ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ

ᖃᐅᔨᒍᑕᐅᔪᔪᑦ

ᐊᑯᓐᓂᖏᓐᓂ 1950 ᐊᒻᒪᓗ 1975, ᑲᓇᑕᐅᑉ ᒐᕙᒪᒃᑯᖏᑦ ᐊᓯᔾᔨᕈᑕᐅᓯᒪᓗᐊᕐᖓᑕ ᕿᑭᖅᑕᓂ ᓄᓇᓕᓐᓂᑦ. ᑐᑭᓕᐅᑎᔭᔅᓴᐅᕗᑦ ᐱᓂᐊᕈᑕᐅᓯᒪᔪᑦ ᒐᕙᒪᒃᑯᓐᓂ ᒪᑯᐊ:

• ᐊᐅᓪᓛᕈᒪᙱᒃᑲᓗᐊᖅᑎᓪᓗᒋᑦ ᑎᓕᐅᖅᑕᐅᓪᓗᑎᒃ ᐊᐅᓪᓛᖅᑎᑕᐅᓯᒪᓂᖏᑦ ᐃᓄᐃᑦ, ᑕᒪᓐᓇ ᐊᕕᒍᑕᐅᓯᒪᔪᖅ ᐃᓚᒌᓄᑦ, ᓄᓇᖅᑲᑎᒌᓐᓂᖏᓐᓄᑦ ᐊᒻᒪᓗ ᐊᑐᕈᓐᓃᕈᑕᐅᓯᒪᓪᓗᓂ ᐃᓕᖅᑯᓯᖏᓐᓄᑦ ᐋᖅᑮᓂᐊᕐᖓᑕ ᖁᓕᓂᑦ ᐱᖓᓱᓂᓪᓗ ᓄᓇᓕᐅᓂᐊᓕᖅᑐᓂᑦ, ᑕᐃᔅᓱᒪᓂ ᐃᓄᐃᑦ ᓱᓕᓂᕋᖅᑐᓄᑦ ᐅᖃᕐᕕᐅᓚᐅᕐᓯᒪᔪᑦ "ᐃᓅᓯᖃᑦᑎᐊᓂᕐᓴᐅᓂᐊᕐᖓᑕᒎᖅ" ᑕᒪᓐᓇ ᓱᓕᓯᒪᙱᑦᑐᖅ.
• ᓱᓕᓂᕋᖅᑐᑎᒃ ᐅᖃᕐᓯᒪᔪᑦ ᐃᓪᓗᖃᖅᑎᑕᐅᓛᕐᖓᑕ ᐊᒻᒪᓗ ᐱᔨᑦᑎᕋᐅᑕᐅᓲᓂᑦ ᐱᔨᑦᑎᕋᖅᑕᐅᖃᑦᑕᓛᕐᖓᑕ ᑕᒪᒃᑯᐊ ᓱᓕᓯᒪᙱᒻᒥᔪᑦ, ᐊᒻᒪᓗ ᐃᓪᓗᐃᑦ ᓴᓇᔭᐅᓚᐅᕐᓯᒪᔪᑦ ᓈᒻᒪᖏᓪᓚᕆᑦᑑᓯᒪᒻᒪᑕ ᐅᑭᐅᖅᑕᖅᑑᑉ ᓯᓚᒋᕙᑦᑕᖓᓄᑦ.
• ᐃᓄᐃᑦ ᓱᕈᓯᖏᑦ ᐃᓕᓐᓂᐊᕆᐊᖅᑎᑕᐅᒐᓱᐊᒡᒐᕐᓂᑰᓪᓗᑎᒃ ᐃᓕᓐᓂᐊᕐᕕᐅᕙᑦᑐᒥᓂᕐᓄᑦ ᐊᒻᒪᓗ ᖃᓪᓗᓈᑦ ᐊᐅᓚᑦᑎᕕᖏᓐᓄᑦ ᖃᓪᓗᓈᑎᑐᑦ ᐅᖃᐅᓯᖅ ᐊᑐᖅᑕᑑᓯᒪᓪᓗᓂ, ᑕᐃᒫᒃ ᐊᒥᓱᑦ ᐃᓄᐃᑦ ᐃᓄᒃᑎᑑᕈᓐᓇᐃᓪᓕᓂᑰᓪᓗᑎᒃ, ᐃᓕᖅᑯᓯᒥᓐᓂᒃ ᐱᖅᑯᓯᖏᓐᓂᓪᓗ ᐊᓯᐅᔨᓯᒪᓪᓗᑎᒃ ᐊᒻᒪᓗ ᐃᓚᒌᒍᓯᖏᓐᓂᒃ. ᕿᑐᕐᖓᓖᑦ ᐅᖃᐅᔾᔭᐅᓚᐅᕐᓯᒪᓪᓗᑎᒃ ᓱᕈᓯᐊᕿᑖᖃᑦᑕᔾᔮᖏᒻᒪᑕ, ᑕᒪᒃᑯᐊ ᐊᓐᓇᐅᒪᔾᔪᑕᐅᓯᔪᒥᓂᐅᑎᓪᓗᒋᑦ, ᓱᕈᓯᖏᑦ ᐃᓕᓐᓂᐊᕆᐊᖃᑦᑕᔾᔮᖏᑉᐸᑕ.
• ᑐᖁᕋᖅᑕᐅᓂᒥᓂᖏᑦ ᕿᒻᒦᑦ, ᐃᓄᓐᓄᑦ ᐊᐅᓪᓚᕈᑎᔅᓴᖃᕈᓐᓃᕈᑕᒥᓂᐅᓪᓗᓂ ᐊᒻᒪᓗ ᓂᕿᔅᓴᓂᒍᓐᓇᐃᓪᓕᒍᑎᒥᓂᐅᓪᓗᓂ. ᕿᒻᒦᑦ ᐊᑑᑎᖃᕐᓯᒪᓪᓚᕆᑦᑐᐊᓘᑎᓪᓗᒋᑦ ᐃᓄᓐᓄᑦ, ᑕᒪᓐᓇ ᐊᑐᐊᒐᖅ ᓈᒻᒪᖏᓪᓚᕆᑦᑐᐊᓗᒻᒥᒃ ᐊᑑᑎᑎᑦᑎᓯᒪᒻᒪᑦ ᐊᑑᑎᕕᐅᓯᒪᔪᓄᑦ, ᐊᒻᒪᓗᑦᑕᐅᖅ ᓂᕿᓂᑦ ᐊᔪᕐᓴᖃᑦᑕᓕᕈᑕᐅᓯᒪᒋᓪᓗᓂ ᐅᑭᐅᖅᑕᖅᑐᒥ.
• ᑕᒪᒃᑯᐊ ᐊᑐᐊᒐᑦ ᐋᖅᑭᒐᔅᓴᐅᖏᑦᑐᒥᒃ ᓱᕋᐃᒍᑕᐅᓯᒪᒻᒪᑕ ᐊᒻᒪᓗ ᑭᖑᕚᕇᒡᒍᑎᓄᑦ ᐅᖁᒪᐃᑦᑐᒃᑰᕈᑕᐅᓯᒪᓪᓗᓂ ᓱᓕ ᐊᑐᖅᑕᐅᓪᓗᓂ ᐅᓪᓗᒥ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ.

ᐅᖃᓕᒫᕈᒪᒍᔅᓯ ᐅᓂᒃᑳᓃᙶᕐᓯᒪᔪᓂᑦ, ᖃᐅᔨᒋᐊᖁᔪᖅ "ᑲᒪᒋᔭᐅᕙᓪᓕᐊᔪᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ" ᐅᓂᒃᑳᓂᑦ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ www.qia.ca, http://www.qia.ca/wp-content/uploads/2019/06/QIA-QTC-English_FINAL-LobbyingKit-2019-06-13_LOW.pdf

ᓈᒪᔪᓂᑦ ᐅᓂᒃᑳᓂᑦ ᑐᑭᓯᒃᑲᓐᓂᕈᒪᒍᔅᓯ, ᐅᕗᖓ ᖃᐅᔨᒋᐊᕐᓗᓯ ᑭᓪᓕᓯᓂᐊᖅᑏᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ: https://www.qtcommission.ca/iu

ᐊᖅᑯᑎ ᓯᕗᒧᑦ

ᐋᒡᒌᓯ 14, 2019ᒥ, ᒥᓂᔅᑕᖓ ᑲᓇᑕᒥ−ᓄᓇᖃᖅᑐᑐᖃᕐᓂᑦ ᐃᓄᓕᕆᔨᑐᖃᒃᑯᑦ, ᐱᔪᑎᒋᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ, ᒪᒥᐊᕝᕕᖃᔪᔪᖅ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ. ᒪᒥᐊᓐᓂᖅ ᑲᔪᓯᔪᔪᖅ ᐃᖅᑲᓇᐃᔮᕆᓯᒪᔭᖏᑦ ᐱᔾᔪᑎᒋᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑕ. ᓇᓗᓇᐃᕐᓯᓂᖅ ᐃᓚᖃᔪᔪᖅ ᑲᑦᑐᖓᐃᕈᑎᖃᕐᓂᕐᒥᒃ ᐋᖅᑮᒍᑕᐅᓛᖅᑐᒥᒃ ᓴᐃᒻᒪᖃᑎᒌᓐᓂᕐᒧᑦ ᑮᓇᐅᔭᓂᑦ, ᑮᓇᐅᔭᓂᑦ ᐃᑲᔪᖅᑕᐅᔾᔪᑎᖃᒃᑲᓂᕐᓗᑎᒃ ᒐᕙᒪᒃᑯᓐᓂᑦ ᐃᑲᔫᑎᖃᕐᓂᐊᕐᖓᑕ ᐋᖅᑭᔅᓱᐃᓂᕐᒧᑦ ᐱᕙᓪᓕᐊᑎᑦᑎᓂᕐᒧᓪᓗ ᐱᓕᕆᐊᔅᓴᒥᒃ ᐊᐅᓚᑕᐅᓂᐊᖅᑐᒥᒃ ᕿᑭᖅᑕᓂᒃᑯᓐᓂᑦ ᐊᑐᖅᑎᑦᑎᒋᐊᒃᑲᓐᓂᕈᑕᐅᓂᐊᕐᖓᑕ ᐃᓄᐃᑦ ᐃᓕᖅᑯᓯᖓᓐᓂᒃ, ᒪᒥᓴᕐᓂᕐᒥᒃ ᒪᑭᒪᓂᕐᒥᓪᓗ ᐅᓪᓗᒥ ᐃᓄᓐᓄᑦ ᓯᕗᓂᔅᓴᑎᓐᓂᓪᓗ ᑭᖑᕚᖑᓂᐊᖅᑐᓄᑦ.