Onkwehón:we Nithotiiòn:sas wahatiráhthen tsi kahswen'karáhere United Nations nón:we
Iakoia'tarahstánion: GAC-PRMNY/Turnbull
Métis Nitiakoión:'a Tracie Léost nok Othore'kehró:non Nitiakoión:'a Sarah Jancke wa'kiaterihwahténtia'te tsi wa'thontatenonhwerá:ton.
Ohwentsiakwé:kon Koráhne, Onkwehón:we nithotiiòn:sas ratinenhrì:ne tsi tehatità:stha tsi watonhwentsia'tariha'tà:ne. Onerahtókha 2023, Onkwehón:we nithotiiòn:sas nok rotikstén:ha Kanón:no ia'thontawenriéhsa né:ne ratiià:tare ne Koráhne tehonwatiwennáhkwen ne United Nations Permanent Forum on Indigenous Issues (UNPFII). Iorihowá:nen wa'thatihtharónnion táhnon wahatiierón:nitste tsi nihontiérha tsi tehatità:stha tsi watonhwentsia'tariha'tà:ne raotinakerahserá:kon.
Sénha sató:kenhs kí:ken watonhwentsia'tariha'tà:ne tehatità:stha raotirihwà:ke táhnon tsi nahóntiere tsi ratiià:tare ne UNPFII ehtà:ke kaia'tarónnion.
Koksténha Claudette Commanda wa'ontewennón:kohte ne Tewa'kanha'néha Algonquin Anishinaabe kanonhweratónhsera ne orhon'kè:ne ioterihwahtentià:ton. Wa'onthró:ri tsi niiorihowá:nen tahontaterihwakwénienhste, táhnon ahontia'tarò:roke ahotiió'ten, wahonwathrória'te ronwahsótha William Commanda tsi nihoterihwaienterhá:'on United Nations nón:we.
Payel Laceese, Tsilhqot'in Cultural Ambassador, wahaterennó:ten karenna'ón:we ne waharihwanhó:ton ne Koráhne ioterihwahtentià:ton tsi tehonwatinonhwerá:tons.
Onkwehón:we nithotiiòn:sas Korahró:non watonhwentsia'tariha'tà:ne tehatità:tstha tahshakotitiohkwatihéntho, ne ò:ni ne Ohén:ton Ì:rate ne Northern Affairs, Dan Vandal, táhnon Lisa Koperqualuk, Ieia'takwe'ní:io ne Inuit Circumpolar Council Canada.
Brian Pottle, Othore'kehró:non Nithoión:'a Tehshakowennáhkwen, waharihwà:reke tsi niiorihowà:nen ne Onkwehón:we nithotiiòn:sas ahatiia'tá:rake né:ne Othorè:ke: "Thieió:kenht ón:ton shontá:kehte ne UNPFII tsi nihotirihwawén:'on ne Onkwehón:we ohwentsiakwé:kon, táhnon tsi akwé:kon skarì:wa wa'akwá:ton tsi iakwanién:te aiakwakarón:ni tsi tkarihwaié:ri enkénhake tsi iohwentsiá:te."
Tsi skátne rotiio'tén:'en ne Yukon First Nations Climate Action Fellowship, Jennifer Mierau wa'onthró:ri ne nahò:ten ratinién:te iaonsahonhsónteren: "Tsi tewa'á:raton wátston, tká:konte tentsitewákha ne onkwa'nikòn:ra, tewaia'tà:ke, táhnon onkwatónnhets. Tká:konte aonsetewakwatá:ko tsi teionkwaienawà:kon ne ohwéntsia. Ne taetewa'aratónnion táhnon taetewákha tsi tekakháhsion tóka' entsitewatéweienhste tsi ní:ioht tsi tiónnhe, tewaweientéhta's, nok ionkwaió'tens."
Tracie Léost, Métis Nitiakoión:'a Teiontatewennáhkwen wa'onthró:ri ahonwatinaktotá:ni tahontatahónhsatate táhnon ahotiianerenhseraién:take ahatihthá:rahkwe nahò:ten rotirì:waien táhnon ia'tahatí:ieste. Saiakehià:ra'ne tsi niiakorihwaienterhá:'on: "Tóka' ónhka'k ionkhró:ri shitewakión:'a tsi sewenhnísera UN né:ne New York nón:we iakatáweia'te ahtahkwa'ón:we wakátston táhnon atia'tawi'ón:we, iah tewakaterièn:tarahkwe tóka' aontakéhtahkwe. Ne kí:ken wahiahská:neke ne ionkhsótha táhnon rotikstenhokón:'a nahontkáhtho tsi nithotiiòn:sas ienkarihwaién:tahkwe aionkhinenhrì:ne ne ohén:ton wenhniseratenióntie."
Tsi nikarì:wes ne Indigenous Youth Roundtable, Sarah Jancke, co-chair kénhne ne Global Indigenous Youth Caucus, wahatihthá:rahkwe ne Minister Vandal nok Bob Rae, Koráhne Tehshakowennáhkwa ne United Nations, tsi ahonwatihretsiá:ron ne Onkwehón:we Nithotiiòn:sas tsi nihontiérha. "Akwahskanéksera né:'e ne sénha íhsi nón:we ién:we tsi taetewatatthárhahse ne nithotiiòn:sas, táhnon kanhà:tshera aetewaterihwahténtia'te. "Professional nitiakoión:'a ionkena'tónhkwen ne 20 niiohserá:ke. Ka'nón:we enwá:ton iaétewe tsi ionkwaió'te ne Onkwehón:we raotiianerénhsera ohwentsiakwé:kon? Kerihwanóntha ahotinaktotá:ni ahotihretsiá:ron ne Onkwehón:we nok Nithotiiòn:sas. Tká:konte aetewatkón:tahkwe tsi ionkwaió'te ohontà:ke nonká:ti, tsi náhe ò:ni ietewaiéhstha tsi nahò:ten ionkwaio'ten'onhátie."
Métis Roksténha Oliver Boulette waha'nowakeránion ne fiddle shaháhsa tsi roterihwanhotónkwen.
Othore'kehró:non Akoksténa Piita Irniq wa'onthró:ri tsi niiokaronnià:tha tsi watonhwentsia'tariha'tà:ne Othorè:ke, táhnon tsi na'teiotonhwentsióhon ok nahatí:iere.
- Tsi niieskahá:wis skakwatákwen: