ᒐᕙᓚᖓ ᑲᓇᑕᐅᑉ ᓇᓪᓕᐅᓂᖅᓯᐅᕆᕗᖅ 21−ᓂᒃ ᐊᕐᕌᒍᖃᓕᖅᑎᓪᓗᒍ ᓄᓇᕗᑦ

ᐋᑐᕚ, ᐋᓐᑎᐅᕆᔪ (ᔪᓚᐃ 9, 2020) – ᒥᓂᓯᑕᖓᑦ ᓯᕗᓪᓕᐅᔾᔨᔪᑦ−ᓄᓇᖃᖅᑳᖅᓯᒪᔪᓅᖓᔪᓂᒃ, ᑭᐅᓗ ᐱᓐᓂᐊᑦ; ᒥᓂᓯᑕᖓᑦ ᓄᓇᖃᖅᑳᖅᓯᒪᔪᓄᑦ ᐱᔨᒃᓯᕈᑕᐅᔪᓄᑦ, ᒫᒃ ᒥᓗᕐ; ᐊᒻᒪᓗ ᒥᓂᓯᑕᖓᑦ ᐃᓄᓕᕆᔨᑐᖃᒃᑯᑦ, ᑖᓂᐅᓪ ᕙᓐᑐᓪ, ᐅᖃᐅᓯᓕ ᐆᒥᖓ ᐅᓪᓗᒥ:

"ᐅᓪᓗᒥ ᓄᓇᕗᑦ ᐅᓪᓗᕆᑎᓪᓗᓂᐅᒃ, ᖁᕕᐊᓲᑎᒋᕙᕗᑦ ᐊᕐᕌᒍᓂᒃ 21−ᓂᒃ ᓇᓪᓕᐅᓂᖅᓯᐅᖅᑕᐅᑎᓪᓗᒍ ᓄᓇᕘᑖᓚᐅᖅᓯᒪᓂᖅ. ᐅᓪᓗᒥ ᑖᓐᓇ ᐅᓪᓗᖅ ᓇᓗᓇᐃᖅᓯᕗᖅ ᓴᖅᑭᑕᐅᓂᒥᓂᖓᓂᒃ ᑲᓇᑕᒥ ᓄ ᑖᖑᓂᖅᐹᖅ ᐊᒻᒪ ᓄᓇᑐᓂᖅᐸᐅᓪᓗᓂ ᓄᓇ. ᐱᒻᒪᕆᐅᕗᖅ ᑖᓐᓇ ᐅᓪᓗᖅ, ᓄᓇᕗᑦ ᐅᓪᓗᖓ ᓇᓗᓇᐃᖅᓯᒻᒪᑦ ᐊᑎᓕᐅᕈᑕᐅᓚᐅᖅᑐᒥᓂᐅᓪᓗᓂ ᐃᓄᐃᑦ ᑐᕌᖅᐸᓪᓕᐊᓂᖏᓐᓄᑦ ᓇᒻᒥᓂᖅᓱᓂᕐᒧᑦ.

ᓇᓪᓕᐅᓂᖅᓯᐅᑎᓪᓗᑕ ᐅᓪᓗᒥ, ᐃᓕᑕᕆᔭᕆᐊᓕᕗᑦ ᐊᑯᓂ ᐊᔪᕐᓇᑐᖅᓯᐅᕈᑎᒋᓪᓗᒍᓗ ᐃᓄᐃᑦ ᐱᓇᓱᐊᖅᓯᒪᓂᖓ ᐱᔪᓐᓇᐅᑎᒥᓐᓂᑦ ᐃᓕᑕᕆᔭᐅᖁᔨᓪᓗᑎᒃ ᑲᓇᑕᒧᑦ. ᐱᒻᒪᕆᐅᓪᓗᓂ ᐊᑎᓕᐅᕈᑕᐅᓂᒥᓂᖓ ᓄᓇᕗᑦ ᐊᖏᖃᑎᒌᒍᑎᐆᑉ 1993−ᖑᑎᓪᓗᒍ, ᐱᕕᖃᖅᑎᑦᓯᓯᒪᔪᖅ ᓴᖅᑭᑕᐅᓂᖓᓄᑦ ᓄᓇᕗᑦ ᓄᓇᕘᖑᓂᐊᓕᖅᑎᓪᓗᒍ 1999-ᒥ. ᐊᕐᕌᓂ ᐊᐅᒡᒍᓯᒥ ᑭᖑᓂᖓᓂ ᐊᑯᓂ ᐋᔩᖃᑎᒌᓐᓃᑦ ᐅᖃᖃᑎᖃᕐᓃᓪᓗ ᒐᕙᒪᒃᑯᖏᓐᓂᒃ ᓄᓇᕗᑦ, ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓ, ᐊᓯᖏᓪᓗ ᐃᓄᐃᑦ ᑲᑐᔾᔨᖃᑎᒌᑦᑎᖏᑦ, ᐱᒻᒪᕆᒃᑲᓐᓂᐅᔪᒥᒃ ᑎᑭᐅᑎᔭᐅᔪᖃᖅᓯᒪᒋᕗᖅ ᐊᑎᓕᐅᖅᑕᐅᓂᖓᓂᒃ ᓄᓇᕗᑦ ᐊᖏᖃᑎᒌᒍᑎᒥᒃ ᐋᖅᑭᒋᐊᕆᒍᑕᐅᓪᓗᓂ ᐊᖏᖃᑎᒌᒍᑦ (AIP). ᑖᓐᓇ AIP ᐱᕕᖃᖅᑎᑦᓯᓯᒪᒻᒪᑦ ᐅᖃᖃᑎᒌᓐᓂᕐᓂᒃ, ᒫᓐᓇ ᐱᕙᓪᓕᐊᔭᐅᔪᖅ, ᑎᑭᐅᑎᔭᐅᒍᒪᓪᓗᓂ ᑭᖑᓪᓕᖅᐹᒥ ᐊᖏᖃᑎᒌᒍᑎᒥᒃ ᐋᖅᑭᒋᐊᕆᒍᑕᐅᓪᓗᓂ ᐊᖏᖃᑎᒌᒍᑦ. ᑕᒪᒃᑯᐊ ᑎᑭᐅᑎᔭᐅᕙᑦᑐᑦ ᐱᒻᒪᕆᐅᔪᑦ ᑕᑯᑦᓴᐅᑎᑦᓯᕗᑦ ᑲᔪᓯᔪᒥᒃ ᐊᒻᒪᓗ ᓇᒻᒥᓂᖃᖃᑎᒋᓐᓂᕐᒥᒃ ᐊᑑᑎᓕᒻᒥᒃ ᑖᒃᑯᓅᖓ ᑲᓇᑕᒧᑦ ᓄᓇᕗᒻᒧᓪᓗ.

ᓄᓇ ᓄᓇᐅᓪᓗᓂ ᐊᒻᒪ ᐃᒪᖅ ᓯᔾᔭᓕᒃ, ᓄᓇᕗᑦ ᓱᓕ ᐱᕈᖅᐸᓪᓕᐊᕗᖅ, ᓴᙱᑦᓯᔭᐅᕙᓪᓕᐊᓪᓗᓂᓗ ᓱᓕ ᐃᓕᑉᐸᓪᓕᐊᔭᒥᓐᓄᑦ ᐃᑉᐱᒋᑦᓯᐊᖅᓱᒋᑦ ᐱᖅᑯᓯᑐᖃᐃᑦ, ᐊᑐᖅᑕᐅᕙᓚᐅᖅᑐᒥᓃᑦ, ᐊᒻᒪ ᐃᓄᐃᑦ ᐱᖅᑯᓯᖓ ᐊᑐᖅᑕᐅᔪᖅ.

ᑲᔪᓯᓂᕗᑦ ᑲᔪᓯᓂᐊᕆᕗᖅ ᑲᔪᔾᔨᖃᑎᑦᑕ ᐱᓇᓱᐊᕐᓂᖏᑎᒍᑦ, ᓲᕐᓗ ᐃᓄᐃᑦ−ᓯᕗᓪᓕᐅᔾᔭᐅᓂᖏᓐᓄᑦ ᓇᒻᒥᓂᖃᖃᑎᒌᓐᓂᒃᑯᑦ ᑲᑎᒪᔨᕋᓛᖏᑦ ᐊᒻᒪᓗ ᐊᑐᓕᖅᑎᑕᐅᓂᖓ ᐅᑭᐅᖅᑕᖅᑐᓂ ᐊᒻᒪ ᐅᑭᐅᖅᑕᖅᑐᒥ ᐊᑐᐊᒐᓕᕆᓂᕐᒧᑦ ᐋᖅᑭᓱᖅᑕᐅᓯᒪᓂᖓ. ᖃᐅᔨᒪᔪᒍᑦ ᓱᓕ ᐃᖅᑲᓇᐃᔮᑦᓴᐃᑦ ᐊᒥᓲᒻᒪᑕ ᓇᒻᒥᓂᖃᖃᑎᒌᓐᓂᒃᑯᑯᑦ ᐃᓱᒫᓗᑕᐅᔪᑦ ᐅᖃᐅᓯᐅᖁᓪᓗᒋᑦ ᓴᐳᑎᔭᐅᔭᕆᐊᖃᕐᓂᖓᑕ ᐅᖃᐅᓯᐅᑉ ᐱᖅᑯᓯᐅᓪᓗ, ᐃᒡᓗᓕᕆᓂᐅᑉ ᐃᓱᒪᓕᕆᔭᐅᓂᒃᑯᑦ ᐱᕕᖃᖅᑎᑕᐅᓂᕐᒥᒃ ᐃᑲᔪᖅᑐᖅᑕᐅᓂᒃᑯᑦ ᐊᒻᒪ ᐃᖅᑲᓇᐃᔭᖃᑎᒌᓐᓂᒃᑯᑦ ᐊᔪᖅᓴᖅᑐᖃᕈᓐᓃᑯᓪᓗᒍ ᓂᕿᒥᒃ ᓄᓇᕗᒻᒥ. ᐱᓕᕆᖃᑎᒌᓐᓂᕗᑦ ᓴᙱᑦᓯᕙᓪᓕᐊᒍᑎᒌᓐᓇᓂᐊᖅᐸᓄᑦ ᐃᖅᑲᓇᐃᔮᖃᖅᑎᓪᓗᑕ ᑲᑐᑎᓗᒋᑦ ᓯᕗᓪᓕᐅᑎᔭᕆᐊᓖᑦ, ᑐᑭᓯᓗᒍ ᐊᔪᕐᓇᖅᑐᒃᑰᐸᑦᑐᕕᓃᑦ ᐊᑐᖅᑕᐅᕙᓚᐅᖅᑐᒥᓃᑦ ᐊᒻᒪ ᓈᓚᓪᓗᒋᑦ ᐊᑲᐅᓂᖅᐹᑦ ᐱᕈᖅᐸᓪᓕᐊᖁᓪᓗᑕ ᓯᕗᓂᕐᒥ ᖁᕕᐊᓇᕐᓂᖅᓴᒥ ᐃᓅᓯᖃᖃᑎᒌᖁᓪᓗᑕ ᑲᑐᔾᔨᓗᑕ. ᓯᕗᓂᒃᓴᖅ ᑲᓇᑕ ᐋᖅᑭᑦᓱᖅᑕᐅᕙᓪᓕᐊᓂᖓ ᓄᓇᕘᑦ ᓴᖅᑭᖅᑕᐅᓚᐅᕐᓂᖓᓄᑦ ᐊᒻᒪ ᐊᑐᖅᑎᑕᐅᓂᖏᑕ ᐃᓄᐃᑦ ᖃᐅᔨᒪᓂᖏᑦ ᐊᒻᒪ ᐱᖅᑯᓯᖓ, ᐊᒻᒪ ᐃᑲᔪᖅᑐᐃᔪᖅ ᐃᓄᐃᑦ ᓇᒻᒥᓂᖅᓱᕈᒪᓂᖓᓂᒃ.

ᐅᓪᓗᒥ, ᑲᑎᑉᐳᒍᑦ, ᐊᑕᐅᓯᐅᓪᓗᑕ ᓇᓪᓕᐅᓂᖅᓯᐅᕐᓗᒍ ᓄᓇᕗᑦ ᑕᒪᓐᓇ ᐱᔾᔪᑎᒋᓪᓗᒍ, ᐊᕐᕌᒍᓂᒃ 21−ᓂᒃ ᓇᓪᓕᐅᓂᖅᓯᐅᖅᑕᐅᑎᓪᓗᒍ ᓄᓇᕗᑦ ᐅᓪᓗᖓ.

ᓄᓇᕗᑦ ᐅᓪᓗᖓᓂ ᓇᓪᓕᐅᓂᖅᓯᐅᑦᓯᐊᕆᑦ! Nunavut ullunganit nalliunirsiutsiarit!"