ᒥᓂᔅᑕ ᕚᓐᑐᓪ, ᐊᒻᒪᓗ ᕼᐊᔾᑐ ᐅᖃᐅᓯᑦᓴᓖᒃ ᓄᓇᕗᑦ ᐅᓪᓗᖓᓂ

ᐅᖃᐅᓯᐅᔪᖅ

ᐋᑐᐊ, ᐋᓐᑎᐅᕆᔪ (ᔪᓚᐃ 9, 2023) — ᒥᓂᔅᑕ ᑖᓐ ᕚᓐᑐᓪ, ᒥᓂᔅᑕᖓ ᐃᓄᓕᕆᔨᑐᖃᒃᑯᑦ; ᒥᓂᔅᑕ ᒫᒃ ᒥᓗ, ᒥᓂᔅᑕᖓ ᓄᓇᖁᑎᖃᕐᓂᕐᒥ−ᓄᓇᖃᖅᑳᖅᓯᒪᔪᓄᑦ ᑐᕌᖓᔪᓄᑦ; ᐊᒻᒪᓗ ᒥᓂᔅᑕ ᐹᑎ ᕼᐊᔾᑐ, ᒥᓂᔅᑕᖓ ᓄᓇᖃᖅᑳᖅᓯᒪᔪᓄᑦ ᐱᔨᑦᓯᕋᕈᑎᓄᑦ, ᐅᓪᓗᒥ ᐅᖃᐅᓯᑦᓴᓖᑦ:

"ᐅᓪᓗᒥ ᓄᓇᕗᑦ ᐅᓪᓗᖓᓂ, ᑲᑎᖃᑎᖃᖅᐳᒍᑦ ᓄᓇᓕᐅᔪᓂᑦ ᓄᓇᕗᒻᒥ ᖁᕕᐊᓲᑎᒋᓪᓗᒍ 30−ᒋᓕᖅᑕᖓᓂ ᑲᔪᓯᑎᑕᐅᓯᒪᓂᖓᑕ ᓄᓇᕗᑖᕈᑎᒧᑦ ᐊᖏᖃᑎᒌᒍᑎᐅᑉ ᐱᖁᔭᐅᑉ ᐊᒻᒪᓗ ᓄᓇᕗᑦ ᐱᖁᔭᐅᑉ, ᓄᓇᕗᑦ ᐃᓕᑕᕆᔭᐅᓪᔪᑎᖓ ᓄᓇᕗᖑᓂᖓᓂᒃ ᑲᓇᑕᒥ.

ᐱᒋᐊᖅᑎᑕᐅᓂᒥᓂᖓ ᓄᑖᖑᓂᖅᐹᖅ ᓄᓇᓄᑦ ᑲᓇᑕᒥ ᐊᓯᔾᔩᓯᒪᑐᐃᓐᓇᖏᑦᑐᖅ ᓄᓇᙳᐊᒥᒃ ᓄᓇᓕᔾᔪᐊᑎᓐᓂ, ᑭᓯᐊᓂᑦᑕᐅᖅ ᑐᙵᕕᑦᓯᐊᖑᓪᓗᓂ ᒪᓕᒐᕐᒧᑦ ᐱᔪᓐᓇᐅᑎᖓ ᓄᓇᕗᒻᒥᐅᑦ ᓂᓪᓕᐊᒍᑎᖏᑦ ᑐᓴᖅᑕᐅᖁᓪᓗᒋ, ᑲᓇᑕᒥ ᓄᓇᕐᔪᐊᒥᓗ.

ᐅᓪᓗᒥ, ᓇᓪᓕᐅᓂᖅᓯᐅᖅᐳᒍᑦ ᐱᒻᒪᕆᐅᓂᖓᓂᒃ ᐱᖅᑯᓯᐅᑉ, ᐃᓅᖃᑎᒌᖕᓂᐅᑉ, ᐊᒻᒪᓗ ᒪᑭᒪᐅᑎᑎᒍᑦ ᐃᑲᔪᖅᑕᐅᒍᑎᓄᑦ ᓄᓇᕗᒻᒧᑦ ᓄᓇᓕᕐᔪᐊᑎᓐᓄᑦ. ᕿᑭᖅᑖᓗᒻᒥ, ᕿᑎᕐᒥᐅᓂ ᐊᒻᒪᓗ ᑭᕙᓪᓕᕐᒥᑦ ᓄᓇᓕᖏᓐᓂ, ᓄᓇᕗᑦ ᐊᖏᕐᕋᕆᔭᐅᔪᖅ ᐊᒥᓱᓄᑦ ᐃᓄᖕᓄᑦ, ᐅᖃᐅᓯᖏᑦ ᓴᙱᔪᑦ, ᐆᒻᒪᕆᑦᑐᑦ ᓄᓇᓖᑦ, ᓄᓇᑐᓂᖏᓪᓗ ᑲᓇᑕᒥ ᓄᓇ ᐊᑐᕕᐅᕙᓐᓂᑯ ᐊᒻᒪᓗ ᓇᑭᖔᕐᓂᖓ.

ᐊᓂᒍᖅᑐᓂ 30−ᓂ ᐊᕐᕌᒍᓂ, ᒐᕙᒪᖓ ᑲᓇᑕᐅᑉ, ᒐᕙᒪᖓ ᓄᓇᕗᑦ, ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓ ᐃᖅᑲᓇᐃᔭᖃᑎᒌᑦᓯᒪᕗᑦ ᐱᓕᕆᖃᑎᒌᑦᓱᑎᒃ ᐊᑐᓕᖅᑎᒐᓱᐊᖅᓱᒍ ᓄᓇᕗᑦ ᐊᖏᖃᑎᒌᒍᑦ, ᑲᒪᓐᓇᓗ ᐱᓕᕆᖃᑎᒌᖕᓂᐅᔪᖅ ᑲᔪᓯᓂᐊᖅᑐᖅ ᑐᙵᕕᒋᔭᐅᓂᖓ ᖃᐅᔨᔭᐅᓂᐊᕐᒪᑦ ᑐᕌᖅᑕᐅᔪᖅ ᓇᖕᒥᓂᖅᓱᕈᒪᓂᖅ−ᐱᓇᓱᐊᕐᓂᒃᑯᑦ ᓄᓇᕗᒻᒥᐅᓄᑦ.

ᐃᓄᐃᑦ ᓇᐅᑦᓯᑐᖅᑎᐅᓯᒪᕗᑦ ᖃᐅᔨᒪᓂᕐᒥᓪᓗ ᑎᒍᒥᐊᖅᑎᐅᓪᓗᑎᒃ ᓄᓇᒥ ᒥᒃᓵᓐᓄᑦ ᑕᐃᒪᖓᓂᐊᓗᒃ. ᐃᓄᐃᑦ 85−ᐳᓴᒦᑦᓱᑎᒃ ᓄᓇᕗᒻᒥᐅᑦ, ᓱᓕᒃᑲᓐᓂᖅ ᐊᓚᒡᒐᐃᑦᑐᓂᒃ ᐱᕙᓪᓕᐊᓂᖃᖅᐳᒍᑦ ᐋᖅᑭᒌᕈᒪᓪᓗᒍ ᑭᖑᓪᓕᖅᐸᐅᑎᓪᓗᒍ ᓄᓇᕗᒻᒥ ᐊᕕᑦᑐᖅᓯᒪᑎᑦᓯᓂᕐᒧᑦ ᐃᖅᑲᓇᐃᔭᕐᕕᐅᔪᓂᒃ ᐊᖏᖃᑎᒌᒍᑦ, ᐊᖅᑯᑕᐅᒍᓐᓇᓂᐊᖅᑐᖅ ᑖᓐᓇ ᐊᖏᖃᑎᒌᒍᑦ ᓄᓇᕗᒻᒥᐅᑦ ᐊᐅᓚᑦᓯᓂᖃᕐᓗᑎᒃᓄᓇᒥᖕᓂᑦ ᐊᒻᒪᓗ ᐊᑐᕋᑦᓴᓂᑦ ᓄᓇᒥ.

ᐅᓪᓗᓂ, ᐅᖃᒃᑲᓐᓂᖅᐸᕗᑦ ᐊᖏᖅᓯᒪᓂᕆᔭᕗᑦ ᐋᖅᑭᖃᑎᒌᓐᓂᖅᑕᖃᖁᓪᓗᒍ ᐋᖅᑭᒋᐊᖃᑎᒌᖕᓂᒃᑯᑦ ᓴᙱᑦᓯᒋᐊᕐᓂᐊᕐᒪᑦ ᐃᓄᐃᑦ−ᓄᓇᖁᑎᖃᕐᓂᕐᒧᑦ ᑲᓱᖅᓯᒪᖃᑕᐅᓂᖓ ᐃᖅᑲᓇᐃᔭᖃᑎᒌᖕᓂᖏᑎᒍᓗ ᐱᓕᕆᖃᑕᐅᔪᑦ ᒐᕙᒪᒃᑯᖏᓐᓄᑦ ᓄᓇᓄᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓ ᓯᕗᓂᒃᓴᑦᓯᐊᕙᐅᓂᖅᓴᐅᖁᓪᓗᒍ ᐃᓘᓐᓇᐃᓐᓄᑦ ᐃᓄᖕᓄᑦ ᓄᓇᕗᒻᒥᒃ ᐊᖏᕐᕋᖃᕐᓂᕋᖅᑐᓄᑦ.

ᓄᓇᕗᑦ ᐅᓪᓗᖓᓂ ᓇᓪᓕᐅᓂᖅᓯᐅᑦᓯᐊᕆᑦ!