ᐃᓱᒪᒋᔪᓐᓇᐃᑕᐅᒍᒪᓂᖅ ᓄᓇᕕᒻᒥ ᕿᖕᒦᑦ ᑐᖁᕋᕐᑕᐅᓯᒪᓂᖏᓐᓂᒃ.

ᐃᓄᑐᐃᓐᓀᑦ ᑌᒪᖕᖓᓂᐊᓗᒃ ᑕᒫᓂᑦ ᓄᓇᖃᕐᓯᒪᔪᑦ ᐃᓅᖃᑎᖃᓚᐅᕋᑎᒃ ᑎᑭᓚᐅᕐᑐᕕᓂᕐᓂᒃ ᑕᒪᐅᖕᖓ ᓄᓐᓇᕆᐊᕐᑐᑐᓂᑦ ᑲᓇᑕᐅᓂᕋᓕᕐᑕᑎᓐᓄᑦ. ᐱᒻᒪᕆᐅᕗᖅ ᐃᓕᑕᕐᓯᒪᒋᐊᖃᕐᓂᕗᑦ ᑲᓇᑕᐅᓗᑕ ᐊᕐᕌᒍᐃᑦ ᑕᐅᓴᓐᑏᑦ ᐊᓂᒍᕐᑐᓂᑦ ᐃᓄᑐᐃᓐᓀᑦ ᓯᕕᑐᔪᐊᓗᒻᒥᒃ ᐅᑭᐅᕐᑕᑐᒥ ᓄᓇᖃᕐᓯᒪᒻᒪᑕ ᐱᒍᓐᓇᓯᐊᕐᓱᑎᒃ ᐳᕿᐊᒋᔭᐅᒋᐊᓪᓚᕕᖃᖕᖏᑐᓂᒃ, ᑕᓯᐅᕐᑕᐅᓱᑎᒃ ᐃᓄᑐᙯᑦ ᓯᓚᑐᓂᖏᓐᓄᑦ, ᐃᓅᖃᑎᒌᑎᒍᑦ ᐃᓪᓕᕆᔭᖃᕐᓂᑯᑦ, ᕿᖕᒥᖏᓪᓗ ᐱᓇᓱᐊᒻᒪᕆᑦᓱᑎᒃ. ᖃᓪᓗᓈᑦ ᑎᑭᓚᐅᕐᑎᓇᒋᑦ, ᐃᓄᐃᑦ ᐃᓗᕐᖁᓯᖃᕐᓯᒪᕗᑦ ᑐᖕᖕᒐᕕᓕᕐᑐᓯᒪᑦᓯᐊᑐᒥᒃ, ᓇᒻᒥᓂᖅ ᐊᐅᓚᒍᓐᓇᓯᐊᕐᓱᑎᒃ, ᐃᓅᖃᑎᒌᑎᒍᓪᓗ ᐃᑲᔪᕐᑎᒌᑦᓯᐊᓱᑎᒃ, ᓱᖏᐅᑎᒍᓐᓇᓯᐊᕐᓱᑎᒃ ᓱᓇᑐᐃᓐᓇᓂᒃ, ᓲᓱᒋᔭᖃᑦᓯᐊᓱᑎᓗ ᐊᕙᑎᒥᓂᒃ ᓄᓇᒥ, ᐃᒪᕐᒥ, ᐆᒪᔪᓂᓪᓗ. ᑕᒪᒃᑯᐊ ᓄᐃᑕᑦᓯᐊᑐᑦ ᐃᓄᐃᑦ ᓇᒻᒥᓂᖅ ᐱᖁᔭᖃᕐᓯᒪᓂᖏᓐᓂᑦ, ᖃᐅᔨᒪᐅᓯᖏᓐᓂᑦ, ᐃᓗᕐᖁᓯᖓᓂᑦ ᐃᓪᓕᕆᔭᖏᓐᓂᓗ.

ᐅᓪᓗᒥ ᑎᑭᓯᒪᕗᖓ ᑭᒡᒐᑐᕐᓱᒋᑦ ᑲᓇᑕᒥᐅᓕᒫᑦ ᐊᒻᒪᓗ ᑲᓇᑕᐅᑉ ᑲᕙᒪᖓ ᐃᓱᒪᒋᔪᓐᓀᕕᐅᒍᒪᓕᕋᑦᑕ ᐱᓂᐊᕐᓂᖃᕐᓯᒪᓂᑦᑎᓄᑦ ᓄᓇᕕᒻᒥᐅᑦ ᕿᖕᒥᖏᓐᓂᑦ ᑐᖁᕃᓂᐅᓯᒪᔪᓄᑦ 1950 ᐊᒻᒪᓗ 1960 ᐊᕐᕌᒍᖏᓐᓂᑦ. ᐱᒻᒪᕆᖁᑎᒋᕙᕋ ᑕᒫᓂᒋᐊᒥᒃ ᑲᖏᕐᓱᔪᐊᒥ. ᓄᓇᕕᒻᒥ, ᐃᓛᓂᐅᖕᖏᑐᓂᕐᒥ, ᐃᓕᑦᓯᓄᑦ ᐃᓚᐅᓗᖓ ᐃᓚᖓᓂᒃ ᕿᖕᒦᔭᕐᑕᐅᔪᕕᓂᕐᓂᑦ ᓄᓇᓕᖓᓂ. ᕿᖕᒦᑦ ᓄᓇᕕᓕᒫᒥ ᑐᖁᕋᕐᑕᐅᓚᐅᕐᓯᒪᔪᑦ, ᑕᒪᓐᓇ ᑐᖁᕃᓂᐅᓯᒪᔪᖅ ᐃᓄᓐᓄᑦ ᐊᒥᓱᓄᑦ ᐋᓐᓂᓇᕐᑐᔪᐊᖑᓯᒪᔪᖅ ᓯᖁᒥᑦᓯᓱᓂᓗ ᐃᓄᐃᑦ ᐱᐅᓯᖏᓐᓂᑦ. ᑌᒣᓯᒪᔪᒧᑦ, ᐅᖃᐅᓯᕐᓂᒃ ᓂᐳᕈᑎᑦᓴᖃᕐᑑᔮᖕᖏᑐᕐᓘᓃᑦ ᑭᑦᓴᓇᕐᑑᓯᒪᓂᖓᓄᑦ ᐅᒡᒍᐊᕈᑎᖃᕋᑦᑕ. ᐱᓂᐊᕐᓂᖃᕐᓯᒪᓂᖏᑦ ᑌᒃᑯᐊᓗ ᓴᐳᒻᒥᒋᐊᓚᐅᕐᓂᖏᑦᑐᑦ ᕿᖕᒦᑦ ᑐᖁᕋᕐᑕᐅᓕᕐᒪᑕ ᐃᓄᓐᓂᑦ ᐋᓐᓂᓯᒪᕐᔪᐊᑐᑦ ᐃᑎᔪᐊᓗᒻᒥᒃ ᐊᑦᓱᕈᕐᓇᑐᒃᑰᑎᑦᓯᓱᑎᓪᓗ ᐃᓄᓐᓂᑦ ᐃᓚᖏᓐᓂᓗ ᐊᑑᑎᒋᐊᑐᕐᓂᖏᑦᑕᖏᓐᓂᑦ ᐊᑑᑐᑎᑦᓯᓱᑎᒃ.

ᐃᓄᑐᖃᕐᓂᑦ ᑐᓴᕐᕕᖃᕐᖃᐅᕗᖓ ᕿᖕᒦᑦ ᑐᖁᕋᕐᑕᐅᓂᕕᓂᖏᓐᓂᑦ ᑕᒫᓂ ᓄᓇᓕᒻᒥᑦ. ᕿᖕᒦᑦ ᖁᑭᐊᔭᐅᓚᐅᑲᑦᓱᑎᒃ, ᑲᑎᕐᓱᑕᐅᑦᓱᑎᒃ ᑐᕙᕐᒥ ᐃᑯᐊᓪᓚᑕᐅᓚᐅᕐᑐᕕᓃᑦ ᕿᒧᑦᓯᓖᑦ ᑕᑯᓐᓇᑎᓪᓗᒋᑦ ᕿᖕᒦᓗ ᐃᑯᐊᓪᓚᑕᐅᒪᔪᑦ ᐃᐱᕃᓐᓇᑕᐅᓯᒻᒥᓱᑎᒃ ᐅᑭᐅᓕᒫᒥᑦ ᑐᕙᕐᒦᓂᐊᓕᕐᓱᑎᒃ ᑕᑯᓐᓇᓂᕐᓗᓯᒪᓂᕐᒥᒃ ᐃᕐᙯᑎᑦᓯᒍᑎᐅᓂᐊᓕᕐᓱᑎᒃ ᐱᐅᖕᖏᑐᕐᔪᐊᑯᑦ ᖁᐊᕐᓵᓇᕐᑐᐊᓗᒃᑯᓗ ᕿᖕᒦᔭᕐᑕᐅᓯᒪᓂᕐᒥᒃ. ᑐᑭᓯᒪᓇᖕᖏᑐᐊᓗᒃ ᑕᒪᓐᓇ ᓱᒐᒥ ᐱᓂᐊᕐᓂᖃᕈᑎᐅᓚᐅᕐᓂᒪᖔᑦ ᓂᑲᒍᓱᓐᓂᖃᖕᖏᑐᓄᑦ ᐊᑑᑎᔭᐅᓚᐅᕐᑐᕕᓂᖅ. ᑎᑭᓯᒪᕗᒍᑦ ᐅᓪᓗᒥ ᓇᓗᓀᕐᓯᒋᐊᕐᑐᓱᑕ ᐱᑦᓯᐊᑕᐅᓯᒪᖕᖏᓂᖏᓐᓂᑦ ᐃᓄᐃᑦ ᑭᓯᐊᓂᓗ ᐃᓅᖃᑎᖃᕆᐊᓪᓚᕈᒪᓂᕐᒥᒃ ᓭᒪᖃᑎᒌᓪᓗᑕ, ᐊᖕᖏᐊᖏᔭᖃᑎᒌᓪᓗᑕ ᒪᒥᓴᖃᑎᒌᓪᓗᑕ, ᐃᓄᐃᑐᐃᓐᓀᑦ ᐃᓅᓯᖏᑦ ᐃᓗᕐᖁᓯᖓᓗ ᓴᐳᒻᒥᔭᐅᓂᖃᑦᓯᐊᕆᐊᖃᕐᒪᑦ.

ᕿᖕᒦᔭᕐᑕᐅᓂᐅᑉ ᑭᖑᓂᖓᒍᑦ, ᖃᑦᓰᓈᐲᑦ ᕿᖕᒦᑦ ᐊᒥᐊᒃᑰᓚᐅᕐᑐᕕᓃᑦ ᓄᓇᕕᒻᒥ, ᐊᒥᓱᐃᓪᓗ ᓄᓇᓖᑦ ᕿᖕᒥᖃᕈᓐᓀᓱᑎᒃ. ᕿᖕᒦᑦ ᐱᒻᒪᕆᐊᓘᓯᒪᔪᑦ ᐊᑐᕐᓂᖃᒻᒪᕆᑦᓱᑎᒃ ᐃᓄᐃᑦ ᐃᓗᕐᖁᓯᖓᓂᑦ ᐃᓅᓯᖏᓐᓂᓗ, ᐊᖑᓇᓱᑦᑎᓂᑦ ᓂᕿᑦᓴᓯᐅᕐᑎᓯᔨᐅᑦᓱᑎᒃ ᐃᓚᖏᓐᓄᑦ ᓄᓇᕐᖃᑎᖏᓐᓄᓗ, ᐃᖏᕐᕋᕈᑎᐅᑦᓱᑎᒃ ᓄᓇᒥ ᓯᑯᒥᓪᓗ, ᐃᓕᒪᓇᕐᑐᒦᑦᑎᓯᑦᑌᓕᔨᐅᑦᓱᑎᒃ ᓴᐳᒻᒥᔨᐅᑦᓱᑎᓗ ᐃᓄᓐᓂᑦ. ᕿᖕᒦᑦ ᑐᖁᑕᐅᒻᒪᑕ, ᐃᓄᐃᑦ ᑕᒐᑦᓭᓇᖅ ᓄᓇᓕᖕᖑᑎᑕᐅᓯᒪᔪᑦ, ᐃᓄᑐᐃᓐᓀᑦ ᐃᓗᕐᖁᓯᕆᖕᖏᑕᖓᓂᑦ ᐊᑐᕐᑎᑕᐅᓯᑦᓱᑎᒃ ᓴᒃᑯᐃᑎᑕᐅᔪᕐᑎᑐᑦ ᐱᕐᖁᓯᕐᒥᓂᒃ ᐱᑐᑦᓯᒪᓂᕐᒥᓂᒃ ᐆᒪᔪᓄᑦ, ᓄᓇᒧᑦ, ᐃᒪᕐᒧᓗ, ᐱᕐᖁᓯᖏᑦ ᑌᒫᖕᖓᓂᐊᓗᒃ ᑭᖑᕚᕇᑎᒍᑦ ᐃᓕᓐᓂᐊᑎᑦᓯᒍᑎᐅᖃᑦᑕᑐᕕᓃᑦ. ᑕᒪᓐᓇ ᐋᓐᓂᓇᕐᑐᔪᐊᖑᓯᒪᔪᖅ ᖁᐊᕐᓵᓇᕐᑐᐊᓘᑦᓱᓂᓗ, ᐃᓄᐃᑦ ᐃᓅᒐᓱᐊᕈᑎᑐᐊᒥᓂᑦ ᐊᓯᐅᔨᑎᑕᐅᓯᒪᒻᒪᑕ, ᐊᓯᑦᔨᑕᐅᓪᓚᕆᑦᓱᓂ ᐃᓅᓯᖓ ᐃᓗᕐᖁᓯᖓᓗ, ᐅᓪᓗᒥᒧᑦ ᑕᒪᒃᑯᐊᕌᓗᐃᑦ ᐱᓂᐊᕐᓂᓗᑲᕕᓂᐊᓗᐃᑦ ᐃᑉᐱᓂᐊᖑᖏᓐᓇᑐᑦ.

ᐃᓄᑐᙯᑦ ᐅᖃᐅᓯᕆᖃᑦᑕᑕᖏᑦ, ᐃᓅᓱᑦᑐᐃᑦ, ᓄᓇᕐᖃᑎᒌᑦ, ᓯᕗᓕᕐᑏᓗ, ᑐᓴᖃᑦᑕᑫᓐᓇᖁᖓ ᖃᓄᑎᒋᐊᓗᕐᒃ ᐃᑎᔪᐊᓗᒻᒥᒃ ᐋᓐᓂᓇᕐᓯᒪᓂᖓᓂᑦ ᕿᖕᒦᔭᕐᑕᐅᓂᐅᓯᒪᔪᖅ ᐅᓪᓗᒥᒧᑦ ᑎᑭᑦᓱᒍ ᐃᑉᐱᓇᕐᒪᑕ ᓄᓇᓕᓐᓂ. ᐃᓚᒌᑦ ᕿᖕᒦᔭᕐᑕᐅᔪᕕᓃᑦ ᐅᓪᓗᒥᒧᑦ ᐋᓐᓂᓇᕐᓯᒪᓂᖓᓄᑦ ᐊᑦᑐᐊᔭᐅᒍᑎᒋᖏᓐᓇᑕᖓ. ᐊᖏᔪᐊᓗᒻᒥᑦ ᐋᓐᓂᓇᕐᓯᒪᓂᖓ ᖁᐊᕐᓵᓇᕐᑑᓯᒪᓂᖓᓗ ᑭᖑᕚᕇᑎᒍᑦ ᐅᓪᓗᒥᒧᑦ ᐃᖏᕐᕋᖏᓐᓇᑐᖅ ᓱᕐᕃᓂᕐᓗᓯᒪᑦᓱᓪᓂᓗ ᓄᓇᕕᒻᒥᐅᑦ ᐃᓱᒪᒃᑯᑦ ᖃᓄᐃᖕᖏᓯᐊᕆᐊᖃᕐᓂᖏᓐᓂᑦ.

ᑲᕙᒪᑐᖃᒃᑯᑦ ᓵᑕᑦᓴᐅᓂᕋᕈᓐᓇᑐᑦ ᕿᖕᒦᔭᕐᑕᐅᑎᑦᓯᓯᒪᓂᕐᒥᓂᒃ. ᕿᖕᒦᔦᓂᖅ ᐱᒋᐊᕐᒪᑦ 1950 ᐊᕐᕌᒍᖏᓐᓂᑦ, ᕿᖕᒦᑦ ᑐᖁᕋᕐᑕᐅᓯᒪᔪᑦ ᑲᕙᒪᑐᖃᒃᑯᑦ ᐊᐅᓚᑦᓯᑎᓪᓗᒋᑦ, ᑲᕙᒪᑐᖃᒃᑯᑦ ᐱᓇᓱᑦᑎᖏᑦ ᖃᐅᔨᒪᑦᓯᐊᓱᑎᒃ ᕿᖕᒦᑦ ᐃᓄᓐᓄᑦ ᐊᑐᕐᓂᖃᓪᓚᕆᒋᐊᖏᑦ ᐊᐅᓚᒍᑎᑐᐊᕆᑦᓱᒋᑦ ᐆᒪᔪᕐᓯᐅᕈᑎᒋᑐᐊᕆᑦᓱᒋᓪᓗ. ᐃᓄᐃᑦ ᓄᓇᓕᖏᓐᓂᑦ 1950 ᐊᕐᕌᒍᖏᓐᓂᑦ, ᐳᑭᕐᑕᓖᑦ ᐳᓖᓰᑦ ᐊᑐᕐᑕᐅᓯᒪᔪᑦ ᑲᕙᒪᑐᖃᒃᑯᑦ ᒪᓕᒐᖏᓐᓂᑦ ᐊᑐᓕᕐᑎᓯᔨᐅᑎᑕᐅᑦᓱᑎᒃ ᐃᓄᐃᑦ ᐃᓗᕐᖁᓯᖓᓂᑦ ᓱᕐᕃᓂᕐᓗᓱᑎᒃ ᓱᒋᐊᓪᓚᕖᕈᑦᓱᒋᑦ ᐱᐅᓯᑦᓴᔭᕆᖕᖏᑕᖏᓐᓂᑦ ᐊᑐᕐᑎᓯᑦᓱᒋᑦ. 1950 ᐊᒻᒪᓗ 1960 ᐊᕐᕌᒍᖏᓐᓂᑦ, ᑲᕙᒪᑐᖃᒃᑯᑦ ᐱᓇᓱᑦᑎᖏᑦ ᖃᐅᔨᒪᑦᓯᐊᓯᒪᔪᑦ ᕿᖕᒦᑦ ᑐᖁᕋᕐᑕᐅᓕᕐᑎᓗᒋᑦ ᑐᖁᕃᓂᕐᒥᓗ ᓄᕐᖃᖓᑎᑦᓯᒐᓱᐊᕐᓯᒪᒐᑎᒃ, ᖃᐅᔨᒪᑦᓯᐊᓱᑎᒃ ᐃᓄᐃᑦ ᐱᕐᖁᓯᖏᑦ ᐃᓅᓯᖏᓪᓗ, ᖃᓄᐃᖕᖏᓯᐊᕐᓂᖏᑦ, ᐊᓐᓇᐅᒪᒍᓐᓇᓂᖏᓪᓗ ᑕᑎᖃᓪᓚᕆᑦᓯᒪᒋᐊᖏᑦ ᕿᖕᒥᓂᑦ.

ᑌᒃᑯᐊ ᓴᐳᒻᒥᔨᐅᒋᐊᕐᑐᓚᐅᕐᑐᕕᓃᑦ ᓄᓇᕐᖃᑎᖃᕐᓗᑎᓗ ᐃᓄᓐᓂᑦ ᐊᖏᔪᐊᓗᒻᒥᒃ ᐱᓗᑲᓐᓂᓯᒪᔪᑦ ᓄᓇᓕᑦᓯᓂ. ᓄᐃᑦᓯᓚᕿᓯᒪᔪᖅ ᑲᕙᒪᑐᖃᒃᑯᓂᑦ ᐅᑉᐱᕆᔭᖃᕈᒪᖕᖏᓂᕐᒥᒃ, ᐳᓖᓰᑦ ᐃᓚᒋᔭᐅᑎᓪᓗᒋᑦ. ᐋᓐᓂᓇᕐᑐᒋᐊᓪᓓᑦ ᑲᕙᒪᑐᑯᖃᒃᑯᓄᑦ ᓄᐃᑕᐅᓯᒪᒻᒥᔪᑦ ᓇᓗᓀᕐᓯᓯᒪᖕᖏᒪᑦ ᑐᖁᕃᓂᕐᒥᒃ ᐊᑑᑎᑎᑦᓯᓯᒪᓂᕐᒥᓂᒃ ᐊᐅᓚᑦᓯᑎᓪᓗᒍ ᑲᓇᑕᐅᑉ ᑲᕙᒪᖓ, ᐃᓚᖃᕐᓱᓂ 2006-ᒥᑦ ᐳᑭᕐᑕᓕᒃᑯᑦ ᐳᓖᓯᒃᑯᑦ ᓴᕐᕿᓯᒪᔭᖓ ᑐᓴᕐᑎᓯᒍᑎᒃ ᓄᓇᓕᓐᓄᑦ ᐋᓐᓂᓇᕆᐊᓪᓚᓯᒪᒻᒪᑦ. ᐳᑭᕐᑕᓖᑦ ᐳᓖᓰᑦ ᓄᓇᓕᓯᓐᓅᖃᑎᒋᓯᒪᔭᕗᑦ ᓄᐃᑕᑎᑦᓯᒍᒪᒐᒥᒃ ᐊᖏᖃᑎᖃᕐᓂᒥᓂᒃ ᐃᓱᒪᒋᔪᓐᓀᕕᐅᒍᒪᓂᑦᑎᓂᑦ, ᑐᓂᓯᒪᓂᐊᕐᓂᒥᓂᓪᓗ ᐅᑉᐱᕆᔭᐅᑦᓯᐊᓗᑎᒃ ᑕᑎᒋᔭᐅᒍᓐᓇᓂᕐᒥᒃ, ᓭᒻᒪᖃᑎᒌᒍᒪᓂᕐᒥᒃ ᐃᓅᖃᑎᖃᕈᒪᓂᕐᒥᓂᓪᓗ ᐃᓄᓐᓂᑦ.

ᑕᒪᓐᓇ ᐃᓱᒪᒋᔪᓐᓀᕕᐅᒍᒪᓂᖅ ᓯᕗᓪᓕᐸᐅᔪᖅ ᐊᐅᓚᑦᔭᕆᐊᕈᑎᖃᕐᓂᖓᓄᑦ ᑲᓇᑕᐅᑉ ᑲᕙᒪᖓᑕ. ᓭᒻᒪᖃᑎᖃᕈᒪᓂᕐᒧᑦ ᐱᓇᓱᐊᖃᑎᖃᕈᒪᓂᕐᒧᓗ ᐃᓕᑦᓯᓂᑦ.

ᑕᒪᓐᓇ ᐃᓱᒪᒋᔪᓐᓀᕕᐅᒍᒪᓂᖅ ᐊᑑᑎᒋᐊᖃᕐᓯᒪᔪᑐᖄᓗᑦ ᑌᑦᓱᒪᓂᐊᓗᓱᓕ. 1999 ᐱᒋᐊᕐᓱᒍ, ᐃᓄᐃᑦ ᓯᕗᓕᕐᑎᖏᑦᒃ, ᐱᓗᐊᕐᑐᒥ ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ, ᐃᓱᒪᒋᔪᓐᓀᕕᐅᒍᒪᕗᒎᕐᒥᒃ ᐊᑑᑎᔭᐅᑎᑦᓯᖁᔨᓲᖅ. ᑲᓇᑕᐅᑉ ᐊᑯᓂᐊᓗᒃ ᐊᕐᕌᒍᓂᑦ ᐊᒥᓱᒐᓴᕐᔪᐊᓂ ᐊᐅᓚᑦᔭᓇᓵᕆᐊᑐᕐᓂᖏᑦᑑᒐᓗᐊᖅ ᐃᓱᒪᒋᔪᓐᓀᕕᐅᒍᒪᓂᕐᒥᒃ ᓄᓇᕕᒻᒥᐅᑦ ᐃᓄᖏᓐᓄᑦ ᑲᓇᑕᐅᑉ ᑲᕙᒪᖓᑕ ᐱᑦᓯᐊᓯᒪᖕᖏᓂᖏᓐᓄᑦ ᕿᖕᒦᔦᓂᕐᒥᒃ ᕿᒧᑦᓯᕈᑎᓂᒃ, ᐱᐅᓯᖃᕐᕕᖃᕐᓱᑎᒃ ᐃᓅᖃᑎᖃᕐᓂᑯᑦ ᐊᑭᕋᕐᑐᓂᕐᒥᒃ. ᐃᓱᒪᒋᔪᓐᓀᕕᐅᒋᐊᓪᓚᕈᒪᕗᒍᑦ ᐊᑯᓂᐅᓗᐊᕐᑐᖅ ᐊᐅᓚᑦᔭᓇᓵᕐᓯᒪᒐᑦᑕ, ᑌᒃᑯᐊᓗ ᕿᖕᒦᔭᕐᑕᐅᓯᒪᔪᑦ ᐊᒥᓱᐃᑎᒍᑦ ᐃᓅᒍᓐᓀᓯᒪᓕᕐᑐᑦ ᐃᓱᒪᒋᔪᓐᓀᕕᐅᒍᒪᓂᕐᒥᒃ ᙯᓯᒪᕐᖃᔭᕋᑎᒃ. ᐃᕐᖃᐅᒪᒋᕙᕗᑦ ᐊᒻᒪᓗ ᓯᕗᓕᕐᓯᒪᓂᖏᑦ ᐊᔪᐃᓐᓇᕈᑎᖃᕐᓱᑎᒃ ᐃᓄᐃᑦ ᐃᓱᒪᒋᔪᓐᓀᕕᐅᒍᒪᕗᒍᑦ ᓚᕕᐅᒋᐊᕐᑐᕆᐊᖃᕐᓂᖏᓐᓂᑦ ᐃᓄᐃᓪᓗ ᓄᓇᖓᓂᑦ ᓴᐳᒻᒥᔨᐅᓯᒪᒻᒪᑕ.

ᑌᒃᑯᐊ ᐱᓂᐊᕐᓂᐅᓯᒪᔪᑦ ᑐᓄᐃᓐᓀᑐᐃᓐᓇᓂᐅᓯᒪᔪᐃᓪᓗ ᑐᖁᕃᓂᖃᕐᑎᓗᒍ ᓇᓪᓕᐊᒍᓪᓘᓃᑦ ᐃᓂᖃᕐᑐᓴᐅᖕᖏᓚᑦ ᑲᓇᑕᐅᑉ ᑲᕙᒪᖓᑕ ᐱᓇᓱᐊᖃᑎᖃᕆᐊᖃᕐᓂᖓᓂᑦ ᐃᓄᓐᓂᑦ. ᐃᓄᐃᑦ ᑲᓇᑕᐅᓪᓗ ᑲᕙᒪᖓᑕ ᐱᓇᓱᐊᖃᑎᒌᓐᓂᖏᑦ ᑐᖕᖓᕕᖃᕆᐊᖃᕐᖁᑦ ᐊᑦᔨᒌᑦᑎᓯᓂᕐᒥᒃ, ᓲᓱᒋᔭᖃᕐᓂᒥᒃ, ᑐᑭᓯᒪᒐᓱᐊᕐᓂᒥᒃ, ᐅᑉᐱᕆᔭᖃᕈᓐᓇᓂᕐᒥᒃ ᐊᒻᒪᓗ ᓴᐳᒻᒥᔭᐅᒋᐊᖃᕐᓂᖓᓂᑦ ᓇᒻᒥᓂᖅ ᐊᐅᓚᒍᒪᓂᖏᑦᑕ ᐃᓄᐃᑦ ᑕᒪᓐᓇᓗ ᑐᓂᒪᒍᑎᒋᓂᐊᕐᓱᒍ ᐱᓇᓱᐊᖃᑎᕐᓂᖅ ᐃᓄᓐᓂᑦ ᑕᒪᓐᓇ ᐱᓪᓗᒍ, ᑐᕌᕐᓂᕆᑦᓭᓇᕐᓗᒍ ᐱᐅᓂᕐᓴᒥᒃ ᓯᕗᓂᑦᓴᓕᐅᖃᑎᒌᓐᓂᖅ.

ᑲᓇᑕᐅᑉ ᑲᕙᒪᖓᓂᑦ ᑲᓇᑕᒥᐅᓕᒫᓂᓪᓗ ᐱᒍᑦᔨᓗᖓ, ᐃᓱᒪᒋᔪᓐᓀᑕᐅᒍᒪᕗᖓ. ᐃᓱᒪᒋᔪᓐᓀᑕᐅᒍᒪᕗᒍᑦ.

ᐅᒡᒍᐊᐳᖓ ᑲᕙᒪᐅᑉ ᐱᓂᐊᕐᓂᕆᓯᒪᔭᖏᓐᓄᑦ ᑐᓄᑐᐃᓐᓇᓂᕆᓯᒪᔭᖏᓐᓄᓗ ᕿᖕᒦᔦᑦᓱᑎᒃ ᐊᕐᕌᒍᓄᓪᓗ ᐊᒥᓱᓄᑦ ᐊᑑᑎᑎᑦᓯᓱᑎᒃ. ᑲᓇᑕ ᐃᓱᒪᒋᔪᓐᓀᑕᐅᒍᒪᕗᖅ ᐋᓐᓂᓇᕐᑐᓂᒃ ᓯᖁᒥᑦᓯᓯᒪᒻᒪᑕ ᕿᖕᒦᔦᑦᓱᑎᒃ ᓄᓇᓕᓯ ᑭᖑᕚᕇᓪᓗ ᓱᕐᕋᑕᐅᒍᑎᒋᓚᕿᓯᒪᒻᒪᐅᒃ.

ᐃᓂᒐ ᐊᑐᕐᓱᒍ, ᐱᕕᖃᕈᓐᓇᓯᖃᑦᑕᖁᖓ ᑲᑎᓯᓂᕐᒥᒃ ᐅᖄᕕᐅᓂᕐᒥᓗ ᐃᓄᐃᑦ ᓯᕗᓕᕐᑎᖏᓐᓄᑦ ᐃᓄᑐᖃᕐᓄᓗ ᐅᖄᖃᑦᑕᒪᑕ ᐅᕙᓐᓄᑦ ᓴᐱᓕᕐᑌᑑᒋᐊᖏᑦ, ᑲᑦᓱᙰᑦᑑᒋᐊᖏᑦ, ᐊᒻᒪᓗ ᐋᓐᓂᓇᕐᑐᔪᐊᕌᓗᒃᑰᒐᓗᐊᕋᒥᒃ ᑲᔪᓯᒍᓐᓇᓯᒪᒻᒪᑕ ᐃᓅᓯᕐᒥᒃ ᓄᓇᒥᓂ. ᓲᖑᔫᓂᓯ ᐱᑦᔪᑎᐅᑎᓪᓗᒍ, ᐃᓄᐃᑦ ᐅᖃᐅᓰᕐᓯᓯᒪᖕᖏᑐᑦ, ᐃᓗᕐᖁᓯᕐᒥᓂᒃ ᑭᓇᐅᓂᕐᒥᓗ ᐊᓯᐅᔨᓯᒪᖕᖏᑐᑦ. ᐆᒪᔪᕐᓯᐅᓃᑦ ᓄᓇᒧᓪᓗ ᐱᑐᑦᓯᒪᓂᓯ ᐅᓪᓗᒥᒧᑦ ᐃᓅᓯᕆᖏᓐᓇᑕᓯ. ᓄᓇᒦᓐᓂᖅ ᐆᒪᔪᓄᓪᓗ ᐱᑐᑦᓯᒪᓂᖅ ᐅᓪᓗᒥᒧᑦ ᐃᓄᐃᑦ ᑭᓇᐅᓂᖏᓐᓂᑦ ᓲᖑᔫᑎᑦᓯᖏᓐᓇᑐᖅ. ᕿᖕᒦᔭᕐᑕᐅᓂᐅᑉ ᑭᖑᓂᖓᒍᑦ, ᐃᓄᐃᑦ ᓴᕐᕿᑎᑦᓯᖃᑦᑕᓯᒪᔪᑦ ᐱᓇᓱᐊᕋᑦᓴᓂᒃ ᕿᖕᒥᓂᒃ ᐅᑎᕐᑎᓯᒋᐊᓪᓚᓂᕐᒧᑦ ᓄᓇᓕᓐᓂᑦ. ᑖᒃᑯᐊ ᐅᑎᕐᑎᓯᒋᐊᕐᓂᐅᓯᒪᔪᑦ ᕿᖕᒥᓂᑦ ᓇᒻᒥᓂᓕᓐᓂᒃ ᐃᑲᔪᕐᓯᓯᒪᔪᑦ, ᐃᓄᐃᑦ ᖃᐅᔨᒪᐅᓯᖏᓐᓂᑦ ᓴᕐᕿᔮᕐᑎᓯᒋᐊᓪᓛᓂᕐᓄᑦ, ᐊᖑᓇᓱᑦᑎᓂᓪᓗ ᐃᓗᕐᖁᓯᕐᑎᒍᑦ ᐱᕐᖁᓯᕐᓂᒃ ᐊᑑᑎᑎᑦᓯᒋᐊᓪᓚᕈᓐᓇᓕᕐᓱᑎᒃ ᓄᓇᒥ. ᐅᓇᓗ ᐃᓄᓐᓄᑦ ᓄᐃᑕᐅᓯᒪᔪᖅ ᐊᑯᓂᓗ ᓄᐃᑕᓕᕐᓱᓂ ᐃᕙᒃᑲᓂᖅ, ᒪᑭᕝᕕᐅᑉ ᐊᐅᓚᕙᑦᑕᖓ ᐊᕐᕌᒍᐃᑦ 20 ᐅᖓᑖᓄᑦ, ᖁᕕᐊᓲᑎᒋᑦᓱᒍ ᕿᒧᑦᓯᓂᖅ ᓄᐃᑕᑎᑦᓯᒍᑎᒋᑦᓱᒍᓗ ᐃᓄᐃᑦ ᓴᐱᕐᑌᑑᓂᖏᓐᓄᑦ ᓲᖑᔫᓂᖏᓐᓂᓗ.

ᐃᓄᐃᑦ ᐱᑦᓯᐊᑕᐅᖕᖏᑑᒋᐊᖃᕐᓂᖏᓪᓚᑦ ᐋᓐᓂᓇᕐᑐᓂᒃ ᓯᕐᓕᕿᓇᕐᑐᓂᒃ ᐊᑑᑎᑎᑕᐅᒋᐊᖃᕐᓂᖏᓪᓚᑦ ᐱᐅᖕᖏᑐᕐᔪᐊᕌᓗᓐᓂᑦ. ᑲᓇᑕᐅᑉ ᑲᕙᒪᖓ ᐊᐅᓚᑦᔭᕆᐊᕈᑎᖃᓴᑦᓕᕋᑕᕐᖁᖅ ᓯᕗᒧᐊᕐᐸᓕᐊᒍᑎᐅᓂᐊᓕᕐᒪᑦ, ᐱᓇᓱᐊᖃᑎᐅᑦᓯᐊᓗᓂᓗ ᐋᕐᕿᒋᐊᕈᑎᑦᓴᓯᐅᖃᑎᐅᓗᓂ ᒪᒥᓴᕐᐸᓕᐊᓂᕐᒧᑦ. ᑖᓐᓇ ᐃᓱᒪᒋᔪᓐᓀᑕᐅᒍᒪᓂᖅ ᓯᕗᓪᓕᐸᐅᔪᖅ ᐊᒥᓱᓂᑦ ᙯᔪᓂᑦ. ᑲᓇᑕᐅᑉ ᑲᕙᒪᖓ ᒪᑭᕝᕕᓗ ᐱᓇᓱᐊᖃᑎᒌᖏᓐᓇᓂᐊᕐᑑᒃ ᓭᒻᒪᖃᑎᒌᓐᓂᒧᑦ ᑎᑭᐅᑎᖃᑎᒌᓐᓂᖅ ᑐᖕᖓᕕᒋᓗᒍ.

ᐃᓄᐃᑦ ᓄᓇᒧᑦ ᕿᖕᒥᓄᓪᓗ ᐱᑐᑦᓯᒪᓪᓚᕆᑦᑐᑦ ᑌᒪᖕᖓᓂᕐᔪᐊᖅ - ᓯᕗᓪᓖᑦ ᐅᓂᒃᑳᑐᐊᖏᑎᒍᑦ, ᑭᖑᓂᖓᒍᓪᓗ ᐊᓪᓚᑕᐅᓯᒪᓂᒃᑯᑦ. ᐱᑐᑦᓯᒪᓂᖏᑦ ᐱᒻᒪᕆᐅᔪᖅ ᐃᓄᐃᑦ ᐃᓗᕐᖁᓯᖓᓄᑦ, ᐱᕐᖁᓯᖏᓐᓄᑦ, ᐃᓅᓯᖏᓐᓄᓗ. ᑲᓇᑕᐅᑉ ᑲᕙᒪᖓ ᐃᓕᑕᕐᓯᕗᖅ ᐅᐱᒍᓲᑎᖃᕐᓱᓂᓗ ᐱᓇᓱᐊᖃᑎᒌᓐᓂᐊᓂᕐᒥᓂᒃ ᑐᓂᓯᒪᒍᑎᖃᕐᓂᐊᓱᓂᓗ ᐱᐅᓂᕐᓴᒥᒃ ᓯᕗᓂᑦᓴᓕᐅᖃᑎᖃᕐᓂᐊᓂᕐᒥᓂᒃ, ᑐᖕᖓᕕᖃᕐᑎᓗᒍ ᓲᓱᑦᓴᓂᕐᒥᒃ ᐊᑦᔨᒌᑦᑎᓯᓂᕐᒥᓗ.

ᓇᑯᕐᒦᒃ.