Nunaqaqqaaqhimayut inulrammiit qunngiaqtittiyut United Nations-kunnit
Piksaliuqti: GAC-PRMNY/Turnbull
Aallait Metis-nguyuq Kivgaqti Tracie Least taamnalu Inuit Inulrammiit Kivgaqtia Sarah Jancke katimapkaihimayut tunngahuktittiplutik.
Kanatami tamaat, Nunaqaqqaaqhimayut Inulrammiit hivuliqtuiyut nunaqyuami akihaqtuiyunik hilamik aallannguqpalliagami. April 2023-mi, Nunaqaqqaaqhimayut inulrammiit iniqnirillu aullaaqhimayut New York City-mut ilauplutik Kanatam kivgaqtiinut United Nations-kut Katimayiit Nunaqaqqaaqhimayut ihumaaluutainik (UNPFII). Ilauhimayut nakuuyunut unipkaaqtunik qauhittihimaplutik qanuq ihuaqhainahualiqtut hila aallannguqpalliayumi nunallaarmingnit.
Ayuiqpaalliqlutik hapkua hila aallannguqpalliayumi akimayut ilauvakkamiklu UNPFII-nut piksautinit ataani.
Iniqniuyuq Claudette Commanda qinngautiyumayuq pitquhiagut Algonquin Anishinaabe quviahuutinik qinngautinik uplaami katimavianit. Unipkaaqhimayuq aghuurnaqniinik ihumagittiariamik, katittaamiklu nakuuyunik havagiamik, ilittuqhaqpaghugulu ataatattianga William Commanda-m ilihimaliqtait talvani United Nations-nit.
Payel Laceese, Tsilhqot'in Ilitquhiinik Kivgaqtiuyut, pitquhiuyumik huqulahimayuq umiktiqhugu Kantam kivgaqtuqtait tunngahuktittiyut katimaviat.
Kanatam Nunaqaqqaaqhimayut inulrammiit hila aallannguqpalliayumi akimayut katitiqhimayut inugiaqtunik, taamnalu Ministauyuq Ukiuqtaqtumiut Ikayuqtiinit, Dan Vandal, taamnalu Lisa Koperqualuk, Angayuqqaaq ICC-kunnit Kanatamit.
Brian Pottle, Inuit Inulrammiit Kivgaqtia, aghuuqhaqpaktuqlu ilaupkaiyaamik Nunaqaqqaaqhimayut inulrammiqnik talvani Ukiuqtaqtumi ikpatimiittunik: "Ilaupluni UNPFII-mut ilittuqhitivaalliutauyuq Nunaqaqqaaqhimayunik Inungnik nunaqyuami tamaat, taimaalu katimayugut atauttimit inirumayaptingnit taimaa naatkutigiiktumik nakuatuqtuumiklu nunaqyuamik."
Havaangigut talvani Yukon-mi Hivulliit Nunaqaqqaaqhimayut Hila Aallannguqpalliayumi Ihuaqhainahuat Katimayiit, Jennifer Mieran unipkaaqhimayuq katiffaaqhutik tautugumayait: "Talvuuna atatarutikkut, atataffaaqtughauyut ihumaptingnik, timiptingnik, aniqniptingniklu. Utiqtittiffaaqtaghavut atatarutikput nunamut. Taimaa nuviqhaghugu katiffaaqhugit hapkua ilaita ayuiqpaalliqhugu qanuq inuuvaktugut, ayuiqhaqpaktugut havakpaktugullu."
Tracie Léost, Aallait Metis-nguyut Inulrammiit Kivgaqtia unipkaaqhimayaat inighaliuqniq tuhaqtauyaamik pilaarutainiklu tuhaqtittiyaamik ikayuriamiklu ihuaqhautinut. Unipkaaqhimayuq ilihimaliqtainik. "Unipkaaqtuqaqqat nutarauyumut uvamnut taimaa qakugu pihungniaqhimayutit talvunga UN-kunnut New York-mi ilipiruqhimaplunga qitauyaqhimaplungalu, naluyunga ukpiriniarupkit. Taimaa hinnaktuumannaqtuq ataatattiamnut Iniqnirinullu tautughimagamik inulrammiqnik inungnik pilaarutainik inighaqhiuriamik hivuliqtuiyaamiklu hivunighaptingnut."
Talvani Nunaqaqqaaqhimayut Inulrammiit Katimavianit, Sarah Jancke, Ighivautaliuqatauhimayuq Nunaqyuami Nunaqaqqaaqhimayut Inulrammiit Katimavianit, uqaqatigihimayaat Ministauyuq Vandal taamnalu Bob Rae, Kanatami Kivgaqtiuyuq United Nations-kunnut, ikayuqtiuyaamik Nunaqaqqaaqhimayut inulrammiit katimatjutainut: "Uvanga tautugumayatka inulramminit katimavalliayaamik tungaanut inulrammiit ilaupkaqtauyut, taimaalu nakuuyukkut inulrammiqnik ikayuqtuiniqmik. Ihumagiyauvaktunga taimaa "ayuittutut" inulrammiqtut 20-nguliqtunik ukiunik. Humunngaunnaqqita hivunighami nunaqyuami Nunaqaqqaaqhimayut pilaarutainut havaaghainut? Apirihimayunga ihuaqtunik ikayuutighaniklu inigharnik Nunaqaqqaaqhimayut Inungnut inulrammiqnullu. Havaghimmaarumayugut nunallaanit, ikayuqtiuplutik huli nunaqyuami havaaghat iniqtauyumit."
Aallait Metis-nguyuq Iniqniq Oliver Boulette uluarutingmik atuqtuuyaqpaktuq angmautaanit katimaviat qinngautiplunilu.
Inuinnaq Iniqniuyuq Piita Irniq unipkaaqhimayuq mihingnautainik hila aallannguqpalliagami Ukiuqtaqtumi, iharianaqniiniklu nunaqyuami nunallaarmiunik ihuaqtukkut nakuuyukkut ihuaqhaiyaamik.
- Ihuaqhiyauyuq ublua: