ᐅᖃᐅᓯᒃᓴᖅ ᐱᓯᒪᔪᖅ ᒥᓂᔅᑕᓂᒃ ᑭᐅᕋᓕᓐ ᕙᓇᑦ (Carolyn Bennett), ᒫᒃ ᒥᓗ (Marc Miller) ᐊᒻᒪᓗ ᑖᓂᐊᓕ ᕙᓐᑖᓪ (Daniel Vandal) ᓄᓇᖃᖅᑳᖅᓯᒪᔪᐃᑦ ᐅᓪᓗᖓᓂ

ᐋᑐᕚ, ᐋᓐᑎᐅᕆᐅO (ᔫᓂ 21, 2020) – ᓂᕈᐊᖅᑕᐅᒪᔪᖅ ᑭᐅᕋᓚᓐ ᕙᓇᑦ (Carolyn Bennett), ᒥᓂᔅᑕ ᒐᕙᒪᑐᖃᒃᑯᑦ-ᓄᓇᖃᖅᑳᖅᓯᒪᔪᑦ ᐱᓂᐊᕐᓂᖏᓐᓄᑦ; ᓂᕈᐊᖅᑕᐅᒪᔪᖅ ᒫᒃ ᒥᓗ (Marc Miller), ᒥᓂᔅᑕ ᓄᓇᖃᖅᑳᖅᓯᒪᔪᑦ ᐱᔨᒃᓯᖅᑕᐅᓂᖏᓐᓄᑦ; ᐊᒻᒪᓗ ᓂᕈᐊᖅᑕᐅᒪᔪᖅ ᑖᓂᐊᓕ ᕙᓐᑖᓪ (Daniel Vandal), ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐅᖃᐅᓯᒃᓴᕐᒥᒃ ᓴᖅᑮᔪᑦ ᑕᒪᑐᒥᖓ ᒪᓕᒃᑐᒥᒃ ᓄᓇᖃᖅᑳᖅᓯᒪᔪᐃᑦ ᐅᓪᓗᖓᓂ ᐅᓪᓗᒥ:

"ᐅᒡᓗᒥ, ᓄᓇᖃᖅᑳᖅᓯᒪᔪᐃᑦ ᐅᒡᓗᖓᓂ, ᖁᕕᐊᓲᑎᖃᖅᑯᒍᑦ ᐊᒡᔨᐅᙱᒃᑐᒥᒃ ᐊᑐᖃᑦᑕᖅᑐᖃᕆᓯᒪᔭᖏᑦ, ᐃᓕᖅᑯᓯᑐᖃᖏᑦ ᐱᐅᓯᑐᖃᖏᓪᓗ ᐊᒡᓚᐃᑦ, ᐃᓄᐃᑦ ᐊᒻᒪᓗ ᐊᒡᓚᖓᔪᐃᑦ ᓄᓇᓕᖏᓪᓗ. ᓄᓇᓕᕐᔪᐊᕗᑦ ᐋᖅᑭᒃᑕᐅᕙᓪᓕᐊᓯᒪᔪᖅ, ᑲᔪᓰᖕᓇᕐᓂᐊᖅᑐᓂᓗ, ᐋᖅᑭᐸᓪᓕᐊᓗᓂ ᖃᐅᔨᒪᔭᑐᖃᖏᓐᓄᑦ, ᐱᔪᓐᓇᕐᓂᖏᓐᓄᑦ, ᐊᖕᓇᐅᒪᒍᓐᓇᕐᓂᖏᓐᓄᑦ ᓯᕗᓕᖅᐸᖕᓂᖏᓐᓄᓪᓗ.

ᐊᑐᖅᑕᐅᖃᒃᑕᕋᓗᐊᕐᒪᑦ, ᑲᑎᖃᑎᒌᖃᒃᑕᕐᓂᖅ ᓇᔫᑎᓂᒃᑯᑦ ᓄᓇᓕᓕᒫᓂ ᑲᓇᑕᒥ ᖁᕕᐊᓲᑎᒋᓪᓗᒋᑦ ᐊᒡᓚᐃᑦ, ᐃᓄᐃᑦ ᐊᒡᓚᖓᔪᐃᓪᓗ ᐃᓕᖅᑯᓯᖏᑦ. ᐊᑐᖅᑎᓪᓗᑕ ᓄᕙᒡᔪᐊᕐᓇᖅ-19 ᐊᒡᔨᐅᙱᑦᑐᒥᒃ ᖁᕕᐊᓲᑎᖃᕐᓂᐅᓂᐊᕐᒪᑦ 2020ᒥ ᐊᒡᔨᒋᙱᑕᖓᓂᒃ ᐊᑐᖅᑕᐅᖃᑦᑕᖅᓯᒪᔪᑦ ᐊᓂᒍᖅᑐᓂ ᐊᕐᕌᒍᕐᓂᒃ, ᑕᐃᒪᐃᒐᓗᐊᖅᑎᓪᓗᒍ ᐃᓕᒃᐸᓪᓕᐊᒍᖕᓇᖅᑐᒍᑦ ᐅᓂᒃᑳᖅᑕᐅᔪᑎᒍᑦ, ᑕᐅᖅᓰᖃᑎᒌᓪᓗᑕᓗ ᐃᓕᖅᑯᓯᑐᖃᑦᑎᓐᓂᒃ ᓄᑖᓂᒃ ᐊᑐᕐᓗᑕ ᑲᑎᓯᒪᒍᖕᓇᖁᓪᓗᑕ ᑲᓲᒪᖃᑎᒌᓪᓗᑕᓗ, ᓇᔫᑎᖃᑎᒌᙱᒃᑲᓗᐊᕐᓗᑕ.

ᓄᓇᖃᖅᑳᖅᓯᒪᔪᑦ ᐅᒡᓗᖓ ᑕᒪᒃᑮᒍᑦ ᐃᓕᑕᖅᓯᓂᐅᔪᖅ ᓄᓇᖃᖅᑳᖅᓯᒪᔪᐃᑦ ᐃᓕᖅᑯᓯᑐᖃᖏᓐᓂᒃ ᓇᓗᓇᐃᒃᑯᑕᐅᒋᓪᓗᓂ ᐊᓐᓇᐅᒪᒍᓐᓇᕐᓂᖏᑦᑕᓗ ᓄᓇᖃᖅᑳᖅᓯᒪᔪᐃᑦ. ᐊᒥᓱᒻᒪᕆᓐᓂᒃ ᓄᓇᖃᖅᑳᖅᓯᒪᙱᑦᑐᑦ ᐃᓕᓐᓂᐊᕈᑎᖃᕈᓐᓇᖅᑐᑦ ᐊᑑᑎᖃᖅᑕᖅᓯᒪᔭᐃᓐᓇᑦᑎᓐᓂ, ᑐᑭᓯᒋᐊᒃᑲᓐᓂᕈᓐᓇᒻᒪᕆᑦᓱᑎᓪᓗ ᓄᓇᖃᖅᑳᖅᓯᒪᔪᐃᑦ ᖃᐅᔨᒪᔭᑐᖃᖏᓐᓂᒃ, ᐱᓐᓇᕆᔭᖏᓐᓂᒃ ᐊᒻᒪᓗ ᐃᓕᓐᓂᐊᑎᑦᓯᒍᑎᒋᒍᓐᓇᖅᑕᖏᓐᓂᒃ, ᖁᕕᐊᓲᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᐃᑦ ᓄᓇᓕᖏᓐᓂᒃ ᓯᔾᔭᑎᓐᓂ ᓯᔾᔭᑎᓐᓄᑦ ᓯᔾᔨᓕᒫᑦᑎᓐᓄᑦ.

ᓄᓇᖃᖅᑳᖅᓯᒪᔪᑦ ᐃᑭᐊᖓᓃᑦᑐᑦ, ᑐᙵᕕᒡᓚᕆᐅᒡᓗᑎᑦ, ᑲᓇᑕᒥ ᐅᒡᓗᒥᐅᔪᖅ. ᑲᔪᓯᕙᒡᓕᐊᖏᖕᓇᖅᑐᒍᑦ ᐱᓕᕆᖃᑎᒌᖕᓂᒃᑯᑦ ᐋᖅᑭᒋᐊᖅᐸᒡᓕᐊᓪᓗᑎᒍᑦ ᐱᓂᐊᕐᓂᖃᑎᒌᖕᓂᕗᑦ ᓄᓇᖃᖅᑳᖅᓯᒪᔪᓂᒃ ᐱᒡᔪᑕᐅᓪᓗᑎᑦ ᐊᖏᕈᑕᐅᓯᒪᔪᑦ ᐱᔪᖕᓇᐅᑏᑦ, ᐱᑦᓯᐊᖃᑎᒌᖕᓂᖅ, ᐊᑐᒃᓯᐊᖃᑎᑎᒌᖕᓂᖅ ᐱᓕᕆᖃᑎᒌᖕᓂᕐᓗ, ᐃᑲᔪᖅᑐᖅᑕᐅᒋᐊᖅᑎᒡᓗᒋᑦ ᓄᓇᖃᖅᑳᖅᓯᒪᔪᑦ ᑕᑯᖕᓇᙳᐊᖅᓯᒪᔭᖏᓐᓂᒃ ᓇᒻᒥᓂᖅᓱᕈᒪᓂᕐᒥ.

ᑭᒡᒐᖅᑐᐃᒡᓗᑕ ᒐᕙᒪᑐᖃᒃᑯᖏᖕᓂᒃ ᑲᓇᑕᐅᑉ, ᑲᔪᖏᖅᑐᐃᒋᐊᖅᐳᒍᑦ ᐃᓕᒋᐊᒃᑲᖕᓂᖁᒡᓗᓯ ᐊᑑᑎᖃᒃᑕᖅᓯᒪᔭᑐᖃᖏᖕᓂᒃ, ᐱᐅᓯᑐᖃᖏᖕᓂᒃ ᐃᓕᖅᑯᓯᑐᖃᖏᖕᓂᒡᓗ ᓄᓇᖃᖅᑳᖅᓯᒪᔪᐃᑦ ᐅᒡᓗᒥ, ᖃᐅᑕᒫᕐᓗ.

ᖁᕕᐊᓱᖁᔨᕗᒍᑦ ᓄᓇᖃᖅᑳᖅᓯᒪᔪᐃᑦ ᐅᒡᓗᖓᓂᒃ!"