ᒥᓂᔅᑕ ᐊᓇᑕᓵᖑᕇ, ᒪᒥᐊᒋᐊᖅᑐᖅᓯᒪᕗᖅ ᐃᓚᒌᓄᑦ ᓅᑕᐅᓚᐅᖅᓯᒪᔪᓄᑦ ᑕᓪᓗᕈᑎᓄᑦ
ᕖᕗᐊᕆ 27, 2025 — ᐃᒃᐱᐊᕐᔪᒃ, ᓄᓇᕗᑦ — ᑲᑎᑉᐳᑦ ᓄᓇᖃᖅᑳᑐᓕᕆᔨᒃᑯᑦ ᐅᑭᐅᖅᑕᖅᑐᓕᕆᔨᒃᑯᓪᓗ ᑲᓇᑕᒥ ᐊᒻᒪᓗ ᓅᑕᐅᓂᑯᕕᓃᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᖏᑦ
ᐱᓂᕐᖢᒃᑕᐅᔾᔪᑎᐅᓚᐅᖅᓯᒪᔪᓂᒃ ᑕᒪᓐᓇᓗ ᐃᓱᒪᒋᔪᓐᓇᐃᖃᑎᒌᖕᓂᕐᒧᑦ ᓯᕗᓂᒃᓴᓕᐅᕈᑕᐅᓪᓗᓂ ᐅᖃᐅᓯᖃᓚᐅᕐᒪᑕ, ᐱᓕᕆᖃᑎᒌᒍᓐᓇᖅᓯᕚᓪᓕᕆᕈᑎᐅᖁᔨᖔᓕᖅᖢᑎᒃ ᐃᓄᖕᓄᑦ-ᓄᓇᖃᖅᑳᖅᓯᒪᔪᓕᕆᔨᒃᑯᓐᓄᓪᓗ
ᐅᓪᓗᒥ, ᒥᓂᔅᑕ ᓄᓇᖃᖅᑳᖅᑐᓕᕆᔨᒃᑯᓐᓄᑦ ᐅᑭᐅᖅᑕᖅᑐᒥᐊᑕᓕᕆᓂᕐᒧᓪᓗ ᒪᒥᐊᒋᐊᖅᑐᖅᓯᒪᓚᐅᕐᒪᑕ, ᒐᕙᒪᑐᖃᒃᑯᑦ ᐊᑕᐅᓯᐊᖏᑦᑐᐊᓘᓪᓗᑎᒃ ᓄᒃᑕᖅᑐᐅᖃᑦᑕᓚᐅᕐᓂᖏᓐᓂᒃ ᐃᓄᖕᓂᒃ ᐃᓚᒌᓂᒃ, ᑭᙵᕐᒥᐅᓂᒃ, ᐱᕖᒍᔾᔭᐅᓯᒪᓪᓗᑎᒃ ᖃᐅᔨᒪᖏᑦᑖᓗᖏᓐᓄᑦ ᓇᓗᔮᓗᖕᒥᓄᑦ ᓄᓇᑖᖅᑎᑕᐅᓪᓗᑎᒃ 1934 ᐊᒻᒪᓗ 1948 ᐊᕐᕌᒍᖏᓐᓂ.
ᐱᕖᒎᑎᑦᑎᓯᒪᓪᓗᑎᒃ ᓄᒃᑕᖅᑎᕆᓐᓂᕐᒪᑕ ᑲᓇᑕᐅᑉ ᓄᓇᖓ ᐊᖏᒡᓕᕆᐊᖁᓪᓗᒍ ᐱᔾᔪᑎᐅᓪᓗᓂ ᐃᓄᐃᑦ ᐃᓅᓯᖏᑦ, ᓄᑕᕋᖏᑦ, ᒪᒃᑯᒃᑐᖏᑦ ᖃᑕᕐᖑᑎᒌᓪᓗ ᐃᓱᒪᒋᔭᐅᖏᑦᑎᐊᖅᖢᑎᒃ. ᐃᓚᒌᑦᑎᐊᕐᓂᖅ ᓯᖁᒥᑕᐅᓪᓗᓂ, ᓄᓇᒧᑦ ᐊᒃᑐᐊᖓᓂᖏᓐᓄᑦ ᖃᐅᔨᒪᓂᖃᕈᓐᓃᖅᑎᑕᐅᓪᓗᑎᒃ, ᐱᖅᑯᓯᑐᖃᖏᑦ ᐃᓕᖅᑯᓯᑐᖃᖏᓪᓗ ᐃᓚᑰᓕᖅᑎᑕᐅᓪᓗᑎᒃ. ᐊᒃᓱᕈᕐᓇᖅᑐᕐᔪᐊᒃᑰᖅᑎᑕᐅᓚᐅᖅᑐᑦ ᐅᓪᓗᒥᒧᑦ ᑎᑭᐅᑎᔪᒥᒃ ᓯᕗᓕᖅᓱᕈᑕᐅᓕᖅᖢᓂᓗ, ᐃᓅᓯᕆᒐᔭᓚᐅᖅᑕᖏᓐᓄᑦ ᓴᒃᑯᐃᑎᑕᐅᓪᓗᑎᒃ.
ᑕᒪᓐᓇ ᐊᑯᓗᐊᓗᒃ ᒪᒥᐊᑕᐅᖁᓪᓗᒋᑦ ᐱᓕᕆᔭᐅᓚᐅᕐᒪᑦ, ᕿᓄᐃᓴᕈᑕᐅᓪᓗᓂ ᑭᒡᒐᖅᑐᖅᖢᒋᑦ ᐅᓪᓗᒥᒧᑦ ᑎᑭᐅᑎᓯᒪᔪᑦ ᑭᖑᕚ ᐃᓚᒌᓪᓗ. ᐊᐃᓴᑭ ᓲᔪᖅ, ᐊᒥᐊᒃᑯᑐᐊᖑᖃᑕᐅᖕᒥᔪᖅ ᖃᑕᕐᖑᑎᖏᓐᓂᒃ, ᐊᕐᕌᒍᒐᓴᓄᑦ ᑕᒪᓐᓇ ᖃᓄᖅᑑᑕᐅᖁᓯᒪᕚ. ᓅᑕᐅᓚᐅᖅᓯᒪᔪᑦ ᐅᓄᖅᑐᑦ ᑐᖁᖓᓕᖅᐳᑦ ᑐᓴᖃᑕᐅᔪᓐᓃᖅᖢᑎᒃ ᒪᒥᐊᕝᕕᐅᓂᖏᓐᓂᒃ, ᐃᖅᑲᐅᒪᓪᓚᕆᒃᐸᕗᑦ, ᓴᙱᔫᓚᐅᕐᓂᖏᑦ, ᕿᓄᐃᓵᕈᓐᓇᓚᐅᕐᓂᖏᑦ ᐱᓗᐊᙳᐊᖅᑐᒥᒃ ᐱᓂᕐᓗᒃᑕᐅᓂᕆᓚᐅᖅᑕᖏᑦ.
ᐋᔩᕋᕈᑕᐅᑎᓪᓗᒍ ᐅᑯᐊ ᐊᖏᖃᑎᒌᒍᑕᐅᓚᐅᖅᐳᑦ ᐊᑎᓕᐅᖅᑕᐅᓪᓗᓂᓗ ᔮᓄᐊᕆ 22, 2025ᒥ, ᑲᓇᑕ ᐊᑭᓕᓂᐊᕐᓂᕋᐃᔪᖅ $4.5 ᒥᓕᐊᓐᓂᒃ ᓅᑕᐅᓚᐅᖅᑐᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᒃᑯᖏᓐᓄᑦ, ᐃᓄᐃᑦ ᐃᓚᒌᑦ ᐃᑲᔪᖅᑐᖅᑕᐅᖁᓪᓗᒋᑦ ᐊᒃᓱᕈᕐᓇᖅᑐᕐᔪᐊᒃᑰᑦᑎᑕᐅᓚᐅᕐᓂᖏᓐᓄᑦ. ᖃᐅᔨᒪᒐᓗᐊᖅᑐᒍ ᑮᓇᐅᔭᖅ ᖃᓄᐃᒍᓐᓃᕈᑕᐅᔾᔮᖏᑦᑑᒐᓗᐊᖅ ᐊᒃᓱᕈᖅᑎᑕᐅᓚᐅᕐᓂᖏᓐᓄᑦ, ᑭᓯᐊᓂ ᑐᓂᔭᐅᕗᑦ ᐃᑲᔪᕈᑕᐅᓇᓱᒃᖢᓂ ᓯᕗᓂᒃᓴᖃᑦᑎᐊᓕᖅᐹᓪᓕᖁᓪᓗᒋᑦ ᒪᒥᓴᕆᐊᕈᓐᓇᖁᓪᓗᒋᓪᓗ ᑐᓴᖅᑕᐅᓗᑎᒡᓗ ᐊᒃᓱᕈᖅᑎᑕᐅᓚᐅᓂᖏᓐᓂᒃ.
ᐊᑯᓂᐊᓗᒃ ᒪᒥᐊᑕᐅᓂᒃᓴᖓ ᓂᕆᐅᒋᔭᐅᓯᒪᕗᑦ ᐊᓕᐊᓇᐃᑦ ᒪᒥᓴᖔᕐᓂᕐᒧᑦ ᐱᓕᕆᖃᑎᒌᒍᓐᓇᖅᐹᓪᓕᕐᓂᕐᒧᓪᓗ ᐊᖅᑯᑎᓕᐅᕈᑕᐅᖕᒪ ᒐᕙᒪᑐᖃᒃᑯᓐᓂ ᐃᓄᖕᓂᓪᓗ, ᐃᓱᒪᒋᔪᓐᓇᐃᖃᑦᑕᐅᑎᓂᒃ ᐱᒋᐊᖅᑎᑕᐅᓪᓗᓂ, ᓴᙱᓂᖅᓴᐅᓕᖁᓪᓗᒋᑦ, ᐃᓅᓯᑦᑎᐊᕆᖕᓂᖅᓴᒧᑦ ᐊᖅᑯᓯᐅᖁᓪᓗᒋᑦ, ᐃᓄᐃᑦ ᓯᕗᓂᒃᓴᑦᑎᐊᕆᖕᓂᖅᓴᐅᖁᓪᓗᒋᓪᓗ.
ᐅᖃᖅᑕᐅᔪᑦ
"ᖃᓱᕗᖓ ᑕᒪᓐᓇ ᐊᑯᓂᐊᓗᒃ ᒪᒥᐊᑕᐅᖁᓯᒪᒐᒃᑯᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᐊᐃᑦᑖᖑᒐᓗᐊᖅ, ᐊᓪᓗᒥ ᓅᑕᐅᖅᑳᖅᑐᕕᓃᑦ ᐃᓅᔪᓐᓃᖅᓯᒪᔪᑐᖃᐅᓕᖅᑎᓪᓗᒋᑦ ᒪᒥᐊᑕᐅᖕᒪᑕ. ᖃᐅᔨᒪᓚᐅᖅᐸᒃᑲ ᐳᓛᖅᐸᒃᖢᒋᓪᓗ ᐃᓐᓇᐃᑦ ᐆᒪᑎᓪᓗᒋᑦ ᐅᖃᐅᓯᖃᐃᓐᓇᖃᑦᑕᓚᐅᖅᑐᑦ ᐊᒃᓱᕈᕐᓇᑐᕐᔪᐊᒃᑰᖅᑎᑕᐅᓚᐅᕐᓂᖏᓐᓂᒃ. ᓂᓪᓕᕈᑎᒋᔪᓐᓇᖅᓯᓚᐅᖅᑕᕋ ᕿᓄᐃᓵᓚᐅᕐᒪᑕ ᐊᕐᕌᒍᑦ 80 ᐅᖓᑖᓄᑦ, ᐱᒋᐊᖅᑎᓚᐅᖅᓯᒪᕙᕋ ᑕᒪᓐᓇ ᐊᕐᕌᒍᑦ 15 ᐊᓂᒍᖅᓯᒪᓕᖅᐳᑦ ᒪᒥᐊᑕᐅᖁᓪᓗᒋᑦ ᐅᑭᐅᖅᑕᖅᑑᑉ ᖁᑦᑎᖕᓂᖅᐹᖓᓄᑦ ᓅᑕᐅᔪᕕᓃᑦ. ᐊᓕᐊᓇᐃᒍᓱᒃᐳᖓ ᑕᒪᓐᓇ ᑐᓴᐅᒪᔭᐅᓂᐊᓕᕐᒪᑦ. ᐊᑯᓂᓗᐊᕌᓗᒃ ᓄᖅᑲᖔᕐᒪᑦ, ᖃᐅᔨᒪᔭᐅᓕᕐᓂᖓ ᒪᒥᓴᐅᑎᐅᓂᐊᓕᕐᒪᑦ. ᑕᐃᒪᑐᖅ ᐃᓚᒌᓄᑦ ᓴᐃᓕᓂᖅᓴᐅᓕᕈᑎᐅᓂᐊᓕᖅᐳᖅ ᐅᓂᒃᑳᖏᓪᓗ ᑐᓴᖅᓴᕈᖅᑎᑕᐅᓗᑎᒃ ᐃᖅᑲᐃᔾᔪᑎᐅᔪᓐᓇᖅᓯᓗᑎᒃ ᕿᓄᐃᓵᕈᑎᒋᓚᐅᖅᑕᖓ ᓱᓕᓪᓚᑦᑖᖅᑐᐊᓘᓚᐅᕐᒪᑦ ᐳᐃᒍᖅᑕᐅᔭᕆᐊᖃᖏᑦᑎᐊᖅᖢᓂᓗ"
ᐊᐃᓴᑭ ᓲᔪᖅ
ᐃᓐᓇᖅ ᐊᒥᐊᒃᑯᑐᐊᖑᖃᑕᐅᓕᖅᑐᖅ ᑕᓪᓗᕈᑎᓄᑦ ᓅᑕᐅᓚᐅᖅᓯᒪᔪᓂᒃ.
"ᐊᐅᓚᔾᔭᐃᒋᐊᓕᖅᐳᒍᑦ ᓴᖅᑭᑕᐅᓪᓚᕆᒋᐊᖃᕐᓂᖓᓂᒃ ᓱᓕᒻᒪᕆᖕᒪᑦ ᑭᙵᕐᒥᐅᑦ ᖃᑕᕐᖑᑎᒌᑦ ᓅᑕᐅᓚᐅᓯᒪᖕᒪᑕ ᑕᓪᓗᕈᑎᓄᑦ, ᓱᓕᔪᒥᒃ ᓴᖅᑭᑏᕗᒍᑦ, ᑕᑯᖃᑕᐅᓯᒪᓪᓗᖓᓗ ᐊᒃᓱᕈᕐᓇᖅᑐᒃᑰᕈᑕᐅᓯᒪᓂᖓᓂᒃ ᐃᒃᐱᒋᓪᓗᒍᓗ ᐱᒻᒪᕆᐅᒋᔾᔪᑎᒋᕙᕋ ᑐᓴᖅᑕᐅᔭᕆᐊᖃᕐᓂᖓ, ᐃᓐᓇᕆᓚᐅᖅᑕᕗᑦ ᐊᒃᓱᕈᕐᓇᖅᑐᒃᑰᓚᐅᖅᑐᑦ ᐊᒃᑐᖅᑕᐅᔾᔪᑎᖃᓚᐅᖅᑐᓪᓗ ᖃᐅᔨᒪᔭᐅᓂᐊᓕᕐᒪᑕ. ᐊᑯᓕᐊᓗᒃ ᑕᒪᓐᓇ ᓴᖅᑭᑕᐅᓇᓱᖕᒪᑦ ᐱᓂᕐᓗᒃᑕᐅᔾᔪᑎᐅᓚᐅᖅᑐᖅ ᓅᑕᐅᑎᓪᓗᒋᑦ ᖃᐅᔨᒪᖏᑖᓗᖏᓐᓄᑦ, ᐊᐃᑦᑖᖑᒐᓗᐊᖅ ᐃᓐᓇᐃᑦ ᐅᓄᖅᑐᑦ ᐃᓅᔪᓐᓃᖅᓯᒪᔪᑐᖃᐅᓕᕐᒪᑕ ᑐᓴᖃᑕᐅᔪᓐᓂᖅᖢᑎᒃ ᒪᒥᐊᑕᕕᐅᓂᖏᓐᓂᒃ ᑐᓴᕆᐊᖃᓪᓚᕆᓚᐅᖅᑑᒐᓗᐊᑦ. ᑕᐃᒪᓐᓇ ᐱᔾᔪᑎᒋᓪᓗᒍ ᒪᒥᐊᑕᐅᔾᔪᑎ ᑐᓴᖅᑕᐅᔭᕆᐊᖃᓪᓚᕆᒃᐳᖅ ᑐᓴᐅᒪᔭᐅᓕᕐᓗᓂᓗ ᑭᖑᕚᖏᓐᓄᑦ ᒪᒥᐊᑕᐅᓂᖅ ᐱᒋᐊᕈᑕᐅᓗᓂ ᐊᖏᕈᑕᐅᓗᓂ ᐱᓂᕐᓗᒃᑕᐅᓚᐅᕐᒪᑕ . ᐊᓕᐊᓇᐃᑦ ᓴᐃᓕᓇᖅᑐᒦᖃᑕᐅᓂᐊᓕᖅᑐᖓ ᒪᒥᐊᕕᐅᓯᒪᓕᕋᑦᑕ ᓯᕗᒧᐊᕆᐊᕈᑎᒋᓕᕐᓗᑎᒍᓗ"
ᓯᐊᕌ ᕕᓕᑉᔅ
ᓅᑕᐅᓚᐅᖅᓯᒪᔪᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ
"ᐅᓪᓗᒥ, ᑲᓇᑕᐅᑉ ᒐᕙᒪᖓ ᐸᓯᔭᒃᓴᐅᓂᖏᓐᓂᒃ ᐊᖏᕈᑎᖃᖅᐳᑦ ᐊᒃᓱᕈᖅᑎᑦᑎᓚᐅᕐᓂᖏᓐᓂᒃ ᐃᓄᖕᓂᒃ ᓅᑏᑦᑎᑎᓪᓗᒋᑦ ᑕᓪᓗᕈᑎᓄᑦ, ᖃᓄᖅᑑᕈᑕᐅᔭᕆᐊᖃᕐᓂᖓ ᐱᒻᒪᕆᐊᓘᖕᒪᑦ ᓯᕗᒧᐊᕈᑎᖃᑦᑎᐊᕐᓂᐊᓕᕋᑦᑕ ᐃᓱᒪᒋᔪᓐᓇᐃᖃᑦᑕᐅᑎᔪᓐᓇᖅᓯᓗᑕᓗ ᐱᓕᕆᖃᑎᒌᒍᓐᓇᖅᓯᕚᓪᓕᕈᑎᒋᓗᑎᒍᓗ ᐃᓄᖕᓄᑦ. ᖁᔭᓐᓇᒦᒃ ᓅᑕᐅᓚᐅᖅᓯᒪᔪᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᖏᑦ ᑭᒡᒐᖅᑐᐃᑦᑎᐊᓚᐅᕐᒪᑕ ᐅᓪᓗᕆᔭᕗᑦ ᐊᑐᖅᑖᓗᒋᓕᖅᑕᕗᑦ"
ᒥᓂᔅᑕ ᒋᐅᕆ ᐊᓇᑕᓴᖓᕇ
ᒥᓂᔅᑕ ᓄᓇᖃᖅᑳᖅᑐᓕᕆᔨᒃᑯᓐᓄᑦ
ᑐᓴᖅᑕᐅᔭᕆᐊᓖᑦ
- ᑕᓪᓗᕈᑎᓄᑦ ᓅᑕᐅᓚᐅᕐᓂᖅ ᓯᕗᓪᓕᖅᐹᖑᓚᐅᖅᓯᒪᖕᒪᒃ ᓄᒃᑕᖅᑎᕆᓂᕐᒧᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ, ᑕᒪᓐᓇᓗ ᐊᑐᐃᓐᓇᖅᑕᐅᓕᖅᖢᓂ ᐊᕐᕌᒍᒐᓴᓄᑦ.
- 1934ᒥ, ᐊᐃᔭᐅᑦ, ᐃᕐᓂᖏᓪᓗ ᑭᒍᑦᑕᖅ, ᓴᐸ, ᖃᕙᕙᐅᖅ, ᓇᐸᔅᓯᑲᓪᓚᒃ ᐸᓂᑐᐊᖓᓗ ᐃᑎᓪᓗᐃ - ᑭᙵᓂᖔᖅᖢᑎᒃ ᓄᑕᐅᓚᐅᖅᓯᒪᕗᑦ ᑕᓪᓗᕈᑎᓄᑦ, ᑭᙵᓂ ᑕᓪᓗᕈᑎᓄᑦ ᐅᖓᓯᖕᓂᖃᖅᑐᖅ 1000 ᑭᓛᒥᑕᓂᒃ. ᐅᖃᐅᑎᔭᐅᑦᑎᐊᖅᖢᑎᒡᓗ ᓄᓇᖓᓄᑦ ᐅᑎᖅᑎᑕᐅᓛᕐᓂᖏᓐᓂᒃ, ᐅᑎᖅᑎᑕᐅᙱᖔᖅᖢᑎᒃ ᓄᒃᑕᖅᑎᑕᐅᖔᓕᓚᐅᖅᐳᑦ.
- ᐅᑯᓄᖓ ᓄᒃᑕᖅᑕᐅᓂᑰᕗᑦ:
- 1934: ᑭᙵᓂ ᑕᓪᓗᕈᑎᓄᑦ
- 1936: ᑕᓪᓗᕈᑎᒥ ᐃᒃᐱᐊᕐᔪᖕᒧᑦ
- 1937: ᐃᒃᐱᐊᕐᔪᖕᒥ ᐃᑭᕋᓴᖕᒧᑦ
- 1948: ᐃᑭᕋᓴᖕᒥ ᑕᓗᕐᔪᐊᓄᑦ
- ᐊᐃᓴᑭ ᓲᔪᖅ, ᐊᒥᐊᒃᑯᑐᐊᖑᖃᑕᐅᔪᖅ ᑭᖑᕚᕆᔭᐅᔪᓂᒃ, ᐊᑯᓂᐊᓗᒃ ᖃᓄᖅᑑᖅᑕᐅᖁᓪᓗᓂᐅᒃ ᐱᓕᕆᐊᕆᓯᒪᔭᖓ. ᓯᕗᓪᓕᖅᐹᒥ ᑎᑎᕋᓚᐅᖅᓯᒪᔪᖅ ᕖᕗᐊᕆ 2010ᒥ ᓕᐅᓂ ᐊᒡᓘᒃᑲᕐᒧᑦ ᑲᓇᑕᐅᑉ ᑲᑎᒪᕕᒡᔪᐊᖓᓄᑦ ᑲᑎᒪᔨᐅᑎᓪᓗᒍ ᐅᓄᖅᑐᐃᖅᓱᖅᖢᓂᓗ ᐊᖃᖃᑎᒌᓐᓇᖅᓯᒪᓪᓗᓂᐅᒃ, ᐃᑲᔪᖅᑐᖅᑎᐊᓚᐅᖅᑐᖅ ᐱᒋᐊᖅᑕᐅᖁᔨᓂᕐᒧᑦ ᖃᓄᖅᑑᖅᑕᐅᔾᔪᑎᖓ.
- ᓅᑕᐅᓂᑯᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᑦ ᓴᖅᑭᑦᑏᓚᐅᖅᐳᑦ ᓄᓇᕗᒻᒥᐅᖑᓪᓗᑎᒃ ᐃᓚᒌᓂᒃ ᐊᕐᕌᒍ 1934ᒥ 1948ᒧᑦ, ᐊᑯᓄᐊᓗᒃ ᓲᔫᑉ ᑕᒪᓐᓇ ᖃᓄᖅᑑᕈᑕᐅᓯᒪᓕᖅᑎᓪᓗᒍ, ᓅᑕᐅᓚᐅᖅᑐᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᑦ ᐊᕐᕌᒍᑦ ᖁᓖᑦ ᑐᓴᖅᑕᐅᖁᔨᓪᓗᑎᒃ ᖃᓄᖅᑑᕈᑕᐅᖁᓪᓗᒍᓗ ᑭᒡᒐᖅᑐᐃᓯᒪᕗᑦ.
- ᐊᐃᕐᕆᓕ 23, 2014ᒥ, ᓅᑕᐅᓚᐅᖅᑐᑦ ᑕᓪᓗᕈᑎᓄᒃ ᑲᑐᔾᔨᖃᑎᒌᑦ ᐅᖃᕆᐊᖅᑐᖅᓯᒪᓚᐅᖅᐳᑦ ᓄᓇᖅᑳᖅᑐᓕᕆᔨᓄᑦ ᐅᑭᐅᖅᑕᖅᑐᓕᕆᓂᕐᒧᓪᓗ ᑲᓇᑕᒥ ᐊᑭᓕᖅᑕᐅᖁᓪᓗᒋᑦ ᒪᒥᐊᑕᐅᖁᓪᓗᒍᓪᓗ ᑲᓇᑕᒥᙶᖅᑐᒥᒃ ᓄᒃᑕᖅᑕᐅᖁᑦᑕᕐᓂᖏᓐᓄᑦ..
- ᔮᓄᐊᕆ 22, 2025ᒥ, ᐊᕐᕋᒍᒐᓴᓄᑦ ᐋᔩᕋᕈᑕᐅᓯᒪᓕᖅᑎᓪᓗᒍ, ᓅᑕᐅᔪᕕᓃᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᑦ ᑲᓇᑕᐅᓪᓗ ᒐᕙᒪᖓ ᐊᑎᓕᐅᖃᑎᒌᓚᐅᖅᐳᑦ ᐊᖏᖃᑎᒌᒍᑎᑖᖅᖢᑎᒡᓗ ᑐᓂᔭᐅᓂᐊᕐᓂᖏᓐᓂᒃ.
ᐱᔾᔪᑎᖓᑕ ᑕᑯᔭᐅᒃᑲᓐᓂᕈᓐᓇᖅᑐᖅ
ᑐᓴᕆᐊᒃᑲᓐᓂᕈᒪᒍᔅᓯ, ᐱᕙᓪᓕᐊᔪᓕᕆᓂᕐᒧᑦ ᑐᓴᕆᐊᕐᕕᓴᑦ:
ᓯᑏᕙᓐ ᑰᐸ,
ᓴᐳᓐᓂᐊᖅᑎ
ᓴᐳᓐᓂᐊᖅᑎᒋᔭᐅᔪᖅ ᓅᑕᐅᓚᐅᖅᓯᒪᔪᑦ ᑕᓪᓗᕈᑎᓄᑦ ᑲᑐᔾᔨᖃᑎᒌᓄᑦ
ᑰᐸ ᓴᐳᓐᓂᐊᖅᑐᓕᕆᔨ
Steve@CooperRegel.ca
1-800-994-7477
ᒍᕆᐊᑯᕆ ᕗᕋᐃᒻ
ᐱᕙᓪᓕᐊᔪᓕᕆᔨ
ᒥᓂᔅᑕ ᒋᐅᕆ ᐊᓇᓐᑕᓴᖓᕇ ᑎᑎᕋᕐᕕᖓᓂ
ᒥᓂᔅᑕ ᓄᓇᖃᖅᑳᖅᑐᓕᕆᓂᕐᒧᑦ ᐅᑭᐅᖅᑕᖅᑐᓕᕆᓂᕐᒧᓪᓗ ᒥᓂᔅᑕᐅᓪᓗᓂᓗ ᑲᓇᑕᐅᑉ ᐅᑭᐅᖅᑕᖅᑐᖏᑕ ᐱᕚᓪᓕᕈᑎᓕᕆᔨᒃᑯᖏᓐᓄᑦ
gregory.frame@rcaanc-cirnac.gc.ca
ᐱᕙᓪᓕᐊᔪᓕᕆᔨᒃᑯ
ᓄᓇᖃᖅᑳᖅᑐᓕᕆᔨᒃᑯᑦ ᐅᑭᐅᖅᑕᖅᑐᓕᕆᔨᒃᑯᓪᓗ ᑲᓇᑕᒥ
RCAANC.media.CIRNAC@sac-isc.gc.ca
ᑐᓴᐅᒪᖃᑎᒌᖏᓐᓇᖅᑕ
ᐅᖃᖃᑎᖃᕈᒪᒍᕕᑦ ᓄᓇᖃᖅᑳᖅᑐᓕᕆᓂᕐᒧᑦ ᑲᓇᑕᒥ ᐃᓚᐅᕕᒃ:
X: @GCIndigenous
Facebook: @GCIndigenous
Instagram: @gcindigenous
ᑐᓴᕆᐊᕈᓐᓇᕆᕗᑎᒃ ᓇᒃᓯᐅᔾᔨᕕᐅᓗᑎᒃ ᐱᕙᓪᓕᐊᔪᓂᒃ ᐅᑰᓇ. ᑐᓴᒃᑲᓐᓂᕈᒪᒍᕕᑦ ᐅᓇ ᑕᑯᒋᐊᕈᒃ www.cirnac.gc.ca/RSS
- ᐅᓪᓗᖓᓂ ᐋᖅᑭᒋᐊᖅᑕᐅᔪᖅ: