Nakatouhkaywak: Ooki Nakatouhkaywak sa atoushkaywin didawn Daw Li Nor tayhkway Winnipeg
Oweechihiwaywak neeshouhkanwak chi-pamihiwayhk Winnipeg sa Nakatouhkaywak.
Li portray kaw-meekihk ouschi Kevin Walker, Kishkinouhtahiwayw ouschi Opaminikayw.
Pamihiwaywin shaywaypichikan
Ooma achimoushtawkaywin daw li computer nakatouhtawtem peekishkwachikawtaywina aykwawnihin chikee naspachiwaypinam ishi amischikayw akouz ouschi peekishkwawtamoowin. Keeshpin kiya kimakouhikoun oohin ayimihiwaywina ouschi namataywak akwa nipahawak Indigene lee faem, lee fee pi 2SLGBTQI+ li moond pi kinatawayistaen shaymawnk peekwayihtamoowin weechihiwaywin, shaywaypichikay 1-844-413-6649. Kaw-kee-meena kawschitinaen kinwaysh-iyikouhk pamihiwaywina (Namou ihtakwan ishi aen Niskimoo la lawngaezh) tapishkoot la sarvel kakayeshkimaywin, alawntour-ouschiyawin peekwayihtamoowin pamihiwaywin pi kee-ishipimawchihounawniwun pamihiwaywina pi awtist ou wayaezh tipahikaywina chi-wawpamihchik lee Vyeu pi nanatawihiwaywak. Lee famee mambr kaw-natounahikik kishkayistamihiwaywin ouschi kaw-namatayw keema nipahawak oshawkahikana chikee kawschitinem Li famee Kishkayistamihiwaywin Itwayshtamawkayw Li’ofis (Namou ihtakwan ishi aen Niskimoo la lawngaezh).
Didawn Winnipeg, Manitoba, kischee atoushkaywuk si atoushkawtamwak chi-weechihawchik en grous vil sa 80,000 Indigene Li moond. Ooki atoushkaywuk shinihkawshhwak Nakatouhkaywak (Namou ihtakwan ishi aen Niskimoo la lawngaezh), pi kee- pishkawpastamwuk la reu ashpinay 1992.
Ooki atoushkaywuk mitouni kee-nishtawinikashouwak didawn 2015 apray nipahtakaywin ouschi Li Promyee Nawsyoon li zanee fee Tina Fontaine, kiko nookoushaystam li troub pawsci ayimanoowin ouschi namataywak akwa nipahawak Indigene lee faem, lee fee, Deu l'ispree, pi aen sort-nishtawaymikawaywin li moond didawn Kenadaw (Namou ihtakwan ishi aen Niskimoo la lawngaezh).
Wawpasta oohin li portray awn baw chi-kishkayistamaen ayiwawk ouschi aenportaan atoushkaywin aykwanwima Nakatouhkaywak ahkamay itoutamwak.
Li Portray’d wawpastahiwaywin
Ooki Nakatouhkaywak machistowak didawn Daw Li Nor tayhkway, akouz oota alawntour outiskawiskum muwnayshkawkaywina di kitimakishiwin, wawhky ashpinaywin, mamitonayihchikan la sawntee li troub, pi nama nawnduw weekiwin. Ooma alawntour itayistam ay-natawayistakwahk wiyawow ikouhk natamoushtawkaywin la fors avek li polis l'ofisyee chi-kenawaymihchik pi chi-paminamiwawt 80,000 Indigene alawntour li mambr.
Ooki Nakatouhkaywak mawchistowak ishpee 1992 pi anoush ayawaywak pawsci 250 oweechihiwaywak aykwawniki papamoustaywak daw la vil saenk en zhournee payyek par smenn chi-pishikayistahkik Winnipeg. Awta namou tahkounamwak pawskishikana, nakatouhkaywak kischee li shmaen aen pchi shmaen daryayr pi oota alawntour chi-pishikawpastahkik, natouhtahkik, pi weechihiwaywak ishpee pi tawnshpee kaw-natawayistakwahk.
"Niatoushkaywinawn oota daw alawntour si aykwawnima chi-miyoumaykihk ikouhk mayipayiwin weechihiwaywin, chi-weechihiwayweeyahk akouta machee-itahkamikunoowin avek miyeu-itoutaymakunouwina meena chi-meekaniwik ishi li moond kaykwuy kahkiyow awiyek kaw-natawayistahk—shakihiwaywin.
Ninakishkawawnanik li moond akout kaw-ayawchik pi ishpee kaw-natawayimikawiyahk."
- Kevin Walker, Nakatouhkayw Nakatoohkataywina Opaminikayw
Ooki Nakatouhkaywak sa atoushkaywina ouschi oweechihiwaywak ouhpikiwun shawpou mamaawinitowin awpacihchikana, weestamakaywin pi onatamawkaywina. Mischayt l’ikol peeshkaytashtaywina, akout kaw-mamawiweekiwak pi mishawa mamowwiitoowina kee-takoowak keema weechihiwaywak avek meekaweewina pi awpaschischikana.
kaw-wawpamischik Nakatouhkaywak daw li shmaen nawachiko Winnipeg zhi taen zhawnd chi-payahtik awtishiw. See bitaen meena Indigene li moond kishchaymoow.
"Tou lee zawn, niweechihiwaywinawn chi-nakinama mayinikeewina pi machee-itahkamikishouwina, avek itapahtamoowin ishi miyoukiyawmashtaywin pi kee-ishipimawchihounawniwun natamoushkawkaywin. Mawka, niki mashkuwsheehtawnawn niweechiwakanouhtoowin avek Winnipeg Li Polis Pamihiwaywin, atoushkatem ishi itwayshtamawkayw ouschi daw alawntour ishi kaw-namataywak en parson li’ofis. Ooma wawpaschikaywin aykwawina 75% iyikouhk kashkihouwin chi-mishkahk li moond.
Ninakatouhkaynanak aykwanwihi li moond ouschi daw alawntour, poor alawntour, pi akouta ayowak chi-peetoushipayistahk."
- Kevin Walker, Nakatouhkayw Nakatoohkataywina Opaminikayw
"Ishi Indigene niwahkoumakaninanik, niyanawn nanatawihiwaywak, kanawayischikaywak ouschi daw alawntour pi la michin tahkounikaywak. Trustab niyanawn akouz nipishkayistaynawn pi rispay niwahkoumakaninanik, nikashkistawnawn chi-ashaynamahk ishpayiwina pi nikashkishtamashhoonawn rispay, kaw-nakishkawayahkik li moond aka kaw-atawmimiwayhkik en manyaer."
- Kevin Walker, Nakatouhkayw Nakatoohkataywina Opaminikayw
Kiyawm ishikeeshikawin, ooki Nakatouhkaywak si tapitow weechihiwaywak. Meekiwak kishaywaatishiwin atamishkawtiwin, li mawzhee, diloo, keema weechihiwaywin. Ashpinae 1992, ooki Nakatouhkaywak kee-ouhpikin chi-kaykinihchik kootakak nakatouhkaywak didawn Brandon, Portage la Prairie, Selkirk pi Opaskwayak awn Cree Nawsyoon didawn The Pas. Itayistamwak meena chi-mishawpayichik ishi Thompson, Manitoba.
- Keestwawm mowatakwashtaywin: