ᑲᓇᑕᐅᑉ ᐅᑭᐅᖅᑕᑐᖓᓂ ᐊᑐᐊᒐᔅᓴᓄᑦ ᐱᓕᕆᐊᔅᓴᐃᑦ: ᐅᖃᖃᑎᒌᖕᓂᕐᒧᑦ ᓇᓗᓇᐃᒃᑯᑕᐃᑦ

ᓇᓗᓇᐃᒃᑯᑕᐃᑦ ᐃᓗᓕᒋᔭᐅᔪᑦ

ᓇᓗᓇᐃᔭᐃᓂᖅ

"ᓇᓗᓇᐃᑦᑐᒃᑯᑦ ᐅᑭᐅᖅᑕᖅᑐᒥ ᐸᕐᓇᒍᑎᖏᑦ ᐃᓅᓯᓗᒃᑖᓐᓂ ᑕᑯᓯᒪᙱᑦᑐᖓ ᐅᕝᕙᓘᓐᓃᑦ ᐅᖃᐅᓯᕆᙱᑕᐃᓐᓇᖅᓯᒪᔭᒃᑲ ᑕᐃᒪᐅᔪᓂᒃ ᐱᒻᒪᕆᐅᔪᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐊᓯᖏᑦ ᑲᓇᑕᒥᐅᑕᐃᑦ ᖃᐅᔨᒪᓂᖏᑎᒍᑦ ᐱᕙᓪᓕᐊᖃᑦᑕᖅᑕᖏᓐᓂᒃ. ᒪᑐᒋᐊᕐᓗᒋᑦ ᑖᒃᑯᐊ ᖃᐅᔨᒪᔭᐅᙱᑦᑐᑦ ᐅᑭᐅᖅᑕᖅᑐᒥᐅᑕᐃᑦ ᐅᖃᖃᑎᖃᕐᓗᑎᒃ ᐅᕙᓐᓄᑦ ᑖᔅᓱᒥᖓ ᓯᕗᓪᓕᐅᑎᑕᐅᔭᕆᐊᖃᖅᑐᓂᒃ"

ᒥᐊᕆ ᓴᐃᒪᓐ, ᓯᕗᓪᓕᕐᐹᒃᑯᑦ ᐅᓂᒃᑳᓕᐊᑦ ᐃᑲᔪᖅᑎᒌᒃᑐᒃᑯᑦ ᐅᑭᐅᖅᑕᖅᑐᒥ ᐊᐅᓚᕙᓪᓕᐊᓂᕐᒧᑦ ᐃᔾᔪᐊᕈᒥᓇᖅᑐᑦ

ᑐᕌᒐᔅᓴᐃᑦ

ᐱᐊᓂᒋᐊᕋᓱᐊᕐᓗᒋᑦ ᓄᑖᓂᒃ ᐊᑐᐊᒐᔅᓴᓂᒃ ᐋᖅᑭᒃᓯᒪᔪᓂᒃ ᐱᐊᓂᒃᓯᒪᔪᓂᒃ ᑲᒪᒋᔭᐅᑦᑎᐊᖅᓯᒪᔪᒃᑯᑦ ᐊᑲᐅᓈᖅᑐᒃᑯᑦ ᒪᓕᓪᓗᒋᑦ ᑕᒪᒃᑭᑦ ᒐᕙᒪᒋᔭᐅᔪᓂᒃ, ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖑᔪᓂᒃ, ᓴᓇᕝᕕᓂᒃ ᐊᒻᒪᓗ ᐊᓯᖏᑦ ᐃᑲᔪᖅᑎᐅᔪᓂᒃ ᓇᓗᓇᐃᕆᐊᕐᓗᒋᑦ ᐊᑲᐅᙱᓕᐅᕈᑕᐅᔪᑦ ᐊᒻᒪᓗ ᐋᖅᑭᒋᐊᕈᑕᐅᔪᔅᓴᐅᔪᓂᒃ ᕿᒥᕐᕈᐊᕐᓂᖅ ᐋᖅᑭᒋᐊᕐᓗᒋᑦ ᐊᑲᐅᙱᓕᐅᕈᑕᐅᔪᑦ ᐊᒻᒪᓗ ᖃᐅᔨᓴᖃᑦᑕᕐᓗᒋᑦ ᐃᓗᐊᓈᕈᑎᔅᓴᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ.

ᓇᓗᓇᐃᔭᐃᓂᖅ

ᑲᓇᑕ ᐅᑭᐅᖅᑕᖅᑐᒦᑦᑐᖅ. ᑐᓪᓕᒋᔭᐅᑎᓪᓗᒍ ᐊᖏᓂᖅᐹᖑᓂᖓ ᐅᑭᐅᖅᑕᖅᑐᒥ, ᐅᑭᐅᖅᑕᖅᑐᕗᑦ ᐱᒻᒪᕆᐅᔪᖅ ᐃᓚᒋᓗᒍ ᑭᓇᐅᓂᕗᑦ ᓄᓇᖃᑎᒌᖕᓂᒃᑯᑦ ᐊᒻᒪᓗ ᖃᓄᐃᓕᐅᖃᑦᑕᕐᓂᕗᑦ ᓯᓚᕐᔪᐊᒥ ᑕᑯᓐᓇᙳᐊᕐᓗᒍ. ᑲᓇᑕᐅᑉ ᐅᑭᐅᖅᑕᖅᑐᖓ ᐊᖏᔪᒻᒪᕆᐊᓗᒃ ᐊᒻᒪᓗ ᐊᔾᔨᒌᙱᕈᓘᔭᖅᑐᑦ ᓄᓇᒋᔭᐅᔪᑦ ᐊᖏᕐᕋᕆᔭᐅᔪᑦ 200,00 ᐅᖓᑖᓂ ᐃᓄᖕᓂᑦ ᓇᓗᓇᐃᖅᓯᒪᔪᑦ ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᖃᓪᓗᓈᓂᒃ ᓄᓇᒋᔭᐅᔪᓂᒃ. ᐅᓂᒃᑲᐅᓯᒃᑯᑦ ᑐᓴᐅᒪᓂᒃᑯᑦ ᓄᓇᒋᔭᐅᔪᒥ, ᐊᒻᒪᓗ ᓄᓇᖃᖅᑳᖅᓯᒪᔪᑦ ᐃᓄᖏᑦ ᓄᓇᖃᖅᓯᒪᔪᑦ ᑕᐃᒪᖓ ᑕᐃᒪᖓᑦ, ᐃᑲᔪᖅᑎᒌᖏᓐᓇᖅᑐᑦ, ᐊᔪᙱᑦᑐᑦ ᐊᒻᒪᓗ ᐱᐊᓂᒍᓐᓇᖅᑐᑦ ᐊᓯᙳᖅᑕᕋᓗᐊᖅᑎᓪᓗᒍ ᐃᓅᓯᒥ. 150 ᐅᑭᐅᑦ ᖄᖏᖅᓯᒪᓕᖅᑐᑦ, ᑲᓇᑕᐅᑉ ᐅᑭᐅᖅᑕᖅᑐᖓ ᐊᖏᔪᒃᑯᑦ ᐊᖏᓪᓕᕙᓪᓕᐊᓯᒪᔪᖅ, ᐊᑐᐃᓐᓇᐅᔪᓐᓇᖅᑐᓂᒃ ᐊᒻᒪᓗ ᐃᒻᒥᑯᑦ-ᐱᔪᓐᓇᕐᓂᒃᑯᑦ.

50 ᐅᑭᐅᑦ ᖄᖏᖅᓯᒪᓕᖅᑐᑦ ᐊᓯᙳᐃᓐᓇᖅᑐᑦ ᐱᕙᓪᓕᐊᓯᒪᔪᑦ. ᓄᑖᑦ ᐃᓱᒪᔅᓴᖅᓯᐅᕈᑏᑦ ᐱᕙᓪᓕᐊᖁᓪᓗᒋᑦ ᐃᒻᒥᒃᑯᑦ−ᐱᔪᓐᓇᕐᓂᕐᒧᑦ ᐅᑭᐅᖅᑕᖅᑐᒥ ᓄᓇᖃᕐᓂᖅ ᐊᒻᒪᓗ ᓄᓇᒋᔭᐅᔪᒥ ᒐᕙᒪᖃᕐᓂᖅ ᑎᒍᔭᐅᓯᒪᔪᑦ, ᐃᓚᒋᓗᒍ ᓄᓇᓕᐅᖅᐸᓪᓕᐊᔪᑦ ᓄᓇᑖᕐᓂᒃᑯᑦ, ᐋᔩᖃᑎᒌᖕᓂᖅ ᐃᒻᒥᒃᑯᑦ−ᒐᕙᒪᖃᕐᓂᕐᒧᑦ ᐋᖅᑭᒃᓯᒪᓂᒃᑯᑦ, ᐱᕙᓪᓕᐊᓂᖅ ᐊᐅᓚᓂᕐᒧᑦ ᒐᕙᒪᕐᔪᐊᒃᑯᑦ ᐱᔪᓐᓇᕐᓂᖃᕐᓂᒃᑯᑦ ᓄᓇᒋᔭᐅᔪᒥ ᐊᒻᒪᓗ ᐱᕙᓪᓕᐊᓂᖅ ᓄᑖᒥᒃ ᓄᓇᖃᕐᓂᕐᒧᑦ (ᓄᓇᕗᑦ) ᐅᖃᐅᓯᕆᓗᒋᑦ ᐊᒥᓲᓗᐊᙱᑦᑐᓂᒃ ᐊᖏᔪᓂᒃ ᐱᐊᓂᒃᑕᐅᓯᒪᔪᓂᒃ.

ᐅᒡᒍᓯ 5, 2016-ᖑᑎᓪᓗᒍ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖏᑦ ᒥᓂᔅᑕᖓ ᑲᕈᓚᓐ ᐱᓂᑦ ᑐᓴᖅᑎᑦᑎᓚᐅᖅᑐᖅ ᐃᖅᑲᓇᐃᔮᔅᓴᒥᒃ ᒥᐊᕆ ᓴᐃᒪᓐᒥᒃ ᒥᓂᔅᑕᐅᓂᕐᒧᑦ ᑭᒡᒐᖅᑐᐃᓂᕐᒧᑦ ᐊᐅᓚᓗᓂ ᐃᓚᒌᖃᑎᒌᖕᓂᕐᒧᑦ ᐊᒻᒪᓗ ᐅᖃᐅᔾᔪᐃᖃᑦᑕᕐᓗᓂ ᓄᑖᓂᒃ ᐱᕙᓪᓕᐊᓂᔪᓂᒃ ᐃᑲᔪᖅᑎᒌᒃᑐᓄᑦ ᐊᐅᓚᑎᑦᑎᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐃᑉᐱᒋᔭᐅᑦᑎᐊᖅᓯᒪᔪᖅ ᐱᐊᓂᒃᓯᒪᔭᖏᑎᒍᑦ ᐅᖃᖅᑎᐅᓂᕐᒧᑦ ᐊᒻᒪᓗ ᐃᓅᓯᖃᑦᑎᐊᖅᑐᓂ ᐃᓅᓪᓗᓂ ᐊᐅᓚᑦᑎᔨ, ᓴᐃᒪᓐ ᐃᓕᓐᓂᐊᖅᓯᒪᔭᖏᑦ ᐊᒻᒪᓗ ᐊᔪᙱᓐᓂᖏᑦ ᑐᓴᖅᑎᑦᑎᒋᐊᖃᓚᐅᖅᑐᖅ ᒐᕙᒪᒃᑯᓐᓄᑦ ᑲᓇᑕᒥ ᐱᒻᒪᕆᐅᓂᖓᓄᑦ ᐊᑲᐅᙱᓕᐅᕈᑕᐅᔪᓂᒃ ᐅᑭᐅᖅᑕᖅᑐᒥ.

ᓴᐃᒪᓐ ᐅᓂᒃᑳᓕᐊᖏᑦ ᓇᓂᓯᓚᐅᖅᑐᑦ ᑲᓇᑕᐅᑉ ᐅᑭᐅᖅᑕᖅᑐᖓ ᑕᑯᔭᐅᓯᒪᔪᓂᒃ ᐊᓯᙳᖅᐸᓪᓕᐊᔪᓂᒃ ᑭᓯᐊᓂ ᐊᖏᔪᒃᑯᑦ ᐱᓕᕆᐊᔅᓴᖃᖅᑐᓂ ᐊᑯᓂᐅᔪᒃᑯᑦ ᐃᓄᖕᓄᑦ ᐅᖃᖃᑎᒌᖕᓂᕐᒧᑦ ᐊᒻᒪᓗ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐊᔪᕐᓇᖅᑐᓂᒃ. ᐅᓪᓗᒥᐅᓕᖅᑐᖅ, ᐊᐅᓚᕙᓪᓕᐊᓂᖓ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᕙᓪᓕᐊᔾᔪᑕᐅᔪᑦ ᐅᓪᓗᑕᒫᒧᑦ ᐃᓅᓯᕆᔭᐅᔪᑦ ᐅᑭᐅᖅᑕᖅᑐᒥᐅᑕᓄᑦ ᑲᓇᑕᒥ ᐊᒻᒪᓗ ᓄᓇᒋᔭᐅᔪᓂ ᐆᒪᔪᓂᒃ ᐊᒻᒪᓗ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓗᒋᑦ. ᑲᓇᑕᐅᑉ ᐅᑭᐅᖅᑕᖅᑐᖓ, ᖃᐅᔨᓴᖅᓯᒪᔭᖓ, "ᓇᓗᓇᖅᑐᒃᑯᑦ ᐋᖅᑭᒃᓯᒪᔪᑦ ᐱᕙᓪᓕᐊᓯᒪᔪᓂᒃ ᐅᑭᐅᖅᑕᖅᑑᑉ ᐅᖂᓯᕙᓪᓕᐊᓂᖓᓄᑦ ᒪᕐᕈᐃᓯᒪᓗᓂ ᐆᓇᕐᓂᖓᓄᑦ. ᑐᓴᖅᓯᒪᔪᖓ ᐅᖃᐅᓯᒋᔭᐅᖃᑦᑕᖅᑐᓂᒃ ᐊᒥᓱᐃᖅᑐᒍ ᐱᕙᓪᓕᐊᓂᖓ ᐅᖅᑰᓯᕙᓪᓕᐊᓂᖓᓄᑦ ᐅᑭᐅᖅᑕᖅᑐᒥ ᓂᕿᒋᔭᔪᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐃᓪᓗᖃᕐᓂᖅ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᖅ ᓄᓇᒥ ᐊᒻᒪᓗ ᑕᕆᐅᒥ."

ᐊᑕᐅᑦᑎᒃᑯᑦ, ᓴᐃᒪᓐ ᐱᒻᒪᕆᐅᔪᒃᑯᑦ ᐅᖃᐅᓯᖃᓚᐅᖅᑐᖅ ᐃᑉᐱᒋᔭᐅᑦᑎᐊᙱᒃᑲᓗᐊᕐᓗᓂ ᐊᖏᔪᒃᑯᑦ ᐱᕚᓪᓕᖅᓯᒪᔪᓂᒃ ᖁᓕᑦ ᐅᑭᐅᑦ ᖄᖏᖅᓯᒪᓕᖅᑐᓂᒃ ᐱᕚᓪᓕᕈᓐᓇᕐᓂᖅ ᐃᒻᒥᒃᑯᑦ−ᐱᔪᓐᓇᕐᓂᕐᒧᑦ ᐊᒻᒪᓗ ᐃᒻᒥᒃᑯᑦ ᒐᕙᒪᖃᕐᓂᕐᒧᑦ, ᑲᔪᓯᔪᓐᓇᕐᓂᖅ ᐃᓅᖃᑎᒌᖕᓂᒃᑯᑦ ᐊᒻᒪᓗ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐊᑲᐅᙱᓕᐅᕈᑕᐅᔪᓂᒃ ᑕᐃᒪᐅᙱᓐᓇᕐᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᓲᒻᒪᑦ, ᐊᐱᕆᔪᖅ "ᐅᑭᐅᖅᑕᖅᑐᖅ ᑲᔪᓯᕙ ᑕᑯᑎᑦᑎᓂᒃᑯᑦ ᐱᐅᙱᓐᓂᖅᐹᒃᑯᑦ ᐃᓅᖃᑎᒌᒃᑐᓂᒃ ᓇᓗᓇᐃᖅᓯᒪᔪᓂᒃ ᐃᓅᑦᑎᐊᕋᓱᐊᕐᓂᕐᒧᑦ?....ᓱᒻᒪᑦ, ᐊᔅᓱᕈᖅᑐᒃᑯᑦ−ᑮᓇᐅᔭᓕᐅᕈᑕᐅᔪᑦ ᐱᕙᓪᓕᐊᓂᕐᒧᑦ ᐊᐅᓚᑦᑎᒍᓐᓇᕐᓂᕐᒧᑦ, ᐊᒥᓱᑦ ᐃᓄᐃᑦ ᐃᑉᐱᒋᙱᓚᑦ ᐊᐅᓚᑦᑎᔪᓐᓇᕐᓂᕐᒧᑦ ᐊᒻᒪᓗ ᐃᓅᑦᑎᐊᕐᓂᕐᒧᑦ?"

ᓴᐃᒪᓐ ᑎᑎᕋᖅᓯᒪᔪᖅ ᐱᒻᒪᕆᐅᔪᓂᒃ ᐅᓂᒃᑳᓕᐊᓂᒃ ᐅᒃᑐᐱᕆ 2016-ᖑᑎᓪᓗᒍ ᐊᒻᒪᓗ ᑭᖑᓪᓕᖅ ᐅᓂᒃᑳᓕᐊᖓ ᒪᔨ 2017-ᖑᑎᓪᓗᒍ. ᐊᑐᐃᓐᓇᐅᔪᑦ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᑐᒥ ᑲᑐᔾᔨᖃᑎᒌᒃᑯᖏᑦ ᖃᕋᓴᐅᔭᒃᑯᑦ, ᐊᒻᒪᓗ (ᐊᒥᓱᙳᖅᑕᐅᓯᒪᔪᑦ ᐊᑐᐃᓐᓇᐅᔪᓐᓇᖅᑐᑦ ᑎᑎᕋᕐᓗᑎᒃ ᐅᕗᖓ ArctiqueEnsemble-ArcticTogether@canada.ca.) ᐱᓕᕆᐊᖓ ᐱᒻᒪᕆᐅᔪᖅ ᐱᕙᓪᓕᐊᓗᓂ ᐸᕐᓇᐅᑎᓂᒃ ᐊᑲᐅᓈᕐᓂᕐᒧᑦ ᐃᓅᖃᑎᒌᖕᓂᕐᒧᑦ ᐊᒻᒪᓗ ᑮᓇᐅᔭᓕᐅᕐᓂᕆᔭᐅᔪᓄᑦ ᐱᕙᓪᓕᐊᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ.

ᑎᓯᐱᕆ 2016−ᖑᑎᓪᓗᒍ, ᓯᕗᓕᖅᑎᒻᒪᕆᒃ ᑦᕈᑑ ᑐᓴᖅᑎᑦᑎᓚᐅᑐ ᐊᒥᓱᑲᓪᓚᓂᒃ ᐃᓱᒪᒃᓴᖅᓯᐅᕈᑎᔅᓴᓂᒃ ᐱᕚᓪᓕᕐᓗᒋᑦ ᐃᓗᐊᓈᕈᑎᔅᓴᓂᒃ ᐊᒻᒪᓗ ᓇᓗᓇᐃᕐᓗᒋᑦ ᐊᒃᓱᕈᕐᓇᖅᑐᓂᒃ ᐊᓯᙳᖅᐸᓪᓕᐊᑎᓪᓗᒍ ᐅᑭᐅᖅᑕᖅᑐᒥ ᐃᓚᒋᓗᒍ ᓄᑖᒥᒃ ᐅᑭᐅᖅᑕᖅᑐᒥ ᐊᑐᐊᒐᖏᓐᓂᒃ ᐋᖅᑭᒃᓯᒪᔪᓂᒃ ᐱᓕᕆᐊᕆᔭᐅᔪᔅᓴᓂᒃ ᐃᑲᔪᖅᑕᐅᔪᒃᑯᑦ−ᐱᕙᓪᓕᐊᓂᖅ ᓄᓇᖃᖅᑳᖅᓯᒪᔪᓄᑦ, ᓄᓇᖃᖅᑐᓄᑦ ᐊᒻᒪᓗ ᓄᓇᒋᔭᐅᔪᓄᑦ ᐃᑲᔪᖅᑎᒌᒃᑐᓄᑦ ᐃᓇᖐᕐᓂᐊᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐸᕐᓇᒍᑏᑦ ᐊᒻᒪᓗ ᐅᖃᐅᓯᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ  ᓯᓚᕐᔪᐊᒥᙶᖅᑐᓂᒃ ᐊᑐᐊᒐᖏᓐᓂᒃ.

ᑐᕌᖅᓯᒪᓂᖓ ᐋᖅᑭᒃᓯᒋᐊᕐᓂᕐᒧᑦ ᐱᓕᕆᐊᔅᓴᐃᑦ ᑐᓂᓯᓗᓂ ᑕᒪᒃᑭᓐᓂᒃ ᐱᒻᒪᕆᐅᔪᓂᒃ ᑐᕌᕐᓗᓂ ᒐᕙᒪᒃᑯᓐᓄᑦ ᑲᓇᑕᒥ ᓯᕗᓪᓕᐅᔭᕆᐊᖃᖅᑐᓂᒃ, ᐱᓕᕆᐊᕆᔭᐅᔪᓄᑦ ᐊᒻᒪᓗ ᑮᓇᐅᔾᔭᒃᓴᕋᓱᐊᕐᓂᕐᒧᑦ ᑐᖅᑯᖅᓯᒪᓂᖅ ᐅᑭᐅᖅᑕᖅᑐᒥ ᑭᒡᓕᒋᓗᒍ 2030. ᐱᓕᕆᐊᔅᓴᐃᑦ ᐋᖅᑭᒃᓯᒪᔪᑦ ᐅᑯᐊᖑᓂᐊᖅᑐᑦ:

  • ᑐᓴᖅᑎᑕᐅᓗᑕ ᓯᕗᓪᓕᐅᔭᕆᐊᖃᖅᑎᑕᐅᔪᓂᒃ ᐃᑲᔪᖅᑎᒌᖑᔪᒃᑯᑦ
  • ᓇᓗᓇᐃᕆᐊᕐᓗᒋᑦ ᐊᔪᕐᓇᙱᑦᑐᑦ ᐃᑲᔪᖅᑎᒌᒃᑐᓄᑦ/ᐊᑲᐅᓈᖅᑐᒃᑯᑦ ᐱᕙᓪᓕᐊᓄᒋᑦ ᐱᐊᓂᒋᐊᕐᓗᒋᑦ ᐃᑲᔪᖅᑎᒌᒃᑐᓄᑦ ᑐᕌᖅᑕᐅᓯᒪᔪᓄᑦ
  • ᐱᕙᓪᓕᐊᓗᒋᑦ ᐱᔭᐅᔪᒪᔪᑦ/ᐃᓗᐊᓈᕈᑎᔅᓴᐃᑦ ᓄᓇᒋᔭᐅᔪᓄᑦ ᓇᓗᓇᐃᕆᐊᕐᓗᒋᑦ ᐊᑕᖏᕐᓗᒍ ᑕᐃᒪᐅᔪᑦ ᐅᑭᐅᖅᑕᖅᑐᒥ ᐃᓕᑕᕆᔭᐅᔭᕆᐊᖃᕐᓂᖏᑦ

ᑲᓇᑕᓕᒫᒧᑦ−ᓄᓇᒋᔭᐅᔪᓂᑦ (Pan-Territorial) ᑕᐅᑐᙳᐊᖅᑕᖏᑦ ᐊᑲᐅᓈᕐᓂᕐᒧᑦ ᐊᕙᑎᒧᑦ ᐱᕙᓪᓕᐊᔪᓐᓇᕐᓂᖅ ᑐᙵᕝᕕᒋᔭᐅᓂᐊᖅᑐᖅ ᐅᑭᐅᖅᑕᖅᑑᑉ ᐋᖅᑭᒃᓯᒪᔭᖏᑎᒍᑦ ᐱᓕᕆᐊᔅᓴᖏᑦ, ᐃᓚᒋᓗᒍ ᑐᙵᕝᕕᐅᔪᑦ ᐱᕚᓪᓕᕈᑕᐅᕙᒃᑐᑦ ᐱᒻᒪᕆᐅᔪᓂᒃ ᐊᑐᐃᓐᓇᐅᔪᓐᓇᖅᑐᓂᒃ ᐱᕙᓪᓕᐊᓂᕐᒧᑦ, ᑮᓇᐅᔭᓕᐅᕐᓂᕆᔭᐅᔪᓂᒃ ᓄᑖᓂᒃ ᓴᖅᑭᑎᑦᑎᓂᕐᒧᑦ, ᐱᕚᓪᓕᕐᓗᒋᑦ ᓴᓇᕝᕕᐅᔪᑦ ᐊᒻᒪᓗ ᓄᑖᓂᒃ ᐃᓱᒪᒃᓴᖅᓯᐅᕐᓂᖅ ᓴᙱᔪᒃᑯᑦ ᐱᔪᓐᓇᕐᓂᖅ ᓄᓇᖃᖅᑐᓂᒃ ᑮᓇᐅᔭᓕᐅᕐᓂᕆᔭᐅᕙᒃᑐᓂᒃ ᐊᒻᒪᓗ ᐱᕚᓪᓕᕐᓗᒍ ᐃᒻᒥᒃᑯᑦ−ᐱᔪᓐᓇᕐᓂᕐᒧᑦ. ᓴᙱᓕᕚᓪᓕᕐᓗᒍ ᐊᒻᒪᓗ ᓄᑖᓂᒃ ᐱᓕᕆᐊᔅᓴᐅᔪᓐᓇᖅᑐᓂᒃ ᑮᓇᔭᐅᓕᐅᕐᓂᕆᔭᐅᕙᒃᑐᓂᒃ ᕿᑎᐊᓃᑎᑕᐅᒋᐊᕐᓗᒋᑦ ᐊᑲᐅᓈᕐᓂᒃᑯᑦ ᐊᕙᑎᓕᕆᓂᕐᒧᑦ ᓄᓇᖃᕈᓐᓇᕐᓂᕐᒧᑦ ᖃᐅᔨᒪᔭᐅᔪᒃᑯᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐃᒻᒥᒃᑯᑦ−ᐱᔪᓐᓇᕐᓂᒃᑯᑦ. ᑎᒍᓗᒋᑦ ᐃᓅᑦᑎᐊᕋᓱᐊᕐᓂᕐᒧᑦ, ᖁᕕᐊᓇᖅᑐᒃᑯᑦ ᐊᒻᒪᓗ ᐱᐊᓂᑦᑎᐊᕐᓂᕐᒧᑦ ᓄᓇᖃᕐᓂᖅ ᐊᑐᐃᓐᓇᐅᑎᑦᑎᓂᐊᖅᑐᖅ ᓄᓇᒋᔭᐅᔪᒥ ᐃᒻᒥᒃᑯᑦ−ᐱᕙᓪᓕᐊᓂᕐᒧᑦ ᑮᓇᐅᔾᔭᒐᓱᐊᕐᓂᕆᔭᐅᔪᒃᑯᑦ, ᐱᒻᒪᕆᐅᓂᐊᖅᑐᖅ ᑮᓇᐅᔭᓕᐅᕐᓂᕆᔭᐅᔪᓄᑦ ᓄᑖᓂᒃ ᐱᓕᕆᐊᔅᓴᕆᔭᐅᔪᓐᓇᖅᑐᓂᒃ ᐊᒻᒪᓗ ᓴᖅᑭᑎᑦᑎᓗᓂ ᐊᒥᓲᓂᖅᓴᒃᑯᑦ ᐃᒻᒥᒃᑯᑦ−ᐱᔪᓐᓇᕐᓂᒃᑯᑦ ᓄᓇᒋᔭᐅᔪᓂ. ᓴᓇᔭᐅᓯᒪᔪᑦ ᐆᑦᑑᑎᒋᓗᒍ ᐊᖅᑯᑏᑦ, ᐅᒥᐊᕐᔪᐊᓕᕆᕖᑦ, ᑐᕝᕖᑦ, ᒥᑦᑕᕐᕖᑦ, ᐊᔪᕐᓇᙱᑦᑐᒃᑯᑦ ᐊᐅᓚᔪᓐᓇᐅᑏᑦ ᓂᕈᐊᕈᓐᓇᕐᓂᖅ ᐊᒻᒪᓗ ᐃᓚᒋᔭᐅᔪᓐᓇᕐᓂᖅ ᐃᒪᒃᑯᑦ ᐊᐅᓚᔪᓐᓇᐅᑎᓂᒃ ᐋᖅᑭᒃᓯᒪᓂᖏᑦ ᐱᒻᒪᕆᐅᔪᑦ ᑮᓇᔭᐅᓕᐅᕐᓂᕆᔭᐅᕙᒃᑐᒃᑯᑦ ᓄᑖᓂᒃ ᐱᓕᕆᐊᔅᓴᕆᔭᐅᔪᓐᓇᖅᑐᓂᒃ ᐊᒻᒪᓗ ᐊᑭᓪᓕᕆᐊᕐᓗᒋᑦ ᐃᓅᒐᓱᐊᕐᓂᕐᒧᑦ ᓄᓇᒋᔭᐅᔪᓂᑦ. ᐃᒻᒥᒃᑰᖓᔪᑦ ᓄᓇᒋᔭᐅᔪᑦ ᒐᕙᒪᖏᑦ ᓴᙱᔪᒥᒃ ᐊᒻᒪᓗ ᐊᐅᓚᑦᑎᐊᖅᑐᒃᑯᑦ ᐃᑲᔪᖅᑎᒌᒃᑐᑦ ᐃᑲᔪᖅᑎᒌᖏᔭᑎᒍᑦ ᓄᓇᖃᖅᑳᖅᓯᔪᓄᑦ ᒐᕙᒪᖏᓐᓄᑦ ᐊᒻᒪᓗ ᑲᑐᔾᔨᖃᑎᒌᖏᑎᒍᑦ. ᐃᓚᒋᔭᐅᓂᖏᑦ ᐊᑐᐃᓐᓇᐅᔭᕆᐊᖃᖅᑐᑦ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐱᕙᓪᓕᐊᓂᕐᒧᑦ ᓄᓇᒋᔭᐅᔪᓄᑦ, ᐊᒻᒪᓗ ᐃᑲᔪᖅᑎᒌᖕᓂᕐᒧᑦ ᓄᓇᒋᔭᐅᔪᒥ ᐃᓅᑦᑎᐊᕋᓱᐊᕐᓂᕐᒧᑦ.

ᑐᓴᕈᒪᑦᑎᐊᖅᑐᒍᑦ ᑲᓇᑕᐅᑉ ᐅᑭᐅᖅᑕᖅᑐᒥᐅᑕᐅᔪᓂᒃ − ᑲᓇᑕᒥᐅᑕᓕᒫᓂᑦ − ᐃᓱᒪᒋᔭᖏᓐᓂᒃ ᐅᑭᐅᖅᑕᖅᑐᒥ. ᑕᒪᓐᓇ ᓇᓗᓇᐃᒃᑯᑕᐃᑦ ᑐᓂᓯᔪᖅ ᐱᕙᓪᓕᐊᔾᔪᑎᔅᓴᓄᑦ ᐃᓱᒪᔅᓴᖅᓯᐅᕈᑎᔅᓴᓄᑦ ᐊᒻᒪᓗ ᐅᖃᖃᑎᒌᖕᓂᕐᒧᑦ ᑐᕌᕐᓂᐊᖅᑐᓂᒃ ᓄᑖᓂᒃ ᐅᑭᐅᖅᑕᖅᑐᒥ ᐊᑐᐊᒐᖏᓐᓂᒃ ᐋᖅᑭᒃᓯᒪᔪᓂᒃ ᑲᓇᑕᒥ.

ᐋᖅᑭᒃᓯᒪᔪᑦ

ᑕᒪᓐᓇ ᓇᓗᓇᐃᒃᑯᑕᖅ ᐋᖅᑭᒃᑕᐅᓯᒪᔪᑦ ᐊᕐᕕᓂᓕᑎᒍᑦ ᐃᓱᒪᔅᓴᖅᓯᐅᕈᑎᔅᓴᓄᑦ, ᐱᕙᓪᓕᐊᔾᔪᑕᐅᔪᓐᓇᖅᑐᓂᒃ ᐅᖃᖃᑎᒌᖕᓂᒃᑯᑦ ᐃᑲᔪᖅᑎᒋᔭᑦᑎᓐᓄᑦ ᐊᒻᒪᓗ ᐊᓯᖏᓐᓄᑦ ᐃᑲᔪᖅᑐᓄᑦ:

  • ᑐᑭᓯᐊᓇᑦᑎᐊᖅᑐᒃᑯᑦ ᐅᑭᐅᖅᑕᖅᑐᒥ ᓴᓇᕝᕖᑦ
  • ᓴᙱᔪᒃᑯᑦ ᐅᑭᐅᖅᑕᖅᑐᒥ ᐃᓄᐃᑦ ᐊᒻᒪᓗ ᓄᓇᓖᑦ
  • ᓴᙱᔪᒥᒃ, ᐊᑲᐅᓈᖅᑐᒥᒃ ᐊᒻᒪᓗ ᓄᑖᓂᒃ ᐱᓕᕆᐊᔅᓴᒋᔭᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᓂᕆᔭᐅᔪᑦ
  • ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐊᒻᒪᓗ ᓄᓇᖃᖅᑳᖅᓯᒪᔪᒃᑯᑦ ᖃᐅᔨᒪᓂᑎᒍᑦ
  • ᓴᐳᒻᒥᓂᖅ ᐊᕙᑎᒧᑦ ᐊᒻᒪᓗ ᐱᓯᒪᑦᑎᓂᖅ ᐅᑭᐅᖅᑕᖅᑐᒥ ᐊᔾᔨᒌᙱᑦᑐᓂᒃ ᐆᒪᔪᓂᒃ
  • ᐅᑭᐅᖅᑕᖅᑐᒦᑦᑐᑦ ᓯᓚᕐᔪᐊᒥ ᑎᑎᕋᖅᓯᒪᓂᖏᑦ

ᐃᒻᒥᒃᑰᖓᔪᒃᑯᑦ ᑎᑎᕋᖅᓯᒪᔪᑦ ᐱᕙᓪᓕᐊᓯᒪᔪᑦ ᑐᑭᓯᐊᓇᖅᑐᒃᑯᑦ ᑕᐃᒪᐅᔪᓂᒃ, ᒪᓕᓪᓗᒍ ᑎᑎᕋᖅᓯᒪᖏᓂᑎᒍᑦ ᐊᒻᒪᓗ ᑐᕌᖅᑕᐅᓯᒪᔪᓂᒃ ᑐᕌᕋᓱᐊᖅᑐᑦ ᓇᓗᓇᐃᖅᑎᑦᑎᓂᕐᒧᑦ ᐅᖃᖃᑎᒌᖕᓂᕐᒧᑦ ᐊᐱᖅᓲᑎᓂᒃ ᑐᓂᔭᐅᓯᒪᔪᓂᒃ ᐅᕝᕙᓘᓐᓃᑦ ᐱᓗᐊᖅᑐᒍ ᑎᑎᕋᖅᓯᒪᓂᑎᒍᑦ.

ᐃᑲᔪᖅᑎᒌᖕᓂᒃᑯᑦ−ᐱᕙᓪᓕᐊᓂᖅ ᐅᑭᐅᖅᑕᖅᑐᒥ ᐊᑐᐊᒐᖏᑦ ᐋᖅᑭᒃᓯᒋᐊᕐᓂᖅ

"ᐃᑉᐱᒋᔪᖓ ᐱᒻᒪᕆᐅᔪᒥᒃ ᒫᓐᓇᐅᔪᖅ ᐃᖅᑲᐃᑎᑦᑎᓗᖓ ᐃᒻᒥᒃᑯᑦ ᐊᑯᓂᐅᔪᒃᑯᑦ ᐅᓂᒃᑳᖅᑐᐊᒃᑯᑦ ᑐᓴᐅᒪᓂᒃᑯᑦ ᑕᐅᑐᕐᕉᕐᓂᖅ, ᐱᕙᓪᓕᐊᓂᕐᒧᑦ ᐸᕐᓇᐅᑎᓂᒃ, ᐸᕐᓇᒍᑏᑦ ᐊᒻᒪᓗ ᐃᓱᒪᔅᓴᖅᓯᐅᕈᑏᑦ ᐊᑐᐊᒐᓕᐅᖅᐸᓪᓕᐊᓂᕐᒧᑦ 'ᐅᑭᐅᖅᑕᖅᑐᒧᑦ ᐊᒻᒪᓗ ᐱᖃᑎᒌᙱᑦᑐᒃᑰᕐᓗᒍ ᐅᑭᐅᖅᑕᖅᒧᑦ....ᓄᑖᓂᒃ ᐅᑭᐅᖅᑕᖅᑐᒥ ᐊᑐᐊᒐᓂᒃ ᐋᖅᑭᒃᓯᒪᔪᓂᒃ ᐱᕙᓪᓕᐊᓂᐊᖅᑐᑦ ᑕᒪᒃᑮᕐᓗᒋᑦ, ᐃᑉᐱᒋᑦᑎᐊᕐᓂᒃᑯᑦ ᐊᒻᒪᓗ ᐅᑉᐱᕈᓱᖕᓂᒃᑯᑦ ᐱᕙᓪᓕᐊᓂᕐᒧᑦ ᓴᖅᑭᑎᑦᑎᔪᓐᓇᖅᑐᒥᒃ (ᐊᒻᒪᓗ ᐱᓯᒪᑦᑎᓗᒋᑦ) ᑐᙵᕝᕕᐅᔪᓂᒃ ᐃᑲᔪᖅᑎᒌᒃᑐᓄᑦ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

ᑕᖅᑭᓂᒃ ᖃᐃᕙᓪᓕᐊᔪᒃᑯᑦ, ᒐᕙᒪᑦ ᑲᓇᑕᒃᑯᑦ ᐱᓕᕆᖃᑎᒌᖕᓂᐊᖅᑐᑦ ᑲᓇᑕᒥ ᐊᒻᒪᓗ ᓄᓇᒋᔭᐅᔪᓂᑦ ᓄᓇᖃᖅᑳᖅᓯᒪᔪᓂᒃ ᑲᑐᔾᔨᖃᑎᒌᖑᔪᓂᒃ, ᓄᓇᖃᖅᑳᖅᓯᒪᔪᑦ ᐊᖏᖃᑎᒌᒃᑐᑦ ᐃᑲᔪᖅᑎᒌᑦ ᐊᒻᒪᓗ ᒐᕙᒪᐃᑦ, ᒐᕙᒪᐃᑦ ᔫᑳᓐᒥ, ᓄᓇᑦᑎᐊᒥ, ᓄᓇᕗᒻᒥ, ᒫᓂᑑᐸᒥ, ᑯᐱᒃᒥ ᐊᒻᒪᓗ ᓂᐅᕙᓐᓛᓐᒥ ᐊᒻᒪᓗ ᓛᐸᑐᐊᒥ ᐱᕙᓪᓕᐊᓗᑎᒃ ᐊᑯᓂᐅᔪᒃᑯᑦ ᑕᑯᔪᒥᓇᖅᑐᒃᑯᑦ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᐊᒻᒪᓗ ᑲᓇᑕᐅᑉ ᖃᓄᐃᓐᓂᖏᓐᓄᑦ ᐅᑭᐅᖅᑕᖅᑐᒥ. ᑐᕌᖅᓯᒪᔪᖅ ᓇᓗᓇᐃᕆᐊᕐᓗᒋᑦ ᓇᔪᕐᕕᐅᓂᖓᑕ ᐅᑭᐅᖅᑕᖅᑐᒥ. ᑐᕌᖅᓯᒪᔪᖅ ᓇᓗᓇᐃᕆᐊᕐᓗᒋᑦ ᐅᑭᐅᖅᑕᖅᑐᒥᐅᑕᐃᑦ ᐊᒻᒪᓗ ᒐᕙᒪᐃᑦ ᓯᕗᓪᓕᐅᑎᑕᐅᒋᐊᖅᓯᒪᔪᒃᑯᑦ ᐊᑐᐊᒐᓂᒃ ᐃᓱᒪᒃᓴᖅᓯᐅᕐᓂᕐᒧᑦ ᐱᔾᔪᑎᖃᖅᑐᓂᒃ ᓯᕗᓂᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᒃ ᐊᒻᒪᓗ ᑲᓇᑕᐅᑉ ᖃᓄᐃᓐᓂᖏᓐᓄᑦ ᓇᔪᕐᕕᐅᓂᖓᑕ ᐅᑭᐅᖅᑕᖅᑐᒥ.

ᒐᕙᒪᑦ ᑲᓇᑕ ᐃᓕᑕᖅᓯᒪᔪᑦ ᐊᖏᔪᒃᑯᑦ ᐱᓕᕆᐊᕆᔭᐅᓯᒪᔪᓂᒃ ᐃᑲᔪᖅᑎᒌᒃᑐᓄᑦ ᐱᕙᓪᓕᐊᓗᑎᒃ ᓯᕗᓪᓕᐅᑎᑕᐅᔭᕆᐊᖃᖅᑐᓂᒃ ᐃᑉᐱᒋᑦᑎᐊᕐᓂᒃᑯᑦ ᓄᓇᒋᔭᐅᔪᓄᑦ. ᑕᒪᓐᓇ ᐱᕙᓪᓕᐊᔪᖅ ᐱᕙᓪᓕᐊᓯᒪᓂᐊᖅᑐᑦ ᐃᓇᖐᖅᓯᒪᙱᖔᖅᑐᒃᑯᑦ ᐱᒻᒪᕆᐅᔪᓂᒃ ᐱᓕᕆᐊᔅᓴᐅᔪᒃᑯᑦ. ᐱᓕᕆᐊᔅᓴᐃᑦ ᐋᖅᑭᒃᓯᒪᓂᖓ ᑕᑯᒥᓇᕐᓂᐊᖅᑐᖅ ᐊᔾᔨᒌᙱᑦᑐᒃᑯᑦ ᐃᓗᐊᓈᕈᑎᔅᓴᓂᒃ ᐊᒻᒪᓗ ᐊᒃᓱᕈᕐᓇᖅᑐᓂᒃ ᐊᔾᔨᒌᙱᑦᑐᓂᒃ ᓄᓇᒋᔭᐅᔪᓂᑦ, ᐃᑉᐱᒋᑦᑎᐊᖅᓯᒪᔪᒃᑯᑦ ᑭᒡᓕᖃᖅᑎᑕᐅᓯᒪᔪᑦ ᓄᓇᐃᑦ ᐱᓕᕆᐊᕆᔭᐅᔭᕆᐊᖃᖅᑐᑦ ᐊᒻᒪᓗ ᐊᖏᖅᑕᐅᓯᒪᔪᒃᑯᑦ. ᐃᓚᒋᐊᕐᓗᒍ, ᐱᓕᕆᐊᕆᔭᐅᓂᐊᖅᑐᑦ ᐱᓕᕆᐊᔅᓴᐃᑦ ᑕᑯᒥᓇᕐᓂᐊᖅᑐᒃᑯᑦ ᓯᕗᓪᓕᐅᑎᑕᐅᔭᕆᐊᖃᖅᑐᓂᒃ ᐃᑲᔪᖅᑎᒌᖕᓂᒃᑯᑦ ᓇᓗᓇᐃᖅᑕᐅᓯᒪᔪᑦ ᒐᕙᒪᒃᑯᓐᓄᑦ ᔫᑳᓐᒥ, ᓄᓇᑦᑎᐊᒥ ᐊᒻᒪᓗ ᓄᓇᕗᒻᒥ: ᓴᓇᕝᕖᑦ, ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐱᕙᓪᓕᐊᓂᖅ ᐊᒻᒪᓗ ᐃᓅᓯᖃᑦᑎᐊᕐᓂᕐᒧᑦ ᓄᓇᖃᖅᑐᓄᑦ. ᓄᓇᒋᔭᐅᔪᑦ ᓯᕗᓕᖅᑎᖏᑦ ᐅᖃᐅᓯᖃᓚᐅᖅᑐᑦ ᐅᓂᒃᑳᖏᓐᓂᒃ ᐅᒡᒍᓯ 31, 2017−ᖑᑎᓪᓗᒍ, ᐱᓕᕆᐊᔅᓴᐃᑦ ᐱᒻᒪᕆᐅᔪᒥᒃ ᐱᔾᔪᑎᖃᖅᑐᑦ "ᐱᕙᓪᓕᐊᓗᑎᒃ ᑕᒪᒃᑮᖕᓄᑦ ᓴᙱᔪᒥᒃ ᐅᑭᐅᖅᑕᖅᑐᒥ ᓄᓇᖃᖅᑐᓂᒃ ᐊᒻᒪᓗ ᐱᕙᓪᓕᐊᓗᓂ ᐊᔪᕐᓇᙱᑦᑐᒃᑯᑦ ᐊᒻᒪᓗ ᓄᑖᓂᒃ ᐱᓕᕆᐊᔅᓴᕆᔭᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᓂᕆᔭᐅᔪᒃᑯᑦ."

ᑕᒪᓐᓇ ᓄᑖᖅ ᐱᕙᓪᓕᐊᔾᔪᑕᐅᔪᖅ ᐊᑐᐊᒐᓄᑦ ᐱᕙᓪᓕᐊᓂᕐᒧᑦ ᐃᑲᔫᑎᒋᔭᐅᔪᑦ ᐊᖏᓂᖅᓴᒃᑯᑦ ᓄᓇᒧᑦ ᐊᑕᔪᒃᑯᑦ ᑐᔅᓯᕋᐅᑎᒧᑦ. ᐊᓯᖏᑦ ᐃᖅᑲᓇᐃᔮᖅᑕᐅᓯᒪᓂᑯᐃᑦ ᒐᕙᒪᕐᔪᐊᒃᑯᓐᓄᑦ ᐸᕐᓇᒍᑎᖏᑦ ᑐᕌᖓᓗᐊᖅᓯᒪᔪᑦ ᐊᖏᓂᖅᓴᐅᔪᓄᑦ ᓄᓇᒋᔭᐅᔪᓂᒃ ᐅᑭᐅᖅᑕᖅᑐᒥ, ᐋᖅᑭᒃᓯᒪᔪᑦ ᐱᓕᕆᐊᔅᓴᐃᑦ ᒫᓐᓇᐅᔪᑦ ᐱᕙᓪᓕᐊᑕᐅᓯᒪᔪᑦ ᐅᑯᐊᖑᔪᑦ:

  • ᔫᑳᓐ
  • ᓄᓇᑦᑎᐊᖅ
  • ᓄᓇᕗᑦ
  • ᐃᓄᐃᑦ ᓄᓇᖓᑦ
  • ᓄᓇᑦᑎᐊᕗᑦ ᓛᐸᑐᐊᒥ
  • ᓄᓇᒋᔭᐅᔪᖅ ᓄᓇᕕᒻᒥ ᑯᐱᒃᒥ
  • ᑐᓄᕕᐊ ᒫᓂᑑᐸ, ᐊᒻᒪᓗ ᑰᒡᔪᐊᖅ.

ᐋᖅᑭᒃᓯᒪᔪᑦ ᐱᓕᕆᐊᔅᓴᒧᑦ ᑎᒍᓯᓂᐊᖅᑐᑦ ᐃᓱᒪᔅᓴᖅᓯᐅᕈᑎᔅᓴᓂᒃ ᐊᒻᒪᓗ ᐃᓚᒋᔭᐅᔾᔪᑎᔅᓴᓂᒃ ᐊᔾᔨᒌᙱᑦᑐᒃᑯᑦ ᐊᑐᐃᓐᓇᐅᔪᓐᓇᖅᑐᓂᒃ, ᐃᓚᒋᓗᒋᑦ ᑎᑎᕋᖅᓯᒪᔪᓂᒃ ᑐᓂᔭᐅᓯᒪᔪᑦ ᐊᒻᒪᓗ ᐅᖃᐅᓯᐅᔪᒃᑯᑦ ᑐᓂᔭᐅᓯᒪᔪᓂᒃ ᓄᓇᓕᖕᓂ ᑲᑎᒪᑎᓪᓗᒋᑦ ᑕᑯᑎᑦᑎᓪᓗᑎᒃ ᓇᓗᓇᐃᖅᓯᑎᑦᑎᓂᕐᒥᒃ ᐊᖏᔪᒃᑯᑦ ᑐᕌᖅᓯᒪᔪᑦ ᒐᕙᒪᑦ ᑲᓇᑕᒧᑦ ᓯᕗᓪᓕᐅᑎᑕᐅᓯᒪᔭᕆᐊᖃᖅᑐᓂᒃ, ᐱᓕᕆᐊᕆᔭᐅᔪᓂᒃ ᐊᒻᒪᓗ ᑮᓇᐅᔭᓕᐅᕐᓂᕆᔭᐅᔪᓂᒃ ᐅᑭᐅᖅᑕᖅᑐᒥ.

ᐅᖃᖃᑎᒌᖕᓂᕐᒧᑦ ᐊᐱᖅᑯᑎ

  • ᓱᓇᐃᑦ ᐱᓕᕆᐊᕆᔭᐅᔪᓐᓇᖅᐸᑦ ᐃᑲᔫᑕᐅᓂᐊᖅᑐᓂᒃ ᓴᙱᔪᒥᒃ, ᐱᐊᓂᑦᑎᐊᖅᓯᒪᔪᒃᑯᑦ ᐊᒻᒪᓗ ᐊᑲᐅᓈᖅᑐᒃᑯᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ?

ᐃᓱᒪᒋᔭᐅᔪᑦ ᐅᖃᖃᑎᒌᖕᓂᕐᒧᑦ

ᐱᒻᒪᕆᐅᔪᓄᑦ ᐅᑭᐅᖅᑕᖅᑐᒥ ᓴᓇᕝᕖᑦ

"ᑭᓇᐅᒐᓗᐊᖅᐸᖅ ᐅᖃᖃᑎᒋᔭᕋ, ᐅᖃᐅᓯᐅᔪᖅ ᒪᑐᓂᐊᓕᖅᑐᒥᒃ ᓴᓇᕝᕕᒥᒃ ᐊᑲᐅᙱᓕᐅᕈᑕᐅᔪᑦ ᑕᐃᒪᐅᒐᔪᐃᓐᓇᖅᑐᖅ, ᐅᕝᕙᓘᓐᓃᑦ ᖁᑦᑎᓐᓂᖅᐹᖑᓪᓗᓂ, ᑎᑎᕋᖅᓯᒪᔪᓂᒃ ᐱᐅᓯᕚᓪᓕᖁᓪᓗᒋᑦ ᐃᓅᖃᑎᒌᑦ−ᑮᓇᐅᔭᓕᐅᕐᓂᕆᔭᐅᔪᑦ ᖃᓄᐃᑦᑑᓂᖏᓐᓄᑦ. ᐅᑭᐅᖅᑕᖅᑐᖅ ᐊᔾᔨᖃᙱᑦᑐᖅ ᓄᓇᒋᔭᐅᔪᒥ ᑲᓇᑕᒥ ᓴᓇᕝᕕᒋᔭᐅᔪᓄᑦ ᐱᖃᕆᐊᖃᖅᑐᓂᒃ ᓲᖃᐃᒻᒪ ᓇᒦᓐᓂᖓᓄᑦ ᓄᓇᖓ ᐊᒻᒪᓗ ᐊᖏᓂᐊᓄᑦ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

ᐊᑲᐅᙱᓕᐅᕈᑕᐅᔪᖅ

  • ᐱᒻᒪᕆᐅᔪᑦ ᐅᑭᐅᖅᑕᖅᑐᒥ ᓴᓇᕝᕖᑦ ᑐᕌᖅᓯᒪᔪᑎᒎᖓᔪᒃᑯᑦ ᐃᓅᖃᑎᒌᑦ, ᑮᓇᐅᔭᓕᐅᕈᑕᐅᕙᒃᑐᓂᒃ, ᐊᕙᑎᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᔭᐅᔪᒪᔪᑦ ᐅᑭᐅᖅᑕᖅᑐᒥᑦ ᓄᓇᖃᖅᑐᑦ ᐊᒻᒪᓗ ᓇᒻᒥᓂᖃᖅᑐᓄᑦ, ᑭᓯᐊᓂ ᐱᔾᔪᑎᖃᖅᑐᑦ ᐅᑭᐅᖅᑕᖅᒥᐅᑕᐃᑦ ᓄᓇᓖᑦ ᐱᕚᓪᓕᕋᓱᐊᕐᓂᕐᒧᑦ.

ᓇᓗᓇᐃᖅᓯᒪᔪᑦ

  • ᐱᖃᙱᓗᐊᕐᓂᖓ ᐃᖏᕐᕋᐅᑎᓂᒃ ᐊᒻᒪᓗ ᐃᑲᔪᖅᑎᒌᖕᓂᒃᑯᑦ ᐊᐅᓚᔪᓐᓇᐅᑎᔅᓴᓂᒃ ᓴᓇᕝᕕᒥᒃ ᑐᕌᖅᓯᒪᔪᒃᑯᑦ ᐊᒻᒪᓗ ᐊᑭᑐᔪᒃᑰᖓᔪᖅ ᑕᒪᒃᑭᓐᓄᑦ ᐃᓅᓇᓱᐊᕐᓂᕐᒧᑦ ᐊᒻᒪᓗ ᐊᑭᖏᑦ ᓇᒻᒥᓂᖃᕋᓱᐊᕐᓂᒧᑦ ᐅᑭᐅᖅᑕᖅᑐᒥ.
  • ᓄᓇᓖᑦ ᓄᓇᕗᒻᒥ ᐊᒻᒪᓗ ᓄᓇᕕᒻᒥ ᐊᑑᑎᖃᖅᑐᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᐱᔪᓐᓇᐅᑎᑕᖃᕈᓇᖁᓪᓗᒋᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᐅᑎᓂᒃ. ᐱᖃᙱᓗᐊᖅᑐᖅ ᖃᕋᓴᐅᔭᓕᕆᔪᓐᓇᐅᑎᓂᒃ ᐊᓯᖏᓐᓂᒃ ᓇᔪᕐᕕᐅᔪᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐊᑭᑐᓗᐊᕐᓂᖏᑦ ᖃᕋᓴᐅᔭᖃᕈᓐᓇᕐᓂᕐᒧᑦ ᐃᓚᒋᓪᓗᒍ ᐊᑭᑐᔪᐃᑦ ᐃᓅᓯᖃᕋᓱᐊᕐᓂᕐᒧᑦ.
  • ᐊᒥᓲᓗᐊᕐᓂᖅᓴᐅᔪᑦ ᐅᑭᐅᖅᑕᖅᑐᒥ ᓄᓇᓖᑦ ᐱᖃᓗᐊᙱᑦᑐᑦ ᐅᑭᐅᒧᓗᒃᑖᖅ ᐃᖏᕐᕋᐅᔾᔪᑎᔅᓴᓂᒃ ᑭᓯᐊᓂ ᑎᒻᒥᓲᒃᑯᑦ.
  • ᐊᒥᓱᐃᖅᑐᒃᑯᑦ ᐱᕙᓪᓕᐊᓯᒪᔪᑦ ᐅᒥᐊᕐᔪᐊᓂᒃ ᐃᖏᕐᕋᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑕᕆᐅᒥ.
  • ᑕᐃᒪᑲᓴᖅ ᒪᕉᒃ−ᐱᖓᓲᖓᔪᒃᑯᑦ ᐅᑭᐅᖅᑕᖅᑐᒥ ᓄᓇᖃᖅᑐᑦ ᐊᑑᑎᖃᖅᑐᑦ ᐅᖅᓱᓗᒻᒥᒃ ᐆᒻᒪᖅᑯᑎᓂᒃ ᐆᓇᖅᓯᕝᕕᒻᒧᑦ ᐊᒻᒪᓗ ᐆᒻᒪᖅᑯᑎᓄᑦ .
  • ᐃᒻᒪᖄ 95% ᓂᖀᑦ ᐅᑭᐅᖅᑕᖅᑐᒥ ᐊᒡᔭᖅᑕᐅᖃᑦᑕᖅᑐᑦ ᐅᒥᐊᕐᔪᐊᒃᑯᑦ, ᐊᒻᒪᓗ ᓂᖀᒋᔭᐅᓂᐊᖅᑐᑦ ᐅᑭᐅᖅᑕᖅᒥ ᓄᓇᖃᖅᑐᓄᑦ. ᓄᓇᒃᑰᕈᑎ ᑕᑭᔪᑦ ᐊᑐᖅᑕᐅᓂᖅᓴᐅᔪᑦ ᖁᑦᑎᓐᓂᖅᓴᒥ ᖃᓪᓗᓈᓂ ᓄᓇᖃᖅᑐᑦ ᐊᒥᓲᓗᐊᙱᑦᑐᑦ ᓄᓇᒋᔭᐅᔪᑦ, ᐃᓚᒋᓗᒍ ᓄᓇᒋᔭᖅ ᑰᒡᔪᐊᖅ, ᒫᓂᑑᐸ.
  • ᓯᓚᐅᑉ ᐊᓯᙳᖅᐸᓪᓕᐊᓂᖓ ᐱᕙᓪᓕᐊᔪᑦ ᐊᐅᓱᐃᑦᑐᖅ ᓄᓇᐅᑉ ᐊᑖᓂ, ᐃᒪᖅ ᐊᒻᒪᓗ ᓯᓚᐅᑉ ᖃᓄᐃᓐᓂᖓ ᓱᔪᕋᐃᑎᑦᑎᓲᖅ ᑕᐃᒪᐅᔪᓂᒃ ᓴᓇᕝᕕᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᓴᖅᑭᑎᑦᑎᔪᖅ ᐊᒃᓱᕈᕐᓇᖅᑐᓂᒃ ᐅᖃᐅᓯᕆᒋᐊᕐᓗᒋᑦ ᓴᓇᕝᕕᐅᔪᓄᑦ ᐱᕕᔅᓴᖃᙱᓗᐊᕐᓂᖏᓐᓄᑦ.

ᖃᓄᐃᓕᐅᖅᓯᒪᓂᑯᐃᑦ

ᐊᔪᕐᓇᖅᑐᖅ ᐊᕙᑎᖓ, ᐊᓯᙳᖅᐸᓪᓕᐊᔪᑦ ᓯᓚ ᐊᔾᔨᒌᙱᑦᑐᑦ, ᓇᐃᓈᖅᑐᒃᑯᑦ ᓴᓇᓂᖅ/ᐅᒥᐊᕐᔪᐊᒃᑯᑦ ᐃᖏᕐᕋᔪᑦ ᐊᐅᔭᒃᑯᑦ, ᐱᖃᙱᓗᐊᕐᓂᖓ ᓴᓇᕝᕕᐅᔪᓐᓇᖅᑐᓂᒃ ᐊᑐᐃᓐᓇᐅᔪᓐᓇᖅᑐᓂᒃ ᐊᒻᒪᓗ ᒥᑭᓗᐊᖅᑐᓂᒃ ᑖᒃᓰᔭᓂᕐᒧᑦ ᐋᖅᑭᑦᑕᐅᓯᒪᔪᑦ ᐱᔾᔪᑎᒋᔭᐅᔪᑦ ᐊᖏᔪᒃᑯᑦ ᐊᒃᓱᕈᕐᓇᖅᑐᓂᒃ ᐊᒻᒪᓗ ᐊᑦᑕᕐᓇᖅᑐᓂᒃ ᓴᓇᕝᕕᓂᒃ ᐊᒻᒪᓗ ᑲᔪᓯᔪᓐᓇᕐᓂᖅ ᓴᓇᕝᕕᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᑕᐃᒫᒃ, ᑲᓇᑕᐅᑉ ᐅᑭᐅᖅᑕᖅᑐᖓ ᐊᖏᔪᒥᒃ ᐱᖃᙱᓗᐊᕐᓂᖓ ᓴᓇᕝᕕᓂᒃ − ᐊᑕᐅᓯᓗᐊᖅ ᐊᖏᔪᒃᑯᑦ ᐊᒃᓱᕈᕐᓇᖅᑐᑦ ᐃᓅᖃᑎᒌᖕᓂᕐᒧᑦ−ᑮᓇᐅᔭᓕᐅᕈᑕᐅᕙᒃᑐᓄᑦ ᐱᕈᖅᐸᓪᓕᐊᓂᖅ, ᑐᐊᕕᕐᓇᖅᑐᒃᑯᑦ ᐊᐅᓚᓂᕐᒧᑦ, ᐊᑐᐃᓐᓇᐅᔪᓐᓇᖅᑐᓂᒃ ᐱᕙᓪᓕᐊᓂᖅ ᐊᒻᒪᓗ ᑕᐃᒪᐅᔪᓂᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪᓗ ᖃᓄᐃᓐᓂᖏᓄᑦ ᐃᓅᓯᐅᔪᓄᑦ ᐅᑭᐅᖅᑕᖅᑐᒥᐅᑕᓂᒃ.

ᐊᑕᐅᓯᙳᖅᑕᐅᓯᒪᔪᑦ ᐊᒻᒪᓗ ᐅᓪᓗᒥᐅᓕᖅᑐᓂᒃ ᐃᖏᕐᕋᕈᑏᑦ ᓴᓇᕝᕕᖏᑦ ᐱᒻᒪᕆᐅᔪᑦ ᓄᓇᒋᔭᐅᔪᓄᑦ. ᐅᑭᐅᖅᑕᖅᑐᒥ, ᓄᓇᒋᔭᐅᔪᒥ ᖃᐅᔨᒪᓂᖅ ᐊᒻᒪᓗ ᑮᓇᐅᔭᓕᐅᕐᓂᕆᔭᐅᔪᑦ ᐱᕙᓪᓕᐊᔪᑦ ᑭᒡᓕᖃᖅᑎᑕᐅᔪᑦ ᐱᖃᙱᓗᕐᓂᖓᓄᑦ ᐃᖏᕐᔪᔾᔪᑎᔅᓴᓂᒃ ᓴᓇᕝᕕᒻᒥᒃ. ᑕᒪᓐᓇ ᐱᖃᙱᓗᐊᕐᓂᖓᓄᑦ ᐊᒃᓱᕉᑎᒋᔭᐅᔪᖅ, ᐱᕕᔅᓴᖃᙱᓗᐊᕐᓂᖓᓄᑦ, ᐊᒻᒪᓗ ᐊᑭᑐᓗᐊᕐᓂᖓᓄᑦ ᓄᑦᑎᖅᑎᕆᓗᓂ ᐃᓄᖕᓂᒃ ᐊᒻᒪᓗ ᓂᕿᓂᒃ ᐅᑎᒧᑦ ᐅᑭᐅᖅᑕᖅᑐᒥ ᓄᓇᒋᔭᐅᔪᓂᑦ. ᑮᓇᐅᔾᔭᒃᓴᕋᓱᐊᕐᓂᕐᒧᑦ ᑐᖅᑰᓯᕝᕕᒃ ᒪᑭᒪᑎᑕᐅᔾᔪᑎ ᐅᑭᐅᖅᑕᖅᑐᒥ ᓴᓇᕝᕕᖕᓄᑦ, ᐆᑦᑑᑎᒋᓗᒋᑦ, ᐊᖅᑯᑏᑦ, ᖃᓪᓕᓂᑦᓴᐅᔭᖅᑎᑑᖓᔪᑦ ᓴᕕᒐᐅᔭᐃᑦ, ᒥᑦᑕᕖᑦ ᐊᒻᒪᓗ ᐅᒥᐊᕐᔪᐊᓕᕆᕝᕕᓂᒃ, ᐊᑐᐃᓐᓇᐅᔪᓐᓇᖅᑐᑦ ᐊᑲᐅᓈᖅᑐᒃᑯᑦ ᑮᓇᐅᔭᓕᐅᕈᑕᐅᕙᒃᑐᓂᒃ ᐃᓗᐊᓈᕐᕕᔅᓴᒧᑦ ᓄᓇᒋᔭᐅᔪᒥ, ᑲᓇᑕᒥ ᐊᒻᒪᓗ ᓯᓚᕐᔪᐊᒥ. ᑕᒪᒃᑯᐊ ᑮᓇᐅᔾᔭᒐᓱᐊᕈᑕᐅᔪᑦ ᐃᑲᔫᑎᖃᕐᓂᐊᖅᑐᑦ ᐊᑭᓪᓕᕆᐊᕐᓗᒋᑦ ᐃᓅᓇᓱᐊᕐᓂᕐᒧᑦ ᐊᒻᒪᓗ ᐊᐅᓚᓗᓂ ᓇᒻᒥᓂᖃᖅᑐᓂᒃ, ᐊᒻᒪᓗ ᐱᕙᓪᓕᐊᔾᔪᑕᐅᓗᓂ ᐱᕈᖅᐸᓪᓕᐊᓂᕐᒧᑦ ᖁᑦᑎᓐᓂᖅᓴᒃᑯᑦ ᐃᑉᐱᒋᔭᐅᓂᒃᑯᑦ, ᐅᑭᐅᖅᑕᖅᑐᒥ ᓄᓇᒋᔭᐅᔪᓄᑦ. ᐊᓯᖏᑦ ᐅᑭᐅᖅᑕᖅᑐᒥ ᐋᔩᖃᑎᒋᐅᔪᑦ ᓯᓚᕐᔪᐊᒥ ᐱᐊᓂᒃᓯᒪᔪᑦ ᑭᒃᑯᑐᐃᓐᓇᓄᑦ/ᓇᒻᒥᓂᖃᖅᑐᓄᑦ ᐃᑲᔪᖅᑎᒌᒃᑐᓄᑦ ᐱᕙᓪᓕᐊᓗᑎᒃ ᐱᑕᖃᕆᐊᖃᖅᑕᖏᓐᓂᒃ ᓴᓇᕝᕕᓂᒃ, ᐱᓗᐊᕐᓗᒍ ᐃᖏᕐᕋᐅᑎᓄᑦ ᓴᓇᕝᕖᑦ. ᐃᓗᐊᓈᕈᑎᔅᓴᐃᑦ ᕿᒥᕐᕈᐊᕐᓗᒋᑦ ᓄᑖᓂᒃ ᓴᖅᑭᑎᑦᑎᓗᓂ ᐱᕙᓪᓕᐊᔾᔪᑎᔅᓴᓂᒃ ᑭᒃᑯᑐᐃᓐᓇᓄᑦ/ᓇᒻᒥᓂᖃᖅᑐᓄᑦ ᐃᑲᔪᖅᑎᒌᒃᑐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐃᓚᒋᓗᒋᑦ ᒐᕙᒪᒃᑯᑦ ᑲᓇᑕᒥ ᑭᒃᑯᑐᐃᓐᓇᐃᑦ/ᓇᒻᒥᓂᖃᖅᑐᑦ ᐃᑲᔪᖅᑎᒌᒃᑐᓄᑦ ᑐᕌᕈᑎᔅᓴᖏᓂᒃ.

ᓯᓚᐅᑉ ᐊᓯᙳᖅᐸᓪᓕᐊᓂᖓ ᐱᔾᔪᑎᒋᔭᐅᖃᑕᐅᔪᖅ ᐊᑲᐅᙱᓕᐅᕈᑕᐅᔪᓂᒃ ᑕᐃᒪᐅᔪᓂᒃ ᓴᓇᕝᕕᓂᒃ. ᐊᐅᑦᑎᖅᐸᓪᓕᐊᔪᓂᒃ ᓄᓇᐅᑉ ᐊᑖᓂ ᐱᕙᓪᓕᐊᔾᔪᑕᐅᔪᖅ ᓱᕋᒃᐸᓪᓕᐊᔪᓂᒃ ᓴᓇᕝᕕᓂᒃ ᓇᔪᕐᕕᐅᔪᓐᓇᖅᑐᓂᒃ, ᐊᖅᑯᑎᓂᒃ, ᒥᑦᑕᕐᕕᓂᒃ, ᓱᓪᓗᕝᕕᒃᓴᓂᒃ ᐊᒻᒪᓗ ᓯᒡᔭᓴᑉᐱᒃᑯᑦ ᓴᓇᕝᕕᓂᒃ. ᐃᓱᒪᒋᓗᒍ ᓯᓚᐅᑉ ᐊᓯᙳᖅᐸᓪᓕᐊᓂᖓ ᓴᓇᕝᕕᓄᑦ ᑮᓇᐅᔾᔭᒐᓱᐊᕐᓂᕐᒧᑦ, ᐃᓚᒋᓗᒍ ᐱᐅᓯᕚᓪᓕᕐᓗᒍ ᐊᒻᒪᓗ ᓄᑖᙳᕆᐊᕐᓗᒋᑦ ᐊᒻᒪᓗ ᑮᓇᐅᔭᓕᐅᕋᓱᐊᕐᓗᓂ ᐃᓕᖅᑯᓯᐅᔪᒃᑯᑦ ᐊᒻᒪᓗ ᐊᓯᙳᖅᐸᓪᓕᐊᑐᐃᓐᓇᖅᑐᒃᑯᑦ ᐃᓱᒪᒃᓴᖅᓯᐅᕈᑎᔅᓴᓂᒃ ᐃᑲᔫᑎᖃᓂᐊᖅᑐᑦ ᓴᓇᕙᓪᓕᐊᓗᓂ ᒪᑭᒃᑲᓐᓂᕈᓐᓇᕐᓂᕐᒧᑦ, ᒥᑭᓪᓕᕆᐊᕐᓗᒋᑦ ᐊᑲᐅᙱᓕᐅᕈᑕᐅᔪᑦ ᐊᑦᑕᕐᓇᖅᑐᓂᒃ ᐊᒻᒪᓗ ᑮᓇᐅᔭᓂᒃ ᐱᓯᒪᒃᑲᓐᓂᕋᓱᐊᕐᓂᕐᒧᑦ ᐊᑯᓂᐅᓂᐊᕐᓂᖅᓴᒃᑯᑦ.

ᐊᒥᓲᑲᓴᒃᑐᑦ ᑮᓇᐅᔾᔭᒐᓱᐊᖅᑐᑦ ᑎᒍᔭᐅᓯᒪᔪᑦ ᒫᓐᓇᓵᖅ ᐅᑭᐅᖑᔪᒥ ᑭᓯᐊᓂ ᑐᕌᖅᑕᐅᓯᒪᔪᑦ ᓴᓇᕝᕕᓄᑦ ᑮᓇᐅᔾᔭᒐᓱᐊᕐᓂᕐᒧᑦ ᐊᑐᐃᓐᓇᐅᓯᓐᓇᕆᐊᖃᖅᑐᑦ ᑐᓂᓯᓗᓂ ᐃᓅᖃᑎᒌᖑᔪᑦ−ᑮᓇᐅᔭᔨᐅᕋᓱᐊᖅᑕᐅᕙᒃᑐᓄᑦ ᐱᕙᓪᓕᐊᓂᖅ ᓄᓇᒋᔭᐅᔪᒥ.

ᐆᑦᑑᑎᒋᓗᒋᑦ:

  • ᐱᕚᓪᓕᕐᓗᒍ ᐃᖏᕐᕋᐅᑎᓄᑦ ᓴᓇᕝᕕᖏᑦ ᒥᑭᓪᓕᕆᐊᕈᑕᐅᔪᓐᓇᖅᑐᑦ ᐊᑭᖏᓐᓄᑦ ᐃᓅᓇᓱᐊᕐᓂᕐᒧᑦ, ᐱᕙᓪᓕᐊᓗᓂ ᐱᐅᓂᖅᓴᒥᒃ ᐃᖏᕐᕋᐅᑎᓂᒃ ᐅᑎᒧᑦ ᓄᓇᒋᔭᐅᔪᓄᑦ, ᐊᒻᒪᓗ ᑎᒍᓯᓗᓂ ᐃᓗᐊᓈᕈᑎᔅᓴᓂᒃ ᓴᙱᓕᕚᓪᓕᖁᓪᓗᒍ ᐊᒻᒪᓗ ᐊᖏᓕᕙᓪᓕᐊᓗᒍ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ
  • ᐱᐅᓯᕚᓪᓕᕐᓗᒍ ᐃᓪᓗᓂᒃ ᐊᑐᖅᑐᐊᖃᑦᑕᖅᑐᓂᒃ ᐊᒻᒪᓗ ᐊᓯᖏᑦ ᐃᓅᖃᑎᒌᒃᑐᓄᑦ ᓴᓇᕝᕕᐅᔪᓂᒃ ᐱᐅᓯᕚᓪᓕᕈᓐᓇᖅᑐᑦ ᐃᓅᑦᑎᐊᕋᓱᐊᕐᓂᕐᒧᑦ ᐅᑭᐅᖅᑕᖅᑐᒥᐅᑕᓄᑦ ᐊᒻᒪᓗ ᓄᓇᖃᖅᑐᓄᑦ
  • ᐱᐅᓯᕚᓪᓕᕈᑕᐅᓗᓂ ᖃᕋᓴᐅᔭᓕᕆᖃᑦᑕᕐᓂᕐᒧᑦ ᐃᑲᔫᑎᒋᔭᐅᔪᓐᓇᖅᑐᖅ ᑲᑎᒋᐊᕐᓗᒍ ᖃᕋᓴᐅᔭᖃᕈᓐᓇᕐᓂᕐᒧᑦ ᐊᒻᒪᓗ ᑐᓂᓯᓗᓂ ᓄᑖᓂᒃ/ᐱᐅᓂᖅᓴᓂᒃ ᐃᓗᐊᓈᕈᑎᔅᓴᓂᒃ ᐅᑭᐅᖅᑕᖅᑐᒥᐅᑕᓄᑦ ᐱᔪᓐᓇᕐᓗᑎᒃ ᐅᖄᓚᐅᑎᒃᑯᑦ ᐋᓐᓂᐊᖅᑕᐃᓕᒪᓂᖅ, ᖃᕋᓴᐅᔭᒃᑯᑦ ᐋᓐᓂᐊᖅᑕᐃᓕᒪᓂᖅ ᐊᒻᒪᓗ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᔅᓴᓂᒃ ᐱᔨᑦᑎᕋᐅᑎᓂᒃ ᐊᒻᒪᓗ ᐱᕚᓪᓕᕐᓗᒍ ᑕᐃᒪᐅᑐᐃᓐᓇᕆᐊᖃᖅᑐᓂᒃ ᐃᓚᒋᔭᐅᔪᓐᓇᖅᑐᓂᒃ ᖃᕋᓴᐅᔭᓕᕆᓂᕐᒧᑦ ᐊᒻᒪᓗ ᐃᑲᔪᕐᓗᒋᑦ  ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ ᐱᕙᓪᓕᐊᔪᓂᒃ
  • ᐱᐅᓯᕚᓪᓕᕐᓂᖅ ᐊᐅᓚᔪᓐᓇᐅᑎᓂᒃ ᓴᓇᕝᕕᓂᒃ ᐊᖏᔪᒃᑯᑦ ᒥᑭᓪᓕᕆᐊᕈᓐᓇᖅᑐᑦ ᐊᑭᖏᓐᓂᒃ ᒐᕙᒪᒃᑯᓐᓄᑦ/ᓇᒻᒥᓂᖃᖅᑐᓄᑦ ᐊᒻᒪᓗ ᒥᑭᓪᓕᕆᐊᕐᓗᒋᑦ ᑕᒪᒃᑭᓐᓄᑦ ᐊᑭᖏᑦ ᐅᑭᐅᖅᑕᖅᑐᒥᐅᑕᓄᑦ
  • ᐱᕙᓪᓕᐊᓗᓂ ᓴᓇᕝᕕᒻᒥᒃ ᐋᖅᑭᒃᓯᒪᔪᓂᒃ ᐃᑲᔫᑎᐅᓂᐊᖅᑐᓂᒃ ᐸᕐᓇᐅᑎᓄᑦ, ᑎᑎᖅᑐᒐᖅᓯᒪᔪᓄᑦ, ᓴᓇᓂᕐᒧᑦ ᐊᒻᒪᓗ ᓄᑖᙳᕆᐊᕐᓗᒋᑦ ᓴᓇᕝᕖᑦ ᐃᓚᒋᔭᐅᔪᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᕙᓪᓕᐊᔪᓂᒃ

ᑐᒃᓯᕋᖅᑕᐅᓯᒪᔪᑦ ᖃᓄᐃᓐᓂᖏᑦ

  • ᐱᕚᓪᓕᕐᓗᒋᑦ ᐃᖏᕐᕋᐅᑏᑦ ᖃᕋᓴᐅᔭᓕᕆᓂᕐᒧᑦ
  • ᑕᐃᒪᐅᙱᓐᓇᖅᑐᓂᒃ ᐊᒻᒪᓗ ᐊᑐᐃᓐᓇᐅᔪᓐᓇᖅᑐᓂᒃ ᑐᐊᕕᕐᓇᖅᑐᖃᕐᓂᖅᐸᑦ ᑭᐅᔭᐅᔪᓐᓇᖅᑐᓂᒃ ᓴᓇᕝᕕᒥᒃ
  • ᐱᕚᓪᓕᕐᓗᒍ ᐅᖄᓚᐅᑎᓕᕆᓂᕐᒧᑦ/ᖃᕋᓴᐅᔭᓕᕆᓂᕐᒧᑦ
  • ᐱᕚᓪᓕᕐᓗᒍ ᐱᔪᓐᓇᐅᑎᓂᒃ ᐊᒻᒪᓗ ᓄᑖᓂᒃ ᐱᕙᓪᓕᐊᓗᓂ ᐃᓪᓗᖃᕐᓂᕐᒧᑦ ᐊᑐᖅᑐᐊᖃᑦᑕᖅᑐᓄᑦ ᓂᕈᐊᒐᔅᓴᓂᒃ
  • ᐱᕚᓪᓕᕐᓗᒍ ᓄᓇᒋᔭᐅᔪᒥ ᓴᓇᕝᕖᑦ ᐃᓚᒋᔭᐅᔪᓐᓇᖅᑐᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᕙᓪᓕᐊᔪᓂᒃ ᐱᕚᓪᓕᖅᓯᒪᔪᒃᑯᑦ ᐸᕐᓇᐅᑎᒃᑯᑦ ᐊᒻᒪᓗ ᐋᖅᑭᒃᓯᒪᔪᒃᑯᑦ
  • ᐱᕚᓪᓕᕐᓗᒍ ᓴᓇᕝᕖᑦ ᓯᓚᒧᑦ, ᐃᒪᒧᑦ ᐊᒻᒪᓗ ᓯᓚᓕᕆᓂᕐᒧᑦ, ᓯᑯᒧᑦ ᐱᔨᑦᑎᕋᐅᑎᓄᑦ ᐊᒻᒪᓗ ᐅᖓᓯᑦᑐᒃᑯᑦ ᓇᓗᓇᐃᒃᑯᑕᓂᒃ ᑐᓴᖅᑎᑦᑎᒍᑎᔅᓴᓂᒃ
  • ᐅᑎᖅᑎᑕᐅᓯᒪᔪᑦ/ᐱᕚᓪᓕᖅᓯᒪᔪᓂᒃ ᐃᓅᓯᖃᕈᓐᓇᕐᓂᖅ, ᓈᒻᒪᒃᑐᒃᑯᑦ ᓴᓇᕝᕕᓂᒃ

ᐅᖃᖃᑎᒌᖕᓂᕐᒧᑦ ᐊᐱᖅᓲᑎ

  • ᓱᓇᐅᕙᑦ ᐊᑐᖅᑕᐅᔪᓐᓇᖅᑐᑦ ᓯᕗᓪᓕᐅᑎᑕᐅᔭᕆᐊᖃᖅᑐᑦ ᓄᓇᒋᔭᕐᓄᑦ?

ᓴᙱᔪᒃᑯᑦ ᐅᑭᐅᖅᑕᖅᑐᒥ ᐃᓄᐃᑦ ᐊᒻᒪᓗ ᓄᓇᖃᖅᑐᑦ

"ᐊᖏᔪᒃᑯᑦ ᐊᒥᓲᑲᓴᒃᑐᓂᒃ ᐅᖃᖃᑎᒌᖃᑎᖃᖅᑐᓂ ᐊᐅᓚᑦᑎᔨᓄᑦ ᐊᒻᒪᓗ ᐊᓯᖏᓐᓄᑦ ᐃᑲᔪᖅᑎᐅᔪᓄᑦ ᐅᑎᓚᐅᖅᑐᑦ ᕿᑎᐊᓄᑦ ᐅᖃᐅᓯᐅᔪᓄᑦ: ᐃᓅᑦᑎᐊᕋᓱᐊᕐᓂᖅ, ᐃᓕᓐᓂᐊᖅᓯᒪᔪᑦ ᐃᓄᐃᑦ ᐱᐊᓂᒍᓐᓇᖅᑕᖏᓐᓂᒃ ᑕᐅᑦᑐᒍᒥᓇᖅᑐᒃᑯᑦ ᐊᑲᐅᓈᖅᑐᒥᒃ ᐱᕙᓪᓕᐊᓂᕐᒧᑦ....ᐊᒻᒪᓗ ᐱᐊᓂᒍᓐᓇᖅᑕᖏᓐᓂᒃ ᐃᓕᑕᖅᓯᓗᑎᒃ ᑕᐃᒪᐅᑐᐃᓐᓇᕆᐊᖃᖅᑐᓂᒃ ᓄᓇᑖᖅᓯᒪᓂᒃᑯᑦ ᐊᖏᕈᑎᐊᒍᑦ, ᐱᕙᓪᓕᐊᓗᓂ ᐊᐅᓚᓂᕐᒧᑦ ᒐᕙᒪᓕᕆᓂᕐᒧᑦ ᐊᒻᒪᓗ ᐃᒻᒥᒃᑯᑦ−ᒐᕙᒪᓕᕆᓂᕐᒧᑦ ᐊᖏᕈᑎᔅᓴᓂᒃ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

ᐊᑲᐅᙱᓕᐅᕈᑕᐅᔪᖅ

  • ᓴᙱᔪᒃᑯᑦ, ᐃᓅᑦᑎᐊᕐᓂᕐᒧᑦ ᐊᒻᒪᓗ ᐱᐊᓂᑦᑎᐊᖅᓯᒪᓂᒃᑯᑦ ᐅᑭᐅᖅᑕᖅᑐᒥ ᐃᓄᐃᑦ ᐊᒻᒪᓗ ᓄᓇᖃᖅᑐᓄᑦ

ᓇᓗᓇᐃᖅᓯᒪᔪᑦ

  • ᐅᑭᐅᖅᑕᖅᑐᖅ ᐱᕙᓪᓕᐊᓯᒪᔪᑦ ᓱᒃᑲᔪᒃᑯᑦ ᐃᓅᖃᑎᒌᖑᔪᓂᒃ ᐊᒻᒪᓗ ᐊᕙᑎᒧᑦ ᐊᓯᙳᖅᐸᓪᓕᐊᔪᒥᒃ.
  • ᐃᓄᐃᑦ ᐊᒥᓲᓂᖏᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᒪᒃᑯᒃᑐᖅ ᐊᒻᒪᓗ ᐱᕈᖅᐸᓪᓕᐊᓂᖓ.
  • ᐃᖅᑲᓇᐃᔮᔅᓴᖃᙱᓐᓂᖓ ᐅᑭᐅᖅᑕᖅᑐᒥᐅᑕᓄᑦ ᖁᑦᑎᓐᓂᖅᓴᐅᔪᖅ ᑲᓇᑕᒥ ᐊᒥᓲᓂᖏᓐᓄᑦ ᐊᒻᒪᓗ ᐊᒥᓱᐃᖅᓯᒪᔪᖅ 50%−ᒥᒃ ᐃᓚᖏᓐᓂ ᐅᑭᐅᖅᑕᖅᑐᒥ ᓄᓇᒋᔭᐅᔪᓂᑦ.
  • ᓄᓇᖃᖅᑳᖅᓯᒪᔪᑦ ᐅᑭᐅᖅᑕᖅᑐᒥ ᐃᓕᓯᒪᔪᑦ ᐊᔾᔨᒌᙱᑦᑐᓂᒃ ᖁᑦᑎᒃᑐᓂᒃ ᓈᓴᐅᑎᒃᑯᑦ ᐊᒥᓲᓗᐊᖅᑐᓂᒃ ᐊᑕᐅᓯᒥ ᐃᓪᓗᒋᔭᐅᔪᒥ ᐊᑲᐅᙱᑦᑐᓂᒃ.
  • ᐅᑭᐅᖅᑕᖅᑐᒥᐅᑕᐃᑦ ᐃᓕᓯᒪᔪᑦ ᖁᑦᑎᓐᓂᖅᓴᒃᑯᑦ ᐊᔾᔨᒌᙱᑦᑐᓂᒃ ᐱᕋᔭᒃᓯᒪᔪᓂᒃ ᐊᒻᒪᓗ ᐱᖃᓐᓈᒥᓐᓂᒃ ᐱᑦᑎᐊᖃᑦᑕᙱᓐᓂᕐᒧᑦ ᖃᓪᓗᓈᑦ ᓄᓇᖓᓐᓂᑦ.
  • ᓄᓇᖃᖅᑳᖅᓯᒪᔪᑦ ᐅᑭᐅᖅᑕᖅᑐᒥ ᐃᓕᓯᒪᔪᑦ ᐃᒻᒥᓃᖅᓯᒪᔪᑦ ᐊᒥᓲᓂᖏᑦ ᖁᑦᑎᓐᓂᖅᓴᐅᔪᑦ ᑕᐃᒃᑯᓄᖓ ᐃᓕᑕᐅᓯᒪᔪᓂᑦ ᑲᓇᑕᓕᒫᒥ. ᐃᒻᒥᓃᕐᓂᖅ ᐊᒥᓲᓂᖏᑦ ᐃᓄᖕᓄᑦ, ᐆᑦᑑᑎᒋᓗᒍ, ᐊᒥᓲᓂᖅᓴᐅᔪᑦ ᓯᓚᕐᔪᐊᓕᒫᒥ.
  • ᐊᒥᓲᓂᖏᑦ ᐋᓐᓂᐊᕈᑕᐅᔪᑦ ᐊᒻᒪᓗ ᐋᓐᓂᐊᕐᓂᖅ, ᐃᓚᒋᓗᒍ ᐳᕙᓪᓗᓐᓂ, ᐊᖏᔪᒃᑯᑦ ᖁᑦᑎᓐᓂᖅᓴᐅᔪᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓄᑦ ᑲᓇᑕᒥ−ᐃᓅᓐᓂᑯᐃᑦ ᖃᓪᓗᓈᓂᙶᖅᑐᓂᒃ.
  • ᐊᑦᑐᙱᕐᕕᒃ ᐊᒥᓲᓂᖏᑦ ᐅᑭᐅᖅᑕᖅᑐᒥ ᐊᖏᔪᒃᑯᑦ ᖁᑦᑎᓐᓂᖅᓴᐅᔪᖅ ᑲᓇᑕᓕᒫᒥ ᓈᓴᐃᓂᒃᑯᑦ.
  •  ᐋᓐᓂᐊᕐᕕᓕᐊᕈᓐᓇᕐᓂᖅ ᐱᔨᑦᑎᕋᐅᑎᖏᑦ ᐊᒃᓱᕈᕐᓇᖅᑐᑦ ᐅᑭᐅᖅᑕᖅᑐᒥ ᐅᖓᓯᓐᓂᖓᓄᑦ ᐊᒥᓱᓄᑦ ᓄᓇᒋᔭᐅᔪᓄᑦ.
  • ᑲᓇᑕᑐᐊᖅ ᑭᓯᒥ ᐅᑭᐅᖅᑕᖅᑐᒥ ᓄᓇᒋᔭᐅᔪᖅ ᓯᓚᕐᔪᐊᒥ ᖁᑦᑎᑦᑐᒃᑯᑦ ᓯᓚᑦᑐᖅᓴᕐᕕᖃᙱᑦᑐᑦ ᐅᑭᐅᖅᑕᖅᑐᒥ.

ᖃᓄᐃᓕᐅᖅᓯᒪᓂᑯᐃᑦ

ᐅᑭᐅᖅᑕᖅᑐᒥ ᓄᓇᓖᑦ ᐃᑲᔪᖅᑎᒌᓐᓇᖅᑐᑦ, ᐃᑲᔪᖅᑐᑦ ᐊᒻᒪᓗ ᓴᙱᔪᒃᑯᑦ ᓄᓇᖃᖅᑳᖅᓯᒪᔪᑎᒍᑦ ᐃᓕᖅᑯᓯᒥᑎᒍᑦ ᐊᒻᒪᓗ ᐊᑐᐃᓐᓇᐅᔭᖅᑕᖏᑦ ᐊᒻᒪᓗ ᓇᓗᓇᙱᑦᑐᒃᑯᑦ ᐅᑭᐅᖅᑕᖅᑐᒥᐅᑕᐃᑦ ᐃᓅᓯᖏᑦ. ᑖᒃᑯᐊ ᓄᓇᖃᖅᑐᑦ, ᑭᓯᐊᓂ, ᐊᖏᔪᒃᑯᑦ ᐊᒃᓱᕈᖅᑐᖅ ᐋᓐᓂᐊᖅᑕᐃᓕᒪᓂᕐᒧᑦ ᐊᒻᒪᓗ ᐃᓅᖃᑎᒌᖕᓂᒃᑯᑦ ᐊᒃᓱᕈᕐᓇᖅᑐᓂᒃ, ᐊᒥᓱᐃᑦ ᐅᓂᒃᑲᐅᓯᒃᑯᑦ ᑐᓴᐅᒪᓂᖅ, ᓄᓇᒋᔭᐅᓂᒃᑯᑦ ᓯᓚᕐᔪᐊᒥᑦ ᐊᒻᒪᓗ ᐋᖅᑭᒃᓯᒪᓂᑎᒍᑦ.

ᐊᒥᓱᑦ ᐅᑭᐅᖅᑕᖅᑐᒥᐅᑕᐃᑦ ᑲᓇᑕᒥ ᐊᒃᓱᕈᖅᓯᒪᔪᑦ ᑕᐃᒪᐅᖏᓐᓇᖅᑐᓂᒃ ᓄᓇᒋᖃᖅᑐᓂᒃ ᐊᐅᓚᑕᐅᔪᑦ, ᐃᓚᒋᓗᒍ ᐱᓐᓂᑰᔪᓂᒃ ᐊᓪᓚᐃᑦ ᐊᖏᕐᕋᖃᖅᑐᓄᑦ ᐃᓕᓐᓂᐊᕐᕕᒃ ᐋᖅᑭᒃᓯᒪᓂᖏᑦ, ᐃᓄᐃᑦ ᖁᑦᑎᑦᑐᒥ ᐅᑭᐅᖅᑕᖅᒥ ᓅᑎᑕᐅᓂᑯᐃᑦ ᐊᒻᒪᓗ ᐊᓯᖏᑦ ᐃᓚᒌᑦ ᐊᕐᕌᒍᖏᑕ ᖃᓂᒌᒃᑐᓂᒃ ᐱᓯᒪᓐᓂᑯᓂᒃ. ᐅᑭᐅᖅᑕᖅᑐᖅ ᑲᓇᑕᐅᒥᐅᑕᐃᑦ ᐊᒻᒪᓗ ᓄᓇᒋᔭᖏᑦ ᐊᒃᓱᕈᕐᓇᖅᑐᒃᑰᕐᓂᐊᖅᑐᑦ ᐃᓅᓯᒥᓐᓂ, ᐃᓚᒋᓗᒋᑦ ᐅᑯᐊ:

  • ᐃᓪᓗᖃᙱᓗᐊᕐᓂᖏᑦ
  • ᐱᐅᙱᑦᑐᓂᒃ ᑎᒥᒃᑯᑦ ᐊᐅᓚᔪᓐᓇᖅᑐᒃᑯᑦ/ᐃᓱᒪᒃᑯᑦ ᐋᓐᓂᐊᖅᑕᐃᓕᒪᓂᕐᒧᑦ ᖁᑦᑎᑦᑐᒃᑯᑦ ᐋᓐᓂᐊᕐᓇᖅᑐᖃᖅᑎᓪᓗᒍ ᐊᒻᒪᓗ ᐃᒻᒥᓃᕈᒪᔪᓂᒃ
  • ᓂᕿᖃᑦᑎᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᑦ
  • ᐱᕕᔅᓴᖃᙱᓗᐊᕐᓂᖓᓄᑦ ᖁᑦᑎᑦᑐᒃᑯᑦ ᐃᓕᓐᓂᐊᕈᓐᓇᖅᑐᓂᒃ ᐊᒻᒪᓗ ᓄᑕᖅᑲᓄᑦ ᒥᐊᓂᕆᔭᐅᓂᕐᒧᑦ ᐃᓗᐊᓈᕈᑎᔅᓴᓂᒃ
  • ᐊᑦᑎᓂᖃᓗᐊᙱᓐᓂᖓ ᐃᓕᓐᓂᐊᕈᑎᔅᓴᓄᑦ ᖃᓄᐃᓕᐅᖅᓯᒪᓂᖏᑦ ᐊᒻᒪᓗ ᐃᖅᑲᓇᐃᔮᒧᑦ ᐃᓗᐊᓈᕈᑎᔅᓴᓂᒃ ᑲᓇᑕᓕᒫᒥ

ᑎᑎᕋᖅᑕᐅᓯᒪᔪᑦ ᓴᐃᒪᓐᒧᑦ ᑭᖑᓪᓕᐅᑉ ᐅᓂᒃᑳᓕᐊᖓᓂ, "ᐊᖅᑯᑎᐅᓂᖓ ᐋᓐᓂᐊᖅᑕᐃᓕᒪᓂᕐᒧᑦ, ᐊᐅᓚᔪᓐᓇᕐᓂᖅ ᓄᓇᖃᑎᒌᒃᑐᓄᑦ ᐅᑭᐅᖅᑕᖅᑐᒥ ᐱᕙᓪᓕᐊᓲᖑᔪᑦ ᐊᒻᒪᓗ ᐱᐊᓂᓲᖑᔪᑦ ᐃᓕᓐᓂᐊᕐᓂᕐᒨᖓᔪᓂᒃ...ᐃᓕᓐᓂᐊᕐᕖᑦ ᐊᑐᐊᒐᖏᑦ ᐅᑭᐅᖅᑕᖅᑐᒥ ᐃᓚᒋᔭᕆᐊᖃᖅᑐᑦ ᐃᓕᖅᑯᓯᒃᑯᑦ ᐊᑐᐊᒐᒃᓴᓂᒃ, ᐊᑐᖅᑕᐅᔪᓐᓇᖅᑐᓂᒃ ᐊᒻᒪᓗ ᐊᔪᕐᓇᙱᑦᑐᒃᑯᑦ" ᑎᓴᒪᑦ ᐊᒡᒐᐃᑦ ᐅᑭᐅᑦ ᖄᖏᖅᓯᒪᓕᖅᑐᑦ, ᒐᕙᒪᐃᑦ ᐊᒻᒪᓗ ᐃᓕᓐᓂᐊᕐᕖᑦ ᑲᑎᒪᔨᖏᑦ ᐅᑭᐅᖅᑕᖅᑐᒥ ᐱᕚᓪᓕᖅᓯᒪᔪᑦ ᑎᒍᓯᓗᑎᒃ ᐅᑭᐅᖅᑕᖅᑐᒥ−ᖃᓪᓗᓈᑦ ᓄᓇᖓᓐᓂᙶᖅᑐᓂᒃ ᐃᓕᓐᓂᐊᕈᑎᔅᓴᓂᒃ ᐃᑲᔪᖅᑎᒌᒃᑐᓂᒃ ᐊᒻᒪᓗ ᐱᕙᓪᓕᐊᓯᒪᓪᓗᑎᒃ ᓴᓇᔭᐅᓯᒪᔪᑦ−ᐅᑭᐅᖅᑕᖅᑐᒥ/ᐃᓕᖅᑯᓯᒃᑯᑦ−ᓈᒻᒪᒃᑐᒃᑯᑦ ᐃᓕᓐᓂᐊᕈᑎᔅᓴᓂᒃ ᐃᑲᔫᑎᖃᖅᑐᓂᒃ ᓄᓇᖃᖅᑳᖅᓯᒪᔪᓂᒃ ᐅᖃᐅᓯᖏᓐᓂᒃ ᐊᒻᒪᓗ ᐃᓕᖅᑯᓯᖏᓐᓂᒃ ᑭᓯᐊᓂ ᐊᒥᓱᒃᑲᓐᓂᕐᓂᒃ ᐱᔭᕆᐊᖃᖅᑐᑦ ᓇᓗᓇᐃᕆᐊᓗᒋᑦ ᐅᑭᐅᖅᑕᖅᑐᒥᐅᑕᐃᑦ ᐃᓕᓐᓂᐊᕈᓐᓇᕐᓂᐊᖅᑕᖏᓐᓂᑦ ᐊᔪᙱᓐᓂᒃᑯᑦ ᐃᓚᒋᔭᐅᓗᑎᒃ ᐊᒻᒪᓗ ᐃᑲᔫᑕᐅᓗᑎᒃ ᐱᕈᖅᐸᓪᓕᐊᓂᕐᒧᑦ ᐊᒻᒪᓗ ᐊᒥᓲᕙᓪᓕᐊᓗᒋᑦ ᐊᖏᓂᖅᓴᒧᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ.

ᑲᓇᑕᐅᑉ ᐅᑭᐅᖅᑕᖅᑐᖓ ᐊᑦᑕᕐᓇᑲᓴᒃᑐᖅ ᐱᕙᓪᓕᐊᔪᓄᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ. ᑲᓇᑕᐅᑉ ᐃᒃᑮᕐᓇᕐᓂᖓ ᐱᕚᓪᓕᖅᓯᒪᔪᖅ ᐊᒥᓲᓂᖅᓴᐅᔪᒃᑯᑦ ᓯᓚᐅᑉ ᖃᓄᐃᓐᓂᖓᓄᑦ ᓯᓚᕐᔪᐊᓕᒫᒥ ᓈᓴᐅᑎᒃᑯᑦ, ᐃᒃᑭᕐᓇᕐᓂᖓ ᖁᑦᑎᓯᕙᓪᓕᐊᔪᑦ ᓱᒃᑲᔪᒃᑯᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᑭᐅᖅᑕᖅᑐᒥ ᓇᔪᕐᕕᐅᔪᓂᑦ. ᐊᒥᓱᐃᑦ ᐅᑭᐅᖅᑕᖅᑐᒥᐅᑕᐃᑦ, ᐱᓗᐊᖅᑐᒍ ᓄᓇᖃᖅᑳᖅᓯᒪᔪᑦ ᐃᓄᐃᑦ, ᓴᙱᔪᒃᑯᑦ ᐱᔪᓐᓇᐅᑎᑕᖃᖅᑐᑦ ᓄᓇᒧᑦ, ᐃᒪᒧᑦ, ᐊᒻᒪᓗ ᓯᓚᒧᑦ. ᑕᒪᓐᓇ ᐊᑦᑐᐊᓂᖓ ᑐᓂᓯᔪᖅ ᓴᙱᓂᒥᒃ, ᑐᑭᓯᐊᔾᔪᑎᔅᓴᓂᒃ, ᐊᒻᒪᓗ ᒪᑭᑕᓂᕐᒧᑦ. ᐊᑕᐅᑦᑎᒃᑯᑦ, ᑭᓯᐊᓂ, ᐱᕚᓪᓕᖅᓯᒪᔪᑦ ᐅᑭᐅᖅᑕᖅᑐᒥ ᑲᓇᑕᒥ ᐊᑦᑕᕐᓇᕐᓂᖓᓄᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᕙᓪᓕᐊᔪᓂᒃ.

ᐊᒥᓲᔪᑦ ᐱᓕᕆᐊᕆᔭᐅᔭᕆᐊᖃᖅᑐᑦ ᑐᓴᖅᑎᑕᐅᓗᑎᒃ ᑕᐃᒪᐅᓯᒪᔪᑦ ᐊᑲᐅᙱᓕᐅᕈᑕᐅᔪᓂᒃ ᐊᒥᓲᕙᓪᓕᐊᔪᑦ ᐱᕙᓪᓕᐊᔪᓂᒃ ᐃᓅᓯᐅᔪᓄᑦ ᐅᑭᐅᖅᑕᖅᑐᒥᐅᑕᐅᓄᑦ ᐊᒻᒪᓗ ᓄᓇᖃᖅᑐᓄᑦ. ᑐᓂᓯᓗᒋᑦ ᐃᓄᐃᑦ, ᐃᓚᒌᒃᑐᑦ ᐊᒻᒪᓗ ᓄᓇᖃᖅᑐᑦ, ᐊᒻᒪᓗ ᐱᕚᓪᓕᕐᓗᒍ ᐊᑐᐃᓐᓇᐅᔪᓐᓇᖅᑐᓂᒃ ᐊᑲᐅᓈᖅᑐᒃᑯᑦ ᐱᔨᑦᑎᕋᐅᑎᓂᒃ, ᐃᑲᔫᑎᖃᕐᓂᐊᖅᑐᑦ ᐃᓅᖃᑎᒌᑦ−ᑮᓇᐅᔭᓕᐅᕐᓂᕆᔭᐅᕙᒃᑐᒃᑯᑦ ᐊᒻᒪᓗ ᐃᓕᖅᑯᓯᐅᔪᒃᑯᑦ ᐊᔾᔨᒌᙱᑦᑐᒃᑯᑦ ᐃᓕᑕᐅᓯᒪᓃᑦ ᐅᑭᐅᖅᑕᖅᑐᒥᐅᑕᓄᑦ ᐊᒻᒪᓗ ᓄᓇᖃᖅᑐᓂᑦ. ᓄᓇᖃᖅᑳᖅᓯᒪᔪᑦ−ᐊᐅᓚᑕᖏᑦ ᐱᓯᒪᔭᖏᑦ, ᐃᑲᔪᖅᑕᐅᓗᑎᒃ ᒐᕙᒪᒃᑯᓐᓄᑦ ᐊᒻᒪᓗ ᐊᓯᖏᓐᓄᑦ ᐃᑲᔪᖅᑎᒌᒃᑐᓄᑦ, ᓇᓗᓇᐃᖅᑎᑦᑎᓂᐊᖅᑐᖅ ᐱᒻᒪᕆᐅᔪᒥᒃ ᐱᐊᓂᒋᐊᕐᓂᕐᒧᑦ ᐱᕚᓪᓕᖅᓯᒪᔪᒃᑯᑦ ᐋᓐᓂᐊᖅᑕᐃᓕᒪᓂᕐᒧᑦ, ᑮᓇᐅᔭᓕᐅᕐᓂᕆᔭᐅᕙᒃᑐᒃᑯᑦ, ᐅᖃᐅᓯᒃᑯᑦ ᐊᒻᒪᓗ ᐃᓕᖅᑯᓯᒃᑯᑦ ᐅᑭᐅᖅᑕᖅᑐᒥ ᓄᓇᖃᖅᑐᓄᑦ.

ᐊᐅᓚᑎᑦᑎᔪᓐᓇᕐᓂᖅ ᑲᒪᒋᔭᐅᔪᓂᒃ ᑮᓇᐅᔭᓕᐅᕈᑕᐅᕙᒃᑐᓂᒃ ᐱᕙᓪᓕᐊᓂᖅ ᐱᕚᓪᓕᖁᓗᒍ ᐊᔪᙱᔾᔪᑎᔅᓴᓄᑦ ᐱᕙᓪᓕᐊᓂᖅ, ᐃᖅᑲᓇᐃᔮᒧᑦ ᐃᓗᐊᓈᕈᑎᔅᓴᓂᒃ, ᐃᓚᒋᔭᐅᔪᓐᓇᕐᓂᖅ ᑮᓇᐅᔭᓕᐅᕈᑕᐅᕙᒃᑐᓂᒃ, ᐃᓕᓐᓂᐊᓕᓵᖅᑐᒃᓴᓄᑦ ᐃᓕᓐᓂᐊᖅᑎᑦᑎᓂᖅ ᐊᒻᒪᓗ ᓄᑕᖅᑭᕆᕝᕕᒃ ᐊᒻᒪᓗ ᐱᕚᓪᓕᕐᓗᒋᑦ ᓄᓇᒋᔭᔪᓂ ᓴᓇᕝᕕᓂᒃ, ᐃᓚᒋᓗᒋᑦ, ᐊᑦᑕᕐᓇᖅᑕᐃᓕᒪᓂᒃᑯᑦ, ᐊᐅᓚᔪᓐᓇᐅᑎᓂᒃ ᐊᑲᐅᓈᖅᑐᓂᒃ, ᓯᓚᐅᑉ ᖃᓄᐃᓐᓂᖓᓄᑦ ᐊᒻᒪᓗ ᐃᓕᖅᑯᓯᒃᑰᖓᔪᒃᑯᑦ ᐃᓪᓗᓕᕆᓂᖅ, ᐊᒃᓱᕈᕐᓇᓂᐊᖅᑐᑦ ᓴᓇᕙᓪᓕᐊᓗᒋᑦ ᓴᙱᔪᒥᒃ ᐅᑭᐅᖅᑕᖅᑐᒥ ᓄᓇᖃᖅᑐᓄᑦ. ᐱᒋᐊᒃᑲᓐᓂᕐᓗᒍ, ᑐᓴᖅᑎᑦᑎᓗᓂ ᐊᑯᓂᐅᔪᒃᑯᑦ ᐋᓐᓂᐊᖅᑕᐃᓕᒪᓂᕐᒧᑦ ᐊᒻᒪᓗ ᐃᓅᓇᓱᐊᑦᑎᐊᕐᓂᕐᒧᑦ ᐊᑲᐅᙱᓕᐅᕈᑕᐅᔪᓂᒃ ᐆᑦᑑᑎᒋᓗᒍ ᐊᒥᓲᓂᖏᑦ ᐃᒻᒥᓃᖃᑦᑕᖅᑐᓂᒃ, ᐊᒥᓲᓂᖏᑦ ᐳᕙᓪᓗᒃᑐᓂᒃ ᐊᒻᒪᓗ ᓂᕿᓄᑦ ᐊᑦᑕᕐᓇᖅᑐᓂᒃ ᑕᐃᒪᐅᑐᐃᓐᓇᕆᐊᖃᖅᑐᓂᒃ.

ᒐᕙᒪᑦ ᑲᓇᑕᒃᑯᑦ ᐃᓕᑕᖅᓯᒪᔪᑦ ᓄᓇᒋᔭᐅᔪᒥ ᐃᓱᒪᒃᓴᖅᓯᐅᕐᓂᖅ−ᐃᓱᒪᓕᐅᕐᓂᖅ ᐊᑐᐃᓐᓇᐅᓂᖓᓄᑦ ᐃᑲᔫᑕᐅᓗᑎᒃ ᓴᙱᔪᒧᑦ ᐅᑭᐅᖅᑕᖅᑐᒥ ᓄᓇᖃᖅᑐᓄᑦ. ᐋᔩᖃᑎᒌᖕᓂᖅ ᐊᖏᕈᑎᖏᑦ ᓅᒋᐊᕐᓗᒋᑦ ᒐᕙᒪᓕᕆᔨᕐᔪᐊᒃᑯᓐᓂᑦ ᓄᓇᓕᖕᓄᑦ ᒐᕙᒪᖏᓐᓄᑦ ᐋᔩᖃᑎᒌᒃᓯᒪᓕᖅᑐᑦ ᐊᒻᒪᓗ ᐊᑐᓕᖅᑎᑕᐅᓯᒪᔪᑦ ᔫᑳᓐᒥ (2003) ᐊᒻᒪᓗ ᓄᓇᑦᑎᐊᒥ (2014). ᐊᔾᔨᑲᓯᐊᑎᑐᑦ ᐋᔩᖃᑎᒌᖕᓃᑦ ᒫᓐᓇᐅᔪᖅ ᐱᓕᕆᐊᕆᔭᐅᔪᑦ ᒐᕙᒪᑦ ᓄᓇᕗᒻᒥ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂ. ᒐᕙᒪᑦ ᑲᓇᑕ ᐋᔩᖃᑎᒌᒃᓯᒪᔪᑦ ᐊᒥᓱᑲᓪᓚᓂᒃ ᐊᖏᕈᑎᔅᓴᓂᒃ ᐊᒻᒪᓗ ᐃᒻᒥᒃᑯᑦ−ᒐᕙᒪᓕᕆᓂᕐᒧᑦ ᐊᖏᕈᑎᔅᓴᓂᒃ ᐃᓄᖕᓄᑦ, ᓄᓇᖃᖅᑳᖅᓯᒪᔪᓄᑦ, ᐊᓪᓚᐃᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᐅᖅᓯᒪᓂᖏᑦ

  • ᐊᒥᓲᓂᖅᓴᐅᓯᒪᔪᑦ ᐃᑲᔪᖅᑕᐅᓯᒪᔪᑦ ᐃᓅᓯᒃᑯᑦ, ᐃᓱᒪᒃᑯᑦ ᐊᒻᒪᓗ ᐃᓅᖃᑎᒌᖕᓂᕐᒧᑦ ᐃᓅᑦᑎᐊᕋᓱᐊᕐᓂᕐᒧᑦ
  • ᐊᒥᓲᓂᖅᓴᐅᓯᒪᔪᑦ ᓂᕿᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐅᑭᐅᖅᑕᖅᑐᒥ ᓄᓇᖃᖅᑐᓂᒃ
  • ᐊᒥᓲᙱᓐᓂᖅᓴᐅᔪᑦ ᐃᒻᒥᓃᖅᑐᑦ ᐊᒥᓲᓂᖏᑦ ᐅᑭᐅᖅᑕᖅᑐᒥ ᓄᓇᖃᖅᑐᓂ
  • ᐊᒥᓲᓂᖅᓴᐅᓯᒪᔪᑦ ᐃᖅᑲᓇᐃᔮᔅᓴᐃᑦ ᐃᓗᐊᓈᕈᑎᔅᓴᐃᑦ ᐊᒻᒪᓗ ᑮᓇᐅᔭᓕᐅᕈᑕᐅᕙᒃᑐᓂᒃ ᐱᕙᓪᓕᐊᔪᓂᒃ, ᐃᓚᒋᓗᒍ ᑮᓇᐅᔾᔭᓴᒐᓱᐊᕐᓂᕐᒧᑦ ᑐᖅᑰᓯᕝᕕᒃ ᓴᓇᕝᕖᑦ, ᐃᑲᔫᑕᐅᓗᑎᒃ ᐋᓐᓂᐊᖅᑕᐃᓕᒪᓂᕐᒧᑦ ᓄᓇᓕᖕᓂ
  • ᐱᓯᒪᑦᑎᓂᖅ, ᐱᒋᐊᒃᑲᓐᓂᕐᓂᖅ ᐊᒻᒪᓗ ᐱᕚᓪᓕᕐᓂᖅ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᖏᓐᓂᒃ ᐊᒻᒪᓗ ᐃᓕᖅᑯᓯᖏᓐᓂᒃ
  • ᐊᒥᓲᓂᖅᓴᐅᓯᒪᔪᑦ ᐱᔪᓐᓇᐅᑏᑦ, ᐃᓚᒋᔭᐅᔪᓐᓇᕐᓂᖅ, ᐃᓕᓐᓂᐊᓕᓵᕐᓂᕐᒧᑦ ᐊᒻᒪᓗ ᓄᑕᖅᑭᕆᕝᕕᓂᒃ ᐊᒻᒪᓗ ᐊᑯᓂᐅᔪᒃᑯᑦ ᐃᓕᓐᓂᐊᕐᓂᖅ ᐃᓗᐊᓈᕈᑎᔅᓴᓂᒃ
  • ᐱᕚᓪᓕᖅᓯᒪᔪᑦ ᑐᐊᕕᕐᓇᖅᑐᒃᑯᑦ ᐸᕐᓇᒃᓯᒪᓂᖅ
  • ᐱᕚᓪᓕᖅᓯᒪᔪᑦ ᐱᕋᔭᒃᑕᐃᓕᒪᓂᕐᒧᑦ ᐊᒻᒪᓗ ᐱᕚᓪᓕᖅᓯᒪᔪᑦ ᓄᓇᒋᔭᐅᔪᒥ ᐊᑦᑕᕐᓇᖅᑕᐃᓕᒪᓂᕐᒧᑦ
  • ᐱᐊᓂᒋᐊᕐᓂᖅ ᐋᔩᖃᑎᒌᖕᓂᖅ ᔫᑳᓐᒥ, ᓄᓇᑦᑎᐊᒥ ᐊᒻᒪᓗ ᓄᓇᕗᒻᒥ

ᐅᖃᖃᑎᒌᖕᓂᕐᒧᑦ ᐊᐱᖅᑯᑎ

  • ᓱᓇᐅᕙᑦ ᐱᓕᕆᐊᕆᔭᐅᔪᓐᓇᖅᑐᑦ ᐱᕚᓪᓕᖁᓗᒋᑦ ᐃᓅᑦᑎᐊᕋᓱᐊᕐᓂᕐᒧᑦ ᐅᑭᐅᖅᑕᖅᑐᒥ ᓄᓇᖃᖅᑐᓂᒃ?

ᓴᙱᔪᒥᒃ, ᐊᑲᐅᓈᖅᑐᒥᒃ ᐊᒻᒪᓗ ᓄᑖᓂᒃ ᐱᓕᕆᐊᔅᓴᕆᔭᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᑮᓇᔭᐅᓕᐅᕈᑕᐅᕙᒃᑐᓂᒃ

""ᐅᑭᐅᖅᑕᖅᑐᒥ ᐊᐅᓚᑦᑎᔩᑦ ᑕᑯᔪᑦ ᒐᕙᒪᑦ ᑲᓇᑕᒥᒃ ᐃᑲᔪᖅᑎᒌᖕᓂᐊᕐᓗᑎᒃ ᑭᖑᓪᓕᖅᐹᒃᑯᑦ ᐊᒻᒪᓗ ᐊᑐᓕᖅᑎᑦᑎᕙᓪᓕᐊᓗᑎᒃ ᐊᖏᕈᑎᓂᒃ ᐊᒻᒪᓗ ᓄᓇᑖᖅᓯᒪᓂᕐᒧᑦ, ᑭᓯᐊᓂ ᐱᔪᒪᔪᑦ ᑕᒪᓐᓇ ᐱᓕᕆᐊᔅᓴᐃᑦ ᐱᐊᓂᒋᐊᖅᓯᒪᓗᒋᑦ ᓈᒻᒪᑦᑎᐊᖅᑐᒃᑯᑦ ᐊᒻᒪᓗ ᐃᓱᒪᒋᔭᐅᑦᑎᐊᖅᓯᒪᔪᒃᑯᑦ ᐋᖅᑭᒃᒃᑕᐅᔭᕆᐊᖃᙱᑦᑐᒃᑯᑦ ᐃᓗᐊᓈᕈᑎᔅᓴᓄᑦ ᐃᓚᒋᔭᐅᔪᑦ ᐊᑲᐅᓈᕐᓂᕐᒧᑦ ᐊᕙᑎᓕᕆᓂᕐᒧᑦ ᐱᕙᓪᓕᐊᓂᕐᒧᑦ. ᐱᐊᓂᒋᐊᕐᓗᒍ ᑕᒪᓐᓇ, ᐅᑭᐅᖅᑕᖅᑐᒥ ᐊᐅᓚᑦᑎᔩᑦ ᐃᓚᒋᔭᐅᔭᕆᐊᖃᖅᑐᑦ ᐃᓱᒪᒃᓴᖅᓯᐅᕐᓂᕐᒧᑦ ᐱᒻᒪᕆᐅᔪᓂᒃ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

"…ᐅᑭᐅᖅᑕᑐᒥ ᐃᓄᐃᑦ ᐊᒻᒪᓗ ᑭᒡᒐᖅᑐᐃᔨᖏᑦ ᑲᑐᔾᔨᖃᑎᒌᖏᑦ ᐊᒻᒪᓗ ᒐᕙᒪᖏᑦ ᐅᖓᓯᓐᓂᖅᓴᐅᔪᑦ ᐱᓕᕆᐊᔅᓴᖏᑎᒍᑦ ᐊᑲᐅᙱᓕᐅᕈᑕᐅᔪᓂᒃ ᐃᓚᖃᖅᑐᓂᒃ ᐃᑲᔫᑎᔅᓴᓂᒃ ᓴᙱᓂᖅᓴᒧᑦ ᐃᓚᒌᒃᑐᓄᑦ, ᓄᓇᖃᖅᑐᓄᑦ ᐊᒻᒪᓗ ᓴᙱᔪᒥᒃ ᑮᓇᔭᐅᓕᕈᑕᐅᕙᒃᑐᓂᒃ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

ᐊᑲᐅᙱᓕᐅᕈᑕᐅᔪᖅ

  • ᓴᙱᔪᒥᒃ, ᐊᑲᐅᓈᖅᑐᒥᒃ ᐊᒻᒪᓗ ᓄᑖᓂᒃ ᐱᓕᕆᐊᕆᔭᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑕᐅᕙᒃᑐᓂᒃ ᐃᑲᔫᑎᖃᖅᑐᓂᒃ ᐊᒥᓱᒃᑯᑦ ᐱᐊᓂᒍᓐᓇᖅᑐᓂᒃ ᐅᑯᓄᖓ: ᐃᒻᒥᒃᑯᑦ ᐊᒻᒪᓗ ᓄᓇᒋᔭᐅᔪᒃᑯᑦ ᐃᓅᓯᖃᑦᑎᐊᕐᓂᕐᒧᑦ; ᒪᑭᑕᑎᑦᑎᓂᖅ ᐆᒪᔪᓂᒃ; ᓄᑖᓂᒃ ᓴᓇᕐᕈᑕᐅᔪᓐᓇᖅᑐᓂᒃ; ᐊᒻᒪᓗ, ᓯᓚᕐᔪᐊᒥ ᑮᓇᐅᔭᐅᕐᓂᕆᔭᐅᔪᓐᓇᖅᑐᓂᒃ ᐊᒻᒪᓗ ᑕᐅᖅᓰᖃᑦᑕᕐᓂᕐᒧᑦ

ᓇᓗᓇᐃᖅᓯᒪᔪᑦ

  • ᓄᓇᒥᙶᖅᓯᒪᔪᑦ ᐊᑐᐃᓐᓇᐅᔪᓐᓇᖅᑐᑦ ᐱᓕᕆᔩᑦ ᒐᕙᒪᒃᑯᑦ ᐊᐅᓚᙱᑕᖏᑦ ᑲᔪᓯᔪᑦ ᐱᒻᒪᕆᐅᔪᒃᑯᑦ ᑮᓇᐅᔭᓕᐅᕈᑕᐅᕙᒃᑐᒃᑯᑦ ᐊᐅᓚᓂᕐᒧᑦ ᐅᑭᐅᖅᑕᑑᑉ ᓄᓇᖓᓂ, ᑐᓂᓯᓗᓂ ᐊᖏᓂᖅᓴᒃᑯᑦ ᐱᔪᓐᓇᐅᑎᔅᓴᓂᒃ ᖁᑦᑎᑦᑐᒃᑯᑦ ᐊᑭᓕᖅᑕᐅᓂᕐᒧᑦ ᐃᖅᑲᓇᐃᔮᔅᓴᒃᑯᑦ, ᐊᔪᙱᔾᔪᑎᔅᓴᓄᑦ ᐱᕙᓪᓕᐊᓂᕐᒧᑦ, ᐃᓕᓐᓂᐊᕈᑎᔅᓴᓄᑦ ᐃᓗᐊᓈᕈᑎᔅᓴᓄᑦ ᐊᒻᒪᓗ ᐃᑲᔪᖅᑎᒌᒃᑐᓄᑦ ᓇᒻᒥᓂᖃᖅᑐᓄᑦ ᐊᒻᒪᓗ ᒥᑭᔪᓂᒃ/ᐊᖏᓂᖅᓴᓂᒃ ᓇᒻᒥᓂᖃᖅᑐᔅᓴᓂᒃ ᐱᕙᓪᓕᐊᓂᕐᒧᑦ ᓇᑭᑐᐃᓐᓈᖅᑐᒥᒃ ᑮᓇᐅᔭᓕᐅᕈᑕᐅᕙᒃᑐᒃᑯᑦ ᐱᓕᕆᔩᑦ ᒐᕙᒪᒃᑯᑦ ᐊᐅᓚᙱᑕᖏᑦ ᐅᑭᐅᖅᑕᖅᑐᒥ.
  • ᐅᑭᐅᖅᑕᖅᑐᒥ ᑮᓇᐅᔭᓕᐅᕐᕆᔭᐅᕙᒃᑐᑦ ᓂᕆᐅᒃᓯᒪᔪᑦ ᐱᕚᓪᓕᕐᓂᕐᒧᑦ, ᐱᒻᒪᕆᐅᔪᒃᑯᑦ ᐃᑲᔪᖅᑏᑦ−ᓄᓇᒋᔭᐅᔪᓂᑦ ᐊᔾᔨᒌᙱᑦᑐᓂᒃ, 2017-2024 ᐃᓗᐊᓂ ᐃᓚᒋᓗᒋᑦ ᐱᕚᓪᓕᕐᓗᒋᑦ ᕿᒥᕐᕈᐊᕐᓂᖅ ᐅᔭᕋᐅᔭᓂᒃ ᐱᓕᕆᔩᑦ ᒐᕙᒪᒃᑯᑦ ᐊᐅᓚᙱᑕᖏᑎᒍᑦ. ᑮᓇᐅᔭᓕᐅᕈᑕᐅᕙᒃᑐᑦ ᐱᕈᖅᐸᓪᓕᐊᓂᖓᓄᑦ ᑕᐃᒪᐅᑐᐃᓐᓇᕆᐊᖃᖅᑐᑦ ᓇᓂᔭᐅᔪᓐᓇᖅᑐᑦ ᓴᓇᓂᒃᑯᑦ, ᐳᓛᖅᑐᒃᑯᑦ, ᐃᓕᖅᑯᓯᒃᑯᑦ ᐊᒻᒪᓗ ᐱᖅᑯᓯᒃᑯᑦ ᓴᓇᕝᕕᒃᑯᑦ, ᐅᒥᐊᕐᔪᐊᒃᑯᑦ ᐃᖏᕐᕋᔪᒃᑯᑦ, ᑮᓇᐅᔾᔭᒐᓱᐊᕐᓂᕐᒧᑦ ᑮᓇᐅᔭᓂᒃ ᐊᑐᖅᑐᐊᕐᓗᑎᒃ ᓴᓇᔾᔪᑎᔅᓴᓂᒃ, ᐊᒻᒪᓗ ᑭᒃᑯᑐᐃᓐᓇᓄᑦ ᐃᒪᕐᒥᐅᑕᓕᕆᓂᕐᒧᑦ.
  • ᐊᒥᓱᑦ ᓄᓇᒥᙶᖅᑐᒥᒪᔪᑦ ᐊᑐᖅᑕᐅᔭᕆᐊᖃᖅᑐᑦ ᐃᒻᒥᕐᓗᒍ ᓯᓚᕐᔪᐊᑉ ᐱᕈᖅᓯᐊᖏᓐᓂᒃ ᐅᖅᓱᖓᓂᒃ ᓯᓚᒧᐊᖅᑎᑦᑎᔪᓂᒃ ᑮᓇᐅᔭᓕᐅᕈᑕᐅᕙᒃᑐᓂᒃ ᐊᒻᒪᓗ ᓄᑖᓂᒃ ᐱᓕᕆᐊᔅᓴᖅᓯᐅᕐᓂᖅ ᐃᒻᒥᒃᑯᑦ ᓄᐃᕙᓪᓕᐊᔪᓐᓇᖅᑐᓂᒃ ᐊᐅᓚᔪᓐᓇᐅᑎᔅᓴᓂᒃ ᐱᓕᕆᔩᑦ ᒐᕙᒪᒃᑯᑦ ᐊᐅᓚᙱᑕᖏᑎᒍᑦ, ᐆᑦᑑᑎᒋᓗᒍ, ᑲᓐᓄᖃ, ᑲᓐᓄᔭᖅ, ᓴᕕᒐᐅᔭᔅᓴᐃᑦ, ᑲᓪᐸᑦ ᐊᒻᒪᓗ ᓴᕕᕋᔭᐃᑦ ᓇᓂᔭᐅᔪᓐᓇᖅᑐᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ.

ᖃᓄᐃᓕᐅᖅᓯᒪᓂᑯᐃᑦ

ᐊᒥᓱᑲᓪᓚᐃᑦ ᐱᔾᔪᑕᐅᔪᑦ ᐊᑦᑐᐊᖓᔪᑦ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐱᕙᓪᓕᐊᓂᖅ ᐅᑭᐅᖅᑕᖅᑐᒥ, ᐅᑯᐊᖑᔪᑦ:

  • ᐊᖏᓂᖓᓄᑦ/ᐅᖓᓯᓐᓂᖓᓄᑦ ᐊᒻᒪᓗ ᓯᓚᐅᑉ ᐃᒃᑮᕐᓇᕐᓂᖓᓄᑦ ᓄᓇᒋᔭᐅᔪᒥ ᐊᔾᔨᒌᙱᓐᓂᖓᓄᑦ ᐱᕙᓪᓕᐊᓯᒪᔪᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᕙᓪᓕᐊᓂᖅ (ᐊᐅᓚᓂᕐᒧᑦ ᐊᑭᑐᓂᖅᓴᐅᔪᑦ)
  • ᒥᑭᓂᖓᓄᑦ/ᐅᖓᓯᓐᓂᖓᓄᑦ ᐃᓄᐃᑦ ᐊᒥᓲᓂᖏᑦ ᓄᓇᒋᔭᐅᔪᒥ (ᑭᒡᓕᖃᖅᑎᑦᑎᔪᖅ ᐃᖅᑲᓇᐃᔮᔅᓴᖃᕐᓂᕐᒧᑦ ᑕᐃᒪᐅᔪᓂᒃ)
  • ᐊᒥᓲᙱᓐᓂᖅᓴᐅᓂᖓᓄᑦ ᐃᓕᓐᓂᐊᖅᓯᒪᓂᕐᒧᑦ ᐊᔾᔨᒌᙱᑦᑐᓂᒃ ᐅᑭᐅᖅᑕᖅᑐᒥᐅᑕᓂᒃ (ᐊᒃᓱᕈᕐᓇᖅᑐᖅ ᐱᔪᓐᓇᐅᑎᔅᓴᓄᑦ ᐅᑭᐅᖅᑕᖅᑐᒥᐅᑕᓄᑦ ᐃᓚᒋᔭᐅᓗᓂ ᐃᖅᑲᓇᐃᔮᔅᓴᖃᕐᓂᕐᒧᑦ ᑕᐃᒪᐅᔪᓂᒃ)
  • ᑭᒡᓕᖃᕐᓂᖓᓄᑦ ᐃᖏᕐᕋᕈᑎᔅᓴᓂᒃ/ᐊᐅᓚᔪᓐᓇᐅᑎᔅᓴᓂᒃ/ᑲᑎᙵᔪᓂᒃ ᓴᓇᕝᕕᓂᒃ (ᐱᕕᔅᓴᖃᙱᓗᐊᖅᑐᖅ ᓂᐅᕕᕐᕕᓐᓄᑦ ᐊᒻᒪᓗ ᐊᐅᓚᓂᖓᓄᑦ ᐊᑭᑐᓂᖅᓴᐅᓪᓗᑎᒃ)
  • ᐅᖓᓯᓐᓂᖓᓄᑦ ᑐᐊᕕᕐᓇᖅᑐᒃᑯᑦ ᑭᐅᔭᐅᔾᔪᑎᔅᓴᓄᑦ ᐃᓂᕝᕕᔅᓴᒥᒃ ᐋᓐᓂᖅᑐᖃᖅᑎᓪᓗ ᐃᓄᖕᒥᒃ ᐅᕝᕙᓘᓐᓃᑦ ᐊᕙᑎᒧᑦ ᓴᐳᒻᒥᔾᔪᑎᔅᓴᓂᒃ (ᐊᖏᓂᖅᓴᐅᑎᑦᑎᔪᑦ ᐊᑦᑕᕐᓇᖅᑐᓂᒃ ᓇᒻᒥᓂᖃᖅᑐᓄᑦ ᐊᐅᓚᓂᕐᒧᑦ)
  • ᑮᓇᐅᔭᓕᐅᕐᓂᕆᔭᐅᔪᓄᑦ ᐱᕙᓪᓕᐊᓂᕐᒧᑦ ᐱᓕᕆᐊᔅᓴᐃᑦ ᑮᓇᐅᔭᖃᙱᓗᐊᕐᓂᖏᓐᓄᑦ ᐊᒻᒪᓗ ᐃᑲᔪᖅᓱᐃᔨᔅᓴᓂᒃ ᐊᑐᐃᓐᓇᐅᔭᕆᐊᖃᕐᓂᖏᓐᓄᑦ (ᐊᒃᓱᕈᕐᓇᕐᓂᖅᓴᐅᔪᑦ ᓄᓇᓕᓐᓄᑦ/ᐊᑯᓂᐅᔪᒃᑯᑦ ᐃᓱᒪᒃᓴᖅᓯᐅᕐᓂᕐᒧᑦ)

ᑕᐃᒪᐅᔪᑦ, ᑭᓯᐊᓂ, ᐊᒥᓲᔪᑦ ᐃᓱᐊᓈᕈᑎᔅᓴᓄᒃ ᑮᓇᐅᔾᔭᔅᓴᕋᓱᐊᕐᓂᕐᒧᑦ ᑮᓇᐅᔭᓂᒃ ᐊᑐᖅᑐᐊᕐᓂᒃᑯᑦ ᑎᒍᐊᖅᓯᓗᓂ ᐊᑲᐅᓈᖅᑐᒃᑯᑦ ᑮᓇᐅᔭᓕᐅᕐᓂᕆᔭᐅᕙᒃᑐᓂᒃ ᐱᕈᖅᐸᓪᓕᐊᓂᕐᒧᑦ ᐅᑭᐅᖅᑕᖅᑐᒥ ᐅᑯᐊᖑᔪᑦ:

  • ᐊᒥᓲᓂᖏᑦ ᓄᓇᒥᙶᖅᓯᒪᔪᑦ ᐊᑐᐃᓐᓇᐅᔪᔅᓴᐃᑦ ᐃᑲᔫᑕᐅᓯᒪᔪᑦ ᐊᖏᔪᒃᑯᑦ ᐊᔾᔨᒌᙱᑦᑐᓂᒃ ᐃᓚᒋᓗᒋᑦ ᐅᔭᕋᖕᓂᐊᕐᕖᑦ, ᐳᓛᖃᑦᑕᖅᑐᑦ ᐊᒻᒪᓗ ᐃᒪᕐᒥᐅᑕᓕᕆᔩᑦ
  • ᓄᑖᑦ ᑮᓇᐅᔭᓕᐅᕐᓂᕆᔭᐅᕙᒃᑐᑦ ᐃᓗᐊᓈᕈᑎᔅᓴᐃᑦ ᑭᒡᓕᖃᖅᑎᑦᑎᔪᑦ ᐱᕙᓪᓕᐊᔪᓄᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᔾᔪᑕᐅᔪᑦ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ ᓄᑖᓂᒃ ᐱᓕᕆᐊᔅᓴᕆᔭᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ (ᑕᐃᒪᐅᔪᓐᓇᖅᑐᓂᒃ ᐊᒥᓲᕙᓪᓕᐊᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᐅᒥᐊᕐᔪᐊᓕᕆᓂᖅ, ᐊᒥᓲᕙᓪᓕᐊᔪᓐᓇᖅᑐᓂᒃ ᐳᓛᖃᑦᑕᖅᑐᓂᒃ)
  • ᐅᓪᓗᒥᐅᓕᖅᑐᒧᑦ ᓄᓇᑖᖅᓯᒪᓂᒃᑯᑦ ᐊᖏᕈᑎᖏᑦ ᓴᙱᔪᒥᒃ ᐱᔾᔪᑎᖃᖅᑐᑦ ᓄᓇᖃᖅᑳᖅᓯᒪᔪᓄᑦ−ᐊᐅᓚᑕᖏᓐᓄᑦ ᐃᓱᒪᔅᓴᖅᓯᐅᕐᓂᕐᒧᑦ

ᑕᐃᒪᐅᔪᑦ ᐃᓗᐊᓈᕈᑎᔅᓴᐅᔪᓐᓇᖅᑐᓂᒃ ᑮᓇᐅᔾᔭᒐᓱᐊᕐᓂᕐᒧᑦ ᑮᓇᐅᔭᓂᒃ ᐊᑐᖅᑐᐊᕐᓂᕐᒧᑦ ᓴᓇᕝᕕᒻᒥ ᑮᓇᐅᔾᔭᒐᓱᐊᕐᓂᕐᒧᑦ ᓄᑖᓂᒃ ᐃᓱᒪᔅᓴᖅᓯᐅᕐᓂᕐᒧᑦ ᓴᓇᕐᕈᑎᔅᓴᓂᒃ ᐱᕙᓪᓕᐊᑕᐅᓯᒪᔪᑦ ᓇᒻᒥᓂᖃᖅᑐᓄᑦ ᐃᑲᔪᕐᓗᑎᒃ ᓄᓇᒋᔭᐅᔪᓂᒃ. ᐊᒥᓲᒋᐊᖅᑎᑦᑎᓂᖅ ᐃᑲᔪᖅᑎᔅᓴᓂᒃ ᐅᑭᐅᖅᑕᖅᑐᒧᑦ, ᖃᓪᓗᓈᑦ ᓄᓇᖓᓐᓄᑦ ᐊᒻᒪᓗ ᓯᓚᕐᔪᐊᒥ ᓇᒻᒥᓂᖃᖅᑐᓄᑦ ᐃᑲᔫᑕᐅᓂᐊᖅᑐᑦ ᒥᑭᓪᓕᕚᓪᓕᕆᐊᕐᓗᒋᑦ ᐅᖓᓯᓐᓂᕆᔭᐅᔪᑦ ᐊᒻᒪᓗ ᐱᕚᓪᓕᕐᓗᒍ ᐃᓗᐊᓈᕈᑎᔅᓴᐃᑦ ᐱᕙᓪᓕᐊᓗᓂ ᓄᑖᓂᒃ ᓂᐅᕕᕐᕕᖕᓂᒃ.

ᓴᓇᓗᓂ ᓴᙱᔪᒥᒃ, ᐊᑲᐅᓈᖅᑐᒥᒃ ᐊᒻᒪᓗ ᓄᑖᓂᒃ ᐱᓕᕆᐊᔅᓴᕆᔭᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ ᐱᔾᔪᑕᐅᔪᓐᓇᓐᖅᑐᑦ ᐱᕙᓪᓕᐊᓗᓂ ᐊᒻᒪᓗ ᐱᓯᒪᑎᑦᑎᒋᐊᕐᓗᓂ ᐃᓕᓐᓂᐊᕌᓂᒃᓯᒪᔪᓂᒃ ᐅᑭᐅᖅᑕᖅᑐᒥᐅᑕᓄᑦ ᑕᑕᒋᐊᕐᓗᒋᑦ ᐊᒥᓲᔪᑦ ᐃᖅᑲᓇᐃᔮᔅᓴᐅᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᒫᓐᓇᐅᔪᒃᑯᑦ ᐃᓂᒋᔭᐅᔪᑦ ᑎᒻᒥᓲᖅᑰᑐᒃᑯᑦ ᖃᓪᓗᓈᑦ ᓄᓇᓂᙶᖅᑐᓂᒃ ᐃᖅᑲᓇᐃᔮᓂᕐᒧᑦ ᐱᔾᔪᑎᖃᖅᑐᓂᒃ. ᐃᑲᔫᑎᒋᔭᕆᐊᖃᕐᓂᐊᖅᑐᖅ ᐱᕙᓪᓕᐊᓗᓂ ᐊᑐᐃᓐᓇᐅᔪᓐᓇᖅᑐᓂᒃ ᓄᓇᒋᔭᐅᔪᒥ ᐊᒥᓲᙱᒋᐊᒃᑲᓐᓂᕈᑕᐅᓗᓂ ᐊᑐᐃᓐᓇᐅᔪᔅᓴᓂᒃ ᐊᒡᔭᖅᑕᐅᖃᑦᑕᖅᑐᓂᒃ ᖃᓪᓗᓈᑦ ᓄᓇᖓᓐᓂᑦ.

ᑐᔅᓯᕋᖅᑕᐅᓯᒪᔪᑦ ᖃᓄᐃᓕᐅᖅᓯᒪᓂᖏᑦ

  • ᐊᑲᐅᓈᖅᑐᓂᒃ ᓄᓇᓂᙶᖅᓯᒪᔪᑦ ᐊᒻᒪᓗ ᓄᓇᓂᙶᖅᓯᒪᙱᑦᑐᓂᒃ ᐊᑐᐃᓐᓇᐅᔪᓐᓇᖅᑐᓂᒃ ᐱᕙᓪᓕᐊᓂᖅ
  • ᐱᕈᖅᐸᓪᓕᐊᓂᖅ ᐊᖏᔪᒃᑯᑦ ᓇᒻᒥᓂᖃᑎᒌᖑᔪᓂᒃ
  • ᐱᕈᖅᐸᓪᓕᐊᓂᖅ ᐅᑭᐅᖅᑕᖅᑐᒥ/ᓄᓇᖃᖅᑳᖅᓯᒪᔪᑦ−ᐊᐅᓚᑕᖏᑦ ᓇᒻᒥᓂᖃᕐᓂᕐᒧᑦ ᐊᒻᒪᓗ ᐃᑲᔪᖅᑎᒌᔪᓐᓇᖅᑐᓂᒃ ᐃᓗᐊᓈᕐᕕᔅᓴᓂᒃ
  • ᐱᕈᖅᐸᓪᓕᐊᓂᖅ ᐃᖅᑲᓇᐃᔮᔅᓴᒧᑦ ᐃᓗᐊᓈᕈᑎᔅᓴᓂᒃ ᐅᑭᐅᖅᑕᖅᑐᒥᐅᑕᓄᑦ
  • ᓴᓇᕝᕕᓄᑦ ᑮᓇᐅᔾᔭᒐᓱᐊᕐᓂᕐᒧᑦ ᐃᑲᔫᑕᐅᓗᓂ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ ᐱᕈᕐᓂᖅ, ᐊᔪᙱᔾᔪᑎᔅᓴᓂᒃ ᐱᕙᓪᓕᐊᓗᓂ ᐊᒻᒪᓗ ᐃᖅᑲᓇᐃᔮᔅᓴᖃᖅᐸᓪᓕᐊᓗᓂ
  • ᐊᑐᓕᖅᑎᑦᑎᕙᓪᓕᐊᓂᕐᒧᑦ ᐊᑦᑕᕐᓇᙱᑦᑐᒃᑯᑦ, ᐱᕕᑭᓐᓂᖅᓴᐅᔪᒃᑯᑦ ᐱᕙᓪᓕᐊᓯᒪᔪᓂᒃ ᐅᒥᐊᕐᔪᐊᓕᕆᓂᕐᒧᑦ
  • ᐊᒥᓲᓕᒃᑲᓐᓂᕐᓂᖅ ᑕᐅᖅᓰᖃᑦᑕᕐᓂᕐᒧᑦ ᐊᒻᒪᓗ ᑮᓇᐅᔾᔭᒐᓱᐊᕐᓂᕐᒧᑦ ᐃᓗᐊᓈᕈᑎᔅᓴᐃᑦ ᐅᑭᐅᖅᑕᖅᑐᓕᒫᒥ ᐊᒻᒪᓗ ᖃᓪᓗᓈᑦ ᓄᓇᙵᓐᓂᑦ ᓂᐅᕕᕐᕕᓐᓂᑦ
  • ᐱᕙᓪᓕᐊᓗᓂ ᐊᐅᓚᑕᐅᔪᒃᑯᒃ−ᐃᓂᒋᔭᐅᓗᓂ ᐅᑭᐅᖅᑕᖅᑐᒥ ᓄᑖᓂᒃ ᐃᓱᒪᔅᓴᖅᓯᐅᕐᓂᕐᒧᑦ ᐊᒻᒪᓗ ᓴᓇᕝᕕᓂᒃ

ᐅᖃᖃᑎᒌᖕᓂᕐᒧᑦ ᐊᐱᖅᓲᑎ

  • ᖃᓄᐃᓕᐅᕈᓐᓇᖅᐸᑦ ᐱᕚᓪᓕᕆᐊᕐᓗᒍ ᐊᑲᐅᓈᕐᓂᕐᒧᑦ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ ᐱᕙᓪᓕᐊᓂᕐᒧᑦ, ᐊᖏᓪᓕᕙᓪᓕᐊᓗᒍ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᓂᕆᔭᐅᔪᑦ, ᓴᓇᓗᓂ ᐃᓂᒋᔭᐅᔪᓐᓇᖅᑐᓂᒃ/ᖃᐅᔨᒪᔨᕐᔪᐊᓂᒃ ᐊᒻᒪᓗ ᐊᒥᓲᒃᑲᓐᓂᕆᐊᕐᓗᒋᑦ ᐃᓚᒋᔭᐅᔪᓐᓇᖅᑐᑦ ᐅᑭᐅᖅᑕᖅᑐᒥᐅᑕᓄᑦ ᓄᓇᒋᔭᐅᔪᒥ ᑮᓇᐅᔭᓕᐅᕐᓂᕆᔭᐅᕙᒃᑐᓂᒃ, ᐱᕈᖅᐸᓪᓕᐊᓂᕐᒧᑦ ᒥᑭᔪᓂᒃ-ᐊᖏᓂᖅᓴᓄᑦ ᐅᑭᐅᖅᑕᖅᑐᒥ ᓇᒻᒥᓂᖃᖅᑐᓂᒃ ᐊᒻᒪᓗ ᐱᕚᓪᓕᕆᐊᕐᓗᒍ ᐃᑲᔪᖅᑎᒋᔭᐅᔪᑦ?

ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ

"ᖃᓄᐃᓕᐅᒃᑲᓐᓂᕐᓂᖅ ᐊᓯᙳᕆᐊᕐᓗᒋᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐅᑭᐅᖅᑕᖅᑐᒥ ᑕᐃᒪᐅᔪᑦ ᓄᓇᒋᔭᐅᔪᒥ-ᐊᐅᓚᑕᐅᔪᑦ ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓯᕗᓪᓕᐅᔭᕆᐊᖃᑦᑎᑕᐅᔪᓂᒃ ᑲᓇᑕᐅᑉ ᐊᑐᐊᒐᖏᑎᒍᑦ ᐱᕙᓪᓕᐊᓂᕐᒧᑦ ᓇᓗᓇᐃᕆᐊᕐᓗᒋᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑮᓇᐅᔭᕆᐅᕐᓂᕆᔭᐅᔪᑦ ᐃᑲᔫᑎᔅᓴᖏᓐᓄᑦ ᓄᓇᒋᔭᐅᔪᓄᑦ ᐊᒻᒪᓗ ᑭᐅᔾᔪᑕᐅᔪᓐᓇᖅᑐᓂᒃ ᐊᐱᖅᑯᑎᐅᔪᒧᑦ ᐅᑭᐅᖅᑕᖅᑐᒥ ᐱᕙᓪᓕᐊᓯᒪᔪᓂᒃ. ᐅᑉᐱᕈᓱᒃᑐᖓ ᑐᙵᕝᕕᐅᔪᑦ ᐊᑲᐅᓈᖅᑐᒃᑯᑦ ᐃᓱᒪᔅᓴᖅᓯᐅᕐᓂᕐᒧᑦ ᓈᒻᒪᒃᑐᒃᑯᑦ ᑐᑭᓯᐊᔾᔪᑎᔅᓴᓂᒃ ᑐᓂᓯᔪᓐᓇᖅᑐᖅ. ᐅᑭᐅᖅᑕᖅᑐᒥ, ᐃᓱᒪᒋᓗᒍ ᐱᔪᒪᑦᑎᐊᕐᓗᓂ ᐊᔾᔨᒌᒃᑐᓂᒃ ᓈᒻᒪᒋᔭᐅᔪᓂᒃ ᓄᓇᖃᖅᑳᖅᓯᒪᔪᓄᑦ ᖃᐅᔨᒪᔭᖏᑎᒍᑦ ᐊᒻᒪᓗ ᐅᐊᓕᓂᙶᖅᑐᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ. ᓄᑖᖅ ᐅᑭᐅᖅᑕᖅᑐᒥ ᐊᑐᐊᒐᖓᑦ ᐋᖅᑭᒃᓯᒪᔪᑦ ᓇᓗᓇᐃᖅᑎᑦᑎᔪᑦ ᐃᓗᐊᓈᕐᕕᔅᓴᓂᒃ ᑕᒪᓐᓇ ᖁᑦᑎᓯᕙᓪᓕᐊᒃᑲᓐᓂᕐᓗᒍ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

ᐊᑲᐅᙱᓕᐅᕈᑕᐅᔪᖅ

  • ᐱᕙᓪᓕᐊᓗᓂ ᓄᑖᓂᒃ ᖃᐅᔨᒪᔭᐅᔪᓐᓇᖅᑐᓂᑦ ᐅᑭᐅᖅᑕᖅᑐᒧᑦ ᐅᐊᓕᓂᕐᒥᙶᖅᑐᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑎᒍᑦ ᐱᕚᓪᓕᕆᐊᕐᓗᒋᑦ ᓇᓗᓇᐃᖅᑕᐅᓯᒪᔪᑦ−ᑕᐃᒪᐅᔪᑦ ᐃᓱᒪᔅᓴᖅᓯᐅᕐᓂᕐᒧᑦ ᐊᒻᒪᓗ ᑭᐅᓗᑎᒃ ᓄᓇᒋᔭᐅᔪᓂᑦ ᐱᔪᒪᔭᖏᓐᓂᒃ; ᐃᑲᔪᕐᓗᒋᑦ ᐅᑭᐅᖅᑕᖅᑐᒥᐅᑕᐃᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᒋᔭᖏᓐᓂᒃ ᐃᓚᒋᔭᐅᓂᕐᒧᑦ ᑕᒪᒃᑭᕐᓗᒋᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᕙᓪᓕᐊᓂᕐᒧᑦ; ᐊᒻᒪᓗ, ᓇᓗᓇᐃᕆᐊᕐᓗᒋᑦ ᑲᓇᑕᐅᑉ ᐊᐅᓚᑦᑎᔨᖏᑦ ᑲᓇᑕᒥ ᐊᒻᒪᓗ ᓯᓚᕐᔪᐊᒥ ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐃᓱᒪᔅᓴᖅᓯᐅᕐᓂᕐᒧᑦ ᐊᒻᒪᓗ ᐃᑲᔪᖅᑎᒌᖕᓂᕐᒧᑦ

ᓇᓗᓇᐃᒃᖅᓯᒪᔪᑦ

  • ᓄᑖᖅ ᑲᓇᑕᐅᑉ ᖁᑦᑎᓐᓂᖓᓂ ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᖅ ᓯᓚᑦᑐᖅᓴᕐᕕᖓ ᐃᖃᓗᑦᑑᑎᐊᒥ (ᓄᓇᕗᑦ), ᑰᒡᔪᐊᑉ ᐃᒪᕐᒥᐅᑕᓕᕆᔩᑦ ᖃᐅᔨᓴᕐᕕᖓ (ᒫᓂᑑᐸ) ᐊᒻᒪᓗ ᓯᓚᑦᑐᖅᓴᕐᕕᒃ ᓄᐊᑎᒃ ᑯᐱᒃᓯ; ᐊᓯᖏᓪᓗ, ᐱᓕᕆᐊᔅᓴᖃᕐᓂᐊᖅᑐᑦ ᐅᑭᐅᒧᓗᒃᑖᖅ, ᓯᓚᕐᔪᐊᒥ ᐱᒻᒪᔪᕆᐅᔪᓂᒃ ᑲᑎᒪᕝᕕᐅᓂᐊᖅᑐᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᓴᓇᕐᕈᑎᔅᓴᓄᑦ, ᐊᒻᒪᓗ ᐱᔨᑦᑎᕋᐅᑎᐅᓗᑎᒃ ᐊᖏᔪᒃᑯᑦ ᓇᔪᕐᕕᐅᓂᐊᖅᑐᒥᒃ ᑕᐃᒪᐅᔪᖃᖅᑎᓪᓗᒋᑦ ᖃᕋᓴᐅᔭᓕᕆᓂᒃᑯᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓴᓇᕝᕕᓂᒃ ᐅᑭᐅᖅᑕᖅᑐᓕᒫᒥ.
  • ᒐᕙᒪᑦ ᑲᓇᑕᒥ ᐃᑲᔪᖅᑐᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᓕᒫᖓᓂ ᐅᑭᐅᖅᑕᖅᑑᑉ ᖃᐅᔨᒪᓂᖏᑦ ᑲᓇᑕᒃᑰᕐᓗᑎᒃ, ᐊᓯᖏᑦ ᒐᕙᒪᕐᔪᐊᑦ ᐃᖅᑲᓇᐃᔭᖅᑏᑦ/ᑲᑐᔾᔨᖃᑎᒌᖏᑦ, ᐊᒻᒪᓗ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑮᓇᐅᔭᓄᑦ ᐃᑲᔫᓯᐊᑦ ᖁᑦᑎᓐᓂᖅᓴᒃᑯᑦ ᓯᓚᑦᑐᖅᓴᕐᕕᖏᑦ ᒐᕙᒪᕐᔪᐊᒃᑯᑦ ᑮᓇᐅᔭᒃᑯᑦ ᐃᑲᔫᓯᐊᑦ ᑲᑎᒪᔨᖏᓐᓂᑦ.
  • ᐊᒥᓲᔪᑦ ᑕᐃᒪᐅᔪᑦ ᓱᓇᒃᑯᑖᓂᒃ ᖃᐅᔨᓴᖅᑐᓂᒃ ᐱᓕᕆᐊᔅᓴᓂᒃ ᐊᐅᓚᑕᐅᔪᑦ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖑᔪᓂᑦ ᐱᓕᕆᔪᑦ ᖃᐅᔨᒪᔭᖏᑎᒍᑦ ᐅᑭᐅᖅᑕᖅᑐᒧᑦ, ᐆᑦᑑᑎᒋᓗᒍ ᐃᒃᑮᕐᓇᕐᓂᖓ ᓯᓚᒧᑦ ᐃᓱᒪᒃᓴᖅᓯᐅᕐᓂᕐᒧᑦ ᔫᑳᓐ ᓱᓇᒃᑯᑖᓂᒃ ᖃᐅᔨᓴᕐᓂᕕᖓ ᔫᑳᓐ ᓯᓚᑦᑐᖅᓴᕐᕕᖓᓂ ᐃᑲᔪᖅᑐᑦ ᐱᓕᕆᐊᔅᓴᓂᒃ ᐃᓚᖃᖅᑐᓂᒃ ᓴᓗᒻᒪᖅᓴᐃᓂᕐᒧᑦ ᓴᓇᕐᕈᑎᓄᑦ ᐱᕙᓪᓕᐊᓂᕐᒧᑦ ᑐᕌᖓᓗᐊᖅᑐᖅ ᐅᑭᐅᖅᑕᖅᑐᒧᑦ. ᑕᐅᒪᐅᒐᓗᐊᖅᑎᓪᓗᒋᑦ ᐃᓱᒪᒃᓴᖅᓯᐅᕈᑏᑦ, ᐊᒥᓲᒃᑲᓐᓂᖅᑐᑦ ᐃᓗᐊᓈᕈᑎᔅᓴᐃᑦ ᓴᙱᓕᕚᓪᓕᕆᐊᕐᓗᒋᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓴᓇᕝᕕᓂᒃ ᐅᑭᐅᖅᑕᖅᑐᒥ.

ᖃᓄᐃᓕᐅᖅᓯᒪᓂᑯᐃᑦ

ᐅᐊᓕᓂᕐᒥᙶᖅᑐᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐊᒻᒪᓗ ᓄᓇᖃᖅᑳᖅᓯᒪᔪᐃᑦ ᖃᐅᔨᒪᓂᑎᒍᑦ ᐱᒻᒪᕆᐅᔪᒥᒃ ᐱᔾᔪᑎᖃᖅᑐᑦ ᐱᐅᓂᖅᓴᒃᑯᑦ ᑐᑭᓯᐊᔾᔪᑎᔅᓴᓂᒃ, ᑭᐅᓗᑎᒃ ᐊᒻᒪᓗ ᐃᑲᔪᕐᓗᑎᒃ ᐃᓅᖃᑎᒌᒃᑐᓂᒃ, ᑮᓇᐅᔭᓕᐅᕐᓂᕆᔭᐅᔪᓂᒃ, ᐊᕙᑎᒧᑦ ᐊᒻᒪᓗ ᐱᖅᑯᓯᖏᑎᒍᑦ ᐊᓯᙳᖅᐸᓪᓕᐊᔪᓂᒃ ᐊᒻᒪᓗ ᐱᕙᓪᓕᐊᑎᑦᑎᓂᖅ ᐅᑭᐅᖅᑕᖅᑑᑉ ᓄᓇᖓᓂ (ᐆᑦᑑᑎᒋᓗᒋᑦ ᐃᓅᑉ ᐊᔪᙱᑕᖏᑦ ᐊᒻᒪᓗ ᐃᓱᒪᒃᑯᑦ, ᓂᖀᑦ, ᐊᑦᑕᕐᓇᖅᑕᐃᓕᒪᓂᖅ, ᑐᐊᕕᕐᓇᖅᑐᒃᑯᑦ ᑭᐅᔾᔪᑏᑦ, ᐊᑲᐅᓈᕐᓂᕐᒧᑦ ᐊᕙᑎᓕᕆᓂᕐᒧᑦ ᐊᑐᐃᓐᓇᐅᔪᓐᓇᖅᑐᓂᒃ ᐊᐅᓚᑎᑦᑎᓂᖅ, ᐃᒃᑮᕐᓇᕐᓂᖓᓄᑦ−ᓯᓚᐅᑉ ᓴᓇᔾᔪᑎᖏᑦ, ᓴᓇᕝᕕᓂᒃ ᐱᕙᓪᓕᐊᓂᖅ, ᐃᖏᕐᕋᔾᔪᑏᑦ, ᐊᕙᑎᓕᕆᓂᕐᒧᑦ ᐊᐅᓚᓂᖅ ᐊᒻᒪᓗ ᓯᓚᐅᑉ ᐊᓯᙳᖅᐸᓪᓕᐊᓂᖓ ᖃᐅᔨᓴᕐᓂᖅ/ᓯᓚᓕᕆᓂᖅ).

ᓱᕋᑐᐃᓐᓇᕆᐊᖃᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᖓ ᐊᕙᑎᖓ ᑕᑯᕙᓪᓕᐊᓯᒪᔪᑦ ᐊᓯᙳᖅᐸᓪᓕᐊᔪᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᔾᔪᑎᖃᖅᑐᓂᒃ ᐊᒻᒪᓗ ᐊᓯᖏᓐᓂᑦ. ᐊᑲᐅᓈᕐᓂᖅᓴᒃᑯᑦ ᐊᕙᑎᓕᕆᓂᕐᒧᑦ ᑐᑭᓯᐊᔾᔪᑎᔅᓴᓂᒃ ᐅᑭᐅᖅᑕᖅᑑᑉ ᐆᒪᔪᖏᓐᓂᒃ, ᐊᒻᒪᓗ ᐱᕙᓪᓕᐊᔪᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐅᑭᐅᖅᑕᖅᑐᒥ ᓄᓇᒋᔭᐅᔪᓂ, ᐊᑐᖅᑕᐅᔭᕆᐊᖃᖅᑐᑦ ᓇᓗᓇᐃᕆᐊᕐᓗᒋᑦ ᑕᐃᒪᐅᔪᓂᒃ ᐃᓱᒪᒃᓴᖅᓯᐅᕐᓂᕐᒧᑦ ᐊᒻᒪᓗ ᑐᓴᒐᔅᓴᙳᕐᓗᒋᑦ ᐊᑲᐅᙱᓕᐅᕈᑕᐅᔪᑦ. ᖃᐅᔨᒪᔨᒻᒪᕆᒃᑯᑦ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐃᓚᒋᔭᐅᔭᕆᐊᖃᖅᑐᑦ ᓄᓇᖃᖅᑳᖅᓯᒪᔪᓂᒃ ᖃᐅᔨᒪᔭᖏᑎᒍᑦ ᐊᑐᐃᓐᓇᐅᔭᕆᐊᖃᖅᑐᑦ. ᓴᙱᓕᕚᓪᓕᖅᓯᒪᔪᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓴᓇᕝᕕᖏᑦ ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᒃᑯᑦ, ᓴᓇᕐᕈᑎᒃᑯᑦ, ᑎᑎᖅᑐᒐᖅᓯᒪᔪᒃᑯᑦ ᐊᒻᒪᓗ ᓈᓴᐅᑎᓕᕆᓂᒃᑯᑦ (STEM) ᐃᓕᓐᓂᐊᕐᓂᒃᑯᑦ, ᐊᖏᔪᒃᑯᑦ−ᓴᓇᕝᕕᐅᔪᓐᓇᖅᑐᓂᒃ, ᐊᔪᙱᔾᔪᑎᒃᓴᒃᑯᑦ ᐱᕙᓪᓕᐊᓂᖅ ᐊᒻᒪᓗ ᓴᓇᙳᐊᒐᕐᓂᒃᑯᑦ ᓱᓇᒃᑯᑖᓂᒃ ᖃᐅᔨᓴᕐᓂᒃᒧᑦ/ᖃᐅᔨᓴᕐᓂᖅ ᓴᓇᓯᒪᔪᓂᒃ ᐃᑳᔪᑎᖃᕐᓂᐊᖅᑐᑦ ᑕᒪᒃᑭᓐᓄᑦ ᑕᐃᒪᐅᔪᓂᒃ ᐃᓱᒪᒃᓴᖅᓯᐅᕐᓂᕐᒧᑦ ᐊᒻᒪᓗ ᓴᙱᔪᒥᒃ ᐅᑭᐅᖅᑕᖅᑐᒥ ᓄᓇᖃᖅᑐᓄᑦ.

ᓄᓇᖃᖅᑳᖅᓯᒪᔪᑦ ᐊᒻᒪᓗ ᖃᓪᓗᓈᑦ ᐅᑭᐅᖅᑕᖅᑐᒥ ᓇᓗᓇᐃᖅᓯᓯᒪᔪᑦ ᐱᔪᒪᔪᑦ ᐃᓚᒋᔭᐅᓂᕐᒧᑦ  ᐊᒻᒪᓗ ᑐᓴᖅᑕᐅᓗᑎᒃ ᐃᓱᒪᒃᓴᖅᓯᐅᕐᓂᕐᒧᑦ ᖃᓄᐃᑦᑐᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓯᕗᓪᓕᐅᑎᑕᐅᔭᕆᐊᖃᖅᑐᓂᒃ ᒐᕙᒪᒃᑯᓐᓄᑦ ᐊᒻᒪᓗ ᐊᓯᖏᓐᓄᑦ ᑮᓇᐅᔭᒃᑯᑦ ᐃᑲᔪᖅᓯᔨᐅᔪᓄᑦ, ᐊᒻᒪᓗ ᐊᖏᓂᖅᓴᒃᑯᑦ ᐃᓚᒋᔭᐅᓗᑎᒃ ᐊᒻᒪᓗ ᐊᐅᓚᓗᑎᒃ ᑕᒪᒃᑭᓐᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᕙᓪᓕᐊᓂᖅ ᐊᒻᒪᓗ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑲᑎᒪᔾᔪᑎᔅᓴᓂᒃ, ᐃᓚᒋᓗᒋᑦ ᐊᖏᓂᖅᓴᒃᑯᑦ ᑐᕌᕐᕕᒋᔭᖏᑦ ᐃᒻᒥᒃᑯᑦ−ᐱᔪᒪᓂᒃᑯᑦ. ᐅᑭᐅᖅᑕᖅᑐᒥᐅᑕᐃᑦ ᐱᔪᒪᑦᑎᐊᖅᑐᑦ ᓇᓗᓇᐃᖅᓯᓗᑎᒃ ᓱᓇᒃᑯᑖᓂᒃ ᖃᐅᔨᓴᕐᓂᖅ ᑲᒪᒋᔭᐅᔪᑦ ᑐᓄᑦᑎᐊᖏᑎᒍᑦ ᐊᔾᔨᖃᖅᑐᑦ ᐃᓅᓯᒥᑎᒍᑦ ᐊᒻᒪᓗ ᐱᔪᒪᓂᑎᒍᑦ. 

ᐊᐅᓚᑦᑎᔨᐅᓗᓂ ᐅᑭᐅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᑲᓇᑕ ᓇᔪᕐᕕᖓᓃᖅᑎᐊᖅᑐᖅ ᐱᕙᓪᓕᐊᑎᑦᑎᓂᕐᒧᑦ ᐊᒻᒪᓗ ᐱᕙᓪᓕᐊᓗᑎᒃ ᓄᑖᓂᒃ ᖃᐅᔨᒪᔭᐅᔪᓂᒃ ᑕᒪᒃᑭᓐᓄᑦ ᐊᑐᕐᓗᑎᒃ ᐅᐊᓕᓂᕐᒥᙶᖅᓯᒪᔪᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑎᒍᑦ. ᓴᙱᔪᒃᑯᑦ ᐃᑲᔪᖅᑎᒌᖕᓂᖅ ᑕᐃᒪᐅᔪᑦ ᐊᒥᓱᒃᑯᑦ ᐊᔾᔨᒌᙱᑦᑐᒃᑯᑦ − ᐃᒻᒥᒃᑯᑦ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐱᓕᕆᐊᔅᓴᓂᒃ ᐊᒥᓱᒃᑯᑦ−ᐃᑲᔪᖅᑎᒌᒃᑐᓂᒃ ᐅᖃᖃᑎᒌᖕᓂᒃᑯᑦ. ᐊᑐᐃᓐᓇᐅᔭᕆᐊᖃᖅᑐᑦ ᓇᓗᓇᐃᕆᐊᕐᓗᒋᑦ ᐅᑭᐅᖅᑕᖅᑐᒥᐅᑕᐃᑦ ᐃᓚᒋᔭᐅᒻᒪᖔᑕ ᑕᒪᒃᑭᓐᓄᑦ ᐱᕙᓪᓕᐊᔪᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᕙᓪᓕᐊᔪᓂᒃ ᐃᓚᒋᓗᒋᑦ ᓇᓗᓇᐃᔭᐃᓂᖅ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓯᕗᓪᓕᐅᔭᕆᐊᖃᖅᑎᐅᔪᓂᒃ, ᐱᕙᓪᓕᐊᓂᕐᒧᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑐᕌᕈᑎᔅᓴᖏᓐᓂᒃ, ᐱᕙᓪᓕᐊᓂᖅ ᐊᒻᒪᓗ ᖃᐅᔨᓴᕐᓂᖅ ᓱᓇᒃᑯᑖᓂᒃ ᖃᐅᔨᓴᖅᑕᐅᓂᐊᖅᑐᓄᑦ, ᐊᒻᒪᓗ ᑐᓴᒐᔅᓴᙳᖅᑎᑕᐅᓗᑎᒃ ᖃᐅᔨᓴᖅᑕᐅᓯᒪᓂᑯᐃᑦ ᓇᓗᓇᐃᕆᐊᕐᓗᒋᑦ ᖃᐅᔨᒪᔭᐅᔪᑦ ᑐᓂᔭᐅᓯᒪᔪᑦ ᓇᓗᓇᐃᖅᓯᒪᓂᑎᒍᑦ, ᓈᒻᒪᒃᑐᒃᑯᑦ, ᐊᒻᒪᓗ ᐊᑐᐃᓐᓇᐅᔪᓐᓇᖁᓪᓗᒋᑦ ᐅᑭᐅᖅᑕᖅᑐᒥᐅᑕᓄᑦ. ᐱᐊᓂᑦᑎᐊᕆᐊᕐᓗᒋᑦ ᐃᑲᔪᖅᑎ ᒌᒃᑐᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑐᕌᕈᑎᔅᓴᐃᑦ ᐊᒻᒪᓗ ᓇᓗᓇᐃᕆᐊᕐᓗᒋᑦ ᐊᑲᐅᓈᖅᑐᓂᒃ ᐊᑐᖅᑕᐅᔪᓂᒃ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑎᒍᑦ ᐃᑲᔪᖅᑎᒌᖕᓂᕐᒧᑦ ᐊᑦᑐᐊᖓᓗᑎᒃ ᐊᔾᔨᒌᖕᓂᒃᑯᑦ, ᐃᑉᐱᒋᑦᑎᐊᕐᓂᒃᑯᑦ, ᐊᒻᒪᓗ ᐱᔪᒪᔭᐅᔪᒃᑯᑦ ᐱᕙᓪᓕᐊᓂᐊᕐᓗᑎᒃ ᓄᑖᓂᒃ ᖃᐅᔨᒪᔭᐅᔪᓂᒃ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᐅᖅᓯᒪᓂᖏᑦ

  • ᐱᕙᓪᓕᖅᓯᒪᔪᑦ ᑐᑭᓯᐊᔾᔪᑎᔅᓴᒃᑲᓐᓂᕐᓂᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᑲᔪᓯᔪᑦ ᐊᓯᙳᖅᐸᓪᓕᐊᔪᓂᒃ ᓄᓇᒋᔭᐅᔪᒥ, ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑎᒍᑦ ᐊᒻᒪᓗ ᐅᐊᓕᓂᕐᒥᐅᑕᒃᑯᑦ ᓱᓇᒃᑯᑖᓂᒃ ᖃᐅᔨᓴᕐᓂᒃᑯᑦ
  • ᓇᓗᓇᐃᖅᓯᒪᔪᑦ ᐅᑭᐅᖅᑕᖅᑐᒥ ᐊᑐᐊᒐᐃᑦ/ᐃᓱᒪᒃᓴᖅᓯᐅᕐᓂᕐᒧᑦ ᐃᑲᔪᖅᑕᐅᓪᓗᑎᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐱᓕᕆᐊᔅᓴᓄᑦ/ᐱᔨᑦᑎᕋᐅᑎᓄᑦ
  • ᐱᕚᓪᓕᕐᓗᒋᑦ ᐃᓕᓐᓂᐊᕈᒪᔪᓄᑦ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᕐᓂᖅ ᐊᒻᒪᓗ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐃᓗᐊᓈᕈᑎᔅᓴᐃᑦ ᐅᑭᐅᖅᑕᖅᑐᒥᐅᑕᓄᑦ
  • ᐃᓱᒪᒃᓴᖅᓯᐅᕐᓂᖅ ᒪᓕᒐᔅᓴᓂᒃ ᐊᓯᙳᖅᐸᓪᓕᐊᓗᒋᑦ ᐅᐊᓕᓂᕐᒥᑕᐃᑦ ᓱᓇᒃᑯᑖᖏᑦ ᖃᐅᔨᓴᕐᓂᕐᒧᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑎᒍᑦ, ᐊᒻᒪᓗ ᐊᑐᕐᓗᑎᒃ ᐊᔾᔨᒌᙱᑦᑐᓂᒃ ᖃᐅᔨᒪᔭᐅᔪᓂᒃ ᐃᓱᒪᒃᓴᖅᓯᐅᕐᓂᕐᒧᑦ
  • ᐃᑲᔪᖅᑕᐅᓂᖅ ᐱᕙᓪᓕᐊᓂᕐᒧᑦ, ᓄᑖᓂᒃ ᐱᓕᕆᐊᒃᓴᕆᔭᐅᔪᓐᓇᖅᑐᓂᒃ ᐊᒻᒪᓗ ᐊᑯᓂᐅᔪᒃᑯᑦ ᐊᑲᐅᓈᖅᑐᒃᑯᑦ ᐊᕙᑎᓕᕆᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᔭᐅᓕᕆᐅᕐᓂᕆᔭᐅᔪᑦ ᑮᓇᐅᔾᔭᒐᓱᐊᕐᓂᒃᑯᑦ ᓄᑖᒃᑯᑦ ᐅᑭᐅᑕᖅᑐᖅᒥ ᓴᓇᔭᔅᓴᓂᒃ ᐊᒻᒪᓗ ᑎᒍᓯᓗᓂ ᓄᑖᓂᒃ ᐃᓱᒪᒃᓴᖅᓯᐅᕈᑎᔅᓴᓂᒃ ᐅᑭᐅᖅᑕᖅᑐᒧᑦ ᐋᖅᑭᒃᑕᐅᔪᓐᓇᖅᑐᓂᒃ
  • ᐃᑲᔪᕐᓂᖅ ᐊᑐᖅᑕᐅᑦᑎᐊᖅᑐᒃᑯᑦ ᐋᖅᑭᒃᓯᒪᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓄᓇᖓᓂᒃ, ᐃᒪᖓᓂ, ᐊᒻᒪᓗ ᓄᓇᓂᙶᖅᑐᓂᒃ ᐊᑐᐃᓐᓇᐅᔪᓐᓇᖅᑐᓂᒃ
  • ᐱᕚᓪᓕᕐᓗᒍ ᓯᓚᐅᑉ ᐊᓯᙳᖅᐸᓪᓕᐊᓂᖓ−ᐃᓚᒋᔭᖏᑦ ᐊᑦᑕᕐᓇᖅᑐᓂᒃ ᐊᐅᓚᓂᕐᒧᑦ ᓄᑖᓂᒃ ᐃᓱᒪᒃᓴᖅᓯᐅᕈᑎᔅᓴᒃᑯᑦ ᓴᓇᕝᕕᒧᑦ, ᒥᐊᓂᕆᑦᑎᐊᕐᓂᕐᒧᑦ ᑮᓇᐅᔾᔭᒐᓱᐊᕐᓂᕐᒧᑦ ᐊᒻᒪᓗ ᓴᙱᓕᕙᓪᓕᐊᓗᒍ ᑐᐊᕕᕐᓇᖅᑐᓂᒃ ᐸᕐᓇᐅᑎᓄᑦ, ᑭᐅᔭᐅᔪᓐᓇᕐᓂᖅ, ᐊᒻᒪᓗ ᐅᑎᖅᑎᑦᑎᓂᖅ
  • ᐱᕚᓪᓕᕐᓗᒍ ᓄᓇᒋᔭᐅᔪᓂ ᖃᐅᔨᒪᔨᕐᔪᐊᑦ ᐊᒻᒪᓗ ᐊᒥᓲᓂᖏᑦ ᓱᓇᒃᑯᑖᓂᒃ ᖃᐅᔨᓴᕐᓂᒃᑯᑦ, ᓴᓇᕐᕈᑎᒃᑯᑦ, ᑎᑎᖅᑐᒐᖅᓯᒪᔪᒃᑯᑦ ᐊᒻᒪᓗ ᓈᓴᐅᑎᓕᕆᓂᒃᑯᑦ ᐃᓕᓐᓂᐊᕐᓂᖅ ᐊᒻᒪᓗ ᐊᓯᖏᑦ ᐊᔾᔨᒌᙱᑦᑐᓂᒃ ᐊᔪᙱᔾᔪᑎᔅᓴᓂᒃ ᐱᕙᓪᓕᐊᓂᕐᒧᑦ, ᐱᕙᓪᓕᐊᓗᓂ ᐃᓗᐊᓈᕈᑎᔅᓴᓂᒃ ᐅᑭᐅᖅᑕᖅᑐᒥᐅᑕᓄᑦ ᑐᓂᓯᓗᒋᑦ ᑐᑭᖃᑦᑎᐊᖅᑐᒥᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᓕᕆᐊᕆᔭᐅᖃᑦᑕᖅᑐᓂᒃ ᐅᑭᐅᖅᑕᖅᑐᒥ
  • ᐱᕚᓪᓕᕐᓗᒋᑦ ᐱᔭᐅᔪᓐᓇᖅᑐᓂᒃ ᐊᒻᒪᓗ ᑐᓴᖅᑕᐅᔪᓐᓇᖅᑐᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑎᑎᕋᖅᓯᒪᔪᓂᒃ ᐅᑭᐅᖅᑕᖅᑐᒥ
  • ᐱᕚᓪᓕᕐᓗᒋᑦ ᖃᐅᔨᓴᕐᓂᕐᒧᑦ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᓄᓇᒋᔭᐅᔪᒥ ᐱᕙᓪᓕᐊᓂᒃᑯᑦ ᐊᒻᒪᓗ ᐊᑕᐅᓯᙳᕐᓗᒋᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑦ ᐊᒻᒪᓗ ᐅᐊᓕᓂᕐᒥᐅᑕᐃᑦ ᓱᓇᒃᑯᑖᖏᑦ ᖃᐅᔨᓴᕐᓂᖏᑎᒍᑦ

ᐅᖃᖃᑎᒌᖕᓂᕐᒧᑦ ᐊᐱᖅᓲᑎ

  • ᖃᓄᖅ ᑲᓇᑕ ᑭᐅᔪᓐᓇᖅᐸᑦ ᓄᓇᒋᔭᐅᔪᒥ ᖃᐅᔨᒪᔭᐅᔪᓂᒃ ᐱᔭᐅᔪᒪᓂᖏᓐᓂᒃ, ᐱᕚᓪᓕᕆᐊᕐᓗᒋᑦ ᐊᒥᓲᕙᓪᓕᐊᑎᑦᑎᓂᕐᒧᑦ ᐅᑭᐅᖅᑕᖅᑐᒥᐅᑕᓄᑦ ᐃᓚᒋᔭᐅᓗᑎᒃ ᐅᑭᐅᖅᑕᖅᑑᑉ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐃᓱᒪᒃᓴᖅᓯᐅᕈᑎᔅᓴᓂᒃ, ᐃᑲᔪᖅᑎᒌᓪᓗᑎᒃ ᓄᓇᒋᔭᐅᔪᓄᑦ ᐊᒻᒪᓗ ᓄᓇᖃᖅᑐᓄᑦ ᓯᓚᑦᑐᖅᓴᕐᕕᖓᓂ, ᐊᒻᒪᓗ ᐱᐅᓂᖅᓴᒃᑯᑦ ᐋᖅᑭᒋᐊᕐᓗᒋᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑎᒍᑦ ᐃᓱᒪᒃᓴᖅᓯᐅᕐᓂᕐᒧᑦ?

ᓴᐳᒻᒥᓂᖅ ᐊᕙᑎᒧᑦ ᐊᒻᒪᓗ ᐱᓯᒪᑦᑎᓂᖅ ᐅᑭᐅᖅᑕᖅᑑᑉ ᐆᒪᔪᖏᓐᓂᒃ

"ᐱᑕᖃᖅᑐᖅ ᐃᓗᒻᒪᕆᒃᑯᑦ ᖃᐅᔨᒪᔭᐅᔪᓂᒃᓄᓇᒋᔭᐅᔪᒥ, ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐃᓕᑕᐅᓯᒪᔪᑦ ᐅᑭᐅᖅᑕᖅᑐᒥ ᑖᒃᑯᓄᖓ ᐅᖃᐅᓯᒋᔭᐅᔪᓂᒃ ᐃᓱᒪᒃᓴᖅᓯᐅᕐᓂᕐᒧᑦ ᐱᕙᓪᓕᐊᔾᔪᑕᐅᔪᓐᓇᖅᑐᑦ ᐊᑐᐊᒐᓄᑦ ᐊᒻᒪᓗ ᐊᑐᖅᑕᐅᕙᒃᑐᓂᒃ ᐱᕙᓪᓕᐊᓂᐊᖅᑐᓄᑦ. ᐊᖏᔪᒃᑯᑦ ᐱᕙᓪᓕᐊᔪᖃᕐᓂᐊᖅᑐᑦ ᐃᓱᒪᒋᔭᐅᔪᓂᒃ ᐊᒻᒪᓗ ᐊᑐᖅᑕᐅᕙᒃᑐᒃᓂᒃ ᐱᒃᑲᓐᓂᕆᐊᕐᓗᒋᑦ ᐃᓚᖃᖅᑐᓄᑦ ᓴᐳᒻᒥᔭᐅᓂᕐᒧᑦ ᐊᕙᑎᐅᑉ ᒥᔅᓵᓄᑦ ᐃᓅᑦᑎᐊᕋᓱᐊᕐᓂᒃᑯᑦ ᐊᒻᒪᓗ ᓱᖏᐅᑎᓂᒃᑯᑦ ᐅᑭᐅᖅᑕᖅᑐᒥ ᓄᓇᖃᖅᑐᓄᑦ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

ᐊᑲᐅᙱᓕᐅᕈᑕᐅᔪᖅ

  • ᐊᑯᓂᐅᔪᒃᑯᑦ ᓴᐳᒻᒥᔾᔪᑎᔅᓴᓂᒃ ᐅᑭᐅᖅᑕᖅᑐᒥ ᐊᕙᑎᖓᓂᒃ, ᐊᐅᓚᓂᖅ ᐊᕙᑎᒧᑦ ᐊᒻᒪᓗ ᐃᒪᓄᑦ ᐅᑭᐅᖅᑕᖅᑐᒥ ᐆᒪᔪᖏᓐᓂᒃ, ᐊᑲᐅᓈᕐᓂᕐᒧᑦ ᐊᕙᑎᓕᕆᓂᕐᒧᑦ ᐱᕙᓪᓕᐊᓂᖅ ᓄᓇᓂᙶᖅᑐᓂᒃ, ᐊᒻᒪᓗ ᓴᙱᓕᕙᓪᓕᐊᓗᒍ ᐱᕈᖅᐸᓪᓕᐊᓂᖓᓄᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᓂᕆᔭᐅᕙᒃᓄᑦ ᐃᑲᔪᕐᓗᑎᒃ ᒪᑭᒪᒐᓱᐊᕐᓂᕐᒧᑦ ᐆᒪᔪᓄᑦ ᐱᓯᒪᑦᑎᑦᑎᓂᒃᑯᑦ/ᓴᐳᒻᒥᓂᒃᑯᑦ, ᐱᕙᓪᓕᐊᓂᖅ ᖃᐅᔨᓴᕐᓂᕐᒧᑦ/ᐅᖃᐅᓯᕆᓗᒋᑦ ᓯᓚᐅᑉ ᐊᓯᙳᖅᐸᓪᓕᐊᓂᖓ ᐊᒻᒪᓗ ᓇᓗᓇᐃᕆᐊᕐᓗᒍ ᓈᒻᒪᒃᑐᓂᒃ ᖃᐅᔨᒪᔭᐅᔪᔅᓴᓂᒃ ᑐᓴᖅᑕᐅᓗᑎᒃ ᐃᓱᒪᖅᓴᖅᓯᐅᕈᑕᐅᔪᓂᒃ

ᓇᓗᓇᐃᖅᓯᒪᔪᑦ

  • ᓯᓚᐅᑉ ᐊᓯᙳᖅᐸᓪᓕᐊᓂᖓ ᐊᐅᓚᔪᒻᒪᕆᐊᓗᒃ ᐊᓯᙳᖅᐸᓪᓕᐊᓂᕐᒧᑦ ᐅᑭᐅᖅᑕᖅᑐᒥ, ᐊᒻᒪᓗ ᐱᕙᓪᓕᐊᔾᔪᑕᐅᔪᖅ ᐃᓅᓯᖃᖅᑐᓄᑦ ᐅᑭᐅᖅᑕᖅᑐᒥ ᑲᓇᑕᒥᐅᑕᓄᑦ.
  • ᐊᐅᓚᔪᓐᓇᐅᑏᑦ ᐊᑐᖅᑕᐅᔪᑦ ᐊᑐᖅᑐᑦ 96% ᐱᕈᖅᓯᐊᓕᕆᓂᕐᒧᑦ ᓯᓚᒧᐊᖅᑎᑦᑎᕙᒃᑐᓂᒃ ᓄᓇᒋᔭᐅᔪᒥ ᐅᑭᐅᖅᑕᖅᑐᒥ ᑕᐃᒪᐅᑎᓪᓗᒋᑦ ᒪᕐᕉᓕᖓᔪᑦ−ᐱᖓᓱᓂᙶᖅᑐᓂᒃ ᐃᖏᕐᕋᔾᔪᑎᔅᓴᓂᙶᖅᑐᓂᒃ ᐊᒻᒪᓗ ᓄᓇᒋᔭᐅᔪᑦ ᐅᑭᐅᖅᑕᖅᑐᒥ ᐊᑐᖅᑐᑦ 1% ᑲᓇᑕᐅᑉ ᑲᑎᓪᓗᒋᑦ ᐱᕈᖅᓯᐊᓄᑦ ᓯᓚᒧᐊᖅᑎᑦᑎᕙᒃᑐᓂᒃ.
  • ᐅᑭᐅᖅᑕᖅᑐᖅ ᓯᓚᕐᔪᐊᒥ ᓯᕗᓪᓕᐅᔪᖅ ᐊᐅᓚᓂᕐᒧᑦ ᐊᕙᑎᓄᑦ ᐊᒻᒪᓗ ᐃᒪᕐᓄᑦ ᐱᕚᓪᓕᖅᓯᒪᔪᒃᑯᑦ. ᓄᓇᕗᑦ, ᐆᑦᑑᑎᒋᓗᒍ ᐱᓯᒪᑎᑦᑎᔪᑦ 10 % ᓄᓇᖓᓂᒃ ᐊᒻᒪᓗ ᐃᒪᖏᓐᓂᒃ (350,000 ᑭᑉᐸᕆᒃᑐᓂᒃ ᑭᓚᒦᑕᓂᒃ).
  • ᑕᓪᓗᕈᑎᐅᑉ ᐃᒪᖓ/ᓛᓐᑳᔅᑐ ᓴᐅᓐ ᑲᓇᑕᒥ ᐃᒪᕐᒥᐅᑕᓕᕆᓂᕐᒧᑦ ᐊᐅᓚᑕᐅᔪᖅ ᓄᓇᖓ ᐊᒻᒪᓗ ᐃᒪᖓ ᓇᔪᕐᕕᖓ ᐃᓚᒋᔭᐅᓗᒃᑖᕐᓗᒋᑦ ᐅᖓᑖᓂ 131,000 ᑭᑉᐸᕆᒃᑐᑦ ᑭᓚᒦᑕᓂᒃ (ᐊᖏᓂᖓ ᒪᕐᕈᐃᓕᖓᑲᓴᒃᑐᑦ ᓄᕙ ᔅᑯᓴᒥᑦ), ᐊᖏᓂᖅᐹᖑᔪᖅ ᑕᕆᐅᕐᒥ ᐊᐅᓚᑕᐅᔪᖅ ᓇᔪᕐᕕᒋᔭᐅᔪᖅ ᑲᓇᑕᒥ.
  • ᑲᓇᑕᐅᑉ ᑕᕆᐅᖓ ᐊᖏᕐᕋᕆᔭᐅᔪᑦ ᐊᖏᔪᒃᑯᑦ ᐊᔾᔨᒌᙱᑦᑐᒃᑯᑦ ᑕᕆᐅᕐᒥᐅᑕᓄᑦ, ᑐᓂᓯᕙᒃᑐᑦ ᐊᓂᖅᓵᕈᑎᔅᓴᓂᒃ ᐅᕙᑎᑦᑎᓐᓄᑦ, ᐆᓇᖅᑎᑦᑎᔾᔪᑎᑐᑦ ᐊᐅᓚᒋᐊᕐᓗᒍ ᓯᓚᕐᔪᐊᑉ ᐃᒃᑮᕐᓇᕐᓂᖓ ᐊᒻᒪᓗ ᐃᑲᔪᖅᑐᑎᒃ ᐊᖏᔪᒃᑯᑦ ᐊᔾᔨᒌᙱᑦᑐᓂᒃ ᐆᒪᔪᓂᒃ ᐊᒻᒪᓗ ᓄᓇᒋᔭᐅᔪᒥ, ᓄᓇᖃᖅᑐᓂᒃ ᐊᒻᒪᓗ ᓯᓚᕐᔪᐊᒥ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ.
  • ᑲᓇᑕᒥ ᓯᒡᔭᓯᑉᐸᒃᑯᑦ ᒥᐊᓂᖅᓯᔩᑦ ᐊᐅᓚᑦᑎᔨᐅᔪᑦ ᒐᕙᒪᕐᔪᐊᒃᑯᓐᓄᑦ ᐱᓕᕆᔩᑦ ᑭᐅᔾᔪᑕᐅᓪᓗᑎᒃ ᐅᒥᐊᕐᔪᐊᓄᑦ−ᐊᑕᔪᓄᑦ ᑕᕆᐅᕐᒥ ᓱᕈᕐᓇᖅᑐᓂᒃ/ᑯᕕᔪᖃᖅᑐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ.
  • ᐊᕙᑎᒧᑦ ᐊᐅᓚᓂᖅ ᐃᑲᔪᖅᑎᒌᒃᑐᑯᑦ ᑲᒪᒋᔭᐅᔪᑦ ᑲᒪᒋᔭᐅᔭᕆᐊᖃᖅᑐᑦ ᖃᓂᑦᑐᒃᑯᑦ ᑲᒪᒋᔭᐅᓂᒃᑯᑦ ᑕᒪᒃᑭᕐᓗᒋᑦ ᐊᔾᔨᒌᙱᑦᑐᒃᑯᑦ ᒐᕙᒪᓕᕆᓂᒃᑯᑦ.

ᖃᓄᐃᓕᐅᖅᓯᒪᓂᑯᐃᑦ

ᐅᑭᐅᖅᑕᖅᑐᒥ ᓄᓇᖓ ᖃᓄᐃᓐᓂᖓ, ᐊᒻᒪᓗ ᐱᕈᖅᓯᐊᖏᑦ ᐊᒻᒪᓗ ᓂᕐᔪᑎᖏᑦ, ᐊᑐᐃᓐᓇᐅᔪᑦ ᑮᓇᐅᔭᓕᐅᕐᓂᕆᔭᕙᒃᑐᓄᒃ, ᐃᓕᖅᑯᓯᒧᑦ, ᐃᓅᖃᑎᒌᖕᓂᕐᒧᑦ ᐊᒻᒪᓗ ᖁᕕᐊᓱᖃᑎᒌᖕᓂᕐᒧᑦ ᐊᑐᐃᓐᓇᐅᔪᑦ ᐅᑭᐅᖅᑕᖅᑐᒥ ᓄᓇᒋᔭᐅᔪᓄᑦ. ᐊᕙᑎ ᐊᒻᒪᓗ ᐆᒪᔪᑦ ᐱᒻᒪᕆᐅᔪᒃᑯᑦ ᐊᑐᐃᓐᓇᐅᔪᑦ ᒥᑭᓪᓕᕆᐊᕐᓂᕐᒧᑦ ᐃᓅᖃᑎᒌᒃᑐᓄᑦ, ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐊᒻᒪᓗ ᐅᕙᑎᒧᑦ ᐊᑦᑕᕐᓇᕈᑕᐅᔪᓂᒃ ᐃᓚᖃᖅᑐᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ. ᑭᓯᐊᓂ ᐅᑭᐅᖅᑕᖅᑑᑉ ᓄᓇᖓ ᖃᓄᐃᓐᓂᖓ, ᐊᖏᔪᒃᑯᑦ ᐊᑦᑕᕐᓇᖅᑐᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᒫᓐᓇᐅᔪᒃᑯᑦ ᐱᕙᓪᓕᐊᓯᒪᔪᑦ ᐊᖏᔪᒃᑯᑦ ᐊᓯᙳᖅᐸᓪᓕᐊᓂᖓᓄᑦ ᐱᕙᓪᓕᐊᔾᔪᑕᐅᔪᑦ ᐃᓅᖃᑎᒌᖕᓂᕐᒧᑦ, ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐱᕙᓪᓕᐊᓂᕐᒧᑦ, ᐆᒪᔪᓄᒃ, ᐊᒻᒪᓗ ᐊᑐᓕᖅᑎᑦᑎᓂᕐᒧᑦ ᑐᕌᖅᑕᐅᓯᒪᔪᓂᒃ ᓄᓇᓂᙶᖅᑐᓂᒃ ᓱᖏᐅᑎᓂᒃ ᐋᖅᑭᒃᑕᐅᔪᓐᓇᖅᑐᓂᒃ ᐊᑐᖅᑕᐅᔪᓐᓇᖅᑐᑦ ᓴᐳᒻᒥᒋᐊᕐᓗᒋᑦ ᐅᑭᐅᖅᑕᖅᑐᒥ ᓄᓇᖃᖅᑐᓂᒃ ᐊᒻᒪᓗ ᐃᑲᔪᕐᓗᑎᒃ ᓱᖏᐅᑎᓂᖅ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ.

ᐊᑐᐃᓐᓇᐅᔪᓐᓇᖅᑐᓂᒃ ᓄᓇᓂᙶᖅᑐᓂᒃ ᓇᓂᔭᐅᓲᑦ ᐅᑭᐅᖅᑕᖅᑐᒥ ᐊᓯᙳᕐᓂᖓ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒻᒪᓗ ᐊᓯᖏᓐᓂᒃ ᐱᔾᔪᑎᖃᖅᑐᓂᒃ, ᒐᕙᒪᒃᑯᑦ ᓇᓗᓇᐃᖅᓯᔭᕆᐊᖃᖅᑐᑦ ᐊᑐᐊᒐᐃᑦ ᓈᒻᒪᓈᕆᐊᕐᓗᑎᒃ. ᐊᑲᐅᙱᓕᐅᕈᑕᐅᔪᑦ ᐱᕙᓪᓕᐊᔪᑦ ᐅᑭᐅᖅᑕᖅᑐᒥ ᐆᒪᔪᑦ ᐱᕙᓪᓕᐊᓯᒪᔪᒃᑯᑦ ᓯᓚᑖᒍᑦ ᐅᑭᐅᖅᑕᖅᑐᒥᑦ ᐊᒻᒪᓗ ᐱᕙᓪᓕᐊᓂᖓᓄᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᑐᖅᑐᒻᒪᕆᐊᓗᒃ ᐊᒻᒪᓗ ᓇᓗᓇᖅᑐᑦ ᖃᐅᔨᒪᒋᐊᕐᓗᒋᑦ. ᐱᒋᐊᕐᓂᖅ ᐃᑲᔪᕐᓂᕐᒧᑦ ᓱᖏᐅᑎᓂᕐᒧᑦ ᐊᒻᒪᓗ ᐆᒪᔪᓄᑦ ᒪᑭᑕᓂᖅ ᒫᓐᓇᐅᔪᒃᑯᑦ ᐊᒻᒪᓗ ᓯᕗᓂᒧᑦ ᓯᓚᐅᑉ ᐱᕙᓪᓕᐊᓂᖏᓐᓄᑦ ᐊᑦᑕᕐᓇᖅᑐᓂᒃ ᓄᓇᖃᖅᑐᓂᒃ ᐃᑲᔪᕐᓂᐊᖅᑐᑦ ᐅᑭᐅᖅᑕᖅᑐᒥ ᓄᓇᖃᖅᑐᓂᒃ, ᑮᓇᔭᐅᓕᐅᕐᓂᕆᔭᐅᔪᓂᒃ ᐊᒻᒪᓗ ᐆᒪᔪᓄᑦ ᐃᑉᐱᒋᓂᒃᑯᑦ ᐊᒻᒪᓗ ᐱᔪᒪᓂᒃᑯᑦ ᐊᓯᙳᖅᐸᓪᓕᐊᑎᓪᓗᒍ ᓯᓚ.

ᐅᑭᐅᖅᑕᖅᑐᒥ ᓄᓇᓖᑦ ᐊᒻᒪᓗ ᐱᓗᐊᖅᑐᒥᒃ ᓄᓇᖃᖅᑳᖅᓯᒪᔪᑦ ᐃᓄᖏᑦ ᐊᑯᓂᐅᔪᒃᑯᑦ ᐅᓂᒃᑳᖅᑐᐊᒃᑯᑦ ᑐᓴᐅᒪᓂᖅ ᐅᑯᓄᖓ, ᐊᒻᒪᓗ ᐃᑎᔪᒃᑯᑦ ᑐᑭᓯᐊᓪᓗᑎᒃ ᓱᖏᐅᑎᓂᕐᒧᑦ, ᐊᓯᙳᖅᐸᓪᓕᐊᔪᓄᑦ ᓯᓚᒧᑦ ᐊᒻᒪᓗ ᓄᓇᒧᑦ. ᓄᓇᖃᖅᑳᖅᓯᒪᔪᑦ ᐊᒻᒪᓗ ᓄᓇᖃᖅᑐᑦ ᖃᐅᔨᒪᔭᖏᑎᒍᑦ ᐃᑲᔪᕈᓐᓇᖅᑐᑦ ᐱᕙᓪᓕᐊᓂᕐᒧᑦ ᓄᑖᓂᒃ ᐊᒻᒪᓗ ᐃᓱᒪᔅᓴᖅᓯᐅᕈᑎᔅᓴᓂᒃ ᐋᖅᑭᒃᑕᐅᔪᓐᓇᖅᑐᓂᒃ ᐃᑲᔫᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᒪᑭᑕᓂᕐᒧᑦ ᐊᒻᒪᓗ ᐃᑲᔫᑕᐅᓗᑎᒃ ᐊᕙᑎᒧᑦ ᐊᒻᒪᓗ ᐅᑭᐅᖅᑕᖅᑐᒥ ᐆᒪᔪᓄᑦ. ᐃᑲᔪᖅᑎᒌᒃᑐᒃᑯᑦ ᐊᐅᓚᑕᐅᔪᓂᒃ ᐋᖅᑭᒃᓱᐃᓂᒃᑯᑦ ᐋᖅᑭᒃᓯᒪᔪᑦ ᐅᓪᓗᒥᒧᑦ ᓄᓇᑖᖅᓯᒪᓂᕐᒧᑦ ᐊᖏᕈᑎᐊᓂᒃ, ᓄᓇᖃᖅᑳᖅᓯᒪᔪᑦ ᐃᓄᖏᑦ ᐱᓕᕆᔪᑦ ᐃᑲᔪᖅᑎᒌᒃᑐᒃᑯᑦ ᒐᕙᒪᕐᔪᐊᒃᑯᓐᓂᑦ, ᓄᓇᖃᖅᑐᓂᒃ, ᐊᒻᒪᓗ ᓄᓇᒋᔭᐅᔪᓂᒃ ᒐᕙᒪᒃᑯᑦ ᐊᔾᔨᒌᙱᑦᑐᒃᑯᑦ ᐊᕙᑎᓕᕆᓂᕐᒧᑦ ᐊᐅᓚᑦᑎᓂᖅ ᐊᑲᐅᙱᓕᐅᕈᑕᐅᔪᓂᒃ, ᐃᓚᒋᓗᒋᑦ ᐊᕙᑎᓕᕆᓂᒧᑦ ᖃᐅᔨᓴᕐᓂᖅ, ᓄᓇᓂᒃ ᐊᑐᖅᑐᓂᒃ ᐸᕐᓇᐅᑎᓂᒃ ᐊᒻᒪᓗ ᓄᓇᓂᙶᖅᑐᓂᒃ ᐊᑐᐃᓐᓇᐅᔪᓐᓇᖅᑐᓂᒃ ᐊᐅᓚᑦᑎᓂᖅ. ᐊᑉᐸᑎᓐᓂᒃᑯᑦ ᖁᑦᑎᓐᓂᖅᐹᒥᑦ ᐊᐅᓚᑎᑦᑎᓂᕐᒧᑦ ᐃᑲᔫᑎᖃᖅᑐᑦ ᓄᑖᓂᒃ ᐃᓗᐊᓈᕐᕕᔅᓴᓂᒃ ᐅᑭᐅᖅᑕᖅᑐᒥᐅᑕᓄᑦ ᐃᖅᑲᓇᐃᔮᕐᓗᑎᒃ ᐃᑲᔪᖅᑎᒌᖕᓂᒃᑯᑦ ᑲᒪᒋᔭᐅᔭᕆᐊᖃᖅᑐᓂᒃ ᐊᒻᒪᓗ ᐊᑲᓈᖅᑐᒥᒃ ᐊᕙᑎᒧᑦ ᐊᐅᓚᓗᒋᑦ ᓄᓇᐃᑦ, ᐃᒪᐃᑦ ᐊᒻᒪᓗ ᓄᓇᓂᙶᖅᑐᓂᒃ ᐊᑐᐃᓐᓇᐅᔪᔅᓴᐃᑦ ᔫᑳᓐᒥ ᐊᒻᒪᓗ ᓄᓇᑦᑎᐊᒥ ᐃᑲᔫᑎᖃᕐᓂᐊᕐᓗᒋᑦ ᒫᓐᓇᐅᔪᒧᑦ ᐊᒻᒪᓗ ᓯᕗᓂᒧᑦ.

ᑲᓇᑕ ᓇᓗᓇᐃᖅᓯᒪᑎᑦᑎᔪᑦ ᐱᔪᒪᑦᑎᐊᕐᓂᖏᓐᓄᑦ ᓇᓗᓇᐃᕐᓗᒋᑦ ᑮᓇᐅᔭᓕᐅᕐᓂᕆᔭᐅᕙᒃᑐᓄᑦ ᐊᒻᒪᓗ ᐊᕙᑎᒧᑦ ᐱᓕᕆᖃᑎᒌᓪᓗᑎᒃ ᐃᓱᒪᔅᓴᖅᓯᐅᕐᓂᒃᑯᑦ ᐆᑦᑑᑎᒋᓗᒍ Pan-Canadian Framework on Clean Growth and Climate Change (ᑲᓚᑕᓕᒫᒧᑦ ᐱᓕᕆᐊᔅᓴᐃᑦ ᓴᓗᒪᓂᕐᒧᑦ ᐱᕈᖅᓯᓂᖅ ᐊᒻᒪᓗ ᓯᓚᐅᑉ ᐊᓯᙳᖅᐸᓪᓕᐊᓂᖓ) ᐊᒻᒪᓗ  Oceans Protection Plan. (ᑕᕆᐅᔪᑦ ᐸᓯᒻᒥᓂᑦ ᐸᕐᓇᐅᑎᑦ)

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᐅᖅᓯᒪᓂᖏᑦ

  • ᒥᑭᓪᓕᕆᐊᕐᓂᖅ ᐅᑭᐅᖅᑕᖅᑐᒥ ᒪᑭᒪᒐᓱᐊᕐᓂᖓ ᐅᖅᓱᐊᓗᒻᒧᑦ ᐱᕙᓪᓕᐊᑎᑦᑎᓂᕐᒧᑦ/ᓴᙱᓕᕙᓪᓕᐊᓂᕐᒧᑦ ᐱᕚᓪᓕᕐᓂᖅ ᐆᒻᒪᖁᑎᓄᑦ ᐊᑲᐅᓇᖅᑐᓂᒃ ᐅᖅᓱᐊᓗᒻᒧᑦ ᐃᓪᓗᓄᑦ ᐊᑐᖅᑕᐅᔪᓄᑦ; ᑕᑯᑎᑦᑎᓗᓂ/ᐃᓕᓯᓗᓂ ᐊᔾᔨᒌᙱᑦᑐᓂᒃ ᐅᕝᕙᓘᓐᓃᑦ ᐊᑐᖅᑕᐅᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓂᒃ ᐋᖅᑭᒃᓯᒪᔪᓂᒃ; ᐊᒻᒪᓗ, ᐱᖃᕆᐊᖃᖅᑎᑦᑎᓗᒋᑦ ᓄᓇᖃᖅᑐᑦ ᐆᒻᒪᖅᑯᑎᓄᑦ ᓴᕕᒐᐅᔭᔅᓴᓂᒃ
  • ᐱᕚᓪᓕᕐᓂᖅ ᐆᒪᔪᓄᑦ ᒪᑭᑕᓂᕐᒧᑦ ᓱᖏᐅᑎᓂᒃᑯᑦ ᐃᓱᒪᔅᓴᖅᓯᐅᕐᓂᒃᑯᑦ, ᐊᒻᒪᓗ ᐊᑕᐅᓯᙳᖅᑎᑦᑎᓂᖅ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐃᓱᒪᔅᓴᖅᓯᐅᕐᓂᕐᒧᑦ ᓄᓇᓂᙶᖅᑐᓂᒃ ᐊᐅᓚᓂᒃᑯᑦ ᐊᒻᒪᓗ ᐆᒪᔪᓄᑦ ᐱᓯᒪᑎᑦᑎᓂᕐᒧᑦ
  • ᖃᐅᔨᓴᕐᓗᒋᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᕙᓪᓕᐊᔪᓂᒃ ᐆᒪᔪᓄᑦ
  • ᐱᕙᓪᓕᐊᓂᖅ ᓱᖏᐅᑎᓂᕐᒧᑦ ᒫᓐᓇᐅᔪᒧᑦ ᐊᒻᒪᓗ ᓯᕗᓂᒧᑦ ᓯᓚᐅᑉ ᐱᕙᓪᓕᐊᓂᖏᓐᓄᑦ ᐃᑲᔪᕐᓂᐊᖅᑐᑦ ᓴᐳᒻᒥᒋᐊᕐᓗᒋᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᑦᑕᕐᓇᖅᑐᓂᒃ, ᐱᕙᓪᓕᐊᓗᓂ ᒪᑭᑕᓂᕐᒧᑦ ᐊᒻᒪᓗ ᐊᑭᑭᓐᓂᖅᓴᐅᔪᒃᑯᑦ
  • ᐃᑲᔪᕐᓂᖅ ᐊᕙᑎᒧᑦ ᑐᐊᕕᕐᓇᖅᑐᓂᒃ ᑭᐅᔾᔪᑕᐅᔪᔅᓴᓂᒃ
  • ᖃᐅᔨᓴᕐᓂᖅ ᐊᒻᒪᓗ ᑲᔪᓯᑎᑦᑎᓂᖅ ᐋᓐᓂᐊᖅᑕᐃᓕᒪᓂᕐᒧᑦ ᐊᒥᓲᓂᖏᑦ ᐆᒪᔪᓄᑦ ᐊᒻᒪᓗ ᓇᓗᓇᐃᕐᓗᒋᑦ ᐋᓐᓂᐊᖅᑕᐃᓕᒪᓂᕐᒧᑦ ᓄᓇᒥ, ᐃᒪᒥ ᐊᒻᒪᓗ ᑕᕆᐅᒥ ᐆᒪᔪᓂᒃ
  • ᐊᑯᓂᐅᔪᒃᑯᑦ ᐊᑲᐅᓈᖅᑐᒥᒃ ᐊᕙᑎᓕᕆᓂᕐᒧᑦ ᐊᒻᒪᓗ ᐊᑲᐅᓈᖅᑐᒥᒃ ᐱᕙᓪᓕᐊᓂᖅ ᓄᓇᓂᙶᖅᑐᓂᒃ ᐊᑐᐃᓐᓇᐅᔪᔅᓴᓂᒃ
  • ᐃᑲᔪᕐᓂᖅ ᓴᙱᔪᒥᒃ ᑐᙵᕝᕕᖃᖅᑐᒥᒃ ᐊᒥᓱᒃᑯᑦ ᑮᓇᐅᔭᓕᐅᕐᓂᕆᔭᐅᕙᒃᑐᓂᒃ/ᐃᖅᑲᓇᐃᔮᔅᓴᒧᑦ ᐃᑲᔫᓯᐊᓂᒃ ᓄᓇᖃᖅᑳᖅᓯᒪᔪᓄᑦ ᐃᓄᖏᓐᓄᑦ ᐃᓚᖃᖅᑐᓂᒃ ᐃᑲᔪᖅᑎᒌᒃᑐᓄᑦ ᐊᐅᓚᓂᕐᒧᑦ ᐊᒻᒪᓗ ᐊᑲᐅᓈᖅᑐᒧᑦ ᐊᑐᖅᐸᒃᑐᓂᒃ ᓴᐳᒻᒥᔭᐅᓯᒪᔪᓂᒃ ᐊᑐᐃᓐᓇᐅᔪᒃᓴᓂᒃ
  • ᐃᑲᔪᕐᓂᖅ ᑐᓴᖅᑎᑦᑎᓂᒃᒧᑦ ᑐᑭᓯᐊᔾᔪᑎᔅᓴᓂᒃ ᐃᐱᒋᑦᑎᐊᕐᓂᒃᑯᑦ ᐊᕙᑎᒧᑦ ᐊᐅᓚᓂᕐᒧᑦ ᐊᑯᓐᓂᖓᒍᑦ ᑕᒪᒃᑮᑦ ᒐᕙᒪᒃᑯᓂᑦ

ᐅᖃᖃᑎᒌᖕᓂᕐᒧᑦ ᐊᐱᖅᑯᑎ

  • ᖃᓄᖅ ᓄᓇᖃᖅᑳᖅᓯᒪᔪᑦ ᐊᒻᒪᓗ ᓄᓇᖃᖅᑐᑦ ᐃᓕᓯᒪᔭᖏᑦ/ᖃᐅᔨᒪᔭᖏᑦ ᐃᓚᒋᔭᐅᔪᓐᓇᖅᐸᑦ ᐱᕙᓪᓕᐊᓂᕐᒧᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒻᒪᓗ ᐆᒪᔪᓄᑦ?

ᐅᑭᐅᖅᑕᖅᑐᖅ ᓯᓚᕐᔪᐊᒃᑯᑦ ᑕᑯᓗᒍ

"ᐅᖃᐅᓯᒃᑲᓐᓂᕆᔪᓐᓇᖅᑕᒃᑯᑦ ᐊᐅᓚᑦᑎᔨᐅᔪᓄᑦ ᐱᒻᒪᕆᐅᓚᐅᖅᑐᖅ ᐊᓯᙳᕐᓂᐊᕐᓂᕐᒧᑦ ᐃᓱᒪᒋᔭᐅᔪᒃᑯᑦ ᐅᑭᐅᖅᑕᖅᑑᑉ ᐊᖏᓂᖓᓄᑦ, ᐅᖓᓯᓐᓂᖓᓄᑦ ᐊᒻᒪᓗ ᐊᒥᓲᙱᑦᑐᒃᑯᑦ ᓄᓇᖃᑎᒌᖕᓂᒃᑯᑦ ᐅᖓᓯᓐᓂᖓᓄᑦ ᓄᓇᒋᔭᐅᔪᖅ ᑲᓇᑕᒥ, ᐃᓱᒪᒋᒋᐊᕐᓗᒍ ᐅᑭᐅᖅᑕᖅᑑᑉ ᖃᓄᐃᓐᓂᐅᓂᖓᓄᑦ ᑭᓇᐅᓂᕗᑦ ᐅᑭᐅᖅᑕᖅᑐᒥ ᓄᓇᖃᕐᓂᕐᒧᑦ, ᐱᔾᔪᑎᖃᖅᑐᓂ ᓄᑖᓂᒃ ᐊᒥᓱᒃᑯᑦ ᐃᓕᖅᑯᓯᖃᖅᑐᓂᒃ ᐃᓚᒌᖕᓂᒃᑯᑦ, ᓯᓚᕐᔪᐊᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐊᑲᐅᓈᕐᓂᕐᒧᑦ ᐊᕙᑎᓕᕆᓂᕐᒧᑦ ᐱᕙᓪᓕᐊᓂᕐᒧᑦ. ᐅᑭᐅᖅᑕᖅᑐᖅ ᐱᕙᓪᓕᐊᓯᒪᔪᖅ ᖃᐅᔨᒪᔭᐅᑦᑎᐊᕐᓂᒃᑯᑦ ᓯᓚᕐᔪᐊᒥ ᐱᔭᐅᔪᒪᔪᓂᒃ."

ᒥᐊᕆ ᓴᐃᒪᓐ, ᓄᑖᒃᑯᑦ ᐃᑲᔪᖅᑎᒌᖕᓂᒃᑯᑦ ᐅᑭᐅᖅᑕᖅᑐᒥ ᐊᐅᓚᔪᓐᓇᕐᓂᖅ ᐃᔾᔪᐊᕈᒥᓇᖅᑐᑦ

ᐊᑲᐅᙱᓕᐅᕈᑕᐅᔪᖅ

  • ᐃᖅᑲᓇᐃᔮᔅᓴᒧᑦ ᑲᓇᑕ ᐃᓚᒋᔭᐅᓗᓂ ᖃᓄᐃᑦᑑᓂᐊᕐᓂᖓᓄᑦ ᐅᑭᐅᖅᑕᖅᑐᒥ ᐊᐅᓚᑦᑎᔨᐅᔪᒧᑦ ᐊᒻᒪᓗ ᐃᑲᔪᖅᑎᒌᖕᓂᕐᒧᑦ ᐱᓕᕆᐊᕆᓗᒋᑦ ᐊᒃᓱᕈᕐᓇᖅᑐᑦ ᐊᒻᒪᓗ ᐃᓗᐊᓈᕈᑎᔅᓴᐃᑦ ᐅᑭᐅᖅᑕᖅᑐᒥ ᓴᙱᓕᖅᑎᑦᑎᓂᕐᒧᑦ ᒪᓕᒃᑕᐅᔭᕆᐊᖃᖅᑐᓂᒃ−ᐊᑐᖅᑕᐅᔪᑦ ᓯᓚᕐᔪᐊᒥ ᒪᓕᒃᑕᐅᔭᕆᐊᖃᖅᑐᓂᒃ ᐊᒻᒪᓗ ᐃᑲᔪᖅᑕᐅᓂᒃᑯᑦ ᑲᓇᑕᐅᑉ ᐊᖏᕐᕋᕆᔭᖏᓐᓂᒃ ᓯᕗᓪᓕᐅᑎᑕᐅᔭᕆᐊᖃᖅᑐᓂᒃ

ᓇᓗᓇᐃᖅᓯᒪᔪᑦ

  • ᐅᑭᐅᖅᑕᖅᑐᒋᔭᐅᔪᑦ ᐅᑭᐅᖅᑕᖅᑐᒥ ᐊᕐᕕᓂᓖᑦ ᐱᖓᓱᑎᒎᖅᑕᐅᓯᒪᔪᑦ ᓯᓚᕐᒧᐊᒥ: ᑲᓇᑕ, ᑭᖕᑕᒻ ᑎᓐᒫᒃ (ᑲᓛᖦᖡᑦ ᓄᓇᖓᓄᑦ ᐊᒻᒪᓗ ᕙᕈ ᕿᑭᖅᑕᖏᑦ), ᕕᓐᓚᓐ, ᐊᐃᔅᓚᓐ, ᓄᐊᕕ, ᕋᓴ ᕕᑐᕆᓴᓐ, ᔅᕕᑕᓐ ᐊᒻᒪᓗ ᐊᒥᐊᓕᑲᒃᑯᑦ.
  • ᐅᑭᐅᖅᑕᖅᑐᒥ ᑲᑎᒪᔩᑦ ᓯᕗᓪᓕᒃᑯᑦ−ᐱᒻᒪᕆᐅᔪᖅ ᓯᓚᑦᑐᖅᓴᕐᕕᒃ ᐅᑭᐅᖅᑕᖅᑐᒧᑦ ᑲᑐᔾᔨᖃᑎᒌᑦ ᐃᓚᖃᖅᑐᑦ ᐊᑲᐅᓈᕐᓂᕐᒧᑦ ᐊᕙᑎᓕᕆᓂᕐᒧᑦ ᐱᕙᓪᓕᐊᓂᖅ ᐊᒻᒪᓗ ᐊᕙᑎᒧᑦ ᓴᐳᒻᒥᓂᕐᒧᑦ. ᓇᓂᔭᐅᓚᐅᖅᑐᖅ ᑲᓇᑕᒥ 1996-ᖑᑎᓪᓗᒍ ᐊᑐᕚᒃᑯᑦ ᓱᓕᓂᕋᕈᑎᒃᑯᑦ.
  • ᓄᓇᖃᖅᑳᖅᓯᒪᔪᑦ ᐃᓄᖏᑦ ᐅᑭᐅᖅᑕᖅᑐᒥ ᓇᓗᓇᐃᖅᑕᐅᓯᒪᔪᑦ ᐅᑭᐅᖅᑕᖅᑑᑉ ᑲᑎᒪᔨᖏᓐᓄᑦ ᐊᕐᕕᓂᓕᒃᑯᑦ ᐊᑐᖅᑕᐅᙱᓐᓇᖅᑐᑦ ᐃᓚᒋᔭᐅᔪᓄᑦ ᑲᑐᔾᔨᖃᑎᒌᖑᔪᓄᒃ (PPs). ᐱᖓᓱᑦ PPs−ᑯᑦ ᑲᓇᑕᒥ ᐅᖃᖅᑎᐅᔪᑦ ᐃᓚᖃᖅᑐᑦ ᐅᑭᐅᖅᑕᖅᑐᒥ ᐊᑕᐹᔅᑲ ᑲᑎᒪᔩᑦ, ᒡᕕᑦᓯᓐ ᑲᑎᒪᔩᑦ ᓯᓚᕐᔪᐊᒥ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓂᒃ.
  • ᒐᕙᒪᒃᑯᑦ ᑲᓇᑕᒥ ᖃᐃᖁᔨᓯᒪᔪᑦ ᒐᕙᒪᐅᔪᓂᒃ ᔫᑳᓐᒥᑦ, ᓄᓇᑦᑎᐊᒥᑦ ᐊᒻᒪᓗ ᓄᓇᕗᒻᒥᑦ ᐃᓚᒋᔭᐅᓗᑎᒃ ᐅᖃᖃᑎᒌᓪᓗᑎᒃ ᓄᓇᒋᔭᕐᒥᓂᙶᖅᑐᓂᒃ ᐅᑭᐅᖅᑕᖅᑐᒧᑦ ᑲᑎᒪᔨᖏᓐᓄᑦ ᑲᑎᒪᓂᕐᒧᑦ ᐊᒻᒪᓗ ᐅᑭᐅᖅᑕᖅᑐᒥ ᑲᑎᒪᓂᕐᒧᑦ ᐱᓕᕆᐊᔅᓴᓄᑦ. ᐊᖏᓂᖅᓴᑦᒃᑯᑦ, ᑯᐱᒃ, ᓂᐅᕙᓐᓛᓐ ᐊᒻᒪᓗ ᓛᐸᑐᐊ ᐊᒻᒪᓗ ᒫᓂᑑᐸ ᐃᓚᒋᔭᐅᕙᓪᓕᐊᔪᑦ ᑲᓇᑕᒧᑦ ᑖᔅᓱᒧᖓ ᐱᒻᒪᕆᐅᔪᒧᑦ ᓯᓚᕐᔪᐊᒥ ᑲᑎᒪᓂᕐᒧᑦ.

ᖃᓄᐃᓕᐅᖅᓯᒪᓂᑯᐃᑦ

ᖁᑦᑎᑦᑐᒥ ᐅᑭᐅᖅᑕᖅᑐᖅ ᓄᓇᒋᔭᐅᔪᖅ ᓇᓗᓇᐃᖅᓯᒪᓗᓂ ᖁᑦᑎᓐᓂᒃᑯᑦ−ᐃᓱᒪᒋᔭᐅᔪᑦ ᓯᓚᕐᔪᐊᒥ ᑲᑐᔾᔨᖃᑎᒌᖑᔪᓄᑦ ᐊᒻᒪᓗ ᖃᐅᔨᒪᔭᐅᓪᓗᓂ ᓴᙱᓂᒃᑯᑦ ᐱᕙᓪᓕᐊᔪᓂᒃ ᓯᓚᑦᑐᖅᓴᕐᕕᓄᑦ ᐃᑲᔪᖅᑐᑦ ᒐᕙᒪᓕᕆᓂᕐᒧᑦ ᐅᑭᐅᖅᑕᖅᑐᒥ. ᑕᒪᓐᓇ ᐃᓚᖃᖅᑐᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓂᒃ, ᑲᑎᑦᑎᕙᒃᓱᓂ ᐅᑭᐅᖅᑕᖅᑐᒥ ᒐᕙᒪᖏᓂᒃ,  ᓄᓇᖃᖅᑳᖅᓯᒪᔪᑦ ᐊᑐᖅᑕᐅᙱᓐᓇᖅᑐᓂᒃ ᐃᓚᒋᔭᐅᔪᓂᒃ ᐊᒻᒪᓗ ᐅᑭᐅᖅᑕᖅᑐᒥᐅᙱᑦᑐᓂᒃ ᖃᐅᔨᓴᖅᑎᓂᒃ ᑲᑎᒪᙱᑦᑐᒃᑯᑦ. ᐅᑭᐅᖅᑕᖅᑐᒥ ᑲᑎᒪᔩᑦ ᐃᓚᒋᔭᐅᖃᑕᐅᔪᑦ ᐊᓯᖏᓐᓄᑦ ᑲᑎᒪᔾᔪᑎᔅᓴᓂᒃ, ᐆᑦᑑᑎᒋᓗᒍ ᓯᓚᕐᔪᐊᒥ ᓄᓇᓖᑦ ᑲᑐᔾᔨᖃᑎᒌᖑᔪᓂᒃ (ᓯᓚᕐᔪᐊᒥ ᐅᒥᐊᕐᔪᐊᓕᕆᓂᕐᒧᑦ ᑲᑐᔾᔨᖃᑎᒌᖏᑦ), ᐊᒻᒪᓗ ᑲᑎᒪᓂᖅ ᐅᑭᐅᖅᑕᖅᑐᒥ ᑕᕆᐅᒥ ᓯᒡᔭᓯᑉᐸᒥ ᒐᕙᒪᖏᑦ (ᖃᐅᔨᒪᔭᐅᔪᒃᑯᑦ A5), ᐊᐅᓚᑎᑦᑎᔪᑦ ᐃᓱᒪᔅᓴᖅᓯᐅᕐᓂᕐᒧᑦ ᐃᓚᖃᖅᑐᓂᒃ ᐅᑭᐅᖅᑕᖅᑐᒥ ᐅᒥᐊᕐᔪᐊᓕᕆᓂᕐᒧᑦ ᐊᒻᒪᓗ ᐃᒪᓕᕆᓂᕐᒧᑦ. ᐊᒥᓲᕙᓪᓕᐊᖃᑕᐅᔪᑦ ᓯᓚᕐᔪᐊᒥ ᐊᖏᕈᑎᓂᒃ ᐊᑐᐃᓐᓇᐅᔪᑦ ᐱᕚᓪᓕᖁᓪᓗᒍ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖑᔪᓂᒃ ᐊᑲᐅᙱᓕᐅᕈᑕᐅᔪᓂᒃ ᐆᑦᑑᑎᒋᓗᒍ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑲᑐᔾᔨᖃᑎᒌᖑᔪᓂᒃ ᐊᒻᒪᓗ ᕿᓂᖅᑎᑦᑎᔨᓂᒃ. ᑲᓇᑕᐅᑉ ᒪᕐᕈᐃᓕᖓᔪᒃᑯᑦ ᐊᖏᕈᑎᒃᑯᑦ ᐃᓚᒌᖕᓂᖏᑦ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᒥᐅᙱᑦᑐᖅ ᒐᕙᒪᖏᑦ ᐊᑐᐃᓐᓇᐅᖃᑕᐅᔪᑦ ᐱᕚᓪᓕᖁᓪᓗᒋᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᑯᐊᐳᕆᓴᓐᑯᓐᓄᑦ.

ᖁᑦᑎᑦᑐᒥ ᐅᑭᐅᖅᑕᖅᑐᖅ ᐊᖏᔪᒃᑯᑦ ᐊᒃᓱᕈᓐᓇᒃᑰᖅᓯᒪᔪᑦ ᐃᓚᒋᓗᒋᑦ ᖃᓄᖅ ᓱᖏᐅᑎᓂᖅ ᐱᕙᓪᓕᐊᔪᓄᑦ ᓱᒃᑲᔪᒃᑯᑦ ᐊᕙᑎᐅᑉ ᐊᓯᙳᖅᐸᓪᓕᐊᓂᖓᓄᑦ ᐃᓄᒋᔭᐅᔪᓄᑦ, ᐃᓕᖅᑯᓯᕆᔭᐅᔪᓄᑦ, ᐆᒪᔪᓄᑦ ᐊᒻᒪᓗ ᓴᓇᓯᒪᔪᓄᑦ, ᐊᒻᒪᓗ ᐅᖃᐅᓯᕆᒋᐊᕐᓗᒋᑦ ᐊᕙᑎᓕᕆᓂᕐᒧᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒃᓱᕈᕐᓇᖅᑐᓂᒃ ᐃᓚᖃᖅᑐᓂᒃ ᐊᒥᓲᕙᓪᓕᐊᔪᓂᒃ ᐱᔭᐅᔪᒪᔪᓄᑦ ᐊᒻᒪᓗ ᐱᕙᓪᓕᐊᔪᓂᒃ ᐅᑭᐅᖅᑕᖅᑐᒥ.

ᐊᒥᓲᖃᑕᐅᔪᑦ ᐃᓗᐊᓈᕈᑎᔅᓴᐅᔪᓂᒃ ᐱᕙᓪᓕᐊᓯᒪᔪᑦ ᐅᑭᐅᖅᑕᖅᑑᑉ ᓄᓇᖓᓂ ᐃᓚᒋᓗᒋᑦ ᐱᕙᓪᓕᐊᓗᓂ ᓄᑖᓂᒃ ᐃᓗᐊᓈᕈᑎᔅᓴᓂᒃ ᐊᑲᐅᓈᕐᓂᕐᒧᑦ ᐊᕙᑎᓕᕆᓂᕐᒧᑦ ᑮᓇᐅᔭᓕᐅᕐᓂᕆᔭᐅᕙᒃᑐᓂᒃ ᐱᕙᓪᓕᐊᓂᕐᒧᑦ, ᐅᖃᖃᑎᒌᖕᓂᖅ ᓯᓚᕐᔪᐊᒥ ᓄᓇᒋᔭᐅᔪᑦ ᓴᙱᓕᕙᓪᓕᐊᓗᒍ ᐱᓕᕆᐊᔅᓴᐃᑦ ᓯᓚᕐᔪᐊᒥ ᓯᓚᑦᑐᖅᓴᕐᕕᖏᓐᓂᒃ ᐋᖅᑭᒃᓯᒪᔪᓂᒃ ᒐᕙᒪᓕᕆᓂᕐᒧᑦ ᐅᑭᐅᖅᑕᖅᑐᒧᑦ, ᐱᓕᕆᖃᑎᖃᕐᓗᓂ ᓯᓚᕐᔪᐊᒥ ᐃᑲᔪᖅᑎᒌᒃᑐᓂᒃ ᐊᒻᒪᓗ ᑲᑐᔾᔨᖃᑎᒌᒃᑐᓂᒃ ᐃᑲᔪᖅᑎᒌᓪᓗᑎᒃ ᑐᑭᓯᐊᔾᔪᑎᔅᓴᐅᔪᓂᒃ ᐊᑲᐅᓈᖅᑐᒃᑯᑦ, ᐊᒻᒪᓗ ᐱᕚᓪᓕᕐᓗᒍ ᐅᔾᔨᕈᓱᓪᓗᑕ ᖃᐅᔨᒪᔭᕆᐊᖃᖅᑕᑦᑎᓐᓂᒃ ᐅᑭᐅᖅᑕᖅᑐᒥ. ᐱᖃᖅᐸᓪᓕᐊᔪᖃᖅᑐᑦ ᐱᔭᐅᔪᒪᔪᓄᑦ ᕿᒥᕐᕈᐊᕐᓂᕐᒧᑦ ᓂᕈᐊᖅᑕᐅᔪᓐᓇᖅᑐᔅᓴᓂᒃ ᐱᕚᓪᓕᖁᓪᓗᒍ ᐊᐅᓚᓂᖓᓄᑦ ᐅᑭᐅᑕᖅᑐᒥ ᓄᓇᖃᖅᑳᖅᓯᒪᔪᑦ ᐃᓄᖏᓐᓄᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ.

ᓯᓚᕐᔪᐊᒥ ᐃᓱᒪᒋᔭᐅᓂᒃᑯᑦ ᑲᔪᓯᔪᖅ ᐊᐅᓚᓗᓂ ᑐᓄᕕᐊᓄᑦ ᒪᑐᐃᖓᓂᖓᓄᑦ ᐃᑳᕈᓐᓇᕐᓂᖓᓄᑦ ᐊᑐᐃᓐᓇᐅᔪᓐᓇᖅᑐᓂᒃ ᐊᒻᒪᓗ ᐃᖏᕐᕋᔾᔪᑕᐅᔪᓐᓇᕐᓂᖓᓄᑦ ᐃᒪᖏᑦ, ᑲᓇᑕᐅᑉ ᐅᑭᐅᖅᑕᖅᑐᖓ ᐊᑐᐃᓐᓇᖅᓯᓐᓇᕆᐊᓕᒃ ᐊᖏᔪᒃᑯᑦ ᓯᓚᕐᔪᐊᒥ ᐊᐅᓚᓂᕐᒧᑦ ᐃᑲᔪᖅᑎᒌᖑᔪᒃᑯᑦ−ᐊᐅᓚᓂᕐᒧᑦ ᐋᖅᑭᒃᓯᒪᔪᑎᒍᑦ, ᐃᒻᒥᒃᑯᑦ ᒐᕙᒪᓕᕆᓂᕐᒧᑦ ᐊᖏᕈᑎᓂᒃ ᐊᒻᒪᓗ ᓯᓚᕐᔪᐊᒥ-ᓯᕗᓪᓕᐅᓂᖅ ᐊᐅᓚᑦᑎᔨᐅᓂᕐᒧᑦ ᒐᕙᒪᓕᕆᓂᖅ ᑲᓇᑕᒥ ᒐᕙᒪᒃᑯᖏᑦ ᓴᖅᑭᑎᓯᒪᔭᖏᓐᓂᒃ ᑕᑯᒋᐊᒃᑲᓐᓂᖁᓪᓗᒋᑦ ᑮᓇᐅᔭᓕᐅᕐᓂᕆᔭᐅᕙᒃᑐᓂᒃ ᐊᒻᒪᓗ ᐊᑐᐃᓐᓇᐅᔪᔅᓴᐅᔪᓂᒃ ᐱᕙᓪᓕᐊᓂᕐᒧᑦ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᐅᖅᓯᒪᓂᖏᑦ

  • ᐃᑲᔪᕐᓂᖅ ᓯᓚᕐᔪᐊᒥ ᐱᓕᕆᓂᖅ ᑐᓴᖅᑕᐅᖁᓗᒋᑦ ᐃᓅᖃᑎᒌᖕᓂᒃᑯᑦ ᐊᒻᒪᓗ ᐃᓕᖅᑯᓯᕆᔭᐅᔪᒃᑯᑦ ᐃᓱᒫᓘᑎᒋᔭᐅᔪᓂᒃ ᐊᒻᒪᓗ ᐱᕙᓪᓕᐊᓗᓂ ᐃᓗᐊᓈᕈᑎᔅᓴᓂᒃ ᐃᓕᓐᓂᐊᕐᕕᒋᖃᑎᒌᖕᓂᒃᑯᑦ (ᐆᑦᑑᑎᒋᓗᒍ ᑎᒍᓯᓂᖅ ᓯᓚᕐᔪᐊᒥ ᑲᑐᔾᔨᖃᑎᒌᖑᔪᓂᒃ ᐱᕙᓪᓕᐊᓗᓂ ᐊᒻᒪᓗ ᐱᓯᒪᑦᑎᒋᐊᕐᓗᓂ ᐃᓕᖅᑯᓯᕆᔭᐅᔪᓂᒃ ᐊᔾᔨᒌᙱᑦᑐᓂᒃ ᐃᓅᓯᕆᔭᐅᔪᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᓂᒃ ᐊᔾᔨᒌᙱᑦᑐᓂᒃ ᐅᖃᐅᓯᖏᑎᒍᑦ ᐊᒻᒪᓗ ᐱᕚᓪᓕᕐᓗᒍ ᐃᓕᓐᓂᐊᕐᓂᖅ, ᐋᓐᓂᐊᖅᑕᐃᓕᒪᓂᖅ ᐊᒻᒪᓗ ᐃᓅᑎᐊᕋᓱᐊᕐᓂᕐᒧᑦ ᐱᕚᓪᓕᖁᓪᓗᒋᑦ ᐅᑭᐅᖅᑕᖅᑐᒥ ᓄᓇᖃᖅᑐᓄᑦ)
  • ᐃᑲᔪᕐᓂᖅ ᓯᓚᕐᔪᐊᒥ ᐱᕚᓪᓕᕐᓂᕐᒧᑦ ᐱᕙᓪᓕᐊᔪᓂᒃ ᐊᖏᔪᒃᑯᑦ, ᐊᑲᐅᓈᖅᑐᒃᑯᑦ ᐊᒻᒪᓗ ᐱᔪᒪᔪᓄᑦ ᑮᓇᐅᔭᓕᐅᕐᓂᕆᔭᐅᔪᓂᒃ ᐅᑭᐅᖅᑕᖅᑐᒥ (ᐆᑦᑑᑎᒋᓗᒍ ᓴᙱᓕᕙᓪᓕᐊᓂᖅ ᐊᓯᖏᓐᓂ ᓄᓇᖃᖅᑐᓂᒃ ᑕᐅᓰᖃᑦᑕᕐᓂᖅ ᐊᒻᒪᓗ ᑮᓇᐅᔾᔭᒃᓴᒐᓱᐊᕐᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ; ᐱᒋᐊᒃᑲᓐᓂᕐᓗᒍ ᖁᑦᑎᑦᑐᒃᑯᑦ−ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐊᒻᒪᓗ ᐱᕙᓪᓕᐊᓗᓂ ᑲᑐᔾᔨᖃᑎᒌᖑᔪᓂᒃ; ᓴᓇᕝᕕᖃᕐᓗᓂ ᐱᕙᓪᓕᐊᔾᔪᑕᐅᔪᓄᑦ ᓄᓇᒋᔭᐅᔪᓂᑦ ᓴᓇᕝᕕᓂᒃ; ᐊᒻᒪᓗ ᓇᓗᓇᐃᕐᓗᒋᑦ ᐊᑦᑕᕐᓇᑕᐃᓕᒪᓂᕐᒧᑦ ᐊᒻᒪᓗ ᐊᑲᐅᓈᖅᑐᒃᑯᑦ ᐊᕙᑎᓕᕆᓂᕐᒧᑦ ᐅᑭᐅᖅᑕᖅᑐᒥ ᐅᒥᐊᕐᔪᐊᓕᕆᓂᕐᒧᑦ ᒥᑭᓪᓕᕆᐊᕐᓗᒋᑦ ᐊᕙᑎᒥ ᐱᕙᓪᓕᐊᔪᓂᒃ)
  • ᐱᖃᐃᓕᓴᐃᓐᓇᕐᓗᓂ ᓯᓚᕐᔪᐊᒥ ᐊᐅᓚᓂᕆᓕᕆᓂᕐᒧᑦ ᐊᐅᓚᓂᖅ ᐊᕙᑎᒧᑦ ᐊᒻᒪᓗ ᐃᒪᒧᑦ ᐅᑭᐅᖅᑕᖅᑐᒥ ᐊᕙᑎᒋᔭᐅᔪᓂᒃ (ᐆᑦᑑᑎᒋᓗᒋᑦ ᐊᐅᓚᑦᑎᓂᖅ ᓯᓚᕐᔪᐊᒥ ᐱᕚᓪᓕᕐᓂᕐᒧᑦ ᒥᑭᓪᓕᕆᐊᕐᓗᒋᑦ ᓯᓚᒧᐊᖅᑕᐅᖃᑦᑕᖅᑐᓂᒃ ᐱᕈᕐᓯᕕᖕᓂᙶᖅᑐᓂᒃ ᐅᖅᓱᓂᒃ ᐊᒻᒪᓗ ᐊᑯᓂᐅᙱᑦᑐᒃᑯᑦ ᐆᒪᔪᓂᒃ ᓱᕈᕐᓇᖅᑐᓂᒃ; ᐃᑲᔪᖅᑎᒌᖕᓂᖅ ᓯᓚᕐᔪᐊᒧᑦ ᐱᕚᓪᓕᕐᓂᕐᒧᑦ ᐃᑲᔪᕐᓗᒋᑦ ᐅᑭᐅᖅᑕᖅᑐᒥ ᓄᓇᓖᑦ ᓱᖏᐅᑎᒋᐊᕐᓂᕐᒧᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ; ᐃᑲᔪᕐᓗᓂ ᓯᓚᕐᔪᐊᒥ ᐱᕚᓪᓕᖁᓪᓗᒍ ᖃᐅᔨᓴᕐᓂᕐᒧᑦ, ᑐᓴᒐᔅᓴᙳᕐᓗᒋᑦ ᐊᒻᒪᓗ ᐱᑦᑕᐃᓕᒪᓗᓂ ᓱᕈᕐᓇᖅᑐᓂᒃ ᐊᑦᑕᕐᓇᖅᑐᓂᒃ ᐱᕙᓪᓕᐊᔪᓂᒃ ᐅᑭᐅᖅᑕᖅᑐᒥ ᐃᓄᖏᓐᓄᑦ; ᐱᕚᓪᓕᕐᓗᒍ ᓯᓚᕐᔪᐊᒥ ᑲᑐᔾᔨᖃᑎᒌᖑᔪᓂᒃ ᓇᓗᓇᐃᕆᐊᕐᓗᒍ ᐊᐅᓚᓂᕐᒧᑦ ᐅᕙᑎᒧᑦ ᐊᒻᒪᓗ ᐃᒪᒧᑦ ᐊᒻᒪᓗ ᐊᑲᐅᓈᖅᑐᒥᒃ ᐊᕙᑎᒥᒃ ᐊᑐᕐᓂᕐᒧᑦ ᐆᒪᔪᓄᑦ ᐅᑭᐅᖅᑕᖅᑐᓕᒫᒥ ᐆᒪᔪᓂᒃ, ᐃᓚᒋᓗᒍ ᑕᕆᐅᖅ)
  • ᓴᙱᓕᕙᓪᓕᐊᓗᖑ ᑲᓇᑕᐅᑉ ᖃᓄᐃᓐᓂᖏᓐᓄᑦ ᐅᑭᐅᖅᑕᖅᑐᒥ ᖃᐅᔨᒪᔭᖏᑎᒍᑦ ᐊᒻᒪᓗ ᐱᕚᓪᓕᕐᓗᒍ ᖁᑦᑎᑦᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑲᑐᔾᔨᖃᑎᒌᖑᔪᓂᒃ ᐊᒻᒪᓗ ᑐᑭᓯᐊᓂᖅ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᓄᓇᒋᔭᐅᔪᓂᑦ ᖃᐅᔨᒪᔭᐅᔪᓂᒃ ᐱᕚᓪᓕᖅᓯᒪᔪᒃᑯᑦ ᓱᓇᒃᑯᑖᓂᒃ ᖃᐅᔨᓴᕐᓂᒃᑯᑦ ᐊᑲᐅᓈᕐᓂᒃᑯᑦ
  • ᓇᓗᓇᐃᕆᐊᕐᓗᒋᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪᓗ ᒥᐊᓂᕆᔭᐅᓂᕐᒧᑦ ᑲᓇᑕᐅᑉ ᐊᒻᒪᓗ ᖁᑦᑎᑦᑐᒥ ᐅᑭᐅᖅᑕᖅᑐᒥ (ᐆᑦᑑᑎᒋᓗᒋᑦ ᓴᓇᕝᕕᒃ ᐱᖃᖅᑐᒥᒃ ᓄᓇᒋᔭᐅᔪᓂᑦ ᐊᒻᒪᓗ ᑲᓇᑕᒥ ᐱᒻᒪᕆᐅᔪᒃᑯᑦ ᐊᒻᒪᓗ ᓴᙱᓕᕙᓪᓕᐊᓗᒍ ᑲᓇᑕᒥ ᐊᒻᒪᓗ ᖁᑦᑎᑦᑐᒥ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪᓗ ᒥᐊᓂᕆᔭᐅᓂᕐᒧᑦ, ᐱᕚᓪᓕᕐᓗᒍ ᐅᓇᑕᖅᑐᒃᓴᐃᑦ ᐊᒻᒪᓗ ᑲᓇᑕᒥ ᓯᒡᔭᓯᑉᐸᒃᑯᑦ ᐅᒥᐊᕐᔪᐊᓕᕆᔩᑦ ᑕᐃᒪᐅᓂᖏᑦ ᐊᒻᒪᓗ ᐱᔪᓐᓇᐅᑎᖃᕐᓂᖅ ᐊᐅᓚᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ; ᐱᕙᓪᓕᐊᓗᓂ ᐃᑲᔪᖅᑎᒌᒃᑐᓂᒃ ᐱᓕᕆᐊᔅᓴᓂᒃ ᐅᑭᐅᖅᑕᖅᑐᒥ ᐅᒥᐊᕐᔪᐊᓕᕆᓂᕐᒧᑦ ᐊᒻᒪᓗ ᐃᑲᔪᖅᑎᒌᒃᑐᓄᑦ; ᐊᒻᒪᓗ, ᐱᕚᓪᓕᕐᓗᒍ ᑐᑭᓯᐊᔾᔪᑎᔅᓴᓂᒃ ᑐᓴᖅᑎᑦᑎᓂᒃᑯᑦ ᐊᒻᒪᓗ ᐅᔾᔨᕈᓱᖕᓂᕐᒧᑦ ᖃᓄᐃᓕᐅᖅᐸᓪᓕᐊᔪᓂᒃ ᐅᑭᐅᖅᑕᖅᑐᒥ ᓄᓇᖓᓐᓂ)
  • ᑐᑭᓯᓇᖅᑐᒃᑯᑦ ᓇᓗᓇᐃᕆᐊᕐᓗᒋᑦ ᓇᒥ ᑲᓇᑕ ᐱᓕᕆᐊᔅᓴᖃᕐᓂᐊᕐᓂᖏᑦ ᐊᖏᕈᑎᓕᐅᕐᓂᕆᔭᖏᓐᓂᒃ ᐅᑭᐅᖅᑕᖅᑐᒥ (ᐆᑦᑑᑎᒋᓗᒍ ᑲᓇᑕᐅᑉ ᑐᓂᓯᓯᓂᖏᑦ ᓯᓚᑖᓂᙶᖅᓯᒪᔪᓂᒃ ᑭᒡᓕᒋᔭᐅᔪᓂᒃ ᐃᓚᒋᐊᖅᑕᐅᓯᒪᔪᓂᒃ ᑭᒡᓕᒋᔭᐅᔪᓂᑦ, ᐋᖅᑮᒋᐊᕐᓂᖅ ᐱᐊᓂᒃᑕᐅᓯᒪᙱᑦᑐᓂᒃ ᐱᕙᓪᓕᐊᓯᒪᓂᐅᔪᒃᑯᑦ), ᐃᑲᔪᖅᑕᐅᔪᒃᑯᑦ ᓈᒻᒪᒃᑐᒃᑯᑦ ᐊᒻᒪᓗ ᓄᑖᙳᖅᑎᑕᐅᓯᒪᔪᓂᒃ ᓄᓇᙳᐊᓂᒃ ᑎᑎᖅᑐᒐᖅᓯᒪᔪᓂᒃ

ᐅᖃᖃᑎᒌᖕᓂᕐᒧᑦ ᐊᐱᖅᓲᑎ

  • ᓱᓇᐅᕙᑦ ᓄᓇᒋᔭᐅᔪᒧᑦ ᐱᔭᐅᔪᒪᕙᑦ ᐊᒻᒪᓗ ᓯᕗᓪᓕᐅᑎᑕᐅᔭᕆᐊᖃᖅᑐᓂᒃ ᒐᕙᒪᒃᑯᑦ ᑲᓇᑕᒥ ᐱᐊᓂᒃᑕᐅᔭᕆᐊᖃᖅᐸᑦ ᓯᓚᕐᔪᐊᒥ?
  • ᓱᓇᓂᒃ ᑕᑯᕕᑦ ᑕᒪᓐᓇ ᐊᒃᓱᕈᕐᓇᕐᓂᖓᓄᑦ ᐊᒻᒪᓗ ᐃᓗᐊᓈᕈᑎᔅᓴᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᓯᓚᕐᔪᐊᒥᙶᖅᑐᓂᒃ ᐊᒻᒪᓗ ᓴᐳᒻᒥᔾᔪᑎᔅᓴᓄᑦ ᐊᑐᐊᒐᓂᒃ ᐊᕙᑎᒧᑦ ᖁᓕᓂᑦ ᐅᑭᐅᖑᓂᐊᖅᑐᓂᒃ ᖃᐃᕙᓪᓕᐊᔪᓂᒃ?

ᖃᓄᖅ ᐃᓚᒋᔭᐅᔪᓐᓇᕐᓂᖅ

ᐱᖓᓱᐃᖅᓯᒪᔪᑎᒎᖅᓯᒪᔪᑦ ᐃᓚᒋᔭᐅᔪᓐᓇᕐᓂᕐᒧᑦ:

  1. ᑎᑎᕋᕐᓗᑎᒃ ᐅᕗᖓ:
    Arctic Policy Framework Secretariat
    15 rue Eddy, 14th floor
    Gatineau, Quebec K1A 0H4
  2. ᖃᕋᓴᐅᔭᒃᑯᑦ ᑐᕌᕐᕕᒃᑯᑦ: ArctiqueEnsemble-ArcticTogether@canada.ca.
  3. ᖃᕋᓴᐅᔭᒃᑯᑦ tweet ᐊᑐᕐᓗᒍ hashtag #ArcticTogether.

ᑲᑎᒪᓂᒃᑯᑦ ᐃᑲᔪᖅᑎᒌᒋᔭᑦᑎᓐᓄᑦ ᑲᑎᒪᔾᔪᑕᐅᓂᐊᖅᑐᑦ ᓄᓇᒋᔭᐅᔪᓂᑦ. ᐅᓪᓗᖏᑦ ᐊᒻᒪᓗ ᓇᒦᓐᓂᖏᑦ ᓇᓗᓇᐃᖅᑕᐅᓂᐊᖅᑐᑦ ᐃᓚᒋᔭᐅᓂᐊᖅᑐᓄᑦ.

ᖁᔭᓐᓇᒦᒃ ᐃᑲᔪᕈᓐᓇᕐᓂᕐᓄᑦ. ᐃᓚᒋᔭᐅᓂᐊᖅᑐᑦ ᐊᒻᒪᓗ ᐃᓱᒪᒋᔭᐅᓂᐊᖅᑐᑦ "ᑐᓴᖅᑕᑦᑎᓐᓂᒃ" ᑎᑎᕋᖅᓯᒪᔪᓂᒃ ᓇᓗᓇᐃᖅᑕᐅᓂᐊᖅᑐᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᑐᐊᒐᖏᓐᓂᒃ ᐋᖅᑭᒃᓯᒋᐊᕐᓂᕐᒧᑦ ᐱᓕᕆᐊᔅᓴᓄᑦ.

ᐃᓚᒋᔭᐅᔪᑦ ᖃᕋᓴᐅᔭᒃᑯᑦ

ᒐᕙᒪᓕᕆᔨᕐᔪᐊᒃᑯᑦ ᑲᓇᑕᒥ

ᓄᓇᓕᖕᓂ ᒐᕙᒪᐃᑦ

ᓄᓇᖃᖅᑐᓂᒃ ᒐᕙᒪᐃᑦ

ᑲᓇᑕᒥ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦ

ᓄᓇᖃᖅᑐᑦ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦ ᐊᑐᐃᓐᓇᐅᔪᓐᓇᖅᑐᑦ

ᐃᓚᒋᔭᐅᖏᓐᓇᕐᓂᐊᖅᑐᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᑲᓇᑕᒥ ᐃᓚᐅᔾᔪᑎᖃᕐᓂᒃᑯᑦ

ᓯᓚᕐᔪᐊᒥ ᐅᑭᐅᖅᑕᖅᑐᖅ

ᐅᓪᓗᖓᓂ ᐋᖅᑭᒋᐊᖅᑕᐅᔪᖅ:
sasasas