ᑕᓪᓗᕈᑎᓄᑦ ᓅᑕᐅᓚᐅᖅᓯᒪᔪᓄᑦ ᒪᒥᐊᑕᐅᔾᔪᑎ

ᐃᓐᓇᐃᑦ, ᒪᒃᑯᒃᑐᑦ, ᓄᓇᖅᑲᑎᒌᓄᓪᓗ,

ᐊᑯᓂᒻᒪᕆᐊᓗᒃ ᑕᒪᓐᓇ ᑕᓪᓗᕈᑎ ᓯᓚᑖᓂᕐᒥᐅᓂ ᑐᓴᐅᒪᔭᐅᓚᐅᙱᑦᑐᑐᖄᓘᑎᓪᓗᒍ ᐃᓄᖕᓄᑦ ᐃᓂᒋᔭᐅᓯᒪᔪᑐᖄᓘᕗᖅ ᐊᓐᓇᐅᒪᕕᐅᓪᓗᓂᓗ ᓄᓇᖓ. ᑲᓇᑕᐅᑎᓪᓗᑕ, ᖃᐅᔨᒪᔭᕆᐊᖃᒻᒪᕆᒃᐸᕗᑦ ᑕᐅᓴᑏᑦ ᐊᕐᕌᒍᑦ ᐅᖓᑎᒻᒪᕆᐊᓄᒃ, ᐃᓄᐃᑦ ᐸᖅᑭᔨᐅᖏᓐᓇᖅᓯᒪᖕᒪᑕ ᐅᑭᐅᖅᑕᖅᑑᑉ ᐊᓐᓇᐅᒪᕕᖏᓐᓂᒃ, ᖃᐅᔨᒪᓕᑦᑎᐊᖅᖢᑎᒡᓗ ᐊᒃᓱᕈᓐᓇᖅᑑᓂᖓᓄᑦ ᐊᕙᑎᖓ. ᖃᐅᔨᒪᓂᕆᔭᓯ ᐊᔪᖏᓐᓂᕆᔭᓯᓗ ᐃᓐᓇᑦᑎᓐᓄ ᐃᓕᑕᐅᓯᒪᒻᒪᕆᒃᐳᖅ, ᐱᖅᑯᓯᑐᖃᕗᑦ ᐅᖃᐅᓯᕗᑦ ᖃᐅᔨᒪᔭᖅᑖᕆᔭᐅᔪᓪᓗ ᐱᒻᒪᕆᒋᔭᐅᓕᖅᖢᑎᒃ.

ᐅᓪᓗᒥ ᓇᖏᖃᑎᒋᕙᔅᓯ ᐃᒃᐱᒍᓱᑦᑎᐊᖅᖢᖓ ᒥᑭᒡᓕᑎᖅᓯᒪᓪᓗᖓᓗ ᖃᐅᔨᓪᓗᖓᓗ ᑲᑎᔾᔪᑎᐅᔪᖅ ᐱᒻᒪᕆᕐᔪᐊᖑᓂᖓᓂ. ᑭᒡᒐᖅᑐᐃᓪᓗᖓ ᑲᓇᑕᐅᑉ ᒐᕙᒪᒃᑯᖏᓐᓂᒃ, ᑕᒫᓂᑉᐳᖓ, ᓱᓕᓗᑕ ᒪᒥᐊᑦᑕᖅᑐᖅᓯᒪᕗᒍᑦ ᐃᓚᒌᓄᒃ ᐊᒃᑐᖅᑕᐅᔾᔪᐊᖅᓯᒪᖕᒪᑕ ᑕᓪᓗᕈᑎᓄᑦ ᓅᑕᐅᓚᐅᖅᓯᒪᑎᓪᓗᒋᑦ.

ᓅᑕᐅᓚᐅᖅᓯᒪᔪᑦ ᐃᓐᓇᕆᔭᐅᓕᖅᑐᓪᓗ ᑭᖑᕚᖏᓪᓗ, ᐅᓪᓗᒥ ᑕᒫᓃᖃᑎᒋᔭᕗᑦ - ᓴᐱᖏᓐᓂᓯ, ᐊᒃᓱᕈᕈᓐᓇᕐᓂᓯ, ᕿᓄᐃᓵᕈᓐᓇᕐᓂᔅᓯ, ᑭᒡᒐᖅᑐᐃᔨᖃᕐᓂᔅᓯᓐᓄᓪᓗ ᑐᓴᖅᑕᐅᖁᓪᓗᒍ ᑕᒫᓃᔾᔪᑎᒋᕙᕗᑦ, ᖃᐅᔨᒪᔪᒍᑦ ᓴᙱᔫᓂᔅᓯᓐᓂᒃ ᑭᓯᐊᓂ ᐊᕐᕌᒍᒐᓵᓗᐃᑦ ᐊᓂᒍᖅᓯᒪᓕᖅᑎᓪᓗᒋᑦ ᐅᓪᓗᒥᒧᑦ ᑎᑭᐅᑎᑕᐃᓐᓇᖅᐳᒍᑦ. ᑎᒍᒥᐊᖏᓐᓇᖅᑕᓯ ᐅᓐᓂᒃᑳᑦ ᓅᑕᐅᓚᐅᖅᓯᒪᓂᕐᒧᑦ, ᕿᓄᐃᓵᖅᓯᒪᓂᐊᓗᒃᓯᓗ ᑕᒪᓐᓇ ᐅᓂᒃᑳᒃᑯᑦ ᐆᒪᑎᑕᐅᖏᓐᓇᖅᖢᓂ ᐊᑐᖅᑕᐅᓯᒪᓪᓚᕆᖕᒪᑦ ᐳᐃᒍᕆᐊᖃᖏᒻᒪᕆᒃᐸᕗᑦ.

ᐃᓅᔪᓐᓃᖅᓯᒪᔪᑐᖃᐅᓕᖅᑐᓪᓗ ᐃᖅᑲᐅᒪᑦᑎᐊᕆᐊᖃᒻᒪᕆᒃᐸᕗᑦ, ᑕᓪᓗᕈᑎᓂᒃ ᐊᒃᓱᕈᕐᓇᖅᑐᕐᔪᐊᓂᒃ ᐊᓂᒍᐃᓯᒪᔪᑦ, ᐅᓪᓗᒥᒧᑦ ᐃᓚᐅᖃᑕᐅᖏᑦᑐᑦ ᑕᑯᓯᒪᖃᑕᐅᓪᓗᑎᒃ ᐃᓅᓯᖃᖃᑕᐅᓯᒪᓪᓗᑎᒡᓗ ᐅᓪᓗᒥ ᒪᒥᐊᓐᓂᖃᖅᑎᓪᓗᑕ ᐃᖅᑲᐅᒪᓪᓚᕆᒃᐸᕗᑦ, ᐃᓅᖃᑕᐅᓚᐅᖅᓯᒪᖕᒪᑕ, ᐊᒻᒪᓗ ᐅᓪᓗᒥᒧᑦ ᑎᑭᐅᑎᒻᒪᕆᒃᐳᖅ ᓱᓕ ᑕᒪᓐᓇ ᑭᖑᕚᑦᑎᓐᓄ ᐊᒃᓱᕈᕈᑕᐅᕗᑦ ᐋᓐᓂᐊᕈᑕᐅᖃᑦᑕᓚᐅᖅᓯᒪᔪᑦ ᓱᓕ ᐃᓚᖓᒍᑦ ᑎᒍᒥᐊᖅᑕᐅᖕᒪᑦ.

ᐅᓪᓗᒥ ᒪᒥᐊᔾᔪᑎᒋᔭᕗᑦ ᐃᖅᑯᓪᓕᕈᑎᒋᔭᕗᓪᓗ ᑐᓴᖅᑕᐅᒐᔭᓚᐅᖏᑦᑎᐊᖅᑐᑦ ᑭᒡᒐᖅᑐᐃᔨᖃᑦᑎᐊᓚᐅᖏᑉᐸᑕ ᐊᔭᐅᖅᑐᐃᔨᖃᓚᐅᖏᑉᐸᑕᓗ. ᐊᐃᓴᑭ ᓲᔪᖅ ᓚᐃᓴ ᖃᕙᕙᐅᕐᓗ ᓯᕗᓪᓕᖅᐹᒥ ᑐᓴᖅᑎᑦᑎᔭᕆᐅᓚᐅᖅᐴᒃ ᖃᓄᖅᑑᖅᑕᐅᖁᓪᓗᒋᑦ ᓅᑕᐅᓂᑯᕕᓃᑦ ᐃᓚᖏᓐᓄ 2010ᒥ, ᑕᒪᓐᓇ ᐊᒃᓱᕈᐊᕇᓐᓇᖅᖢᓂᔾᔪᒃ ᓱᓕᔪᑦᑯᑦ ᑐᓴᖅᑕᐅᖁᓪᓗᒋᑦ ᑭᙵᕐᒥᐅᑦ ᓅᑕᐅᓚᐅᖅᓯᒪᓂᖏᓐᓄᑦ. ᓱᓕᔪᒃᑰᕐᓂᖅ ᑭᒡᒐᖅᑐᖅᑕᐅᔭᕆᐊᖃᕐᓂᖏᓐᓄᓪᓗ ᑐᓴᐅᒪᔭᐅᓕᕐᓂᖓ ᒪᒥᐊᔾᔪᑎᒋᓕᖅᐸᕗᑦ, ᑕᐃᒪᐃᓐᓂᖓᓄᑦ , ᐅᖃᖅᐳᒍᑦ ᓱᓕᑦᑎᐊᖅᖢᑕ ᒪᒥᐊᓪᓚᕆᖕᓂᑦᑎᓐᓂᒃ, ᓱᓕᑦᑎᐊᖅᑐᒥᓪᓗ ᖁᔭᒋᓪᓗᑎᒍᑦ.

ᑲᓇᑕᐅᑉ ᒐᕙᒪᖓᑦ ᐅᒡᒍᐊᕈᑎᖃᒻᒪᕆᒃᐳᑦ ᓅᑎᑦᑎᓚᐅᖅᓯᒪᖕᒪᑕ ᐊᒃᓱᕈᕐᓇᖅᑐᒃᑰᖅᑎᑦᑎᓕᖅᖢᑎᒡᓗ ᐃᓕᔅᓯᓐᓂᒃ, ᑕᒪᓐᓇ ᐃᓕᓴᕆᕙᕗᑦ ᐃᖅᑯᓪᓕᕈᑎᒋᓕᖅᖢᑎᒍᓪᓗ ᐊᒃᓱᕈᕐᓇᖅᑐᕐᔪᐊᒃᑰᖅᑎᑦᑎᓯᒪᓂᕗᑦ ᐃᓚᒌᓯᓐᓄᑦ, ᓄᓇᖅᑲᑎᔅᓯᓐᓄᑦ, ᐃᓅᓯᕆᓚᐅᖅᓯᒪᔭᔅᓯᓐᓄᓪᓗ.

ᓄᓇᒋᓚᐅᖅᑕᓯ ᐃᓚᒋᓚᐅᖅᑕᓯᓗ ᕿᒪᒋᐊᖃᓕᖅᖢᓯᐅᒃ, ᐊᒃᓱᕈᕐᓇᖅᑐᒃᑰᕐᓂᕆᓯᒪᔭᓯᓗ, ᐃᓂᒋᙱᒻᒪᕆᒃᑕᔅᓯᓐᓄᑦ ᓅᑕᐅᑎᓪᓗᓯ ᐃᓚᒌᑦᑎᐊᕐᓂᓯ ᓯᖁᒥᑕᐅᓪᓗᓂ ᓄᓇ ᐱᔾᔪᐅᓪᓗᓂ, ᐸᖅᑭᔭᐅᑦᑎᐊᕐᓂᐊᕐᓂᕋᖅᑕᐅᓪᓗᓯ ᓱᓕᓐᓂᖏᖦᖢᓂᓗ, ᑕᒪᓐᓇ ᐊᒃᓱᕈᑦᑎᐊᖅᖢᑕ ᒪᒥᐊᔾᔪᑎᒋᕙᕗᑦ.

ᒪᒥᐊᓪᓚᕆᒃᐳᒍᑦ.

ᑲᓇᑕᐅᑉ ᒐᕙᒪᖓ ᓲᖑᔫᔾᔪᑎᖏᓐᓂᒃ ᐊᑐᖅᖢᑎᒃ ᐃᓄᖕᓂᒃ ᐅᑭᐅᖅᑕᖅᑐᒦᐅᑕᐅᖦᖤᐱᖕᒪᑕ ᐊᓯᐊᓄᑦ ᓅᑎᑦᑎᓕᕐᓂᖅᐳᑦ ᓄᓇᒋᖏᒻᒪᕆᒃᑕᖏᓐᓄᑦ ᐃᓱᒫᓘᑎᖃᖏᑦᑎᐊᖅᖢᑎᒃ ᖃᓄᐃᒃᑲᔭᕐᒪᖔᑕ ᓅᑕᐅᔪᒪᖕᒪᖔᑕᓘᓐᓃᑦ. ᓅᑕᐅᔪᒪᒐᔭᓚᐅᖏᑦᑐᒃᓴᐅᔪᑦ ᑐᓴᐅᒪᑎᑕᐅᑦᑎᐊᕐᓂᕈᑎᒃ ᐱᔾᔪᑎᐅᔪᒥᒃ. ᐃᑲᔪᖅᑕᐅᑦᑎᐊᕐᓂᐊᕐᓂᕋᖅᑕᐅᓯᒪᓂᖓ ᓱᓕᖏᑦᑎᐊᒻᒪᕆᖕᓂᖅᐳᖅ. ᓅᑕᐅᓯᒪᔪᑦ ᐃᓚᖏᑦ ᑕᑯᖃᑦᑕᐅᑎᒃᑲᓐᓂᓚᐅᖅᓯᒪᔪᓐᓃᖅᖢᑎᒃ ᓯᓚᐃᕐᕆᔾᔪᑎᐅᓪᓗᓂ ᐅᑭᐅᖅᑕᖅᑐᒥᒃ ᑲᓇᑕᙳᖅᑎᑦᑎᓇᓱᖕᓂᑯᒧᑦ. ᓅᑕᐅᓚᐅᖅᓯᒪᔪᑦ ᐃᓚᖏᓪᓗ ᓯᕗᓕᖅᓱᖅᑐᒥᒃ ᐋᓐᓂᐊᕈᑎᖃᐃᓐᓇᓕᖅᖢᑎᒃ, ᐅᓪᓗᒥᒧᔅᓱᓕ ᑕᒪᓐᓇ ᐃᒃᐱᒋᔭᐅᕗᖅ.

ᔫᓐ 1934ᒥ, ᑲᓇᑕᐅᑉ ᑲᓇᖕᓇᖓᓂ ᐅᑭᐅᖅᑕᖅᑐᖅ ᑲᒪᒋᔭᐅᔭᕆᐊᖃᕐᓂᖓᓂᒃ, ᐃᓚᒋᔭᐅᓪᓗᓂ ᑕᓪᓗᕈᑎᐅᑉ ᓄᓇᖓ ᓂᐅᕕᖅᑎᒃᑯᓐᓂ ᓂᐅᕕᕐᕕᒃᑖᕐᕕᐅᓇᓱᖕᓂᕋᓗᐊᕐᒪᑦ ᑲᓇᑕᒥ ᐅᑭᐅᖅᑕᖅᑐᒦᓛᖑᓗᓂ. ᐊᐅᔭᐅᓚᐅᖅᑎᓪᓗᒍ, ᑎᓴᒪᑦ ᐃᓚᒌᑦ ᑭᙵᕐᒥᐅᑕᑦ, 25ᓂᒃ ᕿᒻᒥᒡᒋᖅᖢᑎᒃ, ᓇᔅᑰᐱᒧᑦ ᐃᑭᑎᑕᐅᓕᕐᓂᖅᐳᖅ ᑕᓪᓗᕈᑎᓄᙵᐅᑎᑕᐅᓕᖅᖢᑎᒡᓗ. ᓄᓇᒥᖕᓂᒃ ᕿᒪᐃᓕᖅᖢᑎᒃ ᐅᖃᐅᔾᔭᐅᓯᒪᒐᒥᒃ ᐊᕐᕌᒎᒃ ᒪᕐᕉᒃ ᐊᓂᒍᖅᐸᑕ ᐅᑎᖅᑎᑕᐅᓛᕐᓂᐊᕐᓂᖏᓐᓂᒃ ᑭᙵᓄᑦ.

ᑕᓪᓗᕈᑎᓄᐊᖅᑎᓪᓗᒋᑦ, ᐊᒃᓱᕈᕐᓇᖅᑐᕐᔪᐊᒃᑰᓕᕐᓂᖅᐳᑦ ᖃᐅᔨᒪᙱᑖᓗᒋᖕᒪᔾᔪᒃ ᓯᓚᖓ, ᑭᓱᖃᐅᕐᓂᖓᓗ ᐊᓐᓇᖕᓂᐊᕋᓗᐊᕐᒪᖔᑕᓘᓐᓃᑦ ᖃᐅᔨᒪᔪᓐᓃᖅᖢᑎᒃ. ᓄᓇᖓ ᓲᖃᐃᒻᒪ ᖃᐅᔨᒪᔭᐅᖏᓐᓇᒥᔾᔪᒃ. ᐊᒃᓱᕈᕐᓇᖅᑐᒃᑰᖦᖤᕋᓗᐊᕆᕗᑦ ᐊᒃᓱᕈᒃᑲᓐᓂᕈᑎᖃᓕᖅᖢᑎᒃ ᐃᓅᑑᓕᕐᓂᖏᓐᓂᒃ ᖃᐅᔨᒪᙱᑖᓗᒋᓪᓗᓂᔾᔪᒃ ᓄᓇᑖᖓ. ᑭᙵᕐᒥᐅᑦ ᓅᑕᐅᓂᑯᕕᓃᑦ, ᐊᒃᓱᕈᕐᓇᖅᑐᕐᔪᐊᒃᑰᕋᓗᐊᖅᑎᓪᓗᒋᑦ ᕿᓄᐃᓵᖏᓐᓇᕐᓂᖅᐳᑦ ᐅᖃᐅᔾᔭᐅᓯᒪᒐᒥᒃ ᐅᑎᖅᑎᑕᐅᓛᕐᓂᐊᓂᕐᒥᖕᓂᒃ ᓄᓇᒥᖕᓄᑦ.

ᐅᒥᐊᕐᔪᐊᖅ ᓂᔅᑰᐱᒥᒃ ᐊᑎᓕᒃ ᑕᓪᓗᕈᑎᓄᑦ ᐅᑎᕐᒪᑦ ᓯᑎᐱᕆ 1936ᒥ, ᐃᓄᐃᑦ ᐊᓕᐊᓇᐃᒍᓱᓚᐅᖅᓯᒪᕗᑦ, ᐊᖏᕐᕋᒧᑦ ᐅᑎᖅᐸᓪᓕᐊᓛᓕᕐᓂᖏᓐᓂᒃ ᑕᐃᒪᓐᓇ ᐅᖃᐅᔾᔭᐅᓯᒪᒐᒥᒃ. ᑭᓯᐊᓂ, ᖃᐅᔨᓕᓚᐅᖅᓯᒪᒋᕗᑦ , ᑭᙵᓄᑦ ᐅᑎᑦᑎᑕᐅᔾᔮᖏᓐᓂᒥᖕᓂᒃ, ᓅᑕᐅᒃᑲᓐᓂᕐᓂᐊᓕᕐᒪᑕᒎᖅ - ᐃᒃᐱᐊᕐᔪᖕᒧᑦ ᕿᑭᖅᑖᓗᖕᒥ. ᐃᑲᔪᖅᑕᐅᔪᓐᓇᕐᓂᖅᓴᐅᖕᒪᑕᒎᖅ ᑕᐃᑯᖓ ᓅᑎᑕᐅᒍᑎᒃ, ᑭᓯᐊᓂ ᑕᐃᒪᐃᑦᑐᒪᖕᒪᖔᑕᓘᓐᓃᑦ ᐊᐱᕆᔭᐅᓇᑎᒃ ᐊᐃᑦᑖᕈᓱᕐᔪᐊᓚᐅᖅᑐᑦ ᐅᓗᕆᐊᓱᓕᒃᑲᓐᓂᖅᖢᑎᒡᓗ ᖃᐅᔨᒪᙱᑖᓗᖕᒥᓐᓄᑦ ᓄᓇᑖᖅᑎᑕᐅᓂᐊᓕᕐᒥᖕᒪᑕ.

ᐊᕐᕌᒍ ᐊᓂᒍᖅᑎᓪᓗᒍ ᐃᒃᐱᐊᕐᔪᖕᒧᑦ ᑎᑭᓚᐅᖅᓯᒪᕗᑦ, ᐋᒡᒌᓯ 1937ᒥ, ᐱᖓᓱᒃ ᐃᓚᒌᑦ ᑭᙵᕐᒥᐅᑕᑦ ᓅᑕᐅᒃᑲᓐᓂᓕᕐᓂᖅᐳᑦ, ᐃᑭᕋᓴᖕᒧᑦ ᓂᐅᕕᕐᕕᒃᑖᖅᑎᓪᓗᒍ. ᓅᑕᐅᖃᑦᑕᕐᓂᖏᑦ, ᑲᔪᓰᓐᓇᓚᐅᖅᐳᑦ, ᑭᖑᕚᖏᓐᓄᑦ ᐊᒃᓱᕈᕐᓇᖅᑐᒃᑰᕈᑕᐅᓕᖅᖢᓂ ᓄᑕᕋᖏᓐᓄᑦ, ᒪᒃᑯᒃᑐᓄᑦ ᐃᓚᒌᓄᓪᓗ. 1942ᒥ, ᓅᑕᐅᓂᑯᕕᓃᑦ ᐃᓚᖏᑦ ᑐᖁᖅᓯᒪᓕᖅᑎᓪᓗᒋᒃ. ᕿᒪᒃᑕᐅᓯᒪᔪᓪᓗ ᐊᖏᕐᕋᖅᓯᐸᒃᖢᑎᒃ ᐃᓄᑑᕐᔪᐊᓕᖅᖢᑎᒃ. ᓄᓇ ᐊᖑᓇᓱᒡᕖᓪᓗ ᐃᖃᓪᓕᐊᕐᕖᓪᓗ ᖃᐅᔨᒪᙱᑦᑖᓗᒋᔾᔪᓂᔾᔪᒃ, ᓄᓇᖓᓗ ᐊᑦᑕᕈᓱᔮᕐᓇᓂ. ᐊᓯᐅᔨᓯᒪᔪᐊᓘᖅᑰᔨᓕᓚᐅᖅᑐᑦ ᑭᓇᑐᐃᓐᓇᕐᒧᑦ ᑕᒪᓐᓇ ᑐᑭᓯᓇᖏᑦᑐᑦ ᐊᑐᖅᑕᐅᓚᐅᖅᓯᒪᖏᒻᒪᑦ. ᐃᓄᐃᑦ ᓱᖏᐅᑎᔭᕆᐊᖃᓕᓚᐅᖅᑐᑦ ᓄᓇᑖᕆᔭᕐᒥᖕᓄᑦ ᖃᐅᔨᓇᓱᒋᐊᖃᓕᖅᖢᑎᒃ ᖃᓄᐃᓕᖓᖕᒪᖔᑦ ᓄᓇᑖᕆᔭᖓ. ᐃᓅᓯᖏᓐᓄᑦ ᐊᒃᑑᑎᓂᖓ ᐃᓱᒪᖏᓐᓄᓪᓗ ᐊᒃᑑᑎᓂᖓ ᐊᖏᔪᒻᒪᕆᐊᓘᓚᐅᖅᐳᖅ, ᐃᓚᒌᑦ ᐃᓅᓯᑐᖃᕐᒥᓂᒃ ᐊᕗᑎᑎᑕᐅᓪᓗᑎᒃ.

ᑭᙵᕐᒥᐅᑦ ᐅᖃᖃᑦᑕᐃᓐᓇᓚᐅᖅᓯᒪᔫᒐᓗᐊᑦ ᐅᑎᖅᑎᑕᐅᔪᒪᓪᓗᑎᒃ ᓄᓇᖕᒥᓄᑦ ᑭᙵᓄᑦ. ᑭᓯᐊᓂ, ᐃᑭᕋᓴᖕᒥ ᓂᐅᕕᕐᕕᒃ ᒪᑐᓂᐊᕐᓂᕋᖅᑕᐅᑎᓪᓗᒍ ᑐᓴᖅᑎᑕᐅᓚᐅᖅᓯᒪᕗᑦ 1948ᒥ, ᑐᓴᖅᑎᑕᐅᓚᐅᖏᑦᑎᐊᖅᑐᑦ ᖃᓄᐃᓕᖓᔪᒪᖕᒪᖔᑕ, ᐅᖃᐅᑎᔭᐅᑐᐃᓐᓇᓚᐅᖅᑐᑦ ᐅᖃᐅᑎᔭᐅᓪᓗᑎᒡᓗ ᑕᓗᕐᔪᐊᓄᒃ ᐃᒃᐱᐊᕐᔪᖕᒧᓪᓘᓐᓃᑦ ᓅᑕᐅᔪᓐᓇᑐᐃᓐᓇᕐᒪᑕ ᐅᖃᖅᓯᒪᑦᑎᐊᕋᓗᐊᖅᖢᑎᒃ ᐊᖏᕐᕋᐅᔪᒪᓂᕐᒥᖕᓂᒃ ᐅᑎᑦᑎᑕᐅᓚᐅᒃᑲᓐᓂᕈᓐᓃᖅᖢᑎᒡᓗ.

ᖃᐅᔨᓇᖅᓯᔪᖅ ᐱᔾᔪᑎᖃᖅᑐᖃᓪᓚᕆᓚᐅᕐᓂᖓᓂᒃ ᓅᑕᐅᖐᓐᓇᕐᓂᖏᓐᓄᑦ: ᒐᕙᒪᒃᑯᑦ ᐅᑭᐅᖅᑕᖅᑐᒥᒃ ᑲᓇᑕᑖᕈᒪᓂᑯᒧᑦ ᐃᓱᒫᓗᑎᖃᕐᓂᖅᓴᐅᓚᐅᕐᒪᑕ, ᑮᓇᐅᔭᓕᐅᕈᑎᐅᔪᓐᓇᕐᓂᖓᓄᑦ ᒥᖅᑯᓕᖕᓄᑦ ᑕᐅᖅᓰᖃᑕᕐᓂᒃᑯᑦ. ᑐᑭᓯᓇᖅᓯᓪᓚᕆᒃᑐᖅ ᓲᖑᓂᖏᓐᓂᒃ ᒐᕙᒪᒃᑯᑦ ᐊᑐᖅᑕᐅᓪᓗᑎᐅᓚᐅᕐᒪᑕ ᐃᖅᑲᓇᐃᔭᖅᑎᖏᓪᓘᓐᓃᑦ ᑎᓕᐅᖅᑕᐅᓪᓗᑎᒃ ᒐᕙᒪᒃᑯᖏᓐᓂᒃ ᑐᓵᒻᒪᕆᒃᓗᑎᒃ ᓅᑎᑦᑎᔭᕆᐊᖃᕐᓂᖏᒥᖕᓂᒃ ᐱᕕᖃᖅᑎᑕᐅᖏᒃᑭᓪᓗᑎᒃ ᐃᓄᐃᓪᓗ ᓱᓕᔪᓂᒃ ᐅᖃᐅᑎᔭᐅᓚᐅᖏᒻᒪᑕ ᐊᖏᕈᑎᒋᓗᐊᓕᖅᑕᕕᓂᖏᑦ. ᒪᓕᑐᐃᓇᓕᓚᐅᖅᑐᑦ ᐅᖃᐅᑎᔭᐅᓯᒪᓚᐅᕐᒪᑕ ᐅᑎᖅᑎᑕᐅᓛᕐᓂᖏᓐᓄᑦ ᓄᓇᒥᖕᓄᑦ.

ᓅᑎᑕᐅᓃᑦ ᐊᒃᓱᕈᕐᓇᖅᑐᕐᔪᐊᒥᒃ ᐊᑐᖅᑎᑦᑎᓯᒪᖕᒪᑦ ᐃᓄᖕᓄᑦ. ᓅᑕᐃᓯᒪᔪᓪᓗ ᐃᓚᒌᑦ ᑐᓴᖅᑎᑦᑎᓚᐅᖅᓯᒪᓇᑎᒃ ᐊᒃᓱᕈᕐᓇᖅᑐᒃᑰᓚᐅᕐᒪᑕ ᑭᖑᕚᖏᓐᓄᓪᓗ ᐊᒃᓱᕈᕈᑕᐅᓕᖅᖢᑎᒃ. ᐃᓄᐃᑦ ᓄᑕᕋᐅᓂᕐᒥᖕᓂᒃ ᐃᓕᑉᐸᒃᑕᖏᑦ ᖃᐅᔨᒪᔭᑐᖃᕐᓂᒃ, ᐃᓕᑎᑕᐅᑦᑎᐊᖅᓯᒪᓪᓗᑎᒃ, ᑕᒪᓐᓇ ᓯᖁᒥᑕᐅᓚᐅᖅᐳᖅ. ᓄᓇᑐᖃᕆᖏᑕᖏᓐᓃᓕᖅᖢᑎᒃ, ᐃᓚᒌᑦ ᖃᐅᔨᒪᔭᑐᖃᖏᓐᓂᒃ ᐊᔪᕆᖅᓱᐃᔪᓇᐃᓪᓕᓪᓗᑎᒃ ᓄᑕᕋᖏᓐᓄᑦ ᐊᓯᖔᖓᓂᒃ ᖃᐅᔨᒪᔭᖅᑖᕆᐊᖃᓕᕐᒪᑕ ᖃᐅᔨᒪᙱᑕᖏᓐᓂᒃ. ᑖᒃᑯᐊ ᐊᑐᖅᑕᐅᓂᑯᑦ ᐊᓯᖏᓪᓗ, ᐊᒃᓱᕈᕐᓇᖅᑐᒃᑰᕈᑕᐅᓯᒪᕗᑦ, ᐃᓚᖏᑦ ᖁᕕᐊᓱᖃᑦᕈᓐᓃᖅᖢᑎᒃ ᐃᓱᒪᒥᓂᒡᓗ ᐊᒃᓱᕉᑎᖃᓕᖅᖢᑎᒃ. ᐅᒡᒍᓇᕋᓗᐊᖅᐳᖅ, ᐃᓄᐃᑦ ᐅᓄᖅᑐᑦ ᑐᖁᓵᓕᓯᒪᖕᒪᑕ ᐃᓱᒫᓗᖕᓂᕐᒧᑦ, ᐊᖏᕐᕋᖅᓯᕐᓂᕐᒧᑦ ᐊᒃᓱᕈᕈᑎᒥᖕᓂᒃ ᐊᓂᒍᐃᔪᓐᓇᐃᓪᓕᓪᓗᑎᒃ

ᓄᒃᑕᖅᑎᑕᐅᓂᖏᓐᓄᑦ, ᑭᓱᖃᖏᓐᓄᓪᓗ, ᐃᑲᔪᖅᑕᐅᖏᓐᓂᖏᑦ, ᓴᖅᑭᑦᑏᔪᓐᓇᕐᓇᑎᒡᓗ ᐅᐊᑲᓪᓚᖔ ᐊᒃᓱᕈᓐᓇᖅᑐᒃᑰᓚᐅᖅᐳᑦ ᑕᐃᑲᓂ ᐃᓅᓯᑐᐊᖏᓐᓂᐅᖏᑦᑐᖅ ᑭᓯᐊᓂᒃᑕᐅᖅ ᐃᓚᖏᓐᓄᑦ ᓄᓇᖅᑲᑎᖏᓐᓄᓪᓗ. ᑲᓇᑕ ᒪᒥᐊᑉᐳᖅ ᐱᓂᐊᕐᓂᕆᓚᐅᖅᑕᖏᓐᓂᒃ ᑲᔪᓯᑎᑦᑎᔪᓐᓇᓚᐅᖏᒻᒪᑕ. ᖃᐅᔨᒪᒐᓗᐊᖅᑐᒍᑦ ᑭᖑᕙᓗᐊᖅᖢᑕ ᒪᒥᐊᓐᓇᓱᒃᑲᑦᑕ ᐅᓄᑐᓪᓗ ᑐᖁᖓᓕᖅᖢᑎᒃ. ᐊᕐᕌᒍᑦ 80 ᐅᖓᑖᓂ, ᓄᓇᖅᑲᑎᓯ ᐊᒃᓱᕈᓐᓇᖅᑐᒃᑰᖅᓯᒪᕗᑦ ᐊᑐᖅᑎᑕᐅᓚᐅᖅᓯᒪᓂᖏᓐᓂᒃ ᒐᕙᒪᒃᑯᑦ ᐊᑐᖅᑎᑦᑎᓇᑎᒡᓗ ᐅᖃᐅᔾᔨᓇᑎᒃ ᑐᓴᖅᑎᑦᑎᓇᑎᒡᓗ, ᐊᖏᖅᑎᑦᑎᓇᑎᒡᓗ ᐃᓅᓯᕐᓕᐅᕈᑎᒋᓯᒪᕚ ᐃᓚᒌᑦᑎᐊᕐᓂᕐᒧᑦ ᐊᖏᕐᕋᖃᑦᑎᐊᖅᑎᑦᑎᓂᕐᒧᓪᓗ, ᐱᖅᑯᓯᑐᖃᖏᓐᓂᓪᓗ ᓴᒃᑯᐃᔭᕆᐊᖃᕐᓂᖏᓐᓄᑦ, ᐊᒃᓱᕈᓐᓇᕈᑏᑦ ᐃᓅᓯᕆᔭᐅᓕᖅᖢᑎᒃ ᑭᖑᕚᖏᓐᓄᑦ ᑎᑭᐅᑎᔪᒥᒃ. ᐃᓄᐃᑦ ᐱᔾᔪᑎᒋᓪᓗᒋᑦ ᐋᖅᑭᒃᑕᐅᓚᐅᖅᑐᑦ ᐃᓚᐅᑎᑕᐅᓇᑎᒃ ᖃᓄᖅᑑᕈᑕᐅᓯᒪᓪᓗᓂ.

ᐅᓪᓗᒥ ᑕᒫᓂᑉᐳᒍᑦ, ᐋᖅᑭᒃᓱᐃᓇᓱᖕᓂᕐᒨᖏᑦᑐᖅ, ᑭᓯᐊᓂ ᓱᓕᔪᓂᒃ ᑐᓴᖅᑎᑦᑎᔪᒪᔪᒍᑦ, ᐅᓂᒃᑳᓂᒡᓗ ᑐᓴᕈᒪᒧᑦ, ᐊᖏᕈᑎᒋᓗᒍᓗ ᐱᓂᕐᓗᒃᑕᐅᓚᐅᕋᔅᓯ. ᒪᒥᐊᑉᐳᒍᑦ ᐊᒃᓱᕈᖅᑎᑦᑎᓚᐅᕋᑦᑕ, ᒪᒥᐊᓇᖅ.

ᒪᒥᐊᖅᑲᒻᒥᐊᓗᓪᓗᐊᖅᑐᑦ, ᑕᒪᓐᓇ ᑭᓯᐊᓂ ᐊᖅᑯᓵᓕᑕᐃᓐᓇᕆᕙᕗᑦ ᒪᒥᓴᕐᓂᕐᒧᑦ ᐃᓱᒪᒋᔪᓐᓇᐃᖅᓯᔪᓐᓇᕐᓂᕐᒧᓪᓗ ᑐᕌᒐᖃᖔᓕᖅᖢᑕ. ᐃᓕᓴᖅᓯᔭᕆᐊᖃᖅᐳᒍᑦ ᑲᓇᑕᐅᑉ ᒐᕙᖓ ᐃᓄᐃᓪᓗ ᓄᓇᖏᓐᓄᑦ, ᑭᓱᑐᐃᓐᓇᖅ ᐅᖃᐅᔾᔨᖅᑳᓚᐅᕐᓗᓂ ᑭᓯᐊᓂ ᐱᔭᕆᐊᖃᕐᒪᑦ ᐊᖏᖅᑕᐅᓯᒪᓗᓂ ᐃᓄᖕᓄᑦ.

ᐱᓂᕐᓗᒃᑕᐅᓯᒪᒐᓗᐊᖅᑎᓪᓗᒋᑦ ᕿᓄᐃᓵᖏᓐᓇᕋᔅᓯ, ᓴᖏᓂᖅᓯᒍᑦ, ᐅᖃᐅᓯᖅᓯᒍᑦ ᓄᓇᒧᓪᓗ ᐊᒃᑐᐊᖓᓪᓚᕆᖕᓂᔅᓯᒍᑦ. ᓴᖏᔪᐊᓘᓂᓯ ᓴᖅᑭᓯᒪᕗᑦ ᓅᑕᐅᓯᒪᒐᓗᐊᖅᑎᓪᓗᓯ ᑕᑯᖅᑯᔾᔨᖕᒪᑦ ᑭᖑᕚᓯ ᓱᓕ ᐅᓪᓗᒥᒧᑦ ᐃᓅᖕᒪᑕ ᑕᒪᓐᓇᓗ ᐃᓅᓂᔅᓯᓂᒃ ᐃᓕᓴᕆᔪᑎᐅᓪᓗᓂ.

ᐅᓪᓗᒥ, ᖃᓄᐃᑕᐅᓯᒪᔪᑐᐊᓂᒃ ᑕᑯᖏᓐᓇᑦᑕ ᓯᕗᓂᒃᓴᒧᑦᑕᐅᖅ ᑕᑯᒋᕗᒍᑦ, ᓯᕗᓂᒃᓴᕗᑦ ᐃᓄᐃᒃ ᑭᓯᐊᓂ ᐱᓇᓱᐊᕐᓂᖏᓐᓄᑦ, ᓇᖕᒥᓂᖅᓱᕈᓐᓇᕐᓂᕐᒧᑦ ᓄᓇᓯᓗ ᓴᙱᓂᖏᓐᓄᑦ. ᖃᐅᔨᒪᓂᓯ, ᐃᓕᖅᑯᓯᓯ, ᓯᕗᓕᖅᑎᐅᓂᓯᓗ ᐅᑭᐅᖅᑕᖅᑐᒧᑦ ᐋᖅᑭᐅᒪᔾᔪᑎᐅᖕᒪ ᓴᙱᓗᓂ ᓯᕗᓂᒃᓴᓕᒫᒧᑦ. ᓯᕗᓕᓯ ᑭᒡᒐᖅᑐᕐᓗᒋᑦ ᓴᙱᔫᓚᐅᕐᓂᖏᑦ ᐊᐃᑦᑑᑎᒋᔭᕆᐊᓖᑦ ᒪᒃᑯᒃᑐᔅᓯᓐᓄᑦ, ᓯᓚᑐᓂᖏᓐᓄᓪᓗ ᓯᕗᓂᒃᓴᖃᑦᑎᐊᕐᓂᕐᒧᓪᓗ.

ᖁᔭᓐᓇᒥᕌᓗᒃ