ᐅᖃᖅᑕᐅᔪᑦ ᐅᒃᐱᕐᓇᖅᑑᑉ ᑕᓐ ᕙᓐᑕᓪᐅᑉ 25ᓄᑦ ᐊᕐᕌᒍᓄᑦ ᓇᓪᓕᐅᑎᓂᖓᓄᑦ ᓄᓇᕘᓕᐅᓂᐅᑉ

ᐋᑐᐋ, ᐊᓐᑎᐊᕆᐅ (ᐊᐃᕐᕈᓕ 1, 2024) — ᐅᒃᐱᕐᓇᖅᑐᖅ ᑕᓐ ᕙᓐᑕᓪ, ᒥᓂᒡᑕᐅᔪᖅ ᐅᑭᐅᖅᑕᖅᑐᓕᕆᓂᕐᓄᑦ, ᐅᖃᖅᑲᐅᕗᖅ ᐅᓪᓗᒥ:

"25 ᐊᕐᕌᒎᓚᐅᖅᑐᑦ ᐅᓪᓗᒥᒥᑦ, ᓄᓇᕘᓕᐅᓚᐅᖅᑐᑦ, ᑎᑭᑕᔾᔪᑕᐅᓪᓗᓂ ᐊᑯᓂᒧᑦ ᑎᑭᑕᐅᓇᓱᒃᑐᒧᑦ ᐃᓄᖕᓂᑦ ᐊᐅᓚᑦᑎᓂᖅᓴᐅᔪᒪᓪᓗᑎᒃ ᓄᓇᒥᓂᒃ ᖃᓄᖅᑑᕐᓂᕐᓄᓪᓗ ᓯᕗᓂᕐᒥᓄᑦ.

ᐅᓪᓗᒥ, ᑲᑎᖃᑎᒋᕙᕗᑦ ᓄᓇᓖᑦ ᓄᓇᕘᒥ ᓇᓗᓇᐃᖅᖢᒍ ᑖᓐᓇ ᐱᕐᔪᐊᖅ ᑕᐃᒪᐃᑦᑐᖅ, ᖁᕕᐊᒋᓗᒋᑦ ᐊᔾᔨᖃᖏᑦᑐᑦ ᕿᒪᒃᑕᑦᑎᓐᓂ ᐊᑐᖅᓯᒪᔪᑦ ᐱᖁᑎᑐᖃᖏᓪᓗ ᐃᓄᐃᑦ ᓄᓇᕘᒥᒃ ᐊᖏᕐᕋᖃᕐᓂᕋᖅᑐᑦ, ᐃᓱᒪᒋᓗᒋᓪᓗ ᐱᕐᔪᐊᒃᑯᑦ ᐃᓕᖅᑯᓯᑐᖃᒃᑯᑦ, ᐃᓅᖃᑎᒌᒃᑯᑦ, ᑮᓇᐅᔭᑎᒍᓪᓗ ᐱᕈᕐᓂᕐᓄᑦ ᓄᓇᕘᒥᐅᑦ ᐃᑲᔪᕐᓂᕆᖃᑦᑕᖅᑕᖏᑦ ᑲᓇᑕᒧᑦ ᓄᓇᕐᔪᐊᕐᒧᓪᓗ ᐊᔾᔪᒥᒋᔭᒃᓴᐅᕗᖅ ᓄᓇᖃᖅᑳᖅᑐᓂᑦ ᓯᕗᓕᖅᑎᐅᓂᕐᓄᑦ, ᓄᑭᒃᑖᕆᐊᕐᓂᕐᓄᑦ ᑲᑐᔾᔨᖃᑎᒌᖕᓂᕐᓄᓪᓗ, ᓴᖅᑭᔮᖅᑎᑦᑎᓪᓗᑎᒃ ᐱᕐᔪᐊᖑᓂᖏᓐᓂᒃ ᐃᑲᔫᑎᖏᓐᓂᒡᓗ ᐃᓕᓴᕆᔭᐅᓂᖏᓐᓄᑦ ᐃᒃᐱᒍᓱᖕᓂᕐᓄᓪᓗ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ, ᒐᕙᒪᐅᓂᖏᓐᓂᒃ ᐃᒻᒥᓄᓪᓗ ᖃᓄᖅᑑᕈᓐᓇᕐᓂᖏᓐᓄᑦ.

ᓴᓇᔭᐅᓂᕐᒥᓂᑦ ᐊᐃᕐᕆᓕ 1, 1999ᒥ, ᓄᓇᕗᑦ ᓯᕗᒧᐊᓪᓚᒃᓯᒪᕗᖅ ᐊᐅᓚᑦᑎᓂᖅᑎᒍᑦ, ᐃᓕᓐᓂᐊᕐᓂᖅᑎᒍᑦ ᑮᓇᐅᔭᑎᒍᓪᓗ ᐱᕈᕐᓂᕐᓄᑦ, ᐱᓯᒪᐃᓐᓇᖅᖢᒋᑦ ᐱᐅᓯᒋᐊᖅᖢᒋᓪᓗ ᐊᔾᔨᖃᖏᑦᑐᑦ ᐅᖃᐅᓯᖏᑦ, ᐃᓕᖅᑯᓯᑐᖃᖏᑦ ᐃᓅᔾᔪᓯᖏᓪᓗ. ᓄᓇᕗᑦ

ᑕᐃᒪᐃᑦᑕᕆᐅᒃᑲᓐᓂᖅᑐᖅᑕᐅᖅ ᐃᒻᒥᓄᑦ ᖃᓄᖅᑑᕈᓐᓇᕐᓂᕐᓄᑦ ᖁᕕᐊᓲᑕᐅᓚᐅᖅᑐᖅ ᐊᓂᒍᖅᑐᒥ ᔮᓐᓄᐊᕆᒥ ᓄᓇᕘᒥ ᒐᕙᒪᖓᑦ ᓄᓇᕘᑉ, ᓄᓇᕗᑦ ᑐᙵᕕᒃ ᐃᓚᓕᐅᓯᒪᔪᑦ, ᒐᕙᒪᖓᓪᓗ ᑲᓇᑕᐅᑉ ᐱᓕᕇᓐᓇᖅᓯᒪᖕᒪᑕ ᐅᓄᖅᑐᓄᑦ ᐊᕐᕌᒍᓄᑦ ᑲᑐᔾᔨᖃᑎᒌᒃᖢᑎᒃ ᖃᒡᓕᒋᐊᖅᑎᑦᑎᓪᓗᑎᒃ ᑎᑭᑕᐅᓇᓱᒃᑐᒧᑦ ᐃᒻᒥᓄᑦ ᖃᓄᖅᑑᕈᓐᓇᕐᓂᕐᓄᑦ ᓄᓇᕘᒥᐅᓄᑦ, ᐊᑎᓕᐅᓚᐅᖅᑐᑦ ᓄᓇᕘᒥ ᓄᓇᓄᑦ ᐊᑐᒐᒃᓴᓄᓪᓗ ᐊᐅᓚᑦᑎᓂᐊᕐᓂᕐᓄᑦ ᐊᖏᖃᑎᒌᒍᑎᒥᒃ.

ᐃᓄᒃᑕᖃᖏᑦᑐᖅ ᖃᐅᔨᒪᔪᒥᒃ ᑕᒪᒃᑮᓕᒫᓂᒃ ᑲᖏᖅᖢᓂᒃ, ᐊᑐᓂ ᓯᕐᒥᓂᒃ, ᐊᑕᖏᖅᑐᓂᒃ ᓅᒃᑕᕐᕕᐅᔪᓂᒃ ᓂᕐᔪᑎᓄᑦ ᓄᓇᕘᒥᐅᓂᑦ. ᐊᐅᓚᑦᑎᓂᐊᓕᕐᓂᒃ ᐃᓕᓴᕆᔭᐅᓂᐅᔪᖅ ᐅᒃᐱᕆᔭᐅᔪᓂᒃ ᖃᓄᐃᓕᔪᓄᓪᓗ ᐃᓄᐃᑦ ᐸᖅᑭᔨᐅᓂᖏᓐᓄᑦ ᓄᓇᕘᒥ ᐃᑦᑕᕐᒥᑦ. ᑖᔅᓱᒨᓇ ᑕᐃᒪᐃᑦᑕᕆᐅᖅᑐᒧᑦ ᐊᖏᖃᑎᒌᒍᑎᒧᑦ, ᓄᓇᕗᑦ ᓄᓇᕘᒥᐅᓪᓗ ᐃᑲᔫᑎᖃᕐᓂᐊᖅᑐᑦ ᖃᓄᖅᑑᕈᓐᓇᕐᓂᕐᓂᑦ ᓄᓇᐃᑦ ᐊᐅᓚᑕᐅᓂᖏᓐᓄᑦ ᐊᑐᒐᒃᓴᓂᓪᓗ ᐱᕈᖅᓴᐃᓂᕐᓄᑦ.

ᐅᓪᓗᒥ ᖁᕕᐊᓲᑎᖃᖅᑎᓪᓗᑕ ᐱᓕᕆᔭᐅᓯᒪᔪᕐᓂᒃ ᕿᒪᒃᑕᑦᑎᓐᓂ 25 ᐊᕐᕌᒍᓂ ᐃᓱᒪᒋᓗᒋᓪᓗ ᐱᓕᕆᔭᐅᓇᓱᓚᐅᖅᑐᑦ ᐅᓄᖅᑐᓄᑦ ᕿᒪᒃᑕᑦᑎᓐᓂ ᑭᖑᕚᕇᓂᑦ, ᑕᑯᕕᒍᑦᑕᐅᖅ ᓯᕗᒧᑦ ᑭᖑᓪᓕᕐᓄᑦ 25 ᐊᕐᕌᒍᓄᑦ ᐅᖓᑖᓄᓪᓗ. ᐱᕈᖅᑎᑦᑎᓚᐅᖅᑕ ᑖᒃᑯᐊ ᑲᔪᓯᑦᑎᐊᖅᑐᑦ ᖄᖓᒍᑦ ᑲᔪᓯᑎᓪᓗᒋᓪᓗ ᑲᑐᑎᓪᓗᒋᑦ ᐱᓕᕆᔭᕗᑦ ᓯᕗᒧᐊᖅᑎᒋᐊᕐᓗᒋᑦ ᐱᑦᑎᐊᓕᒃᑲᓐᓂᕐᓃᑦ, ᓴᓇᓗᑕᓗ ᖄᖓᒍᑦ ᐱᔪᒪᔭᐃᓐᓇᑦᑎᓐᓄᑦ ᐊᒃᓱᕉᑎᑦᑎᓐᓄᑦ ᐃᑲᔫᑕᐅᓗᑎᒃ ᐃᒻᒥᓄᑦ ᖃᓄᖅᑑᕈᓐᓇᕐᓂᕐᓄᑦ ᓄᓇᕘᒥᐅᓄᑦ."