Iskweu Project: Thonwanonnhetsherá:wis nok iehonhskanekserénhas

Iskweu Project, kenh ní:ioht aiaí:ron "is-kwa," né:ne Ratirhakon'néha kén:ton ne "iakón:kwe," iakokwatákwen ne Na'kuset, Executive Director ne Native Women's Shelter ne Tiohtià:ke (Iah teká:ien ne Kanien'kéha). Shakotiia'takéhnha's táhnon ratirhiwahní:rats tsi tkaié:ri tsi enthatirihwa'será:ko nó:nen aiontia'táhton'ne ne Onkwehón:we, Rotinón:wa, táhnon gender-diverse niionkwe'tò:ten.

Io'nikonhráksa't tsi ká:ien ne karihón:ni. Tsi na'tekiátere 2009 nok 2021, 6 na'teiothna'néten tsi niiotkà:te ronwatírios ne Onkwehón:we, Othore'kehró:non nok Métis konón:kwe nok nitiotiiòn:sas tsi ní:ioht ne iah tekononkwehón:we.

"Tsi niiawe'towá:nen naho'ténhshon naetewá:iere," ión:ton Na'kuset. "Kwah í:ken tsi tekhwishátste. Nó:nen tiorì:waien akatkáhtho, enkio'tenhserakwatá:ko." Iskweu rotiia'takéhnhas ne kahwá:tsire né:ne tehonatonhwentsió:ni óksa'k ahotiia'takehnha'tsheraién:ta'ne nó:nen ónhkak aiontia'táhton'ne. Nó:nen ok naiá:wen, enwá:ton enhshakonaterihwaniéhthahse tsi kahswèn:karote, ahshakotikária'kse tahontawenriéhsa, tóka'ni ahonwatiia'takéhnhen ne ronte'nikonhrátsients tóka'ni Rotiksténha.

Énska nahò:ten tká:konte ahotiió'ten ne ahatiién:tere'ne tsi niiawén:'on wahón:nise tsi na'tekiátere ne shakotiié:nas nok Onkwehón:we kanakerahserakè:ron Koráhne. Na'kuset wa'ewennò:roke tsi kí:ken onhténtia'te "tsi karì:wes ionnhaksà:ton tsi na'tekiátere ne shakotiié:nas."

Iskweu Project tsi na'tekiátere iontstáhkwa né:'e. Tsi niiá:kon kaia'takehnhà:tshera tehonatonhwentsió:ni enwá:ton aiontateniáhehse ne teiontatewennáhkwa ne shakotiié:nas aiontatthárhahse tsi nikarì:wes rotiio'tátie aontatia'tatshénrion ónhkak iakotia'tahtón:'on.

"Sewatié:rens tká:konte aetewakwatá:ko kaia'takehnhà:tshera nok aiethiiehiahráhkwen tsi thóhtsi ahotiió'ten," ión:ton ne Na'kuset. "Tká:konte sénha aesaianeráhsten ne tahatikonhsotóntie raotirihwà:ke, táhnon teiohsteríhens."

Iah tha'tehatiia'toréhtha. Roti'nikonhaién:ta's.

Iskweu Project ratinién:te tahatí:tahste ohén:ton, shakotiia'takéhnha's tsi niiá:kon ronte'niéntha ahontè:ko tsi nón:we teioterien'thá:ra nok ahshakotinaktatshénria'se táhnon ahshakotiia'takehnha'tsheratshénria'se.

"É:so nikón:ti tsionathonwí:sen ionkwaió'te kóntstha teka'nikonhraténies ahse'kén ióhteront iotirihwaienterhá:'on táhnon tiotia'takehnhà:tshero'kte," ieio'tenhseraiehstáhsions Laura Asuiar wa'tierihwáthe'te. "Ohwentsiakaion'néha nihoti'nikonhrò:ten ne Onkwehón:we tsionathonwí:sen aotirihwà:ke né:'e karihsiónkwas ne Kononkwehón:we aoti'shatsténhsera táhnon tsi tiotí:nakte kanakerahserá:kon. Kí:ken thiká:te ón:ton tsi niiá:wens ronwatinonwenhserários ne Kononkwehón:we nok nitiotiión:'a."

"Thia'teká:konte ionkwa'nikonhrakétskwas tsi niioti'nikonhratshá:ni ne ionatatén:ron né:ne ionkwaió 'te. Nia'tenwáteratste iakotatén:ron ionkhihró:ri tsi ní:ioht tsi iakoia'tanonhstá:ton, eh taiokarón:ni tsi tetewaténies naetionnho'ténhake. Nó:nen ne kahwá:tsire ionkhró:ri tsi ronttó:ka's tsi iethiiatahónhate tóka'ni tsi ronttó:ka's tsi tontakarihwaié:ri'ne, tewattó:ka's tsi wetewakarón:ni tsi iorihowá:nen teiotténion. Iah onkionhá:'ok tétewe's tsi tewaién:tere's tsi niiawen'onhátie ne MMIWG2S+ táhnon kwah í:ken tsi ionkwatshennón:ni aetewaia'tá:rake tsi ionkwaio'tátie kwah tsiok nón:we ohwentsiakwékon."

Hen, waterihwentó:re ne kaio'ténsera, nek tsi iah akwé:kon tekahòn:tsi.

"Tiótkon tewatshénries tsi ní:ioht tsi aionkion'wéskwen ne ki' ostónha takáhkwen tsi niiókste tóka'ni aetewatshén:ri tsi nón:we ionkwaia'tanonhstá:ton," wa'í:ron. "Eh ní:kon niiakwahsteríhstha, tóka' iah sénha tsi ní:ioht ne teiakwahsénthos táhnon teionkwahenréhtha."