Amii gaa-gii-ikidowaad Ogimaag Carolyn Bennett gaye Marc Miller gaye Daniel Vandal Anishinaabe-giizhigak

ADAAWAANG, ONTARIO (Ode'imini-giizis 21, 2020) – Carolyn Bennett aa-ogimaakandang Anishinaabe Wiidanokiimidiwin gaye Marc Miller gaa-ogimaakandang Anishinaabe Wiiji'iwewin gaye Daniel Vandal gaa-ogimaakandang Giiwedino-izhichigewinan, gii-ikidowag owe apii Anishinaabe-giizhigak noongom.

"Noongom gaa-Anishinaabe-giizhigak, jiikendaamin gaa-bi-izhi-bimaadizwaad gaye gaa-izhitwaawaad gaye odizhichigewiniwaan Anishinaabe gaye Eshkiimeg gaye Wiisaakodewininiwag gaye odazhiikewiniwaan. Ogikendaasowiniwaa gaye omashkawendamowiniwaa gaye ozhiibendamowaa gaye gii-niigaaniiwaad gidoonji-ozhi'omin.

Gi-daa-maamawigaabawimin dazhiikewining miziwe omaa Gaanada-Akiing ji-gichi-inenimangwaa Anishinaabeg gaye Eshkiimeg gaye Wiisaakodewininiwag. Owe dash oshki-aakoziwin GOOBID-19 gaa-gii-dagoshinoomagak omaa, gaa-onji-bakaan izhichigeying noongom, geyaabi dash gi-daa-onji-gikendaamin dibaajimowinan gaye izhichigewinan gaye izhitwaawinan bebakaan ayaaying.

Anishinaabe-giizhigak dash gi-waabandaamin epiichi-zhiibendamowaad Anishinaabeg ji-ganawendamowaad odizhichigewiniwaan. Wiinge niibiwa ayaamagan ge-onji-gikendamowangiban aaniin ge-izhi-nisidotamang Anishinaabe-gikendaasowin gaye debweyendamowin gaye gikino'amaagewinan, gaye ji-jiikendamang gaa-inaadiziwaad Anishinaabeg miziwe omaa akiing.

Naawiya'iing gidakiiminaang izhi-ayaawag Anishinaabeg omaa Gaanada-Akiing. Giiyaabi gi-wiidanokiimaanaanig Anishinaabeg ji-ganawendamowaad omiinigoowiziwaan gaye manaaji'idiwin gaye wiidanokiimidiwin gaye wiijiiwidiwin gaye ji-wiidookawindwaa Anishinaabeg ji-dibenindizowaad.

Omaa dash Gaanada-Aki Ogimaawiwin, gidigoom ji-gagwe-gikendameg aaniin gaa-gii-izhi-bimaadiziwaad gaye gaa-gii-izhichigewaad gaye gaa-gii-izhitwaawaad Anishinaabeg, noongom gaye endaso-giizhig.

Jiikendamog Gii-Anishinaabe-Giizhigak!"