔨᓯᒪᓕᕐᓂᐊᕐᒪᑦ ᐊᓯᔾᔨᖅᑐᓂᒃ ᐊᑯᓐᓂᐊᓂ ᑲᓇᑕᐅᑉ ᒐᕙᒪᒃᑯᖏᑕ ᑮᓇᐅᔭᖃᖅᑎᑦᓯᓂᕆᕙᒃᑕᖏᓐᓄᑦ ᒪᓕᒐᖏᑦ FDDIPI ᐃᓱᒪᓕᐅᕈᑕᐅᓯᒪᔪᑦ ᓯᕗᓪᓕᖅᐹᕐᓄᑦ ᑕᖅᑭᕐᓄᑦ ᐱᖓᓱᓄᑦ ᐱᒋᐊᕐᕕᒋᓪᓗᒍ ᓇᓪᓕᐅᑎᕝᕕᖓ ᓄᒃᑎᕆᓂᐅᑉ ᐅᓪᓗᖓᑕ ("FDDIPIy-1") ᐊᒻᒪᓗ ᒪᓕᒐᖏᑦ FDDIPI ᐃᓱᒪᓕᐅᕈᑕᐅᔪᑦ ᐊᑐᖅᑕᐅᓂᐊᖅᑐᑦ ᑕᖅᑭᓄᑦ ᐱᖓᓱᓄᑦ ᐊᓂᒍᕋᑖᖅᑐᓄᑦ ᓇᓪᓕᐅᑎᓚᐅᖅᑎᓪᓗᒍ ᓄᒃᑎᕆᓂᐅᑉ ᐅᓪᓗᐊ ("FDDIPIy-2") ᒪᓕᒃᑕᐅᓗᓂ ᐅᑯᐊ ᒪᓕᒐᐅᔪᑦ ᑮᓇᐅᔭᓕᕆᔾᔪᑎᑦ:

12.24 ᑕᐃᒪᓕ ᑲᓇᑕᐅᑉ ᒐᕙᒪᒃᑯᖏᑦ ᐊᑐᓕᖅᑎᑦᓯᒃᐸᑕ ᐊᕐᕌᒍᑕᒫᓐ ᐅᓄᖅᓯᕙᓪᓕᐊᔾᔪᑎᑦ ᒪᓕᒐᖓᓐᓂᒃ ᑐᓐᖓᕕᖃᖅᑐᖅ ᐊᔾᔨᒋᓐᖏᑕᖓᓂᒃ ᐊᑭᖏᓐᓂᒃ ᓇᓗᓇᐃᒃᑯᑕᐅᔪᓂ FDDIPI ᐊᑐᖅᑕᐅᔪᑦ ᑲᔪᓯᔪᒃᑯᑦ ᑮᓇᐅᔭᖃᖅᑎᑦᓯᔾᔪᑕᐅᔪᓄᑦ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᑦ ᑎᒥᖁᑎᖏᓐᓄᑦ, ᑖᒃᑯᐊ ᐊᕐᕌᒍᑕᒫᓐ ᖁᕝᕙᕆᐊᕈᑎᐅᔪᓄᑦ ᒪᓕᒐᖃᕐᒪᑕ ᑐᓐᖓᕕᒋᔭᐅᓪᓗᑎᒃ FDDIPI ᒪᓕᒐᖏᑦ ᐅᓪᓗᒥᐅᔪᖅ ᐊᑐᖅᑕᐅᔪᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃ ᕿᒥᕐᕈᔭᕆᐊᖃᖅᐳᑦ FDDIPI ᒪᓕᒐᖏᓐᓂᒃ ᐊᑭᐅᔪᑦ ᓇᓗᓇᐃᒃᑯᑕᖏᓐᓂᒃ ᐊᑭᑦᑐᕆᐊᕈᑎᓂᒃ ᓇᓗᓇᐃᖅᑕᐅᓯᒪᔪᓂ ᐃᓗᐊᓂ ᑎᑎᕋᖅᓯᒪᓂᖓᑕ 12.23.

ᐊᓯᖏᑦ ᑮᓇᐅᔭᖃᖅᑎᑦᓯᔾᔪᑕᐅᔪᑦ

12.25 ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᖅ ᑎᑎᕋᖅᓯᓯᒪᔭᕆᐊᖃᖅᐳᑦ ᓇᓗᓇᐃᖅᑕᐅᓯᒪᓗᑎᒃ ᑮᓇᐅᔭᖃᖅᑎᑦᓯᓂᕐᒧᑦ ᒪᓕᒐᖏᑎᒍᑦ ᐱᖃᓯᐅᔾᔨᓂᐊᕐᒪᑕ ᑭᖑᕐᖓᒍᑦ ᓄᒃᑎᕆᓂᐅᑉ ᐅᓪᓗᐊᑕ ᐱᓕᕆᐊᒃᓴᐅᔪᓂᒃ. ᑖᒃᑯᐊ ᑮᓇᐅᔭᖃᖅᑎᑦᓯᓂᕐᒧᑦ ᒪᓕᒐᖏᑦ ᐃᓚᒋᔭᐅᓂᐊᖅᐳᑦ ᑲᔪᓯᔪᒃᑯᑦ ᑮᓇᐅᔭᖃᖅᑎᑦᓯᔾᔪᑕᐅᔪᓄᑦ ᓇᓗᓇᐃᖅᑕᐅᓯᒪᔪᓄᑦ ᑎᑎᕋᖅᓯᒪᓂᖓᓂ 12.20. ᑮᓇᐅᔭᖃᖅᑎᑦᓯᔾᔪᑎᑦ ᒪᓕᒐᖏᑦ ᐱᖃᓯᐅᔾᔨᓯᒪᔭᕆᐊᖃᖅᐳᑦ ᐅᑯᓂᖓ:

1. ᑮᓇᐅᔭᖃᖅᑎᑦᓯᓗᑎᒃ ᓄᓇᕗᑦ ᒐᕙᒪᑯᖏᓐᓄᑦ ᐊᑐᖅᑕᐅᓂᐊᖅᑐᓂᒃ ᐊᑭᖏᓐᓄᑦ ᓄᓇᕗᒥ ᓄᓇᐃᑦ ᖄᖓᓄᑦ ᐱᔪᓐᓇᐅᑎᓄᑦ ᑭᒡᓕᓯᓂᐊᖅᑎᑦ ᑲᑎᒪᔨᖏᓐᓄᑦ ᐊᒻᒪᓗ ᓄᓇᕗᒥ ᐃᒪᓕᕆᓂᕐᒧᑦ ᑲᑎᒪᔨᖏᑦ ᑲᔪᓯᖁᓪᓗᒋᑦ ᐊᑖᒍᑦ ᓄᓇᕗᑦ ᐱᖁᔭᕐᔪᐊᖏᑎᒍᑦ ᐊᑐᕐᓗᒍ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 5.7(b); ᐊᒻᒪᓗ
2. ᑮᓇᐅᔭᑦ ᐅᓄᕐᓂᕆᔭᖏᑦ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑕ ᕿᑲᕆᐊᕈᑎᖏᓐᓄ ᐊᑐᕐᓗᒍ ᑕᐃᔭᐅᓯᒪᔪᑦ ᑎᑎᕋᖅᓯᒪᓂᖓᓂ 10.22(e).

ᐅᐃᒍᖓ 1 ᑎᑎᕋᖅᓯᒪᓂᖓᓄ 12

ᐅᐃᒍᖓ 2 ᑎᑎᕋᖅᓯᒪᓂᖓᓄᑦ 12

ᐊᑐᓕᖅᑎᑦᓯᓂᕐᒧᑦ ᐸᕐᓇᐃᔨᑦ ᑲᑎᒪᔨᕋᓛᖏᑦ

14.1 ᐱᔪᓐᓇᖅᓯᑐᐊᖅᐸᑕ ᑭᖑᕐᖓᒍᑦ ᐊᑎᓕᐅᖅᑕᐅᓚᐅᖅᑎᓪᓗᒋᑦ ᐅᑯᐊ ᓯᕗᓪᓕᖅᓯᐅᑎᑦ ᐊᖏᖃᑎᒌᒍᑎᐅᔪᑦ ᑖᒃᑯᐊ ᐊᖏᖃᑎᒌᒍᑎᓕᐅᖅᓯᒪᔪᑦ ᓴᖅᑭᑦᑎᔭᕆᐊᖃᖅᐳᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐃᔨᑦ ᑲᑎᒪᔨᕋᓛᖏᓐᓂᒃ.

14.2 ᑖᒃᑯᐊ ᐊᑐᓕᖅᑎᑦᓯᓂᕐᒧᑦ ᐸᕐᓇᐃᔨᑦ ᑲᑎᒪᔨᕋᓛᖏᑦ ᑎᓕᔭᐅᖃᑦᑕᕐᓂᐊᖅᑐᑦ ᐊᖓᔪᖅᑳᖏᓐᓂᑦ ᐋᔩᑎᐅᔪᑦ.

14.3 ᑖᒃᑯᐊ ᐊᑐᓕᖅᑎᑦᓯᓂᕐᒧᑦ ᐸᕐᓇᐃᔨᑦ ᑲᑎᒪᔨᕋᓛᖏᑦ ᑲᑎᒪᔨᖃᕐᓂᐊᖅᑐᑦ ᒪᕐᕉᖕᓂᒃ ᑭᒡᒐᖅᑐᖅᑎᖃᕐᓗᑎᒃ ᐊᑐᓂ ᐊᖏᖃᑎᒌᒍᑎᓕᐅᖃᑕᐅᓯᒪᔪᓂᓐᖔᖅᑐᓂᒃ.

14.4 ᐊᖏᖃᑎᒌᒍᑎᓕᐅᖅᓯᒪᔪᑦ ᑲᒪᒋᔭᖃᕆᐊᖃᖅᐳᑦ ᓇᖕᒥᓂᖅ ᐊᑭᓕᕆᐊᖃᖅᑕᖏᓐᓂᒃ ᐃᓚᐅᓂᕆᔭᖏᓐᓄᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐃᔨᑦ ᑲᑎᒪᔨᕋᓛᖏᓐᓄᑦ.

ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎ

14.5 ᓯᕗᕐᖓᒍᑦ ᐊᑎᓕᐅᖅᑕᐅᓚᐅᖏᓐᓂᖓᓂ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎ, ᑖᒃᑯᐊ ᐊᑐᓕᖅᑎᑦᓯᓂᕐᒧᑦ ᐸᕐᓇᐃᔨᑦ ᑲᑎᒪᔨᕋᓛᖏᑦ ᓴᓇᔭᕆᐊᖃᖅᑐᑦ ᐊᑐᓕᖁᔭᓕᐊᒃᓴᓂᒃ ᐊᒻᒪ ᐊᑐᓕᖁᔭᓕᐅᖃᑦᑕᕐᓗᑎᒃ ᐊᖓᔪᖅᑳᖓᓐᓄᑦ ᐋᔩᖅᑎᐅᔪᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᐅᔪᓂᒃ ᑐᑭᒧᐊᒍᑕᐅᓂᐊᕐᒪᑕ ᐊᑐᓕᖅᑎᑦᑎᕙᓪᓕᐊᑎᓪᓗᒋᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᕈᑎᐅᔪᓂᒃ, ᑖᒃᑯᐊ ᑭᖑᓪᓕᖅᐹᕐᒥ ᐊᑐᓕᖅᑎᑦᑎᔾᔪᑎᑦ ᐸᕐᓇᐅᑎᖏᑦ ᐊᖏᖅᑕᐅᔭᕆᐊᖃᖅᑐᑦ ᐊᖓᔪᖅᑳᖓᓐᓄᑦ ᐋᔩᖅᑎᐅᔪᑦ ᑖᒃᑯᐊᓗ ᐃᓕᔭᐅᓯᒪᓂᐊᖅᐳᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᖑᑎᓄᑦ. ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᑦ ᐅᑯᓂᖓ ᓇᓗᓇᐃᖅᓯᓯᒪᓗᑎᒃ:

1. ᑲᒪᒋᔭᒃᓴᖏᓐᓂᒃ ᐊᒻᒪᓗ ᐱᓕᕆᐊᕆᔭᕆᐊᖃᖅᑕᖏᓐᓂᒃ ᐊᑐᓕᖅᑎᑦᓯᑎᓪᓗᒍ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᓂᒃ ᐱᖃᓯᐅᑎᓪᓗᒋᑦ ᐱᖁᔭᕐᔪᐊᑦ ᓴᖅᑭᑕᐅᔭᕆᐊᖃᖅᑐᑦ ᓴᖅᑭᓯᒪᔪᑦ ᐃᓗᓕᖏᓐᓂᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒍᑎᓂᑦ;
2. ᐊᖏᖃᑎᒌᒍᑎᓕᐅᖅᓯᒪᔪᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᓂᒃ ᑲᒪᒋᔭᖃᖅᐳᑦ, ᐊᒻᒪ ᒪᓕᒋᐊᖃᖅᐳᑦ ᐱᕕᒃᓴᓕᐊᖑᓯᒪᔪᓂᒃ ᐱᓕᕆᓂᐊᕐᓗᑎᒃ, ᑲᒪᒋᔭᒃᓴᖏᓐᓄᑦ ᐊᒻᒪᓗ ᐱᓕᕆᔭᒃᓴᖏᓐᓄᑦ ᒪᓕᒡᓗᒋᑦ ᓇᓗᓇᐃᖅᑕᐅᓯᒪᔪᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᓂ;
3. ᑐᓴᐅᒪᑎᑦᓯᓂᕐᒧᑦ ᐊᒻᒪᓗ ᑐᓴᒐᒃᓴᓄᑦ ᐅᐸᓗᖓᐃᔭᐅᑎᐅᔪᑦ ᐊᒃᑐᐊᓂᖃᖅᑐᑦ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᐱᓕᕆᐊᒃᓴᓂᒃ ᑎᒍᔭᐅᓚᐅᖅᑐᓂᒃ ᐊᖏᕈᑎᑎᒍᑦ;
4. ᐊᐅᓚᓂᐅᔪᖅ ᑐᑭᒧᐊᒃᑎᑦᓯᔾᔪᑕᐅᓂᐊᖅᑐᓄᑦ ᐊᒻᒪᓗ ᐃᑲᔪᖃᑎᒌᖕᓂᒃᑯᑦ ᐱᓕᕆᔾᔪᑕᐅᓂᐊᖅᑐᖅ ᐊᖏᖃᑎᒌᒃᓯᒪᔪᓄᑦ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒎᑎᐅᔪᑎᒍᑦ ᐱᓕᕆᐊᖃᖁᓪᓗᒋᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᒥ ᐱᔭᒃᓴᓂᒃ, ᐱᖃᓯᐅᑎᓪᓗᒋᑦ ᐊᐅᓚᓂᐅᔪᒥᒃ ᓇᓗᓇᐃᖅᓯᓗᑎᒃ ᐊᑐᖅᑕᐅᓂᐊᖅᑐᒥᒃ ᑲᒪᒋᔭᒃᓴᓄᑦ ᐊᒻᒪᓗ ᐱᓕᕆᐊᒃᓴᓄᑦ ᐱᔭᕇᖅᓯᔾᔪᑕᐅᓂᐊᖅᑐᓄᑦ; ᐊᒻᒪᓗ
5. ᐊᓯᖏᑦ ᐊᑐᓕᖅᑎᑎᓯᓂᕐᒧᑦ ᐱᔾᔪᑕᐅᔪᑦ ᐊᖏᖃᑎᒌᐳᑎᓕᐅᖅᑐᓄᑦ ᐊᖏᕈᑕᐅᓯᒪᔪᑦ.

14.6 ᐊᑐᖏᓪᓗᒍ ᑎᑎᕋᖅᓯᒪᓂᖏᑦ 14.5, ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎ ᐃᓚᒋᓂᐊᓐᖏᓚᐅᒃ ᐱᓕᕆᐊᒃᓴᓂᒃ ᑎᒍᓯᓂᕐᒧᑦ ᐊᖏᖃᑎᒌᒎᑎᐅᔪᑉ ᐅᕝᕙᓘᓐᓃᑦ ᓴᖅᑭᑦᑎᓂᐊᓐᖏᓚᖅ ᒪᓕᒐᖅᑎᒍᑦ ᐱᖁᔭᖅᑎᒍᑦ ᐱᓕᕆᐊᒃᓴᐅᔪᓂᒃ ᓇᓕᐊᑐᐃᓐᓇᕐᒥᒃ ᐊᑐᓕᐅᖃᑕᐅᓯᒪᔪᒧᑦ ᑎᒍᓯᓂᕐᒧᑦ ᐱᓕᕆᐊᒃᓴᓂᒃ ᐊᖏᕈᑎᓂᒃ.

ᐱᔭᕆᐊᑭᒡᓕᑎᑦᑎᔨᑦ ᑲᑎᒪᔨᖏᑦ ᐊᒻᒪ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᓄᑦ ᐅᓪᓗᒥᓯᐅᑎᕈᖅᑕᐅᓂᖏᑦ

14.7 ᐊᑐᓕᖅᑎᑦᑎᓂᕐᒧᑦ ᐸᕐᓇᐃᓂᕐᒧᑦ ᑲᑎᒪᔨᕋᓛᓂᒃ ᓴᖅᑭᑦᑎᔪᓐᓇᖅᑐᑦ ᐱᔭᕆᐊᑭᒡᓕᑎᑦᑎᔨᑦ ᑲᑎᒪᔨᖏᑦ ᐃᑲᔪᖅᑐᐃᓂᐊᖅᑐᓂᒃ ᓴᓇᑎᓪᓗᒋᑦ ᐊᒻᒪᓗ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᐸᕐᓇᐅᑎᓂᒃ, ᐱᔭᕆᐊᖃᕐᓂᖏᑦ ᒪᓕᒡᓗᒋᑦ.

14.8 ᐊᑐᓕᖅᑎᑎᑎᕙᓪᓕᐊᓂᕐᒧᑦ ᐸᕐᓇᐃᓂᕐᒧᑦ ᑲᑎᒪᔨᕋᓛᑦ ᑐᓂᓯᔭᕆᐊᖃᖅᐳᑦ, ᑐᒃᓯᕋᓚᐅᖅᑎᓪᓗᒍ ᐊᖓᔪᖅᑳᖓᑦ ᐋᔩᖅᑎᐅᔪᑦ, ᐅᕝᕙᓘᓐᓃᑦ ᓇᓕᐊᑐᐃᓐᓇᕐᒥᑦ, ᖃᓄᐃᓕᖓᓕᕐᒪᖔᑦ ᑐᓴᕋᓱᐊᖅᑎᓪᓗᒍ ᐅᓪᓗᒥᓯᐅᑎᐅᔪᑦ ᐊᒻᒪ ᑐᓴᒐᒃᓴᑦ ᐊᒃᑐᐊᓂᖃᖅᑐᑦ ᐱᕙᓪᓕᐊᔭᐅᓂᖓᓄᑦ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎ.

ᐊᑎᓕᐅᖅᑕᐅᔪᖅ ᐊᐅᒡᒍᓯ 15, 2019,
ᐃᖃᓗᓐᓂ, ᓄᓇᕗᑦ, ᐅᑯᓄᖓ