Attokhà:tshera Karáhston - skátne ne sha'oié:ra, énska skátne

"Onkwatétshen ne Attokhà:tshera Karáhston iotohétston ionkwahtharónnion ne Onkwehón:we Rotiksténha táhnon Ratirihwaienté:ri. Wahatikaratónnion ne wahonnise'kénha, tsi nihotirihò:ten, táhnon aká:ion karihonniennì:tshera ohwentsiakwé:kon nitiawé:non táhnon tsi iethirihwakweniénhstha ne Iethi'nisténha Ohwéntsia."

2020 shiiohserò:ten, Claudia taiontáhsawen á:ierahste né:ne watena'tón:ni tsi niiorihowá:nen taetewákha táhnon aiethinónhstate ne Iethi'nihsténha Ohwéntsia.

10 nihatiià:tare Onkwehón:we kentióhkwa wahonhténtia'te tsi wahatí:rahste ne Attokhà:tshera Karáhston né:ne Onkwehón:we, Othore'kehró:non, táhnon Métis táhnon tsià:ta nihá:ti akó:ren tsi kwah tsiok nón:we ohwentsiakwé:kon nithoné:non. 60 nihá:ti kanakerahserá:kon nithoné:non ronathonkarià:kon ahatí:rahste.

"Claudia Salguero wa'ontétshen aiontatia'tarò:roke Rotiksténha nok Ronterien'tara'tsherenhá:wi ne ahatikwatá:ko ne attokhà:tshera karáhston. Tiakawehtáhkwen ne akotetshénhsera nok wa'kató:ken'ne. Kwah í:ken tsi ioiánere tsi ionkwarihwaienterhá:'on, táhnon ionehrákwat ne akwé:kon kakaratónnion. Ióhskats táhnon watena'tonnítskon ne iakoráhston." - Tóta Francine Pryer (Aki Songideye Ikwe), Mikinak ni dodem - Algonquin Nation ieià:tare, unceded Algonquin Territory tsi Koráhne.

Wahotiió'ten tsi wahatikontsherárho nok wahatikwatá:ko tsi na'tekiátere ne Tsiothorhkó:wa táhnon Seskehkó:wa 2021 nà:kon ne COVID-19 kaianerenhserá:ien.

É:so niionkwè:take kanatakonhró:non wahontié:nawa'se tsi kakwatákwen ne 48 (8'x4') nikahswen'kará:ke ionnià:ton ne karáhston.

"Kí:ken kaio'ténhsera kakowá:nen né:'e né:ne tká:konte tsi wa'onhkwísron nok wa'erharáhsten ne Claudia. Kí:ken iakotena'tón:ni iah kwah nek ne tsi ní:wa ne kaio'ténhsera nek tsi, tsi niionkwè:take iakorákwen ahatikaratónnion tsi nihotirihò:ten ne iorihwà:ke ne ionkwateríhonte taetewataterihwakwénienhste. Ionehrákwat tsi wa'kheientérha'ne ne ronátia'ke Rotiksténha táhnon wakatshennón:ni tsi í:ke's." – Dr. Rongo H. Wetere, Officer of the New Zealand Order of Merit, Fellow of the New Zealand Institute of Management (FNZIM) Elder Representative, New Zealand/Australasia Region.

Kanoronhkwà:tshera wátston tsi rotiio'tén:'en ne Attokhà:tshera Karáhston tsi nikarì:wes ronatstòn:ne ne iekontsherarhóhstha ne ahonnónnhete ne karáhston.

"Kaio'ténhsera kanién:te wa'oianeráhsten táhnon ontóhetste nahò:ten wakerhá:rahkwe ahse'kén tsi náhe onhténtia'te ne kaio'ténhsera nia'té:kon nia'tehotirihò:tens wátston tsi tahontáhsawen ne akwé:kon ronatià:tare." – Jaime Baquero, Columbia nithawé:non Ronkwehón:we.

Attokhà:tshera Karáhston né:'e ne oren'onhkwa'kó:wa awèn:ke nontakà:nio táhnon ne Kaié:ri Niiokwèn:rare karáhston watena'tón:ni ne Onkwehón:we tsi tehotiienawà:kon ne Ohwéntsia, sha'oiera'shón:'a, táhnon ka'shatstenhsera'ón:we né:ne ionkhiia'tanónhstats.

TKaráhston ne 1,000 nikatsistóhkwake watena'tón:ni tsi nihá:ti ratiksá:'a ronataweia'tà:non nek tsi iah tha'tethonahténtion. Raterien'tara'tsherenhá:wi Iraqhró:non, raráhstha Mowafak Alrasam, roráhston ne oren'ónhkwa.

Attokhà:tshera Karáhston wahatira'nén:takte entiè:ke nonká:ti ne Ottawa Community Housing kanonhsà:ke táhnon Seskéha 12 shiieskahá:wis, 2021 wahatirhorókhsi.

1365 Bank Tiohá:te Tsi Tkanà:tsio nón:we karáhston, Attokhà:tshera Karáhston ionkwehiahrahkwén:ni tsionkwe'tátshon tsi tká:konte énska entewá:ton ne sha'oié:ra, énska tentewaié:na tsi iethinónhstats ne Iethi'nisténha Ohwéntsia.